زولــه مــارقــه من التــكل

07:34 AM Feb, 11 2015
سودانيز أون لاين
د.محمد حسن -
مكتبتي في سودانيزاونلاين



ابداكي كيفن؟
من وتر ربابة او
من
صوت حنين لي ساقية
سهرانة وتنوح؟
او
من نداهات العوين عند الصباح
من زولة ماشة على الشغل
او زولة مارقة من التكل
او واحدة قاعدة من الفجر
خاتالا شاي
في مفرق الشارع
عشان
تمرق مصاريف القراية
وحق فطور
لي بنية ماشة على الدروس
من غير فطور
والقول كتير
مليان جروح
ابداكي من
من ناس مشتتة في المرافي
نايمة تتوسد رصيف
تتنفس الضيم في المنافي
والحوف مراجل
خليني جد
ما عايز ابوح
اديني نفاج للفرح
نفتاح مسارات للامل
ونغني للاطفال مرح
ما عدت احتمل النواح
خليني نتناغم بي حديث
ناعم جميل
عن ضفة تحضن ليها نيل
في لحظة والقمر البهي
ونسيم عليل
وقليب نضوح
بي كل مشاعر فيها ليك
احساس نبيل
ابديني بي رفة برق
ابداك بي قولا حنين
ما فيه عتاب
قولا مرق
يسند قفاك
وليكي بيلون مشاعر
كلما طلعت شمش
القاك واتبسم عشان
ريقك صبوح
حرفك يفرهد في الوريد
يملاني ريد
امال تزغرد في المدى
افق موشح بالاماني
احلامي زي سرب العصافير
في الخريف
واحساس وريف
عشم المسافر في الوصول
والدنيا عيد
شان تفرح الدنيا وتزغرد
والبشارات تملا سوح
فرحت بيك
لمن نقر
زي المطر
شباكي
بي نقرة وتر
منك وكان
مني القبول
وفتحت للاحساس مداخل
وانداح قصيدي اليك
مترع بي ندوات الفصول
انا وانت والمشوار مظلل
بالغيوم
والوابل الخير في هطول
يلاك نقالد الفرحة
ننساه النزوح
وبس

احساس نبيل

الشاعر د. محمد حسن
ما باين ليها بداية
....
كل ما نقول الارص اتبلت
وشربت عرق الفقرا
الهد الجوع احلاما
عشان تتبلا البذرة وتنبت
فجأة تموت جوانا الفرحة
ونرجع تاني
نفتش كيف نبداها
........

ما عارف ليه ما سميتا ..ابداك كيف...أو كيفن ابداك؟
تحية وتقدير