Post: #2
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-26-2015, 10:09 PM
Parent: #1
الزميل نادر الفضلي يكتب مداخلات جميلة في البوستات واصحاب البوستات يشكرون ناذر الخليفة علي المداخلة .!!
تعودت كل فترة أعمل كشة من خلال محرك البحث لاعرف اين ورد اسمي في المنبر فأجد نادر الفضلي يتداخل ويقتطع من زمنه .. وصاحب البوست أو ضيف البوست يشكر ناذر على الرد ..!!
بالضبط زي كيكي والماكيكي !!!
يا جماعة .. أسمي صعب على الهضم ونادر في السودان .... شخصيا لم يقابلني منه غير اثنين .. اي زول بيضرب لي تلفون بيسالني أول : انت نادر ولا ناذر ؟! فأضطر للشرح المفصل ...
المهم نادر الفضلي ليس ناذر خليفة واكيد ناذر خليفة ما نادر الفضلي ..
وبرضو الموضوع بيخص الزميل نادر الحاف داك ...!!
|
Post: #3
Title: Re: نادر يجقلب والشكر لي ناذر !!!
Author: ملهم كردفان
Date: 02-26-2015, 11:09 PM
Parent: #2
انا بركز على صورتك مع الشانيز وحرف الذال ....زمان كنت بتابع صورة الجيف البتتقلب ديك
هذا مع تحياتى لكم ياناذر ... وللاخوه نادر خليفه ونادر حاااااااف كده ى
|
Post: #4
Title: Re: نادر يجقلب والشكر لي ناذر !!!
Author: elsawi
Date: 02-26-2015, 11:28 PM
Parent: #3
سلام يا ناذر و سلامات لضيوفك
زميل المنبر الغائب الاسمو Alsawi داك كان معذبني عذاب
لاحظ انا اسمي elsawi وهو اسمه Alsawi
ياخي ده مسنجراتو كانت بتجيني و انا اقرأ و اضحك
|
Post: #5
Title: Re: نادر يجقلب والشكر لي ناذر !!!
Author: عبد اللطيف بكري أحمد
Date: 02-27-2015, 07:27 AM
Parent: #4
عندي مزاج اسمع معاك الاغنية دي
ممكن تنزلها ؟؟
https://soundcloud.com/nobian-sort/jxmgnmkcnecm
|
Post: #6
Title: Re: نادر يجقلب والشكر لي ناذر !!!
Author: عاطف عمر
Date: 02-27-2015, 08:06 AM
Parent: #1
ناذر يا هندسة يا فن
تحياتي وسلامات ....
خلق أحد رواد الفيسبوك النشيطين جداً و يكتب باسم Atif Omer Mohamed خلق ربكة شديدة إذ ظنه الناس ( العبد لله )
خاصة عندما ظهر في بداياته أيام بوستاتي عن الفكرة الجمهورية ....
هو أيضاً يعارضها لكن من زوايا تختلف عن الزوايا التي أعارضها منها
وله إسلوبه المختلف عن الإسلوب الذي أتبعه
حدثني بعض الأصدقاء وقد ظنونا شخص واحد حدثوني تباين ( مداخلاتي ) التي هى في البورد واختلافها عن ( مداخلاتي ) التي هى من زاوية الفيسبوك.....
ربك ..... رب الخير
ذات بوست
وقع فيني أخونا Atif Omer Mohamed بستفة السنين في ذات موضوع معارضتنا ( المشتركة ) للفكرة الجمهورية ....
وكشف عن مرجعيته التي لا يمكن أن تتفق مع المرجعية التي أنطلق منها
بل ووضعني وأخواننا الجمهورين في ( شبه ) سلة وااااحدة
فرحت بـ ( بستفته ) تلك .....
مصدر الفرح أنه قد أزال مشكوراً - ربما دون أن يقصد - أزال أى سوء فهم بخصوص ( الشخصيتين ) المختلفتين
ولولا شئ من وقار لـ نشرتها في بوست منفرد ....
|
Post: #7
Title: Re: نادر يجقلب والشكر لي ناذر !!!
Author: محمد أبوالعزائم أبوالريش
Date: 02-27-2015, 03:00 PM
Parent: #6
سلام ناذر وضيوفه.
أتفهم إحتجاجك، فالخلط بين شخصيتين يجر مشاكل على الجهتين.
مثلاً شوف المثال الجابو أخونا عاطف عُمر، يلقى نفسو مواجه برأي شخص آخر والناس توجه ليهو الكلام على أساس إنو هذا الشخص.
نفس الشئ، لو النادر الآخر - مثلاً - كتب بوست أو مداخلة سياسية وأخد راحتو فيها ........ ممكن تجيب ليك مساءلة في صمة خشمك حتى لو إتحلفت إنو دا ما إنت ......... مش؟
|
Post: #8
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 08:50 PM
Parent: #7
سلام ملهم كردفان ..
Quote: انا بركز على صورتك مع الشانيز وحرف الذال ....زمان كنت بتابع صورة الجيف البتتقلب ديك
هذا مع تحياتى لكم ياناذر ... وللاخوه نادر خليفه ونادر حاااااااف كده ى |
طبعا اكترية الناس بترد حسب الصورة لكن الصورة ما مقياس .. قبل ستة سبعة سنوات في المنبر ايام المشاكل واللبع والمغارز .. ظهرت عادة كدة
انتشرت من غير تنسيق .. اللي هي اي زول متشاكل مع زول بيخت صورة الزول دا في بروفايلو .. مثلا انا عندي معاك اشكالية ما اتحسمت بشيل صورتك وأختها في بروفايلي
واحيانا بختها بالمقلوب .. فكان البيحصل انو اعمل مداخلة في اي بوست وصورتك في بروفايلي يقوم صاحب البوست يرد علي بي اسمك انت لانو هو ما قرا الاسم بس شاف الصورة
.. العادة دي انتشرت كم شهر لحدي الناس ومن غير تنسيق برضو خلتا .
وبما انو المنبر للتوثيق وللتاريخ أحب اوضح انو أول زول ابتدر الشغلانية دي اخونا اساسي وكان حايم في المنبر وخاتي صورة الريس بكري في بروفايلو ..
|
Post: #9
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 08:53 PM
Parent: #7
سلام الصاوي ....
Quote: سلام يا ناذر و سلامات لضيوفك
زميل المنبر الغائب الاسمو Alsawi داك كان معذبني عذاب
لاحظ انا اسمي elsawi وهو اسمه Alsawi
ياخي ده مسنجراتو كانت بتجيني و انا اقرأ و اضحك |
ههههههههههه متذكر اللخبتة الكانت حاصلة ... الاسماء القريبة من بعض بتكون مشكلة ..
زميل المنبر كيكي اشمو اشتبك مع اسم واحد تاني .. فداك اضطر عشان ما يتشابه على الناس البقر يمضي في نهاية مداخلاتو .. أبو فواد الماكيكي وتغيير لون الكتابة النهائية ههه
|
Post: #10
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 08:58 PM
Parent: #7
سلام عبد اللطيف ....
وينك قاطع موية ونور ؟!
تمام يا عمك .. نسمع اسمر اللونا في شكل استراحة ...
Quote: عندي مزاج اسمع معاك الاغنية دي
ممكن تنزلها ؟؟
|
|
Post: #11
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 09:02 PM
Parent: #7
كيفك يا هندسة ...
Quote: فرحت بـ ( بستفته ) تلك .....
مصدر الفرح أنه قد أزال مشكوراً - ربما دون أن يقصد - أزال أى سوء فهم بخصوص ( الشخصيتين ) المختلفتين
ولولا شئ من وقار لـ نشرتها في بوست منفرد .... |
هههههههههههه الحمد لله انو فرزتو الكيمان ..
في واحدة من المنابر كان في واحد بيشتم فنان بيكتب اسمو ناذر خضر ومرات نادر خليفة .. وهو زاتو ما متأكد من الاسم .. ما تتصور
تصفية الحسابات دي عملت لي اشكالية كيف بين المعارف ..
|
Post: #12
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 09:07 PM
Parent: #7
اكيد يا ابو العزائم ...
| Quote: نفس الشئ، لو النادر الآخر - مثلاً - كتب بوست أو مداخلة سياسية وأخد راحتو فيها ........ ممكن تجيب ليك مساءلة في صمة خشمك حتى لو إتحلفت إنو دا ما إنت ......... مش؟ |
أول ما بديت أكتب في الصحف كانت المقالات بتنزل بي اسم نادر خليفة ما ناذر خليفة رغم اني نبهت المصححين والمشرفين علي الصفحة .. أخوي الكبير اسمو نادر وكان
قاشر قدام اصحابو انو صحفي وبيكتب المقالات .. يعني من جاه الملوك يلوك وكمان بيناقش الاراء الانا بكتبا مع اصحابو زي الكاتبا هو ..
عانيت جدا .. كل ما استخرج اي ورقة ثبوتية جواز او رخصة او بطاقة .. يطلع الاسم في الاول نادر رغم تنبيهي للزول المسؤول ما يغير الاسم ويخليهو زي ما مكتوب
لكن اي زول بيفتكر النقطة زايدة ويتبرع من نفسو يعدلا لي نادر ..!!
|
Post: #13
Title: Re: نادر يجقلب والشكر لي ناذر !!!
Author: ناذر محمد الخليفة
Date: 02-27-2015, 09:19 PM
Parent: #12
عبد اللطيف والزوار ..
الاغنية الفوق لو ما اشتغلت ليكم اضغطوا على :
Open this content in a new window
الظاهرة فوق في الفريم ...
|
Post: #14
Title: Re: نادر يجقلب والشكر لي ناذر !!!
Author: عثمان الأمام
Date: 02-28-2015, 07:39 AM
Parent: #13
سلامات ناذر
غايتو مداخلاتك ما بتتلخبط مع مداخلات زول تاني أقلاهو بالنسبة لي
اول شي إسمك ثلاثي وموسيقي كمان :)
تاني شئ دايما" بتخت صورتك حتى لو إتغيرت بتخت واحدة غيرا
أنا مرات لو البوست مفتول ممكن أعرف مداخلتك من لون الخط سااي :)
بدون أشوف الصورة والإسم.
حكاية إنو يكون عندك نوع ولون خط ثابت مرات بسهل الأمور برضو.
تحياتنا ليك ولبقية النوادر.
|
Post: #15
Title: Re: نادر يجقلب والشكر لي ناذر !!!
Author: ناذر محمد الخليفة
Date: 03-02-2015, 08:46 PM
Parent: #14
سلام عثمان ..
تعرف نوع الخط او لونو فعلا مرات بيفرز صاحب المداخلة .. أخونا طلال عفيفي دايما كان بيكتب بالازرق في بوستاتو .. بريمة بالبني .. أخونا عز الدين الفحل بيكبر الحط ويلونو بالأحمر ..
ابو فواد نص اسود ونص أحمر ..
أنا شايف وضع الصور مهم جدا .. في أعضاء هنا من سنة 2000 اظن ما غيرو صورة بروفايلم الا نادرا وحسب المناسبة .. اعتقد محمدين اسحق وفرانكلي وممكن نقول كوستاوي ..
|
Post: #16
Title: Re: نادر يجقلب والشكر لي ناذر !!!
Author: حمد عبد الغفار عمر
Date: 03-03-2015, 05:34 AM
Parent: #15
سلام يا ناذر
تعرف الخطأ ببدأ من قراية الاسم في الصفحة الأولى قبل فتح البوست الواحد بلفح الاسم الأول وبوزن على كدا
إذكر أول أيام لي في المنبر محمد عبد الماجد الصائم شاف إسمي إفتكرو حمد فتح الرجمن توووشك جا منقطع في البوست بالتقيل
الظاهر في واحد لكزوا جا داخل تاني بعتذر
لكن الدربكة الجد جد بين معاوية الزبير ومعاوية المدير وفي واحدين بشربكوها ليك بمعاوية الوكيل كمان
الشفقة ما كويسة يا نادر
|
Post: #17
Title: Re: نادر يجقلب والشكر لي ناذر !!!
Author: أيمن دياب
Date: 03-03-2015, 07:30 AM
Parent: #16
ناذر يا حبيبنا..
السعوديين واليمنيين برضو هنا بكتبوا اسم غلط..
أقول ليهم أيمن دياب
يروحوا كاتبنها (أيمن ذياب).. طبعا عندهم غرام مع الذال والثاء..
ولو قلت لي واحد (سامر) يطلع انو اسمو (ثامر)..
ياخي ديل حتى في القرآن والصلاة.. (ولا الضالين) ينطقوها (ولا الظالين)..
المهم: لسه في انتظارك نحنا..
|
|