Post: #2 Title: Re: مستثمر يشكو من سوء المعاملة في المطار Author: وائل حمزه الزبير Date: 02-14-2015, 09:34 AM Parent: #1
G.M.T
Post: #3 Title: Re: مستثمر يشكو من سوء المعاملة في المطار Author: د.محمد حسن Date: 02-14-2015, 12:10 PM Parent: #2
حسب كلام اخوانا وائل حمزة الزبير يعني الرسود دي ماخودة بتوقيت قرينتش وليس توقت ام القرى عليه لا يجوز اخد ايصال عليها
Post: #4 Title: Re: مستثمر يشكو من سوء المعاملة في المطار Author: وائل حمزه الزبير Date: 02-14-2015, 12:21 PM Parent: #1
دكتور محمد حسن
حقيقة حينما رأيت مداخلتك ابتسمت ضاحكاً .. هذه الاختصار هو اختصار يعرفه بعض الاعضاء هنا .. وحتماً سيأتون مترجمين له .. اصبر قليلاً .
Post: #5 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-14-2015, 07:52 PM Parent: #4
سلام للجميع الأخ وائل الرجاء شرح عبارتك G.M.T
Post: #6 Title: Re: مستثمر يشكو من سوء المعاملة في المطار Author: منتصر عبد الباسط Date: 02-14-2015, 08:29 PM Parent: #1
اللهم أفضح ولا تستر أي فساد وفوضى تحدث في بلادنا في المال العام والمؤسسات والمرافق العامة .... أنا في آخر سفرية سألت مكتب سودانير عن رسوم المغادرة فقال لي أنها مضمنة في التذكرة وأنها تؤخذ فقط من السفريات الداخلية ... وأما ما حدث هنا نوع من البلطجة والفوضى التي يعيشها السودان منذ ربع قرن من الزمان ولأن أي موظف يعلم أنه سوف لا يواجه أي محاسبة فالمحاسبة معطلة بصورة رسمية إلا محاسبة الخصوم السياسيين . وهناك دليل بالفيديو على أن عدم المحاسبة أمر مقرر بصورة رسمية لكن مافي داعي المسألة طالما فيها اجانب فليس من اللائق التعريض بزعامات لا نرضاها ولكن ليس في حضرة غير السودانيين.
Post: #7 Title: Re: مستثمر يشكو من سوء المعاملة في المطار Author: أسامة العوض Date: 02-14-2015, 08:44 PM Parent: #1
نعمات عماد مساء الخير نقول لهذا المستثمر المحظوظ الذي نفذ بجلده (ومرقنو كرعينو) , الجاتك في 380 جنيه سامحتك , وعليه أن ينظر في مصائب غيره من المستثمرين السودانيين الذين سبقوه في الهروب فتتضاءل أمام عينيه مصيبته لك التحايا
Post: #8 Title: Re: مستثمر يشكو من سوء المعاملة في المطار Author: نعمات عماد Date: 02-15-2015, 10:37 AM Parent: #7
سلام و تحية الأعزاء
د . محمد حسن
يوسف الطيب احمد إدريس
منتصر عبد الباسط .. رجاءا الفيديو المذكور و أكون لكم من الشاكرين .
أسامة العوض
شكرا للتعليق و المرور الكريم . فائق الإحترام و التقدير . اليوم لم تصدر صحيفة (التيار ) . ربما من تحت رأس هذا الخبر
Post: #9 Title: Re: مستثمر يشكو من سوء المعاملة في المطار Author: Alfarwq Date: 02-15-2015, 11:09 AM Parent: #8
السعودي مسكين اتلحس و هو يتفرج ... ديل همباتة ليس الا .... قبل اقل من شهر مريت بمطار الخرطوم و لا توجد رسوم مغادرة و لا يحزنون ...
لكن هنالك من ضباط الجمارك و الامن من يستغل نفوذه و يسترزق بالحرام ... و هم كثر ... و حكى لي صديق يعمل ضابط في المطار استغال من وظيفته لتجنب الكسب الحرام ما يشيب له الراس.
و انا عندي قصة مشابهة في مطار الخرطوم برفقة زوجتي الله يرحمها و يغفر لهافي احدى زيارتنا للسودان. نحن الاتنين من حملة الجوازات الاجنبية و كان عندنا كاونتر فيزا ... نسخة معانا و نسخة في المطار و الاصل مع اخوي..
المهم عند وصلنا للمطار ابتدى الضابط المناوب الاجراءات و لكن بعد دقايق انتهة وردية الضابط و استلم مكانه ضابط اخر.. و رفض الضابط الاخر مواصلة الاجراءات مدعيا ان تاشيرة زوجتي الله يرحمها ما موجودة ... في حين التاشيرة موجودة امامنا و كل مرة يقلب الاوراق و يقول التاشيرة دي ما موجودة و انا كل ما يقلب اوقفه عند تاشيرة زوجتي و اقول ليه التاشيرة ياها دي. و هو يقول يازول انت حتوريني شغلي ... فلم شفت الموضوع مطول قلت ليه طيب اخوي الطلع التاشيرة موجود برة و ممكن يجيب ليك الاصل .. رفض فسالته عن الحل قالي انت تدخل و زوجتك ترحل ... قلت ليه رحلنا الاتنين رفض و قال هي بس تترحل ... المهم اشتبكنا و قلت ليه باللفظ "انت قايل حتمنع زوجتي دخول الجنة ... هي جهنم و نحن رضينا نجيها" و اتحديته يرحل زوجتي .. المهم اتدخل مدير الخطوط الجينا بيها للسودان و الضابط قال خلاص نمشيهم عشانك ... شوية و الضابط يرسل لي واحد اسمه شوقي طلب مني اتساهل معاهم و فرك الصبابة و الابهام و الضابط ما عنده مانع يخلص ليك الاجراءات ... رفض قلت ليه يا اما ترحلنا او تسمح لينا بالدخول .... اما اني ادفع رشوة دي مستحيلة... و ما ان سمع الضابط المرتشي كلامي هاج و قربنا نتشابك بالايدي و دخلوا بينا الحاضرين و في الثناء دي دخل المكتب ضابط اعلى رتبة و معرفة اتصافحنا و لمن شرحت ليه الموضوع اخد الاوراق و كمل لي اجراءاتي و التاشيرة كانت موجودة بس المرتشي عايز يصعبها عشان يسترزق بالحرام ... المهم بعد ما خلصنا الاجراءات و اخدنا التاشيرة مشيت للضابط المرتشي و سمعته الفارغة زي الترتيب و اتحديت يعمل الدايروا ... لكن جبن لانه عرف موقفه صعب مع قريبنا..
و قبل كدا حضرت موقف مماثل لامراة جاية من امريكا تزور اهلها ..
Post: #10 Title: Re: مستثمر يشكو من سوء المعاملة في المطار Author: ملهم كردفان Date: 02-15-2015, 12:33 PM Parent: #9
يعنى مانجى نستثمر فى السودان والا شنو ياصاحبة السمو....
عليكى الله ماتقولى لى والا شنو...!!!
تحليه استثماريه ... اطيب التحايا مستثمره طوعا فى هذا البوست لك ولزوارك الكرام
Post: #11 Title: Re: مستثمر يشكو من سوء المعاملة في المطار Author: عزالدين عباس الفحل Date: 02-15-2015, 12:46 PM Parent: #10
نعمات عماد
...
الحمد لله شفنا مطارات كثيرة ، لكن بصدق ، في مطار الخرطوم المعاملة راقية ، رغم شح الإمكانيات ، لكن ، We must decide to give every passenger our best service ،،،،
...
عزالدين عباس الفحل ابوظبي ...
Post: #12 Title: Re: مستثمر يشكو من سوء المعاملة في المطار Author: منتصر عبد الباسط Date: 02-15-2015, 12:53 PM Parent: #1
الأخت نعمات و لك التحية رجاءا الفيديو المذكور و أكون لكم من الشاكرين أبشري . سأعرضه لاترك للمشاهد الحكم على ما ورد بنفسه وبفهمه الخاص وقياساً على كلام السيد الرئيس الوارد في الفيديو:: (هل السعودوي دا موظف المطار أخذ منه مبلغ معين والسعودي دفع وذهب إلى بلده الموضوع انتهى هينا تاني التحقيق لزومو شنو ؟؟؟) وتاني الكلام الكثير لزومو شنو ؟؟؟
Post: #13 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-15-2015, 12:59 PM Parent: #12
الأخ وائل
Quote: G.M.T
يعني (غمت) ولا شنو ؟
Post: #14 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-17-2015, 05:51 AM Parent: #13
قامت إدارة مطار الخرطوم بالاتصال بالسعودي والاعتذار له عما بدر من موظفي المطار .
Post: #15 Title: Re: مستثمر يشكو من سوء المعاملة في المطار Author: ود الباوقة Date: 02-17-2015, 06:12 AM Parent: #14
حكاية عجيبة والله
مستثمر الجن دا مش مفروض يسافر بي صالة كبار الزوار
لا من شاف ولا من دري
هو قاعد معزز مكرم امامه اطباق الفواكه والعصائر وتتم له
كافة الاجراءات في مكانه ومن ثم تاخذه سيارة خاصة لسلم الطائرة
Post: #16 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-17-2015, 06:14 AM Parent: #15
يا ود الباوقة كيفنك بطريقتك دي بتبقى عليه (آخر البليلة حصاص)
Post: #17 Title: Re: مستثمر يشكو من سوء المعاملة في المطار Author: ود الباوقة Date: 02-17-2015, 06:18 AM Parent: #16
Quote: بطريقتك دي بتبقى عليه (آخر البليلة حصاص)
اخونا يوسف
الحصحاص ترى في نفر كلامهم دا
موضوع رسوم المغادرة اصبح مضمن مع التذكرة بالفعل
عشان كدا الرواية مجوبكة ما لم تتبين الامور من الطرف الثاني
وشكرا
نعمات كيفنك
Post: #21 Title: Re: مستثمر يشكو من سوء المعاملة في المطار Author: Saifelyazal Elmaki Date: 02-17-2015, 07:03 AM Parent: #17
Quote: اخونا يوسف
الحصحاص ترى في نفر كلامهم دا
موضوع رسوم المغادرة اصبح مضمن مع التذكرة بالفعل
عشان كدا الرواية مجوبكة ما لم تتبين الامور من الطرف الثاني
وشكرا
نعمات كيفنك
الكلام ما مجبوك ولا اي شيء انا شخصيا دخلت بجواز اجنبي شالوا مني نفس المبلغ بطل استهبال
Post: #18 Title: Re: مستثمر يشكو من سوء المعاملة في المطار Author: Kamal Karrar Date: 02-17-2015, 06:20 AM Parent: #15
أخي ود الباوقة..
السلام عليكم .. صحيح ده البيحصل...وشيء مخزي والله...
لو كنت مسئول في المطار كان حققت مع كل العاملين في الوردية..
وأكيد كان نهايتها رفت المسئولين عن الحادثة المؤسفة دي,,,
حقو كلنا ندين هذا السلوك إذا وجد...
تحياتي
Post: #19 Title: Re: مستثمر يشكو من سوء المعاملة في المطار Author: ود الباوقة Date: 02-17-2015, 06:24 AM Parent: #18
نعم ان وجد ندينه ادانة كاملة بالتاكيد
شكرا اخي كمال
Post: #20 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-17-2015, 06:31 AM Parent: #19
يا باوقة المجوبك شنو في الرواية عشان نفهم
Post: #24 Title: Re: مستثمر يشكو من سوء المعاملة في المطار Author: Alfarwq Date: 02-17-2015, 08:45 AM Parent: #19
يا ودالباوقة المعكاسات و تسهيل الامور مقابل الرشوة موجودة و بالهبل ...
انا لي قصة سردتها فوق ... و قضة صديق لي يعمل ضابط برضه مكتوبة فوق ...
مرة قبل ما يطلعوا البطاقات المزدوجة مشيت شؤون الاجانب للتسجيل و عمك المحصل رفض يديني ايصال و انا رفضت اديه القروش من غير ايصال و بعد جدال و نقة و الناس اتلمت نبذني و قال لي زول فقر
خليك من الضباط الكحيانين ديل ... ود عمي جا السودان يعمل شغل صرافة و الموضوع عسلج اها واحد من معارفه قال ليه يعرف زول يساعده ... و الزول طلع احد ضباط و رموز ثورة الانقاذ المشهورين ... عمل فترة في ولاية الخرطوم و اختلص ما طاب له من الحرام ... اها و دعمنا و صحبه مشوا للزول دي بعد المغرب في البيت ... اها صحبك قال ليهم اول عشان نتفاهم ادفعوا 12 الف دولار و دعمي قال ليه لو فتح الخشم بي 12 الف الباقي حيكون بي كم ... قام لملم اوراقه و مشى دبي فتح الصرافة و في امانة الله ...
فيا ود الباوقة الشغلانة خربانة من فوق
Post: #22 Title: Re: مستثمر يشكو من سوء المعاملة في المطار Author: محمد مجيدو Date: 02-17-2015, 08:00 AM Parent: #1
الاخت نعمات .. وضيوفك ... السلام عليكم ..
هذا الامر تكرر كثيرا ... عندنا زميل اردني تم تكليفه لحضور فعاليات معرض الخرطوم الدولي والترويج لمنتجاتنا في السودان .. وقمنا بعمل تاشيرة دخول له من السفارة السودانية بالرياض .. وعند وصوله لكاونتر الجوازات .. طلب منه موظف الجوازات ان يضع ورقة مائة ريال في الجواز لتسهيل دخوله ( حسب ما قال لي ) وعندما رفض الاردني الدفع ... تم معاكسته من قبل الموظف بحجة ان تاشيرة الدخول غير سليمه ... وتم تاخيره لمدة ساعه تقريبا .. وعند اصرار الاردني بعدم دفع اي رشوى ثم طلب مقابلة مدير الصاله للاحتجاج .. سمح له بالدخول على مضض ... وكذلك عند خروجه .. ايضا تم معاكسته .. وطلب منه دفع مبلغ 308 الف جنيه كتاشيرة خروج قام بدفعها دون تسليمه اي ايصال بذلك .... ويحكي لي هذا الاردني بسؤ معاملة موظفي الجوازات له وانهم عبوسين مكشرين .. ولم يتوقع هذه المعامله السيئه من سودانين كان يتوقع منهم اللين والطيبه كما هم في الخليج ... وانا بدوري اطالب السلطات بالتحقيق في ذلك لما له اثر سلبي في جذب الاستثمارات الاجنبيه للبلد.. مع عدم وضع كل موظفي الجوازات في المطار من اقليم واحد ....
تحياتي ,,
Post: #23 Title: Re: مستثمر يشكو من سوء المعاملة في المطار Author: يوسف الطيب احمد إدريس Date: 02-17-2015, 08:35 AM Parent: #22
في انتظار ود الباوقة لمعرفة (الجوبكة) وين ؟
Post: #25 Title: Re: مستثمر يشكو من سوء المعاملة في المطار Author: نعمات عماد Date: 02-17-2015, 10:15 AM Parent: #23
سلام الأساتذة الأعزاء Alfarwq ملهم كردفان عزالدين عباس الفحل منتصر عبد الباسط يوسف الطيب أحمد ادريس Saifelyazal Elmaki Kamal Karrar محمد مجيدو
ما قلتم الأ الحق ، فشكرا لكم علي إثراء البوست بتجاربكم و أرآئكم
شكرا أستاذ منتصر علي الفيديو . كلام البشير هو ملخص لشعار الدولة الأمنية المتأسلمة .
سلام ود الباوقة
المستثمرين ح يكذبوا ليه ؟ حاول نصح الجماعة ( كان ينفع ) بدلا عن النكران حتي لا يخسر السودان المزيد من الإستثمارات .
تحياتي للجميع .
Post: #26 Title: Re: مستثمر يشكو من سوء المعاملة في المطار Author: عبد اللطيف بكري أحمد Date: 02-17-2015, 10:39 AM Parent: #25
غايتو بلد بقت على هامش التاريخ والجغرافيا،،
الحكومة تسرق والشعب يسرق
صديق من جنسية عربية جاء السوداني في وفد علمي مع مجموعة من المشاركين في المناسبة
دخلوا المسجد لصلاة الجمعة = خرجوا بلا أحذية ،،
تخيل وفد لابسين رسمي وجايين ضيوف اكيد كل واحد عندو حذاء واحد ويطلع حفيان مايعرف يسوي شنو،،
أبيخ ما في الموضوع : كل مايلاقيني يذكرني بالخيبة دي من السودان ،، والله فكرت أمشي اشري ليهم كونتينر حق احذية هو والمعاه،،
البلد دي عايشة في ملكوت آخر ياجماعة،،
لازم تلحقوها
Post: #27 Title: Re: مستثمر يشكو من سوء المعاملة في المطار Author: محمد علي البصير Date: 02-17-2015, 11:41 AM Parent: #26
Quote: صديق من جنسية عربية جاء السوداني في وفد علمي مع مجموعة من المشاركين في المناسبة
دخلوا المسجد لصلاة الجمعة = خرجوا بلا أحذية ،،
تخيل وفد لابسين رسمي وجايين ضيوف اكيد كل واحد عندو حذاء واحد ويطلع حفيان مايعرف يسوي شنو،،
أبيخ ما في الموضوع : كل مايلاقيني يذكرني بالخيبة دي من السودان ،، والله فكرت أمشي اشري ليهم كونتينر حق احذية هو والمعاه،،
أستاذنا الحبيب عبد اللطيف بكري لك تحية ود وتقدير والله دا موقف تستحق فيه المواساة الله يصبرك يا حبيب
Post: #28 Title: Re: مستثمر يشكو من سوء المعاملة في المطار Author: منتصر عبد الباسط Date: 02-17-2015, 12:51 PM Parent: #1
Quote: لو كنت مسئول في المطار كان حققت مع كل العاملين في الوردية.. وأكيد كان نهايتها رفت المسئولين عن الحادثة المؤسفة دي,,,
