Post: #1
Title: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-05-2009, 04:30 PM
لا اذكر متى ظهرت حنان بلوبلو في حياتنا لكني اذكر جيدا أنها كانت ملء السمع و البصر منتصف
الثمانينات من القرن الماضي بعد سقوط النميري و خلال فترة الديمقراطية الثالثة تلك الفترة
البديعة من عمر الزمان . عقب الانتفاضة تحرر الناس من قيود كثيرة كبلتهم طويلا : ما عادت
الحفلات تنتهي عند الحادية عشر ليلا,تحرر الناس في طريقة لبسهم و طريقة تعبيرهم عن مشاعرهم
و غنت حنان بلوبلو و هي ترتدي فستانا كما ينبغي للفستان أن يلبس, غنت حاسرة الرأس و رقصت
على رؤوس الاشهاد امام آلاف العاصميين و العاصميات في حفلاتهم الخاصة و في الحفلات العامة .
في دورة معرض الخرطوم الدولي العام 1986 زرنا المعرض زيارة جماعية من مدرسة المقرن الثانوية.
كان المعرض في الفترة النهارية ممتلئا بطلاب و طالبات المدارس المتوسطة و الثانوية و كان شريط
بلوبلو الذي تغني فيه "حمادة سافر ما كلمنا"و "الخدار مرق و انا مالي" و غيرها من اغنيات
كلماتها لا تخلو من ركاكة لم نكن نهتم بها كثيرا..كان الشريط "يلعلع" في ارجاء المعرض و كان
الطلبة و الطالبات "الجريئين منهم و منهن" يرقصون على انغامه مبتهجين.....هييييه ايام.
في خميس من خميسات تلك الفترة ذهبنا انا و قريبي عدنان "نتضهب" في اندية نمرة اتنين
بحثا عن حفلة "نكتلها" وجدنا في نادي الضباط كابلي في الصالة و بلو بلو في المسرح , عدنان
كان لم يحضر حفلا لبلوبلو من قبل و كان مصرا أن نحضر الحفلة "بتاعت" الكابلي مدعما اصراره
بوصفي بأني فارغ و بلوبلو شنو البنضيع فيها زمنا..و لما كان هو مصرا صرت أنا ملّحا في المقابل
على حضور بلوبلو ..نجحت في اقناعه في النهاية بأن نبدأ بها ثم ننتقل بعد ذلك لكابلي .
و عندما بدأت الحفلة و غنت حنان بلوبلو و رقصت هاج الناس و ماجوا و هججوا و كان اكثرهم هجيجا
قريبي عدنان و بعد نهاية الفاصل سألته:نمشي؟؟ رد قائلا: نمشي وين يا زول نحن قاعدين هنا للصباح.
و في مرة كانت في حفلة عند جيراننا و جاء الشباب من كل فج عميق و امتلاء بهم المكان حتى ضاق
فاعتلى بعضهم حائط المنزل و و زادت اعداد الشباب على الحائط مع الوقت فلم يتحملهم و انهار
بهم..
المهم اتذكرنا الايام الخوالي و بلوبلو مع هيجة ناس امريكا بتاعت اليومين ديل..حنان بلو بلو في
نيويورك..بلوبلو في بوسطن..بلو بلو تتجه للأسكا..تاج السر الملك و كوستاوي و سيف برعي ما فضل
الا مولانا هاشم الامام يعلن عن حفلة لبلوبلو.
|
Post: #2
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: Nagi Ahmed
Date: 04-05-2009, 05:28 PM
Parent: #1
سلام يا سيف الحكاية ما بلوبلو
الحكاية نجن في امريكا غربتنا دبل ناس الخليج و الواحد بيكون مشتاق لاي ريحة من الوطن و بالذات الفنانين من حمادة بت و الى زبيدة الانقاذ
|
Post: #3
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف الدولة كامل
Date: 04-05-2009, 05:38 PM
Parent: #2
ابو السيوف
كيف حالك
نحن طلعنا من السودان 1985
لكن حضرنا حنان بلوبلو في
مجدها وما بقدر احكي ليك
سيف الدولة كامل
نيويورك
|
Post: #4
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: حسين نوباتيا
Date: 04-05-2009, 05:49 PM
Parent: #1
شكلك كده تخطط لكتل احدى حفلاتها في هذا الصيف ..
يا عزيزي ركز علي May 2nd في بوسطن .. ومع انو عدنان مازال يدعي
الوقار الا انه سيكون اكثر المهججين في هذا اليوم ..
فعجل الحضور لترى فنانتك المفضلة مع سقوط قناع الوقار من صديقك عدنان مرة اخرى..
في انتظارك..
|
Post: #5
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-05-2009, 06:15 PM
Parent: #4
| Quote: الحكاية نجن في امريكا غربتنا دبل ناس الخليج |
سلامات يا ناجي
ناس الخليج ديل ما عندهم أي غربة..يا اخوي ديل للنفرة بيسووها تقول لي غربة..بس انتو
كمان بهلتوها شديد في حكاية بلوبلو دي..الزولة دي زمانها فات و غنايا مات .
|
Post: #6
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-05-2009, 08:59 PM
Parent: #5
هلا يا سيف الدولة و اتمنى لك تجربة جيدة مع سودانيزاونلاين
Quote: لكن حضرنا حنان بلوبلو في
مجدها وما بقدر احكي ليك |
و الله لو حكيت بيكون احسن..ياخي ده تاريخ و من حق الاجيال القادمة...طلع الفضائح يا ابو السيوف.
|
Post: #7
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-06-2009, 06:37 AM
Parent: #6
سلامات يا حسين
May 2nd قريب جدا و اشك في اني احصل لكن البركة في منجزات التكنولوجيا.. بالله سجلوا
لينا كل الوقائع ...عشان نشوف من الذي سقط وقاره و من الذي صمد.
|
Post: #8
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-07-2009, 08:16 AM
Parent: #7
حمى بلوبلو لا زالت مشتعلة في العالم الجديد!!
|
Post: #9
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 04-25-2009, 08:57 PM
Parent: #8
اها قالوا جاتكم نانسي عجاج..حتستمروا في ولاؤكم لبلوبلو و للا المسألة حيبقى
فيها قولان..
انا غايتو كان دايرين رأيي :بقول ليكم اخير ليكم حنان بلوبلو ..امسكوا فيها قوي.
|
Post: #10
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف الدولة كامل
Date: 04-25-2009, 11:26 PM
Parent: #9
سيف النصر....... سلالالالالالالالالالالالالالالالامات
والله كله شفناه,, بس مشتاقين نشوف حمادة بت
ونكون كملنا الناقصة
تحياتيييييييي
|
Post: #11
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف النصر محي الدين محمد أحمد
Date: 05-02-2009, 06:05 PM
Parent: #10
Quote: بس مشتاقين نشوف حمادة بت
ونكون كملنا الناقصة |
يا ابو السيوف الناقصة فيما يخص السودان ما بتكمل..حتشوف حمادة بت و برضو حتلقى نفسك ما كملت
الناقصة .
|
Post: #12
Title: Re: انتو يا ناس امريكا ما شفتو ليكم حنان بلوبلو قبل كده و للا شنو!!
Author: سيف الدولة كامل
Date: 05-02-2009, 06:15 PM
Parent: #11
يا ابو السيوف.... سلالالالالالالامات
يعني مازال الليل طفل,, لسه حايواصلوا ابداع
|
|