Black Friday ..... جمعة المكاسب

ســــلام مربع
يعني شنو بلاك فرايديه Black Friday

إجتهاد مني سميتها جمعة المكاسب

طيب ليه هي بلاك

الناس القاعدة مع الخواجات يورونا ليه الجمعة التي تلي الخميس الرابع من شهر نوفمبر بسموها بلاك فرايديه ؟


؟

والله يا عاصم انا ذاتي ما عارفة سموها بلاك فرايدي لشنو...لكن اتخيلت عشان
الناس بتمشي تقيف في الصفوف قدام المولات من الساعة 2 صباحا وفي ناس
بيبيتو الليل قدام الدكاكين والدنيا ظلام عشان كجه سموها بلاك فرايدي ..مع انه
نيويورك ما فيها ليل ..والنهار والليل واحد وما فيها ظلام وبيسموا المدينة دي
THE CITY THAT DOESN'T SlEEP
والله يديك الصحة والعافية

شكراً يا أميرة على المرور

لكن دا ما سبب التسمية

نهارك ابيض استاذ عاصم ... للاسف ما اقدر افتيك لكن تقبل مروري

Quote: الجمعة البيضاء.. يوم خاص بالتخفيضات الخميس 27 نوفمبر, 2014 على غرار أيام التسوق الشهيرة مثل "Black Friday" وهو يوم التسوق الأفضل عروضا في أميركا، ويوم "Boxing Day" ببريطانيا، أعلن موقع عربي يوما خاصا بالتخفيضات، ويطلق على هذا اليوم بالجمعة البيضاء.

الموقع المشار اليه هو سوق دوت كوم في السعودية ... قادننا قد باعلانات حملة تخفيضات الجمعة البضاء

استشرت عمنا قوقل عشان نعرف اصل الكلمة جي جات من وين ..وافاد قوقل بالتالي:~
كثير من الناس كانوا يربطون اسم بلاك فرايدي بتجارة الرقيق في امريكا وفقا لما كانوا
يقراونه في وسائل الاعلام حيث كانوا يظنون ان تجار الرقيق وفي اليوم الذي يلي يوم الشكر
وهو اليوم المسمى Thanksgiving كانوا يبيعون الرقيق باسعار مخفضة للمزارعين للاستعداد
لفصل الخريف ولهذا كانوا يسمون تلك الجمعة بلاك فرايدي...
ولكن الحقيقة غير ذلك ..لان هذه الكلمة استخدمت لاول مرة في مدينة فلادلفيا بولاية بنسلفانيا
وذلك بعد الغاء تجارة الرقيق..حيث استخدمها اصحاب الاعمال التجارية لانهم كانوا يخسرون في تجارتهم
من اول السنة في شهر يناير وحتى شهر نوفمبر ..ولكن في ذلك اليوم الذي يلي عيد الشكر وحيث يخرج
الملايين للتسوق تتحول خسائر التجار الى ارباح ويعتبرون انفسهم قد خرجوا من الخط الاحمر(خط الخسارة)
الى الخط الاسود.. اي بعيدا عن دائرة الخسارة....ويبتدئ. الربح بالنسبة لهم......
والله يديك العافية

عصوم ...

صباح الجمعة البيضاء ..

Quote: شكراً يا أميرة على المرور لكن دا ما سبب التسمية

لزوم النساخة ههههههههه طيب معناتو انت عارف التسمية ههه .

((( لكن دا ما سبب التسمية )))

ولالالالالالالا قدام .

"'Black Friday' is the name that the Philadelphia Police Department gave to the Friday following Thanksgiving Day
It is not a term of endearment to them. 'Black Friday' officially opens the Christmas shopping season in center city
and it usually brings massive traffic jams and over-crowded sidewalks as the downtown stores are mobbed from opening to closing

تحياتي عاصم

الفرنسيين عندهم تعبير لمن يجو يوصفو مكان ما بالاذدحام
بيقولو اسود من البشر او بالبشر (noir de monde)
ما عارف اذا الامريكان عندهم نفس التعبير ده
لانو المصطلح امريكي بالاصل ..

وفي النهاية القصة تجارة وذيادة استهلاك

سلام مربع ليكم كلكم ولأميرة السيد سلام خاص لأنها إجتهدت وقوقل قرب يوصلها للإجابة

تقريباً وصلت لكن ما لخصتها

يعني زي ترجمة قوقل

المهم برضو وضاحة إجتهدت لكنها جابت نتيجة البحث بضبانته

بت عمسيب والله ما مساخة لكن المعلومة لمن تجي بشوية صعوبة ولياقة بترسخ وما بتتنسي

عمر فضل الله .. الفرنسيين مثلهم ما بينطبق على البلاك فرايدي

انا كنت عاوز البوست يمشي شوية كمان

بالرغم من إني يوم الجمعة ما بدخل النت وبعتبره يوم الأسرة عندي

لكن بالصدفة فتحت سودانيزاونلاين ولقيت المشاركات من الأخوات والأخوة


قلت ما أعدي ساكت وعلى الأقل الجمعة السوداء (البيضاء) دي ما تمر ساكت

إنتوا لو لاحظتوا في العنوان أنا قلت ليكم إجتهاد مني سميتها جمعة المكاسب

طيب ليه

بإختصار كدا:

سموها سوداء من منظور بتاع بيانات مالية وكدا

في البيانات المالية الأرباح بتتكتب بالحبر الأسود والخساءر بتتكتب بالحبر الأحمر

يعني سوداء هنا ليست ضد بيضاء وإنما ضد حمراء


وسموها سوداء وعزوها للربح لأنها بتكون فيها الأسعار مخفضة والمشتري هو البيكسب

أها بعد دا رأيكم شنو في إجتهادي وتسميتي ليها بجمعة المكاسب

؟؟

Quote: أها بعد دا رأيكم شنو في إجتهادي وتسميتي ليها بجمعة المكاسب

كلام زي الدهب
عليك بتسجيل براءة صك الترجمة يا صديقي
_____
الحليلة

بالمرة يا عاصم بعد جمعة المكاسب شوف لينا معاك حكاية البوكسنق ديي
تحياتي
_____
الحليلة

يا باشمهندس الحليلة كيفك ياخي .. حكاية البوكسينق دي ما تجيبها لينا إنت ونحنا منتظرين

شكراً على التعليق الجميل

Quote: حكاية البوكسينق دي ما تجيبها لينا إنت ونحنا منتظرين

مرحب عاصم
بيني وبينك حاولت أجاسفا لكن ما عرفت ليها صِرفة
نتذكر الجامعة والبوكسنق إقولوا ليك بالعربي
المجموع التنافسي
تلقي مافي علاقة بين الإتنين
أما بالنسبة لي اليوم الذي يعقب الكرسمس ما قدرت أربط
بينو وبين اليوم والبيع
ففي كندا الأنقلفونية يسمونه البوكسنق ديي
والفرانكفونية يترجمون اللفظ حرفيا
أظن أن كلمة بوكسنق ديي أقرب ما يكون للأسم العلم وليس كلمة
محددة لها خلفية محددة
أنت عارف الناس ديل حكاية الأسماء دي ماعندهم ليها أي علاقة بالمضمون
عشان كدا أعجبتني مجاسفتك لي البلاك فرايدي وهو صك جميل جدا ذو معني مستوحي من المضمون
وفي تقديري ممكن نستوحي ترجمة من مصطلحك ونسميه
يوم المكاسب
وأنا في رأيي ما دام الخواجات ما عندهم ليو خلفية محددة ما المانع نسميو
الرحمتات
تحياتي
_____
الحليلة

Quote: الرحمتات

غايتو يا باشمهندس كتلتني بالضحك

أنقر ما فكرت فيها لكن قلت ديك عنجنا آخر جمعة في رمضان

يقوموا يجونا السلفيين يقولوا لينا الجمعة اليتيمة وشبهتوها بجمعة الكفار قلت أحسن أخليها في حناني
أما بخصوص المعنى غير البماشر للبوكسينق هو:
a step to one side

يعني زي أن يهتموا بمساعدة شريحة محددة من الناس

بدفعهم خطوة إلى الأمام

فيمكن أن يكون برضو (الرحمتات)

Quote: أما بخصوص المعنى غير البماشر للبوكسينق هو: a step to one side يعني زي أن يهتموا بمساعدة شريحة محددة من الناس بدفعهم خطوة إلى الأمام فيمكن أن يكون برضو (الرحمتات)

شكرا يا عاصم علي المجاملة
شكلوا كان مافي مداخلات تاني
نعرش علي كدي
والسلفيين ما عندهن معانا درب
كدي نشوف فيهن زول إعمل حركات نص كم
عشان نوريو المكشن برا بصلة
بوكسينق ديي
المعني المرادف بالعربي
الرحمتات
وصباحاتو بيض
____
الحليلة

والله يا جماعة عجبني البوست بالرغم من أني ترددت في دخوله
فكرة المكاسب والرحمتات افكار تسويقية حلوة
منذ عودتي للسودان في 2006 لم أسمع بكلمة تخفيضات
ليكم التحية عاصم والحليلة وكل المساهمين

Quote: والله يا جماعة عجبني البوست بالرغم من أني ترددت في دخوله فكرة المكاسب والرحمتات افكار تسويقية حلوة منذ عودتي للسودان في 2006 لم أسمع بكلمة تخفيضات ليكم التحية عاصم والحليلة وكل المساهمين

تتردد ليه يا ود قاسم .. نحنا ما قاعدين نجي خاشين ليك توووووووووش في بوستاتك

وبرضو تشكر على المرور