شوتات قصيرة من زول فاضي شغلة

08:06 AM Feb, 14 2015
سودانيز أون لاين
عادل الباهي عبدالرازق - زي أبن بطوطه رحال
مكتبتي في سودانيزاونلاين



بما أنو اليوم عندنا ويكند وماعندي موضوع وأصدقاء السوء محتفلين بالفلانتين دي قلنا نقعد نتونس ونتزكر خواطر وقصص ومحن مرت علي الواحد
في مصارعته للحياة من بلد لي بلد في شكل ونسة بعيدا عن ساس يسوس وسوف أترك الباب موارب لاي زول عاوز يتونس والدنيا اخرها كوب تراب

من أجل عينيك


في عهد الصبا كنت مولع بجمع قصاصات أحدي أعمدة الصحف السودانية ( خانتني الزاكرة في أسم الصحيفة ) العمود كان تحت أسم
من أجل عينيك ، والزمن داك لا كان في موبايل ولا ماسنجر ولايحزنون ، الحنك كلو عبر الورق . بتقطع ليك ورقة من كراس وترش ليك
رسالة غرامية زي الترتيب
أها أنا كنت بجمع قصاصات من أجل عينيك أسبوع أو أسبوعين وبعمل ليها كوبي آند بيست في ورقة كراس كجواب غرامي ( ولا بتعب نفسي )
وبشرك بيها للبنات مرة تصيب ومرة تخيب وأنا خسران حاجة ؟
المهم في يوم ذات عصرية صدر فرمان من الوالدة بزيارة قريبة لنا كانت قد أجرت عملية في عينها وكانت تسكن في الاحياء الطرفية من
ولاية الخرطوم ومن الاحياء التي لم يمن عليها المسئولين بأعمدة الكهرباء . دعوني قليلا أحدثكم عن قريبتنا هذة كانت أمراءة مجاملة للحد البعيد
وعكسها تماما زوجها وأبنائها كانو يطلقون عليهم مصطلح حمام ميت
وفي تلك الفترة كنت اعاني من داء الفلس وفي اليوم دا بالذات
لو نفضوني ما بتطلع من جيوبي ثمن كوب الشاي فكنت من المحتجين والمنددين بهذة الزيارة أخيرا طالبت بقرضي بضع جنيهات تسد رمق
جيبي ومنها أبر ببعضها علي قريبتي صاحبة عملية العيون ولكن هيهات رفض شقيقي الاكبر وأبن خالتي مقترحي بحجة أذا أقرضوني
جزء من المال سوف يسجل أمامة دين هالك وهم سوف يصطصحبوني لتلك الزيارة وبعد مداولات أصدرت الحاجة قراراها بأننا سوف نذهب
ولكن لا شأن لنا بالمجاملة هي كأمراءة سوف تجاملها . شددنا الرحال لهذا الحي الطرفي وكنا متوقعين لقاء فاتر من زوجها وأبنائها كعادتهم
وكانو سوف يزيحو عنا حرج الغمت تحت المخدة ولكنهم في هذا اليوم خيبو ظني انا بالتحديد ، أستقبلونا أستقبال الفاتحين وأحضرو لنا المعدوم
من اسواق الخرطوم ومع هذا الكرم بدأنا نتحدث أنا وشقيقي وأبن خالتي بلغة العيون وهذة اللغة كأسرة كنا نجيدها جيدا الي هذا اليوم في وجود
الاغراب لا حاجة لنا للحديث فبلغة العيون نتحدث ويفهم بعضا البعض جيدا . نظر الي شقيقي نظرت لابن خالتي وكان كل الذي قرأتة في عيونهم
بعد هذا الكرم نحن في حل من الاتفاق الذي أبرمناهو معك يا الدائش ، تأكل نارك . أحسست بالحرج قربت أدخل في اظافري ومع قيامنا للوداع
هب المنزل كله واقف في وداعنا أخذ شقيقي جانب ووجهه علي الحائط يريد أن يخرج مبلغ من المال من محفظتة وأستدار أبن خالتي نحو صدر الحائط
المقابل له وأخرج محفظتة ولم أجد أي طريقة غير أن أستدير نحو الحائط الثالث وأخرجت محفظتي التي كنت أعرف مسبقا تعاني من فقر الدم اللهم الا
قصاصات عمود من أجل عينيك كنت قد جمعتها لارسال خطاب غرامي فأخرجت القصاصات وأستدرت ناحية المريضة وكان الوقت بعد المغرب وقبل
آذان العشاء ودعتها ووضعت قصاصات من أجل عينيك تحت المخدة مع المبلغ المالي لوالدتي وشقيقي وابن خالتي وخرجت .
وبعد أن تحركنا بالسيارة سألني شقيقي من أين أتيت بالمال الذي وضعتة تحت مخدة المريضة ؟ قلت له لم أضع مال وضعت قصاصات من صحيفة
وهنا أشتاط غضبا كيف سمحتي لي نفسي بهكذا عمل . قلت ليهو خليها تجمع قروشكم وتقسما علي أربعة .

لكن بيني وبينكم قريبتنا دي لو قرت قصاصات الصحيفة تاني مابتحتاج لعملية عيون .

يا ولدي الحاجة السمحة بتتشاف


في أحدي إجازاتي لمسقط رأس أبي ، كنت متواجد بعد صلاة المغرب بدكان يطلق علية أسم دكان التعاون والرتينة
تضيء عتمة الظلام حضر جدي يحمل جردل يرغب في كوتة التموين من السكر فنظر الي ولم يعرني إهتمام فقمت
بادرتة إزيك ياجدي ؟ قال لي منو أنت ؟ قلت ليهو عادل فطوالي هي ياعادل ياولدي العتب علي النظر جدك خلاص عيونو
ودرن لكن إنتظر شوية لحمل السكر لخالتك . وبينما أنا منتظر والدكان مكتظ بجمع غفير والكل هدفه واحد كوتة السكر
حضرت أحدي البنات أيضا لنفس الغرض ، فالقت السلام علي جدي ، طوالي الحاج مسك ليك يدها
أزيك يانهي إنشاءالله أنتي كويسة
أهلك كيفهم حالكم كيف ، أخبارك و أحدي أيادية الكف مع كف البنت واليد التانية روحت وصلت كوع البنت ( جس صاح) وطوالي صاح في بتاع الدكان
ياعثمان مشي نهي دي في الاول وبعد ما أستلمت نهي كوتتها وقادرت لم أتمالك نفسي فضحكت ، التفت نحوي
بتضحك مالك ياولد بلهجة صارمة فأتشجعت وقلت ليهو أنا ياجدي بعد صلاة المغرب ماعرفتني وقلت النظرضعيف، هسع نهي قريب صلاة
العشاء عرفتها كيف ، عاين لي من تحت النظارة وأزال وجه الصرامة وقال لي ياولدي الحاجة السمحة بتتشاف .

مدير أعمالي

أكثر شيء بيخليني أنشرط ضحك لمن أي فضائية سودانية تنطس في نظرها وتعمل لقاء مع الفنانين الشباب ( الرقشات ) ويقوم يجيب ليك في نص كلامو
عبارة مدير أعمالي ، يأخ البعض منهم مرات أن بكون أول مرة أشاهدو أو أسمع ليهو . مدير أعمالك هي وين الاعمال البتعين ليها مدير ، الواحد منهم بيعمل
ليهو بالكثير في الشهر حفلتين زواج واحدة بثمن لا يستطيع بثمنه شراء بدله فل سوت والحفل الاخر بي بطنو مجان ( مجاملة ) قابلت قبل الان أحدهم في
طائرة الخطوط الاماراتية المتحركة من دبي وكان يجلس بجواري المهم تونسنا ومن معرض حديثة عرفت أنه متهجم علي الفن ، كسر لي رأسي زمن
الرحلة كلها وانو عندو اغاني علي اليوتوب وووووو وبعد أقتراب الطائرة علي الهبوط اتلفت نحوي بتلك العبارة
( والله ياعدولي رقم تلفوني بتغير كثير هربا من مكالمات ناس خفض لي في السعر لكن هاك دا تلفون مدير أعمالي) وحتي لا أحرجة أخذت الورقة التي بها الرقم
وبمجرد نزولي من الطائرة أقرب سله زبالة حدفت بها الرقم وتشهد علي سلة زبالة مطار الخرطوم . ومن باب الفضول دخلت لليوتوب وعملت بحث
لاسم الاستاذ ومع أول أغنية بطني رجعت لكن الشهادة لله حتي لا أظلمة ماعارف عاوز أرجع ليه من صوتو ولا من الكمونية الحشيت
بيها بطني في الافطار . مرت السنوات وبقدرة قادر الزول دا لما ليكم فيني لافي في نواحي الشبكة العنكبوتية دي وبالفعل زاكرتو حديد
وقبضني وهاك ياونسة ( ونسة مصلحة) الاورغن سعرو كم ، الساوند بيكلف كم ، خليتو لمن كمل كلامو وفي الاخر قال لي
عليك الله رقم الهاتف بتاعك عشان نتواصل كتبت ليهو أنت ماعارف ؟ عدولي زاتو عمل ليهو مدير أعمال وسكرتيرة فوق البيعة
أنت قائل الوهمات دي بتعرف ليها براك لكن ممكن أديك تلفون مدير أعمالي ورشيت ليهو تلفون بتاع الجزارة .