عن نسيبتي بقولكم .. للمتزوجين فقط!!!

عن لي أن أطرح السؤال التالي:
ماهو السبب في سوء العلاقة او توترها بين الزوجة وام زوجها؟؟؟؟
وهل دائما النسيبة مصيبة ولا أحيانا ....؟؟؟
وماذا عن شخصية الرجل في البيت وعلاقتة بزوجتة ووالدتة؟؟؟
لماذا كلمة (النسيبة) حتى في الجرس بتشبه (المصيبة)..؟؟؟

# ممكن نستعين بصديق،،،،

وراجع ليكم بعد الاجازة ببعض الكتابات عن النسيبة والطرف..

هذا العنوان بذرة نص جديد .. جاء دون سابق إصرار أو ترصد

تعرف يا حسين
في كلمات في الدنيا دي بخاف منها زي

نسيبه - بنقو - خمرة - بوليس - بامبرز كمل .. الخ









_________
وطي صوتكـ ياخ في زول بجيب سيرة النسيبه في النت

خدر قول بسم الله .. بقيت تهضرب من جبنا السيرة .. كدي قول لينا أي فيلم حضرته وكنت شاهد عين..
وسرك في بير

القصة مجوبكه ..
صدقوني ما بعرف معنى كلمة مجوبكه لكن بسمعها كتير.
المهم المعادلة ناقصة ياصديق !!
لان هنالك في المقابل قصة علاقة الرجل بام الزوجة ..
عشان نكون عادلين !!!نتكلم عن الاتنين !!
والموضوع عاوز بحث متخصصين .. لو في واحد ما بيخاف من مراتو يجي يتكلم
اتكلم
****
وهمسه على انفراد(انت متزوج)
سيبك من نسيبك .. وما يصيبك الا نصيبك !

Quote: وهمسه على انفراد(انت متزوج) سيبك من نسيبك .. وما يصيبك الا نصيبك !

مالك علي
أنا صغير وجاهل
بس الحركة حلوة
وزي ماقلت فوق "الموضوع جاء بدون تدبير مسبق"

welyab
شكرا على المرور

بالله دا كلام ليك يا ود محي الدين
يا جنى مالك ومال النسيبة والمصيبة
كان عرستا نقول ممكن يكون هبشك رأس السوط
بس الظاهر عليك بتجهز
ومن ضمن التجهيزات الاحتياطات اللازمة للحبيبة بالنسيبة


شيل شيلتك مافي شيتن بحلك
النسيبة وراك وراك
والحبيبة قدامك قدامك
وإنتا يا صاحبي بين نارين حتتقلب



شوف
أوعك تفكر إني بكتب الكلام دا لأني باكي من النسيبة أو الحبيبة
والله لا
نسيبتي زي الشربات
وحبيبتي سكر نبات

ودي ما مكنات مني لأنو مافي حد على الإطلاق منهم حيقرأ كلامي دا
يعني براي سارح ومارح



تسلم يا جميل

ود الفاضل (حضور) والله زمان يا جميل..
بعدين منو القال ليك ما حيقرو الكلام ده..
وبيني وبينك دي تجهيزات عشان لما الفاس تقع في الراس الواحد يعرف يتصرف
تحيات طيبات

نَسِيبٌ - ج: أَنْسِبَاءُ. [ن س ب]. (مص. نَسَبَ). 1."هُوَ نَسِيبِي" : أَيْ قَرِيبِي، صِهْرِي.

كسر للروتين ام سوء تفاهم
إستطلاع أجرته صحيفة (الصحافة)

* مى عمر متزوجة منذ خمسة اعوام تقول:
ام الزوج تعتقد ان ابنها الذي حملته تسعة وتسعة وارضعته ورعته ودرسته تقلد احسن الوظائف وعرف طريق الكسب سيكون فجأة في يد امرأة اخرى قد تفرض عليها سيطرتها وسلطاتها وتأسره .... ويظل الابن (الزوج) في غياهب سجون تلك المرأة وهي ستفقده الى الابد.
* رحاب ابراهيم تقول ان علاقتها جيدة جدا مع ام زوجها ولكن تعزى سوء العلاقة الى:
ان الأم تضع في ذهنها ان ابنها لن يضعها ابدا في اولوياته طالما اصبحت له امرأة يتفاكر معها ويشاورها في الامر خاصة اذا كانت الام من النوع صاحب ا لرأى والسلطة في البيت قبل زواج ابنها او النوع صاحب الكلمة فترى ان بعد زواجه لايمكنها ان تمشي عليه كل ماتريد.
* نهي عبدالجليل:
تزوجت ثلاث سنوات دائما ماتقع المشاكل بيني وبين نسيبتي في انها ترغب في ان يحقق لها ولدها كل احلامها التى كانت تحلم بها وهو في مرحلة الطفولة فما ان يجمع قليل من المال الا وتظهر الاحتياجات مرة الحج ومرة بنيان وصيانة المنزل والمشكلة انه ليس الابن الوحيد فنسيبتي احلامها لا تنقطع ودائما تنسى ان ابنها بعد الزواج له مسؤوليات جديدة وهي لا يهمها حتى وان كان ما تحتاجه خصما على احتياجات ابنها.
* مواهب تيسير تحدثت معي بصوت يملأه الالم..
في سنوات زواجي الاولى كانت ام زوجي تعاملني بلطف حتي انني كثيرا ما اجد منها حنان والدتي التي فقدتها وانا صغيرة.. وبعد ان انجبت بناتي الثلاث اصبحت تختلق المشاكل وتمسك في ابسط الاشياء وتطورها الى ان جاءت في يوم وطلبت من ابنها ان يتزوج باخرى حتى تأتي لها بالولد وعندما رفض طلبها قالت له (ماعافيه منك) فهل تعتقدي ان تكون العلاقة جميلة بيني وبين شخص يريد ان يحطم بيتي؟
* بعد ان استمعنا للزوجات كان لا بد من الاستماع (للنسيبات)..
* حاجة فاطمة:
ولدي واحد من بين سبعة بنات وحقيقة بحبه شديد وانا ما بكون الخلافات بينو وبين زوجته فهي ترفض ان ينفق ابني علي لانها تتخيل ان اي (مليم) يكسب لها هي وابنائها ومهما كتر ماله ترى انها في حاجه له.
(حاجة) نفيسه استوقفتها في منتصف الطريق وسألتها فقالت:
انا ما عندي ولد حتى تقع مشاكل بيني وبين زوجته ولكن ابنتي كل مشاكلها من (حمواتها) وقديما قالوا (ضر الضراير سار وضر الحموات سكن الدار) واظنها تقصد بهذاالمثل ان الحقد بين اخوات الزوج وزوجة اخيهم اكبر من الحقد بين الزوجة الاولى والاخيرة، فالبنات بطبعهن يؤثرون على الام لانهن اقرب اليها ويستطعن شحنها وتعبئتها بكلام قد لا يكون في مصلحة ابنها وقد يكون سببا في خراب البيوت.
* مريم يوسف
زوجة ابني غريبة يعني ما مننا لكن والله تعاملني معاملة طيبة وكريمة ودائما تضعني في مقام والدتها واحتمال يكون سبب المعامله الطيبة ناتج من المسكن المتصل فانا عندما اراد ابني الزواج اشترطت عليه ان يكون له حياة منفصلة وقد طلبت مني زوجته اكثر من مرة ان نطبخ مع بعض ولكني رفضت وبشدة وقلت ليها (احسن من بعيد)
* زهرة خليل
اكمال زوجة ابني مثل ابنتي ونحن بحكم المنزل الصغير اصبحنا في مكان واحد انا انسانه بحب النظام بطبعي وما بحب (الحال المايل) وخلافاتنا تأتي من هنا فانا اقوم بنظافة الاطفال والمنزل ولااحب ان يتسخ الاطفال وهي لا تقبل اي توجيه اقدمه لها او لبناتها والشئ الغريب انها دائما ما تحاول ان توقع بيني وبين ابني ولكن دون جدوى.
* حاجة بهية كانت متحفزه بعض الشئ فقالت:
العداء وسوء الفهم يكون بين النسيبه وزوجة الابن على حد سواء الا ان زوجة الابن تتبنى العداء وتكون هى اكثر حقدا وما ان تجد فرصة مع صديقاتها واخواتها والا ومشت تشكي عن ام زوجها ومواقفها معها فنحن معشر النسيبات مظلومين من جانب المجتمع وحتى ابناءنا كثيرا ما يصدقوا ما تقوله زوجاتهم حتى وان كان كذب وافتراء.
سارة ادم
العلاقة بين الزوجة وام الزوج تحتاج الى وعي وتنازل عن الصغائر والاحترام المتبادل بين الطرفين وفي نفس الوقت تحتاج الى رأى الابن الحاسم وعدله بين امه وزوجته وعدم وضع الام في موضع مقارنه مع الزوجة فهناك زوجات ابناء يتعاملن بصورة عقلانية وراشده وهناك امهات ازواج لشدة حنانهن وتعاملهن الطيب مع زوجة الابن تظن انها ابنتها.. ونصيحة اوجهها للامات والزوجات (ابتعدوا عن سوء الفهم المفتعل) حتى يتوفق الزوج وترضي الام وتسعد الزوجة.
ولاهمية هذا الموضوع كان لا بد من استصحاب رأى علمي بخصوص هذه القضية فكان لقاؤنا مع الدكتور اسامه الجيلي مصطفى استاذ علم النفس بجامعة النيلين..
يقول ان توترالعلاقة بين النسيبه وزوجة الابن تتعامل معها كظاهرة وجدت في المجتمعات منذ القدم وخصوصا في المجتمع السوداني وقد ترجع الى المفاهيم الاجتماعية الخاطئة في الماضى والتى استمرت للاسف الشديد في اللاشعور الجمعى للاجيال واصبحت سمة مميزة للمجتمعات الا في بعض الحالات النادره.. فالنسيبة انسانه لها مكوناتها تؤثر وتتأثر بسلوك الآخرين وهذا يمنحها الحق المطلق في كيفية التعامل وفقا لمتطلبات الموقف بمعنى انها اذا وجدت المعاملة كريمة من زوجة الابن فهي قطعا ستبادلها نفس الاحاسيس والمشاعر والسلوكيات والعكس قد يكون صحيح تماما.. ومع الاسف الشديد فان المجتمع يتعامل وفقا للصورة الذهنية المسبقة والتي هي بالتأكيد مغلوطة وخاطئة..
ويرى دكتور اسامه ان المعضلة الاساسية تجاه القضية تكمن في الانسان وفي الانسان تكمن في بنات حواء فدائما ما يكفرن العشير وينسين الفضل ويتعاملن مع الامور بشئ من السطحية الآنية وهذا نوع من الجهل ليس له اساس ولا قاعدة في الشرع ولا فى المجتمع الانسانى ويضيف دكتور اسامه ان ذلك مؤشر لابتعاد من يتعاملن بهذه الطريقة ومن يحمل هذه الصفات وزوجات الابناء عن القيم الدينية الاصيلة النابعة من اصل الدين الحنيف الذي يحثنا دائما على المعاملة الكريمة بل الدين في الاصل المعاملة والقاعدة تقول ا لاقربون اولى بالمعروف.
ويتساءل دكتوراسامه في ختام حديثه قائلا لماذا تصر بعض النسوة على مثل هذه التصرفات غير اللائقة لا دينيا ولا اخلاقيا ولا اجتماعيا ووجه لهن بعض النصح بان يبعدن هذه الصورة السالبة لان ا لنسيبات في كثير من الاحيان قد تكون هي الركيزة الاساسية للاسرة ودائما ما تعمل على حفظ التوازن في الحالات الحرجه والحالكه بل قد تصل الى حد التضحية في سبيل اسعاد الآخرين وضمان استمرارية اسرة ابنها.

عن نسيبتي بقول لكم
زولة أروع ما يكون
لا بتجيب لينا المشاكل
لا بتشيل غيمة هموم
وعن نسيبي لعلكم
وأظنكم قد تعرفون
أنها أروع نسيبة
ومنتهى ماقد يكون


أواصل أن شاء الله
وفي مواقفكم مع نسايبكم

اخوتى الكرام

سلامات

لا اعرف لماذا مفردة نسيبة لماذا لا تكون الام للزوجين
عن نفسى افكر من زاوية واحدة ما دمت انا احب امى واقدرها
لابد ان احب ام زوجى كما احب امى وهى امى الثانية
ولابد ان اضع فى اعتبارى شئ هام ومهم للغاية هى امه التى
حملته وولدته وتعبت فيه فهى صاحبت الحق فيه والفضل
ان لم يحترم امه لن يحترمنى ولن اسعد فى حياتى معه
احمدالله حتى اليوم اقول لام زوجى يا امى مما جعل زوجى يقول لامى يا امى
اعملوا بنصيحتى تعيشو سعداء انتم وابناءكم

انتصار

انتصار
كل الناس لو كانت زيك
كان عشنا سمن عى عسل
وراجع ليك
تحية ود

الزوجه و النسيبه امرأتان تحبان نفس الرجل لاسباب مختلفه

طالما في حب .. إذن نحنا محتاجين شوية توازن
ولا انا غلطان
دانيا
شكر للمداخلة

النسيبة العجيبة
ياشباب
شكله الناس خايفة
وأنا أيدي في الموية الباردة



نسيبتي العزيزة
ممتن لك جدا
عشان خاطر عيون بتك!
حبيبتي،،،

أحي أنا من المابدورو دا.



يازول بوستك دا زول بيجيك فيهو مافي.
الناس دي كلها ممغسة ... لكن هارشة.

يني لو في طريقة كتابة بحبر سري ممكن تحصل مداخلات.
غير كدا اي زول يكتب بيجيب الكتاحة لرقبتو.


أنت الظاهر عليك غاوي مشاكل.

Quote: اي زول يكتب بيجيب الكتاحة لرقبتو.

كتاحة عديل
والله لقيتك جرسة
وبعدين تعال هنا
في نسايب ظراف ولطاف ..


ويا نسيبتي
أنا ليك يغني عشان لأني!

احمد الله لي نسيبة بتحبني اكتر من بنتها.


المصريين بيكرهوا النسيبة جدا

... هاك النكتة المصرية دي

نبويه بتنادي بأعلى صوتها من البلكونه على جارتها: الحقوني حماتي عوزه تنتحر و ترمي نفسها من الشباك !

قالت احدي جاراتها: وانتي مالك يا نبويه

قالت: الشباك ماينفتحش

Quote: نبويه بتنادي بأعلى صوتها من البلكونه على جارتها: الحقوني حماتي عوزه تنتحر و ترمي نفسها من الشباك ! قالت احدي جاراتها: وانتي مالك يا نبويه قالت: الشباك ماينفتحش

تراجي حبابك
بس ماقلت لينا رايك شنو
في الانتظار
تحايا نضرة

حبيبنا
شكرا على المداخلة الحلوة
والنكتة الاحلى
كل الود

أول حاجة أعلق على الكلمات القالها خدر وبالأخسسس البامبرس كمل!! تعرف أنا هسع فكرت أسمي ولدي أبو هريرة يا مان كل يومين أنا (شايل القفة) وجايب ليه بمبارس!! يا حليل زمان الواحد البولندا دي بفكها عادي في نفسه ولا في زول بسألو.

والله بالنسبة للعلاقة بين الزوجة والنسيبة حسب خبرتي بتنشأ المشاكل لمن أم الزوجة تتدخل في الموضوع وتبد الكلام الفاضي بتاع أبقي عشرة على راجلك !! ما تخلي أهلو ديل يمصو دمو .. يا هبلة فكري في مستقبلك ... وبعدين المسألة في أغلبها أزلي وبتترواح حسب النوع ومستوى الفهم

أما بخصوص النسيبة (أم الزوجة) والله والحق يقال أنا عندي نسيبة (نيران منقد) الحمد لله في احترام شديد متبادل بينا ووالله أنا بالنسبة لي أم حقيقية ...وبعدين أحلى حاجة لمن المدام تفرفر طوالي أخوك بعمل زيارة ورسل ليها وهاك يا الكبكبة والجرسلين أخوك بكون قاعد زي الملك ... المدام بتكون اليوم كله بتاخد محاضرات من أمها عن إنو طاعة الزوج من طاعة الله وأنا أكون متشرشح ما أصحابي في القهاوي حريق وشيشة... وأناكل ما تضفر المدام أشيل وأجيب في الهدايا .. المهم نرجع للموضوع والله نسيبتي إمرأة فاضلة ودائما ما أسعد بوجودها بيننا.


شتتتتي !!! خلاص المدام مشت من جنبي !!! يلا نرجع للموضوع بكل صراحة وأريحية (جست كيدينج)

أمير

حسين !!

مودتي ...

موضوع رائع جدا ..

هناك سؤال مهم لماذا يهتم بعض الأزواج بنسيباتهم ويضعها في مكان والدته في أغلب الأحوال ولكن يحدث

العكس بالنسبة للزوجة .. عداوة شديدة بعد محبة ؟؟

Quote: عن نسيبتي بقولكم

أسجّل إعجابي بالعنوان..


موضوع لطيف..
أعتقد أن الأمهات عادة ظراف مع رجال بناتهم
وصعبين مع نسوان أولادهم..

_____
وهي للأسف -قد- تعني أن المرأة تتفنن في تعذيب المرأة..

Quote: وهي للأسف -قد- تعني أن المرأة تتفنن في تعذيب المرأة..

نجوان براك سويتها في نفسك
هسة الحالة دي ممكن نسميها عنف ضد المرأة

تحيات طيبات

ما تاخدي كلامي ده مرجعية
لكن يمكن شغالين بالمثل
كترة الطلة بتمسخ خلق الله


عواطف
اشكرك جدا على المشاركة

Quote: أنا هسع فكرت أسمي ولدي أبو هريرة

يازول قول بسم الله

Quote: أكون متشرشح ما أصحابي في القهاوي حريق وشيشة...

ايامك والله


أمير
شكرا للمداخلة
والتحية عبرك لنسيبتك الرائعة تلك