التقومك من أهلك مريوق

تغشيك أم شانق، وتبيتك مرزوق

أم شانق سعد، وأم شانق حاج إبراهيم ومرزوق من قرى شرق الجزيرة ريفي رفاعة، ومرزوق دي مولود فيها الفنان أحمد الجابري.
ناس البطانة فوق؛ شايلين حس أم شانق ومرزوق وبوصفوهم بالبخل.
مرّة قمت من قرية السعدية بلوري قاصد رفاعة وتمبول.

السعدية دي فريق كواهلة سعدية وهي آخر قرية تابعة للجزيرة شرق رفاعة وأهلها لحدي التمانينات كانوا رحل.

قبل التحرك من السعدية خلوني أوصف الصورة قبل أركب اللوري.
الوكت كان أول يوم في ضراع الأسد ستة صباحا، شيخ عوض الكريم خير الله قال لي: لو ما المطرة دي جاية كنا مسكناك معانا لحدي ما تاكل كرامة حاج الدابي، إلتفت وكورك للبنات السايقات حمير الري لبيارة أم طرطارة ورجعن وحماهن الورود، لأنو المطرة أكيد جاية.

للوري وصل قرية الكاهلي زيدان، ودخلها من فريق أولاد عون، ركبوا فيهو أربعة رجال لابسين جلاليب بيضا وطواقي خضر، لفت نظري انو الجلاليب نظيفة كغير عادة متسوقي تمبول! ركبت كمان امرأة شايلة ليها جدادتين فيوميات - بسري قلت أكيد الفيومي دا دخلتو للعرب ديل جمعية بلان سودان- وواحدة بلدية وسخل أبيض أضانو مشرومة، ورجلو اليسار مربوطة مع يدو اليمين، الجداد علقوهو برّة اللوري والسخل توشك بدأ يكركم في رباط جزمتي الاديداس.
مجرد ما اللوري إتحرك واحد من الأربعة النضاف وقفو وقال لأخوانو: عيك نسينا عدة الشغل، قبل ما ينزل من اللوري واحد من أخوانو همس ليهو في أضانو الما مشرومة: مع الطارات جيب معاك حجر، المرة دي واحدة في اللوري، الله يكفينا شرّها.

المداح جا راجع اللوري ومعاهو طارين في مخلاية، صاحبو قال ليهو: إن شاء الله إتذكرت الحجر؟ ردّ بالنفي، وقال البتجي من الله كلها سمحة. دخلنا أم شانق سعد حوالي تزعة ونص ومشينا نزلنا مكنة بابور عند ميكانيكي طرف الحلة، التنزيل أخد وكت طويل لأنو المكنة تقيلة.
بقينا في اللوري أنا والكمساري، والمداحين الأربعة، والمرأة والسخل ًوتلاتة جدادات بجنب اللوري.
الكمساري خلص من المرة حق نفرين بحجة انو السخل والجدادات بساون زول!
ضربت معاهو حجة شديدة وبعد قنعت منو قالت ليهو: خليتك ليوم القيامة إن شاء النار تشوشوك زي الشية، قال ليها إتي يا مرة مجنونة؟ نار شنو الربنا بشوي بيها الناس! إتي ما عاقلة، معقولة ربنا يرمي ليهو زول حي في نار؟! هسع أنا بقدر أرمي تيسك دا حي في النار؟! دا كلام ساي ما في عذاب بنار ولا شيء.
لا شعوريا إنحزت للكمساري وبسري قلت الكمساري دا علماني!!

بعد عشرة دقائق من خروجنا من أم شانق نزلت المطرة من النوع البفلق في الرأس داك. بسرعة عمر الكمساري طلع ليهو تلاتة مشمعات صفر؛ أدا المرة واحد، وواحد غطى بيهو شوالات العيش والتالت إتكومت فوقو مع المداحين وخرتاية الطارين، بعد داك عمر جاب السخل وجا إتكوم معانا تحت المشمع، بسري قلت: الكمساري دا علماني وحنيّن

Quote: إتي يا مرة مجنونة؟ نار شنو الربنا بشوي بيها الناس! إتي ما عاقلة، معقولة ربنا يرمي ليهو زول حي في نار؟! هسع أنا بقدر أرمي تيسك دا حي في النار؟! دا كلام ساي ما في عذاب بنار ولا شيء.

ابوبكر ازيك

غايتو يا ابوبكر لو انت وافقت الكمساري في كلامو دا


استعد وجهز سيوفك لانو الجماعة اياهم حا يعلنو عليك الجهاد

Quote: مع الطارات جيب معاك حجر، المرة دي واحدة في اللوري، الله يكفينا شرّها.

مداحين.. يمدحون النبي عليه الصلاة والسلام

ومع هذا: يحملون هذه العقيدة الشركية التالفة

عقيدة التشاؤم بركوب امرأة واحدة في لوري السفر

فيظنون فيها ضراً

سبحان الله.. إشراك بالله، وحط من مكانة المرأة



_____________________

تحياتي يا أبو بكر

حضور
دي حلال عربنا
ام شانق وما جاورها
دحين الدابي دة هيل تمبول

Quote: مداحين.. يمدحون النبي عليه الصلاة والسلام ومع هذا: يحملون هذه العقيدة الشركية التالفة عقيدة التشاؤم بركوب امرأة واحدة في لوري السفر فيظنون فيها ضراً سبحان الله.. إشراك بالله، وحط من مكانة المرأة

هههههههههههههههههههههه،

الحق عمّك.

ــــــــــــــــــــــــــــ
تحياتي ابو بكُر...

عليك الله فسراع..
مداحين،،عتوت،وجدادات ،،ومطرة
انا لله...
اريتني اكان كت معاكم..
كنت ميزت الويقود ما انبل..

سرد جميل .. خاصة الحوار بين الكمساري والمرأة ..


ولأنني من غير الناطقين بها .. قرأت العنوان أكثر من عشرة مرات لم أفهم شي ( التقومك أهلك مريوق )
استاذي ابوبكر معليش .. لو سحمت المقصود من العنوان .. عشان نواصل معاك الكلام الجميل ده ..

لك التحية ..

سلام
مريوق جيعان يعني
فكة الريق هو الفطور
مريوق يعني من صحيت ما خش خشمك غير ريقك

Quote: سلام مريوق جيعان يعني فكة الريق هو الفطور مريوق يعني من صحيت ما خش خشمك غير ريقك

يا عبد الحفيض،
علي دا ادُو معاك خبر الحجر فرِد خترة
قبال عماد يجي خافِس...

ههههه
والله يا ود المدير كانت كتيرة خلاس في البطانة
والكعب لو نزل استك وفي مرة واحدة بس راكبة

ههههه
والله يا ود المدير كانت كتيرة خلاس في البطانة
والكعب لو نزل استك وفي مرة واحدة بس راكبة

شكراً كثير اخي عبدالحفيظ ..
جمال هذا الوطن في تنوعه ولكن كلنا نشترك في الثوابت الاخلاقية والسلوك النبيلة ..
مع أننا جيل قديم شوية .. ولكن لم يكن هناك تواصل في الوطن .. وخاصة نحن في أقصى الشمال
لك التحية .. اخي عبدالحفيظ ..

Quote: يا عبد الحفيض، علي دا ادُو معاك خبر الحجر فرِد خترة قبال عماد يجي خافِس...

حبيبنا ود المدير .. أنا ملاحظ السعوديين ينطقوا حرف (ظ) بصوت (ض ) وحتى في الكتابة
لم أكن أعرف اننا لدينا في السودان نفس الحالة ..
بعدين يا حبيبنا إنت جبت طلاسم جديدة ( خبر الحجر فرد خترة ) .. إتحداك من القولد الى حلفا واحد يشرح الكلام ده

يا اخي انتو ناس جميليين .. ومعليش ابوبكر ضيعنا البوست .. أرجو المواصلة

ده دعوه ( ادعوا بيها الزول )

التقومك من اهلك مريوق

يعني الزول البطلع من بيت اهلوا زعلان و جيعان ده تاني البديه اكل منو

غايتو يا بكور لو ختيت بوستات الدواس وناس طبارك بتجي الاول فى البورد ده .

Quote: غايتو يا ابوبكر لو انت وافقت الكمساري في كلامو دا

علمانية ابوبكر دي الا يدخلها لينا في كل مكان حتي لواري أهلنا الغبش طلع المساعد مستنير (:

--------
التحية لصاحب البوست وضيوفه

Quote: يا عبد الحفيض، علي دا ادُو معاك خبر الحجر فرِد خترة قبال عماد يجي خافِس...

سلامات يا ود المدير

وصيتي ليك.. تشيل معاك حجر في توصيل جماعتك الاكلو السندوتش

لزوم الفليع وكدة

Quote: عدين يا حبيبنا إنت جبت طلاسم جديدة ( خبر الحجر فرد خترة ) .. إتحداك من القولد الى حلفا واحد يشرح الكلام ده يا اخي انتو ناس جميليين .. ومعليش ابوبكر ضيعنا البوست .. أرجو المواصلة

أخي عماد حسين مع التحية ..
ودالمدير غاب عن الشاشة ..
اشرح لي معنى الكلام الفوق ( خبر الحجر فرد خترة )
ومازال العرض مستمراً

انشاء الله اتقبتوا

حياك الله يا علي

Quote: أخي عماد حسين مع التحية .. ودالمدير غاب عن الشاشة .. اشرح لي معنى الكلام الفوق ( خبر الحجر فرد خترة ) ومازال العرض مستمراً

فرد: بكسر الراء، أصلها فريد.. بمعنى واحد، وبعض أهلنا يقول: فَد بفتح الفاء
الخترة: بمعنى الرجعة. وختر: رجع. وأختراكم: بمغنى فلنرجع

والغريب أن (فرِد) هذه، تُعد من الكلمات النادرة في لهجتنا السودانية، والتي تجد فيها البداية بحرف ساكن

خلاصة الترجمة: كان ود المدير يطالب بالرجوع - ولو مرة واحدة بس - لموضوع الحجر
الذي يتم حمله في اللوري حينما تكون هناك امرأة واحدة بين الركاب

تحياتي

Quote: الخترة: بمعنى الرجعة

الاضداد
اختر جاى
خاتر وين

مُزْبَدٌ يَخْطِرُ ما لم يَرَنِي فإِذَا أَسْمَعْتُهُ صَوْتِي انْقَمَعْ
اليشكري

مرحب عماد
ختر في ظني ذهب .. سافر .. وليس رجع كما تفضلت

حياك الله يا عبدالحفيظ

Quote: مرحب عماد ختر في ظني ذهب .. سافر .. وليس رجع كما تفضلت

دلالة كلام ود المدير قد تؤيد معنى: الرجعة

واحتمال يكون اختلاف استخدام بين الشمال والوسط

أخونا Abu Baker جاء بما يفيد أن اللفظ يصلح للمعنيين المتضادين

يعني الذهاب والرجعة

شوف هنا...

Quote: الاضداد اختر جاى خاتر وين مُزْبَدٌ يَخْطِرُ ما لم يَرَنِي فإِذَا أَسْمَعْتُهُ صَوْتِي انْقَمَعْ اليشكري

تحياتي لك وللأخ Abu Baker Ahmed Abdel Rahman

سلام
اختر جاي
اي سافر من مكانك وتعال لينا

السلام عليكم اجمعين


مسعولين من الخير


سيد البوست وينو ؟؟؟؟


ختر وللا شنو!!!!!!

سيد البوست كان قد استقال في السابق، لكنه نسيَ، فقام كتب.
ثم تذكر أنه مستقيل، فتوقف عن الكتابة
عادي
رغم إنو كتابتو (خطرة) ورويانه لامن مندية

معاوية ما تصلح لي صاحبك خلى النص الادبي بتاعوا وشغال مساككة في ولد ابا بريمة
شيخ عماد إزيك رشوا

Quote: لاصة الترجمة: كان ود المدير يطالب بالرجوع - ولو مرة واحدة بس - لموضوع الحجر الذي يتم حمله في اللوري حينما تكون هناك امرأة واحدة بين الركاب

مع التحية اخي عماد .. يا أخي ما أجمل هذا الوطن الذي يتحفنا في كل لحظة بحكمة ورمز وعمق وجمال ..
اخي عماد .. أنا اتابع مثل هذه البوستات وخاصة الإخوة أهل البطانة بمفرداتهم وأجتهد في البحث ..
فأحياناً المسادير تبدو لنا صعبة الفهم ولكن بعد أن نرجع إلى الحواشي نعرف قيمة هذا الابداع والرقي ..
هؤلاء يجسدون ما اندثر في البادية العربية .. ( ذي رمة ) وتأبط شراً ... الخ
ليس هذا لأننا من الشمال النوبي .. ولكن ألاحظ أن معظم المتحدثين بالعربية ليس لهم عمق في بعض تلك الخصوصيات

التحية لصاحب البوست الذي غاب عن الساحة بعد فتح لنا كوة معرفية وإثراء ..
شكراً بابكر ..

تاخدوا راحتكم يا شباب، أصلا عضم البوست عن دواوين الحلال (القرى) المفتوحة للضيوف المسافرين (العابرين) وداير أدي ناس مرزوق وأم شانق حقهم في الكرم.

البوست ديوان مفتوح ومفروش

Quote: فرد: بكسر الراء، أصلها فريد.. بمعنى واحد، وبعض أهلنا يقول: فَد بفتح الفاء الخترة: بمعنى الرجعة. وختر: رجع. وأختراكم: بمغنى فلنرجع والغريب أن (فرِد) هذه، تُعد من الكلمات النادرة في لهجتنا السودانية، والتي تجد فيها البداية بحرف ساكن خلاصة الترجمة: كان ود المدير يطالب بالرجوع - ولو مرة واحدة بس - لموضوع الحجر الذي يتم حمله في اللوري حينما تكون هناك امرأة واحدة بين الركاب

أها، كيفِنكُم ؟.
إن شاء الله سيد البوست جمع ؟.
ملحوظة: إن شاء الله تُكتب هكذا. كِدا (إنشاء الله ) خطأ فادح.

نعم،
فرِد تكون بمعني وآحد، يقولك عندي وِليد فرِد وحيّد،
وزي ما قال شيخنا عماد، قد تُنطق فد، مثلاً، عندي
ود فد وحيّد اي ولد وآحد. في سودانيتنا نرخم ونقول
ود لي ولد، وفي الإضافة نقول، ود فِلآن.

المعني في كلآمي، عبد الحفيض تفضل بشرح معني مريوق للأخ علي
وأنا طلبت من عبد الحفيض يضيف لعلي شرح خبر الحجر قبال علي
يسأل منه، ويجي عماد يركبنا باسطونة. ههههههههه.
دا معني تاني في قولنا فرِد خترة . مثلاً تكون ماشي السوق وآحد يقولك،
عليك الله جيب لي معاك ربُع لحمة وربطة ملوخية، وفد خترة اغشي
معاك المكتبة جيب لي جريدة، يعني مرّة وآحدة جيب لي اللحمة والملوخية
والجريدة. يعني لو سمحت جيب لي ربع لحمة وربطة ملوخية، ومرّة
وآحدة جيب معاك جريدة.

Quote: Quote: مرحب عماد ختر في ظني ذهب .. سافر .. وليس رجع كما تفضلت دلالة كلام ود المدير قد تؤيد معنى: الرجعة واحتمال يكون اختلاف استخدام بين الشمال والوسط أخونا Abu Baker جاء بما يفيد أن اللفظ يصلح للمعنيين المتضادين يعني الذهاب والرجعة شوف هنا... Quote: الاضداد اختر جاى خاتر وين مُزْبَدٌ يَخْطِرُ ما لم يَرَنِي فإِذَا أَسْمَعْتُهُ صَوْتِي انْقَمَعْ اليشكري

نعم الكلمة تحتمل المعنيين، معني رجع ومعني ذهب، وكمان امشاكُن (هيا بنا).
مثلاً،
تقول، فلآن ختر نُصّت نِهار، اي ذهب في منتصف النهار.
وتقول، فلآن جانا خاتر بي في الليل، اي اتانا راجع في الليل.
أو تقول في معني هيا بنا، اختراكُم نزور عماد، اي امشاكُم نزور عماد،
هيا بنا نزور عماد. لآمن خترنا من عماد لآقانا ثعلب في الدرِب. اي
عندما رجعنا من عماد قابلنا ثعلب في الطريق.

Quote: مسعولين من الخير سيد البوست وينو ؟؟؟؟ ختر وللا شنو!!!!!!

يسعل مِنّك الخير يا ود الغالي،
الزول ظنيتو ختر، دحين إن كان جا خاتر علي البوست
تاني قولولنا عيييك.

سلآم ومودة...

المطر صبّ صبيباً بدّع (علي وزن خبّ خبيباً بدّع بتاعت ود بادي)، السواق شاف ليهو حتة عالية وتكّل فيها، سيد اللوري الراكب جنب السواق نزل وكورك للمرة وساقها ركّبها قدام وجا إندفس معانا تحت المشمعات، بعد المرة نزلت، المداح قال للمداح: ما قلت ليك جبيب معاك طوبة؟ المداح ردّ للمداح: وأنا موش قلت ليك البتجي من الله كلها خير؟ ووقف على حيلو ورفع يدينو الإتنين لفوق واستقبل المطرة بصدرو.
عمر الكمساري طلّع ليهو من خّرج جنبو تمر بركاوي ووزعوا علينا بالخمشات، وبحركات الكماسرة السريعة ديك مدّ للمرة والسواق القدام خمشتين، بسري قلت: الكمساري دا علماني، حنيّن وكريم، وبسري برضو شكرتو شكر شديد علي فكة الجوعة الدخلها فوقنا برد المطرة.
شوية والمطرة هِدت، عمر شال واحد من المشمعات ومعاهو حبال وظبط لينا تاية بجنب اللوري في دقائق (كنت داير أسري وأضيف للكمساري صفة سريع، لكن خلونا من الجمل الإعتراضية دي)، شلنا المشمع التاني جلسنا فوقو وإنضم لينا السواق. سيد اللوري قال للمداحين أمدحوا لينا، نزلوا الطارات لقوها مرخية، قلت ليهم أنا عندي بابور غاز في شنطتي، وأضفت: نحن برضو عندنا عدة شغل.
شدينا الطارات وكل زول حمس يدينو في البابور والمداحين قعدوا جنب بعض، وبدوا بمدحة: شيء لله يا حسن، يا حسن، الأداء بتاعم أحسن مية مرة من أداء الجمهوريين لهذه المدحة، والمداح الما جاب الطوبة صوتو لو ما أحسن من صوت إخلاص همد، بكون زيها.
قلت ليهم إتوا جمهوريين ولّ ختمية، ردوا لي بمدحة سريعة:
شيء لله يا أب جلابية ويا عثمان شيخ الختمية
شيلوا الفاتحة وأعقدوا النيّة، التمساح جيبولوا أذية

تعديل كلمة صبيباً

أبو بكر عباس كتًاب لامن غياظ !

بعد مدحة التمساح وقفت على حيلي منتشياً وقلت للمداح الما جاب الحجر: اسمك منو؟ قال لي: يوسف، قلت ليهو: شوف يا أب شرا، إتّا صوتك دا أسمح من فنانين ام درمان الحاليين ديل كلهم، ومديح الرسول (ص) حاجة سمحة بلحيل، لكن الزمن عندو حكمو، وحوامة الحلال دي للمديح يمكن بطنك دي ما فايتها، دحين أقلب حقيبة، حافظ غنا حقيبة؟ قال لي: شوية، قلت ليهو ما مشكلة هسع بكتب ليك واحدة وبقول ليك اللحن ونجرب، بتقرأ؟ هزّ راسو لتحت.
كتبت ليهو جزء من الشاغلين فؤادي:
الشاغلين فؤادي .. وفايقين تائهين
يكفي البي زارف .. دمعا ما يقيف
تالي القبلي شايف .. لي برقاً لمع
والصيد في الخمايل .. ياناس إجتمع
قوموا يا أحبّة .. نسترق السمع
ما بطيق القعدة .. والمها اجتمع
وخلطها مع ما بين تبري ناصع وأخصراني اللون
وقفت على حيلي وريتو اللحن كيف، البشوفني يقول اللحن حقي!! عبد الوهاب وردي بس!!
يا أخي، يوسف دا لمان وصل حتة والصيد في الخمايل يا ناس إجتمع، قلبي قرب ينقلع، ولو ما خفت العرب ديل يربطوا تصرفي الجا في خاطري دا بمدني، كنت ...

البوست دا عندي فوقو ضيوف عظام بقيادة الشفيف أب سن، لو ناس مرزوق عشونا؛ برجع ليكم بالواحد

بوست جميل واصل حكى...

سلام وتحية......وإحترام.

Quote: مريوق جيعان يعني فكة الريق هو الفطور مريوق يعني من صحيت ما خش خشمك غير ريقك

تشكر يا ود ابوسن على التوضيح أعلاه .. غايتو في البداية انا دقست وقريت العنوان ( التقومك من اهلك مروق) .. يعني مستمخ اوي 😆😅

تحياتي

حكي جميل يا ابوبكر والله ..
والأجمل الاضافة ..
التقومكـ من أهلك مريوق ..
رغم إني توصلت للمعنى ..
لكن أول مره أسمعها ..

Quote: ولو ما خفت العرب ديل يربطوا تصرفي الجا في خاطري دا بمدني، كنت ...

ههههههههههههههه


جدعة حريفة منك

هههه
ابوبكر ذكرتني سيد ريال مدني الوقع منو
ريال وطار
لك التحية ولضيوفك
عندي جدي رحمه الله عبيد الامين جلي .. كنا اطفالا وكان رجلا كبيرا مقاما وسنا في الحلة .. لو ما جريت عليهو في السلام بقع في النص .. بجيك شابي من يشوفك وينخلع خلعة الفرحة برؤيتك .. ويجي تارس عليك .. كريما اروش

يا جماعة

شايف واحدة من بنات حواء دخلت البوست ده
_________________


أهـا يا أبو بكر... فتوى المداحين شنو في الحتة دي؟؟؟

يا اخوانا افقدوا بكّور دا أصبح كيفنو :)

اخونا عماد مسك في المداحين باعتبارهم دالة مذهبية
مغايرة (او مخالفه لمذهبه ) وشات فيهم (بامر الله ورسوله باعتباره من الفرقة الناجية )
ونسي انو دولة الوهابية تحمل الدين (الاسلام) بقج وغبائن تراث شبه الجزيرة العربية
ضد النساء بمصادرة حقها في الزواج (شرط الكفاءة ) وقيادة السيارة والسفر والابتعاث للخارج !!!!!
حجرنا بسقط حجرنا
حجركم دا البسقطوا شنو ؟

Quote: يا جماعة شايف واحدة من بنات حواء دخلت البوست ده

][/url]
[/url]

Quote: اخونا عماد مسك في المداحين باعتبارهم دالة مذهبية مغايرة (او مخالفه لمذهبه ) وشات فيهم (بامر الله ورسوله باعتباره من الفرقة الناجية ) ونسي انو دولة الوهابية تحمل الدين (الاسلام) بقج وغبائن تراث شبه الجزيرة العربية ضد النساء بمصادرة حقها في الزواج (شرط الكفاءة ) وقيادة السيارة والسفر والابتعاث للخارج !!!!! حجرنا بسقط حجرنا حجركم دا البسقطوا شنو ؟

الشخص الذي يكتب باسم/ محجوب

طالما جئت لأغراض أخرى مافي مشكلة...

نستلف حجر ود المدير، ونديك ليهو بما يناسب مداخلتك...

مع حرصي ألا يصير الصخر مثقالاً بدينار (**)



___________________

(**) كم من لئيم مشى بالزور ينقـلـه** لا يتقي الله لا يخشى من العـار
يود لو أنه للـمـرء يهـلـكـه ** ولم ينلـه سـوى إثـم وأوزار
فإن سمعت كلاماً فـيك جـاوزه ** وخل قائله فـي غـيه سـاري
فما تبالي السما يوماً إذا نبـحـت ** كل الكلاب وحق الواحد الباري
وقد وقعت ببيت نـظـمـه درر ** قد صاغه حاذق في نظمه داري
لو كل كلب عوى ألقمته حجـراً ** لأصبح الصخر مثقالاً بـدينـار

ود المدير ختر جاب الحجر تب جانا

لي بت عماد شان جات وشاركتنا حجانا

يا ودابوسن تلحقنا في هالظرف تلفانا

نعمات عماد حباباالف حاشاها مي ناحسانا






الايام دي متلبساني البداوة

وما احلاها

والله يادكتور ابوبكر شايفك بقيت فى اللستة بتاعة كبار المثقفين والكتاب وعلى سبيل المثال لا الحصر الاستاذ بشرى الفاضل والاستاذ اسامة الخواض
غايتوا خاتين بنبرنا وقاعدين بس ساعدنا بالترجمة للدناقلة الغير ناطقين بها



كن بخير

بعد المطرة وقفت، قلنا للسواق: نتحرك؟ سيد اللوري قال لا لا، أنا والسواق ح ننوم هنا وخيرونا بين نرجع أم شانق، ولّ نمشي مرزوق، واحد من المداحين دندن بالطار:
التقومك من أهلك مريوق تغشيك أم شانق وتبيتك مرزوق
واخوانو بدوا بشيلوا معاهو:
تغشيك أم شانق وتبيتك مرزوق
في اللحظة دي، المرة نزلت من اللوري وقالت لينا بحزم: نمشي مرزوق، بسرعة نزلت شنطتي وعلقتها في ضهري، المداحين دخّلوا عِدّة الشغل في المخلاية، وعمر طلع اللوري نزّل السخل وحلّ الجداد من القناية، وتبعنا المرة.
عمر وهو لابي السخل وشايل الجداد بيدو الشمال قال لينا: أسرعوا خلينا نبقى قدام الوليّة، بسري قلت ليهو: خلاص يا سيدنا موسى!! في لحظة فكرت أساعدو وأشيل منو الجداد، لكن تذكرت انو دا ما بليق بالبرستيج بتاعي، لكني أضفت لعمر صفة الجدعنة بسري، والمداحين سادرين في غيّهم.
شوية ويظهر لينا زول من يمينّا فوق ضهر عنافي حُر، والعنافي ماشي في إتجاهنا بسرعة خفيفة بين الكربتة والخبيب، صوت الشلايل بالجنبات بقى لي زي الزول البصفق، لمان قرّب لينا سلم علينا من فوق ضهر الجمل ورجع للمرة وقال ليها: كيفنك آ نعمات؟ قالت ليهو: بخير يابا وزادت: تراك وصلت معانا، قال ليها: الخير أخركم وبدّر بي.
نوّخ الجمل ومع نزوله منه طلع السكين بجفيرها من ضراعو؛ إضايرت، لكنو مدّاها لبتو، وما زال ماسك بخطام البعير، المرة طفرت فوق البعير بخفة كديسة، وعلقت السكين في المخلوفة وإتناول السخل من عمر وختتو في الخرج وعلقت الجداد جنب السكين وسرحت صوب الحلة.
ــــــــــــــــــــ

تعبتكم وتعبت روحي، بحاول أتمو الليلة قبل ما يجي جادات يرفع بوستاتو ويطيرو لينا الصفحة التانية.

Quote: آ نعمات؟

شن قاصد آآآأبكر ؟؟؟؟3

Quote: شن قاصد آآآأبكر ؟؟؟؟3

داير أرد على شيخ عماد وأشكّرك

أكان كدي ..عديلة طب آبوى تسلم .

تعرف يا دكتور الواحد من يقول ليك لمان والفريق تعرفوا طوالى من مدنى لقيتنى كيف