يقوم "عبد القادر" من محل قاعد، والقعده هى ذاتا نان قعدة شنو فى طرف العنقريب "أو كأن ريح الكون كله، برفقة الجحيم تحته"
يقوم "ابو عبده" وهو يتمايل يمين شمال، ومره لى فوق ومره لى تحت ومعاها لفته كمان
ومن محل قاعد لحدى ما يصل محل الرقيص عشان يلفح ليهو شبال شبالين يكون المغنى وصل، هو ذاتو "الجاغريو" ده زول بتاع مشاكل، براهو يهابش فى عبد القادر ويحرش فيهو "يا ابو عبده وين أحبابنا"
يواصل عبد القادر مسيرته الخدرا المبللة بالطرب، والغناى هناك يسوى
فارقنى دون اسباب اسألوهو يا احباب عن شنو عن شنو
عن إخلاصى ليهو
ومسموح ل "عبد القادر" بناءأ على فرمان "جاغريوى" خاص إنه يلخبط ترتيب "الهزه" و "التِبِشِر" يعنى وزى ما فى "فرائض" "الهزه" مفروض الزول، وبعد ما يعدل الطاقية "كذا تشنيقه يعنى" يقوم من محله ويدى الفنان غشوه فى الأول، وممكن يدى كمان الكورس "غِشيوه" وبعد داك يدخل لى ساحة الرقيص ويقالع الشبابيل أو الشبالات، ايهما أصح
أهم شى بس الواحد ما "يعتر" فى طرف السباتة أو برش الرقيص، لأنه بكون "مِفندر" واكتر الناس حرصا بكونو "المدققين" عشان الجماعة ما يضحكو عليهم بعدين
المهم ومما الفنان يصل لى "عن إخلاصى ليهو" دى
"عبد القادر" الساعة ديك بكون وصل ذروة الجنون "القيسى"
شى تدردق وشى نط وشى طلوع فوق الحِيّط وشى تتلب
وفى الجيهة التانية من ليل العشاق
اضنانك تسمع
يا "ليلى" ليلك جنّ معشوقك نوح وأنّ
ومافى فاصل بين "الليلين" أو بين "الليلتين" غير خيط رفيع أوهن شويه من خيط العنكبوت، واغلد شويتين من من خيط "عراوى" الترزية لكن يذوب العشاق والخيط واحد ويجن المرهفون والليل واحد
طيب
الجن بداوى، كعبه الإندراوه
ويا حليلكن يا ناس ، "الجاغريو" هدا جاكن البحر فيضانو عمل العمايل وسوى الهوايل
السنة ستة واربعين دربك قسا وطال لينا بس تقول درب الاربعين يا الجاهله فوقك الصالحين
وفى عز الدميره، صدح شادى الليل وسيدو وقريب من خشم المويه، تبدا الرميه على شرف الحبيب الزائر
و"تقابة الخلوة شاقه الضُلمه وباقا والحيران يرتلون آيات ما بعد صلاة العشاء
و"قيس" فى فلواته يحنس فى "الصيد" ويتفكر فى عويناتن قال شنو، عشان بشبهن عينين "ليلى"
ده ياهو الجن يا بلاش جِن راسو عديل مو طرطشه
والسبب فى كل الحالات، ياهن العوينات ذاتن محل ما تمش ووين ما تقبل
تعدد الجنون والسبب واحد
يكون يا ربى ياهو ذاته
الجنن عبد القادر ؟
محمد زين ود عمر، الوحيد النافس "قيس" على ميدالية الجنون الذهبية طفش بالخلا بى وشو وقعد ينوح وعلم خلق الله كلها النواح البودى القبر وفعلا مشى ليهو بى كرعيهو
والجاغريو سادر فى "تنويح" الناس وعبد القادر ما هاميهو كلام الناس
و"قيس" المسكين خلاص، منو العوض وعليهو العوض
ومحمد زين بقى ينشبك فى الماشى والجاى ويسأل من "أم عيسى"
وأم عيسى وين عاد تانى
عربك ختمو الفاو وشيلك نيق مو حجاو يا ام درعن راتع العلاو طعمك قونديل مو تمير جاو
اهلك رحلو ودرجو على مرضان ما عرجو يا بكيرة الاندرجو البكا للزول شن فرجو
والسبب كلو شنو؟
غايتو بس الله يجازى الكان السبب
Post: #2 Title: Re: الجنن عبد القادر Author: أبوذر بابكر Date: 04-21-2015, 07:00 AM Parent: #1
يا اللابسه عفافك حله لهجك للحنصل حل ودحمد يازعيم الحله من ريدو كيف ننحل شيخ ادريس قوم نتسل انا عقلى فارق وولى ريدي السببلنا عله يالصديق ياودفع الله يالسهمك لينا مبادر انا فكري نازل وسادر فى الجيل مثالك نادر
دا الجنن عبد القادر
فقدنا الصواب ياشبابنا يابوعبدة وين احبابنا
ده الجزء حق الجاغريو فى الأغنية وأحمد المصطفى عمله "كسرة" للأغنية
أغنية يا بنت النيل
اصلا الأغنية من تأليف الشاعر بشير عبد الرحمن ما اظنه معروف كتير للناس
ويقال انه أأحمد المصطفى كان بغنى فى نفس الأغنية ومن بين الحضور كان أحمد محمد الشيخ الشهير ب جاغريو
فى نفس الحفلة ألف الجاغريو الجزء المذكور
وكل الأسماء الواردة فى الجزء ده من اصدقاء واصحاب الجاغريو
أما عبد القادر فهو عبد القادر مضوى
يقال انه كان بعبر عن مدى طربه و هوشته وانفعاله بحاجات غريبة
والجاغريو ارجع سبب جن عبد القادر للأسباب الذكرها فى الأغنية
Post: #4 Title: Re: الجنن عبد القادر Author: أبوذر بابكر Date: 04-21-2015, 07:09 AM Parent: #2
Post: #20 Title: Re: الجنن عبد القادر Author: أبوذر بابكر Date: 04-22-2015, 01:59 PM Parent: #2
Post: #24 Title: Re: الجنن عبد القادر Author: أبوذر بابكر Date: 04-23-2015, 08:10 AM Parent: #20
معليش حصل خطأ فى وضع صورة المبدع
أحمد محمد الشيخ الجاغريو
Post: #3 Title: Re: الجنن عبد القادر Author: Adil Hassan Date: 04-21-2015, 07:09 AM Parent: #1
يا جميل يا رائع لوحة شعبية جميلة تخيلت معها القرية الكبيرة امدرمان زمان وهي تتزاحم فيها كل هذه الصور مجتمعة في وقت واحد من اقصى اليمين لأقصى اليمين ايضاً فكل جمال اهالينا كان يمينيا بجده وعبثه ومجونه فهم من غنوا وهم من تغزلوا وهم من مدحو ورتلو القرآن ترتيلا
مشكور ابو ذر على روعتك وعلى جمالك
Post: #6 Title: Re: الجنن عبد القادر Author: بله محمد الفاضل Date: 04-21-2015, 07:28 AM Parent: #3
مطر يا مطر
عقدتُ خيوطَ الكلامِ كأنها رقص عبد القادر يا صديق عقدتها بجنونِهِ الظاهر كعلاماتِ إعرابٍ تجلس بالكلامِ في محله المراد دون نقصٍ أو ازدياد
لحقتُ بكم في قراءتي الوثابة على سفرك البديع هذا يا مطر
سلمت، يسلم نضمك، يسلم شوفك المجنون
تحياتي، محبتي واحترامي
Post: #10 Title: Re: الجنن عبد القادر Author: أبوذر بابكر Date: 04-21-2015, 08:52 AM Parent: #6
يا بله يا بلال
ويا بلبل يا بليله
الجنون مرحلة سامية جدا وعصية إلا لذوى العقل
والجنون تحليق فى عوالم بعيدة ما بتتمسك بالليد ولا بتنشاف بالعين
تسلم انت ياخ
تتبارك وتطيب أيامك
Post: #7 Title: Re: الجنن عبد القادر Author: ياسر السر Date: 04-21-2015, 07:44 AM Parent: #3
كلام طاعم وحكي جميل من زول جميل ,, طبعا العم المرحوم عبد القادر مضوي و المرحوم العم احمد محمد الشيخ الجاغريو ده عالم تاني فما زلت اذكر حكاوي الوالد عنهم ووالدي رحمه الله من المعاصرين والمقربين للاثنان الجاغريو وعبد القادر مضوي فكم سرد لنا قصص ومواقف حصلت في مناسبات مختلفه سوى في العيلفون او خارجها عن هؤلاء الاباطرة ,, ويقال انو عمنا عبد القادر مضوي كان حينما يعتليه شيطان الطرب ياكل الكباية باسنانه كاكله لحلاوة لكوم على الرغم من انعدام المقارنه بين هاذي وتلك من ناحية المرونه والصلابة ,, على العموم سعدت كثيرا بهذا الحديث اخي الاستاذ ابا زر عن هاتين الشخصيتين الجميلتين وعن هذا الجيل من البشر الذي لن يتكرر ابدا ,, وتنويه بسيط لاخي عادل وهو ان عمنا وشاعرنا الجاغريو والعم عبد القادر مضوى لم يسكنا امدرمان بل سكنا وعاشا في العيلفون واغلب قصصهم وحكاويهم واشعار الجاغريو تمت في العيلفون والجيل القديم يعرف ذلك مع احترامي لامدرمان واهلها وقاطنيها وشعرائها وشخوصها الفنية البارزة ولك اخي عادل .. تخريمه : عن نفسي اعرف الجنن عبد القادر غايتو بس صعب يتقال يا ابا زر .. لك حبي وسلامي واحترامي ..
تحياتي : ياسر العيلفون
Post: #11 Title: Re: الجنن عبد القادر Author: أبوذر بابكر Date: 04-21-2015, 09:03 AM Parent: #7
ازيك يا ياسر
سعيدين والله بطتك
وجاى شايل معاك ريحة اهلنا فى العيلفون
تمام فعلا أنا برضو سمعت قصص شيقة جدا عن عبد القادر
والجاغريو فلتة من فلتات الزمن موهبة عالية وشاعرية فياضة
يكتب الشعر ويلحن ويغنى كمان
وزى ما قال الوالد رحمة الله عليه
انه كان فى سكن لأهل العيلفون فى الخرطوم فى منطقة الخرطوم تلاتة وتحديدا قريب من ميدان عبد المنعم زمان او نادى الأسرة تحديدا، وكان الجاغريو بتردد عليهم باستمرار
الوصف ده عبارة عن اجترار لقصة حفلة كانت فى ودراوة فى منتصف الأربعينات ايام الفيضان الشهير
وجات مجموعة من اهل العيلفون للمناسبة لأنها بتخص اهلهم ناس
التوم ود عبد الصادق
والتوم ده من سلالة الخليفة بركات الكبير ود شيخنا إدريس الأرباب
واهله واهلنا نحن موجودين حاليا فى ودراوة
من ضمن المعلومات الجميلة برضو انه فى نفس المناسبة كان موجود المبدع الخالد المرحوم خلف الله حمد
وكان لسه من ضمن مجموعة الجاغريو وبشيل مع الجاغريو لما يغنى ولسه ما كان بقى يغنى بمفرده قبل ما يمشى الإذاعة فى الخمسينات
وتحية وتقدير ليك يا ياسر
Post: #9 Title: Re: الجنن عبد القادر Author: أبوذر بابكر Date: 04-21-2015, 08:50 AM Parent: #3
عادل حسن
كيف الأحوال
وتنعدل عليك محل ما تقبل
المشاهد السمحة دى كانت موجودة لغاية زمن قريب
قبل ما تتغول احتفالات الصالات على عادات جميلة واصيلة
Post: #5 Title: Re: الجنن عبد القادر Author: Adil Hassan Date: 04-21-2015, 07:21 AM Parent: #1
Quote:
يا اللابسه عفافك حله لهجك للحنصل حل ودحمد يازعيم الحله من ريدو كيف ننحل شيخ ادريس قوم نتسل انا عقلى فارق وولى ريدي السببلنا عله يالصديق ياودفع الله يالسهمك لينا مبادر انا فكري نازل وسادر فى الجيل مثالك نادر
دا الجنن عبد القادر
فقدنا الصواب ياشبابنا يابوعبدة وين احبابنا
ما قلت كلها يمين شوف الكلام ده بالله واسرح معاهو طوالي تجيك مدحة حاج الماح التمساح سكن الشايقية
Post: #13 Title: Re: الجنن عبد القادر Author: أبوذر بابكر Date: 04-21-2015, 10:25 AM Parent: #5
يا رحمن ارحم بى جودك دلى الغيث ينزل فى بلودك
شئ لله يا اهل الدايره يا الفى الكون اسراركم سايره ارخو السر فى السحره الغايره خلو الدايره التصبح نايره
حاج الماحى المبدع
Post: #8 Title: Re: الجنن عبد القادر Author: Adil Hassan Date: 04-21-2015, 08:36 AM Parent: #1
ياسر السر شكراً يا جميل على التوضيح والكلام الرقيق ولكني لم اقصد بكلامي انهما عاشا في امدرمان بل ذكرت امدرمان ووصفتها بالقرية الكبيرة لعدم اختلافها في ذكرياتها عن قرى السودان الكبرى والصغرى قصدت بأن سرد اخونا ابو ذر الجميل كما صور ذكريات العليفون وام ضواً بان وغيرها صور ايضاً امدرمان متعك الله بالصحة والعافية
Post: #12 Title: Re: الجنن عبد القادر Author: عبد العزيز محمد عمر Date: 04-21-2015, 09:23 AM Parent: #8
Quote: يا اللابسه عفافك حله لهجك للحنصل حل ودحمد يازعيم الحله من ريدو كيف ننحل شيخ ادريس قوم نتسل انا عقلى فارق وولى ريدي السببلنا عله يالصديق ياودفع الله يالسهمك لينا مبادر انا فكري نازل وسادر فى الجيل مثالك نادر
دا الجنن عبد القادر
فقدنا الصواب ياشبابنا يابوعبدة وين احبابنا
انا كنت متأكد أنه عبد القادر دا ما جن من ساهل كدا.. ودا بتؤكده الكلمات دي ... وكلام اخونا ياسر العيلفون والقيسيون كثر يا حاج .... منهم من انتحر ... ومنهم من انتحب ... ومنهم من استحب الخلا على الأخلة وبين هذا وذاك، تظل جمال العذارى هي ملهمة للدهشة، والنشوى
Post: #14 Title: Re: الجنن عبد القادر Author: عمر مصطفى مضوي Date: 04-21-2015, 11:26 AM Parent: #12
أبوذر يا بابكر عبد القادر نموذج للدواخل السودانية النضيفة . فمثله كثر على امتداد الوطن وحكاياتهم هداي في ليل المحبين كما ليلي في درب السالكين والمسافرين في جوف الليالي الساحرة . بحثا عنها في طرقعات اللالوب والذكر المقيم وفي كل خير . خير عميم وألق شفيف وحب جم تتناسل منه محجة السودانيين البيضاء التي تركنا عليها الإباء . وسنتهم في العشق والجمال . كان عبد القادر أيضا نموذجاً في زمن ما وفرح ما في بلدي ويقال أنه كان من الفقراء المعدمين الجميلين الذين هم ملح الحياة واتكاءتها . وكان يعشق ليلى أخرى بعيدة المنال والوصال . فكان عليه أن يغنيها كما يفعل المحبين عادة . وذات مساء قروي خانق تعرضت ليلى للدغة عقرب وأضناها الألم وسمع عبد القادرنا بأمرها فجاء يطوف بالحي وعثر فيما تقول الراوية على عقرب ظن أنها الفاعلة فلم يتردد لحظة وأكلها كما يأكل عبد القادر مضوي كاس الزجاج وعاش بعدها أمدا طويلا وليس في فمه مزعة ضرس أو سن وكان يفخر بذلك كثيراً . هكذا تقول الرواية . أما قبل ذلك كله تحياتي أخي أبوذر وعلى فكرة دون أستئذان نقلت نص أسقي الشمس شاي الصباح لبعض الأحباب فلك العتبى في ذلك .
Post: #18 Title: Re: الجنن عبد القادر Author: أبوذر بابكر Date: 04-22-2015, 07:42 AM Parent: #14
عمر
ازيك يا مضوى و منير
المجانين يؤخذون بجريرة العشق وهم اعقل خلق الله
والعشاق يتهمون بجناية الشغف وهم أصدق البشر
كل زول عنده ليلى البعرف تفاصيل معناها
ويقولون ليلى بالسودان مريضة
زى العامرية ديك اللحست عقل الوليد المسكين
لا علق فى استار الكعبة عندهم
ولا اظن ينفع عندنا بَركة قدام فكى ولا نديهة اللاحقة ايديهم
والعقل ان طفش ومشى فى ديداب الريدة
يبقى خلاص
منه العوض وعليهو العوض
عبد القادر فعلا نموذج غنى ومليان بصنوف العذاب والعذوبة
بالنسبة ل سقاية الشمس شاى الصباح
شيل طوالى واملا برادك شاى واسقى الحبان كلهم
وادعو معانا لى وش الشمس
شكله كده الواحد حيبقى مشهور بعد كده
ههههههههه
Post: #23 Title: Re: الجنن عبد القادر Author: أبوذر بابكر Date: 04-23-2015, 06:47 AM Parent: #18
Post: #16 Title: Re: الجنن عبد القادر Author: أبوذر بابكر Date: 04-22-2015, 06:06 AM Parent: #12
العزيز عبد العزيز كيف الحال
الجنون مرحلة متقدمة وعبقرية من شغل العقل وإعمال العقلانية
سمعت بواحد إسمه جعيفران الموسوس ؟
بالله يا عبد العزيز فتش على الزول ده وشوف حكايته كيف
قيس بن الملوح طبعا من أعظم الناس القنعو من العقل
وعندنا فى السودان ناس كتار زى قيس
بس ما معروفين
وكتير منهم "مقطعنو جواهم" ساى
شكرا ياخ على الشوفة
Post: #15 Title: Re: الجنن عبد القادر Author: أبوذر بابكر Date: 04-21-2015, 01:15 PM Parent: #8
حبيبنا عادل
الوقائع دى كلها حقيقية
وأنا بس زى أعدت صياغتها أو ما شابه
الكلام ده زى ما قلت لأخينا ياسر انه حصل فى منتصف الأربعينات فى ودراوة
وزى ما حكى لى الراوى كانت ليلة فعلا مشهودة
الجاغريو بجلالة قدره غنى واطرب بنفسه
وحتى نحن والله يا عادل برضو حضرنا جزء من نوعية الحفلات الزى دى ونحن اطفال
ما تقول الكائن ده عجوز
هههههههههه
نفس المشهد ده ممكن تشوفه فى نهاية الستينات او حتى بداية السبعينات فى مدن وقرى الأقاليم
Post: #17 Title: Re: الجنن عبد القادر Author: الطيب بشير Date: 04-22-2015, 06:24 AM Parent: #15
Quote: يذوب العشاق والخيط واحد ويجن المرهفون والليل واحد
هو هذا نداك.. ففي حالتي..شقيق والدي هو الفنان أحمد الطيب..و شقيق والدتي هو الشيخ عبدالجبار المبارك و كلاهما (فنان)..و كلاهما يذوب و الخيط واحد ياخ لا حولتن.. .
Post: #19 Title: Re: الجنن عبد القادر Author: أبوذر بابكر Date: 04-22-2015, 08:13 AM Parent: #17
الطيب
يا بشير النضير
من جنان رضـوان أصلك لـذا كـل ربيع فصلك
واهو نورك لاح
وعبيرك فاض وعم الجهات
اهلك عاد بتورينى ليهم ؟
وابقى طيب
ابقى شديد وسعيد
Post: #21 Title: Re: الجنن عبد القادر Author: يحي قباني Date: 04-22-2015, 02:32 PM Parent: #19
Quote: وزى ما قال الوالد رحمة الله عليه
انه كان فى سكن لأهل العيلفون فى الخرطوم فى منطقة الخرطوم تلاتة وتحديدا قريب من ميدان عبد المنعم زمان او نادى الأسرة تحديدا، وكان الجاغريو بتردد عليهم باستمرار
التحية أبا ذر ... و حبيبنا ياسر ...و الضيوف الاكارم ...
انا على قناعة تامة و بتأكيد من بعض الاعمام من عاصروا الجاغريو انه عاش فعليا في الخرطوم فترات طويلة و كان محبا عاشقا للعاصمة و للمدنية رغم ارتباطه الوثيق بالعيلفون و البطانة و شرق النيل ...
الجاغريو قال :
الخدو لال تعال لي دقايق قلال تعال لي معنى الدلال تعال لي الحب حلال تعال لي
و استمر لغاية ما قال : يا نشوتي تعال لي بيك سلوتي تعال لي الحب عِتي تعال لي يالفي ( اليونتي ) تعال لي
اها اليونتي دي .. هي مدرسة الاتحاد الثانوية بنات في شارع القصر جنب المعبد اليهودي
و عمنا الجاغريو كان ما كان كاتلو اللون السماوي حق بنات اليونتي ما كان كتب
و اللون ده عاد الا يكون قاعد و مصاقر ... مامكن بس زيارات ... _________________________________________ سألت احد العارفين عن قصيدة يا رايع ...
و قلت ليهو ياخي القصيدة كلماتها خفيفة و دمها خفيف ...
قال لي تقدر تقول انها زي قريص الخدود كده ... جو جميل و شباب حلو ... و عمنا كان بحب الجمال
فكتب يا رايع ... جفيتني و انا ضائع تعال لي ...
بعدين سكت كد و قا ل لي ... يعني يا قباني جو زي داك دايرو يقول ليها شنو ؟ وجه القمر سافر يضوي شعاع و نور ... ما بتبقى .. مش كده ... و ذهب ضاحكاً ...
Post: #22 Title: Re: الجنن عبد القادر Author: أبوذر بابكر Date: 04-22-2015, 02:54 PM Parent: #21
حبيبنا القبانى
اول شى النسألك
انتو القبانية فرع مدنى ولا فرع ام درمان
وحسب ما بعرف انهم اهل بعض
وسبب العرفه انه عندنا خالتنا متزوجة من ناس ود الأفندى و ود الأفندى والقبانية اهل بعض
ولا الإسم بس مجرد تشابه ؟
نرجع لسيرة Jack Rio
ده طبعا اسم البطل السينمائى السمو عليهو الجاغريو
الجاغريو رغم استقراره بالعيلفون ومنطقة شرق النيل عموما إلا انه فعلا كان مداوم الجية للخرطوم وكان صديق ورفيق لمعظم الفنانين والشعراء وأهل الفن فى الفترة ديك
غير كده العيلفون ما بعيدة من الخرطوم وممكن تعتبرها من احياء الخرطوم عديل يعنى غالبا بتكون اقرب للخرطوم من منطقة شمال ام درمان
عارف يا يحيى
كلنا زمان كنا بنمش نتحاوم قريب من اليونيتى بنعمل فيها ماشين حوش سينما كلزيوم البفتح على دار الشفاء داك بنمش نلقط باقى بوسترات الأفلام المرمية هناك
وبالمرة بنوقت مواعيد مرقة الكائنات اليونيتية الحلوة ديك وهى ترفل فى لونها الأزرق الفاتح
