مكنة النظام الجديدة ! لتعبئة السذج والبسطاء ! ( سكاتنا ولا الكلام الني ) !!!!!

09:00 AM Mar, 07 2015
سودانيز أون لاين
مني بت نفيسة - هولندا
مكتبتي في سودانيزاونلاين

سكاتنا ولا الكلام الني ...

خلاس انتهينا من البديل منو !!! وقلنا ليكم انتوا البديل .

والمعارضة ضعيفة !!! وقلنا ليكم انتوا الاقوياء ..

واخر المكنات : - لو ذهب البشير لاصبح السودان كالعراق وليبيا وسوريا واليمن !! اها في الحالة دي

حا تتوقعوا نقول ليكم شنو ؟ ((( سكاتكم ولا الكلام الني ))) ..

سلامات يا ست منى

الناس ديل لحقتهم دعوة المظلومين التي ليس بينها وبين الله حجاب، وهسع قاعدين ياكلوا بعضهم.

غايتو البشير ما عندو خيار أحسن من أن يكون أول رئيس يسلم نفسه للمحكمة الجنائية الدولية ويذهب إلى لاهاي بالطيارة. الظروف والزمن ليست في صالحهم كسلطة منهارة اقتصاديا ومنهكة عسكريا ومنقسمة على نفسها داخل الحزب الحاكم نفسه. بكرة ستكتمل حلقة التمردات بتمرد حميدتي بعد أن تمرد موسى هلال. وإذا جاطت في السودان ما بكون عندها حد.

نسأل الله أن يهدي البشير فيكون أول رئيس في العالم يعترف بالخطأ ويجنب بلاده مصير ليبيا وسوريا والعراق والصومال.

دا كلامي.

ياسر

-

من طيبة بعض الشعب السوداني وبساطوا مفتكر السودان دا بس ( الخرتوم ) ( وامدرمان ) ( وبحري )
وبطن امي تنسد زي ما قال جحا !! يعني البحصل في باقي وطنا الحبيب اللمة العالم بأسره متمثل
في الأمم المتحدة ومجلس الأمن ... الخ من المنظمات الانسانية والحقوقية دا شئ ما بهموا طيلة ما الحرب
مافي المدن التلاتة الساكن فيها دي !!! والشئ المؤسف جدآ تلقي بعض المروجين للحملة هم من المشار اليهم
باوعي والثقافة .! يعني اسه نفس العالم القائم دا كلو وبالازمة السببها حكومتنا المدتها الافتراضية دي انتهت
زمان ونهتنا معاها ماعارفنها ؟ طيب ما عارفناها ما سمعتبوا بيها ؟ طيب ما سمعتوا بيها ما عايشنها في حياتكم
اليومية ؟؟؟؟

سكاتنا ولا الكلام الني ...

العزيز \ ياسر ..

لك التحية .. ومشكور علي الكلام النجيض ..

Quote: نسأل الله أن يهدي البشير فيكون أول رئيس في العالم يعترف بالخطأ ويجنب بلاده مصير ليبيا وسوريا والعراق والصومال. دا كلامي.

يا ياسر عمر البشير ما حايسلم نفسه للدولية باخوي واخوك ( وان الله لايهدي القوم الظالمين ) وعمر البشير هو مساهم من قريب وبعيد في
زعزعة الامن العالمي وامن الجوار معقول حا يكون حريص علي استقرار بلدو ؟ وعلي ما اظن وكما تشير جميع الارهاصات عمر البشير وشلتو
منتظرين بفارغ الصبر الانفلات الامني في العاصمة لانو ما فضل غير العاصمة والبعض القليل من المدن الكبري فيها شبه الاستقرار وهم بتمنوا
يحصل الانفلات عشان يكون عليهم وعلي اعدائهم .. وان شاء الله ربنا يحفظ الوطن المستغيث . ودمت .

سكاتي ولا الكلام الني ..

يا مني سلام
الموضوع ما موضوع مغالطات ، حاليا النظام ماف زول عنده وش يدافع نيابة عنه وكل الناس مقتنعة بان ذهاب النظام هو افضل الخيارات للشعب ، ولكن ماف ولا زول قال كيف نصل للخيار ده ، وكل المطروح افكار فطيرة خجولة لا ترقي لمستوي انها تغير النظام .. اما انتظار العالم يغير لينا النظام ده اقرب للمستحيل لان النظام العالمي يعمل وفق مصالحه وليس مصالح الشعوب وامامك بشار الاسد مازال رئيسا رغم عدد القتلي والمشردين من شعبه .. المطلوب توحيد للناس والثقة في بعضنا البعض قبل كل شئ ..

حبابك العوض اخوي ..

Quote: وكل المطروح افكار فطيرة خجولة لا ترقي لمستوي انها تغير النظام

ممكن تقول لي زي شنو الفطير وما قدر الطموحات البنرتقي ليها ؟ وبعدين يعني انت نظام مارق نفسك
ومريحها واي شئ داير يجيك جاهز ؟ كدي اول ابدأ لينا بالديمقراطية هل انت من انصارها ولا بتعتبرها
برضو فجور وفسوق وانحلال ؟ اكان انت من انصارها ما بتجينا عوجة والسودان باذن الله حا يتقدم ويتطور
في ظل نظام ديمقراطي بيؤمن بالتعددية ورغبات الشعوب .. اما بخصوص التغيير من الخارج البتقول فيهو دا
وبتمني ما يتكرر ياهو ذاتو مكنة من مكنات النظام في وقت الشدة زي الشدة الحاصلة دي اول ما يتزنق يقول الاستعمار
جايهو ونادتو المعارضة عمومآ انا ايماني بالشعوب ورهاني عليها ما بقع واطة ... بس انت قول الله يعجل لينا بزوالهم ...
ومشكور يا خيي . وسلمت .

سكاتي ولا الكلام الني ..

اهلا مني
الفطير في المعارضة اشتراكها في الحوار ، الفطير تحديد 100 يوم لتغيير النظام ، الفطير مقاطعة الانتخابات ، الفطير خلافات داخلية بين مكونات المعارضة ، الفطير اعتماد الاحزاب علي ديناصورات ..
انا اؤيد الحكم الديمقراطي واري الا بديل له ..
انا ما منتظر شئ جاهز لكن بعمل بقدر ما تتاح لي من،امكانيات وبعول علي وحدة الشعب اكتر من خير من المعارضة ..

مني الحبيبه والمتداخلين الافاضل
النقابات ومنظمات المجتمع المدني حطمت والانقاذ اول شئ فعلته هي ان حبست وقتلت رؤؤساء النقابات = بيوت الاشباح ومجزرة الخدمة المدنية = ورغم هذا لم يستسلم الشعب
وكما فاجأتهم هبة سبتمبر المفاجأة القادمة ستكون اشد
ما فعلوه لا يترك للشعب مجال الا الثورة , ما دام في ظلم لزوم في ثورة ولو كانو عاقلين لبحثوا عن هبوط امن فثورة الجياع لا ترحم والمدن محاطة وكمان مستفة من جوه بالجياع
ستكون فوضي ان لم يتداركوا الامر , هم زرعوا الفساد والحروب وسيكون الحصاد دمار ما لم يلحقوا نفسهم

اجنحة الحكم
حين انقلبوا علي الديمقراطية كانو علي قلب رجل واحد = لم يعترض الا بروف الطيب زين العابدين واثنين اخرين= الان هم عدة اجنحة
1 من يرون ان المنطلقات الفكرية والعقدية صحيحة والخطأ في التنفيذ = وهم الاغلبية
2 من اقتنعوا ان ما يصلح في صدر الاسلام لا يصلح الان
3 من وصل الي قناعة ان الحكم والسياسة ومعايش الناس لا تخضع لامور الدين علي اطلاقه
4 من يري ان العسكر هم سبب الاخطأ وان الفساد الذي ضرب البلاد والعباد منبعه العسكر والمحسوبية
5 البشير مقتنع ان = المعارضة الداخلية والخارجية هي السبب=
وهناك الذين يعرفون ان الامر امر سلطة ليس الا
الخطر الحقيقي يأتي من الاجانب والذين هم تكفيريون لا يرون في السودان الا ارضآ للفتح
اما المعارضة فحديثها = شرحو يطول

لك التحية اخي العوض ..

Quote: الفطير في المعارضة اشتراكها في الحوار ، الفطير تحديد 100 يوم لتغيير النظام ، الفطير مقاطعة الانتخابات ، الفطير خلافات داخلية بين مكونات المعارضة ، الفطير اعتماد الاحزاب علي ديناصورات .. انا اؤيد الحكم الديمقراطي واري الا بديل له .. انا ما منتظر شئ جاهز لكن بعمل بقدر ما تتاح لي من،امكانيات وبعول علي وحدة الشعب اكتر من خير من المعارضة ..

يا العوض بالنسبة للشايفو من سلبيات وفطير زي الحوار لو اخدناهو كاول نقطة كانت في كلامك ومن اهم
النقاط ودا كلام صاح لو كان الحوار بالنسبة ليك سلبي اكيد بالنسبة لي السياسيين وقيادي المعارضة بكل اطيافها
الشاركت فيهو شايفنوا ايجابي واقول ليك ليه وبسألك هل انت اطلعت علي الشروط الموضوعة في الحوار ؟ ولا دا كلام
يأس منك ساي ولا عدم عمق سياسي الحوار دا بعني وصل الكذاب للباب . والدليل هو اسه وينو الحوار اترفض من قبل
تجار الانقاذ لانه ما بلفق معهم لانه لو وافقوا عليهو حايكون نهايتهم معناتها المعارضة عملت حوار ( الشرك ) عشان تفبضوا
بيهم وتاكد للعالم الاجمع اللهو كان مهتم بالحوار ومتابعوا بانو الحكومة دي ما جادة وبتاعت لف ودوران ودي نقطة من مصلحة
المعارضة وليست ضدها . دي النقطة الاولي .

التانية : تحديد المئة يوم دي انت كمان ما تكون زول بتاع اخنق فطس و اسال قبال ما تحكم وما تخلي نفسك قصير السياسين
ديل كان بفكروا باستعجالك دا كان زمان ماتو ( بهارت اتاك ) العجلة ما من مقومات السياسة وما تنسي العصابة الحكمانا دي
متهورة وانت شفت بعينك الملاحقات والاعتقالات الحصلت في الفترة دي عشان كدا بقول ليك اسال عن الاسباب وفكر بشوية عمق
والمئة يوم دي الانت افترضت فيها مفروض يتم التغيير ما تنسي حصار الحكومة للشعب وملاحقتهم اعتبرها دي اسباب فشل الفترة .

اما بخصوص مقاطعة الانتخابات : احسن يقاطعوها لانه مافي انتخابات حرة ونزيهة في ظل نظام شمولي ومحتكر ومسيطر علي
كل شروط الانتخابات !!!

ولي عودة ..

وسكاتي ولا الكلام الني ..

بت نفيسة ..

بوست مهم جداً .. في ظل هذه الظروف وفي ظل الترويج للإحباطات وفي ظل البحث عن تبريرات لإستمرار كابوس الإنقاذ

في فئة من الشعب ما في واحد حسبها هنا وأنا جايبها من جوة السودان من شبه إستبيان وسط ناس مؤيدين للنظام وما هم بأعضاء في المؤتمر الوطني

هاكم ما تقوله هذه الشريحة وضعوه في الإعتبار:

ديل بيقولوا الحكومة دي فاسدة وناهبين أموال وموارد البلد وبالنسبة ليهم دي حقيقة وما عاوزة أي مغالطة وبيضيفوا ليها إنهم دمويين والبيعارضهم بيصلوا معاه لأقصى حاجة وهي القتل

قلنا ليهم طيب بعد دا كله إنتوا مؤيدين وجودهم ومتمسكين بيهم ليه ؟

قالوا الأحداث الحصلت بعد نيفاشا في الخرطوم وحركة ابناء جنوب السودان التي قاموا فيها بالفوضى والقتل في الخرطوم أثبتت لهم أنهم بدون هذه الحكومة ممكن تحصل فوضى ويضبحوهم في بيوتهم وهم نايمين بالليل

أقسم بالله العظيم هذا رأي شريحة من السودانيين في الخرطوم بالرغم من إتفاقهم الكامل على كل المذكور أعلاه من فساد ونهب وغيره وغيره

شفتوا المسألة في السودان وصلت وين .. وهذا سبب رئيسي لضعف التفاعل مع الحراك الجماهيري في الشارع السوداني في سبتمبر

عشان كدا أهم حاجة الناس تبدأ بضمانات عدم حدوث فوضى مع التغيير

الشريحة المذكورة شريحة لا يستهان بها !

كلامي دا أرجو أن يوضع موضع إعتبار من كل من يريد التغيير ولذلك العملية تحتاج لجهود إتفاق واسع وكبير من كل الجبهات المنادية بالتغيير والعشمانة في ديموقراطية نتيجة التغيير !

تسلمي يا منى على هذا البوست الهام

كنت قرأت ردك ورد الصاوي ورد عمر في بوست العوض المسلمي وكانت هنالك مشكلة في الموقع تعليقي لم يتم إرساله

فأعجبت بردك أنتي والصاوي وعمر

وعلمت أن هنالك عيون حريصة وتتابع بحرص ودقة وتقاوم الإحباط الممنهج !




التعديل لتصحيح بعض الأخطاء في الطباعة

لك التحية اخي العوض ..

ونتابع :

Quote: انا اؤيد الحكم الديمقراطي واري الا بديل له .. انا ما منتظر شئ جاهز لكن بعمل بقدر ما تتاح لي من،امكانيات وبعول علي وحدة الشعب اكتر من خير من المعارضة ..

ودا المطلوب اولآ واخيرآ ان تكون الديمقراطية هي هدفنا الوحيد والضمان الوحيد البخارجنا من الوحل النحنا فيهو
دا , والجميع ما مفروض ينتظر شئ جاهز لكن بتمني منك اخي العوض النظرة التشاؤمية دي تقلل منها ولا خالص ما تفكر
فيها لانه بمجرد ما تفكر بهذا التفكير المسمم حا يقتل فيك حاجات كتيرة والزيك يارجل المحب للديمقراطية دي نحنا والوطن
محتاجنو .. ومشكور اخي العوض وان شاء الله ما اكون اثقلت عليك ههههههه .

سكاتي ولا الكلام الني .

اعزائي \ لوسي وعاصم ,,

مساء الخيرات ,,

ولي عودة ..

الاخ عاصم فقيري المحترم
تحياتي
ما ذكرته حقيقي وما حدث ايام وفاة جون قرنق = وقد اصيب كثير من سكان الخرطوم في اموالهم وانفسهم ورأينا العربات مهشمه والاصابات لولا لطف الله لأودت بالكثيرين = ما حدث لا ينسي
انا كنت بام درمان حيث كانت الحرائق ولذت بمنزل بعض من اهلي بالمهندسين ورأيت السرعة التي تكونت بها لجان الحماية , كان يوم شؤم مستمر
ومما زاد الامر سوء خطاب البعض الذي يهدد الخرطوميين بالذبح والاغتصاب .
ما لم يكون الحل سلمي متفق عليه فانها الفوضي ولذا اطالب ب = هبوط امن للانقاذ علي ان تتم محاسبة القادة والتنظيم
الاجانب الاسلامويين جزء اصيل من المنظومة الامنيه وقد كانوا متواجدين وبالزي الرسمي في فض المظاهرات

أختي إخلاص بت المشرف .. سلام مربع يا دكتورة

تعرفي أن المعارضة بكل أطيافها يجب أن تضع ما ذكرناه في أولى أولوياتها

وإن لم تفعل فلن تجد السند الجماهيري المطلوب

معارضة لا تلبي حاجات الجماهير بالأخص فيما يخص أمنها لا تستطيع أن تراهن على الجماهير

الجماهير وصلت مرحلة النضوج لتقبل التغيير ولكني أعتبر توقفها عند نقاط مثل التي ذكرنا يحسب لها وليس عليها فهذا وعي جماهيري في حد ذاته يجب الوقوف عنده

موضوع في غاية الأهمية

شايف أخونا زميل المنبر ناصر حسين محمد .. فاتح بوست بعنوان خارطة طريق للمعارضة أو بمثل هذا المعنى وهذا رابطه، لا أدري هل هو قرأ هذه المداخلة أعلاه وكانت إلهام له أم أنه يلتقي معنا في هذا المفهوم من مصادر أخرى قادته لإلقاء الضوء على ضمانات الأمن اللازم توفرها للشعب السوداني مع التغيير !

وهذا رابط البوست الذي كتبه زميل المنبر ناصر :


http://www.sudaneseonline.com/board/480/msg/%d9%84%d9%85%d9%...9%86-1425884286.html

شوفوا جنس ده دايرين يسوقوكم للجنة

الحبيبة \ لوسي ..

لك التحية ..

الحكومة من جات وزي ما شايفين بدأت بالدمار الاتمثل في دمار العمل من تشريد كفاءات
وسياسة البديل الموالي في المواقع الاستراتيجية للعمل ولي خلافو وفعلآ نجحت في الدمار الشامل
للوطن وحتي للمواطن !!! لكن حتت ثورة سلمية دي يا اخلاص ما ظنيها بتنجح لانهم زي ما عارفاهم
الكيزان بغض النظر عن دمويتهم واجرامهم وعدم اخلاقياتهم هم في ورطة الكره والعداء الخارجي والداخلي
ليهم عشان كدا لو ما اتحمت اي ثورة او انتفاضة بالسلاح مستعدين يبيدوا الشعب كله في سبيل وجودهم الموضوع
بقي بالنسبة ليهم موضوع وجود يعني موت او حياة , والدليل شهداء سبتمبر .. ونواصل .

Quote: النقابات ومنظمات المجتمع المدني حطمت والانقاذ اول شئ فعلته هي ان حبست وقتلت رؤؤساء النقابات = بيوت الاشباح ومجزرة الخدمة المدنية = ورغم هذا لم يستسلم الشعب وكما فاجأتهم هبة سبتمبر المفاجأة القادمة ستكون اشد ما فعلوه لا يترك للشعب مجال الا الثورة , ما دام في ظلم لزوم في ثورة ولو كانو عاقلين لبحثوا عن هبوط امن فثورة الجياع لا ترحم والمدن محاطة وكمان مستفة من جوه بالجياع ستكون فوضي ان لم يتداركوا الامر , هم زرعوا الفساد والحروب وسيكون الحصاد دمار ما لم يلحقوا نفسهم

( ارحل )

فوق