في عيد الأم اتراح الحول الأول إلى روح والدتي العزيزة آمنة محمد الطاهر( بت جنه) شعــــر : هاشم صديـــق
(1) عزم الغلابة .............. مسكين أنا ومسكين أبوي مسكينة أمي ... وبرضو أُختي كمان اخوي لكن – ورغمَك يا شَقا - بَرضو راكزين زي بَلد الليل سَرَح فيها ومشَى وسَاوم عيونها وحَنَّسَها ولا تبدّلت ... لا استسلَمَت. ............... مسكين أبوي ضامِر مِتِل عوداً نِشِف ومسكين أبُوه السلَّ سيفو على المدافع وصاغ صباح مليون حَرِف ومسكينة أمي الماغِشَت درب الكتابة لكنها ساعة الحريق الشال عُمُر ناساً عُزاز نصروا الغلابة عِرفت تَخط حرفين كُبار رَسِمهُم حلا ولا مِن لَمع لون الحِبِر كل البلد صْبحَت دروب مكتوبة لا . .............
............. (2) رسالة .......... أكتب ليك رساله طويله بي دمي أقالدك فيها يا أمي وأضمك ساعة في حضني. .......... وحاتك لا بخط عنوان ولا بكتب إسم إنسان وما برمي الجواب في بريد وما بديهو لي زولاً كمان في الإيد كفاية أقيف وأنقش في جناح الريح كلامي الدايرو يوصل ليك وأزيدك في الكلام تسبيح يخلي الريح تَتَرتر في المسافة عروس تحيل كل الصحارى بروش مَضفَرة بي سعف بلدي وملونه بي مشاعري إليك يا أمي. ............. ............. (3) أتراح الحول الأول ............. من برد الليل متغطي بتوبك أتنفس وهَجك والقلُب اتدفا أتذكر سفرك وْنَفَس الكون الجانا مَكفن ونام في محفه. أتذكرَّ شهقة باب البيت وجناح الصاقعة الحوَّم ورفّ. أتذكر يُمه صُراخ الليل والدَمْع السيل والبِرِش الفيكْ ارتاح واتلفَّ من سفرك مرّ الحول الاول والزمن الأسود دوَّر ولفَّ لا جرحك نام لا صوتك صام لا وجعك خفَّ. ............. يا محفوره في قلب الخاطر يا مرسومه في بطن الكفَّه الزمن اتساقط ورقو الأخضر أصبح أصفر العالم جفَّ ........... استنيتك متل العاشق موج الشوق في صدري جداول وقلبي تشقشق فوق اغصانو طيور الجنه تومين في الشوق يايمه انحنا بالحول تستني وبالحول استنا مما فُتّي - حفيف اقدامك - حلم الشارع ووتر الباب لي نقرك حنَّ آه يايمه مما فتي الزمن اتغير الشِعِر اتحيَّر العالم صنَّ. ........... يا مليانه بشاشه ولون يا حنيّه بحجم الكون ياالأديتي خُطانا عيون يالعلمتي القلم اتحدَّى يا الساندانا في وكت الشِدَّه يا الإحساسك نوَّروأدَّي يا أنفاس الزمن العدَّ احبك موج الشوق في سدري جداول وقلبي تشقشق فوق أغصانو طيور الجنة احبك وما في حبيبة أحنَّ يا مفقوده يا موجوده يا (بت جنه) ......... من برد الليل متغطي بتوبك وحيد زي نجمه مدارها غيوم جبيني موِّلع وعيني تَدَمِّع معبور بالحمى أناجي النوم . العَبْرَه تخلي همومي مساهره الوَحْدَة تفتح عين الذاكره. أناغمِك يمه تجيني مسافره ألقاكِ محلّقه فوق عيني إيديك مفروده ونازله على بشويش كفيك في جبيني اتختن العرق اتفصّد الجسم اتعطّن فتّحت عيني في عينيك اتملَّن شابيت بالشوق لي حُضنك أقوم حسيت كفيك في سدري تحوم تَبْتَبْتي شقاي هَدْهَدتي هموم ومن برد الريد كَرْفَسْت أساي غَبيّت في النوم ........... من برد الليل متغطي بتوبك اتتنفس وهجك القَلب اتحسَر أتذكر درسِك حصص الرحله فصول الدفتر. يا مهمومه بوجع الناسْ يا الإحساسك واقد وحاس يالربيتي وغرسِك خضَّر يا مغبونه بظُلم العسكر. .......... اتذكر نضمك ونسة قلبك سمحه وصافيه أتذكر يُمه حلاوة اللُقمه وسَمَر الصُحبه وضحك العافية ياما عَبرنَا مصايب الغُربه ياما صرخنا في وش (المافيا) يا ما عشقنا الناس البُسطا ياما شَهَرنا سيوف القافيه ........... من بير الليل صوتك رَنّ والزمن ارتجَّ من توب الليل نجمك حنَّ تاوق وفجّ في قلب الليل الدنيا تصن وحفيف قدميك في الخاطر دجَّ. يا رضيانه وعافيه علَي يا مفقوده وماليه عيني العالم مات والفرح اتفات لكنك راكزه وصوتك حي ........... من برد الليل متغطي بتوبك اتنفس وهجك القُلب اتدفا اتذكر سفرك ونَفس الكون الجانا مكفَّن ونام في محفه من سفرك مرَّ الحول الاول والزمن الأسود دوَّر ولفَّ ولا جرحك نام لا صوتك صام لا وجعك خفَّ لا جرحك نام لا صوتك صام لا وجعك خفَّ.
Post: #2 Title: Re: في عيد الأم ... andquot; اتراح الحــول الأول andquot; Author: يحي قباني Date: 03-21-2015, 10:18 PM Parent: #1
Post: #3 Title: Re: في عيد الأم ... andquot; اتراح الحــول الأول andqu Author: يحي قباني Date: 03-21-2015, 10:21 PM Parent: #2
رحمك الله يا أمي ...
فلا جُرحِك نام ...
و لا صوتك صام ...
لا وجَعِكْ خفَّ
Post: #4 Title: Re: في عيد الأم ... andquot; اتراح الحــول الأول andqu Author: معاوية الزبير Date: 03-21-2015, 11:00 PM Parent: #3
في القصيدة عزاء وألم لكل من فقد أمه رحمتك يا الله سلام ليك يا يحيى و لي هاشم
Post: #6 Title: Re: في عيد الأم ... andquot; اتراح الحــول الأول andqu Author: يحي قباني Date: 03-22-2015, 02:34 AM Parent: #4
Quote: في القصيدة عزاء وألم لكل من فقد أمه رحمتك يا الله سلام ليك يا يحيى و لي هاشم
فقد الام يا معاوية لا يوصف ...
إحساس باليتم الحقيقي ...
الانسان الوحيد الذي يحبك دون مقابل ...
Post: #5 Title: Re: في عيد الأم ... andquot; اتراح الحــول الأول andqu Author: عزالدين محمد عثمان Date: 03-21-2015, 11:08 PM Parent: #3
يا رضيانه وعافيه علَي يا مفقوده وماليه عيني العالم مات والفرح اتفات لكنك راكزه وصوتك حي
الله يرحمك ويغفر ليك يا أمي..
Post: #7 Title: Re: في عيد الأم ... andquot; اتراح الحــول الأول andqu Author: يحي قباني Date: 03-22-2015, 02:39 AM Parent: #5
Quote: يا رضيانه وعافيه علَي
شايف يا عز الدين ...
ما كانت رحمها الله تخت التلفون مني الا تختم كلامها بالرضا و العفو ...
وده العزاء الملهمنا الصبر ...
رحم الله والدتنا ووالدتكم و جميع امهاتنا ...
Post: #8 Title: Re: في عيد الأم ... andquot; اتراح الحــول الأول andqu Author: اخلاص عبدالرحمن المشرف Date: 03-22-2015, 08:15 PM Parent: #7
اللهم ارحمها والدة الشاعر الفذ الاستاذ هاشم صديق اللهم ارحمها والرحم والدي زمن المحنه يا حليلو
Post: #9 Title: Re: في عيد الأم ... andquot; اتراح الحــول الأول andqu Author: يحي قباني Date: 03-23-2015, 01:56 AM Parent: #8
Quote: اللهم ارحمها والدة الشاعر الفذ الاستاذ هاشم صديق اللهم ارحمها والرحم والدي زمن المحنه يا حليلو
توقعت مرورك من هنا ...
رحمهم الله جميعاً يا دكتورة ...
تحياتي ...
Post: #10 Title: Re: في عيد الأم ... andquot; اتراح الحــول الأول andqu Author: عبيد الطيب Date: 03-23-2015, 05:25 AM Parent: #9
Quote: من بير الليل صوتك رَنّ والزمن ارتجَّ من توب الليل نجمك حنَّ تاوق وفجّ في قلب الليل الدنيا تصن وحفيف قدميك في الخاطر دجَّ.
الدنيا تصِن...وحفيف قدميك... في الخاطر دَج.. تجدنا نصِن ونصنف لمفردة هاشم، فهو يطوَّع الحروف الدَّاجة بالصَّي.... رحم الله أُمِّي وأمَّك وأُم هاشم وأمَّهات سائر المسلمين فكانت رفيقة دربي... وكانت شفاءً لقلبي.... وكانت طنيبة بيتي...... وذُخري هُنا ويوم التَّناد وكانت أُمَ اليتامي... ومأوي الحزانا... وضُل التَّعابا... وعكَّاز مكدودٍ أثقله عبء الزَّمان.... وقدحا مُترعا بالمحبةِ والحنان...... ودُخري سنين الرَّماد فمثلك عصيَّة ليدِ المنون.... لأنَّك تهبي المنيحة وأسمح مالك..... وتمنحي الجار وضيف الهجوع طعام عيالك...... فأنتِ المرأة "وزينة الدِّقون"...... فنعشك مشبولٌ بجيد السَّماحة ولحدك بين حنايا أهل البواد .. اللّهُمَّ طيِّب ،بشآبيب رحمتك ،روحيْهما النَّاشقة ،وأجعلها لخندريس خمر جنانك ذائقة ، وأجعل عبقهم دليلي،في الزَّمن "الفِسِلْ"، والسّنون الماحقة،وأكرمني بهم كلّما حلّت بيَ ضائقة
تحيَّاتي أخي قباني لك ولزوارك
Post: #11 Title: Re: في عيد الأم ... andquot; اتراح الحــول الأول andquot; Author: عاطف عمر Date: 03-23-2015, 09:23 AM Parent: #1