هل يعود؟!!

10:58 AM Feb, 19 2015
سودانيز أون لاين
د.محمد حسن -
مكتبتي في سودانيزاونلاين



يانية لاصفة كما النجوم
انا وانت والليل والسهر
وجحافل الاطياف تبدد
من العيون الواسنة
نوم
يلاك على طول المسافة
نمشيها نتقاود سوا
بيناتنا الفة
وبيننا يغشانا الهوى
نفتح نوافذ للحلم
عشم الصغار
في ليلة دافية بلا هموم
اديني ايدك يا الجميلة
ما نحن في الاشجان
بننسج
من الاماني
الحايمة بين جنبينا يوت
احرف
تتمنى لو تغشى المرافي
او
تحس حالة السكون
في لحظة يوم
الموجة تحمل في حشاها
سر كل الخلوق
الحايمة هايمة
بتفتش الحالة الوطن
وانا في البعيد
شايل الوطن جوايا كوم
وتر الحنين اتشد ناعم
والحروف تتلبسا الحالة الطرب
مطر الشجون صابب علي
كل البراعم انبتت
واتناثر القول القصيد
مابين مشارف امدر
وابعنجة
لي عند مقرن النيلين
واتمد للخرطوم عموم
عشتك تفاصيل من حكايات
في مسامات الحجاوي
وسوسنات نرميها للقمرة البعيدة
وهل بعود من غاب يوم؟
ويكبر نحن في جوفنا السؤال
كلما لفظتنا من جوفا المنافي
والاجابة
هناك في القيفة الحنينة
والساقية
البتسقي لي جرفا
حفظ طعم الاغاني
لما كنا
بنعزف الطمبور نغني
مع القمر
ونقلب الايقاع دليب
قبل الزمان يرمينا بالناس السجم
والوجبة تتحول سموم
انا وانت والنخل البسامق للسما
انا وانت والقمري البقوقي مع العصير
انا وانت والاشواق ردوم
يلاك على طرف البحر
نغسل حزنا ونرتشف
نهمس مع الموج الوجع
اديك كلام مليان شجن
تديني منك نظرة للفجر البتاوق لينا
من بين الستور
واقراك من بين السطور
برقا بيومض بالبشارة
معنى الكلام
الجوة في خاصرة وجع بيحوم
مسدار حقيقة
لا بتتغطى
لا بتروح
هياك على اول بدايات الربيع
هياك نبذر
نرمي التواريب للخريف
خليها مطمورة وميقنة
مستنية الزمن الخصيب
وانا ليك مبذول يا مناي
سترك انا وماعون ادامك للضيوف
لامن يجوك والليل هزيع
ما اروع الناس الضيوف
والليل هزيع
وبس

*

*