قصتى مع بورداب الرياض بكل شفافية .. هذا ما حدث

منذ ست سنوات و انا عضو بهذا المنبر الوضئ و انا انتهج مسار تربيتى القائمة على احترام الاخر و خلق علاقات فاضلة مع كل من اعرف و محاولة توطيد علاقتى بمن لا اعرف ،
و فى سبيل ذلك كانت وسيلتى ان اترك انطباعا حسناً لدى الالاف من رواد هذا الفضاء الاسفيرى ، و بحمد الله اعتقد اننى قد نجحت الى حد ما فى تحقيق هذا المقصد و لا زلت اضعه امام اعينى .
حين افترع الاخ معتز زيزى خيطه عن تكوين لجنة بورداب الرياض بدأت التهانى التقليدية فى الاندياح حتى جاءت مداخلة الاخ السمانى ( اساسى ) مغايرة لما هو متوقع فنشطت الاقلام بين
موافق و معارض .
ما كان يعنينى كثيرا امر اللجنة الا فى اطار الزمالة التى احرص على دعمها ، و ليس هناك من رابط تنظيمى يربطنى بالزملاء الافاضل من بورداب الرياض ، لكن لفت نظرى النشاط الذى
اعترى المنبر بفعل مداخلة اساسى ، فعبرت عن ذلك بالمداخلة التالية :

Quote: اعجبتنى مداخلة الاخ السمانى اساسى و ارى انه يستحق التحية عليها ، و بغض النظر عن صحة رأيه او مجانبته للصواب ، ارى انها حركت ساكنا فى هذا المنبر الذى شدتنا دوما اليه النقاشات الساخنة و الردود الملتهبة ، فقد اصبح المنبر فى الفترة الاخيرة بارداً هادئاً .. لا يثير حماسةً و لا يُغرى بالمتابعة . اقول قولى هذا و ليس لى فى بورداب المملكة ناقة او بعير لكنها فرصة اهتبلها للتذكير بأن اهم كيان للبورداب و هو بورداب الداخل قد مات سريرياً و صار نسياً منسياً الا من بعض الفعاليات المتباعدة و الدعوات التى يقيمها الاخ العوض المسلمى بين فترة و اخرى , شكراً اساسى الاساسى و بالتوفيق للجميع ،،

هل فى هذه المداخلة اى مساس ببورداب الرياض او لجنتهم المنتخبة ؟
لم اكن اتوقع ان يأتى الاخ يوسف السمانى الذى اُنتخب لرئاسة اللجنة ليرد بمداخلة اثارت فى نفسى الحزن و الغضب اذ قال :

Quote: حكمة قيلت بالارشيف قديما . العلم نور والجهل انور

ماذا يتوقع اى عاقل ان يكون رد فعلى تجاه هذه الاساءة و التى جاءت بكل اسف من الكبير الذى انتخبوه رئيساً ؟
ما حدث من مناوشات تلت ذلك هو نتاج لما بدأ به الاخ يوسف و شايعه بعض افراد لجنته .
لا انكر انه لا يعنينى تكوين اللجنة فى قليل او كثير ، و ما حدث هو تداعيات لما اسلفت .
و فى كل الاحوال فلست احمل حقداً على احد فنحن جميعا اخوة ربطنا هذا الفضاء الاسفيرى فتكونت علاقة هى اقوى بكثير من علاقات محسوسة و مباشرة .
و للرياض و زملائى فيها معزة خاصة و هى حقيقة لا اتزلف بها و لا اداهن ، فيكفينى فخرا ان هبوا لنداءات منى فى اوقات عدة ، و لا زال مرسوم بداخلى
موقف انسانى حين هرعت الى مطار الخرطوم لاستلام ادوية لوالدى عليه رحمة الله ارسلتها الدكتورة داليا الكباشى .
ختاما ارجو ان اكون قد وضحت و ليسامح الله من اخطأ بحقى و ليسامحنى ان صدر منى ما يسئ لاخرين .
و اخيرا فان الحكمة هى :
لا تحاول الانتصار فى كل الخلافات ، فأحياناً كسب القلوب اقوى من كسب المواقف ، و لا حرق الجسور التى قمت بعبورها يوماً ما فلربما تحتاجها للعودة
يوماً ما .
و الله الموفق وهو المستعان ،،،،

شكرا يا استاذ التكينة ...
حديث جميل لا يصدر الا من رجل جميل ..

Quote: شكرا يا استاذ التكينة ... حديث جميل لا يصدر الا من رجل جميل ..

تسلم يا مزمل و اتمنى ان تصل رسالتى بكامل وضوحها للاخوة بورداب الرياض

يسامحني في شنو بالضبط يا محمد المسلمي

Quote: احمد حنين الله يسامحك

أستاذ/ التكينة المحترم....السلام عليكم.

Quote: و فى كل الاحوال فلست احمل حقداً على احد فنحن جميعا اخوة ربطنا هذا الفضاء الاسفيرى فتكونت علاقة هى اقوى بكثير من علاقات محسوسة و مباشرة . و للرياض و زملائى فيها معزة خاصة و هى حقيقة لا اتزلف بها و لا اداهن ، فيكفينى فخرا ان هبوا لنداءات منى فى اوقات عدة ، و لا زال مرسوم بداخلى

ما ترجع للفات ومن هنا أبدأ......لا تنبش الماضى وعهدناك أخ كريم جميل.....تسلم..

Quote: ما ترجع للفات ومن هنا أبدأ......لا تنبش الماضى وعهدناك أخ كريم جميل.....تسلم..

شكراً استاذ اسماعيل على الكلام الطيب .
نصيحتك على العين و الرأس

الاستاذ انور

هذا هو المتوقع منك لك التحية والتقدير وجزاكم الله خيرا

أخي أنور

أسعد الله نهارك بكل خير

ليس من العدل أن نقحم الكيان في اي خلاف فكري كان أو شخصي،
أي عضو في لجنة بورداب الرياض رائه الشخصي لا يمثل رأي المجموعة وأن كان على رأسها
وهذا الشرط الأدبي و بلاشك لا يلغي الشرط الأخلاقي الإلتزامي ولا يمنحنا الحصانة الدبلوماسية لتخطي الحدود.

كان من المفترض أن تخاطب يوسف في شخصة في بوستات أخرى منفصلة لأن الرد يمثله
وليس من المنطق ان نُعالج الخطأ بخطأ آخر ،


وليكن عنوان بوستك (قصتي مع يوسف بكل شفافية .. هذا ما حدث)

تقبل خالص تحياتي
وأشكر لك جميل طرحك

كلامك بشبهك يا راجل يا طيب يا زول يا فنان


بورداب الرياض (الختيتوها رقدت)

يا معتز ياخ عليك الله خلى المكاجرة والنضمي الاعوج دا. انور ما جاب سيرة بورداب الرياض دي مكاجرة منو ولا جابها ساي كدا من بنات افكارو
الموضوع الحصل فيهو اهانة لانور ووصفه بالجهل حصل في بوست بورداب الرياض وحصل من رئيس بورداب الرياض ومافي اي سبب يخليهو ما يذكر
بورداب الرياض وبعدين ياخ زول جاء كتب بلغة جنح فيها للسلم تجي تتشاتر وتطبزها مالك وبعدين ياخ انت ما المندوب السامي لسيادة الريس يوسف في اسافير
الدنيا ومنبر بكرى دا .... يوسف لو عندو حاجة مع انور يجي يقولها ليهو هو بنفسه يعني الفلسفة والتنطع والملاوة في الكلام دي حاجة ما ظريفة منك .... هيجت
علينا الاعور الله يسامحك.

عداك العيب يا أستاذنا المربي المصوراتي الفاضل أنور التكينة!

أستاذ ومربي فاضل وحازم علمنا الأبجديات ببري.. كما علمنا حب التصوير أسفيرياً
وجعل منا أستاذة بأرقى الجامعات ننتهج بنهجه .. ونمى فينا التوثيق الفوتوغرافي!
رغم حبنا له ولأسرته... لكن صرامته وحزمه وصوت أكفه لا تزال ترن في آذان بعضنا :)

العيب كذلك تعدى السماني أساسي والحبيب يوسف السماني والحنين أحمد،

هو سوء فهم وجب بتره!

لا شيء شخصي بيني وبين الأخ أنور التكينة .. ولم ألتقيه في حياتي ..
وفي المنبر لم أتداخل معه فيما أذكر ..
وأكثر من ذلك أننا اصدقاء في الفيس بوك لكننا لا نتداخل مع بعضنا ..
وحتى في البوست المعني أي بوست لجنة بورداب الرياض لم أرد أو أعلق على أي من مداخلات أنور
لكنني أحببت أن أذكّر أن الأخ أنور صفّق لأساسي في مداخلته الأولى ، ومداخلة أساسي معيبة من حيث أنها تدخل في أمر حسم ديمقراطيا
وبالنسبة لأساسي كأنها انتخابات بلد آخر غير بلده من حيث أنها لا تعنيه في شيء
وكنت قد اعترضت ورددت على اساسي وكالعادة دخلنا أنا وأساسي في (حرارة النفس ) وهذا أمر قديم ..
جاء الأخ دهب وصفّق لأساسي واستحسن كلامه ، وسفه ردّي عليه واتهمني صراحة بالثقالة وضمنيا بالجبن ..
رددت على دهب ..
وجاء أنور ليثني على دهب ونقل مداخلته .. ومدحها ومدح صاحبها دون أن يذم صراحة الشخص الموجه له ما ورد بالمداخلة وهو شخصي ..
التزمت بعدم الإشارة لأنور ، لكن ظلّ السؤال عالقا في نفسي .. ما الذي بيني وبين الرجل ...
والآن أنور يكتب ببراءة شديدة أنه فقط يرى أن مداخلة أساسي أعادت للمنبر حيويته وأعادته إلى سابق عهده..
وأقول أن مجريات البوست بدأت تسوء بعد ذلك .. وأن حيوية المنبر لا يتم تحريكها بالباطل ، ولا يتم تحريكها بال( المكاواة ) ، ولا بالهتاف
عالي الصوت ما دام هذا الهتاف مجافيا للحق ..
والحق أن بورداب الرياض انتخبوا لجنتهم بصورة ديمقراطية .. واللجنة وزعت المسئوليات وتهيكلت على أسس ديمقراطية
ومن يقول بغير ذلك فهو مخطيء خطئا بينا ..
وشانئ يوسف السماني هو الأبتر ..

الكبير كبير يا اخ انور . كلام راقي ومهذب وينم عن شفافية عالية وادراك ووعي
بعدين لو جينا للاساءة الحقيقية لا انا ولا انور مافي زول اساء لي زول في بوست بورداب الرياض بخلاف الاخ احمد حنين الذي اتهم ود الباوقة بانه تمساح كبير ( يعني حرامي كما هو مفهوم ) تم انتخابه لامانة المال .
مداخلتي التي عصفت بالبوست كان فحواها انه يوسف السماني من خلال معرفتنا له في البورد كان انسان حاد وضيق الافق ولا يصلح ان يكون رئيسا لبورداب من ضمنهم قامات وقد عددت منهم نفرا كريما
لو في مصداقية في المنبر دا هل يتم سحل اخونا انور بكلماته التي اقتبسها بعاليه
ام الاخ احمد حنين الذي وصف احد اعضاء اللجنة بانه حرامي (او تمساح كما كتب)

يا أساسي الأساسي .. ازيك
انتا قلت هنا

Quote: بعدين لو جينا للاساءة الحقيقية لا انا ولا انور مافي زول اساء لي زول في بوست بورداب الرياض

وهناك قلت

Quote: اذن هو عهد انحطاط لجنة بورداب الرياض

الاساءة دي كيف عليك الله ؟؟؟
ياخي انتا صرفت ليهم بالجملة .

يا فتحي .. لو حكومة السودان دي مثلا الرئيسها البشير قام جاب معاهو وزراء ملائكة عديل هذا لا يمنع ابدا انه ما دام البشير علي رئاستها تكون مكمن سبة وانقاص
انا ما تحدثت عن لجنة بورداب الرياض كافراد انا تحدثت عن لجنة علي رأسها يوسف السماني (المنقصة) وفي عضويتها راجل زي ابو جهينة بكل كاريزمته وحضوره وقبول الناس ليهو
عليك الله دا ما حط من قدر اللجنة انه قامات مثل بورداب الرياض يتقدمهم ماسورة ؟
ما ملاحظ انك بالليل ..دا فرغت كلامي من مضمونه وبترته بطريقة لا تقربوا الصلاة كلو كلو ؟

Quote: الاستاذ انور هذا هو المتوقع منك لك التحية والتقدير وجزاكم الله خيرا

الاستاذ / النعمان خوجلى
تسلم حبيبنا و لك من الود قناطيراً مقنطرة

Quote: كان من المفترض أن تخاطب يوسف في شخصة في بوستات أخرى منفصلة لأن الرد يمثله وليس من المنطق ان نُعالج الخطأ بخطأ آخر ، وليكن عنوان بوستك (قصتي مع يوسف بكل شفافية .. هذا ما حدث

الاخ / معتز زيزى
ما اورت اسم يوسف الا لانه كبير القوم القدوة رغم ان كثيرين جاطوا و ساطوا لكنى لم احفل بهم

Quote: كلامك بشبهك يا راجل يا طيب يا زول يا فنان

الاخ المحترم / بكرى الخير
شكرا جميلا .. ده من طيب اصلك يا جميل

Quote: يا معتز ياخ عليك الله خلى المكاجرة والنضمي الاعوج دا. انور ما جاب سيرة بورداب الرياض دي مكاجرة منو ولا جابها ساي كدا من بنات افكارو الموضوع الحصل فيهو اهانة لانور ووصفه بالجهل حصل في بوست بورداب الرياض وحصل من رئيس بورداب الرياض ومافي اي سبب يخليهو ما يذكر بورداب الرياض

الاخ / الخير محمد عوض
واحدة من اهم فوائد البوست سالف الذكر ان اعاد قلمك الوضئ ، لنطالع حروفك بعيدا عن معتركات اللوترى ..
شكرا يا حبيب .. و نصيحةً تخدرك

Quote: أستاذ ومربي فاضل وحازم علمنا الأبجديات ببري.. كما علمنا حب التصوير أسفيرياً وجعل منا أستاذة بأرقى الجامعات ننتهج بنهجه .. ونمى فينا التوثيق الفوتوغرافي! رغم حبنا له ولأسرته... لكن صرامته وحزمه وصوت أكفه لا تزال ترن في آذان بعضنا :)

الاخ / محمد ياسين خليفة
كلماتك الطيبات اخجلت تواضعى ، و وضعت المصوراتى فى مكانه الحقيقى غير المكان الذى اراده الاخ احمد حنين .. شكرا بالاردب و الكيلة ..
و يا احمد حنين حاشاى سعادتك ان توصم اخرين بصفات تعتبرها مذمة بينما هى مفخرة و اى مفخرة .

Quote: وحتى في البوست المعني أي بوست لجنة بورداب الرياض لم أرد أو أعلق على أي من مداخلات أنور لكنني أحببت أن أذكّر أن الأخ أنور صفّق لأساسي في مداخلته الأولى ، ومداخلة أساسي معيبة من حيث أنها تدخل في أمر حسم ديمقراطيا

الاخ / ود قاسم
كيف الكلام ده ؟ انا لم اتطرق لمضمون حديث الاخ اساسى و انما قلت انه حرك ساكناً .. مالكم كيف تحكمون ؟

Quote: لو في مصداقية في المنبر دا هل يتم سحل اخونا انور بكلماته التي اقتبسها بعاليه ام الاخ احمد حنين الذي وصف احد اعضاء اللجنة بانه حرامي (او تمساح كما كتب)

الجبيب اساسى الاساسى
ليت كلماتك تسمع من به صمم

يا أخ أنور
مالكم كيف تنكرون ... وكمان ببساطة ..
ارجع إلى البوست وستجد أنك نقلت في مداخلتك الثانية رد الأخ دهب على مداخلتي
ووصفه لي بالمساخة والثقالة .. ثم بعد النقل هتفت له .. ودهب لم يتحدث عن بورداب الرياض في تلك المداخلة ولا عن يوسف
ولم يشتعل البوست قبل ذلك مظلقا ..
يبدو أنك دون أن تشعر كنت تصب الزيت على النار

يا انور ..

لك التحية .. لكن ايضا خالفك الصواب..

اولا.. تسخين المنبر ... لا يكون .. بالاعتداء علي بورداب الرياض

ثانيا .. ماذا يعني تصفيقك لأساسي.....نوع من المديدة حرقتني ..

ثالثا .. عندك تصفيه حسابات شخصية مع يوسف السماني ..او مع اي احد .. ارجو ان تصفيها بعيد عن الكيان ..

ولذا لزم التنوية ...

تخريمه
الناس جو هنا يشكروا فيك ... ويصفقوا..

ليه ما قالوا ... لما غلطت في بوستاتك الباقيه والمحذوفه... غايتو نحن شعب نستاهل ...

Quote: اولا.. تسخين المنبر ... لا يكون .. بالاعتداء علي بورداب الرياض ثانيا .. ماذا يعني تصفيقك لأساسي.....نوع من المديدة حرقتني .. ثالثا .. عندك تصفيه حسابات شخصية مع يوسف السماني ..او مع اي احد .. ارجو ان تصفيها بعيد عن الكيان ..

استاذ احمد
قول بسم الله و خت الكورة واطة ..
ثم .. لو ورقك قافل من امبارح ما تبقى غافل لانو ورقى فتح ..
يعنى ما عندك طريقة لو الفورة عشرين ..
انا قبيل وضحت وجهة نظرى التى تنطوى على العناصر الاتية :
1/ غض النظر عن ( مضمون ) مداخلة اساسى الا انها ادت دوراً ايجابيا .
2/ ليست لى عداوة مع اى بوردابى و معظمهم لم التقيهم الا عبر الاسافير و بالتالى يستبعد تماما كلام احقاد او تصفية حسابات .
3/ الاخ يوسف السمانى لا اعرف عنه اى شئ سلبا ام ايجابا و لم اتشرف بمعرفته فيما مضى لكنه بدأ بالاساءة لى و لابد ان انصر
نفسى قبل ان ينصرنى الاخرون .
4/ و ده الاهم .. سألت الله ان يسامح من اخطأ فى حق اخرين سواء انا او المتداخلين ..
بعد كدة لو اتلولوت الا تكون عندك قصد ..

Quote: الموضوع الحصل فيهو اهانة لانور ووصفه بالجهل حصل في بوست بورداب الرياض وحصل من رئيس بورداب الرياض ومافي اي سبب يخليهو ما يذكر بورداب الرياض

يا الخير يا خير هسا عليك الله البشير لو قال عليك تربية شيوعيين وفي السودان الانت قاعد فيهو بتوجه الكلام للبشير والا للشعب السوداني

زميل البورد أنور التكينة تحية طيبة
انا ما تابعت البوست المعني ولكن لو يوسف فعلاً بادرك بالهجوم .. ما عندو حق فعلاً
لسببين
الاول: لأنو المقام (بوست بورداب الرياض) وكونه انتخب رئيس ليهم كان مفروض يراعي للمقام ده وينأ بنفسه عن أي خلافات بينه وبينك.
الثاني: مافي حاجة بتستاهل الناس تكون شايلة من بعض وخاصة نحن في مقام افتراضي ولا سبب يرقى للضغائن العابرة للبوستات والسنوات!
بقول ليك الكلام ده وانا عضو في بورداب الرياض وعضو في لجنة بورداب الرياض وعبرت عن تأييدي لترشيح الاخ يوسف ولسا مقتنع انو كان وما يزال الانسب لرئاسة كيان بورداب الرياض في المرحلة الحالية على الاقل ،،
ودمت بخير وعافية ويسعدني المبرور بالبوست
-
في التكينة بتتعشو بكم جوز حمام

ايمن ازيك

كلام التكينة هدا

Quote: اعجبتنى مداخلة الاخ السمانى اساسى و ارى انه يستحق التحية عليها ، و بغض النظر عن صحة رأيه او مجانبته للصواب ، ارى انها حركت ساكنا فى هذا المنبر الذى شدتنا دوما اليه النقاشات الساخنة و الردود الملتهبة ، فقد اصبح المنبر فى الفترة الاخيرة بارداً هادئاً .. لا يثير حماسةً و لا يُغرى بالمتابعة . اقول قولى هذا و ليس لى فى بورداب المملكة ناقة او بعير لكنها فرصة اهتبلها للتذكير بأن اهم كيان للبورداب و هو بورداب الداخل قد مات سريرياً و صار نسياً منسياً الا من بعض الفعاليات المتباعدة و الدعوات التى يقيمها الاخ العوض المسلمى بين فترة و اخرى , شكراً اساسى الاساسى و بالتوفيق للجميع ،،

كدي امكن انا بقرا باضنيني وريني انت ويييييين هنا انور هبش ناس الرياض
بعدين الرياض دي دايرين نغترب فيها ما تبوظو لينا ساي :)

Quote: بعدين الرياض دي دايرين نغترب فيها

تغترب كيفن يا الخير وأنا لحدى هسه ما جانى اللوتري ؟! :)

Quote: ما اورت اسم يوسف الا لانه كبير القوم القدوة رغم ان كثيرين جاطوا و ساطوا لكنى لم احفل بهم

يا انو التكينة صدق او لا تصدق .. في وسط بورداب الرياض مافي حاجة اسمها كبير القوم والكلام ده .. بمفهوم ان المسالة تشريف وتكريم وتعظيم
وعايز اوضح ليك حاجة وللقراء الكرام ..
اي زول بفتكر رئاسة بورداب الرياض او عضو لجنة بورداب ده تشريف وسلطات ومسألة تستاهل التنافس .. هو غلطان وغلطان جداً ..
لحدي الآن الرئيس اكتر زول اتكلف بمهام وبادر بتنفيذ مهام خاصة ونحن بصدد عمل احتفال بمناسبة الاستقلال وهو اكتر زول بيخسر من زمنو وقروشو ومجهودو
نفسي زول يوريني هو كسبان شنو غير الاجر الرباني!؟

الأخ الفاضل انور التكينة ،
إنسان بمجمل الكلمة ،
من طيب المعشر وحسن الخلق ،
وليس من رواد المخاشنة ،
والحروف المعكوفة زفارة ،
نسيج من الأدب الجم ،

...











عزالدين عباس الفحل
ابوظبي
...

إنتو شنو وهمة فلان لا ينتمي للكيان دي ؟؟؟
ياخ تعالوا ننظر وناس القانون هنا يفيدونا طالما بقت الشغلة قوانين وكيانات ويحق ولا يحق ..
أسة انا من بورداب الخرطوم ولا لأ ؟؟؟ وهل في بورداب إسمهم بورداب بحري؟؟ وفي بورداب إسمهم بورداب أمدرمان ؟؟
انا بيتي في الخرطوم وساكن الخرطوم و إسمي في كرت التموين ولحدددي أسة ناس بيتنا بيصرفو العيش بي الكرت وعيشتي ثبووتة ..أها في سبب بيمنع إني أكون من ضمن بورداب الخرطوم ؟؟؟و هل من حقي أعترض على تعيين لجنة من الخرطوم ولا لأ ؟؟؟
طيب لو واحد من بورداب الرياض نقلوهو جدة لي مأمورية 6 شهور ..ده وضعو شنو ؟؟ هل يحق له التحشر في لجنة الرياض ولا لأ؟؟ طيب هل يحق له إنتخاب نفسه في لجنة بورداب جدة ولا لأ ؟؟ ولا يكون زول ساااي كده يا حليلو مسيكين ما بوردابي في أي حتة ...؟؟
طيب لو في بوردابي عندو إقامة في السعودية وقاعد يجي السعودية 6 شهور ويمشي السودان 6 شهور ده تبع منو في الأهل؟؟
طيب البوردابي القاعد في المعيلق ده حنكو شنو ؟؟ يعمل بوراب المعيلق ولا كل ناس حلة وقرية جمب بعض يتلمو يعملوا بورداب ؟؟ يعني ناس قنب الحلاوين وسرحان وأم تريبات ومعيجنة يسمو روحم بورداب شنو ؟
ولا هم زاااتم ما يحق ليهم يعملوا لجنة بورداب ؟؟
وهو زاااتو مفروض العدد يكون كم عشان بكري يحترف بيك إنك لجنة بورداب ؟؟ يعني مثلاً أم حجار فيها اربعة بورداب ممكن يعملوا لجنة ؟ وفعاليات؟؟ وتبرعات؟؟

وهو منو زاااتو البيوافق إنو يكون في لجنة من عدما ؟؟؟
يعني بكري ده لو قال انا ما عايز بورداب رياض هل كده خلاص الشباب ديل يتفرتقو؟؟ ولا يقولوا لي بكري ولااا علي كيفك نحن ح نسمي روحنا ما إنت البتحدد؟؟

أساسي زي ما قلت لو بكري ده صحى الصباح قفل المنبر ده في ناس كتااار ح تلقاهم واقفين في الصواني يفلقو بي الحجار..

تخريمة :
دلعك وزوقك الخلوني أتكسر فوووقك بردلب أقع ..

Quote: إنتخاب نفسه في لجنة بورداب جدة ولا لأ ؟؟ ولا يكون زول ساااي كده يا حليلو مسيكين ما بوردابي في أي حتة ...؟؟

و الله يا عمر الفاروق كلامك دايما كباااار و منظم و مجيه ..
اسى فى واحد اخونا لا ارضاً قطع و لا ظهراً ابقى .. اياهو زى زولك الستة شهور هنا و ستة شهور هناك .. لا بقى رقم فى الداخل و لا دخل لجنة فى الخارج ..

Quote: الأخ الفاضل انور التكينة ، إنسان بمجمل الكلمة ، من طيب المعشر وحسن الخلق ، وليس من رواد المخاشنة ، والحروف المعكوفة زفارة ، نسيج من الأدب الجم ،

عز الدين عباس الفحل
الرجل انيق المظهر و المخبر
تسلم يا الحبيب و اتمنى ان يجمعنا الله فى اوقات طيبة اذ كان لقائى بك سريعا فى قندهار .
لك الود كله و المحبة

Quote: ونحن بصدد عمل احتفال بمناسبة الاستقلال

اهااااا .. ده الكلام الجاب الكلام .. غايتو ود الصايم ده غتيت غتاتة ..
نتمنى لكم احتفالية جميلة و ناجحة و لو شيخ عمر ود الباوقة بى ايدو اللاحقة برانى بى تأشيرة و تذكرة بحضروا معاكم

Quote: نفسي زول يوريني هو كسبان شنو غير الاجر الرباني!؟

السؤال ده يا ايمن اجابته عند ود الباوقة حيث يمتلك الخيط الرفيع فى الربط بين الدنيا و الاخرة
و مكاسب كل منها .

الأخ أنور والجميع

كل سنة وانتو طيبين

انتهز الفرصة للتحية للحبيب أنور

وعبر هذا البوست تحياتي لكل بورداب الخرطوم

وأخص بالسلام شيخ العوض ومزمل وصالح وبقية الاخوة والأخوات

متعكم الله بالصحة والعافية

كل الكلام ده .. هنا ... ولا هناااك ..

لولوه ساى ..
ردم بوستات ساااى ... وكمية نضمى ...
وكووووولو .. فى اللا شيئ ..




.......................


مع احترامي وتقديري ومحبتى لكل احبابي واصدقائي الاعزاء
الذين اعرفهم .. اعرف من زاملنى فى الروضه وكان عفيفا شريفا وقتها
واعرف من زاملنى فى الخلوة وقد كان معاطا ظرييفا ..... الخ الخ الخ الخ

وطبعا ما قاصد زول محد لانو كلهم ما شاء الله مشهود ليهم ما بتطلع منهم العيبه
وده مجرد رأى سااااى .. يصيب او يخيب ..

هريتونا هرى .. الله يسامحكم

واوجه التحية لعثمان حسين .. وقصته ... ولتوفيق مكى ومنظمته للشفافية
وتحية وتحيات .. للمعاطين والمعاطات
وتحية وتحيات .. لسواكن وسنكات
وتحية وتحيات .. للردم الجاييينى انا بالذات

Quote: دلعك وزوقك الخلوني أتكسر فوووقك بردلب أقع ..

عمر الفاروق ووضاح خنفر ... اقصد وضاح عبد الرحمنن أمنعوا الهرجلة ...
___
يا عمر الفاروق ... زمان ناس جامعة جوبا ودوهم داخلية اسمها (الفاروق) في المنطقة الصناعية بحري ... والدراسة كانت جنب المقر الدائم للمعسكرات ...
[الداخلية تحديدا جنب الصهريج الكبير داك المرسومة فيه دعاية البيبسي ... اللي قال عنه ود البشير انه ناس الجزيرة لموا يجوا مارين بجنبو (الصهريج)
بيقولوا ناس الخرطوم... قاعدين يشربوا البيبسي بالصهاريج] :) ...
عشان الطلاب يصلوا الداخلية من الخرطوم بحري ... للمقر الدائم للمعسكرات الاسبوع بكون خلص ...
الطلاب سموا الداخلية (الخازوق) ... من بعدها من مكان الدراسة وبعدها من الدكاكين ... داخلية مقطعية عديل كدا ...
لو بص الترحيل فاتك ... إلا ترجا اليوم التاني للمحاضرات ...
كلما أقرا ليك مداخلة قاعد اتذكر الاسم داك :) ...

______
موت ... موت ... حيا ... حيا ... :)

Quote: وتحية وتحيات .. للردم الجاييينى انا بالذات

ردم بالدوم (دا حق ناس المصران)
وردم باللالوب (ديل بجوك أنصاص الليالي ناس قيام ليل)
وردم ليمون (دا خاص بالناس البطنها طااامة)

أها أنت كان ردموك بيردمك عابر سبيل لزوم تحية وسلام

تحياتي يا حبيب

بسم الله الرحمن الرحيم
وبه نستعين

اخوانا الطيبيين بورداب الرياض

سلام عليكم ورحمة الله وبركاته

مده طويله ادخل من الشباك واخرج واحتفظ برأيى الا مع القليليون الذين اقابلهم

فى مناسبات او طرقات الحياة وكل ذلك للإبتعاد عن المخاشنات شدنى اليوم عنوان

البوست ومنيت نفسى أن اجد شيئا جميلا وللاسف وجدت الملامات لكننى حمدت الله

على وجود العقلاء وربنا يكثر امثالهم .

والله الاخوه المعنيين فى البوست الاخ التكينه ويوسف السمانى كلكم اعزاء واتمنى

أن يبعد الله الشيطان وعجبنى جدا الادب الجم الذى تحدث به الاخ التكينه وهذا ينم

على طيبة الخلق واعتقد جازما إنه يسعى لتوضيح موقف من يوسف كما إننى اعرف

الاخ يوسف كنت اتمنى بوضعه فى رئاسة البورداب الان أن يبادر ويتقبل الاخ التكينه

ليكون عيد استقلالنا عيدين وحتى تضيع الفرصه للإصطياد من أخرين لمواقف سابقه

وبكل أمانه اقف مع الاخ ايمن فيما ذكر وأن نلتقى فى احتفالية الاستقلال بالاحضان وأن

نعلم بعضنا إنه ليس هناك مهذوم فى خصام وإننا جميعا إخوان فى الخير وللخير مع كبير

شكرى للأخ التكينه على مبادرته ويلا يا ريس ما تتأخر !!!!!!!!!!!!

تحياتى للجميع

سيد سيدنا

Quote: وعجبنى جدا الادب الجم الذى تحدث به الاخ التكينه وهذا ينم على طيبة الخلق واعتقد جازما إنه يسعى لتوضيح موقف من يوسف كما إننى اعرف الاخ يوسف كنت اتمنى بوضعه فى رئاسة البورداب الان أن يبادر ويتقبل الاخ التكينه

شكرا الاخ سيد محمد احمد سيدنا على الكلام الطيب و ستظل يدى ممدودة بالمحبة للكل بدون فرز

Quote: كل الكلام ده .. هنا ... ولا هناااك .. لولوه ساى .. ردم بوستات ساااى ... وكمية نضمى ... وكووووولو .. فى اللا شيئ ..

وضاح ااخوى
الجابرك شنو ؟
اقلب الصفحة ياخى و تلقى المفيد عند صديق مهدى و الزول التانى بتاع السقاى الفى لندن ( و الله ما متذكر اسمه )
و نرفع الاكف لله بالشفاء العاجل لاخينا صلاح رئيس المنظمات و الروابط داك فقد ترك فراغا عريضا لك فى البورد

Quote: انتهز الفرصة للتحية للحبيب أنور وعبر هذا البوست تحياتي لكل بورداب الخرطوم وأخص بالسلام شيخ العوض ومزمل وصالح وبقية الاخوة والأخوات

و لك الود و التحيات العطرات اخى حسن و اتمنى ان نلتقيك فى رحاب الوطن

علاقات عامة وتطييب خواطر
لا يوجد حوار جاد
ولا إجابات
تحياتي لك ولبورداب العالم

احترامى ياانور... للكلام المسئول ... فالوضوح الذى يعالج غشاوة العيون والقلوب لامثيل له

وضاح يا حبوب ..
البوست ده تحديييداً ما فيهو أييي هرجلة كلام واضح ومنظم لم يتعدى حدود الإحترام وكل الأسئلة المطروحة فيهو Valid points يا قول المثقفاتية (ياريت الإسبلينق يكون صاح مع إنجليزيني الحبة ده ) ..بالمناسبة حتى بردلب بردلب دي عميقة ما تشوفا كده وتستهتر بيها ...
وعشان أوريك إنك بتنضم ساي تعال وريني الهرجلة هنا وين ؟؟ ووريني مداخلة فيهو خارج الموضوع ؟؟
صدقني حتكتشف إنو مداخلتك دي أووول مداخلة هرجلة ..

تخريمة :
أهدي اللحن القادم لي أهلي بي الحليلة غرب وأنوه لي إنو الحليلة بها شفخانة ومدرسة بنات وبير موية ..

سلام للجميع
الناس الجايين يكسروا تلج للتكينة كدي يروقوا المنقة وهنا ما محلو
سيدي انور التكينة انت جيت في البوست السابق وثنيت كلام اخونا اساسي
واخونا اساسي كان واضح والواضح ما فاضح ختاها واضحة مع السماني واستنكر اختياره رئيس
اها يا سيدي انور التكينة الكلام المعسل الفوق دا ما بيروينا

Quote: حكمة قيلت بالارشيف قديما .العلم نور والجهل انور

حسع دا بيزعل ليه زول لو مافي شيء خفي

Quote: اسى فى واحد اخونا لا ارضاً قطع و لا ظهراً ابقى .. اياهو زى زولك الستة شهور هنا و ستة شهور هناك .. لا بقى رقم فى الداخل و لا دخل لجنة فى الخارج ..

مافي داعي للتزاكي خليك واضح وارمي بياضك

شقي الحال يقع في القيد

Quote: حسع دا بيزعل ليه زول لو مافي شيء خفي

حيكون فى شنو يعنى ؟ و لما زول يصفك بالجهل تنبسط منو ؟
حمزاوى ..
القصة ما كسير تلج لكنه قول الحق الذى تتعامى عنه .. انا جيت و كبيت بضاعتى كلها قدام الناس ..
ختيت الحيثيات بكل امانة ، و كل هولاء استحسنوا طرحى و اقتنعوا بقوة حجتى و ابدوا اعجابهم
بما انتهجت .. هل ده كسير تلج ؟
و هل اذا اجمع الناس على حسن طويتك و قالوا كلمة حق .. هل هذا كلام معسل ؟
و الله العظيم معظم الناس الضايقتك ردودهم لم تربطنى بهم الا زمالة هذا المنبر ..
كدى ورينا انت حارق رزك مالك ؟

عمنا حمزاوي ..
والله حييرتني..
يدقكم أساسي وتشكروهو ..
يشكركم التكينة وتدقوهو ؟؟؟
عارف أحححر تلاتة نبزات في الدنيا دي زول يقول ليك عديم التربية..أو يقول ليك جاهل..أو يقول ليك يا حصان ..
والله حصان دي نبزة شينة كيف :) :)

Quote: عمنا حمزاوي .. والله حييرتني.. يدقكم أساسي وتشكروهو .. يشكركم التكينة وتدقوهو ؟؟؟ عارف أحححر تلاتة نبزات في الدنيا دي زول يقول ليك عديم التربية..أو يقول ليك جاهل..أو يقول ليك يا حصان .. والله حصان دي نبزة شينة كيف :) :)

انا ما بخاف في الدنيا من زول إلا من الاسمو اساسي دا
بخاف منو عدييييييييييييييل كدا
وعليك الله ما تحرشو علي

يا عمر الفاروق يا ابوالنسب
مسكاقمي
مشكلة سيدي انور التكينة كلام اساسي ريحتو في كنكوجو لشيء في نفس يعقوب
وجاء طوالي مثنيه ومثبتو
انا كنت حاقبل رأيه اذا قال كلامو عدل زيما ما انت قاعد تعمل
بس يجي متغطي بكلام واحد تاني دي تبقى ما كويسة
واهلنا بيقولوا المتغطي بكلام الآخر عريان

تخريمة
انا حصان وبالتحديد فرس

Quote: مشكلة سيدي انور التكينة كلام اساسي ريحتو في كنكوجو لشيء في نفس يعقوب وجاء طوالي مثنيه ومثبتو انا كنت حاقبل رأيه اذا قال كلامو عدل زيما ما انت قاعد تعمل بس يجي متغطي بكلام واحد تاني دي تبقى ما كويسة

يا عم حمزاوى
اتق الله
متين انا صفقت لى كلام اساسى حسب المضمون ؟ للمرة العشرين انا قلت اساسى حرك سكون المنبر بغض النظر عن
مضمون كلامه .
شنو اللف و الدوران البتعمل فيهو ده ؟ يا اخى اختشى .. انت راجل كبير و ليك احترامك بحكم السن .. ف ما تخلينا
نخاطبك بما تكره و نكره

Quote: وضاح يا حبوب .. البوست ده تحديييداً ما فيهو أييي هرجلة كلام واضح ومنظم لم يتعدى حدود الإحترام وكل الأسئلة المطروحة فيهو Valid points يا قول المثقفاتية (ياريت الإسبلينق يكون صاح مع إنجليزيني الحبة ده ) ..بالمناسبة حتى بردلب بردلب دي عميقة ما تشوفا كده وتستهتر بيها ... وعشان أوريك إنك بتنضم ساي تعال وريني الهرجلة هنا وين ؟؟ ووريني مداخلة فيهو خارج الموضوع ؟؟ صدقني حتكتشف إنو مداخلتك دي أووول مداخلة هرجلة ..

Quote: وعشان أوريك إنك بتنضم ساي تعال وريني الهرجلة هنا وين ؟؟

تعرف يا ابو عمير ... مرة كنا في حصة رياضيات في آخر اليوم الدراسي ... والاستاذ قاعد يشرح لينا في معدالات س و ص ... والناس راسها مسخن والاستاذ راسه مسخن اكتر مننا ... بعد حل المسألة والناس قاعدة تكتب في الحل ... يقوم واحد من الطلاب ... سأل الاستاذ وقال ليه يا استاذ لو قمنا عملنا كدة مش كان أحسن ... الاستاذ قال ختوا الاقلام وانتبهوا معاي .... خلى ليك حصة الرياضيات وقلبا لينا حصة تاريخ وتربية اسلامية :)... قال زمان لما موسى قال لبني اسرائيل الله قال ليكم اضبحوا بقرة ... مفروض طوالي بني اسرائيل يضبحوا أول بقرة تصادفهم ولكنهم صعبوا الأمر وقعدوا يزيدوا في الأسئلة ... هي بقرة عادية ولا حاجة ما عادية تفردت بميزة جديدة ... ويقولوا ليه أدعو لك ربك ليبين لنا ما هي ... ويدعوا موسى ربه فيزداد التشديد عليهم أكتر فيقول ليهم بأنها بقرة وسط ليست مسنة ولا فتية ... بين بين ... أها بني اسرائيل قاموا صعبوا في الموضوع أكتر بسؤالهم عن لون البقرة ... موسى سأل ربه وحدد لونها بالأصفر ... وتاني جماعتك رجعوا يسألوا ... إن البقر قد تشابه علينا ... وتاني رجع موسى لربه وربنا قال ليه انها بقرة لا معدة لحرث ولا لسقي ... بعد اللت والجعن دا كله ... بني اسرائيل لقوا ليهم بقرة مطابقة للمواصفات دي وقاموا ضبحوها ... اها الاستاذ قال انتوا عاملين زي بني اسرائيل ديل ... نحل ليكم المسألة بأسهل طريقة وانتوا دايرين تصعبوها على روحكم ...
انا معاك اسئلتك الفوق دي كووولها مشروعة ... وكلامك واضح ومنظم ولم يتعد حدود الاحترام وكل الأسئلة المطروحة فيهو فالد بوينت ... ولكنها صعبت الشغلة ... والشغلة بدون تصعيب يالله يا الله ماشة ولا مو كدي :) ... ودام الود بيننا...
__
أنا ما وضاح يا حبوب... أنا قسم الفضيل يا حبوب :)

طيب يا قسم الفضيل يا حبوب :)..
يلا ده ما كلامي زاااتو القلتو إنو ما كان في داعي يصعبوها ..
من زمااان اللجان دي بتتعمل في هدووء وبدون ضوضاء وبي البركة وبدون تعقديات وجمعية عمومية ونصاب وبوستات إستباقية وشعلقة فوووق في البورد و و و و..
أها الجماعة عقدوها براااهم ولو كان عملوها زي كل مرة كانت مشت ..
عرفت قوم إسرتئيل منو ؟؟ وعرفت مفروض توجه كلامك لي منو ؟ :)

يا الفاروق ... مرة مشينا الحج 4 انفار عشان نحج جماعي ... واحد فارقنا من جدة ... قبل ما نصل مكة ... والتاني بعد طواف القدوم والسعي قال ما بقدر يحج كداري ... حجينا أنا وواحد صاحبي ... لكن كل واحد رجع البيت براهو ... نحن السودانيين ديل مستحيل نتفق ... لازم تلقى ليك جماعة شغالين خرجمة ... بالله الجاليات التانية دي تلقاهم حاجين مع بعض 100 نفر بلبس واحد وقائدهم واحد ... واهو شوف 500 بوردابي من الرياض ما قادرين يتفقوا ... كيف يتفق 30 مليون ؟؟؟
____
بالمناسبة دي يا عمر ... اتا اسرائيل دي ما فيها بورداب :)

حكمة الله أن ربنا خلق كل شئ وضده .. لا يستغنى أحدهما عن الآخر .. سالب وموجب ذكر وانثى .. حلال وحرام .أسود وأبيض . حار وبارد .
منذ أعلان لجنة بورداب الرياض دخلت وباركت صادقا بقناعتي برئاسة يوسف السماني رغم عدم معرفتي العميقه به نسبة لحداثتي بالمنبر .. لكن لثقتي برأي من أختاروه خبروه ومعظمهم جمعتنا بهم علاقة خارج المنبر وقديمة . وكذلك ترسيخا لمبدأ الديمقراطية .
كذلك أيضا وجود المعارضة مطلوب لابد من رأي آخر لايجعل الامور تسير في اتجاه واحد .. كلنا عشنا و نعلم أن وجود الحزب الواحد تكريسا للفساد .
لكن رغم ذلك لم أستطع أن أكتم أو أسر إعجابي بمداخلة الموهوبين أساسي وعمر الفاروق فهم لهما مقدرة عجيبة على توليد الكلام بصورة رائعة تحسبها بعيدة ولكن تجدها في صلب الموضوع .. لدرجة ؟ أني تمنيت لو أستطع أستدراجهما خارج هذا الموضوع في موضوع مشابه بعيدا عن هذا الصراع الذي كثرت فيه المرارة رغم أنه لا يستحق وحمل أكثر مما يحتمل . فهما يشبهان الموهوبيين الاستعراضيين في كرة القدم والتي أصبحت موهبة قائمة بذاتها خارج اطار الميادين الخضراء .
ومن أفتراع هذا البوست للاستاذ أنور التكينة هو شعر نفس الشعور .. وعبر بطريقة فهمت خطأ وولدت رد فعل أستفذاه شخصيا وجره لباقي ما أورد ربما لخلفيات سابقة فهمت بعبارة الريس يوسف السماني .. لان نفس هذه العبارة لو ذكرت في مكان آخر لن يفهمها أحد ولا عرف ماذا تعني وأعتقد حتى في هذا البوست لم يفهمها أحد غيره فهي ليست بذيئة ولا شتيمة في ظاهرها العام ..ولكن أعتقد بهذا البوست هو وضح وجهة نظره وأصبح عذره مقبولا ..
لكن مداخلة عمرالفاروق الاخيرة ولدت خلطا جديدا : لو قلنا من هو البوردابي . هو الشخص الذي يمتلك كلمة سر في موقع سودانيز اونلاين فقط.. طيب هل يشترط أن يكون سودانيا .. وماهو المعيار الذي على اساسه وزع البورداب جغرافيا .. وماذا عن التنقلات الجغرافية التي تحدث عادة للبورداب بسبب ظروف المعيشة .. خير مثال حي ودع بورداب الرياض العام الماضي العضو النشط الباشمهندس محمد ابراهيم لانتقاله لمدينة جدة لظروف العمل .. هل هو لازال يعتبر من بورداب الرياض ضيفا على بورداب جدة أم العكس ..
صدق من قال سهلها تتسهل عقدها تتعقد .. نحن من نعقد حياتنا وبعد ذلك نظل نعاني من حلحلة هذه العقد ..

Quote: ومن أفتراع هذا البوست للاستاذ أنور التكينة هو شعر نفس الشعور .. وعبر بطريقة فهمت خطأ وولدت رد فعل أستفذاه شخصيا وجره لباقي ما أورد ربما لخلفيات سابقة فهمت بعبارة الريس يوسف السماني .. لان نفس هذه العبارة لو ذكرت في مكان آخر لن يفهمها أحد ولا عرف ماذا تعني وأعتقد حتى في هذا البوست لم يفهمها أحد غيره فهي ليست بذيئة ولا شتيمة في ظاهرها العام ..ولكن أعتقد بهذا البوست هو وضح وجهة نظره وأصبح عذره مقبولا ..

نعم اخى درديرى فقد نطقت بالحق ..
لك شكرى و امتنانى .

العم انور التكينه
انا اشهد لك بكل ماقلته
منذ ان كنت متابعأ قبل ان انال عضويه هذا المنبر كنت ومازلت اعتبرك من الكبار فيه والذين لايخوضون السفاسف والابتزال
وفي كل يوم تكبر في ناظريا
حفظك الله ورعاك..

Quote: العم انور التكينه انا اشهد لك بكل ماقلته منذ ان كنت متابعأ قبل ان انال عضويه هذا المنبر كنت ومازلت اعتبرك من الكبار فيه والذين لايخوضون السفاسف والابتزال وفي كل يوم تكبر في ناظريا حفظك الله ورعاك..

شكرا اخى عثمان احمد شرف الدين
و أسأل الله ان اكون عند حسن ظنكم .
تسلم اخى .