الفقرابيع يا بشري الفاضل

الاعتذار للاديب المبدع لتجاوزي ومحاولة نحت اسم يعادل موضوعيا ما نحته
طفابيع
ف شنو يا استاذي
كيف للطفبوع ان يمارس هوايته مالم يكن هناك فقيربيع

كفقرابيع فنحن نجيد بمهارة تجسيد ما اسميه ب
ثقافة الفقر
لا نستغني بسهولة عن الاشياء .. وامكن يوم احتاج ليها وما ألقاها
عندنا خوف غريزي من بكرة .. نشتري البارد ونحفظ الفارغ .. بنفع نخت فيهو حاجة . فيزدحم الزقاق بالقارورات الفارغة مختلفة المقاسات وبرضو نلم حتي لو صادفتنا واقعة في الشارع

ووجدت من يحفظون عشرات فرش المعجون الفارغة !! ضنو ان يرموا بها
نغير اللمبة ونحفظ القديمة في الزقاق
نغير استك عجلة طفلنا ونحفظ
مشايات الاطفال
ان اردت ان تعرف مقياس ثقافة فقر احدهم فأنظر ل زقاق منزله
وانظر تحت سرائر بيته
وانظر فوق ظهر الدولايب

ونبيع !
ولكننا
لا نبيع إلا ما نملك !
ولا نبيع إلا ما نحتاجه !
نبيعه قهرا
وحوجة
وغصبا
ونبيع ونحن نعلم اننا سنندم ببيعه
ولكن
لا مناص !

اقتني الفقراء في زمن الجاهلية دون ان تدركهم انوار المشروع الحضاري والبعث الجديد .. وقبل ان تتم صياغتهم
اقتنوا
المروحة
البوتجاز
التلاجة
وكثيرا من الاجهزة الحديثة التي لا غنا عنها للمنزل
كسروا الحيطة وركبوا باب كبير بدل باب الصفيح
وبدل الجير ضربوا البوماستك
واشتروا الاطباق والريسفيرات ورأوا عالما لم يروه من قبل
كان هذا قبل ان يكتشف الطفابيع ارض السودان

وأكتشف الطفابيع السودان
وحين بدأ الفقرابيع في بيع ما ادخروه رويدا رويدا
وأول ما اصاب البيع مراوح السقف

الجماعةبهتفوا
نأكل مما نزرع
وواحد بس بهتف
نأكل مما نلبس
سألوهو بعد التحقيق معه !
قال ليهم
امبارح لو ما بعت قميصي ما كان اتعشيت

ويبيعون تلك الكتب التي جاعوا ليقتنوها

رحم الله مصطفي سويس واسكنه فسيح جناته
قصة كنت شاهدا عليها
وهو تاجر اواني منزلية بسوق كوستي الكبير . جاهو واحد قال عندو تلاجة 12 قدم واقفة داير يبيعها .. ومصطفي تاجر شاطر . يتاجر في كل ماهو معروض بيعا وشراءا
المهم حسبت المواصفات اتفقو علي مليون ج .. الزول ساق كارو ومشي يجيب التلاجة
التلاجة لامن جابوها .. مطابقة للمواصفات المتفق عليها وبحالة جيدة .. مصطفي فتح التلاجة يشوفها من جوة .. صاقطة وريحة الخضار طالعة منها والطماطم المدفق باقيها قاعدة
سألوا ليه داير تبيعها .. واصر عليهو كشرط للشراء
الزول قال ليهو
انا موظف وبتي مخطوبة وضربو لي قالو جايين بكرة .. وماعندي قروش ولا زول بعرفو يديني
..فقلت للمرة ابيع التلاجة .وعرضتها وبعد بعتها مشيت فضيتها
فدفع لي مصطفي مليون كدين ورجع ليهو تلاجتو
وبل
لو المليون ما كفا تعال راجع

وتتغير الاولويات
شاي اللبن يبقا سادة .. وسكر خفيف .. وينعدم
تغادر اللحوم ومشتقاتها المنازل
اللبن ومشتقاته
يسكن العدس الديار . والسخينة
والفول يصير رفاهية
تتراجع لبسات العيد
قروش التحلية للطلاب
وتظهر ثقافات مبتدعة للحشوات .. حشوة رغيف وموزة
حشوة ملاح خدرة
حشوة ام رقيقة
وبل تنعدم حتي تلك الحشوات
ولا تتوقف الاسر عن البيع لتأكل
والعلاج !!
الشافي الله
وما شق حنكا ضيعو
والفقرا اتقاسمو عداد الكهربا وعداد الموية وبير المرحاض
ولحقهم الطفابيع
لو وصلت لي جارك كهربا غرامة تصل للملايين ! مع انك دافع حق الكهربا
ما توصل ليهو
ماعندو !
بي طريقتو !!!

يا عبدالحفيظ بكري الجاك عندو بوست قديم عن ثقافة الفقر خليني امشي اكوسو وأجيك

ياريت يا مننصر والله
والشكر مقدم

عربجي صاحب كارو حمار بني بيتا من الطوب الاحمر دون ان يشتري طوبا
بلقط الطوب في اثناء عمله .. ما يلقي ليهو طوبة واقعة والا يطفر من كارتو ويشيلها . والناس عرفتو وبقوا لو لقو طوب واقع يوصفو ليهو محلو .. والزول البكسر وعندو طوب ما دايرو .. والببني وفضل ليهو طوب
تم بيتو في كم سنة .. عندو قطعة في احد الاحياء الشعبية الجديدة
بني منزله بشق الانفس
ثم اضطر فباعه رغم افتخاره به
نأكل مما نبني

البيوت البنوها للوساع .. ضيقوها للايجار
تقسم بيتك تأجر نص وتضايق انت وعيالك في نص

كلامك سمح بالحيل لذول قاري الحاصل صاح شكرا اخي عبد الحفيظ

مرحب ابوقصيصة
وكتر خيرك
قال حميد
وما بتحير بين الناس الفوقانية والتحتانية
الا مغير
ولا عقوق
ولا كفيف الانسانية
فالحال ما داير مقال
وهو جليا لكل ذي بصر كفيف حتي !
سعيد بوجودك هنا

حقك بحصل حدك
انزنقت في قرشين .. تبيع بس
مروحة السقف لعلاج الملاريا .. الدواء بي 72 دواء الملاريا . فحص الفحيص بي 10 ج ..
امشي اي دلالة وشوف الحاجات المعروضة ..
الناس بتبيع القديم شان تجدد .. ونحن بنبيع شان نعالج مشاكل يومية ما واقفة .. تبيع كدة لامن تدقر معاك .. تدقر معاك ما تلقي شي تبعو زاتو
امشي الدلالة واتفرج
اتفرج في الوضع البائس .. مراوح .. خلاطات .. مكاوي .. بوتجازات .. تلاجات .. مكيفات
تدقر معاك ومخك يقفل احتمال وارد تطفر جوة البحر
والحكومة ولا خساها .. مشغولة بالهجرة إلي الله
وتحية للصديق الشاعر الصادق الرضي
الله في نار الدموع
ف
الله يسكن الاماكن كلها

وبل يصل الامر لبيغ المنازل
في ظل تدهور البيئة وسؤ التغذية وانشغال السلطة بغيرهما .انتشرت الامراض التي لم تكن في اسلافنا بهذه الكثرة
السرطان والفشل الكلوي
عملية تغيير الكلي تكلف 300 مليون وهذا تقدير حقيقي . فلي ابن عم يحتاجها وسألنا
اها جنس دة غير يبيعو ليهو البيت يسو شنو

ل
حين
ميسرة

يا عبدالحفيظ
مساء الورد
صك الكلمة أعجبني والحكاوي أيضاً... جاييك.

استاذ بشري !!
ألجم وجودك حرفي
ل
حين ميسرة

عندو بيت كبير .. اشتراه قطعة وبناهو بي مزاجو .. وعشان البيت يكون شرعي بني صالون للضيوف منفصل تماما عن المنزل وله نفاجا .. وضربو بوماستك يسر الناظرين .. وعلا حيطو وحوشو خوف المطر .. وتنفس الصعدا فرحا بما اقترفت يداه !
كان موظفا بالنقل النهر .. يسافر وياخد ماهية نحو الجنوب ويلقط معاهو بضاعة تزيد تنوع طعامه وتيسر معيشته ولبسه
وجاءوا كما النعاس .. يغازلون اشواقه نحو عهد يسمع به من الجوامع
فرح واستبشر خيرا بالطفابيع ولم يكن يعرف
اول شي فصل للصالح العام .. واعطي اموالا لم تقم اوده سوي شهور
وفكر وفكر معه اهله وجيرانه واصحابه
البيت واسع .. ومفصول .. بيع نص واشتري بوكس واقلب بيهو تجاري .. ترحيل
واشتري البوكس وقلب بيهو تجاري
وانصلح الحال قليلا
وتغلغل الطفابيع في مفاصل الخدمة ! ولا رادع لهم حين يجدون فرصة مال سائب او في حرز
لموا فيهو ناس المرور .. شغال توريد ليهم
وتغلغل الطفابيع حتي بين الناس .. فكانت النصائح شركا .. ينضم معاك وينصحك وهو يتلمظ طمعا
بدل البوكس اشتري ليك بص .. البص بشيل 45 راكب مع الواقفين بعمل 80 .. في ألف ونص الفردة بتعمل 120 ألف . انت والعربية اكلوا نصها .. والنص وفروا
وانا عارف زول عندو بص سمح وبقبل عربيتك وووو
امممممممك
تمت الصفقة
وزولنا هسة سايق ركشة وما حقتو
القصة حقيقية

Quote: ونبيع ! ولكننا لا نبيع إلا ما نملك ! ولا نبيع إلا ما نحتاجه ! نبيعه قهرا وحوجة وغصبا ونبيع ونحن نعلم اننا سنندم ببيعه ولكن لا مناص !

والله يا عبد الحفيظ جنس بيع يهرد المصارين
واحد معاشي في عيد الضحية الفات لحدت يوم التاسوعة بعد العصر مصاقر السلفية الوعدوها بيهم ،، ولمن حسى انو الجماعة حا يمقلبوه ،، جانا في السوق وقال لينا يا جماعة انا شكلي كدة ما بقدر اجيب الضحية لأنو لي هسي ما صرفو لينا والزمن كبس اها يا اولادي انا عاوز اتصرف ،، قلنا ليه تتصرف عشان تعمل شنو ، قال عشان اجيب الضحية ،،
رد عليه واحد بعرفو من الجماعة وقال ليه يا حاج انت قايل الضحية دي فرض يا اخي انساها عادي ، رد عمك وقال والله انا عارفا ما فرض بس نعمل شنو مع خرفان الجيران الحمت الاولاد النوم دي ومع البوبار ،، عموما عرض على واحد من التجار مكيف ولكن التاجر طلع زي مصطفى سويس بتاع كوستي اداه مليون ونص وقال ليه بعد تصرف تعال جيبا وبالتقسيط كل شهر جيب خمسية ،، على الطلاق يا حفيظ عمك بكى لمن ابكانا ،،
يا اخي جنس وجع ووجايع تهرد الكباد

----------------------
يا اخي انت قلم الوجع الله يخليك يا صديقي

ل
حين
ميسرة

حباب ود دفع الله
تشرف يا صاحب وتشكر
كنا جميعا احياء شعبية .. نأكل طعاما واحدا ونلبس زيا متشابها
كل البيوت متشابهة بشكل عام
فطور جارك لا يختلف عن فطورك ولا غداءه
ظروف الناس متشابهة .. ليسو اغنياء ولكنهم مستورين
جاء الطفابيع
فشردوا الناس من اعمالهم وضايقوا غيرهم بالجبايات
وتآمروا علي كل صاحب عمل مربح .. فشردوه وجلسوا مكانه
توزعوا خيرات الوطن كضيعة ودار ابوك كان خربت شيل ليك منها شلية
وتباين الناس وهم طعاما وملبسا وسكنا
يشبعون ويبيت الناس الطوي
يبنون العمارات ذات حمامات السباحة الملونة ولا يكاد الناس يجدون ما يشربون
وكما قال سيدنا علي رضي الله عنه
ما اغتني غني الا بفقر فقير

اوضة الضيوف الفي ركن البيت . يقفلوها من جوة .. ويفتحوها علي الشارع . ويركبو ليها باب حديد كبير ضلفتين . وبالبوهية الما خمج
بقالة ابورونق
لجميع المواد الاستهلاكية .. لحوم .. اسماك .. بيض .. خضروات .. توجد بها مفرمة
ثم يؤول بها الحال ان تصبح غسالا يفتح يوم ويقغل يومين
ولا محل رصيد .. تربيزة فقيرة وكرسي
الناس غلبها البتسويهو

الأخ عبد الحفيظ
تحايا نواضر لشخصك الحاضر
عندما وقعت عيني على عنوانك البديع تبادر إلى ذهني المرابيع وكوستي
عندنا واحد لما يلقى زول وصاف متلك كدي
يقول ليك: والله فلان دا لو وصف ليك الموت ... تشتهيه
أها إنت بوصفك للفقر دا شهيتنا ليه !!!

Quote: ويبيعون تلك الكتب التي جاعوا ليقتنوها

دا والله الفقر الما حبابه ... فقر ينتقل من جيبك لعقلك

اقسى حالات الفقر في بلدنا فقر المرأة الوحيدة، تلك التي لم تتزوج وليس لها من يعينها حين يكون أهلها الكبار ماتوا وهي توغلت في عمر بائس فإن كانت مثل
هذاه المرأة عفيفة فلا تقبل الصدقات فلكم أن تتخيلوا عسر حالها سيما إن كانت تعيش في قرية. بيتها غرفة واحدة قديمة من الطين أو القصب ولم تأكل لحماً إلا في الأعياد من مناولات الجيران.
وموعودة بالمجاعات تترى
وراء ضجيج الخطب
خطب الساسة والحكام المرتفين
وموعودة بالنوى والتعب..
مثل هذه المراة حين تجيء الحكومة الديمقراطية وهي مقبلة لا محالة فلتطالبوا جميعاً بأن يكون له راتب شهري ومأوى تبنيه لها الدولة حين يتم إلغاء ما يسمى
ديوان الزكاة وإقامة وزارة الرعاية الاجتماعية بشكل عصري تستند إلى العلم والمعلومات بحيث يحصي جميع النساء أولاً ممن هن تحت تحت تحت مستوى
الفقر؛ ثم يتم الصعود إلى من هم تحت تحت مستوى الفقر؛ ثم إلى من هم تحت مستوى الفقر؛ ثم إلى الفقراء أخيراً حيث نتنفس الصعداء.
وهؤلاء جميعاً تكون وراتبهم من أموال الطفابيع وعقاراتهم التي اكتنزوها طوال ربع قرن وتزيد.وهي اموال تكفي للفقراء ومن هم تحت مستواهم كما تكفي لبناء
المدارس والمستشفيات وتعمير القرى والمدن.

مرحبا جعفر
كتر خيرك والله لطيب قولك
الواقع أمر مما هو مكتوب .. وحال الناس يزداد سوءا كل يوم
يوميا تنسحب اسرا مستورة نحو هاوية الفقر والعوز بفعل السياسات الرعناء للسلطة
لا يمر يوم وإلا يزداد الوضع سوءا .. ويصبح الحصول علي الضروريات في حكم الاستحالة ..
قد لا تتوقع ان بعض الحوجات البدائية البسيطة تصعب علي الفقراء .. ان سرق منك شئ واردت التبليغ عنه ستدفع مالا . وتشتري ورق الفلسكاب وقلم الحبر ليكتبوا لك به بلاغا .
بل حتي ان طالبت احدهم مالا عليك دفع نسبة من قيمة المبلغ مقدما كعريضة
فحتي المطالبة علي حقك يحتاج لمال
صعبت وتزداد صعوبة والسلطة مافيشة ! قالوا هاجرت لي الله
بعد ان كانت لله هاجروا ليهو عديل .. فكأن الله سبحانه وتعالي بعيد وهو خير القائلين
اني قريب اجيب دعوة الداعي اذا دعاني

مرحبا الاستاذ بشري
يا جعفر لو انا وصاف امشي اقرأ ل بشري قصة
الغازات
شوف كمية الابداع الوصفي الذكي الفيها
تعرف يا بشري مرة قاعد في السوق اتت امرأة مسنة لا تكاد تسير إلا بصعوبة .. تدفع امامها مربعا من الحديد تتوكأ عليه ويساعدها في نقل خطوها .. حدثني جاري انها تعيش وحيدة هي وزوجها الذي جلس .. ولهما ابناء مهاجرين خارج الوطن يبعثون لهم بما يقيم اودهم
ضايق الطفبايع الشباب فتركوا اهلهم في عز حوجتهم لهم

ود ابسن سلام
تعرف يا عبدالحفيظ عندنا واحدا قريبا لينا د مشى ليبيا بدرى قبال العيال يعرفوها
وذى ما قال عمى الجرارى ( يا ليبيا الكشفو دورك جابوكي سفنجه تكورك )
اها زولنا دا جا بشاحنتين كيى واي والتانيه زد واي بالله لمن يدقش الخيران تسمع القعونج ( كي واي زد واي كي واي زد واي ) بدل سفنجه والكاش بالدورال ربط ربط وبنى البيت عقد وتعال شوف الفنجره
وفنجره المشتاق وحنين اها استلموا جماعه من مدرسه ناس مجلس كوستي الانتا خابرهم ديلك حمالتك على زولك ما تم الحول
يالله يالله حلحلوا من البيت
والله كان فى الآخر صفيت على رقشه و بالتقسيط شفت المحن يا ود ابسن

طفابيع أستاذنا بشرى الفاضل
هذه الكائنات الاسفنجية التي تمتص وتبيع كلما طفا في حياتنا سائل بل أصبحت تتوغل في الشقوق

وفقرابيع أخونا ود أبو سن هؤلاء الغلابا الذين يبيعون كل شئ حولهم ليكسبوا يوما جديدا في الحياة

بين هذين القوسين المدمرين يتلاشى الوطن

مرحبا موسي الراجل
كيفك يا صاحب والعيال
اها الطفابيع دخلو لينا الكسر .. وعملوا ليهو سوق
سوق المواسير
لو داير قصص بشبعك
حكي لي قال عندو بيت ودكان . قبل سنوات .. اقنعو اشتري بص بي مليون بي شيك بي سنة . وجا مواعيد الشيك .. وكتب غيرو بي شهر بمبلغ زيادة وكرت السبحة
قال لي
دخلت السجن وهسة لا عندي بيت ولا دكان ولا قروش

مرحبا درديري
وحبابك
قالوا في المثل
البسوم امو بلقا البتمنا
اها تلك الكائنات الخارجة من جلباب العصر السحيق لانحطاط الانسانية ادخلت من فقه البيوع وممارساته مالم يكن في اسلافنا
سمعنا بالزوج الذي خدع مغتربا وزوج له زووجته تساعده امها !!
حكاية يهرب عقلك لتكذيبها .. ولكن ذل الحاجة والفقر والعوز وقلة الحيلة .. باع مع زوجته الغيرة والرجولة والشهامة
ولكم ضحكت حين سمعت مسؤولا يقول ان لا تراجع عن طرد المسؤول الاممي لأننا نتعامل برجولة
زج بالرجولة عنوة وادخل وأكتشف وله السبق الدبلوماسي
دبلوماسية الرجولة !!

يا صاحبي
بين الطفابيع الذين يبيعون كل ما طفى حتى ضمائرهم الطافية وعقولهم المسطحة
وبين الفقراء الذين يبيعون أمهاتهم وزوجاتهم وأطفالهم ليعيشوا الباقين
الكل خاسر ولا يربح البيع أحدا
لكن أول مرة يكيفني حرامي ذاك الذي باع أستاد التحرير أو رهنه للبنك
زمان المصريين أهل القاهرة المحتالين منهم كانوا يضحكوا على االفلاحين ويبيعوا لهم الاملاك العامة وحتى أصبحت ضرب مثل ( فلان باعوا له الترماي أو أبو الهول أو الاهرامات ) . لكنها أظنها كانت نكات فقط كنايات تدل على الغشاوة والغفلة .
لكن أن يبيع أحد ملعب لكرة قدم أكبر منه عمرا ولمن لبنك ؟؟؟؟؟؟؟؟؟ .. هذه رغم سماجتها لكنها نكتة الموسم .

حباب درديري
ولعلك تذكر بيع شارع في كوستي وكتبت بوستا هنا عنه .. وتحرك غيري من اهل كوستي .. حتي اوقفنا بناء المنزل
ولعلك قرأت هنا ايضا عن بيع سوق حي الرديف وازهري ووقفة اهالي الرديف ضد بيعه ونجاحهم في ذلك
وهم
لايتوقفون عن البيع فالنهم من صفاتهم
يوقف الناس البيع إلي حين .. ولكنهم متعطشين ويسيل لعابهم لمرأي الفرص التي يخلقونها برؤية الاماكن العامة المسجلة بأسم الدولة
ف
هم الدولة

وفي كل عام يرزل الطفابيع الفقرابيع
يستحدثون من الجبايات ما يمص قليل صبر عند الناس

عمك صحى فجأة لقى نفسه مربط ومغطى والقطن في أضنينه وصوت الحفر في الخارج .. حاول ينفك ما قدر بقى ينادي من تحت الغطاء ( عمر .. خضر ... عبد الرحمن ,,, يا جماعة الجمبي منو )
واحد سمعه جا قريب منه .. هو سمع صوت الخطوات .قال خضر ؟؟3
أيا أنا ياني خضر في شنو .
- يازول أنتو مربطني ومكتفني مودني وين ؟ الشي أنا حي .
- يا زول ها أسكت ساي كمان عاوز تسوينا في فضايح ويقولوا ما بيعرفوا الموت ..أنطم بس أرجى الراجيك ..
هههههههههههههههههههههههههه

*********************************

توهان معايير القيم عند الفقرابيع

ماذا يقابله عند الطفابيع

لو اردت يا درديري ان تعرف فأنظر سلوك السادة المسؤولين فهي تغنيك عن الفانتازيا
معتمد وين كدة ما عارف رفض الاغاثة القطرية لانهم رفضوا يسلموها ليهو يوزعها بي معرفتو .. قالوا ليهو طيب ورينا معرفتك ونحن بنوزعها .. رفض
يا فيها ... يا اطفيها

أهدي لك قصة واقعية لواحد ( فقربوع) أن جاز الاصطلاح ننعش بها هذا البوست الدسم

عم عمر

رجل يحب السياسة ويخافها . يخوض فيها بشوق وحذر . لا يفصح عن رأيه الا بعد أن يطمئن لمحدثيه ..أذا تحصل على معلومة جديدة لايتسطع كتمها كأنها تضايقه كالعطسة يكون حريصا ومتسرعا لنشرها على من يثق بهم .
في أولى حياتنا العملية بالمنطقة الصناعية كسلا .. تعودنا أن نتجمع شلة من أبناء كسلا بجامعة الجزيرة تحت ظل النيمة أمام مطبعة كباشي في فسحة ألافطار . نتناول الشاي والقهوة .. ونحكي عن ذكريات حياتنا الطالبية والتي لازالت صورها تجري في دمائنا طازجة بذات ألقها .. بما أن حوار الطلاب والخريجين عادة فيه كثير من السياسة .. جذب حديثنا عم عمر .. قد كان رجل ربما في الستين من عمره يرتدي بنطلون بصورة أدق نصف بنطال ( ردا ) وفنلة نصف كم ( تي شيرت ) . أحد عينية تالفة تحل محلها أعتقد عين زجاجية ..
في الاول أقترب منا مستمعا للحوار ثم مستمتعا .. ثم مشاركا .. ومدخله للحوار دائما يكون بمغالطة مثال (أمريكة شنو بتحاربوها أنتو . كنت مره في بيت مناسبة في واحد عقيد حكى لينا .قال لامن زار بوش نائب الرئيس الامريكي السودان في سنة خمسة وتمانين . بوش سأل واحد من معاونية عن شئ .ياخ قاليك الراجل دق جهاز في يده جاب البيت الابيض صوت وصورة واشنطون وين وود شريفي وين .. تقول لي نحارب أمريكا نحن وين وأمريكا وين ) ..
مرة وفي أحد حواراتنا الساخنة وكان عم عمر مستلما الجلسة والحديث . ونحن حتى يسخن هو كنا ندافع له عن الحكومة كمؤيدين للنظام .. وهو كان يأخذ راحته على الآخر معارضا وشاتما الحكومة.. فجأة تقف أمامنا سيارة لاندكروزر من النوع التي يستخدمها جهاز الأمن . نحن كنا معتادين عليها لانها كانت سيارة الصديق الصادق سلطان .. كان يعمل بأحدى المنظمات الأجنبية بمنطقة خشم القربة وكان عادة يزورنا في الصناعية كل خميس أو مرتين في الشهر ليكمل اللمة الجميلة .. نزل الصادق من السيارة مع سائقه الخاص .. سلم علينا ..أما عم عمر فقد سكت عن الكلام المباح وغير المباح تماما . وكان ينظر للصادق بريبة ووجل .أنا همست للصادق قلت له .. (خلي بالك عم عمر خاف منك )
الصادق فهم الدور وبدأ يلح على عم عمر ليواصل حديثه ( كنت قعد تقول في شنو أتكلم كمل كلامك ؟) عم عمر في الاول نظر الينا مستنجدا بنظراته فقط وبدأ ينسحب بظهره بخطوات بطيئة ثم أسرع .. ثم مهرولا ناحية الورشة التي يعمل بها ..
نحن بعدها ضحكنا . والصادق أصر يكمل التثميلية .. قال لي أرح نزوره في ورشته .. وفعلا وصلنا كان هو جالس في كرسي أمام الورشة قربه عامل يلحم في الحديد .. بعد ما شاهدنا قادمين نحوه دخل الى الورشة مذعورا .. وقف الصادق بدأ يسأل عن أشياء لا غرض له فيها وكل مرة يرفع رأسه ينظر ناحية عم عمر ..
قلت للصادق حرام ياخ الراجل دا راح يموت بالخوف .. عدنا أدراجنا .. لكن بعدها أنقطع عم عمر عن زياراتنا تماما ..
ظل عم عم منقطعا عن زياراتنا وحرمنا الصادق سلطان بشقاوته من طلاته وحواره اللذيذ .
لكن بعد فترة سمعنا أنه تم العثور عليه في موجة برد ضربت المدينة ميتا في أحد البيوت المهجورة .. الله يرحمه .
هو نموذج من النماذج لناس في الحياة التي يطلون عليها بصمت ويغيبوا بهدوء دون أن يتركوا أي أثرا أو يلعبوا دورا في حياة أحد .. فارق عم عمر الدنيا دون وداع كما تقول حياته الكئيبة أيضا أنه دخلها دون أستقبال أو فرح من أحد ..
لا أدري هل أحد من ألاصدقاء يذكر عم عمر السياسي بلا سياسة والثوري بلا ثورة ... لا نملك الا أن تنمنى من الله أن يتغمده برحمته بقدر ما حرمته الدنيا والمجتمع من رحمتهما . ونقول له يا عم عمر نحن عاصرنا الزمن الذي تدق فيه جهاز واتساب أو أسكايب وتجيب والدتك تعوس في الكسرة في ظل راكوبة في بيتكم في كسلا ونحن في الرياض .. الرياض وين والراكوبة وين يا عم عمر ؟.

آسف جدا
المداخلة جات ارقام وغلبني اعدلها .. وللاسف بكتب مباشر للمنبر
ف
عذرا واسف حقيقي للصديق درديري ولكل متابع

تعرف درديري السياسة بقت غصب الناس تتكلم فيها
تمشي من ارحم الراحمين تقيف في صف الغاز ..العربية مليانة تخش جوة المحلية . ويمرقن منها 30 اسطوانة والاولوية لرجال الكاكي ..! ليه ؟ ماتعرف
ومن صف الغاز يبدا الكلام في السياسة
والتنظير
والما بعرف سياسة بعرف وبكرة هو زاتو ببقا منظر
وقس
في اي مكان توجد العكننة التخليك تفكر في انو في سلطة ومتميزة عليك
اقول ليك
اسطوانة الغاز الفاضية بي 500 ج والناس بقت تدق ليها دستور في حيطة المطبخ وتعمل ليها جنزير .. بقت هدف للحرامية واكيد بكون فيها غاز

فكك الطفبايع الاسرة الفقرابيعية !!
الاب شغال اكتر من مهنة ليل صباح ... وبخش البيت مهدود .. قلت ملاحظاته علي سلوك الابناء او متابعته لتحصيلهم المدرسي
الام شغالة دندرمة ومؤجرة ليها شافع باليومية .. نفس الشافع الضحية المفروض يكون بقرا
وبتسوي الزبادي والبسكويت والكعك وتوزع للدكاكين . وتقوم بتلبية طلبات الزباين في البيت .. فهي مشغولة ما بين شراء ادوات الانتاج ولا توزيع الانتاج ولا خلصان قروش الانتاج ومحاسبة الدكاكين .. ولا واقفة جمب الفرن
غاب الاب والام .. فغابت الرقابة الاسرية