تمنيت لو عرفت سبب عدم السماح لتوريد سيارات خاصة للسودان شنو

زماان لما كنا طلبة في الاقتصاد كانوا بقولو لينا الجمارك لحماية المنتجات الوطنية
لكن ما اعتقد انو الكلام ده صح ، لانو لو كده مفروض السودان مايكون فيهو شعبة جمارك من اصلو
على شنو و هي وينها المنتجات الوطنية البتحتاج حماية
شاشات و تلفزيونات
اجهزة كومبيوتر
كومبيوتر محمول
سيارات
صناعة الدمورية وقفت في السودان فهل يعقل ان تكون في صناعات اجهزه الكترونية و نحن ما عارفين ؟؟
لذلك فمسألة حماية المنتجات الوطنية دي ما ياها السبب .... لكن ماهو السبب ؟؟

اعتقد من حق كل اسرة سودانية ان تستورد سيارة خاصة بها او تجارية و بدون اي جمارك و ان تفرض جمارك اذا كان هناك اكثر من سيارة للاسرة الواحدة ... اليس هذا عدل ؟؟
السيارة اصبحت ليست من الكماليات او اللوكشوريز ، بل هي من الضروريات زيها و زي الاكل و الشراب و العلاج في كل دول العالم من السهل جدا اقتناء سيارة ترفع رجلك و تعينك على قضاء حوائجك و حوائج اهلك الكبار في السن و لو لا قدر الله
حصلت حاجة للطبيب او المستشفى في ليل دجوجي او انصاص الليالي هل يفترض بنا ان نقوم كداري لغاية شارع الظلط البعيييد داك ننتظر سيارة اجرة في وقت ينقطع فيهو المارة و السابلة و الحنابلة في بلد ناس بينومو من العاشرة مساء
ام ماذا تفعل ؟

لماذا يضع الجمركيون مبلغا يساوي ضعفي سعر السيارة عند دخولها السودان ؟؟ لماذا يصر السياسيون انو نمشي نحن كداري و نقيف في حر المواصلات و نزازي زي كلاب الحر و هم يركبون الفارهات من اموالنا ؟؟؟ بل حتى لا يألون جهدا في امتطاء هذه الفارهات ولو للذهاب للمسجد القريب ....لماذا؟
اليس من الواجب و المفترض ان يتم السماح لكل اسرة بامتلاك سيارة خاااااصة اذا كان في مقدورها استيراد سيارة دون وضع اي فلس جمركي اليس من حق كل اسرة ان يكون لها سيارة ؟؟؟

تصاب بوجع القلب اذا كنت في زيارة لاقرب دول خليجية و عرفت حجم الفارق الخرافي بين سعر السيارة في هذا البلد و سعرها في السودان
و تصاب بامراض لا تعرف حصرها اذا عرفت انك لن و لن تستطيع توريد هذه السيارات للسودان رغم انه بامكانك شراءها و بسهولة


حتقول لي دي دول بترول

اقول ليك البترول طاير نحن ماقلنا لي كل فرد سيارة نحن قلنا لكل اسرة سيارة لكل بيت سيارة اضعف الايمان

و بالحساب كده و المنطق تعالو نشوف هل تأثير استيراد السيارات بدون جمارك بالصورة المذكورة دي يؤثر سلبا و لا ايجابا على الاقتصاد :

لا اؤمن بنظريات الاقتصاد و التي هي غالبا ما تكون اشبه بضرب من ضروب الخيال و قصص الف ليلة و ليلة بالذات ستصاب بالدوار و عدم الادراك لو تم اسقاط تلك النظريات على اقتصاد بلد كالسودان غير مخطط اقتصاديا
غالب النظريات الاقتصادية تفترض ثبات عوامل كثيرة على حالها و هذا ما لا يمكن حدوثه في ارض الواقع و هل يستطيع اي عبقري زمانو ان يتكهن بثبات اي عامل من عوامل النمو الاقتصادي على حاله ليوم و ليلة ؟ لست ادري ماذا تفعل وزارة الاقتصاد والمالية في السودان ؟ الاقتصاد غير مخطط و يستحيل بناء اي استراتيجيه اقتصادية
و سترى ذلك حينما تشاهد اي برنامج تلفزيوني يستضيف اقتصاديين ستكتشف حينها ان كل الاحتمالات يمكن حدوثها و لن تخرج بأي نتيجة و معلومة مؤكده تنبئ بحدوث حراك سلبي او ايجابي في الاقتصاد ذو طبيعة منطقية ، فكل شئ يعتمد على اذواق المستهلكين
و المقدرة الشرائية و التنبؤات و الشمارات الفي السوق و هذه عوامل لعمري يستحيل قياسها و الاعتماد عليها و الشئ الواضح و المعلومة الوحيدة الثابتة و المؤكده هي ان زيادة الانتاج تؤدي الى زيادة الدخل و بالتالي زيادة الرفاهية
عندك مشكلة في الاقتصاد فعليك بزيادة الانتاج فيما لك فيه ميزة نسبية
طيب ..

في محلو ..

لكن ( البسمع ) منو ؟

------------

و في سؤال تاني :
قروش الجمارك دي ذاتا بتمشي وين ؟
بتخش في اي بند صرف ؟
أو في جيب منو ؟ طالما ما هي غير ظاهرة !!

جمارك السودان يا خالد بتربح أكتر من ضعف ربح الشركة المصنعة للعربية ذاتا !!!

بقولو عايزين يحدو من عدد العربات عشان يقل صرف الوقود وبالتالي يقل (دعم الحكومة للوقود) .. رايك شنو في الحته دي؟

الأخ خالد
داير النصيحة
والا
الجنبا
؟
____
الحليلة

تحايا للاخوين عبد اللطيف و ايمن و مشكورين على المرور

الجمارك القصد منها هو التحصيل و زيادة ايرادات الحكومة و هذا هو الذي يحدث ، ما عندي ارقام للايرادات السنوية للجمارك لكن تقريبا كده هي بتوفر زي 50 في المية من الايرادات او اكتر لانو النسب المفروضة و الاسعار الجمركية على الواردات
حجمها خرافي
انا في رأيي يجب الغاء حاجة اسمها جمارك نهااائي لانها عديمة الفائدة للمواطن و بالعكس هي سبب التعاسة التي يعيشها المواطن
بلد ما عايز ينتج افتح باب الاستيراد فيهو منتظرين شنو ،،
استغرب لما اجيب لي شاشة سوني من امها اجي في المطار يقولو لي تدفع 150 دولار جمارك و الذي يصيبك بالاستغراش اكثر انو السوق كووولووو بضاعة صينية ضاربة لو رفعت صوت التلفزيون ساااي بس لاعلى درجة تنفجر فيك السماعات
ياخ على الاقل مفروض تدفع لي انا مش انا ادفع ليك جمارك لاني انا دخلت في البلد بضاعة اصلية و بي مواصفات
البلد لو فيها بضاعة اصلية الزول بكون شوية متقبل الموضوع لكن البضاعة الفي البلد اردأ بضاعة على وجه الارض و ما بخلوك تدخل بضاعة نضيفة لي نفسك !!!
يعني لا بتلقاها من جوة البلد و لا بتقدر تجيبها من بره بس الفي ده عايزو عايزو ما عايزو ادفع لينا !!!

العربات قول ممكن يكون عشان البترول طيب الشاشات و التلفزيونات عشان شنو ؟؟؟
معا نحو موانئ و مطارات خالية من الجمارك

اخي الكريم سلام مربع وبعدين انا بعمل في اكبر شركة سيارات في منطقة الشرق الاوسط والله العظيم امتلاك السيارة بالنسبة لي زى امتلاك كتاب ولكن نفس السؤال يدور في ذهني لماذا لا امتلك سيارة مثلهافي السودان والاجابة بدون اجتهاد اذا سمحوا لي وسمحوا ليك انت وكل قادر ان يحضر سيارة لاسرته كما ذكرت وليس كل فرد كل اسرة وكلام معقول ومنطقي طيب تجار الدين والسلطة يتاجروا في شنو ما نفس السيارة المنعوك ليها بتلقاها في سوف الله واكبر في الكرين في المريديان سابقا وباضعاف مضاعفة في القيمة انت قائل مص الدم هو معناهو تبرعك بالدم في بنوك الدم بالمستشفيات هم يحرقوا دمك ويمصوهوا ليك وياكلوا قروشك بالباطل عاوز اشترى ما عاوز يجي واحد منهم وفيهم ويشترى وعينك تعاين قروشوا وحر مالوا هو تعبان فيها يا اخي الله يكون في العون

ما ينقص العقول السودانية هو الجرأة
و الادارة في السودان ادارة حارسة و الادارة الحارسة هي التي تحرس الموجود فقط و لا تقدم اي جديد و هي عكس الكرييتف و القدرة على الابداع
يعني المدير يجيبوهو بس يكون عايش على القديم و حارس الكنب و الكراسي و الطرابيز و المكتب و الدفاتر القديمة و البوكس فايلات و النظام الموروث و فلاحتو تكون في هو يا زول ماتجي متأخر تاني و هوي يازول ما تتحاوم بي جاي امش شوف شغلك
لكن الشغل هو شنو زااااتو ما عارفو
الادارة هي الابداع و التجديد و الجرأة و سبب التعاسة و النحس الذي يلازم دولاب العمل و الخدمة المدنية هو ان المدراء مجرد حراس فقط يحرسون الورثه التي آلت اليهم كما يفعل البواب
و انا اؤمن تماما انو معظم النظم و اللوائح و القوانين التي تحكم البلاد في الاقتصاد و الادارة و السياسة منتهي الصلاحية و ماف زول عارف بس الناس بتمش الشغل و تجي راجعة لكن عملت شنو ، هل ابتكرت هل استحدثت هل غيرت في شئ ؟ .. ما اظن
و احد هذه النظم و القوانين هي نظام الجمارك في السودان و الذي يحتاج في رأيي الى اعدام و الغاء
الجمارك عبارة عن نهب مصلح و تقنين للسطو المسلح بس بدل ما ناس النهب المسلح بلاقوك في الشارع ديل بلاقوك في مكاتب مكيفة و كلهم بشيلو حقك و عرقك و دم قلبك قلع عدييييل
بالمنطق ياخ.. انا اشتريت لي شاشة تلفزيون ،، الفهم شنو السبب شنو ادفع فيها جمارك ؟ ماهو تأثير استيراد شاشة تلفزيون على الاقتصاد الكلي ؟؟؟ فهمونا يا بتاعين الجامعات و الدراسات العليا و الدكتوراه لانو نحن بقينا ما بنفهم

سلام يا خالد
يازول الجمارك بتاعة السودان دى هى سبب دمار البلد والاقتصاد لانو ظلم واكل لاموال الناس بالباطل بصورة فوق الخيال
قبل شهرين اشتريت عربية كامرى موديل 2015 من الوكالة ب ـ 79000 ريال واخوى فى السودان اشترى بوكس موديل اتنين وتمانين تخيل بى 140 مليون
يعنى نفس سعر العربية الزيرو الاشتريتا انا فى الدوحة

السيارة توسان 2015 قير توماتيك وفتحة سقف بانوراما 73500 ريال سعودي تساوي 169 مليون بالسوداني
الجمارك 184 مليون
زائد 2500 لشركة المهاجر لو ان السيارة افراج
ليتجاوز مبلغ الجمارك 186 مليون
رغم انها ربما لاتستخدم قطع غيار لأكثر من سنتين
وسيارة الأسرة بالسودان لاتخدم الأسرة فقط
انما بامكانها تقديم خدمات لاتستطيع الحكومة تقديمها لمواطنيها

واذكر انني حينما ذهبت لتجديد تصريح الافراج من شرطة مكافحة التهريب
حضر احدهم ومعه برادو 2014 للجمارك
وهو يعيش بالسودان
وقالوا له الجمارك 394 مليون
ودفعها على دائر مليم
واستلم اوراقه في نفس اليوم الساعة الثانية
علما بان سعره البرادو 130 الف ريال سعودي تساوي 299 مليون

مايحدث في الجمارك
والأراضي
وبعض حفلات الزفاف في السودان أمر يدعو للدهشة
بل ويحتاج فتوى من ابليس !!!

.


هذا من صنوف الظلم الذي لا مثيل له إلا في السودان،
ربما الحل هو دعوة الشعوب والحكومات الخيرة في العالم للتدخل لحماية شعب السودان!

.

مع إنني مقيم في السودان
ومع انني متضرر من القيود المفروضه على استيراد السيارات في السودان.
ولكن
لو اتيحت لي الفرصه لحظرت استيراد السيارات تماما الي السودان مع مجموعه كبيره اخرى من السلع التي تعتبر من ال Consumables والتي لا تتناسب مع دوله فقيره مثل السودان.
فقرار الحكومه بزياده الجمارك وحظر السيارات المستعمله قرار صائب من الناحيه النظريه على الاقل.


كدي عيبو لي كوبا :)

المشكلة في التعريفة الجمركية و الرسوم العالية جدا و المبالغ فيها..يعني حتى لو كانت نسبة معقولة مقبولة لكن ان تكون اكتر من 100% هذا غير معقول.
انت ماشي بعيد ليه الأدوية و الأغذية و البان الاطفال عليها رسوم حكومية..يعني ما قادرين تدعموها كمان تختو عليها رسوم.

.

Quote: فقرار الحكومه بزياده الجمارك وحظر السيارات المستعمله قرار صائب من الناحيه النظريه على الاقل.

ياخي تبا للناحية النظرية التي تنادي بها!! هذه الحكومة تعيش عالة على أبناء الشعب السوداني، نحن نتكفل بمعاش هذه الحكومة ومنسوبيها مع ان الله لايسألنا عنهم!
برضو في ناحية نظرية تانية اسمها التخلص فصل الشعب عن الدولة!

.

Quote: المشكلة في التعريفة الجمركية و الرسوم العالية جدا و المبالغ فيها..يعني حتى لو كانت نسبة معقولة مقبولة لكن ان تكون اكتر من 100% هذا غير معقول. انت ماشي بعيد ليه الدوية و الأغذية و البان الاطفال عليها رسوم حكومية..يعني ما قادرين تدعموها كمان تختو عليها رسوم.

انتو قايلين الحكومة دي بتدعم الحاجات دي كيف مثلاً يفرضوا جمارك علي لبن الاطفال ب 50 % من سعروا تقوم الحكومة تقول نحنا بندعم الللبن ده ب 7 % وبكدة تبقي الجمارك 43 % بس دعم ده ولا موش دعم يا متعلمين
هسع كان فتشنا بنلقي حكومة الجن دي داعمة استيراد السيارات بقريب ال 13 %

عبد الحي يوسف أفتى بحرمة الجمارك - بحسب سمع أضاني في مسجد كلية الطب بجامعة الخرطوم بعد صلاة الظهر في رمضان قبل ما يزيد عن 6 سنوات
واستدل بحديث لا يدخل الجنة صاحب مكس
وقال في المسجد - والحديث من الذاكرة - إن استطعت التهرب من الجمارك فافعل ولكن لا تغش
وقال الضرائب تحلل بشروط معينة وهي غير متوفرة في ضرائبنا الحالية
وحتى لا أبهت الشيخ لا أذكر الشروط تحديداً لكن من بينها ألا تكون دائمة أي أن تفرض في وقت معين لحوجة معينة ولزمن معين

وقد طرحت من قبل رأيي في عدم السماح باستيراد السيارات المستعملة و ليت المسؤولين يقرؤوه و لربما كانت السيارات المستعملة أخف كثيرا على البلاد من السيارات الجديدة..
يا وزارة المالية قرار حظر استيراد السيارات المستعملة غير سليم .. يا وزارة المالية قرار حظر استيراد السيارات المستعملة غير سليم ..

التحية للاخوة العابرين الذين اثروا الموضوع
و لنا عودة

لو جبت بسكويت صناعة مصرية ... حا يكون إمّا معفي من الجمارك ... أوجماركو رمزية !!!







... المهم ....

Quote: تمنيت لو عرفت سبب عدم السماح لتوريد سيارات خاصة للسودان شنو

حاليا العملة الصعبة البتدخل البلد من الثروة الحيوانية، الصمغ وشوية زراعة زايد المغتربيين.
هذا الناتج لا يكفي إستيراد الإحتياجات الضرورية من قمخ وبترول وأدوية وونسة شركة زين.
الليلة دي لو الحكومة فتحت لإستيراد العربات من غير جمارك باهظة؛ بكرة دي الإقتصاد بنهار وسعر الدولار بحصل 50000

السبب بسيط: زيادة الدخل القومي...يعني يزيدوه ليك من وين؟؟
الحكومة دي مش كل يوم بتعمل في كبري؟؟
وبترصف في الشوارع؟؟
وبتترس المطر.؟؟
وبتعمل حملات تطعيم للاطفال؟؟
ومستشفيات ورواتب مدرسين وجيش وشرطة وامن
وطيارات نازلة وطيارات قايمة...؟؟؟
الرؤساء والوفود البتجي دي مش الحكومة قاعدة تعزمهم فطور وغداء وعشاء؟ يوم واحد جريت ليك خروف قلت ليهم حرم فطور الجماعة ديل علي؟؟؟

وعايز يدخلوا ليك برادو مجان....عشان تكمل الخرفان...كل يوم واقف ليك في لفة رافع ليك خروف
ولامي ليك جماعة يلعبوا في الكوتشينة..وخروفك معلق في سمك الباب!!!!
الحكومة بتلعب كوتشينة..؟؟ واللا شفت ليك حكومة معلقة خروف في سمك باب؟؟


سير صير يا بشير

Quote: ياخي تبا للناحية النظرية التي تنادي بها!! هذه الحكومة تعيش عالة على أبناء الشعب السوداني، نحن نتكفل بمعاش هذه الحكومة ومنسوبيها مع ان الله لايسألنا عنهم! برضو في ناحية نظرية تانية اسمها التخلص فصل الشعب عن الدولة!

شكرا سيف اليزل الماحي

فقد عبرت عن حقيقة الحاصل في السودان .. أعداد مهولة من الدستوريين تكفي لإدارة القارة الأفريقية وولايات جديدة وهياكل حكومية جديدة كل يوم و(خبراء وطنيين) برواتب أعلى من رواتب الوزراء وأجهزة قوات نظامية تزيد

من الحاجة إليها الاشكاليات السياسية بالبلاد والمظالم الناتجة عن انفراد حزب صغير بالسلطة في هذا الوطن الكبير ...

كل هذه نفقات تحتاج هذه الدولة للضرائب والجمارك و الجبايات المرهقة لمواجهتها .. كل هذا كوم واحتياجات الحزب الحاكم ومنظماته وأنشطته الـ ....VIP ... كوم آخر ..

والمواطن السوداني مكتوب عليه أن يتحمل كل هذا لأنه (مرفوع الرأس من الحكومة الاسلامية التي تناطح الأمريكان وتمثل الخلافة الاسلامية الاخوانية).....

السوداني يمرض ويموت بأمراض تم إعلانها جزء من التاريخ في أماكن كثيرة حول العالم ومن المهد إلى اللحد على ظهر حمار ولا يمكن أن يحلم بالسيارة .. بينما (عيال الترابي) يتمرغون في المحليات والوزارات والشركات الحكومية وخبراء وطنيين ودستوريين ونواب تشريعيين ومستشارين وغيره ويتقاعدون بالسيارة الحكومية بموجب قانون رسمي اصدرته الدولة السنية...

قرية كاملة في الجزيرة تدعم الاقتصاد الوطني بمنتجات زراعية إما تنتجها هذه القرية أو تستوردها البلاد بالدولار ولا تجد سوى لوري قديم للحاق بالنساء الحوامل للمستشفى الفقير مروراً بالطرق غير الممهدة ودستوريين الجبهة الاسلامية يتقاعدون بسيارات جماركها نصف مليار وثلاث أرباع مليار ...

كل هذا لأجل عيون دعايات تطبيق الشريعة الاسلامية التي طبقوها على المواطن واستثنوا منها أنفسهــم

ادفعوا الجمارك واسكتوا ...

أحمد الشايقي

Quote: السبب بسيط: زيادة الدخل القومي...يعني يزيدوه ليك من وين؟؟ الحكومة دي مش كل يوم بتعمل في كبري؟؟ وبترصف في الشوارع؟؟ وبتترس المطر.؟؟ وبتعمل حملات تطعيم للاطفال؟؟ ومستشفيات ورواتب مدرسين وجيش وشرطة وامن وطيارات نازلة وطيارات قايمة...؟؟؟ الرؤساء والوفود البتجي دي مش الحكومة قاعدة تعزمهم فطور وغداء وعشاء؟ يوم واحد جريت ليك خروف قلت ليهم حرم فطور الجماعة ديل علي؟؟؟ وعايز يدخلوا ليك برادو مجان....عشان تكمل الخرفان...كل يوم واقف ليك في لفة رافع ليك خروف ولامي ليك جماعة يلعبوا في الكوتشينة..وخروفك معلق في سمك الباب!!!! الحكومة بتلعب كوتشينة..؟؟ واللا شفت ليك حكومة معلقة خروف في سمك باب؟؟ سير صير يا بشير نزار "You made my day,"

---

Post: #25 Title: Re: تمنيت لو عرفت سبب عدم السماح لتوريد سيارات خاصة للسودان شنو وليه الجمارك و و Author: Salah Habib Date: 11-26-2014, 11:55 AM Parent: #1 تحية طيبة الحكومة او ادارة الجمارك لو فكرت وعملت الجمارك 50% بس / بشرط تدفع بالعملة الصعبة لكان فيها فائدة للطرفين !! على الاقل يكسبوا عملات حرة .. بس مين يقول البغلة فى الابريق

---

Post: #26 Title: Re: تمنيت لو عرفت سبب عدم السماح لتوريد سيارات خاصة للسودان شنو وليه الجمارك و و Author: خالد المبارك Date: 11-29-2014, 11:27 AM Parent: #25 الموضوع لا علاقة له من قريب او بعيد بالعملة الصعبة ماهي نسبة ان اودع تحويلاتي في بنك و ادخلها النظام المصرفي ان اشتريت سيارة ام لم اشتر ؟ القصد من الموضوع هو الجباية و زياده ايرادات الحكومة في ظل الانهيارات التي تحدث بين الفينة و الاخرى ثم ان هنالك لوبي بين التجار و الحكومة لا يسمح بمرور اي سيارة داخل البلاد بي اخوي و اخوك القطط السمان تتجة الحكومة لتغليب مصلحة القطط السمان على حساب ضروريات المواطن المسكين ام بماذا تفسرون فرض ضرائب تفوق المائتي دولار على شاشة تلفزيون ؟؟ ماهي مصلحة الحكومة في عدم دخول تلفزيون من قبل المواطنين عبر موانئها و مطاراتها ؟؟؟؟ انها لقسمة ضيزى ان يستأثر التجار و القطط السمان و الحكومة و يربحون من كاهل المواطن المتضرر الوحيد في هذا الصراع الغير مبرر المفروض عليه الا يعد السماح لكل اسرة سودانية بشراء سيارة خالية من الجمارك خدمة للمواطنين الذين يفترض ان تذهب اليهم ايرادات الجمارك برمتها ما الذي يضير الحكومة اذا سمحت بهذا ان كانت فعلا تعمل على رفاهية المواطن و ليس لرفاهية القطط السمان لا يخفى على عاقل اهمية احقية امتلاك سيارة لكل اسرة بدون جمارك و لكن من يقنع عقل الحكومة و من يقنع هؤلاء المصفقاتية اعضاء البرلمان الذين لا يجيدون سوى التصفيق من الذي يمرر حقوقنا نحن الشعب السوداني و ماهي الوسيلة التي يستطيع ان يمرر الشعب استحقاقاته و مطالبة و يفرضها على الكل في الوقت الذي يتثائب فيه اعضاء البرلمان قرار حظر استيراد السيارات او فرض جمارك قرار جائر و يصب في مصلحة افراد يحسبون على اصابع اليد و يمتهن كرامة الشعب السوداني المغلوب على امره لانه الشعب الوحيد الذي يسير على رجليه من دون شعوب الارض فكيف لشعب يسير برجلية ان يحقق تطلعاته في عصر السرعة و النفاثات