مطلوب رأي الأطباء حول ما جاء عن أضرار السُكّر في هذا الفيديو

يا أخوان/ت .. عمّكم دا كلامو صحيح .. ولاّ تنظير ساي ؟!





ــــــــ
بصراحة بحب السُكّر

والمذيعة دي .. شكلها كدا برضو بتحب السُكّر .. لأنّو بقدر ما حاولت تكسّر التلج عشان يسمح ليها ولو بالقليل منه .. قطعو معاها ناشف !!

http://www.mdanderson.org/patient-and-cancer-information/cancer-information/cancer-topics/prevention-and-screening/food/cancersugar.htmlhttp://www.mdanderson.org/patient-and-cancer-information/can...ood/cancersugar.html

سلامات يا صبري
منذ أن شاهدت هذه الشريحة لم أضع سكر في شاي أو في قهوة، وذلك من يوم 13 سبتمبر الفائت، يعني شهرين ونصف.

ياسر

اخي ياسر وانا مثلك قبل ثلاثة أشهر أو أكثر لم أتناول اي سكر .. إكتشفت أخيراً أن الشاي متعة بدون سكر ..
أما القهوة فهي المتعة نفسها المسألة إرادة وإصرار مع أول كباية شاي .. إذا إستطعت ان تشربه .. خلاص ..
بعدين الواحد يشعر وكأنه إنتصر على جيش .. تشعر بنشوة انتصار ونوع من الثقة ..

استاذنا صبري .. كمان إذا في حد متخصص عايزين نعرف تأثير التمر برضو هل نفس السكر او مختلف ..

لك التحية .. وفي إنتظار من لهم خلفية عن هذه المواضيع ..

سلام يا صبري وضيوفه

أها أنا ولا شفت الفيديو لكن منقبل 20 شهر موقف السكر لكن ما نهائي

يعني مرة مرتين في الأسبوع بمشيها

وبإستخدم إستيفانا معاي في الشنطة

وكمان موقف الدهون

يعني الشافني قبل 20 شهر وشافني الآن حيكطون الفرق ظاهر جداً

البنكالين كلها بقت وسيعة والجديد جبناه بمقاسات أصغر

الوزن نقص خلال الـ 20 شهر حوالي 10 كيلو أو أكتر

الواحد بقى حاسي إنه شباب

بس المشكلة الواحد بقى يجيب سيرة العرس كتير لمن يوم يلبسوهو حلة فوق راسه

اخدها منى ياخوى .. تنظير سااى
الناس ديل كل يوم ذايعين لينا بحث . انو الفول بكبر العقول .. وبكرة بحث انه الفول بصغر العقول
الليله يقولو الموبايل قاتل.. وبكرة يقولو ما فيهو شئ

الليله يقولو الدكوة فيها السرطان .. وبكرة فى الدخان


لخ لخك ساااى لكن ما تكتر ..

اى حاجه بالمعقول .. وفى الحركة بركه

Quote: اخدها منى ياخوى .. تنظير سااى الناس ديل كل يوم ذايعين لينا بحث . انو الفول بكبر العقول .. وبكرة بحث انه الفول بصغر العقول الليله يقولو الموبايل قاتل.. وبكرة يقولو ما فيهو شئ الليله يقولو الدكوة فيها السرطان .. وبكرة فى الدخان لخ لخك ساااى لكن ما تكتر .. اى حاجه بالمعقول .. وفى الحركة بركه

لكن في حاجات لو كتّرت منها أو قلّلت منها بتودّيك التوج :)

وعليكم السلام أخي عاصم ...

Quote: أها أنا ولا شفت الفيديو لكن منقبل 20 شهر موقف السكر لكن ما نهائي يعني مرة مرتين في الأسبوع بمشيها وبإستخدم إستيفانا معاي في الشنطة وكمان موقف الدهون يعني الشافني قبل 20 شهر وشافني الآن حيكطون الفرق ظاهر جداً البنكالين كلها بقت وسيعة والجديد جبناه بمقاسات أصغر الوزن نقص خلال الـ 20 شهر حوالي 10 كيلو أو أكتر الواحد بقى حاسي إنه شباب بس المشكلة الواحد بقى يجيب سيرة العرس كتير لمن يوم يلبسوهو حلة فوق راسه

وأنا لاحظت على نفسي وزني بينزل بشكل ملحوظ جداً عندما أتوقّف أو أخفّف من تناول السُكّر ...

Quote: بس المشكلة الواحد بقى يجيب سيرة العرس كتير لمن يوم يلبسوهو حلة فوق راسه

عشان كدا أعمل حسابك ما يدسّو ليك السُكّر في الدسم :)

Quote: كمان إذا في حد متخصص عايزين نعرف تأثير التمر برضو هل نفس السكر او مختلف ..

نفس استفهامك على بالي ...

أضف لذلك ما تأثير المُحلّيات (تستخدم بديلاً للسُكّر وتعطي نفس طعمه) .. مثال لذلك مسحوق اسمه توربيكانا ...





ـــــــ

وعليكم السلام أخي ياسر ...

Quote: منذ أن شاهدت هذه الشريحة لم أضع سكر في شاي أو في قهوة، وذلك من يوم 13 سبتمبر الفائت، يعني شهرين ونصف.

ويا ريت تدّينا ملاحظاتك على صحّتك بعد توقفك عن تناول السُكّر .. الوزن مثلاً ...

تُشكر يا دكتور على الرابط ...


mdanderson.org/patient-and-cancer-information/cancer-information/cancer-topics/prevention-and-screening/food/cancersugar.html

اما عن نفسي منذ ثلاثين عاما لم اذق ولا ذرة سكر واحدة،،،ولاتمر ولا طحنية ولا مربة اوعسل او بسكويت ،،،ولا اي مشروب مضاف له سكر خالص،،،،يعني ذرة ولا ذرة...
المتاكد منو اني لو لم افعل ذلك لكنت قبل ربع قرن مسوق بي وليد،،او علي كرسي،،وامكن من زمااااان اكون لحقت ابواتي....
لعن الله السكر في كل القبل،،،وماقاله هذا الرجل صاح بليون المية...
اختو السكر والدهن وكثير الملح،،،وعليكم بالجكة.

بدون ادني شك ولا دوران فاني توقفت عن السكر انا وجميع اطفالي وزوجتي واخوي .......ومنذ ذلك الوقت لم اصاب باي التهاب ولا حتي انفلوزا وهي من الحاجات النادرة جدا حيث انه خلال هذه الفترة 4 شهور تقريبا حدثت تقلبات في المناخ ودخل الحج
وكان المستحيل ان لا اصاب بنزلة برد .
اما الاولاد فالذين توقفو عن السكر " اصلا ما بشربو شاي " لم يصابو باي التهاب ولا نزلة برد ......اما الذين لم يستطيعو مقاطعة الحلويات فانهم قد اصيبو بزلات ولكن لم تنتقل للمتوقفين رغم المداخلة والتعايش مع بعضهم البعض .....وكذلك انخفض الضغط واصبح
110/75 وهي ضغط مدهش بالنسبة لزول عمره 48 سنة ......وكذلك الوزن وبداء يتاكل الغضروف نتيجة لانخفاض الوزن بشكل ملحوظ .......
اهم حاجة اني تعودت علي شراب الشاي والقهوة بدون سكر واصبحت استمتع بهما بطريقة مدهشة .......
توقفو عن السكر تصحو

أرجو من الأخ وضاح سحب مداخلته لأنها تنطوي على مخاطر عظيمة للذين سيتبعون ارشاداته،،

السكر والملح هما آفة يجب التوعية في مقاطعتهما ما أمكن ،،


صبري : انت محظوظ لأنك تلقيت هذه النصيحة من عمك دا وأنت في هذه المرحلة المبكرة من الشباب،،،

ابعد عن السكر وعن بن زيما !!

ماتقول ناسيك!! ههههههههههه

Quote: أرجو من الأخ وضاح سحب مداخلته لأنها تنطوي على مخاطر عظيمة للذين سيتبعون ارشاداته،،

ههههههههههه يتبعون .. شنو يا ابو خالد
يا حبيب انت زاتك .. لخ سااااى

تصدق يا الحبيب انا كنت كده .. من اسمع لى دراسة ولا بحث بتقول احذروا كده وكده وكده .. كنت بسمع ليهم واحاول اتبع نصايحهم

لمن اكتشفت انو ده بحر غريييييييييييق .. وكضب كتيييييييييير

ومصالح شركات .. غذائية .. وشركات دوائية
ونصب واحتيال على عقول الناس

او لو احسن النية .. نقول استهبال ودراسات ما عندها اى قيمه تجريبيه اللهم الا شويه شغل فى المعمل
ويجوا طوالى ينشروها فينا

ما عاوز اجيب ليك امثله
ولا البرامج الاتعملت حول (فتاوى) العلماء المتناقضة جدا حول الابحاث والتحذيرات
لانها مالية النت .. واكيد ما فاتت عليك .


....................
بس حا اديك اخر واااااحده طازة من الفرن سمعتها قبل اربعة ايام
فى برنامج الدكاترة الامريكى على قناة ام بي سي
واقف الدكتور وجايب دراسة عن التأثيرات الضارة لتناول الخضروات

اى والله الخضروات الواحده دى .. خصوصا البناكلها فى السلطة دى
وانو دى مفاجأة وانه وانه وانه

اها نصايح المعامل والدكاترة الماشين عليها لينا سنين عن ضرورة الاكثار من الخضروات نوديها وين
وتعليماتهم المشدده عن اعطاء الاطفال الخضروات نوديها وين !!؟؟؟

نحن السودانيين بتاعين سكر درجة اولى الممتازة،
التي بوي في مكتبنا، برش للموظفين السودانيين سكر زيادة، وكبابيهم على جنب؛ خد من هنا لا دا نفر سوداني شقر كتير،
كل ما يسخن الشغل بديها كباية شاي مدفوسة سكر،
وقهوتنا برضك سكرا زيادة؛
الشاي ما عندو طعم بلا سكر، ولا القهوة،
نحن نشرب الشاي والقهوة عشان السكر الفيهم؛
جربوالقهوة الايرلندية سكرها زي سكر قهوتنا السودانية،
......................................
زملينا السعودي قال لزميلنا السودان:
طالما جسمك بحرق السكر، استمتع!!!

السكر "كسكر" في نفسو لا يضر.
السكر في الحلويات و المشروبات التي يدخل فيها يسبب السمنة في حالة الافراط و السمنة لها
مخاطر صحية معروفة و مثبتة.
الحد الأدنى للرجال تسعة ملاعق صغيرة يوميا و ستة ملاعق للنساء.

Quote: الحد الأدنى للرجال تسعة ملاعق صغيرة يوميا

سلام يا دكتور سيف
والله يا دكتور التسعة ملاعق دي انا شخصياً و من زمن بعيد في الاسبوع ما بستهلكها.
طمنتنا ياخي

Quote: السكر "كسكر" في نفسو لا يضر. السكر في الحلويات و المشروبات التي يدخل فيها يسبب السمنة في حالة الافراط و السمنة لها مخاطر صحية معروفة و مثبتة. الحد الأدنى للرجال تسعة ملاعق صغيرة يوميا و ستة ملاعق للنساء.

يا حبيب .. أظنّك تقصد الحد الأعلى ...

وتُشكر على المعلومة ...

Quote: نحن السودانيين بتاعين سكر درجة اولى الممتازة، التي بوي في مكتبنا، برش للموظفين السودانيين سكر زيادة، وكبابيهم على جنب؛ خد من هنا لا دا نفر سوداني شقر كتير، كل ما يسخن الشغل بديها كباية شاي مدفوسة سكر، وقهوتنا برضك سكرا زيادة؛ الشاي ما عندو طعم بلا سكر، ولا القهوة، نحن نشرب الشاي والقهوة عشان السكر الفيهم؛ جربوالقهوة الايرلندية سكرها زي سكر قهوتنا السودانية، ...................................... زملينا السعودي قال لزميلنا السودان: طالما جسمك بحرق السكر، استمتع!!!

الطيب يا حبيب .. نسبة السُكّر في الشاي والقهوة تعويدة ...
يعني لو عودت نفسك تشرب كُبّاية الشاي بملعقة واحدة لمُدّة شهر ...

بعدها لو شربتو بي ملعقتين حتشوفو عسل عديل كدا ...

أسأل مُجرّب !!

Quote: صبري : انت محظوظ لأنك تلقيت هذه النصيحة من عمك دا وأنت في هذه المرحلة المبكرة من الشباب،،،

بإذن الله سأجرّب الامتناع عن تناول السُكّر لمدّة ثلاثة أشهر .. وبعدها أشوف الفهم شنو ...

Quote: ابعد عن السكر وعن بن زيما !! ماتقول ناسيك!! ههههههههههه

أمّا بالنسبة لعسل برشلونة فلن أستطيع المقاومة .. خاصة مع لمسات الثلاثي المُرعب (ميسي - نيمار - سواريز) ...

وحأشوف نتيجة هذا العسل في آخر شهر العسل (الموسم) :)

Quote: بدون ادني شك ولا دوران فاني توقفت عن السكر انا وجميع اطفالي وزوجتي واخوي .......ومنذ ذلك الوقت لم اصاب باي التهاب ولا حتي انفلوزا وهي من الحاجات النادرة جدا حيث انه خلال هذه الفترة 4 شهور تقريبا حدثت تقلبات في المناخ ودخل الحج وكان المستحيل ان لا اصاب بنزلة برد . اما الاولاد فالذين توقفو عن السكر " اصلا ما بشربو شاي " لم يصابو باي التهاب ولا نزلة برد ......اما الذين لم يستطيعو مقاطعة الحلويات فانهم قد اصيبو بزلات ولكن لم تنتقل للمتوقفين رغم المداخلة والتعايش مع بعضهم البعض .....وكذلك انخفض الضغط واصبح 110/75 وهي ضغط مدهش بالنسبة لزول عمره 48 سنة ......وكذلك الوزن وبداء يتاكل الغضروف نتيجة لانخفاض الوزن بشكل ملحوظ ....... اهم حاجة اني تعودت علي شراب الشاي والقهوة بدون سكر واصبحت استمتع بهما بطريقة مدهشة ....... توقفو عن السكر تصحو

تسلم أخي إبراهيم .. ونتيجة واضحة ومُقنعة ...

ربنا يديم عليكم الصحّة والعافية ،،،

Quote: اما عن نفسي منذ ثلاثين عاما لم اذق ولا ذرة سكر واحدة،،،ولاتمر ولا طحنية ولا مربة اوعسل او بسكويت ،،،ولا اي مشروب مضاف له سكر خالص،،،،يعني ذرة ولا ذرة... المتاكد منو اني لو لم افعل ذلك لكنت قبل ربع قرن مسوق بي وليد،،او علي كرسي،،وامكن من زمااااان اكون لحقت ابواتي.... لعن الله السكر في كل القبل،،،وماقاله هذا الرجل صاح بليون المية... اختو السكر والدهن وكثير الملح،،،وعليكم بالجكة.

قبل الاغتراب كُنت أتناول كمّية سُكّريات فيها نوع من المُبالغة .. ولكن أيضاً كُنت أمارس الرياضة بنوع من المُبالغة والنتيجة وزن مثالي + صحة مية مية ...

أخونا صبري .. قناة ( إم بي سي ) وأنا في السيارة سمعت دكتور يتحدث الحذر من ثلاث أبيض (السكر ، الملح ، الدقيق الابيض ) عازين دكتور سيف في الموضوع ده .. ويضيف الدكتور أنه من الأفضل ايقاف السيارة بعيداً عن المكتب للمشي وايضاً يفضل الصعود الى المكتب بالسلالم بدلاً من المصعد ويحبذ الصلاة في المسجد من ناحية الصحية عشان المشاوير .. لازم تكون في حركة متواصلة على الأقل عشرة دقائق في اليوم .. مشكلتنا في الاغتراب الحريم وعدم الحركة .. نحن هين ..

وفي تلفزيون السودان .. قبل عام تقريباً .. كان احد الاقتصاديين يتحدث عن ( أقل إستخدام للسكر للفرد عندنا حوالي 35 كجم في السنة وفي الصين حوالي 7 كجم المعدل الاعلى ) وقال ( أن باقي السكر في الكباية والذي يتم غسله يكلف حوالي 20 مليون دولار .. وخاصة لدى ستات الشاي )

مع تحية أخونا صبري

صحيح يا صبري اقصد الحد الأعلى .
المهم في الأمر هو عدد السعرات الحرارية و ليس كمية
السكر في حد ذاتها .
تصوير السكر كمادة ضارة موقف لا تدعمه ادلة علمية
و لا دراسات منشورة في دوريات محترمة.
اذا في زول بيكره السكر يمكنه أن يتوقف عنه و لكن أن
يحرم اطفاله فهذا موقف متطرف لا داعي له أبدا .