مشروع الجزيرة خسران منذ الستينيات

مشروع الجزيرة خسران من الستينيات

يا معالي دولة الرئيس عمر حسن أحمد البشير بعد التحية والإحترام.. أتمنى أن يصلك جوابي هذا ويجدك بخير وعافية. أما إذا سألتم عنا نحن ناس الكنابي فالحمد لله بخير لا نفقد إلا (سوى) عدم رؤياكم. "الزول الاخترع الجملة دي أحسن من كتب رسالة وابحثوا عن السبب". سمعنا يا معالي دولة الرئيس – في السايبر- (لكن ناس حلة السايبر دول كتيرهم كضاضيب) أنك قلت: مشروع الجزيرة خسران من الستينيات وكان عاله على الدولة أعتقد أنك قلت كان عالة على الحكومة. الكل عالة على الدولة حتى الحكومة نفسها عالة على الدولة. لكن لو كلامك دا صاح سوف تنطبق عليه الحكمة القبرصية الفلسفية. قال ذلك القبرصي: كل ناس قبرص كذابين. فهل حديثه صحيح أم كذب؟
في ميزانية العام 1966/1967 (زمان كانت الميزانية تبدأ شهر يوليو وتنتهي بنهاية يونيو من العام التالي) حتى غيرها عبقري زمانه عبد الرحيم حمدي والذي أجزم أنه لم يكن يعرف السبب في أن الميزانية كان كذلك. في تلك الميزانية كان دخل الحكومة ينقسم على ثلاث اقسام: يأتي مشروع الجزيرة بنصف الدخل من العملات الحرة والجنيه السوداني واحد منها.. وتأتي السكة الحديد بربع الدخل في الميزانية وتأتي صادرات الحبوب الزيتية والصمغ العربي والمواشي بأنواعها بالربع الرابع. وكانت الميزانية رابحة والفصل الثاني على ودنه حيث قام إمتداد المناقل دون قرض من أي دولة.
العرب قالت:"حلّا بالليد ولا حلّا بالسنون" ولكن لأن الأوضاع معكوسة فنحن نستخدم سياسة البصيرة أم حمد. نذبح الثور ثم نكسر الزير. وبما أن ناس الجزيرة دول كانوا عايشين عالة على الحكومة! نقترح أن نفضي الجزيرة من الناس ونقسم الأرض قطع سكنية فاخرة حتى تحصل الحكومة على أكبر عائد وتسدد الديون التي على المزارعين. وكل مزارع يزرع ليهو جبراكة (دي من الغرب يا ود المصطفى) صغيرة على قدر حاله وتكون المشكلة انحلت بقدرة قادر ويا دار ما دخلك شر.
أما مقترحنا الثاني وهو مطلب بسيط هو أن تغيِّر الزول البكتب ليك خطاباتك خاصة من خطاب الوثبة وتعال جاي. لقد سمعت خطاب الوثبة من البداية وحتى النهاية ولم أفهم بالضبط ماذا تريد أن تقول! ولكن عزيت السبب على بطء فهمي وعدم قدرتي على إستيعاب كلام المثقفين ناس عبد الله علي ابراهيم. ولكن وافقنا على كلامك كان صاح ليك وكان طلع كُتر يكون عليك ونحن براءة.
ودعوة للإخوة المقربين من معالي دولة الرئيس عليكم الله الزول دا انصحوه شوية وما تخلوه يشطح في كل مرة بكلام لا داعي له ولا يخدم غرض لا للحكومة ولا للشعب الصابر على كل الحاصل فما تزيده زيادة مافيش داعي لها.
زر قناتي في اليوتيوب من فضلك واشترك فيها
https://http://http://www.youtube.com/user/KabbashiSudanwww.youtube.com/user/KabbashiSudan

كبـّاشي الصافي

(العوج راي والعديل راي)

كباشى يا حبيب سلام، وعسى بت عمى والوليدات بخير..
يعنى انت بتعرف اكتر من الحكومه؟ مش هم الحكومة وعارفين كل حاجة!!!
اللمبى صاحب اللمبى ده قال مشروع الجزيرة خسران منذ الستينات
طيب هاك شوف ده من الوثائق البريطانية، تقرير سنة 1950 - 1951
بلغت ارباح مشروع الجزيرة مبلغ ثلاثة وعشرون مليون جنيه استرلينى

وقد إستخدمت الحكومة البريطانية هذه العائدات فى تشييد الاتى:
(1) ميناء بورتسودان.
(2) توصيل سكك حديد إلى الخرطوم – مدني – بورتسودان.
(3) بناء الوزارات بالخرطوم.
(4) بناء كلية غردون.( مبانى جامعة الخرطوم حالياً)
(5) بناء خزان سنار والقنوات والمواجير حتي نهاية المشروع.
(6) انشاء سكك حديد الجزيرة.
(7) استجلاب وانشاء المحالج والهندسة الزراعية

تجى انت يا معارض تقول لى البشير مشلخ وماناقش؟ والمشروع ما خسران؟
والله يا الصافى اخوى الناس ديل شدة ما بستهونوا بينا عينك ليه قرد ينطط يقولو ليك
ده عتود والله عتود كمان بتغالطنا قلنا ليك عتود...
من طرائف الاسلاميين ديل يروى ان عرابهم الترابى يوم غالطهم انه ممكن يقنع
شخص ما بما لايصدق وساق الجماعه ومشى علي الزول وشبكو الزول كل عام وانت بخير
وتعود الايام والقابله على امانيك والزول موهوم فى شنو؟ وهم شابكنو كدى جيب الشربات
خلى الاستهبال فى زول ما بعرف العيد كمان وزولك لما افاق من الدهشة الجماعه كان ضربوا
الشربات واتخارجو وخلو الزول يسأل زول زول، قوم لف تجى انت تقنعنا انه ما كان خسران؟؟

يعني باختصار يا ود الموج .. علي الطلاق كان طارت عنزة...
لكن السؤال الفايدة البجنيها الريس من الكلام دا شنو؟ من حقه يشوف كلام فيهو فايدة ويقولوا بدل ما يخسر كل الناس بلا سبب وجيه؟
زر قناتي في اليوتيوب من فضلك واشترك فيها
https://http://http://www.youtube.com/user/KabbashiSudanwww.youtube.com/user/KabbashiSudan

كبـّاشي الصافي

(العوج راي والعديل راي)

Quote: لكن السؤال الفايدة البجنيها الريس من الكلام دا شنو؟ من حقه يشوف كلام فيهو فايدة ويقولوا بدل ما يخسر كل الناس بلا سبب وجيه؟

يا ابن العم عساك وعقبك طيبين
إجابة مع المختصر المفيد:
يستفيد دولة الرئيس كونه عمل مقدمة لبيع المشروع الخاسر منذ الستينيات خاصة وقد وعدت قطر بشراء المشروع الخاسر
بمبلغ خرافي يكفي لفك الضائقة السودانية لأكثر من عشر سنوات قادمات
مش من حق ناس الجزيرة بعد دا يرددوا بل يلحنوا ويغنوا العبارة الأكثر شهرة:
لا نفقد شئ سوي عدم رؤياكم الغالية يا دولة الرئيس عمر حسن أحمد البشير؟
طبعا سيغني ويلحن هذه الأغنية إبن قرية ود النعيم البار بجزيرته العملاق
محمد الأمين حمد النيل
تحية مرة تانية لك ولود الموج
____
الحليلة

اها يا ود الحليلة قلنا المشروع انباع لدولة قطر .. نحن ناس الكنابي نصيبنا حيروح وين؟
دايرين حقنا ني وبعدين نتفاهم مع ناس دولة قطر ولا كلامي أعوج؟
زر قناتي في اليوتيوب من فضلك واشترك فيها
https://http://http://www.youtube.com/user/KabbashiSudanwww.youtube.com/user/KabbashiSudan

كبـّاشي الصافي

(العوج راي والعديل راي)

ول أبا كباشي
تحياتي

Quote: يا معالي دولة الرئيس عمر حسن أحمد البشير بعد التحية والإحترام

- معاليك دي للوزير وما دون، أما الرئيس فهو فخامة الرئيس.
- أصحاب الكنابي (أكالة) ليس لهم شئ، إنما الكلام مع (ملاك) الأرض.
- لو قطر إشترت المشروع وبنته عمارات!، حتشيلوا معاها ولا بتتركوا في النهاية للملاك؟
- عندي ( جنينة هشاب) 5X10) كيلو، ( جنبها عد) لو قطر عايزاها أنا مستعد للبيع وحق الوسيط مضمون.

Quote: اها يا ود الحليلة قلنا المشروع انباع لدولة قطر .. نحن ناس الكنابي نصيبنا حيروح وين؟

يا ود العم
أسمع كلام ود الطاهر وأمسك فيو قوي شديد

Quote: أصحاب الكنابي (أكالة) ليس لهم شئ،

ياود الطاهر قول المبلغ المطلوب وكان كباشي عجز عندنا ليك وسيط - وبالمرة شوف لينا حق وسيط الوسيط
_____
الحليلة

كباشي تحياتي

في برنامجه (اسماء في حياتنا) سال المذيع عمر الجزلي الرئس الراحل نميري عن المصدر الذي وفر له المال لاستخراج البترول في اواخر سيعينيات القرن الماضي (مش الستينات)فكان جواب التميري من مشروع الجزيرة,

Quote: في برنامجه (اسماء في حياتنا) سال المذيع عمر الجزلي الرئس الراحل نميري عن المصدر الذي وفر له المال لاستخراج البترول في اواخر سيعينيات القرن الماضي (مش الستينات)فكان جواب التميري من مشروع الجزيرة,

وفي نفس السياق أكد الرئيس الراحل جعفر محمد نميري في أكثر من مناسبة - وفي كتيب عن مشروع كنانة أمتلكه في مكتبتي -أن السودان سيستغل كل واردات البترول من أجل تطوير الزراعة في مشروع الجزيرة
شكراً الأخ عبد الله علي المعلومة التي ألهمتني الأخري
____
الحليلة