Post: #1 Title: أين درست الروضة؟ Author: سيف النصر محي الدين Date: 11-30-2011, 10:38 PM Parent: #0
مع الاعتذار مقدما للأخ الحبيب ابو الحسين و Nothing personal _______________________________________________ عني فقد درست الروضة في أكثر من مكان نظرا لظروف الايجار و اصحاب المنازل الجشعين اولا ببحري المزاد و قد ظهرنا بالتلفزيون مع بابا فزاري و قدمنا نشيد شهر مايو يا أحلى شهر"كان أحلى شهر ما عارف". ثم بعدها بامتداد ناصر و قد كانت روضة على مستوى جيد و كان لدينا ترحيل من باب البيت لباب الروضة و العكس. ثم اخيرا بالكلاكلة القبة حيث استقر بنا المقام حتى الآن. العجيبة أن مدرساتنا في روضة الكلاكلة حين اقابلهن الآن لا أحس أنهن أكبر مني سنا و لسبب ما توقف بهن الزمان و مضي بي حتى شاب الرأس مني. السؤال هل تؤهلني هذه الــCV لوظيفة في القصر الجمهوري؟
Post: #2 Title: Re: أين درست الروضة؟ Author: حسين نوباتيا Date: 11-30-2011, 10:58 PM Parent: #1
ابو السيوف مشتاقين يعلم الله..
انا روضتي كانت رعي الخراف والاغنام في عثمان نارتي ببدين ..
لكن والله بعد داك قريت كتير لكني متذكر رعايتي للخراف والاغنام اكثر من كل الكتب والمناهج الدرستها ..
يعني اذا ناس القصر ديل قرروا يشربوا لبن غنم طازج -- كمطاشر غنماية في الحديقة الخلفية للقصر اخوك بنجض ليهم الشغلانة دي نجاض قبورة..
سلام يا دكتور سيف و طلعت سادن كمان... قلت لي شهر مايو يا أحلى شهر؟ لكن ياخي الروضة براها ما كفاية بعد الروضة لازم تكون درست في سان فرانسيس و أهم حاجة دي:
Quote: يحب العلاقات الإجتماعية ومخالطة الناس دون تعال أو إستكبار.
يعني تكون مخلوق من طينة تانية و الطبيعي إنك تستعلى على الناس و تستكبر لكن لو ما بتعمل كدا يجيبوها ليك في سيرتك الذاتية. قلت لي يا حسين عملتها كلها غنم و قراية و ناس سيدي الواحد يصحى من نومه يلقى كومه. الله كريم علينا.
دكتور سيف سلام .. دى سيرة ذاتية كااااربة ، أزكيك رئيس جمهورية ظاااتو.. المافى شنو ؟
Post: #7 Title: Re: أين درست الروضة؟ Author: محمد عبدالله مختار Date: 11-30-2011, 11:50 PM Parent: #4
سلام دكتور سيف .. وأحييك على البوست الهادف الذي سيخرج المواهب الدفينة لأعضاء البورد أعجبتني سيرتك الذاتية في الروضة خاصة دراستك في ثلاث رياض مختلفة وهذا لعمري يؤكد انك راجل ما ساهل . بالنسبة لي دخلت الروضة باكراً قبل السن القانونية بأشهر قليلة بعد محاولات عديدة قام بها الوالد مع ادارة الروضة نسبة لرغبتي الشديدة في دخول الروضة والتي سمعت عنها فقط . نجحت المحاولة وفي اليوم الأول تم الإتصال بوالدي بعد اعتدائي على احد الزملاء وقذف احدى المعلمات بقنينة بيبسي وتم طردي من الروضة فوراً . بعد بلوغي السن القانونية ذهب بي والدي الى الروضة وتم رفضي بعد التعرف علي فإضطر الوالد الى اخذي الى روضة اخرى في نفس الحي في مدينة الدوحة (العزيزية) لكنها بعيدة نسبياً عن المنزل . حافظت لأسابيع معدودة على كبت السلوك العدواني الذي كان يلازمني في طفولتي بعد تهديدات مرعبة من والدي العزيز .. المهم اكملت الروضة بخيرها وشرها ولكنها لم تعجبني كنت اتهرب من الذهاب الى الروضة بإدعاء المرض او الفرار ..!
_______ سأقوم بالتعديل في سيرتي الذاتية بعد ظهور اهمية الروضة في الـc.v
Post: #5 Title: Re: أين درست الروضة؟ Author: محمد حيدر المشرف Date: 11-30-2011, 11:33 PM Parent: #3
روضتى كانت اقوى روضة فى الخرطوم .. وأجمل روضه فى العالم أحرزنا المرتبه الأولى بنسبة نجاح 100% والحمدلله كلنا دخلنا الابتدائي .. من هنا فإنى أقول .. وبدون ان يتطرق لى الشك للحظة واحده غنو روضة "ماما راقيه" بالثوره ح 8 كانت أقوى من " رياض الحنان " بما لا يقارن .. بس المشكله انو الدنيا دى ما فير يا سيف يا قريبي
Post: #6 Title: Re: أين درست الروضة؟ Author: محمد حيدر المشرف Date: 11-30-2011, 11:44 PM Parent: #5
بعدين نشيدنا كان أسمح من نشيدكم بتاع مايو أحلى شهر الماسمح ده ..
"ماما راقيه ادتنا علوم .. وقالت لينا كلام مفهوم .. كل كلامها كان فى الثورة ثورة مايو العامله الحره نهتف ليها ولن ننساها نوحد صفها ونمشى وراه "
هيجت علينا الشجون يا سيف .. مفكر أعمل بوست بعنوان ..
"كل الذين تسللوا لروضة ماما راقية " أو "أطفال روضة ماما راقيه .. أجدع ناس "
Post: #8 Title: Re: أين درست الروضة؟ Author: Adil Hamza Date: 11-30-2011, 11:50 PM Parent: #6
انا كنت فى روضة ماما امال حميدة ببرى كوريا و بعدها روضة ماما فاطمة العوض بالقرير الروضتين ديل اقوى من رياض الحنان بتاعت مساعد الرئيس و بما اننى غير متعالى و غير متكبر يعنى ممكن اكون مساعد للرئيس او مستشار
Post: #11 Title: Re: أين درست الروضة؟ Author: عرفة محمد سعيد Date: 12-01-2011, 05:36 AM Parent: #6
Quote: ماما راقيه ادتنا علوم .. وقالت لينا كلام مفهوم .. كل كلامها كان فى الثورة ثورة مايو العامله الحره نهتف ليها ولن ننساها نوحد صفها ونمشى وراه "
هيجت علينا الشجون يا سيف .. مفكر أعمل بوست بعنوان ..
"كل الذين تسللوا لروضة ماما راقية " أو "أطفال روضة ماما راقيه .. أجدع ناس "
ود المشرف شوف معاك العناوين دي :
روضة ماما راقيه تلك الروضة المتفردة
الى خريجي روضة ماما راقية اجمعوا هنا
دفتر احوال طالب الروضة المشاغب
عدت من الروضة هذة المرة لابشر بالابتدائية
المضحك المبكي مما نذكر ونفتكر من ايام الروضة ..ادخل لتضحك وتبكي
ملتقى خريجين روضة راقية (توجد دعوة) ###
روضة راقية طراوة "الجزء ما قبل الاول
تعالو شوفو معي روضة راقية قبل التكسير...
انا ورفقاء روضة ماماراقية والكتب المجدعة في الممرات .................الخ
مع الاعتذار مقدمالاصحاب البوستات المشابهه
Post: #9 Title: Re: أين درست الروضة؟ Author: جمال الباقر Date: 11-30-2011, 11:50 PM Parent: #5
انا ما درست روضة
قريت خلوة بس
والله صحي
والله يا صاحبي تاريك جاهل وصغير .......... قال روضة قال
Post: #10 Title: Re: أين درست الروضة؟ Author: Nagat Sid Ahmed Elshiekh Date: 12-01-2011, 04:32 AM Parent: #9
نجحت المحاولة وفي اليوم الأول تم الإتصال بوالدي بعد اعتدائي على احد الزملاء وقذف احدى المعلمات بقنينة بيبسي وتم طردي من الروضة فوراً .
مستوفى لشروط روضة القصر الاخ محمد... عشان تفلق لينا مساعدى القول. والله صحي.
كما ارشح الاخ جمال الباقر لروضة القصر لتلاوة ما تيسر من سورة البقرة نسبة لتخرجه من الخلوة.كيف يا جمال الوظيفة دى معاك؟؟؟
اما عن شخصى الضعيف درسته من منازلهم روضة حنان الأم...تنفع ولا لا؟ سلام الاخ سيف.
Post: #12 Title: Re: أين درست الروضة؟ Author: معاوية عبيد الصائم Date: 12-01-2011, 05:46 AM Parent: #10
مولود فى (منشية )ام الطيور (سيتى)
يلا بعد داك درست روضة ام الطيور( سيتى) بعدين الاعدادى فى ام الطيور ( هاى) وتانى الراهبات ..(حالة) خاصة.شان بابا وكده ثم بعد داك ..يلا..بابا مشى (.لن دن) قومنا قرينا (فى جامعة بريطانية فى (لن دن) ثم معهد عالى كده اسمو(كيف تكون انسان) والحمد لله ده (انسليت ) منو بعرف حاجات حلوة خااالص .. يعنى اتعلمت كيف اجيد اللغة العربية (حاجة هاااى جدا) وتانى اتعلمت فيهو فن الخطابة ..والكتابة( مبالغة) وبرضو كيف اشيل الفاتحة فى بيوت البكاء.... والجيران فى (الفلل) الجنب فيلاتنا ...دائماااا بقولوا لى تعال شان تقرا لينا الرسائل ..لانى بعرف بقعد الحروف سمح.. والاهم من كده ..
والله ما احب اتكلم عنى نفسى كتير لكن انتو مصرين
المحيرنى وقاطع قلبى ..ما عارف شنو ال########ى هنا معاكم شنو...غايتو الزول يقول قسمة وفقط...يعنى نصيب
Post: #13 Title: Re: أين درست الروضة؟ Author: محمد جلال عبدالله Date: 12-01-2011, 06:01 AM Parent: #12
يا دكتور سيف أنا مواليد 1974 وما قريت روضة تخيل جننننبلغ كده خشيت المدرسة طوالي أها أنفع وللا ما أنفع ^____^
Post: #14 Title: Re: أين درست الروضة؟ Author: Ahmed musa Date: 12-01-2011, 06:43 AM Parent: #13
أها يا (فِرَد)* أنا ما متذكر الروضة بتاعتي ولا داير قصة مساعد رئيس دي انا يا دوبك منافس لعضوية اللجنة الشعبية ومنافسي هو جمال جاكوبس وهو ما متعالي برضه لكن انا نفسي شربت قهوة في السوق زي تلاتة مرات واتونست مع المواطنين عااااادي اها ادعموني ينوبكم ثواب وينوب اهلكم في بري السُكر والزيت والبصل وإحتمالات (العيش) واردة ... بس ما ضمان 100%
ـــــــــــ (فِرَد)* دي محاولة لإثبات إني (شعبي) وغير متعالي
Post: #15 Title: Re: أين درست الروضة؟ Author: محمد أبوالعزائم أبوالريش Date: 12-01-2011, 06:59 AM Parent: #14
غايتو البوست ده، في ناس بتحاحي بعيد منو، لأنهم ما بيعرفوا الرياض وناس خلاوي ساكت.
هسي في داعي؟
محمد المشرف يكلمنا عن روضة ماما راقية، وناس يجوا يقولوا (خلوة الفكي المبارك)؟ ..... وبعد ما (يطلقوهم البيوت) تلقى الواحد حايم بي سروالو من دافوري لي (سكج مكّج).
الله في
Post: #16 Title: Re: أين درست الروضة؟ Author: ود الخليفه Date: 12-01-2011, 07:27 AM Parent: #15
Quote: ماما راقيه ادتنا علوم ..
رحم الله ماما نفيسة
فلا اظنها كانت تعرف حقوق الملكية الفكرية
فقد حفظنا هذا النشيد مبدوءا باسمها
رسالة وصلتني من احد الاصدقاء
Quote: الأخ ود الخليفة تحية طيبة اولا انا درست الروضة في الكنيسة (لووووووووول) اها انت درست الروضة وين , يبدو انو الروضة حتما هي مؤثرة في تكوين مستقبل الفرد والدليل عندك اهو مستشار الرئيس الجديد لشئون شنو كده ما عارف درس الروضة في دار الحنان (الخرطوم 2) واهو حنّو عليهو وعيّنوهو مساعد ياي ,,,, عن نفسي انا خايف يعيّنوني مساعد قسيس. والله انا ما فاهم البحصل شنو شابكننا معارضة وشابكننا لن نشارك وكمية من النقة تقول ديل حيشاركو الشيطان وفي النهاية شفت الانبهالة والانبراشة كيف. كان الله في عون الشعب السوداني مع خالص الود من مساعد .......
Quote: وداعا روضتي الغنا وداعا معبدي القدسي
او كما قال
عندما كنا في الروضه كنا نسال (لمن تكبر داير تبقى شنو؟)
فاخترنا كل المهن ولم يدر بخلدنا اختيار منصب مستشار رئاسي فقد كنا رعاعا
Post: #17 Title: Re: أين درست الروضة؟ Author: معاوية المدير Date: 12-01-2011, 07:53 AM Parent: #16
سلآمات يا قريبي. أنا قريت الروضة في السيالة القديمة. روضة شيخنا عبد الوهاب ود علي.
نشيد الروضة بتاعنا كان: حا جا بلف حيجب يا و ألف...
Post: #18 Title: Re: أين درست الروضة؟ Author: سيف النصر محي الدين Date: 12-01-2011, 08:01 AM Parent: #16
Quote: انا روضتي كانت رعي الخراف والاغنام في عثمان نارتي ببدين ..
مشتاقين و الله يا نوباتيا رعي الخراف و الاغنام عملك مدير بنك في امريكا "ظاااتها" لكن مساعد رئيس في السودان ماعندك طريقة للآسف. عموما خلي تلفوناتك احتمال نشوف ليك منصب مساعد معتمد محلية بدين
Post: #20 Title: Re: أين درست الروضة؟ Author: سيف النصر محي الدين Date: 12-01-2011, 08:08 AM Parent: #18
Quote: و طلعت سادن كمان... قلت لي شهر مايو يا أحلى شهر؟ لكن ياخي الروضة براها ما كفاية بعد الروضة لازم تكون درست في سان فرانسيس
العوض سلامات صعبتها خالص بسان فرنسيس دي رغم أنها ما مهمة كما يبدو و إلا كان الجماعة ضمنوها السيرة الذاتية. تخيل يوم "شهر مايو أحلى شهر دي" مشينا الروضة متأخرين و لقينا الجماعة فاتونا قاموا ناس البيت لحقونا ليهم بتكسي. سدانة ليها ضل قال ليك.
Post: #19 Title: Re: أين درست الروضة؟ Author: ايمان بدر الدين Date: 12-01-2011, 08:02 AM Parent: #16
Quote: ود المشرف شوف معاك العناوين دي :
روضة ماما راقيه تلك الروضة المتفردة
الى خريجي روضة ماما راقية اجمعوا هنا
دفتر احوال طالب الروضة المشاغب
عدت من الروضة هذة المرة لابشر بالابتدائية
المضحك المبكي مما نذكر ونفتكر من ايام الروضة ..ادخل لتضحك وتبكي
ملتقى خريجين روضة راقية (توجد دعوة) ###
روضة راقية طراوة "الجزء ما قبل الاول
تعالو شوفو معي روضة راقية قبل التكسير...
انا ورفقاء روضة ماماراقية والكتب المجدعة في الممرات .................الخ
مع الاعتذار مقدمالاصحاب البوستات المشابهه
ود المشرف شوف معاك بعض الاسماء الفى العناوين دى
روضة ماماعرفة تلك الروضة للطائفيين اولاد الحنكشه
الى خريجي روضة ست عرفة معليش اقصد (ست فله) اجمعوا هنا
دفتر احوال المشاغب طالب موية وبخرات شيخة عرفة
ملتقى خريجين حولية عرفة (توجد دعوة) ###
عدت من الانجيلية هذة المرة لابشر بالابتدائية
تعالو شوفو معي روضة الشريفة عرفة قبل التكسير...
انا ورفقاء روضة الختمية شرق والفتات المجدعة في الممرات .................الخ
مع الاعتذار مقدمالاسماء اصحاب البوستات المشابهه
Post: #21 Title: Re: أين درست الروضة؟ Author: سيف النصر محي الدين Date: 12-01-2011, 08:17 AM Parent: #19
Quote: دى سيرة ذاتية كااااربة ، أزكيك رئيس جمهورية ظاااتو
سلامات يا أمونة المشكلة رئيس الجمهورية ما اعلن عن دراساتو "الروضوية" مركز على المؤهلات العسكرية بس و ده شعرا ما عندنا ليهو رقبة. انت بورتسودان دي ما كان فيها روضات و للا شنو؟
Post: #22 Title: Re: أين درست الروضة؟ Author: سفيان بشير نابرى Date: 12-01-2011, 08:17 AM Parent: #19
Quote: انا روضتي كانت رعي الخراف والاغنام
نوباتيا بطل طرطشه و اطلع من هنا افتح بوست برااااك انت موهل نبي بشغلتك دى شنو قصر و مساعد ياي !!! و الله انا جني وجن الزول الما بقدر نفسو!!.
يادكتور كيفك ؟
Post: #23 Title: Re: أين درست الروضة؟ Author: سيف النصر محي الدين Date: 12-01-2011, 08:23 AM Parent: #22
Quote: نجحت المحاولة وفي اليوم الأول تم الإتصال بوالدي بعد اعتدائي على احد الزملاء وقذف احدى المعلمات بقنينة بيبسي وتم طردي من الروضة فوراً .
سلامات يا محمد عبدالله تاريخك في الروضة تاريخ حافل، لكنه لا يصلح لوظيفة مساعد رئيس كل المطلوب منو يقعد ساكت و مؤدب أو على اسوأ الفروض يبتسم و يصافح الضيوف. لكن قنينة البيبسي الفي الروضة دي بتحرج ناس كتار هنا، ياخ تصدق انو في ناس كانوا بشيلوا فطورهم في كورية
Post: #24 Title: Re: أين درست الروضة؟ Author: سيف النصر محي الدين Date: 12-01-2011, 08:28 AM Parent: #23
Quote: "ماما راقيه ادتنا علوم .. وقالت لينا كلام مفهوم .. كل كلامها كان فى الثورة ثورة مايو العامله الحره نهتف ليها ولن ننساها نوحد صفها ونمشى وراه
ود المشرف لقيتك ارسخ قدما مني في مسألة السدانة فنشيدكم لا يصدر إلا عن مايويين محترفين.
Post: #26 Title: Re: أين درست الروضة؟ Author: سيف النصر محي الدين Date: 12-01-2011, 08:39 AM Parent: #24
Quote: انا كنت فى روضة ماما امال حميدة ببرى كوريا و بعدها روضة ماما فاطمة العوض بالقرير الروضتين ديل اقوى من رياض الحنان بتاعت مساعد الرئيس
سلامات يا عادل مشكلتك أنك عكست الأمور و حركتك كانت في عكس حركة التاريخ السوداني أي من المركز للاطراف و ده ممكن يعطل حصولك على منصب المساعد، لكن ممكن يشغلك في وزارة الطاقة
Post: #28 Title: Re: أين درست الروضة؟ Author: موسي الراجل Date: 12-01-2011, 08:54 AM Parent: #24
د . سيف سلام و شوق نطمع فى الا جرين وكان حتلت يكفينا اجر السلام وكان نوباتيا لقيتو له الخلفيه نجيبو له شوك الزريبه ونشاركه بخبرتنا فى حله السبارس
شايفك كترت الرياض لكن( قطر حلفا) ما ابوظ عليك سيرتك الخايف عليها
Post: #25 Title: Re: أين درست الروضة؟ Author: عبدالمجيد الكونت Date: 12-01-2011, 08:38 AM Parent: #23
انا دخلت روضة وفشلت فيها ودخلت خلوة وبرضو ما نجحت والسبب ابوي كان مدلعني ........ والله صحي
روضة الحلة كانت تدرس فيها الاستاذة سميرة خضر حماد حياها الله وحفطها ... والروضة كان في حوش النادي حق الحلة الواقع في طريق الزراعة حقت اهلنا ... انا مشيت يومين دوب ما خشيت الروضة اشوف ابوي نازل اجدع الكراس واحصله في الزراعة في الاخر خليت الروضة ودوني خلوة عمنا عبدالله ود الفقير حياه الله وحفظه ...اداني الشهور القبطية (برمودا وكيهكي وماعارف شنو كده ... قلت لي ابوي قلت له الزول ادانا كلام (اطرق اطرق) وما فهمته ...قال لي شيل منجلك واندلاك
الغريبة مما خشيت المدرسة مااسك الاول لمن خلصت الابتدائي والمتوسط ما حصل جبت تاني الفصل زاته .....
اها ما بنفع مساعد رئيس
Post: #27 Title: Re: أين درست الروضة؟ Author: سيف النصر محي الدين Date: 12-01-2011, 08:44 AM Parent: #25
يا عرفه ممكن تضيفي لقائمة العناوين كمان - ايام دراستي في روضة مما راقية و لم يكن في جيبي غير جوز جنيهات. - ماما راقية مان تو مان.
Post: #29 Title: Re: أين درست الروضة؟ Author: سيف النصر محي الدين Date: 12-01-2011, 08:54 AM Parent: #27
Quote: انا ما درست روضة
قريت خلوة بس
جيمي خلوة دي ما بتأكلك عيش يا اخوي، سيرتك الذاتية تقدمها لناس ديوان الزكاة لعل و عسى. بعدين ماما راقية دي ما سمعت بيها و للا شنو ؟
Post: #32 Title: Re: أين درست الروضة؟ Author: سامى عبد الوهاب مكى Date: 12-01-2011, 09:23 AM Parent: #29
Quote: ايام دراستي في روضة مما راقية و لم يكن في جيبي غير جوز جنيهات.
غايتو زي ما قلت في بوست تاني انا قريت في روضة الشهيد أورتشي بس كنا ممنوعين من السياسة ومسموح (تجكس) أبرز إنجازاتي مشيت خطبت بت الكوارتا.
Post: #30 Title: Re: أين درست الروضة؟ Author: العوض المسلمي Date: 12-01-2011, 08:55 AM Parent: #27
مادام التعيين بقي حسب الروضة فالموضوع يا دكتور سيف ما بقسم معاي اخوك زول حلوة وبس !! بس ليك علي ما اخلي طفل من اطفالي الا ادخله الروضة واوثق ذلك بالصور ..
Post: #31 Title: Re: أين درست الروضة؟ Author: عبد الدائم سيد أحمد Date: 12-01-2011, 09:10 AM Parent: #30
اضيفى للعناوين يا عرفة فيضان بحر ابيض يكسر سور روضة بالكلاكلة القبة ( توجد صور ) كم صوورة كده من اللفة لاطفال يأكلو شطة و عجور .
يا سيف لو كنتو استقريتو فى المزاد ولا برى الوصول للقصر الجمهورى كان حيكون اسرع ... هسه انتا لو عايز تمشى المطار من الكلاكلة لازمك 5 ساعات قبل الاقلاع ..
Post: #33 Title: Re: أين درست الروضة؟ Author: بله محمد الفاضل Date: 12-01-2011, 09:28 AM Parent: #31
النصيحة ناس خلوة ساكت مسعلة روضة دي إلا ملاحق ولا نشوف طريقة للوليدات وننوع في الرِوض...
سلام دكتور وكويس محصن رقبتك والله المسعلة بسطتنا تب بس أطعن لافوق حدوت الرئاسة وكدا ما تعاين للشيوير وكدا...
Post: #34 Title: Re: أين درست الروضة؟ Author: انعام حيمورة Date: 12-01-2011, 09:47 AM Parent: #33
نحن ناس :
ووين ووين يا ماما ايامنا الحلوة الحالمة فاتت كدة بي سرعة كنًا جناحا حماما (والايدي ترفرف)
سلامات يا سيف ..
تاري انا امبارح حلامانة بي مظاهرات كاربة تاريها الدنيا مقلوبة ..
Post: #35 Title: Re: أين درست الروضة؟ Author: عبدالكريم الامين احمد Date: 12-01-2011, 09:49 AM Parent: #33
اناماعارف يا سيف الزول لو قرا في خلوة فكي( قوبي) ممكن يتعين مستشار رئيس بتاع شئؤون دينية واوقاف ولا الحكاية دي فيها ملعوب
Post: #36 Title: Re: أين درست الروضة؟ Author: عبدالله الشقليني Date: 12-01-2011, 10:03 AM Parent: #35
.
وداعاً روضتي ...
*
Post: #37 Title: Re: أين درست الروضة؟ Author: بريمة محمد Date: 12-01-2011, 10:30 AM Parent: #36
مادام الروضة تدخل فى ال cv وشخصى الضعيف راعى غنم ساكت ذى أخوى حسين نوباتيا من الأن قررت أرجع وأدرس الروضة حتى لو يومين فى نهاية الأسبوع
------------------------------------------- الكلام دا عشان نطور ال cv .. ونبقى مساعد حاجة إن شاء الله مساعد سواق عربية
بريمة
Post: #39 Title: Re: أين درست الروضة؟ Author: قيقراوي Date: 12-01-2011, 11:18 AM Parent: #37
Quote: سلامات يا عادل مشكلتك أنك عكست الأمور و حركتك كانت في عكس حركة التاريخ السوداني أي من المركز للاطراف و ده ممكن يعطل حصولك على منصب المساعد، لكن ممكن يشغلك في وزارة الطاقة
لوووووووب
عكس الامور ما بتعرفو كان كدا يا دكتور!
انا قريت خلوة الشيخ عبد القادر دينق في القيقر ثم ابتدائيتها، و فابتدائية نمرة 9 في كوستي .. ثم خلوة جامع الختمية في الحلة الجديدة كوستي
اها بتدونا مساعد ياي و لّ المهمشين الا يشيلوا سلاح حتن يتعينوا مساعدين للرئيس!؟
-------
برضو تقولوا لي مافي مؤسسة جلابة!؟
جعفوري دا قدر اللمين اخوي السغير.. و دا قرأ (كمبوني) عديييل! اها كان ما اتعين يبقى الشغلة فوقا ملعوبية تب!
Post: #40 Title: Re: أين درست الروضة؟ Author: نجاة محمد بابكر Date: 12-01-2011, 11:31 AM Parent: #33
انا درستا فى الروضة الدرس فيها عمو محمد ابوالعزائم بالرغم من انى اصغر منو ب 15 سنة لكن روضتنا واحدة هى روضة برى المحس
Post: #38 Title: Re: أين درست الروضة؟ Author: ismeil abbas Date: 12-01-2011, 11:03 AM Parent: #30
ألأخ/سيف...........لك التحية ..كان كده أنا مؤهل تأهيل شديد خلاص.
أولآ قريت خلوة قبل الروضة فى خلوة أبوى الشيخ/محمد زين إبراهيم التى تأسست عام 1948 غرب ميدان الربيع بالعباسة..وعشان الخلوة حقتنا كان ما بدقونا لآن خلوة خالى والخال والد.
عندما رحلنا لأمبدة قبل دخول ألأبتدائى دخلت روضة ست زينب بأمبدة جنوب السبيل..مازالت ست زينب على قيد الحياة الله يمتعها بالصحة والعافية..
كل ما أمر بالقرب من الروضة أعتز وأفتخر أمام بناتى وأولادى بأن هذا المكان كان له دور فى نشأتى وتشكيل شخصيتى..
شكرآ لآتاحة الفرصة لى للتعبير عن زمن بعيد كم أهوى الحديث عنه....وأتمنى أن تتاح لى الفرصة أيضآ لآكتب عن ألأستاذة المذيعة القديرة/سعاد أبوعاقلة وذكريات ألأذاعة وركن ألأطفال وعمكم مختار
احمدك يارب انك وانا صغير اعطيتني ماما وبابا البحبوني موت واحمدك الهي انه الكورنفليكس والنيدو زالسيريلاك كان متوفر اربعة وعشرين ساعة في الديب فريجر بتاعنا واشكرك يا ربي انه ماما ما كانت بتسمح لي باللعب مع الاولاد المتوحشيين الاولاد الماعندهم جاكوزي في بيوتهم وبيطلعو الشارع وهم ما فاطرين زيي وزي تامر اخوي وريماز اختي وكمان ماعندهم tv وكانوا بيخالطوا المجتمعات كلها عاليها وسافلها الحمد لله بابا ما كان بيسمح لينا نخالط الناس من طرف وبيقول لينا دايما خالطوا الفي مقامكم يا ابنائي الحلوين الصغننين.. وامممممممح ماما تطرقع لينا في خدودنا الموردات ببوسة حلوة
دي صورة لماما سهى وماما إلطاف وماما نادية وهم ماشيين في طريقهم لروضتنا الحبيبةروضة عصافيرالربيع اللي اتخرجنا فيها انا واخوي تامر واختي ريماز سنة 1987م مع العلم يعني اني من مواليد 1982م وكملت باقي تعليمي بايطاليا واتخصصت فن ديكور وميك اب ...
اما الوحشيين دولك الكانوا بيرعو الغنم والخيل وبيشربو من الترعة فبقول ليهم يا وحشيين يا وحشيين ،،،
والنشيد دا كنا بنقراهو دايما لضيوف بابا وماما وهم بيسالونا درستو شنو يا شاطرين في الروضة
لما كنت صغير بلعب في الموكيت ماما لبستني الجينز والتي شيرت مشيت للأفندي درسني انترنت ناكل إيه ؟ ناكل شيبسي نشرب إيه ؟ نشرب بيبسي نبكي كيف؟ يا ماااااامّي
Post: #48 Title: Re: أين درست الروضة؟ Author: سيف النصر محي الدين Date: 12-01-2011, 02:50 PM Parent: #46
Quote: اما عن شخصى الضعيف درسته من منازلهم روضة حنان الأم...تنفع ولا لا؟
دي في الدناقلة شمال و للا جنوب يا نجاة؟ غايتو من اسمها كده تنفع و نص و خمسة.
Post: #49 Title: Re: أين درست الروضة؟ Author: عزان سعيد Date: 12-01-2011, 09:37 PM Parent: #48
في داعي تحرجونا يا سيف ياخي ؟
أنا مشيت الروضة يوم واحد بس، جيت شارد في نفس اليوم وما رجعت أبدا . . الغريبة لمن الجماعة سألوني ابيت الروضة مالك؟ قلت ليهم :"الفراشة -بتشديد الراء- شينة"!
هل يعني هذا أنني غير مؤهل لتولي أي منصب حكومي؟!
Post: #50 Title: Re: أين درست الروضة؟ Author: حسين نوباتيا Date: 12-02-2011, 07:46 PM Parent: #49
كــــــــــلابنا الضالة سلام
مساعد محلية بدين بتاع شنو يا سيف ياخ اخوك كان بكون ماسك فوق للخمسين من الخراف والماعز بطلع من الصباح وبرجع مع المغرب ومافي خروق دخلت فيهو شوكة بكونوا ماكلين وشاربين وفرحانين والكورجة دي كلها ما في حمل برضع من غير اذني.. والله حقو يدوني وزارة الدفاع او وزارة التربية والتعليم:)
سفيان والله كلامك سمح بس بعدين تقيف مع اخوك في حروب الردة وكان اخوك لحّقوهو الاستاذ اصولو ما معافي ليك وبريمة والكونت ديل بعينهم خلفاء
قولك بعد السووها الكيزان ديل في زول بخش معاي:)
Post: #51 Title: Re: أين درست الروضة؟ Author: احمد ضحية Date: 12-04-2011, 07:57 AM Parent: #50
(*)
Post: #52 Title: Re: أين درست الروضة؟ Author: سيف النصر محي الدين Date: 12-04-2011, 10:06 AM Parent: #51
Quote: مولود فى (منشية )ام الطيور (سيتى)
يلا بعد داك درست روضة ام الطيور( سيتى) بعدين الاعدادى فى ام الطيور ( هاى) وتانى الراهبات ..(حالة) خاصة.شان بابا وكده
معاوية الحمدلله ما درست الجامعة في كدباس يونيفيرسيتي.
Post: #53 Title: Re: أين درست الروضة؟ Author: سيف النصر محي الدين Date: 12-04-2011, 10:11 AM Parent: #52
Quote: تخيل جننننبلغ كده خشيت المدرسة طوالي
عارف يا محمد جلال لو قدمت طلب لشغل وظيفة مساعد رئيس غالبا طلبك حيرجع لعدم استيفاء الشروط! الروضة اساسية يا رعاك الله.
Post: #54 Title: Re: أين درست الروضة؟ Author: سيف النصر محي الدين Date: 12-04-2011, 10:16 AM Parent: #53
Quote: لكن انا نفسي شربت قهوة في السوق زي تلاتة مرات واتونست مع المواطنين عااااادي اها ادعموني ينوبكم ثواب
ما شاء الله يا احمد موسى سيرة ترفع لها القبعات و العمم و لكنها للأسف غير كافية و لو دعمناك بنكون خالفنا ضميرنا. كيف ما تتذكر الروضة و هي أهم مراحل الحياة؟
Post: #55 Title: Re: أين درست الروضة؟ Author: فيصل محمد خليل Date: 12-04-2011, 12:44 PM Parent: #54
Post: #56 Title: Re: أين درست الروضة؟ Author: سلمى الشيخ سلامة Date: 12-04-2011, 06:38 PM Parent: #55
يا سيف نحنا قرينا فى خلوة السيد البدوى ولمن حبوبة لقت الفكى بجلد فينى الفلقة مرقتنى منها لكن بعد حفظت الاجزاء الاولى كلها لغاية "قد سمع" وبعد داك مشيت روضة ست وهيبة فى شارع الاربعين فى العباسية انفع اكون نايبة ريس مركب غرقانة مش؟ تحياتى
غايتو انا يومي كله كنت بقضيهو في «كفاي الجداد» أليلنا كان عندنا ديك تقيل جرح ضهور الجداد كلهن كنت بديهو نص ساعة وارجع اسجنه تاني
Post: #58 Title: Re: أين درست الروضة؟ Author: سامى عبد الوهاب مكى Date: 12-05-2011, 06:00 AM Parent: #57
Quote: غايتو انا يومي كله كنت بقضيهو في «كفاي الجداد» أليلنا كان عندنا ديك تقيل جرح ضهور الجداد كلهن كنت بديهو نص ساعة وارجع اسجنه تاني
حرام عليك يا راجل سببت للديك كبت.
Post: #59 Title: Re: أين درست الروضة؟ Author: maia Date: 12-05-2011, 07:25 AM Parent: #58
Quote: فقد درست الروضة في أكثر من مكان نظرا لظروف الايجار و اصحاب المنازل الجشعين اولا ببحري المزاد و قد ظهرنا بالتلفزيون مع بابا فزاري و قدمنا نشيد شهر مايو يا أحلى شهر"كان أحلى شهر ما عارف". ثم بعدها بامتداد ناصر و قد كانت روضة على مستوى جيد
الاخ دكتور سيف
وجود روضة بابا فزاري وامتداد ناصر في السي في بتديك كريديت تبقا المندوب الدائم في الامم المتحدة
وتدخل مجلس الامن
Post: #60 Title: Re: أين درست الروضة؟ Author: سيف النصر محي الدين Date: 12-05-2011, 08:05 AM Parent: #59
Quote: محمد المشرف يكلمنا عن روضة ماما راقية، وناس يجوا يقولوا (خلوة الفكي المبارك)؟ ..... وبعد ما (يطلقوهم البيوت) تلقى الواحد حايم بي سروالو من دافوري لي (سكج مكّج).
سلامات يا ابو العزائم سكج مكج دي في الخرطوم اصلو ما شفتها و لكن لما كنا نمشي عطبرة في الاجازة كانت اللعبة الاكثر شعبية في شواراعها. فهل انت من عطبرة؟
Post: #61 Title: Re: أين درست الروضة؟ Author: معاوية الأرباب Date: 12-05-2011, 08:18 AM Parent: #58
الروضة الوحيدة التي كنت أعرفها وأمشي ليها يوميا في طفولتي هي خالتي الروضة بت الضواها ود التنقليل , الله يطاها بالخير فقد كانت تبيع الفول والتسالي والقنقليزوفي الخريف كانت بتقلب عنكوليب وتبش بالشطة والليمون .
يا دكتور سيف يبدو لي أني حأكون مناسب جدا لمنصب مساعد الرئيس لشؤون تأصيل وتحسين سلالات العنكوليب والتبش .
Post: #62 Title: Re: أين درست الروضة؟ Author: سيف النصر محي الدين Date: 12-05-2011, 08:46 AM Parent: #61
Quote: رحم الله ماما نفيسة
فلا اظنها كانت تعرف حقوق الملكية الفكرية
يا ود الخليفة مابين ماما راقية و ماما نفيسة الحالة واحدة . سلامي لك و لصديقك.
Post: #63 Title: Re: أين درست الروضة؟ Author: محمد الكامل عبد الحليم Date: 12-06-2011, 06:37 PM Parent: #1
تحية الي عزيزنا دكتور سيف...
بعدتفكيك السؤال وحذف اي استشكال ينم عن استعلاء طبقي...او واقع تجد فيه البرجوازية الصغيرة ضالتها..فان مفهوم الروضة هو استبدال حميد للخلوة وما ادارك ما الخلوة...في منحني النيل في الشمال قريتي وخلوتي وشيخي وحبيبي مولانا (الحسن محمد خير) تغشاه الرحمة وهو في عليين..درسنا الحب واكلنا الحب..تعلقنا بالبيئة والجروف وحملنا المنجل وغرسناه منذ ذلك الزمان في الارض..امنا الرؤوم...وقفنا خلف ابائنا عند الدميرة وفي الاعياد وفي الاحتفاء بموتانا...ودخلنا الدارة خلف كبارنا وهم ياخذون الشبال علي نغم يطوي الليل ويسرجه انوارا...وحشينا القش لمعزاتنا الاليفات وسميناهن باسماء اخواتنا...وكانت كل بنت هي اختنا الكبري او الصغري وكل اب هو ابونا...اصحابنا وقتذاك هم اصدقاء اليوم وكنا بهم ولا نزال كالبنيان المرصوص وفاءا..
رحلتنا في حب الناس لازلت مستمرة...
Post: #64 Title: Re: أين درست الروضة؟ Author: سيف النصر محي الدين Date: 12-06-2011, 07:00 PM Parent: #63
Quote: أنا قريت الروضة في السيالة القديمة. روضة شيخنا عبد الوهاب ود علي.
يا ود المدير علك طيب ياخي الباوقة على ما اذكر كان فيها رياض اطفال، على الأقل عندنا في الجرانيس كان في واحدة و الغريبة انها قريبة من الخلو الفي بيت ناس كرم الله.لكن ود علي ده ما عندنا فيهو كلام.
Post: #65 Title: Re: أين درست الروضة؟ Author: سيف النصر محي الدين Date: 12-06-2011, 07:13 PM Parent: #64
Quote: نوباتيا بطل طرطشه و اطلع من هنا افتح بوست برااااك انت موهل نبي بشغلتك دى
يا سفيان في امريكا دي ممكن يعلن نفسو نبي مرسل او اله حتى بدون اي مشاكل ياخي ديل عندهم زي كم مية نبي كده و هم لسه تاريخهم ما قفل ستمية سنة.
Post: #66 Title: Re: أين درست الروضة؟ Author: سيف النصر محي الدين Date: 12-06-2011, 07:31 PM Parent: #65
Quote: نطمع فى الا جرين وكان حتلت يكفينا اجر السلام وكان نوباتيا لقيتو له الخلفيه نجيبو له شوك الزريبه
سلامات يا موسى يا راجل يا حليل ايام قطر حلفا ياخ. غايتو الفهمتو من كلامك انك زي اخونا نوباتيا كنت زول سعية ساااكت فبرضك زي اخوك نوباتيا ده بنشوف ليك معتمدية!
Post: #68 Title: Re: أين درست الروضة؟ Author: سيف النصر محي الدين Date: 12-06-2011, 08:53 PM Parent: #67
Quote: قال لي شيل منجلك واندلاك
التحية ليك و للوالد الكريم يا كونت.
Post: #69 Title: Re: أين درست الروضة؟ Author: طارق جبريل Date: 12-07-2011, 00:06 AM Parent: #68
Quote: حرام عليك يا راجل سببت للديك كبت
Post: #70 Title: Re: أين درست الروضة؟ Author: Walid Safwat Date: 12-07-2011, 01:12 AM Parent: #69
Quote: نشيد الروضة بتاعنا كان: حا جا بلف حيجب يا و ألف...
هيهيهيهي
Post: #71 Title: Re: أين درست الروضة؟ Author: Tragie Mustafa Date: 12-07-2011, 04:09 AM Parent: #70
سلام يا د.سيف وكثر خيرك عرفتنا على جانب مهم من شخصيات البورد!
اها انا دخلت في روضه طوكر لا اذكر لها اسما لاني اعتقد بانها كانت الوحيده,جميله ومرتبه ومليانه لعب بس فيها بنت بتقرصنا اسمها (كوثر) ومافي زول كان قادر يشتكيها للملعمات الا انا اصغر واحده اشتكيتها ووقفتها عند حدها.ذكرياتي ضعيفه عن الروضه لاني بعتقد باني كنت صغيره شديد....ودخلت المدرسه باكر لاني بنت معلمه اي بديت قبال السنه القانونيه.انفع مساعد حله يا ربي.
Post: #72 Title: Re: أين درست الروضة؟ Author: الصادق الزين Date: 12-07-2011, 06:27 AM Parent: #71
انا درست فى خلوة الفكى صالح فى و سط حلتنا! كنا فى الشتاء بنفزع نجيب الحطب عشان نوقد نار المسيد
الفكى صالح رحمة الله عليه, كان دوما بقرا سورة و انت حل فى هذا البلد والله صحى!
اظن انفع ابقى مساعد رئيس مش يا سيف؟ ولا رايكم شنو فى طريقة مناوى لتصبح مساعد رئيس؟ كمان دى بتبقيك كبير المساعدين فت مرة على الحناكيش ديل!
Post: #73 Title: Re: أين درست الروضة؟ Author: عادل نجيلة Date: 12-07-2011, 07:27 AM Parent: #71
الزميل سيف النصر .. تحية طيبة .. والدي رحمة الله عليه كان رجل علم و تعليم .. وبالمناسبة هو الذي وقع عليه الإختيار لتدريس أبناء آل الميرغني في مدرسة الأشراف ببحري ومن تلاميذه السيد محمد عثمان الميرغني و شقيقه الراحل المقيم السيد أحمد الميرغني رئيس السودان الأسبق .. حينما دنت سنوات عمري من الخامسة وكنا نسكن ساعتئذ في الهاشماب أمدرمان في منزلنا الفاتح بابه على شارع الموردة والدايات توقعت أن يتم تسجيلي أنا و شقيقتي أميرة في روضة ست نفيسة الكائنة في الهاشماب قرب المسجد ولكن سجلنا في روضة (فاطمة سلك) في حي العباسية منطقة أم سويقة .. ولم أكن أفهم هذا الأختيار وأنا طفل ذو خمسة أعوام إلا بعد أن دخلت الروضة المعنية ..فلقد كانت روضة فاطمة سلك أشبه بالمدارس ففيها فصلان والدراسة فيها لعامين .. فصل للخامسة أعمارهم و الفصل الآخر التمهيدي للأطفال في السادسة من أعمارهم .. روضة فاطمة سلك رحمها الله كانت أشبه بالمدارس الحكومية فهي تعطي ثلاث حصص في اليوم عربي دين ورياضيات .. كانت المرحومة فاطمة سلك أستاذة قوية الشخصية ذات صوت مسموع وعال تحمل في يدها سوطآ من العنج ولكنها لم تستعمله إطلاقآ .. كنا نرهبها و نحبها كانت تقدم لنا الإفطار المكون من ساندوتشات الفول والجبنة والساردين والبيض بالجبنة والتحلية طحنية مربة و عسل أو فواكه مثل الموز و البرتقال.. كانت الحصص تبدأ في الثامنة صباحآ و تنتهي في الحادية عشر والنصف .. تعلمنا من روضة فاطمة سلك الكثير وعلى مدى عامين وحينما دخلت مدرسة الموردة الأولية كنت أضحك من سهولة المواد من رياضيات و عربي ودين لأنني قد أخذت معظم هذه الموات من ألف البا ياء وحفظ صور جزء عم و الجمع و الطرح والأناشيد في روضة فاطمة سلك .. ومن زملائي و زميلاتي في هذه الروضة أذكر بدالردين موسى وأشقائه و ناجي عباس قدح الدم وعادل عبدالرسول وأشقائه وخالهم الفنان شرحبيل أحمد و الطيب الفاتح الطيب و إلشقيقتان إيمان وإخلاص ختر وإيمان عباس وإصلاح وهدى بخاري .. وطلال التجاني عبدالحليم .. كانت أيام جميلة قضيناها ولعامين في روضة فاطمة سلك ولقد جمعتني الحياة العملية فيما بعد التخرج بإصلاح بخاري زميلة الروضة التي أصبحت زميلتي في بنك الخرطوم أما هدى بخاري فلقد أصبحت محامية وإيمان ختر أصبحت صحفية وعادل عبدالرسول مهندسا وناجي عباس قدح الدم إقتصاديا .. وبدالردين حسن موسى أصبح أنجحنا بعد أن سلك التعليم المهني وتم إبتعاثه لألمانيا بواسطة التدريب المهني في الخراطة وعاد ليفتتح مسبك أمدرمان المركزي. بالمناسبة يا سيف النصر أنا وشقيقتي أميرة كنا أعضاء في كورال بابا فزاري من ضمن برنامج جنة الأطفال التلفزيوني إيام المرحومة رجاء أحمة جمعة ماما رجاء ومن الأناشيد التي قدمناها (صاح الديك فوق الدك كوكو كوكو قال الديك ) ومثلنا فقرات عن البيت تحكي تعامل الأسر مع أطفالهم رحم الله بابا فزاري وماما رجاء و ست فاطمة سلك.
Post: #74 Title: Re: أين درست الروضة؟ Author: سيف النصر محي الدين Date: 12-07-2011, 08:55 AM Parent: #73
Quote: غايتو زي ما قلت في بوست تاني انا قريت في روضة الشهيد أورتشي بس كنا ممنوعين من السياسة ومسموح (تجكس) أبرز إنجازاتي مشيت خطبت بت الكوارتا.
سلامات يا سامي روضتكم دي برضو جمب سلاح الذخيرة زي مركز صحي الشهيد اورتشي؟ ادائك في الروضة يؤهلك لوظيفة المساعد بدون شك، خصوصا اذا وضعنا جزئية الكوارتا دي في الاعتبار.
Post: #75 Title: Re: أين درست الروضة؟ Author: سيف النصر محي الدين Date: 12-07-2011, 09:00 AM Parent: #74
Quote: اخوك زول حلوة وبس !! بس ليك علي ما اخلي طفل من اطفالي الا ادخله الروضة واوثق ذلك بالصور
سلامات يا حاج العوض غايتو فاتت عليك، بس كويس انك مفكر تستثمر في الاولاد. و بالمناسبة ده هو عين ما فعله السيدان ، فما تستغرب بعد ده لو ناديناك السيد العوض LOL
Post: #76 Title: Re: أين درست الروضة؟ Author: سيف النصر محي الدين Date: 12-07-2011, 09:04 AM Parent: #75
Quote: لو كنتو استقريتو فى المزاد ولا برى الوصول للقصر الجمهورى كان حيكون اسرع ... هسه انتا لو عايز تمشى المطار من الكلاكلة لازمك 5 ساعات قبل الاقلاع .
يا عبد الدائم يا نضيف الكلاكلة دي طلعتنا بره التاريخ، لكن مع ده برضو بنحبها.
