Post: #1
Title: من وحي بوست "أحسن كتّاب وكاتبات عام 2014"
Author: معاوية الزبير
Date: 12-16-2014, 06:02 PM
Parent: #0
أولا أُثْني وأُثَني على الأسماء التي وردت في البوست وأعتقد أن الاختيارات حالفها الصواب
وإن كان هناك العديد من الأسماء التي كَتَبَت -وأجادت- في العام المعني ولم يرد ذكرها (حتى الآن على الأقل)
ثانيا موضوعي ليس فقط الثناء والتثنية ولا غياب أسماء إنما ما لاحظته من مفارقة تتجلى
في كون أن هذا العام المحتضَر كان من أكثر الأعوام التي تكثفت فيها الشكوى
من التدني في موضوعات البوستات وحفولها بالكتابات التي تنضح بالعنصرية والبذاءة والمكاواة واللاموضوع
فكيف يستقيم ذلك مع هذا العدد الضخم من الكتّاب والكاتبات المميز/ين/ات في العام نفسه
أين الخطأ؟
لماذا يغلب الزبد حتى يضج الناس بالتأفف منه
وما ينفع الناس ينحسر ونفضل نتحسر على الماضي؟
أين العيب وأين الخطأ؟ هل كلنا شركاء في غلبة الزبد
أم أن الشكوى باطلة والأمور تمام التمام؟
تاليا قائمة بالأسماء الواردة حتى الآن
|
Post: #2
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 06:06 PM
Parent: #1
الترتيب كما ورد في المداخلات
مع حفظ الألقاب:
محمد إبراهيم علي
محمد سليمان
نور تاور
نعمات عماد
محمد أبو جوده
مني عمسيب
محمد حسن
الفاتح ميرغني
عبد الحفيظ أبوسن
أميرة السيد
حسين نوباتيا
حاتم إبراهيم
عماد أحمد
يوسف أبوصالح
راشد سيد أحمد الشيخ
سيف اليزل سعد عمر
أحمد طراوه
أحمد الطيب بدرالدين
مصطفي مدثر
يحي قباني
الصادق إسماعيل
سمير كوكو
أحمد أبكر
عيسي مصطفي عثمان
محمد البشرى الخضر
محمد المرتضى حامد
أسامة العوض
الكيك
منصور المفتاح
عمر علي حسن
عبد الرحمن إبراهيم
عبد المنعم خليفة
نور الدين منان
إسماعيل جعفر
محمد فضل الله المكي
أسماء عبد الحليم
سعاد تاج السر
الطيب شيقوق
ود المنسي
وضاحة
هارون دياب
محمد حيدر المشرف
عبد الله عثمان
عبد العزيز عثمان
حرسم
صلاح جادات
كبر
عواطف إدريس
نوباتيا
أحمد عالم
قريب المصري
محمد عثمان الحاج
هشام هباني
مواهب إدريس
سمير كوكو
عادل عبد العاطي
صلاح ال بندر
بشرى الفاضل
تبارك شيخ الدين
نور تاور
بكري أبوبكر
أبوجهينة
أحمد الامين أحمد
فريدة محجوب
إسمارت أنا
ود أبو
بله محمد الفاضل
أبو ذر بابكر
ملهم كردفان
درديري كباشي
عاطف عمر
إبراهيم النعيمة
سيف النصر
محجوب علي
كمال عباس
فضيلي جماع
عبد الله الشقليني
زهير عثمان حمد
أحمد القرشي
عثمان محمد صالح
عبيد ود المقدم
|
Post: #3
Title: Re: من وحي بوست andquot;أحسن كتّاب وكاتبات عام 2014andquot;
Author: مني عمسيب
Date: 12-16-2014, 06:18 PM
Parent: #2
صديقي العزيز \ ود الزبير ..
تحياتي الخاصة ..
يا ود الزبير بالمناسبة الناس ما تحاول تدخل في الخيارات عشان ما تتناسي
حتت النسبية ولو لا اختلاف الاراء والمزاج لابارات اشياء كتيرة ومن ضمنها الكتابة
والكتاب . وعشان ااكد ليك الكلام دا اقسم ليك انا في بعض الاخوة الذكر
اساميهم ما اكتشفتهم الا لما ذكروا اها قول دي رقم واحد عشان كدا حتت
الخيارات دي شوية صعبة . وسلمت يا يا صديقي ..
ولي قدام ..
|
Post: #4
Title: Re: من وحي بوست andquot;أحسن كتّاب وكاتبات عام 2014andquot;
Author: عبدالحفيظ ابوسن
Date: 12-16-2014, 06:19 PM
Parent: #2
تحياتي يا معاوية
خارج اطار البوست مشتاقين ياخ وتحية للعيال
ومعك ومتابعين ونسأل
|
Post: #5
Title: Re: من وحي بوست andquot;أحسن كتّاب وكاتبات عام 2014andquot;
Author: عبدالحفيظ ابوسن
Date: 12-16-2014, 06:21 PM
Parent: #2
تحياتي يا معاوية
خارج اطار البوست مشتاقين ياخ وتحية للعيال
ومعك ومتابعين ونسأل
|
Post: #6
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 06:42 PM
Parent: #5
| Quote: ولو لا اختلاف الاراء والمزاج لابارات اشياء كتيرة ومن ضمنها الكتابة والكتاب |
معقول يا منى في ناس مزاجها ما كافورا
تسلمي ياخ
|
Post: #7
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 06:51 PM
Parent: #6
أقصد من ذا الذي يستمزج مثل هذه المواضيع إلا إذا كان غير سوي
فإن كان كذلك فلماذا نقابله بكل هذا الكرم في المتابعة
|
Post: #8
Title: Re: من وحي بوست andquot;أحسن كتّاب وكاتبات عام 2014andquot;
Author: مني عمسيب
Date: 12-16-2014, 07:01 PM
Parent: #7
يا معاوية كدي افتح ليك موضوع شكلة بيني وبينك عشان تتأكد من كلامي .
يا معاوية يا صديق خلي الكدح مغطي لو سمحت هههههههه .
بهمس :
ماشة ابلع حبوب القرحة .
|
Post: #9
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 07:04 PM
Parent: #7
تسلم يا ابو سن، نحمد الله نقع ونقعد ونقوم فنقع و...هكذا
دايما ياخ "هذا الرقم مغلق حاليا ويمكنك ترك رسالة...
رسالة شنو مع اسطوانة مجوفة، نحن البشر زاتهم في تَل تَلا
خلي الكلام مع الآنسرمشينات
سألاحقك
|
Post: #10
Title: Re: من وحي بوست andquot;أحسن كتّاب وكاتبات عام 2014andquot;
Author: محمد البشرى الخضر
Date: 12-16-2014, 08:24 PM
Parent: #9
| Quote: الشكوى باطلة والأمور تمام التمام؟ |
بس ياها زاتها :)
|
Post: #11
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 08:50 PM
Parent: #10
| Quote: ماشة ابلع حبوب القرحة |
يا بت عمسيب، البوستات أم قرحة دي أنا بعرفها من عنوانها وما بقرب منها ولو كان كاتبها شيخ زبير
بالكتير بقرا مداخلتين تلاته في أم نزله، أو وجع بطن عابر سبيل، وعادة الأخير دا بِعْبُر للسبيل براهو
|
Post: #12
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-16-2014, 10:46 PM
Parent: #11
Quote:
Quote: الشكوى باطلة والأمور تمام التمام؟
بس ياها زاتها :) |
لا يا بشرى ما ياها زاتها
في ناس يملكون قدرا مقدرا من المعرفة والعلم ولكنهم يستكينون للواقع أو بالأحرى لا يأبهون
وكأن تواجدهم في هذا المكان لا يحملهم مسؤولية إصلاحه
كأن الفاسدين هؤلاء ليسوا موجودين على الأرض في السودان أو لن يعودوا إليه لينقلوا أفكارهم البائسة
الكلمة مسؤولية، وأكثر ما تكون عظيمة على المتعلم والفاهم والواعي
والساكت عن الحق شيطان ومن تعلّمَ عِلما شنو كدا ما عارف
يللا قم بدورك يا متعلم
|
Post: #13
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-17-2014, 03:59 AM
Parent: #12
هسي شوف زي تبارك دا !
عِلم ومعرفة، وفوق ذلك نجمٌ يتهافت الناس على بوستاته
(زي الفنان السكوهو البنات قدام اتحاد الفنانين)
ورغم ذلك مضيّع كل هذه الإمكانيات ومتفرغ لملاحقة السلفيين
قال يقطعوا ليهو شنو قال!!
ياخ نحن نتمنى نصنع مجتمع ما تكون فيهو سرقة زاتو
عشان ما تتقطع أي حاجة
|
Post: #14
Title: Re: من وحي بوست andquot;أحسن كتّاب وكاتبات عام 2014andquot;
Author: عوض جاه الرسول
Date: 12-17-2014, 05:05 AM
Parent: #13
أستاذنا يومكـ سعيد
جيت أسلم بس
|
Post: #15
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-17-2014, 05:10 AM
Parent: #14
يا هلا يا عوض ومشتاقين إنتو متين تجونا
يوم 2 يناير حفل تخريج أمل راشد عوض
وبإذن الله ناويين الحضور
هذا مع أعجابي بجدية كتاباتك والله
|
Post: #16
Title: Re: من وحي بوست andquot;أحسن كتّاب وكاتبات عام 2014andquot;
Author: عوض جاه الرسول
Date: 12-17-2014, 05:35 AM
Parent: #15
Quote: يا هلا يا عوض ومشتاقين إنتو متين تجونا
يوم 2 يناير حفل تخريج أمل راشد عوض
وبإذن الله ناويين الحضور
هذا مع أعجابي بجدية كتاباتك والله |
يديكـ العافية ياخي..
كنت ناوي حضور التخرج لكن لظروف مرض الوالد مشيت السودان
وجيت قبل اسبوع تقريباً ، لكن برضو بنكابس ونحضر
مودتي يا اصيل وبنجيييكـ ...
|
Post: #17
Title: Re: من وحي بوست andquot;أحسن كتّاب وكاتبات عام 2014andquot;
Author: nour tawir
Date: 12-19-2014, 09:55 PM
Parent: #16
يا منى خّفى من بوستات البشير البتهّيج القرحة دى..
بدل ما الحكاية تتطور لى حاجات تانية لا سمح الله..
وأتى لّسه فى عمر الزهور..
وأقول ليكى سر..
أنا ما بعانى من الامراض البتجى نتيجة حرق الاعصاب دى خالص..
رغم حرق الاعصاب الحاصل لى من السودان ومغآيسه..
لسبب واحد بس..
وهو التخّلص من أى توتر وقلق أول بأول..
و الطريقة دى تلقيها فى النت..
|
Post: #18
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-20-2014, 11:06 AM
Parent: #17
Quote: التخّلص من أى توتر وقلق أول بأول..
و الطريقة دى تلقيها فى النت.. |
نورينا يا نور ينولك ثواب.
زي ما شايفه المجهودات المهدرة في جدل أسطواني مخروم من الطرفين
يأتي من الفراغ ويذهب إلى الفراغ..
خلينا من السياسة التي لن نتفق حولها أبداً..
لو تم استغلال هذه الجهود في مناقشة ظواهر
اجتماعية أو ثقافية أو رياضية أو أكاديمية
لقطعنا نصف الطريق نحو سودان معافى
مع كامل التقدير للمواضيع الهادفة التي تطرحينها
|
Post: #19
Title: Re: من وحي بوست andquot;أحسن كتّاب وكاتبات عام 2014andquot;
Author: محمد المرتضى حامد
Date: 12-20-2014, 12:31 PM
Parent: #18
Quote:
زي ما شايفه المجهودات المهدرة في جدل أسطواني مخروم من الطرفين
يأتي من الفراغ ويذهب إلى الفراغ..
خلينا من السياسة التي لن نتفق حولها أبداً..
لو تم استغلال هذه الجهود في مناقشة ظواهر
اجتماعية أو ثقافية أو رياضية أو أكاديمية
لقطعنا نصف الطريق نحو سودان معافى |
عزيزنا ود الزبير..
كان لنا زميل في المنبر يقول (مؤونة عام من الود).. فهاكها ومعها كم ميغاوات سعادة..
أتفق معك في ضرورة مناقشة النشاطات الحياتية اليومية المختلفة التي عرضت لها أعلاه
بانفتاح وقبول يثري معرفتنا وبالتالي حركتنا اليومية بشكل عام..
جئت هنا لأتعلم وأحاور وأتواصل وأشارك بالقليل المتواضع الذي معي if any ، وربما
أكون مخطئا في ظني أن السياسة متواجده بشكل أو بآخر في كل هذه النشاطات لأن إدارة
أي نشاط هو عمل سياسي إلا أن بعضهم يعتقد أن السياسة هي أن تبث علينا ليل نهار
ما تراه في عدد من الكتابات ، فأصيب الغالبية بالملل وزهدوا حتى القراءة.
أتمنى لو تفيض في شرح هذه الجزئية لكل تصبح المشاركة والقراءة هنا فعلا مفيدا ماتعا..
|
Post: #20
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-20-2014, 02:19 PM
Parent: #19
| Quote: جئت هنا لأتعلم وأحاور وأتواصل وأشارك بالقليل المتواضع الذي معي if any |
if any شنو يا مولانا، إنتو اللحم المجاور العضم، بل أنتم العضم itself
صحي والله منو الكان بقول "مؤونة عام من الود"؟ الكلام دا قريييب، لكن الوسواس الخناس ولّ شنو ما عارف
ياخ أنا قاعد في الحوش بقنِّن لي في حلة للبن داير ألِم الفحم، محل ختيت الماشّه وين ما عرفت
لحظات، أضاير الحَلة وأجيك
|
Post: #21
Title: Re: من وحي بوست andquot;أحسن كتّاب وكاتبات عام 2014andquot;
Author: nour tawir
Date: 12-20-2014, 02:43 PM
Parent: #20
عزيزنا معاوية الزبير..
خلينا من السياسة التي لن نتفق حولها أبداً..
...
ودا سبب الكترابة القايمة فى المنبر دا وبقية فضائيات الله أكبر..
السودانيين نفسهم بقى ضيق..
وجخرانين..
وكل واحد أو واحدة تدخل المنبر..
شايلة ليها عود وتخبط من طرف..
بلا تبّصر أو روية..
يعنى نظام فضفضة بدلا من الحوار الهادف..
عشان كدا أتعلمنا نتخلص من التوتر أول بأول..
قبال ما نلحق أمآت طه..
والخواجات كّتر خيرهم عّلمونا الطريقة دى..
وزى ما قال وآحد من فلاسفتهم..Anxiety is the mark of age
وهو عنوان هذا العصر..
و المرجعية لمعظم أمراض العصر..
عشان كدا خش النت..
وأعمل دكتور لى روحك..
وأكتب أعراضك..
ثم أطلب العلاج..
يجيك على طول..
وما تشوف شر أن شا الله..
نهارك سعيد..
|
Post: #22
Title: Re: من وحي بوست andquot;أحسن كتّاب وكاتبات عام 2014andquot;
Author: محمد المرتضى حامد
Date: 12-20-2014, 03:55 PM
Parent: #21
Quote: السودانيين نفسهم بقى ضيق..
وجخرانين..
وكل واحد أو واحدة تدخل المنبر..
شايلة ليها عود وتخبط من طرف..
بلا تبّصر أو روية..
يعنى نظام فضفضة بدلا من الحوار الهادف.. |
(جخرانين) ما عارف معناها لكن الأستاذه نور كلاما في محله..
في هذا المنبر يمكنك أن تتعرض أنت وأهلك ومعارفك لشتائم من أناس لم يعرفوك ولم يلتقوك ولم يسبق أن
أشرت إليهم أو إلى من يعرفهم ودون أي سبب وجيه أو غير وجيه وربما فقط لرأي لا يتفقوا فيه معك .. لسوء حظك ..
مساحة الحوار وهامش الصبر المتوفر هنا لا تكفيان حتى لرد السلام، والأكسجين المتاح لايكفي
لرئتي عضوين للتداول حتى في شأن تعادل برشلونه مع خيتافي..
الغريبه يا أستاذه نور كل هذه المصائب تأتي من عدد غير قليل ممن يدعون أنهم ينتسبون لناس (سياسة)...
غايتو ، نشيل الصبر يا نخُتا المنبر..
|
Post: #23
Title: Re: من وحي بوست andquot;أحسن كتّاب وكاتبات عام 2014andquot;
Author: nour tawir
Date: 12-20-2014, 07:21 PM
Parent: #22
الآخ الفاضل محمد المرتضى حامد..
جخرانين دى فى لغة أهلنا فى الغرب معناها عصبيين..
وما بيحتملوا اقل حاجة..
وصدرهم ضيق..
يعنى بى لغة الخواجات عندهم anger issues
...
أقتباس..
مساحة الحوار وهامش الصبر المتوفر هنا لا تكفيان حتى لرد السلام، والأكسجين المتاح لايكفي
لرئتي عضوين للتداول حتى في شأن تعادل برشلونه مع خيتافي..
الغريبه يا أستاذه نور كل هذه المصائب تأتي من عدد غير قليل ممن يدعون أنهم ينتسبون لناس (سياسة)...
غايتو ، نشيل الصبر يا نخُتا المنبر..
....
وهذا هو مربط الفرس..
المنافسة فى اظهار البذآءة بكل أنواعها..
يعنى أهلك يدّخلوهم فى الامر عنوة..
دون أى علم بشخصك أو أهلك..
وكل هذا ينصب فى خانة الاختلاف فى الرأى عندهم..
..
يا أخى دا ما أختلاف فى الرأى..
دا فاقد تربوى عام حصل للبلد فى زمن الانقاذ..
فما عارفه توجههه وين...
لغاية ما لقت الفضاء الواسع الفضفاض دا..
..
دى وأحدة من أزمات البلد الاستفحلت..
ولا ليها علاقة بى سياسة ولا يحزنون..
شوف مثلا بوستات التنابذ والاساءة..
راسا عدد القراء يصل الاف..
والمتداخلين تلقى العميان شايل المكّسح..
..
لكين افتح ليك بوست هادف..
وشوف البيجيك منو ؟
والبيقرا ليك منو؟
غايتو الدّخلتها الانقاذ فى البلد..
رقدت..
|
Post: #24
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-20-2014, 09:22 PM
Parent: #23
Quote: أتفق معك في ضرورة مناقشة النشاطات الحياتية اليومية المختلفة التي عرضت لها أعلاه
بانفتاح وقبول يثري معرفتنا وبالتالي حركتنا اليومية بشكل عام.. |
Quote: أتمنى لو تفيض في شرح هذه الجزئية
لكي تصبح المشاركة والقراءة هنا فعلا مفيدا ماتعا.. |
الفكرة ما جديدة يا مولانا ود المرتضى، وجدتها قبلي وأدليت بدلوي فيها
وتتلخص في إنو هذا المنبر يعج بالاختصاصيين في شتى ضروب المعرفة. منهم الموسيقيون والرياضيون وعلماء الاجتماع والبيئة
واللغويون وناس الشعر والغناء والهندسة بمختلف مجالاتها والطب والحقوق وناس الفاين آرتس والصيدلة... الخ الخ
لو فُتحت بوستات تناقش أسباب تدهور الرياضة (بمختلف أنشطتها) ووسائل معالجة أسباب التدهور
لو فُتحت بوستات تناقش الظواهر الاجتماعية السالبة، أسبابها وطرق معالجتها
وهكذا في مختلف التخصصات المذكورة أعلاه والمضمّنة في الخ الخ
أما كان ذلك أفيد للبلد بناسها وأرضها من هذا التشاحن البغيض في شؤون السياسة والدين؟
ماذا جنينا من مئات البوستات وعشرات آلاف المداخلات في شؤون السياسة والدين؟!
هل بدّل أحدٌ دينه؟ هل آمن ملحد؟ هل ألحد مؤمن؟ هل غيّر شخصٌ انتماءه السياسي؟ هل تحول معارض إلى موالي أو العكس؟
تفوت أجيال على المنبر وتجئ أجيال والحال ياهو نفس الحال
شتائم وبغض ومماحكات ومكاواة وعدم موضوع
وكل شئ في مكانه إن لم يكن تدهور وتراجع
وحال البلد من سئ إلى أسوأ
الخلاصة ماذا استفاد الوطن من عِلمنا ومعارفنا
بماذا أفِدنا البلد أرضاً وشعباً من استخدامنا وسائل الاتصال الحديثة النيو والسوشال ميديا؟
وهكذا وهكذا....
برجعلِك يا نور
|
Post: #25
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 03:59 AM
Parent: #24
Quote: لكين افتح ليك بوست هادف.. وشوف البيجيك منو ؟ والبيقرا ليك منو؟ /QUOTE] تقريبا دا سبب فتح هذا البوست أختي نور
إذا كان المنبر وفي خلال عام واحد فقط ضم أكثر من 80 كاتباً مفضلاً ومُستحسَناً ورغم لك يحدث ما يحدث
هل اختيارات الناس خاطئة أم مجامِلة ؟
هل الناس المختارون ديل سلبيين، غير مبالين !
لماذا هم مُفضَلون وبالتالي قادة رأي عام في منبر يشكو الناس من تدهوره وتراجعه وسلبيته
هنا كان سؤالي: أين الخطأ
لماذا يتجه الناس يا عزيزتي إلى بوستات البذاءة والشتائم والفضائح
وبعدين يجووا يقولوا ليك كاتبي المفضل فلان الفلاني،
ويطلع دا من أرق شعراء المنبر ولا يتداخل معه أكثر من اتنين تلاتة
بينما غير المذكورين في القائمة يدخل بوستاتهم الآلاف ؟!
بالجد أين الخطأ
شكرا وإلى عودة
|
Post: #26
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-21-2014, 04:49 AM
Parent: #25
Quote: هسي شوف زي تبارك دا !
عِلم ومعرفة، وفوق ذلك نجمٌ يتهافت الناس على بوستاته
(زي الفنان السكوهو البنات قدام اتحاد الفنانين)
ورغم ذلك مضيّع كل هذه الإمكانيات ومتفرغ لملاحقة السلفيين
قال يقطعوا ليهو شنو قال!!
ياخ نحن نتمنى نصنع مجتمع ما تكون فيهو سرقة زاتو
عشان ما تتقطع أي حاجة |
وما نيل المطالب بالتمنّي *** ولكن تؤخذ الدنيا غِلابا ...
كل فرد يرى أولويات مختلفة للجبهة التي يجب حسمها أولاً ..
ربما لم تصادف أولوياتي هواك ... ولكنني لن أنتظر داعش أخرى في وادي النيل ...
وكوني لا أتقمّص معايير عالم الوردي الخالي من السارقين ... لا يجعلني أعمى عن خطر الداعشيين ...
(خصوصًا نموذج "الداعشي المتقزّم الجهلول ذو الفكر السطحي المقبول إجتماعيًا" ... صاحبك!!!)
... المهم ....
|
Post: #27
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 05:24 AM
Parent: #26
Quote: كل فرد يرى أولويات مختلفة للجبهة التي يجب حسمها أولاً ..
ربما لم تصادف أولوياتي هواك ... ولكنني لن أنتظر داعش أخرى في وادي النيل ... |
أنا لا أختلف معك في حق اختيار الأولوية التي يجب التصدي لها
لكني أرى أن خطر "داعش" يكمن في البيئة الضحلة الهشة الرخوة التي يستهدفها
ومن هنا جاء ندائي بأن نقوي جبهتنا حتى لا يرتع فيها الداعشيون والمغامرون السياسيون
تقوية الجبهة (المجتمع السوداني) يتأتى بقيام المتعلمين والعارفين بأدوارهم، كل في مجاله
وهذا المنبر ميدان لوضع هذه المعارف والعلوم والوعي على أرض الواقع
لكننا لا نفعل ذلك، نحن هنا نبدو كمن يزجي الوقت ويفرغ جهده وطاقته في ما لا ينفع سوى التسلية (ولا بأس بالقليل منها طبعا)
ثم حتى طريقتك التي تستخدمها لنشر الوعي والتنوير بخطأ وخطر السلفيين، أراها أنا غير مجدية ولن أتجرأ بالأستذة عليك وأقول غير صحيحة
لكن انظر إلى الغالب في آلياتك (السخرية) وإلى تفاعل غالب المتداخلين من طرفك (الاستمتاع بسخريتك) ثم استجابة المعنيين بالاستهداف
ماذا ترى من نتائج مقابل برميل الحبر الذي دلقته في البوست الجاري مثلا
هل اهتدى ضال، هل تعلْمَنَ ديني، هل لانت ذرة من عقله أم أنه بالعكس ازداد تجمداً ؟
ما نمارسه نحن هنا أشبه بمباراة كل فريق يريد أن ينتصر مستخدما كل الوسائل القانونية وغير القانونية، الأخلاقية وغير الأخلاقية
الانتصار فقط هو ما يهمنا، بينما الطرف الآخر إما أنه لن يعترف بالهزيمة بالمماحكة أو لن يقبلها ويسكت عليها ويعود محاولا تعويضها
نحن ندور كثيران الساقية
|
Post: #28
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 05:37 AM
Parent: #27
| Quote: (خصوصًا نموذج "الداعشي المتقزّم الجهلول ذو الفكر السطحي المقبول إجتماعيًا" ... صاحبك!!!) |
أما صاحبي فأنت تظلمه لسبب لا أعرفه
صاحبي رجل مستنير يعرف دوره في مساعدة المجتمع والارتقاء به ويعمل بما وسعت يداه لتحقيق هذا الهدف
ولو قام كل عضو في هذا المنبر بما يقوم به عبد الحفيظ في مدينته لما وصل الحال إلى ما هو عليه
كتابات أبوسن يعرفها الكثير من الناس هنا بمختلف تصنيفاتهم ولم أقرأ لأحدهم ينتقدها
أما أعماله فتشهد عليها كوستي
من تبني مشروع تقديم وجبات إفطار للمرضى الفقراء (وغير الفقراء) في المستشفيات
من تبني مشاريع جلب أجهزة طبية للمستشفى
من تبني مشروع إقامة عنبر للأطفال بمستشفى المدينة
من المشاركة في توفير وجبات لتلاميذ المدارس
من توفير الزي المدرسي لغير القادرين منهم
ومن سعي لإقامة مكتبة خيرية (علمانية بالمناسبة)
من سعي لتأسيس مركز ثقافي
وغيرها وغيرها
بالله عليك وبدون طريقة هلال مريخ أو غالب لا مغلوب:
ألا ترى أنك ظلمت وتظلم هذا الرجل؟!
سأعود حين ميسرة
|
Post: #29
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-21-2014, 05:39 AM
Parent: #27
فعلاً لا تصادف أولوياتي هواك ...
ولا تصادف معاركي رصدك الكروي الشيّق
فأنا لست هنا لأهزم أحد ...
المهزومون ... مهزومين بالفطرة
(حتى صورهم تعبّر عن هزيمتهم!)
... المهم ....
|
Post: #30
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 09:39 AM
Parent: #29
| Quote: فعلاً لا تصادف أولوياتي هواك ... |
من أين استنتجت هذه النتيجة يا تبارك؟
أنت قلت Quote: كل فرد يرى أولويات مختلفة للجبهة التي يجب حسمها أولاً ..
ربما لم تصادف أولوياتي هواك ... ولكنني لن أنتظر داعش أخرى في وادي النيل ... |
وأنا رددت عليك هكذا Quote: أنا لا أختلف معك في حق اختيار الأولوية التي يجب التصدي لها
لكني أرى أن خطر "داعش" يكمن في البيئة الضحلة الهشة الرخوة التي يستهدفها
ومن هنا جاء ندائي بأن نقوي جبهتنا حتى لا يرتع فيها الداعشيون والمغامرون السياسيون
تقوية الجبهة (المجتمع السوداني) يتأتى بقيام المتعلمين والعارفين بأدوارهم، كل في مجاله |
كيف توصلت يا تبارك إلى : "فعلا لا تصادف أولوياتي هواك"
رجالة كدا بس
ياهو دا نوع النقاش الأنا برفضو، واحد يصر على رأي في راسو ما بتنازل عنو مهما يكون
ولا حتى بسمع في التاني بقول شنو.
تلميحاتك وصلت، وهي مؤسفة من أي جهة أخدتها
|
Post: #31
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-21-2014, 04:40 PM
Parent: #30
| Quote: ياهو دا نوع النقاش الأنا برفضو، واحد يصر على رأي في راسو ما بتنازل عنو مهما يكون |
وريتنا لاكين ...
Quote: ومن هنا جاء ندائي بأن نقوي جبهتنا حتى لا يرتع فيها الداعشيون والمغامرون السياسيون
تقوية الجبهة (المجتمع السوداني) يتأتى بقيام المتعلمين والعارفين بأدوارهم، كل في مجاله |
دي نظرية جديدة في التغيير الإجتماعي والسياسي؟ ولّ برنامج حزبي محكوم بى آيديولوجيا محددة؟ ولّ وصفة مجربة في دولة أخرى؟ ولّ ياهو هواك ووجهة نظرك؟
أها ... أنا أولوياتي لا توافق هواك ... بناءًا على كلامك المطاط دا ...
لأنو هدّ الركن الكهنوتي بتاع (كلٌ في مجاله) البيبقي "الدين" هو مجال "المفتي" ... أولى بالنسبة لي من تأسيس كهنوت "تخصصي" جديد لا أساس له ..
كلٌ في مجاله دي بيستعملوها للمهن المرتبطة بمبحث علمي محدد زي الطب والهندسة والصيدلة والقانون ...
لاكين (كلٌ في مجاله) هنا في سودانيز؟ ليه اصلو؟
يعني ودالمشرّف تاني ما يقول راي سياسي؟
ياخي لو دي أهواءك ... فأولوياتي لم توافق هواك ...
... المهم ....
|
Post: #32
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 05:34 PM
Parent: #31
يعني هسي يا تبارك عايزني أرد عليك أقول شنو؟
كلامك الفوق دا ما عندو أي علاقة بي كلامي
عايزني كل مرة أفسر ليك أي كلمة وجملة ترد في كتابتي
ولّ عايز تجرجر البوست خمسه سته صفحات في اللا موضوع الذي أعلنت رفضي له منذ البداية
شنو أولوياتي وأولوياتك وهواي وهواك
هوى شنو ياخ، هو متين العمل العام ببقى بي هوى الناس
وليس واجبا ثقيلا على كل من تعلّم علما ويرى أن يفيد به العالمين
|
Post: #33
Title: Re: من وحي بوست andquot;أحسن كتّاب وكاتبات عام 2014andquot;
Author: أبوبكر عباس
Date: 12-21-2014, 06:05 PM
Parent: #32
Quote: هسي شوف زي تبارك دا !
عِلم ومعرفة، وفوق ذلك نجمٌ يتهافت الناس على بوستاته
(زي الفنان السكوهو البنات قدام اتحاد الفنانين)
ورغم ذلك مضيّع كل هذه الإمكانيات ومتفرغ لملاحقة السلفيين |
يعني لو خلى ملاحقة السلفيين؛ البخلينا نتهافت عليهو شنو؟!
إتّا قايلنا بنات الفنان جد جد
|
Post: #34
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 06:36 PM
Parent: #33
هههههه
انت قايل المراهقة دي في الجنسانية بس
هسي يا تبارك، د. أبوبكر دا متخصص وناجح في مجالو في البيطرة
وبدأ يفيد الناس في المنبر وله إسهامات أعرفها تفيد الوطن والعالمين
ومع ذلك يدلو بدلوه في السياسة والدين بقدَرٍ معلوم
المشكلة وين لما د. محمد حيدر المشرف الناجح في تخصصه في الصيدلانية
يفيد الناس في المنبر ويفيد الوطن والعالمين في مجال تخصصه
ويدلو بدلوه في السياسة
شوف الشاعر هاشم صديق في قصائده ألا يمارس تخصصه في الشعر والدراما والمسرح
وفي ذات الوقت يفيد الناس ويقدم إسهامه في الوطنية؟!
وقع ليك كلامي؟
يعني ما الفائدة عندما نترك تخصصاتنا في المكتب ونجئ للمنبر دا ناس سياسة ودين بس
وبدون أي استعداد للتنازل عن آرائنا قيد أنملة؟!
|
Post: #35
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-21-2014, 06:51 PM
Parent: #34
Quote: يعني ما الفائدة عندما نترك تخصصاتنا في المكتب ونجئ للمنبر دا ناس سياسة ودين بس
وبدون أي استعداد للتنازل عن آرائنا قيد أنملة؟! |
انت وكت الفكرة دي ... لا توافق هواك ...
اتركها ...
(المشكلة انها لا توافق هواك ... حين يمارسها غيرك )
... المهم ....
|
Post: #36
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 07:10 PM
Parent: #35
شكرا منى عمسيب
شكرا عبد الحفيظ أبوسن
شكرا محمد البشرى
شكرا عوض جاه
شكرا نور تاور
شكرا محمد المرتضى حامد
شكرا أبوبكر عباس
أعدكم بفتح بوست آخر بعنوان لا يمت للموضوع بصلة
شكرا تبارك -الغواصة- إذ جعلت هذا غير ممكن
|
Post: #37
Title: Re: من وحي بوست andquot;أحسن كتّاب وكاتبات عام 2014andquot;
Author: محمد البشرى الخضر
Date: 12-21-2014, 07:10 PM
Parent: #35
يا ود الزبير ...
مالك مضيّقها كدا! دا اسمو المنبر العام العاااااااام
يعني العايز معلومة في البيطرة او الصيدلة ما بكوسها هنا غير المنتديات و المواقع المتخصصة كان وقعت قوقل أو ويكيبيديا بتلقى العايزه
أما ونسة ابوبكر العاضة و استقالاته المتكررة و حذلقة ود المشرف ولغته المعسّمة و سغالة تبارك و فقعه للمرارة ديل الما بتلقاهم إلاّ هنا
فا شنو.. الأمور طيبة زي ما قلت ليك
بس ما ترفع سقف توقّعاتك أكتر من اللازم و أهو الأمور ماشة
|
Post: #38
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-21-2014, 07:14 PM
Parent: #37
خلاص يا ود البشرى
دفنا الساس و بعنا القطعة زاتها
لا سقف لا يحزنون
|
Post: #39
Title: Re: من وحي بوست andquot;أحسن كتّاب وكاتبات عام 2014andquot;
Author: أبوبكر عباس
Date: 12-21-2014, 08:46 PM
Parent: #38
Quote: ماذا ترى من نتائج مقابل برميل الحبر الذي دلقته في البوست الجاري مثلا
هل اهتدى ضال، هل تعلْمَنَ ديني، هل لانت ذرة من عقله أم أنه بالعكس ازداد تجمداً ؟ |
كلامك دا طبعاً غير صحيح
الإنسان دائم التفكير، قد يتجمد مؤقتاً، لكنه لا يستطيع أن يتجاوز الحجج المنطقية أبد الدهر.
أتوقع أن يكون لنقاشات تبارك أثر على شيخ عماد في المستقبل القريب.
أحمدونا بياخد وكت، لكن غير ميؤوس منه!
|
Post: #40
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-21-2014, 10:26 PM
Parent: #39
Quote: أتوقع أن يكون لنقاشات تبارك أثر على شيخ عماد في المستقبل القريب.
أحمدونا بياخد وكت، لكن غير ميؤوس منه! |
حسن الظن بالعباد ... من حسن الظن بالله ... 
(نحن هسي في "الألفا" المبعوث فينا دا )
... المهم ....
|
Post: #41
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية المدير
Date: 12-21-2014, 11:25 PM
Parent: #40
Quote: أتوقع أن يكون لنقاشات تبارك أثر على شيخ عماد في المستقبل القريب.
أحمدونا بياخد وكت، لكن غير ميؤوس منه! |
هههههههههههههههههههههه،
إنّك لن تهدي من احببت.
الغريبة ط بارك اداها ليك لآيك زي الما حصل شئ !؟،
ووضعها في إطار حُسن الظن، وليس لشخصي الضعيف
ادنى شك في صديقي ابا بكر.
غايتو البُكان دا فيهو جِنِس هوايل !!!...
|
Post: #42
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-22-2014, 06:15 AM
Parent: #41
Quote: مالك مضيّقها كدا! دا اسمو المنبر العام العاااااااام
يعني العايز معلومة في البيطرة او الصيدلة ما بكوسها هنا غير المنتديات و المواقع المتخصصة كان وقعت قوقل أو ويكيبيديا بتلقى العايزه |
طيب يا ود البشرى
حتى لا يُغلَق هذا البوست على فهم خاطئ أكرر مقصدي منه:
أنا قلت إن الأعضاء من المتخصصين وأصحاب العِلم والمعارف يمكن أن يجعلوا سودانيز أونلاين منبرا لتقديم المنفعة للوطن وللقراء
أن يقدم الرياضيون طروحاتهم في أسباب تدهور الرياضة ووسائل علاجها وهكذا يفعل الأطباء والبيئيون والبياطرة والصيادلة والموسيقيون ..الخ
وعبر النقاش وتلاقح الأفكار يمكن أن نقدم فائدة للجميع وللوطن، وضربت مثلا بالدكتور أبوبكر عباس فهو يمكن أن يفيد ببوستاته عن الإبل والمرعى
وأمراض الماشية ومنتجاتها ، ويقوم غيره من الزراعيين مثلا بطرح أفكارهم عن مشاكل الزراعة وتتلاقح أفكارهم مع الخبراء العمليين غير الأكاديميين
وهكذا في كل المجالات.
أنا لا أقصد تقديم معلومات يمكن أن نجدها في الإنترنت وقوقل ولا أقصد أن يتحول المنبر إلى قاعة محاضرات جامعية
أقصد أن يُوجّه المجهود الذي يضيع في المناقشات السفسطائية حول الدين والسياسة إلى نقاش حول مشاكلنا الحقيقية على الأرض
من فشل زراعي ورعوي ورياضي وبيئي وظواهر سلبية في المجتمع.. الخ الخ الخ الخ الخ إلى آخره
ـــــــــــــــــــ
هههه
يا ود المدير
تخيّل الفائدة التي ستعم بلدنا عندما يتعلمن أحمدونا وشيخ عماد
نحن في ديك الساعة ... الخ الخ برضو
|
Post: #43
Title: Re: من وحي بوست andquot;أحسن كتّاب وكاتبات عام 2014andquot;
Author: حمد عبد الغفار عمر
Date: 12-22-2014, 06:34 AM
Parent: #42
وقف البيع
ياخ ورجع العربون
Quote: أنا قلت إن الأعضاء من المتخصصين وأصحاب العِلم والمعارف يمكن أن يجعلوا سودانيز أونلاين منبرا لتقديم المنفعة للوطن وللقراء
أن يقدم الرياضيون طروحاتهم في أسباب تدهور الرياضة ووسائل علاجها وهكذا يفعل الأطباء والبيئيون والبياطرة والصيادلة والموسيقيون ..الخ |
هم ديل ذاتهم تسببوا من دون قصد في خلق الوضع الحاصل دا لأنهم في وقت ما تركوا الكتابة الجادة وإنشغلوا بعضوية المنبر ونوعيتها والرجرجرة وقريعتي راحات وتسميات كتيرة حصلت مما خلق
بيئة بتاعة جمجرة للآن المنبر ما قادر يتجاوزها
الكاتب الجاد مافي شيئ بحول بينو وبين الكتابة
ودينا خالدفي مداخلة ليها في البوست بتاع دينق قالت ما معناه إنو أي زول صاحب فكرة مشوهة يخلوه يقول كلامو ويتعرى هنا دا ودا كلام عين العقل دي ساحة مفتوحة لنزال فكري مهمة العالم فيهو هي تنوير الجاهل
وإلا يكون منبر صفوة كتاب وأدباء للقراءة فقط
بعدين حاجة تانية لبكري يا إما يوقف حكاية فصل الأعضاء دي يا إما زول يتفصل لسوء السلوك أكثر من مرة ما مفروض يكتب ليهو حرف هنا تاني ، زول سلوكو سيئ عايز بيهو شنو
مع تحديد دقيق لحالة سوء السلوك
|
Post: #44
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-22-2014, 07:07 AM
Parent: #43
دا كلام جميل يا حمد
وأضيف، ما دايرين المنبر يكون منبر صفوة
أي زول ممكن يكون مفيد في المجال العندو فيهو خبرة
يعني المزارع ممكن يكون عمليا أفيد من البروف الزراعي
ثم ما طرحته هنا لا يعني أن ينغلق الموقع على الرؤية السابقة والكتابات الجادة
وتُلغى المناقشات والبوستات الأخرى من ذكريات وطرائف وأخبار ومجاملات ومماحكات وغيره
أنا فقط استنكر بوستات المشاحنات والمكاواة السياسية والدينية والطاقات التي تُهدر فيها
|
Post: #45
Title: Re: من وحي بوست andquot;أحسن كتّاب وكاتبات عام 2014andquot;
Author: تبارك شيخ الدين جبريل
Date: 12-23-2014, 07:01 PM
Parent: #44
Quote: أما صاحبي فأنت تظلمه لسبب لا أعرفه
صاحبي رجل مستنير يعرف دوره في مساعدة المجتمع والارتقاء به ويعمل بما وسعت يداه لتحقيق هذا الهدف
ولو قام كل عضو في هذا المنبر بما يقوم به عبد الحفيظ في مدينته لما وصل الحال إلى ما هو عليه
كتابات أبوسن يعرفها الكثير من الناس هنا بمختلف تصنيفاتهم ولم أقرأ لأحدهم ينتقدها
أما أعماله فتشهد عليها كوستي
من تبني مشروع تقديم وجبات إفطار للمرضى الفقراء (وغير الفقراء) في المستشفيات
من تبني مشاريع جلب أجهزة طبية للمستشفى
من تبني مشروع إقامة عنبر للأطفال بمستشفى المدينة
من المشاركة في توفير وجبات لتلاميذ المدارس
من توفير الزي المدرسي لغير القادرين منهم
ومن سعي لإقامة مكتبة خيرية (علمانية بالمناسبة)
من سعي لتأسيس مركز ثقافي
وغيرها وغيرها
بالله عليك وبدون طريقة هلال مريخ أو غالب لا مغلوب:
ألا ترى أنك ظلمت وتظلم هذا الرجل؟! |
لا أرى أنني ظلمت الرجل ...
أنصار السنة فتحوا الخلاوي وبنوا المساجد والمستشفيات وأطعموا الناس وعالجوهم وكسوهم أدخلوهم الجامعات ووظفوهم ...
فهل أرى أنني اظلم انصار السنة في مهاجمتي لمنهجهم السلفي الداعشي؟ بالطبع لا ...
داعش نفسها ... أطعمت المجاهدين وكستهم وسلحتهم وأطعمتهم وأغنتهم من مال البترول العراقي والسوري وباعت لهم الجواري الإيزيديات بأبخس الأثمان ... هل أظلم داعش في وصفها بالجاهلية والإرهاب؟
قال مكتبة علمانية قال ...
الله يرحم زمن المن والإبتزاز ...
نحن ننظر للخطاب الفكري ونحكم على منتوجه ... بغض النظر عن عرضحالات أعمال البر والإحسان ...
... المهم ....
|
Post: #46
Title: Re: من وحي بوست andquot;أحسن كتّاب وكاتبات عام 2014andquot;
Author: معاوية الزبير
Date: 12-23-2014, 10:15 PM
Parent: #45
يا تبارك ياخ، أنا لما كتبت Quote: هسي شوف زي تبارك دا !
عِلم ومعرفة، وفوق ذلك نجمٌ يتهافت الناس على بوستاته
(زي الفنان السكوهو البنات قدام اتحاد الفنانين)
ورغم ذلك مضيّع كل هذه الإمكانيات ومتفرغ لملاحقة السلفيين |
إنما أحسنت بك الظن
ورجوت منك فائدة في سياق موضوع البوست
فإذا كنتُ مخطئا فليس أمامي سوى الاعتذار
لأنني لا أريد مجاراتك في ما استهجنته شخصيا في أمر الملاحقة والنقاش الدائري المخرّم
الذي لا يقود سوى إلى الهباء وإهدار الجهد والوقت
أما موضوعك مع (أو للدقة: عن) صديقنا العزيز عبد الحفيظ أبوسن ورأيك الشخصي فيه
فلن تجدي -معك- محاولاتي لإثبات سوء فهمك له، كما لن نجني فائدة عامة إذا أثبتَ حسنَ فهمك له
هسي موضوع البوست الأصلي قفلناهو وعايزين نقفل موضوع أبوسن دا بالله
اطفي النور وجر الباب معاك لو سمحت
|
Post: #47
Title: Re: من وحي بوست andquot;أحسن كتّاب وكاتبات عام 2014andquot;
Author: د.محمد حسن
Date: 12-24-2014, 09:17 AM
معاوية
يا ود الزبير
جيت اسلم
واشوت في نفس الاتجاه
بس بطعم مختلف
اتمنى ان يروقك
|
|
|