انتبه !!!! معتمد بربر يزور قرية بانت جنوب بربر ويوعدهم ببناء فصول وأشياء أخري

08:04 PM Feb, 24 2015
سودانيز أون لاين
بكري الخير - KSA - Jeddah
مكتبتي في سودانيزاونلاين



معتمد بربر امس الاثنين الموافق 23 فبراير 2014 ساقته قدماه الي قرية بانت الواقعة جنوب بربر واجتمع بناس اللجنة الشعبية وبعض الشخصيات ووعدهم ببناء ثلاثة فصول في المدرسة القديمة وبعض الاشياء الاخري
غايتو لو زيارتك دي تبع الدعاية الانتخابية واللعب علي الدقون تكون بالغت معانا ولو كانت من صميم شغلك كمعتمد حنوصلك لحدي خشم الباب ونشوف اخرك شنو
انا شخصيا بكري الخير دا حا اقيف ليك في العزيزة بخصوص هذا الموضوع واعلم علم اليقين انك ستقرأ هذا الكلام او ينقله لك احدهم ....

خليكم متابعين نشوف الحيحصل شنو؟؟؟؟؟

معليش يا أهلي في بانت امكن البوست دا يكون عندو اثر سلبي علي احلامكم
لكين أهو نشوف يا بقي زول شغل يا بقي زي غيرو الادونا غبشة كراعهم
اصلو الوالي داك الله يديهو العافية لابيهش لا بينش غير يقعد يعزل في البكيات والفواتح

الاجتماع ضم ممثلين من اللجنه الشعبيه والنادي والمدارس وجمعيه الشباب

كل موسسة من موسسات القرية عبرت عن حوجتها

فيما يتعلق بلمدراس قال لهم تعالو المحليه وجيبو معاكم التكلفه والمحليه تدفع %50
ياربي ال50% التانية دي البيدفعا منو؟

عن التامين الصحي تكفل بعدد من البطاقات لبعض المواطنين

محافظة بربر ايضا تعاني من مشكلة المركز والهامش فالخدمات علي قلها تتركز في مدينة بربر اما ضواحيها فتعاني الامرين

دعوني انقل لكم مشاركة الاخ عاطف العقيل من الفيسبوك فقد لمس لب المشكلة

Quote: والله يابكرى الخير برغم اننى من سكان مدينة بربر لكن اتفق معك انو ناس بربر والمعتمد يعتقدون ان حدود المحلية تنتهى عند خور الدكة شمالا والقدواب بعد سطوة الشيخ البدرى جنوبا وما بعد ذلك لا احد يجيب خبرهم برغم هم المنتجون الحقيقون السنة الفائته انا ساقتنى خطاى لزيارة صديق لى يعمل معلم فى مدرسة فتوار ورايت قرية وادعة وناس طيبون لكن يفتقدون لابسط الخدمات يعنى لامياه ولاكهرباء ولامركز صحى والمدرسة داخليتها التى تستضيف ابناء وبنات قرى السليمانيه عبارة عن خرابة لاتصلح لسكن الحيوانات ناهيك من اولاد وبنات من بنى البشر وواصلت رحلتى شمالا حتى جزيرة العشير ونفس الشئ ينطبق على الجزيرة لاوجود لمظاهر تدل على انها تنتمى الى محلية بربر وقالو لم يزر الجزيرة اى معتمد الا الاخ حسن سليمان ولعب القبيليه دور فى ذلك لان اهالى الجزيرة ينتمون لنفس قبيلة المعتمد السابق لا يوجد بالجزيرة مركز صحى وهى تقع وسط نهر النيل ولا قدر الله حدث مكروه لاحد من اهلها عليهم الابحار غربا وركوب طرق وعرة حتى يجدوا اقرب المشفى وهى الباوقة اهل الجزيرة اناس منتجون ويكاد يكتفون ذاتيا من منتجاتهم الزراعيه لكن لا احد يساعد كثير من اتباع منظمة بربر فى قلوبنا ينتقدونى عندما اعترض الاولويات المغلوطه وعدم الاحتفاء بها كتنجيل استاد بربر والساحة الشعبيه وفاجعة فيصل المعتمد مسرح النيل ومنتدى شبرين لان ارى ان الاولى بموارد المحليه هى المشاريع الاساسيه كتوفير مياه الشرب الصحيه لكل ارياف واطراف المحليه المهمله المنتجه لا عطالة الرياضة وادعياء الثقافه

Quote: ناس بربر والمعتمد يعتقدون ان حدود المحلية تنتهى عند خور الدكة شمالا والقدواب بعد سطوة الشيخ البدرى جنوبا وما بعد ذلك لا احد يجيب خبرهم

ود العم بكري الخير
طاب نهارك بكل خير
ينفطر القلب لوعة وأسى لحال ناس قريعتي راحت بالمهجر ولكنك اليوم نكأت جرحاً غائراً بهذا الاقتباس ، وزدت الهم همين والألم ألمين ..
فقد صدق كاتب المقتبس في كل كلمة قالها ... فغرب بربر هو هامش الهامش .. ويمكن أن يقود ثورة وتمرداً ولكنهم يتدثرون بالصبر ويقتاتون بالقناعة
الوعود التي امتلأت بها إذهان ناس قريعتي راحت في غرب بربر تملأ دفاتر لو كتبت فهي كلها وعود شفهية تظهر من فينة لأخرى وهم يعلمون ذلك تماماً فأصبحت زيارات المسؤولين لا تعني لهم شيئاً ووعودهم يحملها معه غبار سياراتهم ..
أحسب من يوم الزيارة وحتى وضع أول طوبة لأول فصل وعد كم سنة ستمضي..

ويا مثبت العقل والدين ..

Quote: والله يابكرى الخير برغم اننى من سكان مدينة بربر لكن اتفق معك انو ناس بربر والمعتمد يعتقدون ان حدود المحلية تنتهى عند خور الدكة شمالا والقدواب بعد سطوة الشيخ البدرى جنوبا

سلام يا بكري
الزول الكتب الكلام الفوق ده دحين ما عكس الاتجاهات و لا أنا رأسي لافي؟
المهم بخصوص المدرسة نقول الله يرحم أيامك يا ابوالعباس.
تحياتي و احتراماتي لك و لزوار البوست الكرام

عكس ابوها زاتو يا وليد


بكرى ياهامش ازيك

Quote: الزول الكتب الكلام الفوق ده دحين ما عكس الاتجاهات و لا أنا رأسي لافي؟

الوليد ود الشيخ
التحيات الزاكيات
بالفعل كاتب المقتبس هو الراسو لافي لكن فكرته وصلت ..
ويا مثبت العقل والدين ..

صدق الزول الأتكلم عن فتوار

انا من ابنائها
المعتمد الجديد والقديم تم تكريمهم في فتوار واصدروا وعودا سارت مع الهواء الماشي
زي ما قلت لاكهرباء لاوموية لا شفخانة لا ...... بالرغم من أن شركات تعدين الذهب تنهب موارد المنطقة وهي على بعد 17 كلم من فتوار!!!!!