قرارات الجنائية:تجاهل تام من قبل الحكومة..ما شغالين بيها الشغلة.

قبل صدور القرار الأخير بشأن الرئيس الجماعة قالوا أنو نحن ما عندنا علاقة بما يسمى بالمحكمة الجنائية
الدولية دي و نحن ما معنيين باي قرار يصدر عنها و بنعتبره كأن لم يكن..
بعدين صدر القرار..اها الجماعة باقيلك انستروا؟؟ غايتو حسب ما بنسمع انهم متجاهلين القرار و اكامبو
و المحكمة لكن كل ما تفتح التلفزيون يا تلقى تقارير عن مسيرات رفض و غضب يا نفرين تلاتة قاعدين ينضموا
في موضوع المحكمة يا اناشيد وطنية..و شريط الرسايل اسفل الشاشة كلو ادانات للمحكمة و تضامن مع الرئيس
و توعد للعملاء و الخونة..الاذاعة خلت عملها كلو و قبلت علي المحكمة..الجرايد ليها اكتر من اسبوع ماجابت
سيرة شي غير المحكمة..الحكومة الاتحادية و الحكومات الولائية ما عندهم شغلة الايامات ديل بلا المحكمة..
ناس صلاح غريبة و ود الباوقة ينوموا و يصحوا بالمحكمة..
آ ناس اثبتوا علي كلامكم الاولاني و اعملوا نفسكم مطنشين..عشان منظرنا بقى بايخ قدام العالم.

سيف النصر
مسكاقمي
بعد ده كلو ورغم السيطرة الكاملة علي كل وسائل الاعلام مشو اعتقلوا عبد الحكيم من قريتة تولا المحس *قرية صغيرة بالقرب من اردوان المحس)عشان كتب بوست في المنتدي النوبي بعنوان اربعاء باربعاء والبادي اظلم في اشارة لمجزرة كجبار يوم الاربعاء 13-7-2007

عالم غريب.
نسأل الله ان ينتقم من الذين قتلوا الابرياء في كل اتجاهات السودان في الدنيا والاخرة.
وونور كمبون كوقور.

سلامات يا مدحت
ياخي زي عبد الحكيم ده الاعتقال بيزيدوا صلابة و ايمان انو ماشي في طريق الحق..اتخيل انهم اعتقلوه
و هم ما شغالين بموضوع المحكمة...لو شغالين بيها كانو عملوا ؟؟

سيف
ازيكـ


احلى نكتة هذه الايام::


قالوا مجموعة من المساطيل والسكارى خرجوا في تظاهرة كبرى واحتشدوا امام مبنى شرطة النظام العام ، حجتهم هي::

انهم غير موقعين على قانون النظام العام فيجب ان لايشملهم


نفس الفكرة بتاعة ميثاق روما

سلامات يا شمايل
السودانيين كغيرهم من الشعوب المعذبة بقوا يستعملوا سلاح النكتة في احلك الظروف.

Quote: قالوا مجموعة من المساطيل والسكارى خرجوا في تظاهرة كبرى واحتشدوا امام مبنى شرطة النظام العام ، حجتهم هي:: انهم غير موقعين على قانون النظام العام فيجب ان لايشملهم

هسه بشوف برنامج الاطفال على القناة السودانية . اكامبو و المحكمة حاضران بقوة...
برنامج الاطفال يا ناس التلفزيون...بتبالغوا لكن.

و بعد جنة الاطفال جا برنامج مامون حميدة و برضو كانت الافتتاحية عن المحكمة و اوكامبو
حتى بعد داك دخلوا في موضوع الحمل الخطر.

و الله يا دكتور انت الغلطان
معليش انت ما الزول البنصحوهوا لكن صحتك تهمنا
مالك و مال التلفزيون و الاذاعة في الايام الكعبة دي
احمد الله ما عندي قنوات سودانية و لا عربية زاتو
اللهم الا قناة مغربية ما فاهيم بتقول شنو
هي عوة بفوروا و يهدوا بعد شوية
فما تعكر صفوك في الفارغة
قولت لي حمل خطر؟هو في اخطر من حملهم ابو عشرين سنة دا
ح يلدوا ديناصور؟
الله يدي العافية

ولا معترفين بيهو ذاتو

غنمى فى المدرسة وعيالى فى الذريبة

هسى سوو شنو غير زى 200 مسيرة عفوية ما دافعين فيها غير ذى كم مليار

بس وكلوا كدا ذىمليون ونص نبذة وحبة ميات من المقالات

وشوية كم الف لقاء تلفذيونى كدا غايتو انتو بس بتهولو الحاجات ساى

هسى شايفين ليكم اهتمام

الاخ سيف,
بعيدا عن السخرية, كلامك صحيح مائة فى المائة. لاحظ حتى الاكاديمين مضطربين و بيقطعواه من راسهم كل يوم و الواضح ان معظم هولاء لم يقروا ميثاق روما و الذى اسس بموجبه المحمكمة الجنائية الدولية. انا شاهدت واحدة قانونية فى برنامج بتاع إسماعيل حاج موسى بتقول بلسانها عن المادة 13 انها منتشرة فى منتديات الانترنت. تتخيل!!! و شوفت هضربات بتاع سبدرات فى اول فراش للمجلس الوزراء بعد التوقيف. اين القانونين فى السودان يا عالم? حكاية ان المحكمة الجنايات محكمة سياسية و بالتالى ما بتعاونو معها ليس دفاع قانونى: سياسى او غير سياسى, يجب على هولاء اعلام البشير بانه متهم بجرائم خطيرة و لازم يرد على التهم. اما حكاية ان السودان لم يمضى ميثاق روما و بالتالى حر ان يتجاهل الجرائم الموجهه اليه من قبل محكمة دولية, فهذه كارثة و فشل للخيال .

الطرفة التالية منقولة من سودانايل
تقول كاتبتها ساره عمر



يحكى أن أمرأة شايقية تحب الشاي كثيراً قررت فجأة أن تتوقف عن شربه فتحدتها جارتها إن كانت تستطيع.
وفي اليوم الموعود لبدء الرهان استقيظت الشايقية منذ الصباح الباكر وهي تردد "أهو دة أنا خليت الشاي، الحصل لي شنو؟ ولا أي حاجة" وجارتها الجعلية تسمع هذا الكلام.
واستمرت الشايقية تردد طوال اليوم والجعلية تستمع لها عبر السور، إلى أن جاء موعد شاي المغرب فرددت الشايقية مقولتها مرة ثانية: "أهو دة أنا خليت الشاي، الحصل لي شنو؟ ولا أي حاجة"، فما كان من الجعلية هذه المرة إلا أن اطلت عليها من خلف السور قائلة "يعني دايرة الشاي يعمل فيك شنو أكتر من العملو دة؟".
حكومة الانقاذ ظلت منذ أربع سنوات تقول إن المحكمة الجنائية الدولية لا ولاية لها على السودان ولا اختصاص، وأن كل ما يصدر عنها كأن لم يكن، لكن ما أن صدر القرار حتى أخذت الحكومة تحشد الحشود وتقيم المسيرات وخرج الفنان "قيقم" من قمقمه بعد طول غياب.
صار حال الحكومة مثل حال الشايقية التي ظلت تقول إن الشاي لا يؤثر عليها، لكن كانت كلما كررت هذه العبارة أقامت دليلاً جديداً على أن الشاي يؤثر عليها بشدة، لكن حكومة الانقاذ لم تجد جعلية أو جعلي ليواجهها بالحقيقة.

Quote: هي عوة بفوروا و يهدوا بعد شوية

من كيبوردك و لباب السماء يا نصار يا اخوي..العوة دي شكلها مطوووولة بالحيل.
اها رأيك شنو امس السهرة كانت مع شعراء من البطانة قالوا ليهم زي مليون قصيدة كده
عن المحكمة و اوكامبو و اتجدعوا فيها جديع شديد و اخدوا راحتهم ع الآخر...
الناس ديل ما باقي لي بيهدوا قريب.

Quote: هسى سوو شنو غير زى 200 مسيرة عفوية ما دافعين فيها غير ذى كم مليار بس وكلوا كدا ذىمليون ونص نبذة وحبة ميات من المقالات وشوية كم الف لقاء تلفذيونى كدا غايتو انتو بس بتهولو الحاجات ساى

ما سوو شي يا زينب يا بت امي ..كلها حاجات عااادية و ما بتدل علي أي اهتمام بالمحكمة
و لا بالمدعو اوكامبو .
اريتم كان قالو مهتمين و مشغولين و المسألة دي خطيرة و تستحق المواجهة المحسوبة المدروسة بعناية
لكن الطبع يغلب التطبع و الحماقة اعيت من يداويها.

الأخ سيف النصر

هم الجماعة ديل غير الصرف الغير مقنن والأعلام الهلامي مافي شئ جايب ليهم الكفوه

والجميل ناااس السفارات والقنصليات والتمائم الحمراء علي رؤوس مؤتمريهم ورقصات

علي شظاياء البارود الله يكون في عونهم (هي الأنتخابات بدت ولا شنو ؟ ).

بطل شيل حال يا د.سيف الجماعة ديل عاملين حِميِل وأطان جلد كمان بس أنت المتابع بزياده قنواتهم وحتي برنامج أطفالهم كمان!

،،،،أبوقصي،،،،