Post: #1
Title: ما عافية ليك كان عرست (إعادة نشر // 2005)
Author: Hani Arabi Mohamed
Date: 11-23-2014, 05:24 PM
نشرت هذه الحروف في 2005 في منتدى عكس الريح واستأذنكم في إعادة نشرها هنا:
(1)
محمد كبر
اتخرج من الجامعة
ولقى شغل
كوّن نفسه
وبعد سنة
افتتح دكان
وبقى يتابعه بالمسا
مرت سنتان من العمل الدؤوب والجاد لم يقصر فيها تجاه احد من اخوته وامه وابيه
-- يا أمي انا داير اتكلم معاك في موضوع
** ايوة يا ولدي ان شاء الله خير ؟
-- أمي أنا داير أعرس وداير اعرفك على واحدة تمشي تزوريهم في بيتهم وتديني رايك فيها وفي أهلها
** شنو ياولد عرس عرس شنو انت سويت لينا شنو ؟ كبرت متين ؟ جاي تتكلم
في العرس كمان؟ أول حاجة تقدم لاهلك ولامك ولاخوانك بعد داك تجي تفتح معاي
الموضوع دا
-- لكن يا أمي
** لكن شنو يا ولد لو فتحت الموضوع دا تاني أنا ماعافية منك
الكلام دا تم سنة
البت الكان عاوزها محمد
اتزوجت من واحد تاني
وبقى عندها تيمان
ومحمد لسع مجتهد ومواصل في دربه
-- أمي
** أيوة يا محمد
-- انا داير أعرس
** وووب ووووب ووووب عرس تاني ياولد لا لا لا
-- لكن يا أمي
** والله تفتح الموضوع دا تاني انا ماعافية منك
-- يما ,,,, اسمعيني
** لا اسمعيني ولا غيره اسمع يا ولد انت ولد متين عشان تجيب سيرة العرس ؟
(2)
بعد ستة سنوات
محمد هو محمد
زادت في راسه كم شيبة
ونقصت منه كم شعره
تجارته زي ماهي
وظيفته رفدوه منها
لانه حزب الطابور المئوي
استلم البلد
واعلن العطاء
لاهل الولاء
(3)
راجل كبير جا دكان محمد
-- مرحب يا خال
* اسمع يا محمد يا ولدي
-- ايوة ياخال مالك؟ في شنو متغير كدا ؟!
* محمد الدنيا دي طريق عابر وما في زول دايم فيها
-- في شنو يا خال ؟ الحاصل شنو ؟؟ خوفتني منو ؟
* امك يا محمد اختي فاطمة واااااااااااااااااااااااااااااااااااااااااا
(4)
الصيوان ليه تلاتة يوم قدام البيت
الناس اتلمو وجو من كل البلد
# الفاتحة
- البركة فيكم
@ الله يعظم الاجر
-- ياعبدالكريم
*** أيوة يامحمد
-- ديك منو ؟
*** دي سمية بت محمود العطا
-- طيب خليك هنا أنا واصل موار قريب وجاي
*** وتخلي العزاء لمنو ؟
-- مابتأخر حاجة ضرورية
(5)
بعد ساعتين
محمد رجع الصيوان
والكتير من المعزين
كانوا راجينه
عشان يقومو بالواجب
(6)
*** انت محمد دا جن ولا شنو ؟ الراجل المعاه دا مش فلان؟
--- أيوة ياهو زاتو
*** الجابو هنا شنو ؟
(7)
محمد يكورك: ياجماعة اتلمو علي هنا انا مشيت لعم محمود العطا
طلبت بتو سمية والعقد بعد صلاة المغرب هنا , ودا عمي سامي الماذون معاي
*** في صيوان أمك؟ دا شنو يامحمد
|
Post: #2
Title: Re: ما عافية ليك كان عرست (إعادة نشر // 2005)
Author: عواطف ادريس اسماعيل
Date: 11-24-2014, 04:30 AM
Parent: #1
أخي العزيز العربي
يسعد صباحك
للأسف هناك عائلات كثيرة تتجنى على أبنائها فتيات وشباب خصوصا الأخ الأكبر
والتجني يكون في بعض الأحيان بدافع الحب والغيرة أو الأنانية ، فكم من مستبقل ضاع
لبنت تجاوزت الخمسين ، وشاب على أعتاب الشيخوخة بسبب هذا التجني المرير
شكرا لهذا البوست الرائع ، وهذا الطرح الجميل
|
Post: #3
Title: Re: ما عافية ليك كان عرست (إعادة نشر // 2005)
Author: Hani Arabi Mohamed
Date: 11-24-2014, 07:44 AM
Parent: #2
مرحباً عواطف ...
شكراً على مشاركتك :)
( 8 )
محمد كِبِر
فات الخمسة بعد الاربعين
عنده طفلتين زي القمر
آيات وأميرة
ما تمَّن اربعة سنين
(9)
يوم راقد في الديوان
وبناته الاثنين في حضنه
بيونسن
ويتخيل يوم يتخرجن
يوم يعرسَن
يوم ...
يوم ...
وفجأة سكت وعاين ...
سأل نفسه:
عمري وقتها ح يكون كم؟
ومن حسع للوقت داك
هل ح تكون عنده المروّة
يتعب معاهن
للوقت داك
عشان يوصلن
المكانة ديك ؟
وهل ح يقدر !
يقيف معاهن ؟!
في البداية خاف
لكنه لعن الشيطان
وقال
الله ما شق حنكا وضيعه
( 10 )
بيت محمد
والكل سعيد
آيات اتفوقت في امتحان الشهادة
وحاج محمد
بعكازه
بيحاول يجامل الضيوف
ناس تهني وناس تبارك
( 11 )
محممممممممممد محمممممممممد
الناس في المستشفى
والعطر ديتول
(12)
الرجال في المقابر
محمد كان طيب
الله يكون في عونكم
(13)
آيات صابرة ومكافحة
مجتهدة ومجدّة
بس الظروف أقوى منها
حاول الاهل مساعدتها
لكن اليد قصيرة
(14)
بعد نجاح سنتين في كلية الطب
جمدت السنة
ونزلت شغل
(15)
حارجع أقرا بعد سنة
دا كان جوابا لأي زول يسأل
(16)
السنة بقت اثنين
وثلاثة
وأربعة
(17)
حلم الطب تبخر
(18)
ايات تبكي جنب أمها
وتترحم على محمد
وين انت يا أبوي ؟
( 19 )
محمد راقد في القبر
حزنان على بناته
داير يرجع
لكن كيف الرجوع؟
لكل أجلٍ كتاب
(ونعمَ بالله)
(20)
كله منك يا امي
ما خليتيني
اعرس واربي
في شبابي
|
|