Post: #1
Title: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-05-2009, 06:12 PM
Parent: #0
شاهدت قبل قليل احدى السيارات تحمل لوحة غريبة وعند تدقيق النظر فيها وجدتها تحمل عبارة السودان باللغة العربية واربعة ارقام واختصار لولاية الخرطوم kh .. اتصلت بعدها باحد ضباط شرطة المرور واكد لي انهم شرعوا في تغيير لوحات السيارات بلوحات جديدة مقروءة آلياً ومواكبة للعصر ..
|
Post: #2
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: الكباشى البكرى
Date: 01-05-2009, 06:20 PM
الاخ معتصم
سلام
عليك الله احجزو لينا رقم مميز معاكم
بعدين مكتوب سودان ولا نيو سودان
دقق شويه.
|
Post: #3
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: نزار الحميدي
Date: 01-05-2009, 06:23 PM
Parent: #2
نستا
وين الصور
كل سنه وانت طيب
|
Post: #5
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-05-2009, 06:28 PM
Parent: #3
والله يا نزار شلت الكاميرا وجريت على العربية لقيتا شتتت .. مع انو كان في زحمة ..
لكن ليك علي اجيب ليك صورتا ..
صورة النمرة طبعا ..
|
Post: #6
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: القلب النابض
Date: 01-05-2009, 06:29 PM
Parent: #3
عارف يا معتصم بالامس كنت اسير في شارع الجامعة سارت امامنا عربة مكدسة بشباب وتسير بطريقة غريبة وتتخطى السيارات بهمجية واهمال
حاولت النظر الى رقم السيارة فوجدتهم يطلون نمرة السيارة بلون أبيض بحيث لا تستطيع ان تقرأ رقم السيارة( مفروض الرقم يكون بالاسود واللوحة بالابيض)
وهذا مدعاة لتساؤلات كثيرة كيف يسمح لسيارة تغطي رقمها ان تسير ماذا لو كانت السيارة مستخدمة لإرتكاب جريمة وسرقة أو غيره
خاصة وانه في الفترة الاخيرة برزت ظاهرة سرقة موبايلات من محلات الاتصالات بواسطة سيارات جميلة ولكن ارقامها اما مطلية بالابيض أو ملطخة بالطين بحيث لا يمكن قراْة الرقم
.. حقو ناس الحركة يلاحظو للحركات دي
|
Post: #23
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:22 AM
Parent: #6
الاخت القلب النابض ..
فعلا هنالك فوضى عارمة تجتاح الخرطوم في ضبط السيارات وحركتها والملطخة اللوحات اخف قدرا من التي لا تحمل لوحات اصلا وهي كثيرة والمؤلم ان كل السيارات المخالفة اما حكومية أو تتبع لحكومي أو حركة شعبية .. ويضاف للفوضى التظليل الذي عاد للتمدد بعد انحساره عقب الحملة الشعواء التي شنتها ادارة المرور في شهر اكتوبر الماضي ونزعت فيها تظليل سيارات ضباط الشرطة اولا لكن الحال عاد اسوا مما كان .
|
Post: #4
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-05-2009, 06:27 PM
Parent: #2
يا كباشي ..
سلامات ياخ ..
اللوحة كالاتي
الســودان
9999 KH 99
اقول ليك شفت لوحات السعودية .. بس شفوها منهم .
ولا اقول ليك ..
اصبر على التصبح بس بصورا وبجيبا ليك ..
|
Post: #7
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: Alshafea Ibrahim
Date: 01-05-2009, 06:35 PM
ألأخ معتصم:
أذكر أنه في خلال الخمس سنوات الأخيرة طرأ تغيرين على لوحات العربات . أنا شخصيا رخصت ابو حرفين وكم رقم .. وبعد سنة تقريبا مشيت وقالوا طلعت ابو 3 أحرف وكم رقم وبتكلفة باهظة غير مبررة .. وكنت على يقين تام أن المرور سوف يقوم بإصدار لوحات جديدة .. ومستغرب لتأخير هذه الخطوة ... المؤلم حقا هو المغالاة في سعر وتكلفة هذه اللوحات يعني المقصود منها (توسيع) (مواعين الجبايات) للمرور وهي بعيدة كل البعد من الواقعية والعلمية والتنظيم الدائم المستمر الذي يجلب الراحة والقبول لملاك العربات .. ليت التغيير يكون (بلاش) مع الترخيص إعمالا لحسن النية في الخطوة التي نجزم أنها لن تكون الأخيرة في سلسلة تغيير اللوحات .. خاصة وأن سلطات وحقوق المرور على المواطنين بقانون أو بدون قانون لا تطاق ومؤلمة وباهظة ... والشكية لله وحده ...
الشفيع إبراهيم
|
Post: #21
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:12 AM
Parent: #7
| Quote: المؤلم حقا هو المغالاة في سعر وتكلفة هذه اللوحات يعني المقصود منها (توسيع) (مواعين الجبايات) للمرور |
الشكية لله اخي الشفيع ..
|
Post: #8
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: انعام حيمورة
Date: 01-05-2009, 07:38 PM
وتدخل بذلك اشراقة حيمورة تاني لوحة ارقام مكتوب عليها اسم السودان اليوم .. حيث رخصت عربتها (الافيتا) الجديدة ...
الف مبروك يا اشراقة العربية واللوحة الجديدة والرقم المميز (2002)
معتصم كل سنة وانت طيب
|
Post: #9
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: Salahaldeen Nadir
Date: 01-05-2009, 08:21 PM
Parent: #8
الليلة وووووووووب
(على قول أميرة الشيخ)
يعني ح ندفع رسوم جديدة مش؟
ونقيف في صف قدام شركة (يلوحون) الماخده إمتياز اللوحات الجديدة مش؟
ده الفالحين فيه
كرهتونا البللي زاتو ياخ
قلت لي مقرؤة أليا؟؟
ههأ أو
!
|
Post: #10
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: يسرى معتصم
Date: 01-06-2009, 00:27 AM
Parent: #9
معتصم أخوى سلامات
من النمر البارزة لأرقام دولية .... ماشاء الله
نفسى أعرف سر أعجاب السودانيين بالرقم المميز شنو
هنا فى أمريكا كل شئ تغير رقم تلفونك كل يوم ...
كذلك لوحة العربية ملك لصاحب العربه يعنى تبيع العربية بدون لوحات وتحتفظ باللوحات للعربية الجديدة .... وممكن تختار أى أسم بعد دفع فرق سعر شوية دولارات
تعرف أول عربية أشتريها فى أمريكا لوحاتها كانت
WADKASSALA
تقديرى
|
Post: #14
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 05:51 AM
Parent: #10
سلامات يا يسري ..
وربنا يعافي الخال ..
الامريكان اصلهم بتاعين شطحات ..
بعدين نظام الاسم ده لو جابوه لينا الا تكون النمرة بطول الصدام ..
|
Post: #20
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:09 AM
Parent: #9
Quote: الليلة وووووووووب
(على قول أميرة الشيخ)
يعني ح ندفع رسوم جديدة مش؟
ونقيف في صف قدام شركة (يلوحون) الماخده إمتياز اللوحات الجديدة مش؟
ده الفالحين فيه
كرهتونا البللي زاتو ياخ
قلت لي مقرؤة أليا؟؟
ههأ أو
! |
هوي يا صلاح امشي شوف الكهرهك البلي منو .. انا حصل لعبت معاك ؟؟ انت ذاتك قالو خرخار ..
|
Post: #22
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:16 AM
Parent: #8
Quote: وتدخل بذلك اشراقة حيمورة تاني لوحة ارقام مكتوب عليها اسم السودان اليوم .. حيث رخصت عربتها (الافيتا) الجديدة ...
الف مبروك يا اشراقة العربية واللوحة الجديدة والرقم المميز (2002)
معتصم كل سنة وانت طيب |
مبروك يا اشراقة العربية والرقم المميز ..
شكرا انعام .. وتاني شكرا
|
Post: #11
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: يوسف الولى
Date: 01-06-2009, 01:10 AM
| Quote: لوحات السيارات بلوحات جديدة مقروءة آلياً |
حاولت اقنع نفسى واتخم بالعباره دى زى كل الناس .. بس ال( الخمه ) ابت
يا جايب الشمار .... يعنى شنو لوحات مقروءة آلياً
|
Post: #12
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: ALazhary2
Date: 01-06-2009, 05:30 AM
Parent: #11
.
.
يامعتصم في واحد خليجي مشى إدارة المرور في بلده داير يدوه لوحة عربية حروفها (أبو قيس) على إسمه فقالوا ليه ورينا عرض أكتافك . المهم صاحبنا سكت وزعل وطلع ، قام في الطريق شاف عربية لوحتها (أبو ظبي) قال : الله يلعن أبو الواسطة .
برضو قال ليك في واحد مصري كضاب كضب السنين إسمو أبو عرب ماسك ليك الناس في السوق شابكهم إنو امبارح كان مساهرين معاهو أبو جهل وأبو لهب وأمية بن خلف والحارث بن حلزة ، المهم عذب الناس عذاب شديد وقاعد يحلف على الكلام ده ، فقام واحد قال ليهم لزول ده كضاب لكن مرتو أم عرب مابتكضب نمشي نسألها، فقاموا مشو ليها وقالوا ليها الراجل ده قال كده وكده ودايرين نعرف الحقيقة إنتي شفتي الناس ديل؟ قالت ليهم : الكضب خيبة أنا ماشفتهم لكن شفت عربية قدام الباب مكتوب في لوحتها : ملاكي قريش
عارفن بايخات لكن يادوب صاحي وشفت موضوعك ده .
غايتو
المهم .
.
.
|
Post: #19
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:08 AM
Parent: #12
قوية يا ازهري ..
لكن انا قبيل الصباح في البيت لما قريت مداخلتك لقيت حقت ناس ابو ظبي .. ولما وصلت المكتب لقيت حقت ناس قريش دي ..
عادي يا عمك اصلو البلد دي اي حاجة فيها بتتغير بدون مقدمات زي نمر العربات ..
|
Post: #24
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: Adam Mousa
Date: 01-06-2009, 09:20 AM
Parent: #12
لا لا يا ازهرى انت حرفت الاسم الاول شويه..معتز قريش ..مش ملاكى قريش
|
Post: #13
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 05:49 AM
Parent: #11
Quote: حاولت اقنع نفسى واتخم بالعباره دى زى كل الناس .. بس ال( الخمه ) ابت
يا جايب الشمار .... يعنى شنو لوحات مقروءة آلياً |
يا عمك ..
يا اخي دي الحكومة هي القالت مقروءة اليا .. مش الحكومة تقول اليا بصليا ..
لكن مع ذلك سالت ناس الحكومة وقالوا اليا دي يعني النمرة دي ح يكون عندها اتصال مع الردارات التي بدأ تركيبها فعليا في التقاطعات .. والنمرة تحمل شريحة الكترونية بداخلها ..
بالله لو عندك سؤال تاني وجهو للحكومة ..
|
Post: #15
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: Hala Hassan
Date: 01-06-2009, 06:38 AM
Parent: #13
يا معتصم،
| Quote: لكن مع ذلك سالت ناس الحكومة وقالوا اليا دي يعني النمرة دي ح يكون عندها اتصال مع الردارات التي بدأ تركيبها فعليا في التقاطعات |
خبر شنو الجايبو من الصباح دة؟
قلت لى رادارات؟؟؟؟
أنا تانى أمشى قندهار كيييف؟؟
إنعام،،
Quote: وتدخل بذلك اشراقة حيمورة تاني لوحة ارقام مكتوب عليها اسم السودان اليوم .. حيث رخصت عربتها (الافيتا) الجديدة ...
الف مبروك يا اشراقة العربية واللوحة الجديدة والرقم المميز (2002) |
شنو حكاية اللافيتا معاكم؟؟
تكونى خليتى الطيارات و اشتغلتى فى العربيات؟؟
الف مبروك العربية يا إشراقة،،
الله يديكى خيرها و يكفيكى شرها..........
|
Post: #16
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معاذ حسن
Date: 01-06-2009, 07:17 AM
Parent: #15
| Quote: والله يا نزار شلت الكاميرا وجريت على العربية لقيتا شتتت |
ابونون..تحياتي
يا اخي شوف ليك عذر جديد
قبل يومين قلنا ليك وين صور الطيارات
قلت مشيت جبت الكاميرا لقيتا شتتت!!(معقولة تلاتة تاتات دي كلمة شنو)
تاني كمرتك دي خليها استاند باي.
|
Post: #17
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:03 AM
Parent: #16
ازيك يا معاذ ..
الطيارات قالو لو صورناها بصورونا عشان كده خليناها تشتت
|
Post: #18
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: معتصم محمد صالح
Date: 01-06-2009, 08:05 AM
Parent: #15
يا هندسة ..
الخبر ده من امبارح العصر ياخ صباح شنو ..
بعدين قندهار دي ذاتا ناس الحكومة كونوا ليها لجنة والدخول ح يكون بالبطاقات .. وسيصدر قانون جديد اسمو ( دفع المعلوم قبل التهام اللحوم ) ..
|
Post: #25
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: خالد عبد الله محمود
Date: 01-06-2009, 10:12 AM
| Quote: اتصلت بعدها باحد ضباط شرطة المرور واكد لي انهم شرعوا في تغيير لوحات السيارات بلوحات جديدة مقروءة آلياً ومواكبة للعصر .. |
ده شنو ده يا ريس ؟؟؟
ده كلـو حاصل في البلد و أنت آخر من يعلم ؟؟
|
Post: #26
Title: Re: شرطة المرور تشرع في تغيير لوحات السيارات بولاية الخرطوم بلوحات جديدة تحمل اسم السودان
Author: القلب النابض
Date: 01-06-2009, 12:21 PM
Parent: #25
أخي معتصم أن اتحدث عن التهاون في اشياء متعمدة من مستعترين مثل طلاء نمرة السيارة بالابيض حتى لا يتبين الرقم .
مثل هذه السيارة يجب على شرطة المرور ايقافها وان تدفع غرامة وان تعرف اسباب طلاء النمرة ( هذه ناحية امنية ) ربما ينوي ارتكاب جريمة بها كما حدث مع محلات الاتصالات .. واظنك تعرف الحكاية.
أي شخص يغطي رقم السيارة لاي سبب لابد أن يرتكب شئ لا يريد أن يعرف رقم السيارة
عليه لا بد من إلزام أي سيارة بالالتزام بالمواصفات في الرقم
|
|