Post: #1
Title: أبوذر بابكر..حالة إستثنائية ..وموضوع دراسة ..!!
Author: عمر الفاروق
Date: 04-01-2015, 03:02 PM
Parent: #0
02:02 PM Apr, 01 2015 سودانيز اون لاين عمر الفاروق- مكتبتى فى سودانيزاونلاين
الزول ده حالة إستثنائية ..تحتاج دراسة ..وبتحتاج الناس تقيف عندها .. عن نفسي من زمان بقول الزول ده أحسن زول بيكتب في سودانيز .. ولو ما أخاف الكضب مرة قلت أبوذر أحسسسن زول بيختار عنوان البوست .. زمان كنت بعيب عليهو إنو بيكتب موضوعه كلللو مرة واحدة فبيطلع طوييل فبيقومو معظم الناس ممكن يزهجو من تتمة الموضوع ..لكن كمان كتابة أبو ذر بتسوقك لدرجة إنك بتكلفت السطر البتقرا فيهو عشان تنط للسطر البعدو .. للأمانة كتابتي للموضوع ده هي دعوة لمناقشة الظاهرة الإسمها أبوذر ده أكتر من إنو بوست بغرض الشكر وكسّير التلج .. النقاش المرة دي بصراحة من جانب دخلتني فيهو خوفة من ما يكتب اباذر ومن الإسلوب البيستخدمه ..وعليه ح أشركك معاي يا أباذر في إنك تنتشلني من المخاوف دي.. إقتباسك من القران الكريم !!! دي النقطة المجهجهاني صراحة ..مكيييفاني شديييد ومخوفاني شديييد .. واضح جداً من خلال كل ما تكتب طيلة هذه السنوات إنك زول دارس للقرأن أو حافظ ليهو بصورة ممتازة.. ما حا أنظر وأقول التربية الصوفية ظاهرة فيك وفي إسلوبك زي ما بيكرر كلو السودانيين في جميع محافلهم إنهم صوفيين لكن صراحة في حالتك إنت فهي ظاااهرة من خلال ما تكتب.. النص الأخير القريتو ليك بتاع إنا أعطيناك النيل قريتو بمتعة وإندهاش ما بعدو متعة ..لكن والله يا اباذر وانا بقرة قلبي إنقبض كده ومسكتني خوفة ..فججججأة كده ..لاوزت ووقفت ..يا ربي أسة البيسوي فيهو ابوذر ده صاح؟؟ لدرجة إني شطحت ودخلت في قصة يا ربي حلال ولا حرام !! :) ما تتخلع يا حبوب ..ما دخلني شك تجاه ما تكتب ولا تجاه أفكارك ..الشك دخلني مني انا وانا بستمتتع بالكتابة الجمييييلة دي.. النص بتاع النيل ده فعل فيني فعايلو والله يا اباذر كوني محب جددداً للنيل ووالله يا اباذر ما حصل مشيت إجاز السودان وما مشيت قعدت في النيل برااااي في حتة كده بتاعت تأمل وإستنشاق هوا النيل ..الغريبة بسرح وجواي بيتردد نفس كلامك الإنت كتبتو ده لكن طبعاً انا بيغلبني أعبر زييك كده لكن والله ياها الحوارات الداخلية الجواي.. فدحين يا حبوب ويا باقي الاعضاء عشان ما أنداح وأسرح وأطلع من موضوعي الأساسي انا عايز أخدك كحالة إستثنائية يتم تشريح ما تكتب في المنبر من ناس المنبر ديل.. وبرضو تفيدني في قصة إقتباسك من القرأن لدرجة تقارب للتطابق دي وضعها شنو من الإعراب .. معليش يا صاحب ورطّتك معاي وختيتك تحت المجهر وانا عارفك زول ما بتحب الأضواء والفلاشات .. بالمناسبة المحيّر برضو إنو ابوذر في الرياضة وفي الفن أخطر من في الثقافة ..
تخريمة : عن نفسي إنا أعطيناك النيل دي مفروض تتحول لي رواية ..وبصراااحة كتابة أفضل مليون مرة من الحاجات البتفوز بي جوائز ناس شوق الدرويش وما عارف شنو كده جائزة الطيب صالح..
|
Post: #2
Title: Re: أبوذر بابكر..حالة إستثنائية ..وموضوع دراسة
Author: ودقاسم
Date: 04-01-2015, 03:11 PM
لا حولاااااااااااااااااا عمر ! الفاروق !؟ ما بصدق ... أجري يا دينا خالد .. صاحبك فك طريق أساسي واخد الطريق من ابوذر يازول طريق أبوذر ده طريق زلق ما بتقدر عليهو استمتع إنت بالدهشة ، واسكت .. واللهيا عمر إنت مشروع بتاع زول كويس ، لكن أهلنا بيقولوا : خسّرت جلدا يبقى سقو لكن يمكن غلب عليك الكتاب وطفقت تعمل بعمل أهل الجنة .. ما بخلي البوست ده نهائي .. ده بوست لازم يستمر حتى بعد الأرشفة
|
Post: #5
Title: Re: أبوذر بابكر..حالة إستثنائية ..وموضوع دراسة
Author: Hololy
Date: 04-01-2015, 04:17 PM
Parent: #2
.... .........
... ..اي حاجه تتكتب بجانب الورد ده ولبكم التلاته ..ـــ..كل واحد واحده (بث) بالله ....ــــ حتخرب الموضوع ___ ... لكن احتياطا كده الزول ده كتاباتو و اشعارو ... فيها ريحة الارض ... و الناس ... و حجوات الحبوبات ... و التاريخ و و البدره و الشجره و الحلم بوطن عزيز الجانب ..معافي بارضو وبناسو البسطاء ....فان كان دلك كدلك فهو ادم الاول داك ...معجون بماء و تراب ارض عشقها و جرتقته بعطر طميها...... ... ...يا عمر يا فاروغ .... او كما قالو .... .... ...لا مكان للخوف من تناول ما يمس حياتنا و حيواتنا و الانسان فينا بكل الاقبال و الجراه .... فالقران نفسه باياته و سوره و شروخاته ...لن ينفد من سياج التمانيه و عشرين حرفا لللغه التي تنداولها ... و لن يمزق تلك الحروف اشلاء لينثرها في الفراغ ... ... و ياتي باخري من خارجها .... وفي الان و الحين و المستقبل ستظل هي دات الاحرف التي نكتب بها الان و نرص الكلمات و الاشعار كما هدا الالق المحتفي به ... ...مجددا ورد وحب مقيم لكم . . . . . . . . . . .في حاجه او حقيقه صفه مهمه نسيت دكرها .... . .انو الزول ده زول مرتب انسانيا .... شيمة المرهفين في كل زمان و مكان . .
|
Post: #42
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-02-2015, 02:06 PM
Parent: #5
Hololy
اقسم بالله الواحد امتلأ فرحا وزهوا
وازداد وسامة كمان
ما فضل لى الا امرق الشارع
زى زول استاذنا دكتور بشرى الفاضل داك
البخلى الناس يتغزلو فيهو
فيا صديقى
حياك الخالق وزاد روحك اخضرارا وجمالا وسقى ايامك بمدرار العافية وهميم السعد
وشكرا بلا حد
|
Post: #21
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-02-2015, 06:22 AM
Parent: #2
ازيك يا ود قاسم
صباحاتك انسام ولحظاتك فرح وانغام
عمر ده يا ود قاسم مش مشروع زول كويس وبس
الزول ده زى ما قال اخونا حيدر
من فاكهة الدنيا الحلوة
مش فى المنبر هنا وبس
قول مثلا كده "تفاح اخدر"
حاجة حلوة وشهية وشكلها جميل ومفيدة وكله
يكون فى زول مثلا برضو
ما بحب التفاح اللخدر ده
ولا حتى اللحمر كمان
لكين بحب البرتكان وبموت فيهو
هههههههه
وهكذا دواليك
انتو دواليك دى عندها علاقة بالدواليب او الدلاليك ؟
والله يا ود قاسم كنت عايز اقول لى كلام كتير جدا عن عمر الفاروق
لكن اكيد لو قلته هسه بقولو عشان هو كتر خيره فتح ليهو دكان عنى أنا
عشان كده نخليهو وقت تانى
لكن عموما
هو زول كويس والله
كويس خالس
بس كيف الزول يكلمه ويحاول يحس بيهو
زى ما قال محمد ميرغنى
|
Post: #3
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-01-2015, 04:01 PM
عمر الفاروق
ويحك يا رجل
كدى خلينى بعد ارجع البيت بعد شويه
والى ذلك الحين
محاربك
ههههههههههه
عارف
الى ذلك الحين دى ومعاها ديك بتاعة نشكر التيم العامل
بتعمل لى حشرجة فى المخيخ
والله جد
|
Post: #4
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 04:15 PM
Parent: #3
المشكلة انو طريقي وطريق دينا وطريق اساسي واااحد.. المشكلة الاكبر انو طريق اساسي وطريق ابوذر برضو واحد واصحاب عديييل.. اها بما انك قريت جامعة الخرطوم فاتوقع من السهولة بمكان وعن طريق علوم الاستدلال تتخيل العلاقة بيني وبين ابوذر..
|
Post: #6
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-01-2015, 05:39 PM
دقيقة بالله يا فاروق
هسه أنا يعنى انضم ولا اسكت ولا اعمل شنو تحديدا
اناولك الطوب ؟
هههههه
لا لا والله لازم انضم
|
Post: #7
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-01-2015, 05:53 PM
عارف يا عمر
الواحد زى فجأة كده حس انه زى الزول الكويس
الاحساس ده ما قاعد يجينى كتير والله
غاين
كان فى واحد من اهلك العرب زمان قبل الإسلام اسمه
حاجب بن زرارة التميمى
زول مسلط جدا
القصه انه كسرى عظيم الفرس وفى قمة عز الفرس وسلطانهم كسرى قام منع اهل حاجب ده من منطقة معينة فى العراق
قام حاجب مشى عشان يقابل كسرى ويشوف الفهم شنو
المهم زولنا وصل قصر كسرى والجماعة وقفوه بره على بال ما كسرى يأذن ليه بالدخول
جا الحارس وقال ل حاجب كسرى قال ليك انت سيد العرب ؟
قال ليه لا ما سيد العرب
مشى وتانى رجع قال ليه انت سيد قبيلتك ؟
قال ليه لا ما سيد قبيلتى
تانى برضو مشى ورجع قال ليه طيب ياخ انت سيد اهلك وبيتك ؟
قال ليه ولا دى كمان برضو
المهم كسرى لما زهج منه قال ليهم نادو الزول ده النشوف موضوعه شنو
لما دخل على كسرى سأله قال ليه انت منو يا زول ؟
حاجب بن زرارة قال ليه
أنا سيد العرب
الله، طيب ياخ نحن ما سالناك قلنا ليك انت سيد العرب قلت لا انا ما سيد العرب
حاجب بن زرارة رد وقال ل كسرى
قبيل ما كنت سيد العرب لكن هسه وبعد ما دخلت عليك واتشرفت بحضرتك
بقيت سيد العرب
قال ليك يا فاروق كسرى ده نط على حيله وقرب يدردق بالواطا
طبعا الوصف ده بعد سودنة كلام شيخنا بن عبد ربه فى العقد الفريد
كسرى اتهجم وقال لجماعته
املو خشمه در و لؤلؤ ودهب لامن يفضل
فا شنو
عليك امان الله انا، هذا العبد الفقير الى رحمة مولاه، لا استثنائى ولا موضوع دراسة
لكين بقيت كده بعد نضميك ده
شكرا يا كسرى عظيم المنبر
بجى تانى اتم ليك النضمى
|
Post: #8
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-01-2015, 07:38 PM
نتشارك ؟
انت عايز تورطنى عارفك
ذكرتنى حكاية عشه الفلاتيه مع ابو داود لما قال ليها عندنا صندوق تعالى ادخلى معانا وعشه ابت
هههههههههه
لكين خلينى النوريك موضوع الإقتباس من القرآن الكريم أو الشى الإنت سميته اقتباس، وهو ما اقتباس طبعا بالمعنى البلاغى البيانى
القصة ببساطة يا عمر فى الخصوص ده كما يلى
طالما نحن بنكتب بالعربية، وابلغ ما فى اللغة العجيبة دى هو القرآن الكريم وغير كده هو كلام الله ربنا
انا بحاول اقلد كلام الله
فى احسن واجمل واعلى وارفع من كلام ربنا ؟
مافى طبعا
اشيل تعابيره ومعانيه ومفرداته وتراكيبه
اسرقها واستعملها زى ما انا عاوز ولا زول بسالنى مافى
مش بتلقى الناس كل واحد بقلد الزول الشايف انه نموذج بالنسبة ليه فى المجال المعين ؟
بس الفكرة كده
القرآن الكريم فيه لغة رفيعة وبيان عجيب والله يا عمر وكل ما تتمعن فيه تكتشف اشياء جديدة كل مره
بالنسبة للصوفية
النوريك طيب
الشيخ أحمد ارباب العقائد الورد ذطره فى الكتابة دى والعدى من توتى وقعد وعمل الخرتوم دى
هو جدى أنا
ايوه جدى عديل كده لحم ودم من جيهة والد الوالده لأنه ولده، الشيخ محمد الأمين صاحب القبة الظاهرة مقابر البشاقرة غرب على شارع مدنى الخرطوم هو جد الوالدة من جيهة ابوها
ثم
الشيخ حياتى حاج حمد العربى
راجل الصقيعة الراوى الكبير والمجيد وشاعر اجمل مدائح النبى الأكرم
هو عم الوالدة برضو
تانى شنو يا ربى
عاين
عايز حاجة قبل ما امشى ؟
هههههه
|
Post: #9
Title: Re: أبوذر بابكر..حالة إستثنائية ..وموضوع دراسة
Author: ودقاسم
Date: 04-01-2015, 09:25 PM
Parent: #8
المشكلة في صحبة عمر واساسي من جهة وصحبة عمر ودينا خالد من جهة ومعادلة ملخبطة كده عشان يدخل فيها ابوذر ياخ لو ابوذر ده بقى صاحب هناي داك أنا تاني ما بقرأ ليهو حرف موش لو كتب إنا أعطيناك لو كتب إنا أنطيناك ذاتو تاني ياعمر بقول ليك إنت ممكن تبقى زول كويس ، بس ، خلي بالك من بس دي أول حاجة الحاجات الما قدرك ما تحاول تتشعلق ليها ، زي محاولة نقدك لأبوذر تاني حاجة الناس الما سمحين ما تصاحبهم زي صحبتك مع فلان داك تالت حاجة ما تدعي إنك صاحب اي بت من بنات البورد لأنك إنت فاتح بوست بالجهة التانية ضدهم الحاجات دي خلي بالك منها ولو اتذكرت حاجة تاني بجيك .. وما تعمل فيها صاحبي وما تحاول تحيدني ما بخليك إن بقيت حي .. إنت قايل دي للحب بس ، للاحب أيضا .. حبك برص
|
Post: #10
Title: Re: أبوذر بابكر..حالة إستثنائية ..وموضوع دراسة
Author: عبدالحفيظ ابوسن
Date: 04-01-2015, 09:48 PM
Parent: #9
امممممك طلعنا اهل الشيخ حياتي جدي ..وانا من الصقيعة . وقبل شهرين كنت فيها لوفاة في داخل بيت الشيخ حياتي زوجة ولده اهل عديل اهو الواحد اتلم ليهو علي واحد مؤسس
|
Post: #35
Title: Re: أبوذر بابكر..حالة إستثنائية ..وموضوع دراسة
Author: أبوذر بابكر
Date: 04-02-2015, 07:45 AM
Parent: #10
يا ود اب سن
ان شاء الله يا بت عمنا احمد تجيبى ولد بإذن واحد أحد
وكان جا ولد يا سميهو محمد شمس الفلاح يا محمد تاج الأصفياء
ده كان جزء من الحوار بين الوالده الله يديها العافية والعمر الطويل وبين اعمامها ابناء الشيخ حياتى وابناء اخيه الشيخ المبارك
كانو فى زيارة لأهلهم فى ودراوة والعيدج
والولد الجاى ده هو العبد لله أنا
وللأسف ما كان لى نصيب فى الإسمين لا شمس الفلاح ولا تاج الأصفياء
نحن صلتنا يا عبد الحفيظ من جيهة جدنا أب الوالده وهو بن عم الشيخ حياتى واخوانه الشيخ المبارك والشيخ المختار
واكيد بنفرح بيك ونفخر لما انت تطلع قريبنا ومن اهلنا
|
Post: #11
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 09:58 PM
Parent: #9
ود قاسم.. جيب لي حتة وااااحدة ادتك احساس اني عايز اصاحبك واحييدك دي.. وما طالبني حليفة بقطع تذكرة بييي ليلي ده اجي ابوس راسك من فوق لييي اخمص رجليك..اها قصرت معاك؟ لكن شكلك انت بتنقل ما يشعر به عقلك الباطن وبدون ما تشعر بتسقطه علي الواقع.. كدي قول بسم الله واشرب سحلب وادمدم نوم..النومة بتريحك السهر مع الكبر ما كويس انت لسة مشوارك طويل مع الرطوبة والموية البيضا والذي منو .. النقطة المهمة شديد يا ود قاسم..طووول عمري ما قاعد انتظر زول يقييمني سواء سلب او ايجاب..انا ادرى بي نفسي تماااما كان كويس ولا كعب..ما تفتكر اني من النوع البنتظر يثني علي زول ...
|
Post: #12
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 10:13 PM
Parent: #11
ابو ذر.. وكمان جدك الشيخ حياتي!!!؟؟؟؟ ات ااا زول بي صحك؟؟؟ وقاعد معانا هنا عااادي؟؟ وترد كمان علينا؟؟؟ صحي تواضع صوفي.. بجيك بي رواق ان شاء الله فيما يتعلق بالموضوع الاساسي..
|
Post: #13
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 10:26 PM
Parent: #12
نرجع لي ود قاسم.. مش قلت ليك المرة الفاتت انو لو في تلاتة انفار كتابين في المنبر فاساسي واحد منهم؟ اها المنبر ده لو فيو خمسة انفار ضكرانين والزول يفتخر بانه صحابهم فاساسي جوووة الجك في الخمسة ديل.. كونو الزول ده قلبو اباك وما صاحبك فدي ما مشكلتي.. لكن اوعدك بتوسط ليك اساسي بسمع كلامي وبقدرو.. بس انت خليك جاهز عشان لمن يوافق يصاحبك تقالدو وتبكي..
|
Post: #14
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 10:38 PM
Parent: #13
هلولي يا حبوب.. ما هو ال28 حرف ديل الاعجاز كلللو..بدليل انو كلللنا بنعرفهم ورغم عن كده يتلقي فينا الزول الكتاب والزول الما بعرف..ومن ال28 حرف ديل في ناس بتعمل كلمات وجمل تحلف تقول اووول مرة تسمع بيها..
|
Post: #15
Title: Re: أبوذر بابكر..حالة إستثنائية ..وموضوع دراسة
Author: عمر الفاروق
Date: 04-01-2015, 10:41 PM
Parent: #14
ابوذر يا راقي.. لسسسة حتة كلام الله والقرأن ما وقعت لي..او خليني اقول ما اقنعتني..حاسي انو في تعقيدة في حتة ما انا ما قادر اوصلا ليك.. النقطة المهمة يا صاحب انو الكلام عاجبني لكن ملاوز بي شديد..
|
Post: #17
Title: Re: أبوذر بابكر..حالة إستثنائية ..وموضوع دراسة
Author: حبيب نورة
Date: 04-02-2015, 00:44 AM
Parent: #12
بتكون قافلة مرات
ومااااا إلَكْ إلا المطر بس!
سمح سماحتنْ تمحِّن!
وساعدني كتير في تجاوز مطبات الخيال يعلم الله.
بوست كويس خالص، ومحبة للجميع.
|
Post: #26
Title: Re: أبوذر بابكر..حالة إستثنائية ..وموضوع دراسة
Author: عبدالله الشقليني
Date: 04-02-2015, 06:48 AM
Parent: #17
[QUOTE]سمح سماحتنْ تمحِّن!
وساعدني كتير في تجاوز مطبات الخيال يعلم الله.
بوست كويس خالص، ومحبة للجميع. |
الكاتب الروائي حبيب نورة هنا ؟ أهل ومرحب بالكاتب الروائي
...... يا روحي حرام عيك ... أنا الحار في دواي حُكمة وأطباء ....
|