عكّاز مضـــــــــــــــــــــبب

11:09 AM Apr, 01 2015
سودانيز اون لاين
ودقاسم-
مكتبتى فى سودانيزاونلاين



إن قلت أن العكاز شبيه بالقنا فأنت مصيب .. وإن قلت أنه نوع من القنا ، فأنت مخطئ .. فالعكاز رغم شبهه بالقنا إلا أنه اثقل بكثير منه ..
وحين بشتري المشتري عكازا فهو (يلدّه) اي يهزّه بيمناه هزة قوية ليقدّر وزنه .. وكلما كان العكاز ثقيلا كلما كان أجود ..
والعكّاز ليس عصا . العصا في ثقافة أهل السودان خفيفة الوزن بها اعوجاج طبيعي بسيط أو بفعل فاعل .. ولو كان الاعوجاج طبيعيا وكبيرا فهو مجداع .. ويستعمل في الصيد ..
والعصا والعكّاز وحتى السكين ، تعتبر أداة رجالية لا شأن للنساء بها ، ولا تحمل المرأة عصا إلا إذا عملت بالرعي فتهش بعصاها على غنمها دون أن يكون لها بها مآرب أخرى,,
لذا يقولون لك ، ( العكاز بيتم الرجالة ) .. والعكاز قد يكون بطول حامله أو يكون اطول إذا كان حامله قصيرا .. ولتجويد العكّاز يتم تجليده فيسمى عكّازا مضببا ..
والضبة من جلد ذنب الثور ، تسلخ ببراعة لتخرج كما هي دون فتق أو شق ، ثم يتم إدخال العكّاز فيها وهي طرية لينة .. وتترك لتجف فتصبح ملتصقة تماما بالعكّاز وتمنحه قوة وجمالا ..
ويتم تنظيف الشعر منها ، وهو أصلا ليس بكثيف .. فيصبح العكاز مضببا ، وهو أجود أنواع العكاكيز ..
لسة في كلام جايي

حاجز مقعد درجة أولى
تحياتي يا خال

بوست شكلو مضبب

غايتو نحجز مكان مع أخذ ساتر

سلام أبا طلال

صديقي الوسيم الباهي ابوجهينة
سلام وشوق
ويبدو لي أن العكّاز أصوله نوبية .. ذلك لأنه موجود في كل أنحاء السودان بمختلف الثقافات ..
وما يعم السودان فهو لا شك نوبي الأصول .. فلو كان غير ذلك لوجدناه في مناطق دون أخرى
وما عصا موسى إلا عكّازا نوبيا لا ريب ولا شك
وقد تلقفت تلك العصا ما سواها من العصي
وكما قال موسى أن استخداماته لعصاه انحصرت في ( أهش بها غنمي ) ثم اتسع الاستخدام ( ولي فيها مآرب أخرى )
والعكاز عند غيرنا من الشعوب هو عصا طبية الاستعمال ، يعتمد عليها من يحتاجها وربما بوصفة ومواصفات طبية ..
وقد استخدمها أجدادنا وآباؤنا في مراحل متقدمة من العمر لتعينهم على أمن الحراك والحركة ،
ولتكشف لهم عثرات الطريق حين الإصابة بالعمى

نادر النور آدم
تحيات طيبات
العكّاز مهاب جدا .. فحامل العكاز يمكنه أن يرسل ضرباته إلى من يواجهه من بعد يضمن له سلامته
مع إصابة الخصم .. لكن ليس كل حامل عكّاز يجيد استخدام العكّاز .. فهو كأي سلاح يحتاج تدريبا
ويحتاج مهارة ـ ويحتاج قوة .. ومن أوجب استخدامات العكاز ثبات من يحمله ، فمن الصعب أن تصيب خصمك وأنت متحرك
وإن أصبته فهي ضربة لا تفيد وربما لا تعيق العدو ..
ومن أسوأ ما يمكن ان يحدث لحامل العكّاز هو أن يسلبه العدو عكّازه .. فيتم ضربه به وهو مالكه .. ثم يتم تعييره بين الناس
حين يعلم البعض بتفاصيل الحادثة ..
والعكّاز لا يضرب به من يراد تأديبه من الأولاد أو غيرهم ..وإن ضربوا به فإن الضرب يتم في منطقة الساق الأمامي
وهي ضربة لا يصمد أمامها الصغار لأنها ضربة في العظم مباشرة لكنها لا تحدث جرحا وعادة ما تكون خفيفة لكنها
صعبة على من تقع عليه ... ولا يضرب الحيوان الأليف بالعكّاز لأن الضربة يمكن أن تكون مميتة خاصة إذا وقعت في منطقة الرقبة أو الأضلاع
أو الكلية .. لكن يضرب الثور الهائج بأغلظ أنواع العكاكيز ، والثور الذي يحاول الهرب من الجزارين يحيط به مجموعة ممسكة بأغلظ العكاكيز ،
فياخذ ضربة من هذا وضربة من ذاك فيقع منهارا ويتم ذبحه مستسلما ..

لازم تذكر نوع الاشجار

لانو اقوي عكاز من شجر السلم

ممكن يطلق على العكاز عصاية ايضا

شكرا ود قاسـم

كثيراً ما ارتدت الأسواق مع جدي عليه رحمة الله وكان تاجراً في وارد الانقسنا وجبال النوبة ودارفور من توابل وغيرها وكانت ترد من الدمازين الحبال والقنا,

العكاز سلاح ماضي لمن يحسن الضرب به وأهلنا في النيل الأبيض يجيدون استخدامه بصورة مذهلة ورد العكاز يسمى بالـ (صــرف) وتعلم الصرف أهم من تعلم الضرب ومكمل لـه

في سودان المحبة القديم كانت المواجهات تتم بالعكاكيز المضببة.

الناس أصحاب الخبرات يشقون العكاز بطوله على اثنين أو حتى على اربع لو كان سميكاً ثم يدخلونه في الضـبب ويقولون أن هذا يمنع أن ينكسر العكاز عند النزال ..

شكرا ود قاسـم

أحمد الشايقي

الأستاذ أحمد الشايقي
لك التحية
فعلا ناس النيل الأبيض ربما يكونوا من أكثر حملة العكاز في السودان
ويخيل إلي أن مهنة الرعي مرتبطة بحمل العطاز للهش على المواشي وللحماية من اللصوص
ولأننا مجاورين لمنطقة النيل الأبيض فأنا أعرف أنهم يجيدون استخدام العطاز في الصرف
وقد يلتقي اثنان من المجودين ويتبارزوا لنصف ساعة دون أن يتمكن اي منهم من إصابة الآخر
والضبة تحمي العكاز من الكسر .. يعني زي ممتص الصدمات

أبا ذر عبدالعال
تحية واحتراما
فروغ السلم تصنع منها العصي ـ لكن العكاز له فصوص
والسلم ليس له فصوص
العكاز نوع من القنا

اطيب التحايا استاذنا ود قاسم
ما ذكرته عن وجوب معرفة حامل العكاز لاستخدامه مهم جدا
ولعلك تسمح لي اذكر مهارة (الصرف) وهي استخدام العكاز في رد الضربات سواء كان العكازية أو السكينية (في بعض الأحيان)
يقولو ليك فلان (صراف) يعني بعرف يستعمل العكاز في صرف الضربات الموجهة ليهو
كان عندنا راعي اسمه سليمان (لا اعرف اين هو الآن) كان معروف انو لو فكيتو بي (سكسكة) حتى... برضو مستعد يصرفا بي عكازو
وفي مداخلة قادمة ان شاء الله نتطرق لمسميات العكاز وبعض نماذج مما كنا نسمي (عكاكيزنا)

معذرة لاحتلال البوست ولكن بصفتي زول جزيرة وزول حلة فالحديث عن العكاز ذو شجون

لو ما أخاف الكضب البوست ده كان له ما بعده ..ود قاسم قال ليكم للحديث بقية ..غايتو البوست لو واصل كده شكلو حيتفتل ويتجه لما لم يفتح من أجله ..
وحينها سينطبق على البوست المثل الهندي القائل :
ربّ صدفة لم تلده أمك..
للضمان كده وعشان أشارك انا بيعجبني جداً السفروق ولو إنو ما عندو علاقة بالموضوع..
أهلنا زمان عندهم عكاز إسمو الوصّافة ..بيرسمو بيهو في الأرض ذات ونسة عصرية مع الأنداد ..

إنت ياعمر مالك زمال العكاكيز ، إنت امدرماني بتفعم في البونية والكورة وسمك الموردة
ما تلخبط لينا الكيمان .. هسة إنت شفت صديق الموج بيدخل بوستات زي دي؟
طبعا صديق الموج أمدرماني راسخ ، بالرغم من إنو كلكم جابتكم المهدية
يعني طرش مهدية زي طرش بحر في جدة ، ودي طبعا حنة لسة ناس اساسي اصحابك ما وصلوها
ولو أخدوا الجنسية ممكن يبقوا أيضا طرش بحر
لكن طبعا الجنسية لحسة كوع
أعمل حسابك وانت بتدخل البوست ده ما يقع فوقك عكاز عشان نحن لا عندنا ليك يود ولا مرهم ، بس بنعرف ندعك البصلة
ولو اضطرينا بنخت على الضربة سفة
وده زي ماقالوا أهلنا البقارة ( ألمي حار مو لعب قعونج )

لمن تجوا لحتة ( البسطونة ) ألكزوني بالله

Quote: لمن تجوا لحتة ( البسطونة ) ألكزوني بالله

تتوفر لدينا بالرياض بسطونة اصلية فاخرة .. للعرض فقط

البسطونة دي نحن شفناها عند الفكي وناظر المدرسة بس
بس في حاجة صغيرة كده بيسوقوا بيها الحمير بيسموها مطرق
وتستخدم لجلد الطلاب في المدارس

نادر
ليك تحية وتعظيم سلام
حمل العصا عادة إجتماعية قديمة ،ونحن نحاول تسليط الضوء على هذه العادة
ولو انضموا لينا ناس علم الاجتماع يكون كتّر خيرهم
اشكرك على مداخلاتك التي تضيف للموضوع وتفتح الكثير من النوافذ
واصل ، ولك الشكر 

Quote: أبا ذر عبدالعال تحية واحتراما فروغ السلم تصنع منها العصي ـ لكن العكاز له فصوص والسلم ليس له فصوص العكاز نوع من القنا

حيااك الله اخي ود قاسم

في احتمال اختلاف المسيمات من منطقه الى اخري
ولكن العاز الجد جد عكاز السلم او السيال ..وومافيهو منظر ولا فصوص املس للخبت بس..ووزنو تقيل جدا..ولا يحتاج الى ضبه ..
الذي له فصوص ده فعلا القنا او الخيزران يمكن ان يتضبب... ويقول ليك قنايه مضببه وو البصطونه ايضا من القنا

السفروك..الطرنباش..حق الادروبات ..

Quote: تتوفر لدينا بالرياض بسطونة اصلية فاخرة .. للعرض فقط

جاتك فوق جرح يا أبو ندرة

للعرض .. ولا للعرضة ..

Quote: للعرض .. ولا للعرضة ..

متعددة الأغراض يا عمك ههههههههههه

اخوي ودقاسم
مسكاقمي
زيما قلت ليك بهناك باننا في المنطقة النوبية لا نحمل عكاز اطلاقاً ونادر ما تجد شخص حامل عكاز وكما ذكر سيدنا موسى عليه السلام اهش بها غنمي ولي فيها مآرب أخرى سيدنا موسى اخذ العصى من مدين عندما عمل راعي لديهم ( مافي زول بيرعى غنم بعكاز مضبب بيكون صوط او عصا طرية ) ممكن تلقى زول شايل عكاز اذا عندو رطوبة او صعوبة في المشي عشان يتكي عليها ، ومن الطرائف عندنا اذا هو بيشيل عكاز اذا دايرين يعرفوه يقولوا ليك فلان البيشيل العكاز داك ، وعندنا طبعاً مستحيل تلقى زول لابس سكين في ضراعو .. حتى ماعندنا هذا النوع من السكين بتاع الضراع دا في الاسواق عندنا .
انا عشت في منطقة النيل الابيض والجزيرة تلقى الزول عادي لابس سكين في ضراعو وشايل عكاز وقاعد جنبك في البص ولا حايم في السوق
لك ودي

سلام للكل

Quote: والعكّاز ليس عصا

Quote: وما عصا موسى إلا عكّازا نوبيا لا ريب ولا شك

يوسف لا تقطّع كلامي .. لو عدت وأكملت ستجدني تحدثت عن أن العكّاز ليس عصا في الثقافة السودانية
والعصا عندهم أصغر ..
وعصا موسى وردت في القرآن .. وفيه ورد على لسان عيسى أن النبي اسمه أحمد وأن يونان هو يونس وإن إبراهام هو إبراهيم
وغير ذلك كثير .. وليتك حاولت أن تسعى لما يفيد بدلا عن النقد السلبي

يا حمزاوي إنت نوبي من أجيال ما بعد الحداثة
وقضيت حياتك كلها في المجيقة وأبوحبيرة وأبوحلاقيم
والله جدودك تكون عكاكيزهم تتطاقش
هسة كلمة عكأز دي ما عندها مقابل في الرطانة ؟
ويمكن لو رجعت للشعر تلقاها موجودة
اسأل دكتور شريف ومكي علي إدريس والباشمهندس ابراهيم وتعال لينا تاني
قال أهل مدين قال

حمزاوي
تحيات وأشواق
انا بس بقول إن أصبحت العادة عامة لجميع أهل السودان فهذه العادة تكون ذات أصول نوبية
وعادة حمل العصا واعتبارها مكملة للرجالة أو اعتبارها مكملة للوجاهة تشمل كل السودانيين
وزي ما قال واحد أخونا في الفيسبوك أن العصا من الكلب والسكين من السلب
ةقد عايشنا العرب فما وجدناهم يستخدمون العصا ..
زي ما قلت ليك إنت راجع الموضوع مع كبارك وأدينا الإفادة ..

تعرف يا اباذر السلم ده نحن ما عندنا ، وانا شفت عصا السلم وهي ثقيلة فعلا
لكنها لا تسمى عكازا في منطقتنا .. إنما فقط تسمى عصا
وأول ما شاهدت عصا السلم في بداية السبعينات وكان لي عم مريض بالرطوبة ( الروماتيزم )
وذهب لأحد المشايخ ووصف له علاجا من ضمنه أن يتدخن بالسلم .. فبحثنا فلم نجد ..إلا أن جدنا محمد ود عبدالرحمن من ودربيعة
سمع بحاجة عمنا المريض للسلم فأرسل لنا عصا يمتلكها منذ سنين ..
وجدنا هذا كان قاصا للأثر ، وكان ماهرا في القبض على اللصوص ، وغالبا كان أول من يضرب اللص حين يصله
وعندما وصلتنا العصا وقبل ان يتم تكسيرها كحطب دخان ، قال عمي الآخر لعمي المريض : يازول عصاة عمك ده كتل بيها كم زول وما أظنها تداويك ..

سلامات يا جميل ...

الحاج محمد احمد سرور كان لا يغني في أي بيت لعبه الا و معه ( كريزة ) ...

و يقال ان كان له ( روسية ) لا تضاهى ...

هذا الخيط ينطبق عليه مقولة الكلام المفيد.
لأستاذنا البروفيسور محمد إبراهيم أبو سليم كتاب بعنوان" أدوات الحكم والولاية في السودان" تطرق فيه لأنواع العصي وربما العكاكيز واستخداماتها، وعلى ما أذكر أن الباحث في التراث الشعبي المرحوم الطيب محمد الطيبة تطرق في إحدى حلقات برنامجه الشهير" صور شعبية" لهذا الموضوع أيضا.

عثمان كباشي
لك التحية
ليتنا نتمكن بمساعدة بعض الاخوة من تقديم ما يفيد
فهناك ظواهر كثيرة من عادات أهلنا لم يتم بحثها بصورة كافية
ودراسة هذه الظواهر تكشف الكثير من شخصية السوداني
وقد انبنى على كثير من هذه الظواهر أدب وشعر أو ارتبطت بالرقص( العرضة ) والزينة
كما لامست أمورا أخرى من حياة الشخصية السودانية والبيئة

الأخ ود قاسم
السلام عليكم

Quote: يوسف لا تقطّع كلامي .. لو عدت وأكملت ستجدني تحدثت عن أن العكّاز ليس عصا في الثقافة السودانية والعصا عندهم أصغر .. وعصا موسى وردت في القرآن .. وفيه ورد على لسان عيسى أن النبي اسمه أحمد وأن يونان هو يونس وإن إبراهام هو إبراهيم وغير ذلك كثير .. وليتك حاولت أن تسعى لما يفيد بدلا عن النقد السلبي

كيف قطعت كلامك ؟ وهو تساؤل ليس إلا لكن شايفك تضايقت وحررت نفسك وسميته نقد سلبي في حين أنه اقتباسين توحي طريقة ورودهم بالتساؤل ، لكن شايف نفسك حار شديد .
وسؤالي هل العصا ما هي العكاز في الثقافة السودانية بس ولا في كل المجتمعات التي تستعمل العصا والعكاز ما اختلاف أغراض استخدامهم؟
لو تساؤلي الأول والثاني والمداخلتين قاطعوك وما عجبك كلامي امسحهم على طول.

الأخ يوسف الطيب احمد إدريس
وعليكم السلام
لست أنا من يمسح مداخلات الزملاء مهما بلغت من الحدة ..
ونفسي ما قام ولا حرّ
أوضحت لك أنك ( قطّعت ) لاحظ الشدة على الطاء وارجع اقرأها هناك مرة أخرى
ولم اقل قطعت أو قاطعت
بعدين عادي ممكن تثبت لينا أن العصا والعكّاز حاجة واحدة ، وهناك أحد الزملاء تحدث عن عصا السلم
وأسماها عكازا كما يطلق عليها أهل منطقته ، وقد أوضحت له أننا نسميها عصا وأن العكاز الذي نعرفه له فصوص
ولو عدت لمداخلتك ستجد أنك لم تسأل كما افدت في مداخلتك هذه إنما أوردتها على أنها نوع التناقض ،
اي مرة قلنا أن العكاز غير العصا ومرة قلنا أن عصا موسى ما هي إلا عكاز نوبي وهذا نقد أي أنك ابنت أن كلام الكاتب متناقض ، وهو ليس تساؤل
ثم جئت وأوضحت أن كلمات القرآن في كثير منها تختلف عما تعارفنا عليه وضربنا امثلة

يا يحيى والله (بيت لعبة ) أحلى حاجة .. إنت طبعا أمدرماني اصيل والآن تستخدم مصطلح بيت لعبة
تخيّل عندنا في الحزيرة يسمون بيت العرس أيضا نفس الاسم وبعضهم يقول ليك ماشين بيت اللعب
ويسمون رقصة العروس لعب العروس .. ويقولون انها لعّابة
ما تشوف لينا غنية سيرة كده ترفع فيها العصي والعكاكيز

Quote: يا يحيى والله (بيت لعبة ) أحلى حاجة .. إنت طبعا أمدرماني اصيل والآن تستخدم مصطلح بيت لعبة تخيّل عندنا في الحزيرة يسمون بيت العرس أيضا نفس الاسم وبعضهم يقول ليك ماشين بيت اللعب ويسمون رقصة العروس لعب العروس .. ويقولون انها لعّابة ما تشوف لينا غنية سيرة كده ترفع فيها العصي والعكاكيز

حبيبنا ...

الوالد رحمه الله لغاية ما توفاه الله ... ما كان بقول الا بيت لعبه ...

و لأنه مولود و متربي في ود أرو ... جماعتك ناس كرومة و سرور كانوا قريبين ...

الحاجة أمي الله يرحمها كانت لما تدور تتبوبر رغم انو ما من طبعها ...

تقول ليك احنا في عرسنا غنى لينا ( الحاج ) ... و الحاج هو محمد احمد سرور في اول الاربعينات ...

ود قاسم سلام يا صديقي...
العكاز في حلتنا لا يُحمل هكذا اعتباطا، بل لغرض...
عامة الشعب لا تحمل العكاكيز الاوهي مغرودة في هذا البتاع...
اذكر وان بعد يافع حملت عكازا شبه مضبب، وذهبت للتمرين
وكنت وقتها مشاكل صديقي احمد عبدالقيوم؛
.......................................
ولما اتشاكل هرول مع موسى في الدافوري، وموسى اكبر من هرول وامتن،
في نص الشكلة قال هرول: دقيقية دقيقة النمشي اجيب عكاز ابوي، وسمحنا له بالذهاب نحن الحجازة؛
ولم يرجع لمضارب الشكلة،
ومعلوم ان والده من اطيب ناس الحلة، وعندما سالناه شنو يا فردة انتظرناك وما جيت؟
انتوا مواهيم بالله يوم واحد شفتوا ابوي شايلو عكاز، نحن اصلا ما عندنا عكاكيز...
..................................
واحد من حلتنا برضو مشربت، له عكاز اقرب للعصاية في الطول واسمك من العكاز العادي واتقل منه، واي تور ينضبح في الحلة يضيف ضبة لهذا العكاز العصاية،
وصاحبنا دا مسمي عصايتو دي( الكلـــــــيب ظر..) حرف واحد مكان النقطتين...
.................................
اللتة عندنا بالتاء وليس الدال...
.................................
موضوع سلس وسودانوي بامتياز،
شكرا ود قاسم...

سلام للجميع

عندنا عمنا كان بلعب تنس يوم كسر يد المضرب وقعد فتره يلم في قروش مضرب جديد يومه الاشتراه مشى ضببه

اهلنا النوبه عندهم حاجة كدا بين البسطونة و العكاز بقشطوا في راسها صامولة مقاس 24 و مرات فرول عجلة .. الله لاجابك في صفها

تحياتي

ود الاعسر عندو عكاز صح،مضبب بي ضنب تور ارقط،،اتهاوش مع ود المكي صبي عاجبا رقبتو ،اها ود الاعسر قشط بي عكازو ود المكي رماهو نشيط،،،الجماعة جابولو قرجة قالولو قوم علي..قال ليهم خلوني راقد لي فوق راي،بعد فات ود المكي قالولو رايك شنو؟ قال ليهم علي اليمين الزول الاصنج ده،ان تني عكازو الاغم ده فوقي،قومتي يوم القيامة فيها شك..
ود قاسم اخوي النضم ده صحي عكاكيز بس،وله راقدلك فوق راي..
لك وللاحبة كل المحبة..

عبدالعزيز اخوي ..
الراي الراقد عليهو أنا هو إني افتح الموضوع وأرجى حكاياتك الممتعة
شوف طعامة الحكاوي الطلعت من الموضوع ده
انامتأكد عندك كتير ... قول ..

محمد جبرة لك التحية
اضحكتني كثيرا .. فلك الشكر
ليت كتاب قينيس يسجل لعمك هذاالسبق ( مضرب التنس المضبب )
قلت لي عصا ابوصامولة .. والله كلام

http://alintibaha.net/index.php/%D8%B1%D8%A4%D9%89/31744-%D8%A7%D9%84%D8%AD%D8%AC%D8%A7%D8%B2-%D9%84%D9%8A%D9%87%D9%88-%D8%B9%D9%83%D8%A7%D8%B2.htmlhttp://alintibaha.net/index.php/%D8%B1%D8%A4%D9%89/31744-%D8%A7%D9%84%D8%AD%D8%AC%D8%A7%D8%B2-%D9%84%D9%8A%D9%87%D9%88-%D8%B9%D9%83%D8%A7%D8%B2.html
ورد بصحيفة الانتباهة بعنوان الحجاز ليهو عكاز

صديقي عبداالمنعم
لك التحية
حكايات العكاكيز إثراء للموضوع
شكرا جزيلا وننتظر منك المزيد من الحكاوي

والله زول غنّى ليهو الحاج يحقّ له البوبار
أحد الأصدقاء تزوج ابنة الكاشف .. كنت أحس بالرهبة أمامهما
بالمناسبة يا يحيى أنا قابلت الحاجة في الرياض مع أبو وائل
شوف الدنيا دي ضيقة كيف
لها وللوالد الف رحمة

عدنا
تسمى في بعض المناطق (الخيزرانة) وفي بعضها (البنبقاية) وأيضاً (البسطونة) وهو الأكثر شيوعاً
من نبات الخيزران وهي مرنة واذا ضربت لا تكسر ولا تعوق .. قريبة للسوط اكتر من العكاز
غالب استخداماتها تكملة للوجاهة واللبس القومي، وكذلك للعرضة
يحملها المشايخ والوجهاء وبعض أهل الطرق الصوفية، وقد زاحمتها الآن الكريزة المصنعة من أنواع مختلفة من الخشب بل وبعضها مطعمة بالفضة والعاج
ومع اني لست من الوجهاء ولا المشايخ ولا من الصالحين.. لكنني اسعى الماثلة أمامكم هذه للعرضات والمناسبات السعيدة

نادر
العصا عندك
أوعى تفرّط فيها
سمحة للقدلة والعرضة

شفتا شكلتين بى عكاز
لحدى هسا متذكر

شكلة بين الفاضل صقير عربى من البجا عبد الهادى جبل اولياء
ضد جمعة غزال دينكاوى فى حلتنا
اها جمعة رمى الفاضل فى الارض وهو من فوقو
جا الحاج صقير اخوى الفااضل ماسك العكاز بى يدينو الاتنين ومن فوق خلاص منزل العكاز على رأس جمعة غزال
فى لمحة كدا ظهر زول دفر الحاج وانقذ راس جمعة غزال من انفجار كان وشيك

التانية مبارة بين فريق حلتنا الجهاد ضد الزهرة فريق ديم البساطاب
شكلة وجوطة والجمهور داخل الملعب
زول شايل عكاز ونازل بيهو على رأس لاعب فريقنا ضياء الدين صالح سبدرات
بشجاعة عجيبة ضياء صرف العكاز بى يدو واصاب بكسر مركب تم علاجو فى شهور طويلة

الأخ ود قاسم
سلام تاني
ما داير احرف البوست عن مساره ولا ادخل في جدل بيزنطي بس لا بد من الرد على ما أوردت:

Quote: الأخ يوسف الطيب احمد إدريس وعليكم السلام لست أنا من يمسح مداخلات الزملاء مهما بلغت من الحدة .. ونفسي ما قام ولا حرّ أوضحت لك أنك ( قطّعت ) لاحظ الشدة على الطاء وارجع اقرأها هناك مرة أخرى ولم اقل قطعت أو قاطعت بعدين عادي ممكن تثبت لينا أن العصا والعكّاز حاجة واحدة ، وهناك أحد الزملاء تحدث عن عصا السلم وأسماها عكازا كما يطلق عليها أهل منطقته ، وقد أوضحت له أننا نسميها عصا وأن العكاز الذي نعرفه له فصوص ولو عدت لمداخلتك ستجد أنك لم تسأل كما افدت في مداخلتك هذه إنما أوردتها على أنها نوع التناقض ، اي مرة قلنا أن العكاز غير العصا ومرة قلنا أن عصا موسى ما هي إلا عكاز نوبي وهذا نقد أي أنك ابنت أن كلام الكاتب متناقض ، وهو ليس تساؤل ثم جئت وأوضحت أن كلمات القرآن في كثير منها تختلف عما تعارفنا عليه وضربنا امثلة

اولاً: نفسك كان حار والدليل انك في المداخلة الأولى ما قلت السلام عليكم رغم اني سلمت على الكل في أول مداخلة.
ثانياً: يا ريت نثبت على حاجة واحدة انو نقد سلبي ولا كلام متناقض لانو كل مرة بطلع مصطلح ؟
يا حبيبنا كل ما أوردته أن اقوله تساؤل أهو عصا أم عكاز ؟ أم العكاز لحاله والعصا لحالها؟ والمصطلحات لا تفرق في الثقافة السودانية او غيرها من الثقافات التي تستخدم العصا والعكاز، حتى عصا موسى ربنا سماها عصا ليهش به على غنمه يعني العصا للأغراض الخفيفة أما العكاز فهو للأغراض الثقيلة كالشجار أو ما نحوه.

يا شيخ يوسف كثر التكرار
ولا اريد مزيدا منه


لو سمحت

سلام يا ود قاسم .. نحييك على هذا البوست العفوي الجميل والمهم ..
نحن عندنا في شرق السودان كسلا . العكاز واحدة من الملازمات .. عادي تجد شخص حافي القدمين ويحمل عكازا .. والبجا هم أبرع من يستخدم العكاز بجميع أنواعه ويتدربون عليه .. بل يعرفون ( المقاتل ) كلها في جسم الانسان .. بمعنى الأماكن التي يمكن أن تكون ضربة العكاز فيها قاتلة ..
نحكي لك طرفة أو موقف كان العكاز طرفا فيه .
يحكي واحد من أهلنا أصحاب السواقي قال كان عنده عاملين واحد من الهدندوة مختص برعاية الأبقار .. والثاني هوساوي مسؤول من البير والمضخة وهكذا . في وقت القيلولة جالسين يتونسوا ويتهازروا .. الهوساوي أخطأ خطأ فادحا أذ ذكر (أم ) الهدندوي في معرض هزاره العابر .. فجأة تحول الآخر الى أسد كاسر .. تناول عكازه وضرب الهوساوي في الرأس أعلى من ألأذن بقليل .. وذاك قبل أن يسقط وجه له لكمة في الوجه وسقط الآثنان ودخلا في غيبوبة . وقال وهو جلس محتارا في هذه الحادثة كيف سيتصرف .. بعد قليل فاق الهوساوي أعقبه الهدندوي .. لكن قبل أي تصرف تحرك الهدندوي ناحية الهوسواي أعتذر له وتصافحا .. بعد يومين قال قابلت الهدندوي وسألته لماذا بادرت بالاعتذار سريعا ؟
قال ( يا حاج أنت ما تعرف حاجة .. والله ضربة زي دي جمل تكتل )

الكاتب الأنيق درديري كباشي
لك التحية
صحيح ما ورد عن البجا عن حمل العكاز وإجادة استعماله .. وهم من أبرع السودانيين في الصرف والقفز لتغيير موضع المقاتل
لكن بونية الهوساوي الله لا يوريك .. ويقال أن أهلنا الهوسا اقوياء البنية لأنهم يتناولون القورو
لكني اشهد لهم بالمتانة والقوة والمهابة
أشيد بحكمة المتقاتلين .. وجنوحهما للسلم
قلت لي (ضربة زي دي جمل تكتل)

صديقي محمد سيد احمد
لك التحية
الصرف وهو فعل مشترك في الحادثتين وكما أشار أحد المتداخلين مهم جدا
وهناك من يجيده إجادة تامة
ويتم التدريب عليه في ألعاب الصبية وفي أوقات الرعي
والتدريب عليه مهم في أزمنة سابقة كان العكاز يمثل فيها سلاحا فتاكا
ومن لا يعرف الصرف لا يجيد ضرب ( التيوة ) أو الضرب بها أو الزوغان منها ..وهي لعبة مشهورة عن القرويين

قبيل الصباحية يا ود قاسم
كنت بحكى لى اسامة الخواص جزء من نضمى اولاد الزمن الفينا ده

وجبت ليه سيرة "الضبة" والعكاز المضبب
كنت بقص ليه عن نوع البناطلين الحايم بين الشباب حاليا

الواحد كراعه بتكون مضببة تب

بتكون لاحظت ليه مش كده ؟

وهسه انتبهت لعكازك المضبب

عاين

العكاكيز ذات الشأن زمان كل واحد لازم يكون عنده اسم

زى ما الناس زمان كانو بسمو السيوف باسماء معبرة

أنا هسه بتذكر ليك كم اسم

سجم اللاقونا
اللطرش "الأطرش"
كراع الفيل
عوج الدرب
كفتة الجان

ههههههههههه

كان اتذكرت بجيك تانى

ود قاسم ولدنا

فى سيرة حكاولى العكاز

واحد من حلتنا كان عندهم عرس
يوم العرس جا من الجزر مضبب تلاتة عكاكيز

صنفهم على النحو التالى

دا مخصوص ليكم يا اولاد الحلة اى زول يعمل مشكلة داير يفرتق الحفلة

ودا لاولاد ناس ديم البساطاب

والكبير دا لاهل العريس العواليق الجايين من الثورة