سلمي سلامة فرحان بيك

فرحانة بيك كل النجوم
لا نام بريقها ولا انطفا

شكرا ليك ونفرح بجديد وليداتك
كتر خيرك واتمنى انه العام دا يبقى عام خيرتنشال همومنا ونرجع لديارنا الانطردنا منها
واعنى ما اقول
محبتى

بالجد طلتك بتفرح ،، عليك الله خليك على طول ،،
شكرا صديقي حفيظ وانت تبشرنا مع اطلالة عام جديد رجوع الاستاذة سلمى الشيخ سلامة

ود اب سن الله يفرحك بكان ما تقبل
و علي الطلاق انا فرحان بيكم انتو الجوز
سلمى عليك الله تاني ما تعملي كدا دا يا زولة نحن
بنريدك ساي لله في لله تسوي شنو.
مليح الظهرتي

وجودك بشارة خير
ورأيت اسمك
ودعتك عيوني .. مرقت وخشيت تاني .. اي والله
يكفي انك هنا
والوطن
ما ماخدني شك ابدا ولا لي لحظة انو سيكون اجمل .. وستعود إليه طيوره
حركة التاريخ حركة صاعدة للامام شئنا ام ابينا .. غصبا او في سلاسة
وبرضو
وحات الله فرحان بيك فرح اللقا الرايحة كما قال القدال
وليك يا صاحبة في الزمن الصعب

ود السناب عبدالحفيظ سلام ياجميل جبت الزول السمح الطال غيابو

مرحب حباب الاميرة الكنداكة سلمى كل سنة وانت طيبة الله يحفظك ويجعل كل وقتك نعمة وسعادة .

العزيزة سلمى
هلا ومرحبا ونورتي المنبر العام
والخير على قدوم الواردين وان شاء الله زي ما قلتي
يكون عام خير وبركة ونهاية هموم الوطن المكلوم
ودمتي دائما بخير وصحة وعافية
اميرة مصطفى السيد
بسمات الشيخ عبد الرحيم

عفيت منك يا ودابوسن
قدرت تجيب سلمى



----------------
سلمى مشتاقين

سلمي الشيخ يا حيبية الجميع لا حولا وأنا أقول العام الجديد دا من الصباح الشمسو مشرقة


شكراً يا عبدالحفيظ

الأستاذه أختنا الكريمه سلمى الشيخ سلامه
مرحبتين حباب عودتك لمكانك الطبيعى ,

بت الشيخ سلامة
كل عام وانتى احلى البشر
دا الكلام ياخى فرحتينا بي طلتك ربنا ما يحرمنا منك يا بت يا حديقة

الاعزاء
علي دفع الله
امجد الجميعابي
فقيري جاويش
اميرة السيد
بسمات الشيخ
خالد العبيد
ابراهيم كوجان
عبدالله عبدالله
وضاحة
شاكر لكم حيث لا موجب للشكر فأنتم اهل المباشرة
شاكر لكم احتفاؤكم وجميل ترحابكم

حبابك
وجيدا جيتي
الاستاذة بت الشيخ سلامة

شكرا ود اب سن زول البشارات
ورجل المهام الصعبة
حباب ست الدار سلمي
جبارة خواطر الطيبين
وهذا زمان قلمك ياسلمي.

على موقفى من سلمى .. حتى تحترم مشاعرنا وموروثنا الثقا فى ..

ويبقى الخلاف خلاف بشرف ..

العنف الذهنى ..بريمة نموذجا العنف الذهنى ..بريمة نموذجا

I`am GayI`am Gay

بريمة

مرحبا عبدالعزيز
وكتر خيرك
مرحبا بريمة
وحبابك
كنت اظن ان ما يجمعني معك ولازلت الاحترام والتقدير .. التقدير في انني لن أكون سببا في تعكير فرحك يوما مهما بلغ بي خلافي معك . لن افسد لك فرحك .. والفرح حالة خاصة تخص صاحبها . لن اقول لشخص يجب ان لا يفرحك ما فرحت مهما كان رأي سالبا في مصدر فرحه
والاحترام .. احترام حالة المشاعر الانسانية .. الفرح والحزن ..بلاشك ان التعبير عنهما يخص المؤازرة والمواساة والمشاركة .
لم افتح بوستا لنقاش مفاهيم سلمي حول اي قضية .. لاتفق او اتفق معها
ومن ناحية اخري عزيزي بريمة اسمح لي دون سؤ نية او قصد .. فلندع قلوبنا مفتوحة وعقولنا كذلك لتقبل الآخر اولا .. ولتقبل فكرة ان ما بين 2012 و 2015 سنوات تسمح بتغيير القناعات والفهم .. وتسمح بتنقيح ما كنا نؤمن به وما كنا نرفضه
رجاء اخ يكن لك تقديرا ان تدعني افرح بعودة اختي وصديقتي وكنت اناديها ان تعود
من اجلي فقط ان كنت اطيب لك
ولتفتح ماتشاء من بوستات لنقاش ما تود قوله
وشكرا

Quote: على موقفى من سلمى

يا ود يا بتاع المواقف إنت.
لقيتك ختري لكن...

مرحبا الاستاذة سلمى

مشكور يا ود ابسن على هذا الجهد\ الراقي الذي شهدنا عليه

نتمنى نبذ الارهاب الفكري

وان الحجة لا تقارع الا بمثلها

مرحبا ود المدير
وحبابك
قال الشاعر
وكانوا جميعا بسألوا عنك
وين البت اشجار الصندل
وين
وين البت منقاية الروح
وثمار الشتل
وانت لأنك كنتي ومافي
كان الشاي بس ناقص سكر
فيهو حليب بس ناقص الابيض

Quote: قال الشاعر وكانوا جميعا بسألوا عنك وين البت اشجار الصندل وين وين البت منقاية الروح وثمار الشتل وانت لأنك كنتي ومافي كان الشاي بس ناقص سكر فيهو حليب بس ناقص الابيض

،

وتظل بت الشيخ هي بت الشيخ،
ولك التحايا النواضر أخي عبد الحفيض...

مرحباُ الأستاذة سلمى
مرحباُ بك شجرة ظليلة تظلل المنبر
و طاقة إبداع متجددة إن شاء الله
أكرر ترحيبي في مكانك الطبيعي

يا إلهي ... !!!!
بت الشيخ سلامه ، حبيبة الملايين والله فرحت لظهورك وكم تساءلت بخصوص عودتك ,
أهلآ وسهلآ ويديك الصحه .
ويااااااا ود أبو سن إمتناني ياخ .

صباح الخير ايها العالم الجميل
صباح الجمال لكل من سال عنى وعبر من ها سائلا او محييا
صباح الالفة وشاى الصباح وشاى الضحى وكلام اماتنا البخش الروح
صباح الفل على اهل الحب
واقول للاخ بريمة انك للاسف ماقريت البوست
ولو كنت قريت البوست كان فهمت
وشكرا ليك انك بتجيب البوست فى كل مناسبة عشان الناس تقراهو
دى حالة ايجابية بالمناسبة
لانه البوست لغاية الان قراهو اكتر من ستين الف شخص
ودا يحسب لى انى مقروءة
غرور وكدا
وبمناسبة القراءة فى قوقل لقيت انه عندى اكتر من عشرة مليون زول مبارينى
من حقى افرح
وعليك الله كل يوم نزل البوست عشان عدد القراء يزيد

تقاس الامم بعظمائها ومبدعيها
سلمي بوجودك زاد منبر بكري درجات في سلم الريادة
ي مراحب وي بختنا
وكما قال ابوجوده في موضع ما من بهاك نحن بقينا بهناك
من بهاك ومن صفاك

Quote: شكرا ليك انك بتجيب البوست فى كل مناسبة عشان الناس تقراهو

ود ابوسن خشمك فيه اللبن
النجيضة انا بحب البت الحديقة الاسمها سلمى سلامة دى
نورت البكان عالم الله وشاهد،،،

حمدلله على السلامة بت الشيخ

تحياتى أبوسن و الضيوف .

العزيز فقيرى جاويش تحياتى
وفى القلب ايام القاهرة وما حملت من جمال واخاء
لك التحية والاحترام
كن بخير

اميرة الاميرة
عام سعيد ومليان بالخير عليك
شكرا ليك على الترحاب

خالد العبيد
ايها الرجل الجميل كل الايام وانت بخير واسرتك بالف خير
شكرا ليك وما تنقطع
مرة مرة شدالسلك
تحياتى

ابراهيم كوجان
ياخ بتبالغ معاى
مالك مجافينى ؟
اتمنى انك بخير وعافية

الأخت سلمى سلامة.. عدوة الوهابية

حمداً لله على سلامتك

الله يحفظك

الاستاذ عبد الله عبد الله عبدالله
تحياتى وما زلت احمل تلك الليلة بينكم فى الحنايا
شكرا لك

وضاحة يا فجر المشارق
اول حاجة كيف صحة الوالد اتمنى ان يكون فى اتم عافية وصحة وسلام كبير
تحياتى واحترامى

الصادق الخالدى
تحية واحتراما
شكرا لمرورك الكريم

ودابسن حبابك ياجميل
وكل عام وانت بخير وربنا يجعل
قلبك عامر دوما بالمحبة والاخاء
والتحية عبرك للاخت الزهرة
سلمي التي تعطر اي مكان
تتواجد فيه والله شرف لينا انو
يضمنا بورد واحد مع سلمي
ربنا يسلمها من كل شر
تسلم ياحبيب

Quote: كتر خيرك واتمنى انه العام دا يبقى عام خيرتنشال همومنا ونرجع لديارنا الانطردنا منها واعنى ما اقول

شكرا ود اب سن جبت الغالية
اجمل بشرى فى بداية 2015 م
يا سلمى عدت لى دارك كما قلت والعود أحمد وديارنا بيك نورت
وبالله تانى كان طردوك ما تمشى فى زول بيطردو من دارو .
مرحب حبابك شرفت ونورت

Quote: الاستاذ عبد الله عبد الله عبدالله تحياتى وما زلت احمل تلك الليلة بينكم فى الحنايا شكرا لك

أختى العزيزه سلمى بنت الشيخ سلامه
نحن فى واشنطن من كان لهم عظيم الشرف بوجودك بيننا فى ذلك اليوم
ندعو الله أن تتكرر زيارتك لنا فى بلاد العم سام ومعك الحفيده .

الاعزاء
الصادق الخالدي
درديري كباشي
محمد عبدالله
اخلاص المشرف
عفراء سند
صديق الموج
نعمات عماد
عماد حسين
سليمان القرشي
احمد قلوب
كتر خيركم
و
سلمي
تاني وين ضيق المكان وانت في

يا سلام على تباشير بداية العام الجديد
مرحب بيك في دارك ومكانك الشاغر يا سلمى بت الشيخ
وأجمل ما في عودتك أن حامل بشارتها هو الإنسان الملك ود أب سن
التحية لكما

حباب الاستاذة العظيمة سلمى الشيخ سلامة

نورتي البكان



شكراً الحبيب ود ابسن

الاعزاء
محمد البشري
الجنيد حمد
كتر خيركم
سلمي تاريخ يسير بيننا
فقد شهدت وشاركت واحدثت فرقا
وهي كاتبة متمكنة

يا سلام يا سلمى
عودا حميدا

مشكور يا أبو سن على الجهد وما ضاع حق وراه مطالب

وحقنا على سلمى إنها تكتب

عام سعيد .. بعودة الكتابة المفرحة

والانسانة الراقية .. سلمى الشيخ والتحية موصولة

والشكر أخى أبو سن

سلمى الشيخ سلامة
سنة سعيدة على المنبر بعودتك
بشرياتك رائعة أستاذنا أبوسن
أمنياتي لكم بعام جميل وكل سنة وأنتم طيبين

لا شك أن عودة الأستاذة سلمى الشيخ للكتابة هنا خبر يسعد الكثيرين،
نتمنى عودة أقلام أخرى لهذه المساحة..

تحاياي ودأبوسن.

الف مرحب بعودة الاستاذة سلمى

الاعزاء
حمد عبدالغفار
طه كروم
اسامة العوض
محمد المرتضي
وضاح
كتر خيركم ولكم الشكر
ولمثلها نفرح

سلمى وسلامة !! ياخي والله حاجة لا تصدق !!!


الله يبهجك يا عبدالحفيظ



ويحفظكم الإثنين معاً


يا سلام !!!! تحياتي

مرحبا مامون
وحبابك
فعلا وجود سلمي مبهجا
ويبشر بنقلة نوعية
الجاب سلمي يجيب العقاب

Quote: فرحانة بيك كل النجوم لا نام بريقها ولا انطفا

قول يا عبيد حباب عربن هوادجا ناجعة
وحباب ناس أم نفل وسماح طيورها السّاجعة
بعد نشقت رويحتي اللّيلة جاتني راجعة
و شاشا قليبي ساهرت بي رباعتي الهاجعة
بت الشيخ سلامة الحُرَّة
محلفنا السَّمِح زنتيهو شامة وقرَّة
العرب النّايو بي اللّقحة المغاورة الدَّرَّة
ديل يا سلمي غير ليمهُن محال ننسرَّه

بي سماح ناسا حنان يا سلمي قولي أشجينا
سماح ناس العميري الكان قبيل شادينا
حليلو الكان بعزِّك وكان دواخلو حنينا
كتير أسعدنا بي وترو الحروفو رزينا

شكرا ياودصُرَّة المنبر علي المبادرة والربعة الزينة
وشكرا لك علي عودة أم نفل بت الشيخ سلامة الحُرًَّة، والفنَّانة المُبدعة،
فهي من تبلديَّات بلادي
بالمناسبة لم ألتقِ بسلمي يوما ولا بالراحل العميري ولا بود أب سن
ولكنني أحببتهم لجمال روحهم وبياض النيَّة والدواخل
معزة صادقة لجميع المحتفلين بعودة بسلمي بت الشيخ سلامة

حمدلله على سلامة العوده للمنبر يا بت الشيخ

تحياتى أبوسن و الضيوف .

الاخ العزيز عبدالعزيز عثمان
زاد الضيفان وعشا الحبان
يسلمك الرحمن

معاوية ود المدير
مدير الجمال والانسانية
مالك مجافينى ؟
تلفونى معاك سالمنى مرة مرة
يسلمك الله

كباشى
تلحقنا وتفزعنا
زمان حبوباتى كن يعتقدن اعتقادا جازما ان الشيخ الكباشى يقيهن شر العقارب
ويعتقدن رحمهن الله انه رجل واصل
رغم انهن دائما يسبقن الشيخ ابوقرجة جدهن على الشيخ الكباشى
بل انهن يضفن واحدا الى الاخر فى امر الفزعة
لم يقل اخد انهن "مشركات "
لم يصبهن احد بداء اللعنة ولم يقل احد انهن الا نساء صالحات
احببن الحياة وعشنها كما وددن او كما شاء الله لهن
شكرا لك على ما اورت من من جمال هو جزء اصيل فى روحك
وروحك دائما محل الحبة
وكما كانت تقول امى "الماعندو محبة يسمه اسم الحبة "
لك الحب اخى الكريم

محمد عبد الله الحسين ودالابيض
وما ادراك ما الابيض
تلك البقعة التى تظل فى الوجدان الى يوم يبعثون
فهى امنا وهى رديفة الروح لك الود اجزله

اخلاص المشرف
يشرفنى ان اكون بينكم رغم انى كتبت ذات مرة ان هذا المكان بات موحشا
وبات وبات ، لكنه يظل مكان لنا نلتقى فى روابيه
رغم اى حاجة
شكرا لحضورك الباهى

عفراء سند
كل ما شفت اسمك يخطر ببالى صديقى الجميل محمد عبد الرحمن المطرطش
يا لحزنى عليه ويا لفجيعة رحيله
تسلمى بت امى من كل شر وعامك سعيد
وخلى بالك من زهورك

صديق الموج
ياحبيب الروح
والقال ليك منو انى ما بحبك ؟
زمان كان بجى زول بصلح العناقريب فى حى العباسية
ووراهو واحد تانى كسلان
اها الزول البصلح العناقريب يكورك " اصلح العناقريب "يرد الكسلان "وانا كمان "
دحين يا ود امى الحب متبادل
تحياتى وسلامى ونتلاقى فى الزمن الفسيح

سلمى الشيخ سلامة

فرحة رجوعك بس كفى

نعمات عماد
اسمك فيهو ايقاع سمح
زمان فى المدرسة الثانوية "كلية المعلمات "
كان عندنا استاذ"بقينا اصحاب لغاية الان "
استاذنا كان اسمه محمود عمر
لكن ما فى زول شغال باسم ابوه
سميناهو محمود فنون
كان يدرسنا مادة الفنون
زمن المدارس بخيرها
وكان عندنا كل يوم خميس حفلة اما على مستوى الداخليات او على مستوى الافراد لمن يكون ما عندنا خروج
الخروج معناها البنات العندهم اهل او اقارب بطلعو عندهم ، والافراد معناها فى "تعليمة عروس لعروس مرتقبة "
والخميس البعده بكون فى حفلة الداخليات "تمثيلوغناء وشعر وقصة واختفالات حب اعياد |
نرجع لموضوعنا
محمود فنون كان مادة حلوة بيننا كلما بدأ الاحتفال الخاص يوم مافى خروج كنا بنغنى لو شفناهو جا لمراقبة المذاكرة
لمن كان فى مذاكرة اجبارية ومكتبة اجبارية
بدون مقدمات بنلقى روحنا غنينا " محمود فنون يا محمود فنون ، محمود فنون يا زوجى الحنون "
محمود فنون كان من اجمل وانبل الناس الذين عرفتهم والى الان
العام 2005 مشيت السودان بعد انقطاع زاد على ال15 سنة
دعتنى اسرة مركز عبد الكريم ميرغنى لتقديم ندوة
كان محمود فنون اول الحضور جاء من الابيض خصيصا لملاقاتى
شفتى كيف ؟

مليون مرحب بعودة الأخت الفاضلة
سلمي الشيخ سلامة
سعدنا بعودتك ونورتي المنبر وأهلآ بيكي في دارك ووسط أهلك الذين فقدوكي كثيرآ في الفترة الماضية.
شكرآ ود أبوسن

عماد حسين
سلام من الله عليك
وبالمناسبة ما عندى عداوة مع اى فكر انسانى
مالم يتعدى الانسانية ويحاول اعادتنا الى زمن الحريم والكهوف
اما انصار السنة فواحد منهم استطاع الى اغلاق تلك النافذة لدنى
كان خطيب شقيقتى رحمها الله
ويوم ان اصيبت شقيقتى بالسرطان فى ثدييها وازالوه ، اذا به ولم تتعافى شقيقتى بعد
ان قام بخطوبة ابنة عمى شقيق والدى وتزوجها وهدى كانت فى سرير المرض
ويوم زارتنى فى القاهرة كانت دموعها لاتجف ولاتتوقف ، حدثتنى لو انه انتظرنى لمن اموت مالو ؟
من يومها لم اغفر له دموعها ولن
ومن يومها قام سد ضخم بينى وبين اشباهه من مدعى التدين

سليمان القرشى
سلام عليك من الله
شكرا ليك واتمنى ان اكون عند حسن ظنك
يسلم عمرك

محمد قلوب
قريت اسمك بمعنى "قلب "
وجمعه "قلوب "
والقلوب شواهد او كما قال المثل
مرة كنت بسجل مع الفنان الجميل خليل اسماعيل رحمه الله
وجات سيرة الغنا المشحون بالقلوب "قال لى والله ابوقطاطى دا عنده كمية قلوب
فى غناهو"
وغنى "ما كنت بفتكر العيون تتعب قلوب الشكل دا"
له الرحمة ولك العمر كله

محمدالبشرى خضر
وحات شيخى كان فتشت ورا كدى بتلقى عندى بيك صلة قرابة
لانه اسم الخضر "تنطقه امهاتى بتخفيف الضاد تتحول الضاد الى دال "زى الترتيب "
وهو اسم ينتشر بين اهل دنقلا كثيرا "
ياخ فرحانة بيك جد جد
يسلمك الله يا ود الروح

الجنيد الولد الكتاااااااااااااااب
وين الكتابة السمحة العرفتنا عليك ؟
اتمنى ان يكون هذا العام وعدا لجمع كل ما كتبت واصداره فى كتا نفرح به جميعنا
لك المحبة ابنى الذى تمنيته

حمد عبدالغفار
تحياتى يا زول يا سمح

طه كروم
كل التحايا والامنيات ان يعود عليك العام الجديد بالخير يا سيد الخير

اسامة العوض
ازيك
وكيف السنة الجديدة ؟
اتمنى ان تعود عليك بالخير والعافية
شكرا لك على حفاوة الاستقبال

مولانا المرتضى
تحياتى وشكرا لحفاوتك

ألف مرحب بعودة الأستاذة سلمى

الابن وضاح عبد الرحمن
اتمنى ان تكون قد طالعت البوست الذى قلت عنه انه مقرف
فهو يحمل عنوانا مغايرا فقط لكن كل ماحواه قصص حقيقية من بلاد العم سام
اتمنى ان تقرا قبل ان تحكم
وشكرا لك

مامون احمدابراهيم
تحياتى يا يازول اتمنيت الاقيهو
وجيت الدوحة مرتين وما لاقيتك للاسف
اتمنى ان نلتقى بيننا كلام كتير..مودة بلا حدود

Quote: عماد حسين سلام من الله عليك وبالمناسبة ما عندى عداوة مع اى فكر انسانى مالم يتعدى الانسانية ويحاول اعادتنا الى زمن الحريم والكهوف اما انصار السنة فواحد منهم استطاع الى اغلاق تلك النافذة لدنى كان خطيب شقيقتى رحمها الله ويوم ان اصيبت شقيقتى بالسرطان فى ثدييها وازالوه ، اذا به ولم تتعافى شقيقتى بعد ان قام بخطوبة ابنة عمى شقيق والدى وتزوجها وهدى كانت فى سرير المرض ويوم زارتنى فى القاهرة كانت دموعها لاتجف ولاتتوقف ، حدثتنى لو انه انتظرنى لمن اموت مالو ؟ من يومها لم اغفر له دموعها ولن ومن يومها قام سد ضخم بينى وبين اشباهه من مدعى التدين

الأخت سلمى

هذا واحد.. ولا أريد أن أغالط بشأنه... بل سأسلم لك

لكن نحن نعرف (من أنصار السنة) مئات الدعاة والأطباء والمهندسين والأئمة.. كلهم متزوجين وكلهم في أمان الله..

من الجور القياس على موقف واحد..

عموماً.. حمداً لله على السلامة

اي صوت راجيهو صوتك
كوني النجمة
عرفت سلمي كقارئ وانا في بواكير قراءاتي .. أتلمس طريقي فلا يقع في يدي ما يقرأ .. إلا وإلتهمت سطورة بشغف جائع
وقرأت له سطور اخت محبة في الراحل العميري . ولم يكن انطباعي عنه جيدا .. كنت صغيرا في العام وكان العميري منتشرا غناءا وتمثيلا وشعرا .. ولم اعط نفسي لصغر سني فرصة لمعرفته .. وتعتريني روح المراهق النزق نحو اتخاذ المواقف دون روية .. وقرأت ل سلمي بعد رحيلة احرف تفيض شجنا وود وذكري .. واعجبتني سلمي اولا .. احب روح الوفاء والانتماء للآخرين .. اعجبني ما كتبته عنه .. ابانت بشكل اخاذ كيف ان العميري كان انسانا ! وكيف رحل قبل تورق ثماره وتتفتح ازهاره .. رحل باكرا وهو اشد شغفا بالحياة . فأحببت العميري وندمت
رحل عميري وبقي شذي سلمي يعطر ذكراه كل عام
اتمني ان اجد مثل سلمي حين ارحل تكن لي مودة وشوق
قال سند
شوقا يخض دمي إليه
كأن كل دمي اشتهاء
ف يا صديقتي واختي
فرح بك فرحا يكاد يسد مسام الحزن داخلي

عبيد الطيب
ود البادية الجميل
احتفى بك بشكل خاص
واطالع كل ما تكتب بقلم ينضح حبا
لك الحب يا صديقى وصديق العميرى

محمد مجيدو
يسلم عمرك اخى الغالى

نصر الدين عثمان
شكرا للوردة التى ترد الروح

الف مراحب يا سلمى و سعيد جداً بعودتك و كل عام و انت بألف خير
و الف شكر ليك يا ابوسن يا صنو الجمال و الألق

ودالصاوى
مرحب بيك
لكم احببت داليدا
ربما لاننى وكثير من ابناء جيلى احببناها
ازعم انها مولودة فى اسكندرية من اصل فرنسى والله اعلم
لك المحبة دائما

سيد احمد شامى
ووجودك معانا برضو جميل
شكرا ليك يا اصيل

حفيض ابو سن
حبوباتى كن ينادينى خالى حفيظ بحفيض
ويقلن "يا حفيض تحقض"
يا حفطى كما ننادى خالى حفيظ نحن الجيل الثالث لدن الحبوبات
ياخ فرحانة بيك من تالاى
وسعيدة العرفتك
وعميرى دا زول يظل فريد
ما اظن فى زول بشبه عبد العزيز ، تصدق ، لغاية الان لمن نتذكره مع الاصحاب بنبكى
نبكى فقده ومكانه الذى ظل شاغرا
كانسان وكفنان واخ وحبيب للكل
وما اظن بمر يوم دون ما اتذكره براى
مرات اكون ماشة فى الشارع اضحك من فكرة قالها عميرى
كان مرات لمن نكون ماشين فى الشارع يقيف ويضرب على عربية
يقول لى "دى عربية بت كلب اسمعى الصوت دا ؟ ونمشى قليلا يشوف عربية تانية
"يضرب عليها ويقول "عاينى دى وديك ؟ شفتى الفرق ؟ دى طرورة ساكت "خاصة لمن صوتها يكون عالى "
بقيت اعمل الحركة دى فى اى مكان واى زمان ، اضحك من خيال عميرى ..
ومرات اعاين للناس البشربو المشروبات الغازية ولا بدخنو سيجارة سالنى مرة
" انتى ليه الناس لمن يدخنو ولا يشربو بيبسى بعاينو للسيجارة ولا القزازة ؟
حقيقة لقيت الحركة دى "شغالة " وبقت مصدضحك بالنسبة لى
رحمة الله على عبد العزيز عبد الرحمن العميرى

شكرا جميلا ود ابو سن على اقناع ايقونة البورد بت الشيخ بالعودة فقد نجحت فيما فشل فيه الكثيرون..

وحباب سلمى فقد ظل مكانك شاغرا وظل محبي الجمال في انتظارك وانتظار قلمك الانيق بلا كلل او ملل..





وما أحلى كده ياخ..

Quote: وحات شيخى كان فتشت ورا كدى بتلقى عندى بيك صلة قرابة

أفا يا بت الشيخ! وهل خوّتك محتاجة ليها تفتيش

تحياتي للجميع
ست الشي جات ترد براها وهي افصح مني واكثر ذوقا

سلمي بت سلامة
شنو يعني
ياااااك
وتشتتي
والناس راجينك
حبوك حب
قدر الحروف الفي الكتب

الأخت سلمى
أرجو أن لا أكون قد خذلتك .فأنا لست من تعنين . نعم أنا محمد عبدالله الحسين و لكني لست من الأبيض التي أكن لها كل حب و أتمنى أن اراها.
كما أنني لم التقي بك شخصيا لكني عرفتك من وحي كتاباتك التي تكلمتي فيها عن مستشفى كوستي و ذكريات السفر بالقطار و عن والدك و مرة أخرى عن استاذ تحملين له كل المودة .
و هي كتابات لفتت نظري لأنها كانت صادقة و تفيض بالحنين و المشاعر الإنسانية الدفاقة. فكنت كأني ألتقيت بك و أعرفك لذا جاء ترحيبي بعودتك.فأهلاً بك مرة أخرى.