ما معاك

ما معاك!
ومرقتة في يوم قلتة في جواي
اريت كل البيوت السوداء
تتعطش تفوت..
وكل البقولو: اني من ماضيك مشتت
في حواري الناس
وعايش
شان اموت ..
ينبسطو كل مايشوفو زول سارح;
انا،
انتي
والماضي التليد
ملعونة مدرسة الندم الهادة حيل كل
الخلق
...وانا ما معاك...
انا ما معاك
لمن تكوني سارقة خاطر
الناس تقفلي في بيوت الشوق
وتقتلي كل حي..
ما معاك
وكتين تنادي للوليد وتحاولي
تظهري لية انك
دار امان;
تزقية سم غدرك ويشرق..
مالو.؟
مات.
تمشي وتتولولي في الجنازة.
وتزيفي
وتحكي للناس الاكازيب
ما معاك
لمن تخوني الجاك وكل امالو
فيك ....
الدنيا نار
والكل بشارك في الحريق
راجين نبي ينقذنا
منك;
من قاساوتك;
من رجراحاتنا.. وبكن..
بكن كل اللشافو الجد حصل
ماضحكو ذي ما عملو ديل;
ما نامو سرخو بي اسي
ولعنوك;
لعنتك;
واكتفيت!
وانا ما معاك;
حضنك مولول زي شمس مشنوقة
في نُص السما
وملت كلاب الواطة من اكل
الحشايش والوسخ!
جبل الجليد في ضحكة ذاب
واتونست كل الخلق ...
وبكت عصافير الصباح من ليل شتا
وغنت غراريب الندم !
***
خريفك;
صراع السحاب المشتت
قبل ما تهب الرياح المعبية
بالمصايب والمحن!
النار تنقط وتنطفي;
تولع تساسك;
مالة ؟
مغصوبة ومفلقة من دعا المسكين
بتحرق كل بيت!
***
وكل مانقول غيمة الاسي بتنزاح
ويفرح كل حي..
تظهر غيوم; تزقينامر المر
وتعزف شان نموت.
تتلهف الاوتار عليك!
و تنادي خيل!
وتقومي ليل!
وتشتكي وما يجيكي نوم..
***
غابة الندم مالت
وكل اشجارة صبحت يابسة
القمرة نامت في وسادة الشوك وما
حلبت نعاس.
والشمس ضلها دستو ! واتلخبطت يبست مفاهيم
العقاب!
وانا ما معاك!
صالت مصلت ومنتهي!
مظلوم مضللم ومشتهي!
معروف معرف ومختفي!
مجبور مجبر ومتلهي!
و ما مننا:
من قساوتك ومن شعاويذ السما
من مرادك من دهاليذ الحتالة الشاردة
من غدر الماسي المظلمة!
من جهالتك من بيوت الخوف
دوام متلثمة !
وضاعت سنين العمر مني وبلسما!
***
لفيت بفتش وما لقيت!
وحلمتة بي كابوسك انتي
وما صحيت!
انتي الممطرة بي المساء!
ما قلتة ليك انا من زمان
سيبي الخلق!
واتحشمي ما بجيكي شي
ممكن كمان تتبرجي وما بجيكي شي
ممكن تقيفي تصفقي .. ما بجيكي شي
ممكن تجوطي ما تجي .. مابجيكي شي
ممكن تغالطي و تشتكي .. ما بجيكي شي
في يوم ممكنتولعي وفي البعدو
ممكن تنطفي .. وما بجيكي شي
بس انتي رافضاها الحلول!
غلبان انا وهلكان معاك
اوعك تقومي تكوركي لي;
انا جد ابيتك وما بعيد اطفش اسيب ليكي الارض!
ما تكوركي لي;
انا ما بجي!
اقتنعي بي واقعك وطيري وحلي عني
وعن سماي!
انا ما بشارك في جرايمك في خرافاتك
وما ممكن اكون;
انا ما النبي البتبيعي فية وتشتري
وتزقية مكرك
وتشتهي تتأمري!
ملعونة انتي وكل زول شارك معاك!
وكل زول بس شاف وما شارك معاك
ملعون انا الفي يوم عرفتك يابلد;
عيشتك خراب .. موت الفقير في
حضنك اليابس سحاب ينطح سحاب
نارك تولع شان تخرب.........
شان تحرق......شان تشرد
ما عشان تدي المساكين حقهم
وبكو..
وجعتني شوفتك ما معاي..
ما معاهم..
مالا سيرتك عرجا
مكفوفه وبلا عكاز؟
.......
وطارت هرتي وركت قصاد صحن
اللبن!
اللبن المنقط من درع مضغوط
وغصباً عنو مارق يشتكي
وشكواه ما لي زول..
فترتة من الانتظار
كل الجاني منك ما عرف كيف لي
يصل..

ذرة ترابك انتهت رخصت وما عاد
ليك قول..
ارواح ولادك بي شلنق والكل عبيد
والكل عجول!
عجولك تهنق
حميرك تغني
كلابك بترقص
وانسك مريض
***
سحابك بيمطر
وشمسك بتشرق
وارضك بتنبت
وانسك مريض.
***
انتظري لسه..!
راجية انسانك يعالج نفسو صدفة
وينتشي؟
ماظن يجيك!
***

يبست حلوقنا من الدعا
وكتر الشكاوي
واشتقنا ليك!
اشتقنا لي بركاتك الدايماً تحل
وتجينا ليل...
ارفعنا درجة وختنا ونزلنا درجة
وما بعيد
لو زارنا طيف خيرك
يبشر في المنام!
قول لينا جملة واكتفي !
وقيد لينا شمعه ودلنا!
واهدينا وارفع مننا
وزكينا يا رب السما

2008 جوبا