الصائمون في العالم الغربي..مشاعركم كيف لما تشوفوا الناس الفاطرين؟؟

في الدول العربية و معظم الدول الاسلامية و مع بداية شهر الصوم تتكاثف جهود الناس
و الاجهزة الرسمية في مراقبة الناس و التأكد من التزامهم بالصوم فتغلق المطاعم و محلات
المشروبات و يتعرض من يجاهر بالافطار للويل و الثبور و ربما الاعتقال و المحاكمة.
و من المعروف أن الله سبحانه و تعالى عندما فرض الصوم منح غير القادرين من المرضى
و كبار السن و كل من لا يطيق الصوم رخصة بالافطار ، و من المعلوم أن هناك الملايين من غير
المسلمين يعيشون في كنف الدول ذات الاغلبية المسلمة و هم مجبرون على ترك الأكل و الشرب
في نهار رمضان علنا على الأقل فاذا ما اراد الواحد منهم أن يأكل أو يشرب فليس امامه
إلا أن يفعل ذلك خفية هذا إن وجد ما ياكله أو يشربه اصلا.
الحجة الاساسية في هذا السلوك هي الا يؤذي المفطرون مشاعر الصائمين ، طيب يا ناس امريكا
و كندا و هولندا و بريطانيا و هلمجرا كيف تحسون عندما ترون الناس من حولكم بين آكل و شارب؟
و هل منظر الناس و هم مفطرين يؤذي مشاعركم؟؟
و ما هو هذا الأذى الذي يلحق بالمشاعر المرهفة؟؟
افيدونا حتى نعلم إن كانت حجة الناس هنا valid or not.

والله يا د سيف

اظنو حااااااار

كدى نتظر تبارك ومن شاهده ردة فعله


سلام

الأخ سيف النصر ..
والله انا برضه كنت بسأل نفس السؤآل عن كيف تكون مشاعر الصائمين فى بلاد غير اسلامية ؟ وكنت اقول ان هؤلاء الصائمين وطالما انهم قد صاموا رمضان ايمانا واحتسابا وعن يقين حقيقى بأداءهم لتلك الفريضة والله لو جمعوا لهم ما لذ وطاب من اكل او شرب لما اهتزت مشاعرهم قيد انملة لأن المسألة كما ذكرت آنفا هى مسألة قناعة وايمان ..
اما الذين يأخذون من الدين قشوره والذين يبصقون فى الشارع بكل جلافة وبلا ادنى احساس او مراعاة لشعور الآخرين واولئك الذين يلوكون المساويك بكل قرف فى المواصلات العامة وفى الشارع ولسان حالهم يقول (شوفونى انا صايم) فللأسف ان امثال هولاء واولئك هم من يقبضون على الأمور فى هذا البلد وهم الذين حولوا شهر رمضان من شهر للرحمة والتراحم الى شهر بغيض وذلك بتضييقهم على من اباح الله سبحانه وتعالى له الفطر فى رممضان من مريض ومسافر وطفل وشيخ كبير (ولى تجربة مؤلمة فى هذا الصدد) وذلك بأقفالهم لمحلات الأكل والشرب بأدعائهم بأن فتح المطاعم والكافتريات يوذى مشاعر الصائمين , ويعلم الله ما هو كذلك لمن صام رمضان ايمانا واحتسابا. ولكن ماذا نفعل لتلك العقلية التى تعتقد بأنها تفهم فى الأسلام اكثر من الرسول (ص) ذات نفسه والعياذ بالله من امثال هؤلاء المتأسلمين المتنطعين والمتشددين الذين حولوا شهر رمضان شهر الرحمة الى شهر من المعاناة والمكابدة والعناء .

سلم فومك أخي قلقو

ــــ
وكثيراً ما تضمنا معهم إجتماعات أو تنويرات وبجانبنا مساحة خُصصت لما ألز الز الز من الفطائر
والمعجنات والكوكي وبالسكويتات وشرائح البيتزاء المشكلة الجاهزة للماكرويف والعصائر بأنواعها ،
والكوفي وفتلات الشاي الأخضر منه والأحمر والشكولاته واللبن
وعند الإقبال عليها
تجد نفسك بفخر
تقول sorry I'm fasting
شعور جميل يتحول بعده {البِرك} لأسئلة كثيرة
تتخللها الـ WOOOWات
وانت تحدثهم عن بداية يوم الصيام
وحتى الأفطار والحرمان من{ كلو} حتى من قهوة ساخنة وسجارة
تخفف عليك عزابات الشتاء والبرودة الداخل في العضم دي !

والـ WOOOWات مستمرة ..

وإنت لسة مدورة ..

وينتهي {البِرك} لينتصف اليوم


شعور لذيذ غايتو ..



ورمضان كريم للجميع

والله حالتكم صعبة عديل ياودالجزولي
يعني انت هسي ماعارف زاتو
تتحمل رمضان
ولا البرد
ولا WOOOOOOOOW
ولا الشكلوتة ولا اللبن
ولا السيجارة






ياخ كامل تضامني معك والله ياصديقي
أجر وعافية
عاد نقول شنو ؟

سيف ياصحبي
ازيك ورمضان كريم

ياخ بالنسبة لسؤال البوست افتكر انو ما بشملنا كسودانيين وانا ماعارفك ليه بس جريت علي
العالم الغربي ـ وحياتك ياسيف انا ده واحد من الناس التعبان تعب شديد جداً مع الناس الفاطرين
في العالم الشرقي ده ـ يعني ريحة الشية دي تجي تغتالك الساعة 10 ونص الساعة 11 تشم في ريحة الجبنة
لامن الله يغفر ليك أها من النهار يجي تدور الخلاطات بتاعت البرتكان والمنقة والجوافة والناس داخلة بي
كورة وطالعة بي فورة ـ يخ والله انا بالطريقة دي حأستشهد عديل


ـــــــ

أكتب الان والروائح مالية الفجة

دكتور سيف سلامات
كل سنه وانت والاسره بخير وعافيه

يااخوى انت رجعت من هنا ولا شنو؟

طبعا الاخ قلقو ما خلى لينا تعليق الا اود ان اضيف بان هنا مسلمون يعملون فى مطاعم
يوزعون الاكل لهؤلاء بايديهم وهم صيام وطبعا انت عارف انواع الاكل هنا ،كل ما لز وطاب
انا شخصيا ما بتحرك فينى شعره والعقيده بتلعب دور كبير جدا ،،وغير الاكل هنا فى شباب مسلمين
غير متزوجين يعملون فى مجالات عده يتعاملون مباشرة مع الكاسيات العاريات ولا حتى يرفعو عيونهم
عليهن

تحياتى

رمضان كريم للجميع

الحتة التحت دى

Quote: يتعاملون مباشرة مع الكاسيات العاريات ولا حتى يرفعو عيونهم عليهن

دى ياها زاتة المجننه بوبى ياخى مرات كدة ظروف الشغل توديك محلات واللة لو غمضت عيونك ما بينفع عارف مرات الواحد يمشى زى
الشايلو حمار النوم مغمض ويطس فى الخلق دى كلها وبرضوا ما نافع
عشان كدة يا زول تانى نهى صيام بره السودان يا دكتور سيف الناس دى ما بتختشى تب
اما الاكل والشراب صدقنى ما مشكلة كبيرة لانو الجو زاتو بارد والناس متعودة على الاكل بعد الرجوع للبيت فى المساء علا السجائر
بيجيب كثافة الزول تب

ربنا يعودا علينا وعليكم بالصحة والعافية ِ

د سيف ازيك

Quote: الصائمون في العالم الغربي

في العالم الشرقي كيف ؟؟؟
ايام الدراسة ونحن في عز رمضان جايين من الدراسة ومعاي زميلة سودانية جالدة الشهر كلو وبتاكل في ايسكريم
المهم الدنيا كانت حر والروس ديل في الحر لبسهم صعب خلاص المهم اخوك مرات بجر نور طويل وبستغفر
اها هي لمن شافتني كدة قالت لي امشي جيب ليك ايسكريم وتعال صيامك ده من حتتو دي ما قايم
تقول لي غير المسلمين

والله العظيم يادكتور سيف

لا تاثر فيني هذه المناظر

ولو رجعت السودان واصبحت من اهل الراي

لتركت المسافرين والمرضي والصغار يدخلو المطاعم

لتناول وجباتهم دون اي اعتراض

طالما الصيام مقصود به وجه الله فهذه المناظر لا تؤذي احد

.
سلامات يا سيف و ضيوفو
الشارع ما بديك الفرق الحقيقي
لكن زملاءنا الخواجات كانوا بيحترموا مشاعرنا في رمضان أكثر من "بعض" السودانيين هنا في الخرطوم!!

يعني هو فاطر، لو غير مسلم أو (متطوّر) لدرجة لا تلزمه بالدين، في الحالين المفروض يمشي بي سيجارتو بعيد مني..و يشرب شاي الصباح دة في مكتب طرف..لكن المسألة أحيانا فيها عمدية ممعنة في الغباء!

.

مهم

العزيز د. سيف كل سنة وإنت طيب
والله لا بؤذوا المشاعر ولا يحزنون، والعايز يصوم دا بصوم في أي جو
ما في ناس بتصوم في غير شهر رمضان برضو ما بتأثروا، وبعدين ماشي
بعيد ليه؟ السودان الواحد دا العايز يفطر بفطر عينك يا تاجر والعايز
يصوم برضو بصوم، وحقو الدول البتشدد في مراقبة غير الصائمين أن تترك الخلق للخالق
ونبذ الديكتاتورية دي

رمضان في الغرب خلي ساكت 17ساعه والشارع خلي علي الله بس ربنا باجرنا يا الاخ سيف

Quote: اما الذين يأخذون من الدين قشوره والذين يبصقون فى الشارع بكل جلافة وبلا ادنى احساس او مراعاة لشعور الآخرين واولئك الذين يلوكون المساويك بكل قرف فى المواصلات العامة وفى الشارع ولسان حالهم يقول (شوفونى انا صايم) فللأسف ان امثال هولاء واولئك هم من يقبضون على الأمور فى هذا البلد وهم الذين حولوا شهر رمضان من شهر للرحمة والتراحم الى شهر بغيض وذلك بتضييقهم على من اباح الله سبحانه وتعالى له الفطر فى رممضان من مريض ومسافر وطفل وشيخ كبير (ولى تجربة مؤلمة فى هذا الصدد) وذلك بأقفالهم لمحلات الأكل والشرب بأدعائهم بأن فتح المطاعم والكافتريات يوذى مشاعر الصائمين , ويعلم الله ما هو كذلك لمن صام رمضان ايمانا واحتسابا.

شكرا جزيلا يا قلقو فقد نجحت في تصوير الأمر كما هو بالضبط .

Quote: شعور لذيذ غايتو ..

لازم يكون كده يا محمد الجزولي..يعني اذا كان الصوم هو اختبار لقدرة الصائم على ترك كل ما يشتهي خلال النهار و هو اختبار للارادة
و قوتها ، كيف حيكون فيهو تحدي اذا الجماعة عاملين ليك تسهيلات كبيرة و مجتهدين في منع اي شئ متحرك من أن يشرب او يأكل!
زي حقكم ده هو الاختبار الحقيقي.

Quote: الشكلوتة

يا هدر هسين..الشكلوتة دي على ايامنا كانت حاجة بخوفوا بيها الشفع .

Quote: يعني ريحة الشية دي تجي تغتالك الساعة 10 ونص الساعة 11 تشم في ريحة الجبنة لامن الله يغفر ليك أها من النهار يجي تدور الخلاطات بتاعت البرتكان والمنقة والجوافة والناس داخلة بي كورة وطالعة بي فورة

انت في السودان ده سكنت وين يا خضر؟
يبدو أن حلتكم تعج بالمنافقين يا اخا النوبة ، اوصيكم بتشكيل هيئة للأمر بالمعروف و النهي عن المنكر لتأخذوا على ايدي هؤلاء الفسقة.
شية و جبنة في نهار رمضان !! و الله يا خضر أنت ناس العالم الغربي بالنسبة ليك في نعيم عديل كده .

سلامات يا خيري بخيت
انا بلدكم ديك اتخارجت منها قبل رمضان بكام يوم كده بس خليت ليكم الاولاد .

Quote: ،وغير الاكل هنا فى شباب مسلمين غير متزوجين يعملون فى مجالات عده يتعاملون مباشرة مع الكاسيات العاريات ولا حتى يرفعو عيونهم عليهن

الحتة دي انا ما فكرت فيها و انشغلت بالاكل ، و هي مسألة مهمة و اختلاف نوعي بين ما يواجه الصائم هناك و الصائم هنا.

Quote: عشان كدة يا زول تانى نهى صيام بره السودان يا دكتور سيف الناس دى ما بتختشى تب

رمضان كريم يا امير
كويس انك تقدر تصوم رمضان في السودان و خصوصا اذا كان عندك اولاد لأنو اجواء رمضان مميزة في السودان و تستحق انو الاولاد يعيشوها.
اما بالنسبة للناس الما بتختشي دي فهم طول السنة ما مختشين اشمعنى حيجوا على رمضان و يختشوا!

Quote: اها هي لمن شافتني كدة قالت لي امشي جيب ليك ايسكريم وتعال صيامك ده من حتتو دي ما قايم

يا دكتور و الله خوفي يكون انطبق عليك الحديث القائل "رب صائم ليس له من صيامه الا الجوع و العطش"
لكن ما مشكلة يا جيمي مع حياة السعودية الناشفة دي الفات كلو بيكون اتمسح .

Quote: والله العظيم يادكتور سيف لا تاثر فيني هذه المناظر ولو رجعت السودان واصبحت من اهل الراي لتركت المسافرين والمرضي والصغار يدخلو المطاعم لتناول وجباتهم دون اي اعتراض طالما الصيام مقصود به وجه الله فهذه المناظر لا تؤذي احد

يا ود عوج الدرب
ما خليت كلام يتقال تاني بعد كلامك ده.

الطيب بشير رمضان كريم

Quote: لكن المسألة أحيانا فيها عمدية ممعنة في الغباء!

لا نريد أن نحاكم نوايا الناس هنا و لكني معك في أنه من الضروري أن يراعي الناس قواعد
اللياقة و حسن الأدب في اماكن العمل.

الحجة الاساسية في هذا السلوك هي الا يؤذي المفطرون مشاعر الصائمين ، طيب يا ناس امريكا
و كندا و هولندا و بريطانيا و هلمجرا كيف تحسون عندما ترون الناس من حولكم بين آكل و شارب؟
و هل منظر الناس و هم مفطرين يؤذي مشاعركم؟؟
و ما هو هذا الأذى الذي يلحق بالمشاعر المرهفة؟؟
افيدونا حتى نعلم إن كانت حجة الناس هنا valid or no
__________________________________________________

أخونا سيف النصر حبابك ورمضان كريم .... يا أخي الناس في الغرب محترمين جداً لكنهم يعتبرون الأمور الدينية أمور شخصية ... بس هم بيستغربوا جداً كيف الإنسان يصوم ساعات طويلة عن شرب الماء. الأكل بالنسبة لهم ليس ضرورياً ويعتبرون التقليل منه يؤدي إلى فقدان كثير من الشحوم وهذا امر مستحب جدا عندهم/هن.

غايتو أنا بتفادى دائماً الإقتراب من محلات المشاوي والشاورما والحاجات البتخلي اللعاب يسيل .... الأيام الأولى دائماً صعبة لكن بعد كم يوم كدا النفس بتتوطن ... الأكل والشراب ما مشكلة (الكلام غض البصر) ...

تحياتي ورمضان كريم

المسالة ما عندها علاقة بالمشاعر يا دكتور سيف. الحكاية عندها علاقة بقهر الاقليات الغير مسلمة و جعل حياتهم صعبة.

Quote: الأكل والشراب ما مشكلة (الكلام غض البصر)

ـــ
تحياتي سيف النصر

سلام يا دكتـور سيف وضيوفك..

نفس الشعــور لما نشوف الناس اللابسين.. ناس يفطروا ويتغدوا ويتعشـوا، المشكلـة شنو؟

بعدين ياخى عند المهووسين الأمور مشقلبـة، لأنهم بالذات أكتر ناس يأكلوا فى رمضان الذى شـرع من
أجل تضييق مجارى الدم.. يعنى شنو الواحد يأكل الليل كلو من اللحوم الدسمـة أضعاف أضعاف ما يأكله
فى غير رمضان، ثم ينوم النهار مثل المرفعين.. وبذلك يكون وسـع مجارى الدم ليجرى من خلالها الشيطان..
ولو رأى مريضا أو مسافرا يأكل القليل فى النهار يشتط ومشـاعره تستفـز لأنه يذكره بنهم الليل الذى
تبقى له عدة ساعات.. فهو لا يتوجه لله بصـومـه ثم يقوم بعمله ويترك بقية عباد الله لحالها، بل يظل
طول النهار يعانى من الشعـور بالحرمان لأنه غير مقتنع بأسباب تركه للطعام، ولو كان مقتنعـا لتفرغ
للعبادة ولما أستفزته رؤية من يأكل أو يشرب أو حتى يعمل أى شئ اخـر.

مثل هؤلاء ليس لهم من صيامهم غير الجوع والعطش. وليسألوا أنفسهم: هل بعض رمضان مجارى دمهم ضاقت أم توسعت؟

النذير يا هندسة..رمضان كريم

Quote: وحقو الدول البتشدد في مراقبة غير الصائمين أن تترك الخلق للخالق ونبذ الديكتاتورية دي

المسألة هي تماما كما لخصتها أنت بكلمة واحدة"ديكتاتورية".

Quote: رمضان في الغرب خلي ساكت 17ساعه والشارع خلي علي الله بس ربنا باجرنا يا الاخ سيف

آمين يا حسن النعمان.

ويجب مراعاة مشاعر الام وهى تعد لاطفالها وجباتهم اليومية!
جنى

الأخ سيف تحية طيبة ورمضان كريم ...
تعودت ان اقدم لجزء من اجازتي السنوية من يوم 15 رمضان وانت ماشي ... اذ يصبح الامر صعبا من ناحية الزمن وكدة .. الطريف في الامر هذه السنة سألتني زميلة في العمل ( كم حورية ستقدم لك جزاء لهذا الصوم ؟) فكانت المفاجأة ان ردت عليها زميلة اخرى - يهودية - وشرحت لها ان الصيام ليس الهدف منه الحوريات ولكنه يساوي ما بين الفقير والغني ويعود النفس على التحكم في الرغبات ويقوي الارادة... لم استغرب من شرح اليهودية فلقد مررت بعدة تجارب مع اليهود عرفت بانهم يعرفون الكثير عن الدين الاسلامي من ناحية اخرى يوفر مرور شهر رمضان بيئة جميلة لشرح الدين الاسلامي على حقيقته اذ يكون معظم غير المسلمين مندهشين من عدم شربك للمياه او الاكل طوال اليوم ... ويبدأؤن في طرح اسئلة يكون معظمها عن اشياء يتم اجترارها في الاعلام لكن والحق يقال اجد كل التعاون من زملائي وزميلاتي في المؤسسة التي اعمل بها وهم خليط ما بين مسيحين ويهود ولا دينيين يحترمون كل ذي عقيدة ما دام يحترمهم ....
الا غايتو غض البصر يا دكتور محمد هارون في مدينة زي برايتون دي ياهو ( المجرح صيامنا ) يعني لو غضيت بصرك لازم لازم في مرة من المرات يصيبك رشاش لكن بي الواحد ( بحتسب ) ..... وطبعا المثل ( العيار الما يصبش يدوش ) ما نجروه المصريين من راسهم ...

لكم جميعا التحية والتجلة
اسامة

سلام يا دكتور سيف
وتحياتي
طيب انتو شعوركم شنو لمن تشوفونا نصوم ونفطر
دون حلو مر او بليلة وكركدي وآري ابيض ؟!
الاسترال وباقي القوميات الفاطرين هنا بالجد ناس ودودين جدا
وبيحترموا صيامنا وممكن يغيرو ليك جدول شغلك لتجد مساحة وقت للفطور في البيت
لكن معظمهم لايفهم معنى الصيام الطويل وبدون ماء !
دون ماء دي بتحيرهم جدا

لكم كل الاشواق يا ناس جدة
والله لسه طعم فطوركم ما راح !

يا دكتور كان تسالنا نحن ناس العالم العربي ديل قبل ما تمشي لناس العالم الغربي
___
اما لو سالت عن مشاعرنا فهي بخير وصحة جيدة ولا ينقصنا سوى عدم رؤية هلال العيد حتى الآن

الأخ سيف ... رمضان كريم ...

بجانب غض البصر ... المشكلة الزملاء الأمريكان snacking اليوم كله ...

ووقت الغداء روائح الأكل تفوح من الـ Break room وتعبق كل المكتب.

ولكن من يعرفون إنك صائم يقدرون ذلك و لا بأكلون أمامنا ...

وكل سنة و الجميع بخير ...

العزيز دكتور سيف تحياتي :
اليس من حكمة الصيام هي تأهيل المسلم وتدريبه علي الصبر؟أعتقد ان وجود الصائم بجانب الفاطرين
هي إمتحان وفي نفس الوقت تقيم لمدي قدرته علي الصمود ، وامتثال أوامر المولي ، ولكن الثابت ان
الكثير منا ينظر الي الصيام بمنطق الرجالة ومحاربة الملزات اكثر منه فرض وطاعة واجبة التطبيق،اذ
نجد الكثيرين يتعسفون في تطبيق الرخص.....فتسمع احدهم يقول لك "والله انا لو اموت ما أفطر ياخي
سفر شنو ومرض شنو دي البفطر؟"ثم تجد الكثيرين يوصومون الفاطر بانه بطيني ، او ضعيف لا يقوي
علي الجوع.......والاخير طعن في الرجالة اكثر من هو طعن في الدين ،شخص بهذا التصور اعتقد انه
يمكن ان يتأثر وربما يذهب الي اكثر من ذلك من المغالاة في تتبع الناس وترصدهم.
هذا مع استثنائي لبعض الامور الغير مقبولة كالتدخين علي سبيل المثال، وذلك لانه يؤذي الجميع
صائم وفاطر ، ولانه يتسبب ربما مباشرة في افطار الصائم.
ولك شكري

Quote: غايتو أنا بتفادى دائماً الإقتراب من محلات المشاوي والشاورما والحاجات البتخلي اللعاب يسيل .... الأيام الأولى دائماً صعبة لكن بعد كم يوم كدا النفس بتتوطن ... الأكل والشراب ما مشكلة (الكلام غض البصر) ...

شكرا محمد هارون...بس ما وريتنا مشاعرك اتاذت و للا لأ

Quote: المرشحون الديمقراطيون والليبراليون لن ينسحبوا من أرض المعركة ولن يمارسوا العبث .

ده يعني شنو؟؟؟؟؟؟