تقسيمات سودانيز اون لاين

05:36 AM Feb, 13 2015
سودانيز أون لاين
عبدالحفيظ ابوسن - كوستي / حي الشاطئ
مكتبتي في سودانيزاونلاين



هسة الواحد لو داير يقسم الناس الهنا وفقا ل
الاهتمامات
ممكن يقسمهم كيف
اقلاها لامن تخش تكون عارف انت قاعد في ياتو مصطبة

المساعدة مطلوبة والله
واحد من ناس النصر مدخل كوستي .. مريخابي متعصب .. كان في مدني وهلال كوستي لاعب هناك .. مؤجرين حافلة . قال لي معاذ كروبين وهو صاحبو .. ما لقا مواصلات مدني كوستي .. اها احسن يمشي الاستاد ويرجع مع ناس الهلال والدنيا ليل ... ركب معاهم وهاك يا نقاش .. ويشكر في الهلال واللاعبين والهلال كان مغلوب .. وركز علي ظلم الحكم والنتيجة ما عادلة
وصلوهو بيتو
نزل ونزل شنطتو
والحافلة اتحركت
مد يدينو الاتنين في حركة تجديف وبي طول حسو
شرط ... شرط ...
السواق من الضحك داير يعمل حادث

عبدالحفيظ
كيف امورك
يكفي أنه منبر عام
يعني كوكتيل

أخي ودأبوسن
تحياتي
تعرف ما أظن في تصنيف سياسي لانو مسطبة الجادين وأهل الفكر والعقل العدد فيها قليل جدا
والادب كذلك
ولكن ممكن تقول
الساخرين والساخرات
الاجتماعيين والاجتماعايات
وناس الاقتصاد رجالاونساء
والفوضويين ومحبي العبث والفارغة
والجماعات الدينية من أهل ذمة ومسلمين ومتشددين
وسخفاء العصر وهو يحملون بضاعة التعاسة تكدير للعامة
ونعاني قلة الظرفاء بيننا و أنت من ظرفاء هذا الحوش صديقي
لك كل الود وعيد حب يمتد عام وأعوام طوال

4 2 4

اربعة للدفاع عن مكوناتك

اتنين بكتبو بموضوعية

اربعمائة واربعين هجومات شخصية

مرحبا ود قاسم
وحبابك
لا خلاف فهو منبر عام وكما الواقع يضم جميع الفئات .. مجتمع مصغر او قل عينة احصائية صادقة لما عليه الواقع
المشكلة كيف افرز

تحية

التقسيم يا استاذ عبد الحفيظ متروك لحصافة الشخص في المتابعة واختياره الشخصي في التعامل او التداول عن الفكرة المعينة..

وطبعا اللجوء الي التقسيمات يقودنا الي التنميط وتجميد الناس في اطر محددة عكس ما يراد للمنبر..

تخريمه: احد اصدقائي الظرفاء من كوستي قال لي ذات يوم أن ناس مريخ كوستي كلهم هلالاب فتأمل.

( نفتح نافذة تذكار لصديقنا عباس راوة ومسامراته الباذخة)

Quote: احد اصدقائي الظرفاء من كوستي قال لي ذات يوم أن ناس مريخ كوستي كلهم هلالاب فتأمل.

رهيبة يا محمدالكامل عبد الحليم .. ههه

ملحوظة : لو ما كلمة فتأمل دي أنا ما كنت أتأملت ..
فتأمل :)



وتحياتي للأخ عبدالحفيظ أبوسن والأخوة المتداخلين ..

تحية

جميل يا منير أن تحفزك حروفنا المتواضعة الي التأمل في زمن اصبحت فيه المسامرة نادرة ندرة الكببريت الأصفر كما يقول دكتور عبد الله الطيب يرحمه الله..

بقي ان ننتظر ثمار التامل...وواضح من صورتكم البهية أنك من الشخصيات الطاردة للتجهم...

لك احترامي وسلامي..

سلام وتحايا أخي محمدالكامل ..
ردك الودود يرد الروح .. ويحسسك بأن الكلمة الطيبة كشجرة طيبة ..

كلماتك متواضعة كيف ياخي ؟؟ الطرفة عن مريخاب كوستي كلهم هلالاب دي والله تخليك فعلاً تتأمل كيف إنو مزج المتناقضات إبداع .. عبارة مدهشة أكيد أدهشتك قبل ما تباصيها لينا هنا :)
وتحية ليك ولصديقك ..

تحية

رن جرس الهاتف ومددت يدي بالسلام( شعوريا) فأتاني صوته:أنت فالح الدوسري.؟ قلت له أسف يبدو ان الرقم خطأ..اجاب منفعلا: ليش ترفع السماعة بعد؟؟

نقول ايه يا منير...الشكية لي اب ايدن قويه..

هههها حلوة يا ود الكامل
أنا غايتو الأيام ديك كنت هلالابي، لكن تحت تحت بشجع فريق الوطن
كان فريق مميز ياخ، وناس كوستي يعرفو ذلك جيدا
الآن كلو دا راح وانطوى
يا ربي الأحداث البتمشي وتصبح ذكريات دي، بتكون هي الأساس ونحن نمر بيها فقط أم العكس

----
يا عبد الحفيظ التقسيمة دي إلا تمشي ورشة عمك جارو يظبطها ليك

مرحبا زهير
وكتر خيرك
يعج المنبر بتشكيلات مختلفة من الظرفاء نفعنا الله بقرقرابهم وضحكهم وانتفاخ اوادجهم مرحا
وفيهو اهل الطرب والمتعة من يهزمون تعاستنا بجميل اختيارهم
وفيهو اصحاب الرد الحاضر المرح الطريف الذي يؤسس للحميمة
وفيهو عكاز الخاتي
وفيهو عكاز الطرور
وعود العشر
علا
علا خايف اضطر زي المريخ حق ناس كوستي
ولا اخش لي في وكرة وتغلبني المرق منها الا املص عراقيني حتي اتحل !!!

مرحب محمد حسن
بخصوص الارقام ونكتة ذات دلالة بعيدة
قالو وواحد ببول في زقاق جاهو شيطان ومسك ب خصيتيه وقال ليه ..
ناقص اتنين ولا زايد اتنين
زولنا فكر وقال ليهو
زايد اتنين
وخرج ب 4 خصيات
احتار وفكر بعد تعبو من الخصي التي تعيقه السير
و
قال امشي ابول تاني في الزقاق ولو جاني اقول ليهو ناقص اتنين اشيل اتنين وارجع عادي
وفعلا
جاهو وامسك بال4 خصيه !
وقال ليهو
زايد اربعة ولا ناقص اربعة

رحم الله عباس راوة فقد كان طريفا ذكيا مثقفا
وكذلك كان والده احمد عبدالكريم ود راوة ..فقد كان والده صديقا لوالدي .. وصاحب حكاوي بحكم عمله بالسكة حديد
رحمهم الله جميعا
ومن نافلة القول ان اذكر انه شقيق الفريق ابراهيم احمد عبدالكريم الاديب ذو الذاكرة الفتوغرافية
تشكر محمد الكامل وللاسف لا افهم في الرياضة ولا معرفة لي ولا هواية لي فيها سوي ما اسمع عنها من حكاوي

تحية

يا معاوية الزبير سلام...

سؤالك الحالم عن الاحداث التي تمر ثم تصبح ذكريات هل هي الأساس ونحن نعبرها فقط أم العكس سؤال يثير قضية فلسفة الزمن وماهيته: هل يمر بنا أم نمر به...وبهذه الطريقة سنتحول الي مراجعنا ونبدأ في دك حصون الذكريات الي أن تسكت شهرذاد عن الكلام المباح..

والحال كذلك ندلف الي ابراهيم عوض وهو يستوطن ذاكرتنا( اليوم البمر مابنلقاهو تاني...صابحني ببسمة ومسيني بأماني)...الشاعر يطرح لنا فلسفة القفز فوق الزمن والاستقرار بين قوسي الأبتسام والأمنيات..عندئذ لايهم أن تتجمد رؤانا لأنها ببساطة في انتظار اشتعال الشوق عند حافة اللقاء المنتظر..

ويا عبد الحفيظ لك الاحترام المستدام..

مرحبا منير
وحبابك
تشكر والله ويشكر معك ودالكامل
تعرفو شان ما اطلع كضاب . ناس كوستي حسب ملاحظتي لانتمائهم للفريقين بكوستي ضعيف .. لكن انتماؤهم الاكبر للفريقين بالعاصمة .. الهلال ولا المريخ لاعب ومتلفزة تأكد من خلو الشارع من المارة بشكل نسبي .. وماتزور زول وقتها
ودة الكان بحصل لي ف بزور الواحد وبكون ما عارف زاتو انو في كورة واتمقلب لانشغاله عني ودايما بحضروها في مجموعة متباينة غالبا

كما قال الغناي يا معاوية
كيف تبدو الذكريات
كيف يبدو طعم ايام الشجن
من يعلم ذكرياتي كل اشكال التداعي
والرحيل المر
ف كما يقول اهل العلم ان الذاكرة انتقائية ويقولون ايضا من يبلغ من العمر سنينا عدد تقل عنده الذاكرة القصيرة وتشتعل البعيدة .. يعني ما يتذكر اتغدا بي شنو لكن يتذكر طفولته
وبرضو الذاكرة ماكرة وتمارس انبعاثها بشكل غاية التعقيد
تسمع غنية تتذكر زول فجأة دون سابق انذار ويكون مطمورا في ذاكرتك لسنوات
او تسمع لفظا او تعبيرا فتمتلئ سعادة وحب
ولا
حتي بعض الراحلين تتذكرهم عند طرفة وبدل الحزن عليهم يبعثون فيك المرح ثم لا تتذكرهم الا ضاحكين
اين توجد الذكريات وكيف تبعث فينا كل تلك الحميمية والدفء
كيف لتعاسة سابقة تكون مصدر فرحا آنيا
الذكريات وقود ايام الشتاء ... شتاء الروح والجسد
لك اعزازا تعرفه

تحية

الذكريات عصفور يقف علي نافذة الروح يلتقط منهاحب البقاء واستمرار الوجود وتلتقط منه شفافية الوداع في الزمن القصير...عمر الذكريات.. لأنها تبقي ما بقينا وترحل بارتحال أزماننا..صادقة لأنها كانت حاضرا معاش وكاذبة لأنها اصبحت من الماضي الذي لا يعود.. يتشكل منها تكويننا ويتكون منها ماضينا...بين التشكيل والتلوين تسكن الذكريات..

يااااا الله !!!!
ودالكامل
وصفت فأجدت .. وخلطت الحلم بالواقع
الذكريات صادقة كما ذكرت بدلالة تيقننا من حدوثها فقد كنا ابطالها .. كالممثل الذي يشاهد اداءه بعد انتهاء تمثيل الفلم وعرضه
لا يعود الماضي ولكن للروح قدرتها علي الولوج نحوه . وبل لتكاد تشم عبير تلك الازمنة وتتذوق حلاوتها بدلالة فرحة القلب ووجيبه
انا قادر علي استرجاع الذكري لو اغمضت عيناي ولم افكر سوي فيما اريد تذكره .. ولم استعدت والدي ووالدتي وشعرت بهم قربي وفرحت بهم .. رحمهما الله
الذكري وقود الليالي الشاتية الباردة
كثير ود وامتنان
واحترام
ولك من الاحترام والتقدير بقدر مايمكن للقلب احتمال الفرح

والله يا محمد الكامل انا ما لي في الكورة اي اهتمامات لكن اي بوست لود ابو سن متاكدة انه حيكون بوست دسم
وفعلا وقفت في الطرفة بتاعت ناس المريخ في كوستي كلهم هلالاب ..وفعلا ابتديت اتامل ..وقلت في نفسي
احتمال صاحبك قاصد ان مشجعي مريخ كوستي كلهم بشجعوا هلال العاصمة....
اما اذا كان هو قاصد ان لاعبي مريخ كوستي بشجعوا هلال كوستي ..تبقى دي المصيبة ..
والله يديك الصحة والعافية..
اما بالنسبة للتقسيمات يا ود ابو سن...ففعلا هناك تقسيمات..وجاياك مرة ثانية بمهلة
والله يديك الصحة والعافية

سلام يا صديقنا ود ابسن
كل ما أقول أدخل البوست دا الاقي نفسي محتاج أرجع لورى زي العايز أشوت فاول ( رولاندو وكدا )
بصورة عامة نحن مجمعاتنا الاجتماعية تحديدا كلها متشابهة .. سوى كانت ثابتة كألاندية الرياضية أو الاجتماعية .. أو متغيره كمناسبات الافراح والاتراح .. والتشابه نابع من طبعنا الموروث .. فنحن كشعب لانؤمن بالتخصص ولا نعترف بالمتخصصين ..لازم كله يفهم في كله ..وكذلك كله يتحدث في كله .. لا ننكر أننا شعب يحب الاطلاع وجمع المعلومات في كل مجال .. وهذه ثقافة لا غبار عليها .. لكن العيب في الاعتقاد أنها كافية جدا لمنافحة المتخصصين في المجال المعين .. لذلك حياتنا صاخبة ضاجة .. في المطارات وفي المطاعم وفي المناسبات تحس أن عدد المتحدثين أكثر من المستمعين ..حتى في الغربة مطاعم كل الشعوب هادئة لا تمسع فيها الا قعقعة الملاعق والشوك .. أما المطاعم السودانية .. ضجيج وونسة وضحك مخلوط بصوت الجرسون الذي يصر أن يملي الطلبات من موقع الزبون نفسه ( وعندك كوارع وأمفتفت وكمونية وصلحه ) ..
لذلك في نظرنا جميعا لابد أن تكون مصنف في كل المجالات .. سياسيا لازم تكون أما مؤيد للحكومة أو ضدها .. ولو كنت ضدها لازم تكون يساري أو يميني علماني أو اسلامي اصلاحي .. وكذلك رياضيا لازم تكون هلالابي أو مريخابي .. لاتوجد عندنا مناطق حيادية .. أحكي لكم طرفة حكاها صديق طبيب للوالد أيام كان طالبا بجامعة الخرطوم ..
قال في ركن من أركان الخطيب الجمهوري الشهير ( دالي ) قال أخذت فرصة وقلت يا جماعة أنا فلان الفلاني تانية طب .وأنا لا اسلامي ولا يساري ولا مستقل ولا علماني ولا عندي أي مشكلة مع زول .. ليه يا أخوان نحن ما نتفق على شئ مشترك ..وووووو الخ .
قال دالي مسك المايك وقال ( بالله شوفوا أخونا بتاع الطب دا .. قال هو لا يساري ولا اسلامي ولا علماني ولا مستقل وما عنده أي مشكلة في الدنيا دي .. ياخ أنت ذاتك ما مشكلة .. معقولة لا أديان السما و لا اديان الواطة قدرت أقنعتك ... )
هههههههههههههه ضج الحضور بالضحك وصاحبنا انسجب جريا الى داخليته ..
نعود أن كان في الكأس باقي

تحية

يسكن واقعنا السياسي بين مع وضد...تنطلق علاقتنا من مشاجرة علي مقعد في قطار ..تفكيك الأزمة يسكن في (باركوها)...الجدل قد يحسمه (عكاز) أو تبادل سفة صعوط علي بساط(ما كنت قايل)


احد اصدقائي قال لي ذات يوم:(كنا في الجامعة نسكر مع الشيوعيين وندي صوتنا للكيزان)... انتفاخ الأزمة السودانية قد يحتاج فقط الي (حرجل)...يشربه الجاثمون علي الصدور لربع قرن...


يا عبد الحفيظ انت صاحب الدهليز نشرب من دنه الحب ليس الا..

تعرف يا درديري وتلك آفة اركان النقاش آنذاك .. شهدت دالي والقراي واسماء محمود ومامون سيداحمد وصديق الزيلعي وامال جبرالله وناهد ونزار والجميعابي ومحمد طه محمد احمد واييييييك
التباري كان في السخرية واضحاك الجمهور بالتلاعب في التعابير .. والاستفزاز ..قليل من المعرفة وكثيرا من المغالطات
وانتقلت للجمعية التأسيسية .. في وضع اخطر .. مماحكات وتقعر لغوي وتعقيد لفظي واستشهاد بالشعر والتراث ولا عمل يرجي منه
اها
شيل دة كلو وكبو في المنتديات .. النقاش في المنتديات كالنقاش في الاركان الجامعية
زمان نحن مش دقيناكم .. ولا السنة الفاتت انت مش سويت وسويت .. وكضاب لا ما كصاب
والاساءات تجيك في صمة خشمك وتخلعك زاتك .. فلا مبرر لها
لذا تجد الناس هنا تقرأ ما ليس مكتوبا
وتتوجس خيفة
ف شنو
دة ياهو البجيب الختا !

حبيبنا الكلس \ ابو سن ..

والله شوق الشووووووووق .. وطبعآ طالبي كم تلفون ههههههه .

اما بخصوص المصطبات نحمدو نحن ناس جوة الحوش هههههههههههه

للنقة وتلقي الحجج هههههههههههههه .

اسمعني وينكم من صالون الاميرة ؟ ولا لسة كدوسك ما صلحتو ؟ ههههه

غايتو الله يعدل الحال .

حبابك اميرة
وفي انتظارك

حبابك اميرة
وفي انتظارك

Quote: شهدت دالي والقراي واسماء محمود ومامون سيداحمد وصديق الزيلعي وامال جبرالله وناهد ونزار والجميعابي ومحمد طه محمد احمد

نسيت ( شلوبا ) مالك ؟

Quote: أنا غايتو الأيام ديك كنت هلالابي، لكن تحت تحت بشجع فريق الوطن

وتن واته ..... مالك داسيهو يا معاوبة الزبير

حبابك ود الكامل
ووجودك يضفي جمالا علي البوست
شاكر ليك مودتك وتسلم يا صاحب
قباني
ههههع
ما حضرتو لكن حضرت حمادة بتاع الهندسة وعمر اومو بتاع علوم