فشل قيام حفل الفنان زمراوي بالنادي السوداني دبي المقرر 16 يناير

- في وقت متأخر من عصر يوم الخميس 15 يناير؛ أفادتنا إدارة النادي السوداني دبي بعدم التمكن من إستخراج تصديق وزارة العمل للحفل المقرر قيامه غداً الجمعة 16 يناير.
- حاولت جاهداً إيجار صالة خاصة بالقرب من مكان الحفل إلا أن محاولاتي باءت بالفشل.
- أعتذر للجميع عن سوء التنسيق والذي نتحمل كامل وزره ويعود ذلك لجهلي بضرورة إستخراج تصديق رسمي لحفل غير تجاري بنادي إجتماعي.
- أكرر الإعتذار
- أرجو من الأخ بكري أبوبكر رفع البوست بالبانر حتى لا يتكبد معجبي زمراوي مشقة الحضور للنادي غداً.

نعتذر للجميل زمراوي عن الربكة الكبيرة

تعالوا العين ناس عباس محمود بزبطوها ليكم
وتاني بالله ركز ةنجض شغلك بدل قاعد لي اليوم كلو تشكك و بتاع :)

ما زلت يا ود البشرى، "أشكك" في انو الحفل دا بحتاج لتصديق مسبق!!!
لكن تقول شنو، كل شيء في الحياة جائز زي ما بقول حسن موسى عليه السلام
ـــــــــــــــــــــ
عين شنو يا أخي؟! هسع الواحد لو إقتنع يسويها هناك، تفتكر يوم واحد بكفينا نقطع بيها دواراتكم العويرة ديك عشان نصل النادي؟!

عملت بمجلس ادارة النادى السودانى بابوظبى
وكنت عضو مجلس ادارة النادى العربى بالشارقة
واشرفت على اقامة العديد من الامسيات الثقافية والشعرية والغنائية ضمن منتدى النيلين الثقافى فى النادى السودانى بالعين

ولم يطلب منا فى ابوظبى او الشارقة او العين

تصريح لنشاط يقام داخل الاندية دون مقابل مادى

سلام محمّد،
المنطق بقول كدا، وأهو تجربتك قالت كدا، خلينا نشوف ناس الوزارة بقولوا شنو يوم الأحد؟ يمكن دبي غير؟
لا يعقل أن تحتاج جلسة إستماع بنادي إجتماعي لتصديق رسمي!
لكن برضو جائز!!

سلام ابوبكر


اولا لازم ادارة النادي تخاطب الوزاره التي بدورها تخاطب جهات تانيه

وللمعلوميه مافي نشاط بكون في نادي بدون اذن

اي تجمع لازم يكون بعلم السلطات


المهم الحليب كيف اسي

سلام معتز (عباس)،
دا يا هو كلام ناس الإدارة، والحصل انو جلستنا صادفت فعالية لبعض الهنود إستأجروا ميدان النادي وتم إستخراج تصديق لها من فترة، وقالوا لينا الوزارة رفضت إستخراج تصديق الجلسة عشان ما ممكن تٌصدق على فعاليتين في يوم واحد.
ما زلت أرى في جلسة الإستماع نشاط لا يحتاج لتصديق ويوم الأحد بنشوف من غير ما نظلم حد.

وفعلا المهم هو الحليب

دكتور أبو بكر سلامات.

وصلتني رسالة منقولة من الفيس بوك ان الفعالية مقترح انها تكون الخميس القادم 22 يناير. صاح الكلام ده ؟

بعدين يا بكور دوارات العين هي نفسها بل أقل منها لما شرفتنا في محاضرة د.عبد الله علي أبراهيم وبرضه في لمتنا لتدشين كتاب حبيب نورة.

في منتدي النيلين عملنا 30 فعالية متنوعة في السنتين الفاتو ...كنا نحتاج فقط لأستئذان أدارة النادي لحجز المكان.

أتمني ليكم التوفيق وأن شاء الله حاضرين معاكم لما يتحدد الميعاد بشكل نهائي.

سلام دكتور ابوبكر وضيوفه الكرام

تم تاجيل الحفل الى يوم الخميس 22 يناير الساعة 8 مساء بالنادى السودانى دبى
والله يا ناس مدنى شرطوا عينا ههههههه نتوقع حضور الجميع والادارة تاسف للربكة دى
على لسان حال السكرتير الثقافى الاخ المحترم صداح وراق


كونو بخير

أها هسي في الوكت دا المفروض تكون فيه حفلة زمراوي مدورة: بتعمل في شنو يا بكور؟

تعرف ألذ حاجة تكون متوقع ثلاث ساعات مليانة في وقت لاحق وفجأة المناسبة تتلغي
فتجد نفسك كسبت تلاته ساعات إضافية لي عمرك
وأي حاجة تعملها في الساعات المقصودة دي بتكون ما مكتوبة ليك في الأصل

الكلام دا فلسفي بالمناسبة
أقعد فكّر فيهو في حوشك الواسع داك الكلو رملة بتدخل ليك في الشبشب وانت طالع من الحمّام إلى الأوضة..
الحاجات الزي دي بتضايقني اكتر من داعش (والله جد) على الأقل داعش بتكتلك وخلاص

انت يا ود الزبير الاوضة البقطعو ليها حوش بي رملتو إلاّ كان أوضة الغفير أو القرّاش غايتو, أبوبكر (شكّاك) دا قاعد ينزّلك وين؟

يا زول أصلا البيت حوش يرعى فيهو البوش، وفي طرفو حمّام (للبوش!) بعدين اضافوا ليهو أوضة في الركن الأقصى
تمشي تستحم، وانت جاي راجع يكون معاك جك مليان موية، تصل باب الأوضة تغسل رجليك وتدخل
تلقى الموكيت زاتو فيهو بقايا رمله من الناس المابشيلو معاهم جك موية
تطلع تاني تغسل رجليك وتلبس شرابين دبُل، حتان ترتاح

بعدين انت المداخلة الفلسفية دي كلها ما لقيت فيها غير الأوضة

أهو يا عباس، عبد الخالق عابد أكد موضوع التأجيل ليوم 22 يناير دون أدني مسؤولية من جانبي

الأيام دي يا مٌعاوية، الأوضة قفلناها ونصبنا الخيمة، ونوم الليلة الواحدة تحت الخيمة يكسبك ثلاثة سنوات لعمرك، والتأمل في السماء في ليلة غائبة القمر يجعل نوع كلامك الفلسفي دا؛ حكي ساكت.

غايتو يا ود البشرى، الما عارف يقول عدس

Quote: بعدين انت المداخلة الفلسفية دي كلها ما لقيت فيها غير الأوضة

آكشوالي مش الأوضة في رقبتها لكن كونها خارج البيت و ما معاها حمام !

أوكي يا بكّور , قلنا عدس
بالمناسبة عارف أصل قصة قولة عدس دي شنو؟

Quote: الأيام دي يا مٌعاوية، الأوضة قفلناها ونصبنا الخيمة، ونوم الليلة الواحدة تحت الخيمة يكسبك ثلاثة سنوات لعمرك، والتأمل في السماء في ليلة غائبة القمر يجعل نوع كلامك الفلسفي دا؛ حكي ساكت.

يا بابكر خيمتكم البتتاملوا من جواها دى سقفها الا يكون بانوراما

بعدين بالله دبى دى فيها حاجات بتفشل لو ما كسل السودانيين ساى

Quote: أوكي يا بكّور , قلنا عدس بالمناسبة عارف أصل قصة قولة عدس دي شنو؟

يا ود البشرى، مكتبة سودانيز دي لم تترك صغيرة أو كبيرة إلا وكان لها بوستاً!!
إتّا قايل الناس شردت منها لشنو؟ نضب معينها، وجينا نحن بعد متابعة كبيرة ولسنوات من البلكونة عارفين الناقص شنو وبقينا نجوم كبار.
يا أخي، الأمثال السرية قاعدة في المكتبة! تقول لي عدس!!

امشي رد على بوست التراكتر عشان تكمّل السيجا ولّ صفرجت ما عارف، العاملنها بأساميكم في البوستات انت والمعاويات

Quote: يا بابكر خيمتكم البتتاملوا من جواها دى سقفها الا يكون بانوراما بعدين بالله دبى دى فيها حاجات بتفشل لو ما كسل السودانيين ساى

سلام يا أخمد،
الخيمة البدوية عندها أمتداد أمامها عبارة فرشات (سجاد) يتم الجلوس فيهن ليلا وتوقد أمامهن النار، التعبير بتاعي بتاع راقد تحت خيمة لا يعني ذلك حرفياً.

كلامك صاح، ما مفروض الحفل يفشل، المهم أخيرا تمكنا من تأكيد إقامة حفل لزمراوي يوم الخميس خارج التنسيق مع التجمعات القطيعية.
حفل خاص والدعوة خاصة

Quote: حفل خاص والدعوة خاصة

أجي!!! خاص ودعوة خاصة كيفن يعني ؟