Post: #1
Title: الفردة دقس و أتلحس
Author: سيف النصر محي الدين محمد أحمد
Date: 05-25-2006, 07:17 AM
Parent: #0
بالأمس و على شاشة القناة الأولى المصرية شاهدت جزءا من برنامج أستضاف مجموعة من كبار المفكرين و الأدباء في مصر ..منهم أحمد عبد المعطي حجازي ,يوسف القعيد و صلاح عيسى.
كان الحوار يدور حول المفردات الجديدة التي غزت العامية المصرية..تباينت رؤى الضيوف حول الظاهرة فمنهم من حاول مقاربتها نقديا و منهم من تحدث عنها بشكل انطباعي يدمغ الأجيال الجديدة بالتفاهة و تدني الثقافة.
تبادر لذهني و أنا أشاهد البرنامج التساؤل التالي:هل تتعرض عاميتنا السودانية لنفس الظاهرة و هل أصبحت هنالك فجوة بين الأجيال المختلفة في كيفية التعبير عن أنفسهم ؟
بمعنى هل عندما تغيب لفترة خارج السودان و تعود..هل تحس بغربة ما..؟ هل تحس بصعوبة في فهم التراكيب اللغوية التي يستخدمها الشباب في كلامهم؟ هل هناك مفردات جديدة غزت الكلام اليومي للسودانيين؟
|
Post: #2
Title: Re: الفردة دقس و أتلحس
Author: سيف النصر محي الدين محمد أحمد
Date: 05-25-2006, 07:37 AM
Parent: #1
استدراك
قد يبدو الكلام أعلاه مغرقا في نزعته المركزية التي تري الأمور فقط بمنظار الشمالي الذي يتحدث العربية....يبدو أنني نسيت أن الأمور في السودان أكثر تعقيدا من ذلك.
عموما أنا أقصد العامية العربية في السودان و ما اعتراها من تغييرات محتملة.
صراع المركز و الأطراف في السودان خلى الواحد يكب الجرسة عديل كده.
|
Post: #3
Title: Re: الفردة دقس و أتلحس
Author: حيدر حسن ميرغني
Date: 05-25-2006, 07:51 AM
Parent: #1
عزيزي دكتور سيف
فعلاً لكل أوان مفرداته الخاصة التي تواكب متطلباته، لكن مفردات العصر ده اصبحت عجيبة وعصيَة
على الفهم... هناك مثلاً مفردات كانت تستخدم أثناء كشات الحكومة للشباب لتجنيدهم إجبارياً في
حربهم ضد جون قرنق منها (إتلحس) لمن قبضوا عليه وعمل (شتات) لمن أفلح في الافلات، وركب التونسية
لمن إستقلَ دفاراً على إعتقاد إنه مجرد وسيلة مواصلات عادية (في الاصل شرك كان يستغله عساكر
الكشات لاصطياد الشباب دون مطاردة)
مرة في إجتماع لمجلس مجمع اللغة العربية في القاهرة اواخر الثمانينات من القرن المنصرم أراد
المصريين إدخال كلمة (ريالة) ضمن المفردات الفصيحة المتداولة في الوطن العربي فما كان من
الدكتور الراحل عبد الله الطيب والمؤرخ السعودي الراحل الملقب بعلامة الجزيرة العربية حمد
الجاسر إلا أن إعترضا على الكلمة بحجة أنها من العامية المصرية وليست كلمة فصيحة
تخيَل انا كنت أعتقد حتى تلك اللحظة أن كلمة (ريالة) إبتداع سوداني من كثرة إستخدامنا لها
لكن أحلى مفردة
كلمة:
(ضنب كيزان)
|
Post: #4
Title: Re: الفردة دقس و أتلحس
Author: سيف النصر محي الدين محمد أحمد
Date: 05-25-2006, 09:25 AM
Parent: #3
Quote: لكن أحلى مفردة
كلمة:
(ضنب كيزان) |
حيدر حنين:
سلامات لا تنسى أنك شخصيا قد شاركت في صناعة مفردات جديدة تبناها الكثيرون في الزقازيق مثل "الحنين" و "اللغم" و غيرها ....يعني يا حنين أنت جزء من الظاهرة..و يمكن ضنب كيزان دي برضه تكون من إختراعك.
|
Post: #5
Title: Re: الفردة دقس و أتلحس
Author: حيدر حسن ميرغني
Date: 05-26-2006, 06:25 AM
Parent: #4
عزيزي ابو السيوف
ضنب كيزان دي تكون حقت صلاح علي صالح .... والله اعلم
|
Post: #6
Title: Re: الفردة دقس و أتلحس
Author: saif massad ali
Date: 05-26-2006, 06:31 AM
Parent: #5
دكتور سيف
والله قصة غريبة رجعت السودان بعد 12 سنة كنت غريب بين اهلي ونصف الكلام ما بفهمو والذ شئ في كلية اللغاويس جامعة الخرطوم طالبة بتتكلم عن قصيدة وفجاة قالت لاطشها وتعال عاد شوف بقيت افتش في لاطشها دي جات في كلامنا ده لي شنو
اخيرا سالت منها وقالو يعني مسروقة
|
Post: #7
Title: Re: الفردة دقس و أتلحس
Author: حيدر حسن ميرغني
Date: 05-26-2006, 07:15 AM
| Quote: بقيت افتش في لاطشها دي |
معقولة دي يا سيف مساعد ماسمعت بـ لاطشاها دي قبل كده .. والله إنت رايق تب
ولا حتى بـ لطشتو كفَ (صفعته) ودي طبعًا لازم تكون في الوجه بس
انا مثلك لم أزر السودان من 11 سنة
لكن بعرف حاجات متل:
1-الزول ده عاوز (يلحس) نصيبي من الشغلة دي
ويلحس معناها هنا يستعبط او يستهبل او يطلع بيك العالي في موضوع معيَن
2- (وزن الريشة) وتقال للانسان القلبو رهيَف جداً يعني ممكن يحب ليهو مليون جكسوية في الدقيقة
ما عندو قشَة مرة ويطلع بلا نصيب أخرة المطاف ..
3- (جنينة) مجنون
4- (خلف الله حمد) متخلف
وحاجات ثانية كده زي شريفة فاضل وسوسن عبد الفتاح
غايتو مصايب
د. سيف
الجماعة قالو ريالة كلمة فصيحة؟
غايتو المصارية ديل مابيموتو
هم يقولو ونحن نريَل
وريالاتنا كمان شيئ عجيب لما تشوفها في محسن دفعة وهو نائم
|
Post: #8
Title: Re: الفردة دقس و أتلحس
Author: سيف النصر محي الدين محمد أحمد
Date: 05-26-2006, 02:05 PM
Parent: #7
سيف مساعد حمد الله على الرجوع والحمدالله أنو مشكلتك كانت مع كلمة لاطشها..و هي ما كلمة غريبة لكن أعتقد أنها ممكن تكون غريبة لمن تسمعها من بنت.
حيدر حنين
المصريين ممكن يدخلوا أي كلمة للفصحى مش مجمع اللغة العربية حقهم.
تعرف أنا الوالدة معاي اليومين ديل و سمعت منها بعض المفردات الجديدة...كانت بتتكلم عن زول من معارفنا كلام طويل و في النهاية قالت :غايتو على قول أخوانك ده زول "بيض" خلاص.
و لا أدري ما علاقة البيض بكون الشخص مزعج أو سيئ..
أيضا قالت أنو الأولاد أول ما يرجعوا من الجامعة يجوا يقعدوا معاها و يسألوها:آها يا حاجة الحنك الليلة شنو؟ولو الكلام ما عجبهم يقولوا ليها و الله الليلة حنكك بيش.
|
Post: #9
Title: Re: الفردة دقس و أتلحس
Author: طارق جبريل
Date: 05-26-2006, 09:27 PM
Parent: #1
دكتور سيف كيفنك
والله يا سيدي انا رجعت السودان بعد طرشمية سنة كدة
مشيت لقيت نفسي من العصر الحجري في المصطلحات
كلام كدة عجيب
فاطي سطر
قدر ظروفك
امسح ليه شنبو
لكن نفسي مسطح جدا
طوالي دقست رجعت لي غربتي
تحياتي للوليدات وامهم
|
Post: #10
Title: Re: الفردة دقس و أتلحس
Author: حيدر حسن ميرغني
Date: 05-27-2006, 07:51 AM
Parent: #9
up
|
Post: #11
Title: Re: الفردة دقس و أتلحس
Author: سيف النصر محي الدين محمد أحمد
Date: 05-27-2006, 10:03 AM
Parent: #10
طارق جبريل ..سلامات
يا ريت بس تكون قدرت ظروف الجماعة و مسحت ليك كم شنب كده.
سلامي للأسرة الكريمة.
|
Post: #13
Title: Re: الفردة دقس و أتلحس
Author: Tragie Mustafa
Date: 05-27-2006, 10:36 AM
Parent: #12
د. سيف
بوست ظريف وتشكر عليه
واظرف حاجه في السودان لما تلقى حاجه كبيره من النوع البيسمع كلام وليداته وبناته في الجامعات
ويعيد الكلام بيطلع (حاجه ما تخلص),وبالناسبه دي تكونوا سمعتوا بالخستكه,ضحكته من كم يوم لما لقيت
الغاليه آمنه مختار كاتباها لاني زي ما سمعتها لي مليون سنه.
تحياتي.
ومتابعه.
تراجي.
|
Post: #14
Title: Re: الفردة دقس و أتلحس
Author: حامد بدوي بشير
Date: 05-27-2006, 11:11 AM
Parent: #1
الأستاذ سيف النصر،
أثار موضوعك اهتمامي لأنني قضيت وقتا ليس بالقصير في تعلم هذه اللغة الجديدة التي غزت المجتمع السوداني.
والمثير في هذه اللغة أنها لغة توحيدية. إذ يتكلمها الشباب من كل أنحاء السودان وليس فيها إقليمية أو جهوية أو عرقية.
فيما يلي فقرة من مسرحيتي (طلب هجرة إلى جمهورية أم كردوس)، أرجو أن تجد فيها بعض الأمثلة لتجليات هذه اللغة في حاضرنا.ّ
جميلة: يسد يا يابا ... (فجأة تبتر جملتها وتتلفت بخوف) سجمي، النظام العام ..(تخطف الكفتيرة وتركض مسرعة لتخرج من الناحية اليمنى.... تعود وهي تلهث من الناحية اليسرى) العسكري ما قطع قلبي! أنا قايلاهم ديل النظام العام، الحمدلله طلعوا ديل بتاعين الإلزامية.
حماد: (يهب واقفا بذعر) الإلزامية .. الله لا تبارك فيك يا جميلة .. وجايباهم لحد عندي ! (يركض خارجا من الناحية اليسرى... يعود بعد قليل من الناحية اليمنى وهو يلهث.. يتوجه للمشاهدين..) يا جماعة الواحد في بلدو يقبى زي ناس العمرة الزايغين؟ كل ما يشوف ليه عسكري يفتح؟ بس إظهر عسكري واحد والشارع كلو يفتح .. الفارش بضاعة والطابي جكس وستات الشاي والشحادين والنشالين .. كلو شتات..
جميلة: حماد! شنو شتات ويفتح .. إت الأستاذ ما قال ليك تخلي كلام الشماشة دا؟ ات داير تفضحنا قدام المغتربين؟
حماد: يا فارة دا ما إسمو كلام الشماشة. دا إسمو الرندوك
جميلة: ياخي إتكلم زي خلق الله .. يفتح يعني شنو؟ ما تقول يفز.
حماد: يفز ... ويفز دي ما راندوك؟ ( يدخل أستاذ التاريخ في طريقه لباب المدرسة وهو يحمل كتبا في يده)
الأستاذ: يفز أصلها يفوز والمقصود يفوز بحياته أي يهرب من الخطر. وتحرفت من يفوز إلى يفز. (تتابع جميلة كل كلمة يقولها الأستاذ بوله وحب ظاهر)
حماد: (بتعالم زائف) وزي ما تحرفت من يفوز لي يفز فقد ترندكت إلى يفتح، بمعنى يوسع أي يفتح الفضاء المكاني باتجاه الإتساع والشتات.
الأستاذ: حماد إت بتجيب الكلام الغريب دا من وين؟
حماد: من الحنان ... ولو الحنك بجيب الحنان أن مستعد أقبى الشيخ الشعراوي زاتو. (يعود للتعالم) وبالمناسبة يا أستاذ، لو عاوز درس عصر في الرندكة، أنا مستعد.
الأستاذ: (منتهرا) حماد .. ما تس ... تس ... تستأ ... تستز
حماد: إت عاوز تقول شنو ؟
الأستاذ: عاوز أقول ما تعمل لي فيها أستاذ.
حماد: بسيطة .. تقول بلاش تركب مكنة أستاذ بدل تستس كدا. ولا إيه رايك يا جميلة؟
جميلة: (تكون جميلة تائهة وهي تتأمل الأستاذ) .. آه؟ قت شنو؟
|
Post: #15
Title: Re: الفردة دقس و أتلحس
Author: سيف النصر محي الدين محمد أحمد
Date: 05-28-2006, 01:08 PM
Parent: #14
Quote: (منقول من سودانايل-homesick)
الحنك البيش ... الرندوك ... اطلاق اسماء اشخاص ... اواماكن على بعض الافعال او العكس ... ذي عشة الفلاتية ... العشاء ... ولمن يقولو ليك عشة الفلاتية غنت ... يعني شوف ليك عشاء لي روحك ... وفي ناس كمان بقولوا عشمانة ... واغرب حاجة الاكل اسمو العضة ... تتصل على واحد يقول ليك ... يا مان انا اسع بعضي ... كلمني بعدين ... يعني وقت الاكل الواحد بكون سعران ... ولا كيف !!!
ــ زيدان ابراهيم أو رمضان زايد ... الزيادة في كل شي ... كل شي محتاج زيادة ... اعمل للفول ده زيدان ابراهيم ... وارحكم نجيب رمضان زايد ... وفي ناس يحبو ليك رمضان زايد ده ... ذي عيونهم ... مع انو بغلط عليهم ... امس فلان داك كان كويس ... بعد رمضان زايد ... قعد يعزف ... ده كلام ده !!!
ــ خوجلي عثمان ... خجول ... يقول ليك واحد من الفكاكين ... امس قابلت ليك الدامة ديك ... وقريت ليها جريدة ... يا زووووول ... لمن هي عملت وراء البسمات ... خوجلي عثمان وكده ... اسع ده ما كلام مساطيل ... والله عينو ما شافته ... الكلام ده كلو ناجرو من راسو ... فكااااااااااااااااك
ــ فاتن حمامة ... البت الحديقة ... اقصد الخفيفة ... وتندرج تحتها فاصوليا ...
ــ احمد مظهر ... بتاع مظاهر ... ما يسلم عليك الا يكون راكب تكسي ... نظام شوفوني ... والشباب يقولوا ليك ... يلا نعمل احمد مظهر لي ناس البكاء ... يعني نديهم طلة ... احمد مظهر اصله ما بتراد ... مرة مشى حفلة براهو ... عمل لينا البعيو ... ارخي يا اصلي ... بكرا يا قلبي الحزين تلقى السعادة ... وقع في مصيدة ... تاني سكة حديد ما تلمنا بيهو ... احسن هو زاتو احمد شرفي وكده ... كرهنا السلفادور والانسولين ... يوم ما لقيتو مكون نفسه ... دبيب ... ياخ ده كوكب ... والله مظلي عديل كده ... اها الحنك ده كله في احمد مظهر ...
ــ ليبتون ... وين يا مان ... عامل ليبتون ليك يومين ... شكلك راقد على خميرة ... الاداك بالكوريك يدينا بي قفا الملعقة ... او المعلقة ... من زمان الكلمة دي وسورة الكافرون ... بختوني في ملف ضيق ... لا والله ... لا ليبتون ولا حاجة ... بس الشاغلين فؤادي ... مع غورباتشوف وكده ... ليهو يومين عامل معانا فيتنام ... تصدق احمد شوبير ... ده الا يلقى ليهو زول قطيم ... يعمل لي ثابت البطل ... قبيل عملت لي مرسال الشوق ... داير لي حمرا ... شبكني ليك الدين النصيحة ... لكن خلاص اتفكفكت منو ... عملت لي السجل التجاري في الكورس ...
لكم ودي ونتلاقى في الرملة الدقاقة
انتهي
ــــــــــــــــــــــــــ
اها يا المغتربين واللاجئين حول العالم اللغة دي (الكانت ) سائدة في السودان في التزعينات اها الان في شفرات جديدة يعني الواحد منكم لمن يرجع السودان الا يسوق معاهو مترجم
رايكم شنو نفرتق الحنك دا هنا ونخلي كل تلاتة في محلاتة وكل ستة في حتة وكل صفيحة بي فسيخها نظام انه انتو ماخدين ستة صفر وكدا بالنسبة لي الحنك دا طبعا الحنك الجديد المنتشر الايام دي ناس اظهار رقم وفصل الدين عن الدولة وناس مسكلي وامسكل ليك وعيك |
أساسي شكرا على المرور هنا.
|
Post: #16
Title: Re: الفردة دقس و أتلحس
Author: سيف النصر محي الدين محمد أحمد
Date: 05-28-2006, 01:11 PM
Parent: #15
الأستاذة تراجي
أوافقك أن سماع هذه المفردات الجديدة من الكبار "ألذ" ألف مرة من سماعها من مباشرة من الشباب..لك التحية.
|
Post: #17
Title: Re: الفردة دقس و أتلحس
Author: سيف النصر محي الدين محمد أحمد
Date: 05-28-2006, 01:14 PM
Parent: #16
الأستاذ حامد بدوي بشير..شغلك نضيف يا "فرده" و حقيقة لقد أثريت هذا البوست أيما إثراءْ
|
Post: #18
Title: Re: الفردة دقس و أتلحس
Author: حامد بدوي بشير
Date: 05-29-2006, 01:35 AM
Parent: #1
الأستاذ سيف النصر،
وهاك الرندوك دا .....
Quote: حماد : ات اظنك ما ناقشة . يا استاذة انا تعييني في وظيفة فراش رسمياً مربوط ببداية الدراسة والمدرسة ما ممكن تبدا كان ما انتهت ازمة اسم المدرسة ، فهمت ؟ يعني انا شغال وما شغال. وبعدين يعني بيزنس تك.
جميلة : شنو يعني بزبز تك ؟
حماد : يعني الواحد مآمن .
جميلة : يعني شنو مآمن ؟
حماد : يعني الصهريج فاضي ، سخانة .
جميلة : يا الله .. سخانة يعني شنو يا حماد ؟
حماد : يعني بي رندوك الجلاكين، اباطه والنجم .. مفلس .
|
|
Post: #19
Title: Re: الفردة دقس و أتلحس
Author: حيدر حسن ميرغني
Date: 05-29-2006, 03:17 AM
Parent: #18
سيف النصر
مرة في واحد هندي متعوَد يسمع كفيلو يقول لمن يزوره في المكتب ( مرحبا نوَرت المكان) يازول مرة
جاء ضيف والكفيل كان ما موجود، الهندي الشليق عاوز يعمل فيها زول بيعرف أصول الترحيب بالضيف
وكده ... قال للضيف
مرحبا..فضل.. إنت (لمَبة) كبير والله
|
Post: #20
Title: Re: الفردة دقس و أتلحس
Author: حيدر حسن ميرغني
Date: 05-29-2006, 04:58 AM
Parent: #19
سيف النصر
بوستك مولَع بالهنود
حكى لي صديق سعودي وقال إنو أثناء interview لبعض العمالة الهندية وجه سؤال للهندي وقال ليهو
كنت شغال شنو في السعودية زمان؟
الهندي ما عارف يقول شنو (في الحقيقة كان شغال ملقَح نخيل) مفردة ملقَح دي طارت من راسو
قال ليهو حاجة كده
أخ خ خ خ خ خ طارت مني
لو عرفتها قولها لي بالله
|
Post: #21
Title: Re: الفردة دقس و أتلحس
Author: ABU QUSAI
Date: 05-29-2006, 06:09 AM
Parent: #20
دكتور سيف
سلامات
شنو يا صاحبي تقابلني تكب لي مكنة وتواعدني وتعمل زغبير ( تكب الزوغة ).
تعرف يا دكتور أجمل حاجة في لغتهم دي لما تمشي السودان بتعلمك انك تكون زول تقيل ما تدخل في أي ونسة معاهم إذا ما كنت فاهم الحاصل ، لانهم طوالي بيقولوا ليك بره الشبكة يعني ما ناقش أي حاجة عشان كدا لازم تبقى تقيل .
تحياتي للأسرة .
أبو قصي
|
Post: #22
Title: Re: الفردة دقس و أتلحس
Author: سيف النصر محي الدين محمد أحمد
Date: 05-30-2006, 10:18 AM
Parent: #21
حيدر أرجو أنك تظل لمبه كبيرة في هذا البوست.
حامد بدوي في أنتظار المزيد.
أبو قصي: يا فرده ما أنت عارف الظروف و كده و بعدين أنا ما عملت زغبير أنت العامل ست الريد بقت نساية.
|
Post: #23
Title: Re: الفردة دقس و أتلحس
Author: حيدر حسن ميرغني
Date: 05-31-2006, 04:43 AM
Parent: #22
سيف الحنين
كنت أعمل بجدة في مركز لتعليم الكمبيوتر واللغة الانجليزية ومعاي الحنين عماد شقلي والـBOSS
حقنا هندي محترم ومتعلم جداً بس مصيبتو كانت في إسمو (محمد كليم الله) وكان يقولي لاتردد اسمي
كاملاً على لسانك أمام السعوديين لانه كان يساوره إعتقاد بأن السعوديين ،المطاوعة منهم، ربما
يخلقو ليهو متاعب ( يارفيق انت مافي تعرف كليم الله هو سيدنا موسى) ويازول لقيتها فرصة و بقيت
اطالبه بزيادة الراتب ( كان يدير المركز ويحدد الرواتب) وإلا أجيب ليهو مطاوعة جدة كلهم (وانا
في الحقيقة كنت عمرجي أرجف من صـوت سيارة اسعاف).. كان طيباً مثل من عاشرناهم من الاخوة الهنود
رعاهم الله.
نجي للشغل التاني...
تعرف امبارح حكى لي واحد صاحبي، رجع من إجازة قضاها في السودان، عن مفردة عجيبة جداً
قال لي موضة لبس بنطلون الجينز مع الـ T.SHIRT القصير اللي بيظهَرالحجاب الحاجز) زاتــو يسمى
في السودان (فصل الدين عن الدولة)...
ليهن الحق ناس ماريا كاري وبرتني سبيرس ينطَطن ســــــــاكت وقت الغنا لما الشغلة دي ماتظهر
يكونن علمانيات ياوزل ونحن ما عارفين؟
|
Post: #24
Title: Re: الفردة دقس و أتلحس
Author: حيدر حسن ميرغني
Date: 06-01-2006, 05:29 AM
Parent: #23
الفردة ده إتلحس ولاَ شنو
|
Post: #25
Title: Re: الفردة دقس و أتلحس
Author: حيدر حسن ميرغني
Date: 06-01-2006, 06:28 AM
Parent: #24
الفردة سيف
أخونا عبد الدائم سيد احمد (النضيف)- عشان ما يزعل - يغريك السلام كيمان كيمان وطلب مني ان
اضع مساهمته الجميلة مثله أدناه في البوست الحلو ده:
Quote: وهاك الكلام التالى وارجو تنزلو فى الفردة دقس واتلحس
كمان ما شفتا ونسة الفنانات والفانانين حقين الايام دى امثال ناس فنانة اسمها منو كدى القلعة
ووحدة اسمها شنو كدى جبرة والتانية الانقاذ وكباشى ووحدة طالعة جديد اسمها حياة شكلة ومعاهم
فنانين ذيهم كدة شكلا واحد اسمو حمادة بت والتانى وجــك وشنو كدى ارباب والقلع وما بعرفو
الباقى المهم بتلمو كل يوم اتنين فى بيت واحد ويشربو القهوة والجلسة دى بسموها فى كلامهم
تحديقة وتبدى فلانة التحديقة برفع الحواجبين وصفيق اليدين هااااااى هااااى يااىاىاى وتقول
الخاينة اللئيمة شلبت برغلى الا لاقيتا عن ناس هـدية وجــاجـيتا ولو هى عملت المغارز انا
اسبيرى خاتاهو ولو نضمت معاى بنفض فيها الكلوش وبسهك ليها السيتان ولحدى هنا قطعتو معاهو
ناشف
اها تعال اشرح ليكم المصطلحات عشان مافى واحدة تجى تجاجينى بعدين
شلبت يعنى سرقت راجلى
برغلى يعنى راجلى
جاجيتا يعنى طاعنتها بالكلام CHACHETA
المغارز يعنى المقالب
نفض الكلوش يعنى اشاكلا واضاربا
بسهك ليها السيتان يعنى بطلع ليها فضايحها
قطعتو ناشف يعنى خاصمتها ولا وقفتها فى حدها
اجى اجى اجيييه يا التلفزيون ديل ياهم مطرباتنا ومستواهم لميتوهم من بيوت السمايات
ولبستوهم خمارات وجايبنهم لينا فى السهرات عشان نصدقكم لكين نحن تفاتيح اكتر منكم وعارفين
ديل مستواهم شنو والنقطة وين والصفقة الصفقة الصفقة والنبك النبك النبك ويا حليـلكم يا
البـلابـل والله يجازيك يا الطيب مصطفى
والى تحديقة اخرى يوم الاتنين الجاى عن ناس فلانة بالحيطة المجاورانا |
|
Post: #26
Title: Re: الفردة دقس و أتلحس
Author: عوض الله الفولانى
Date: 06-01-2006, 06:30 AM
Parent: #24
كانت هذه المصطلحات خاصة بأصحابنا الشماشة
و لكن فى ألآون ألأخير صارت لغة الجميع حتى
الكبار احيانا يستعملونها و اذا ما عملته
حسابك حتكون ذى ألأطرش فى الزفة .. اها هاك
الرندوك ده ..
يا فارة يا فرفارة يا لحم الجزارة يا الكل زفارة
دمت ايها الظريف
الفولانى
|
Post: #27
Title: Re: الفردة دقس و أتلحس
Author: سيف النصر محي الدين محمد أحمد
Date: 06-01-2006, 02:30 PM
Parent: #26
حيدر حنين
يا خي الليلة أنا جيت عشان أنزل مساهمة عبد الدائم لقيتك سبقتني ..شوف بالله الدنيا دي عجيبة كيف أنا و هو مع بعض في جده و أنت في آخر الدنيا و تنزل مساهمتو قبلي.....يا حنين أنت العلم أتطور ولا شنو؟؟
|
Post: #28
Title: Re: الفردة دقس و أتلحس
Author: سيف النصر محي الدين محمد أحمد
Date: 06-01-2006, 02:51 PM
Parent: #27
عوض الفولاني
هل أستخدام الناس لكلام الشماشة يستبطن أعجابا خفيا بطريقة حياة هذه الفئة من الناس من حيث ميلهم للتمرد و تحللهم من كافة أشكال النفاق الأجتماعي السائدة في بلادنا..
الشماشة كانوا موجودين في الخرطوم دائما على الأقل طيلة الفترة التي وعاها جيلنا ..ربما زادت أعدادهم مؤخرا و لكنهم دوما كانوا هناك يعيشون على هامش الحياة ..في الغالب مرفوضين من المجتمع ينظر لهم الناس نظرة دونية و لا يختلطون بهم..أذن ما الذي حدث و جعلهم أصحاب تأثير كبير لهذا الحد؟
|
Post: #29
Title: Re: الفردة دقس و أتلحس
Author: حيدر حسن ميرغني
Date: 06-03-2006, 06:23 AM
Parent: #28
سيف
طاير لي معنى مفردة (خير السيد)
كان يستخدمها ذكي مساعد كل ما يأكل ليهو فاصوليا
|
Post: #30
Title: Re: الفردة دقس و أتلحس
Author: Ahmed El Gasim
Date: 06-03-2006, 11:21 AM
Parent: #29
سيف النصر
واحد من اهلنا الكلاكلة(ولد صغير مقارنة بنا مواليد بداية الثمانينيات (يعني انا كنت في الجامعة..)جاء قبل فترة مغتربا معنا...
زارني قائلا(والله من البيت جيتك موزة..؟؟)سكت ولم افهم انها بسرعة وكداري (بالراندوك)....بعد ان ضحك وقال لي لازم تفهم الكلام دة بقي لغة سائدة علشان ماتتسكوك؟؟
بعد فترة اتصل قائلا(والله بتصل بيك بعد ما جازفت لي كلامة؟؟)))يعني مستلف لي تلفون من واحد...
ضحكت
وكدت ابكي مرة اخري علي عون الشريف قاسم له الرحمة...
|
Post: #31
Title: Re: الفردة دقس و أتلحس
Author: حيدر حسن ميرغني
Date: 06-04-2006, 11:54 AM
Parent: #30
فوق عشان الرندوك
|
Post: #32
Title: Re: الفردة دقس و أتلحس
Author: حيدر حسن ميرغني
Date: 06-05-2006, 07:06 AM
Parent: #31
بمناسبة كأس العالم
كان عندنا فتاة محسيَة جميلة في حينا بعطبرة هام بحبها كل صبايا الحي السمح والشين منهم وانا
كنت من بينهم أدافر قدر حيليتي، من شدة جمالهاســـموها((كـأس الـعالم)) شفت كيف .. الاسم ده
بي قروش.
الزولة دي قالت كدي وماتت ... فجعني خبر وفاتها وانا في مصر ولمَا رجعت في الاجازة زرت
قبرها ضحاً ترَحمت عليها وعلى خسارة جمالها الطواهو التراب قبل ما (يفوز) بيهو واحد مننا..
رحمها الله
|
|