(العرس) ... (خفة بنات ) .. و(شطارة أمهات )... (فقه الضرورة)

مساء الخير يا أمة الأمجاد والماضي العريق

في الحقيقة كنت في الاسبوع الماضي قاعدة في حفلة عرس لا بي ولا علي زي ما بقولوا يعني بتفرج بمزاج خالص ولكن

شفت العجب اللي لابسة أحمر في أحمر واللي ماشة بدون ، واللي عاملة خصلة بالشمال ، والتانية باليمين ، واللي عندها عمى ألوان

وفي الآخر قلت لنفسي دعي الخلق للخالق إنتي برضك ممكن ما تكوني عاجبة الناس ، ولا متابعة الموضة الكل يوم بتتغير

فعلا والله أسماء تياب عجيبة ما أنزل الله بها من سلطان ، ولأني ما مواكبة وتيابي بتاعة السهرة منذ زمن أهل الكهف ما قدرت أحفظ ليكم الأسماء فسامحوني

ما كانشي قصدي ...

كل دة ما مهم ، شفت ليك الأولاد الشباب كمان موضات ، وصرعات عجيبة حلق باليمين ، وشعر واقف لا تهزه ريح صرصر عاتية قالوا التسريحة دي إسمها (مسمار)

يكفينا الله شر المسامير أما البنات ف BACK LESS و ARM LESS و LEG LESS إلى أخره على فكرة لست ضد الشباب فللناس فيما يعشوقون مذاهب

عموما الموضوع المهم والأهم استمعت إلى إحدى السيدات وهي تقدم نصيحة غالية لبنت صديقتها وبتقول ليها (أها إنتي لسة مفيش جديد يا بتي ما تتحركي شوية)

إبتسمت الفتاة إبتسامة نص كم وقالت بدلع ( والله لسة يا خالتو) فردت عليها خالتو وقالت ليها هوي يا بت الكلام دة ما بينفع إنتي ما سمعتي المثل بيقول

العرس (خفة بنات وشطارة أمهات) التقلة الكتيرة دي مي سمحة شدي حليلك شوية ؟؟؟

في تلك اللحظة مر أمامي طيف بنات العائلة غير المتزوجات وعددهن أصبح تلاتة بعدما تزوجت أصغر واحدة وسافرت فرنسا طبعا العيلة بعيد عنكم

كلها أولاد ... واحدة ما عرفت لغاية دلوقتي لونها الاجتماعي ... عايزة تزوج ولا مش عايزة .. التانية يا دوبك خلصت الجامعة أما التالتة فلا يعجبها العجب

ولا الصيام في رجب دي اللي مفروض تتعلم الخفة .. عشان حالها يسلك .. تقيلة زيادة عن اللزوم , لازم تفك زرارة .. ياربي في دروس خصوصية للخفة

طيب لو اتخففت واتراشقت أمها كيف تتعلم الشطارة ؟ وكيف تكون دبلوماسية في كلامها الزي الرصاص دة ؟ كيف تعرف إنه الدبلوماسية هي فن الممكن

كل التفكير دة وأنا داخل قاعة الحفل ، ولم ينقطع حبل أفكاري إلا عندما سمعت صوت الفنان وهويقول تاني توبة لا حب لا غرام لا خطوبة عرس بس

فقلت لنفسي أهو الدنيا .. بخير ولسة في شباب عايزين يكملوا نصف دينهم فلا داعي إذا لفقه الضرورة ...

وفتكم بعافية ..

مساء الخير عواطف

تطفو الرغوة إلى فوق وتظهر للناس

المجتمع والحمد لله مليء بفتيات صالحات ورجال كرام يريدون السترة والعيش الحلال !

طاب مساؤك يا هاني

كلامك واقعي وحقيقي وقد طرحت الموضوع للنقاش فكثير من الناس تغيرت لديه القيم إما بفعل العولمة أو الإختلاط بثقافات أخرى

لك كل الود

لك و للعائلة الكريمة

دكتور مصطفي

يا مرحبا والله مشتاقين .. كيفك يا زول

تحياتي لك وللعائلة

وشكرا عالورد

للضرورة أحكام .. تجتمع الأضاد شد الحيل مع الخفة .. بتوازن تحققه الشطارة !

يا عواطف ياخ فى كان داعى تغيبى وتحرمى القراء من ذكاء الطرح و (خفته) المحببة (وتقله) فى مضمونه، تظلله شطارة معهودة!

أخي العزيز نادر

الخفة أنواع والشطارة خشم بيوت ربنا يرفع سعد البنات

شكرا كلماتك ليست كالكلمات

Quote: فكثير من الناس تغيرت لديه القيم إما بفعل العولمة أو الإختلاط بثقافات أخرى

الحبيبة عواطفي .. تحياتي لك ولي جميع حبيباتي وبنوتات وطني الحبيب وامهاتهن الكرام .
التغيير لابد ان يكون لو كان خلال العولمة او خلال اكتساب عادات وثقافات اخري هذه هي سنة الحياة
بمعني انا وانت ما زي جيل امهاتنا ولا حبوباتنا يعني المتغيرات بالنسبة لي من الظواهر العادية
ومتوقعة بدون شك . وبتمني منك يا حبيبة استبدال كلمة( خفة بنات) دي ( بشطارة بنات) وشطارة امهات
وربنا يسعد بنوتنا الجميلات .وهو عليك الله غير احساس الشطارة دا الفضل ليهن شنو من الحياة الاصبحت ليهن
جحيم في القبل الاربعة اللهم يسر عليهن كل امر عسير واسعدن واسترن دنيا واخرة . مشكورة يا توفي .

ولي قدام .

موني أسعدت مساء

كلامك جميل ويدعو إلى الأمل والتفاؤل

أما مصطلح (خفة) فقد ذكرته كما ورد في نص النصيحة دون تغيير

وفي اعتقادي أنها تقصد الرشاقة وخفة الدم

كوني بخير

تحياتي عواطف وضيوفها
شفتي فقه الضرورة وجحر ضب خرب ادخلونا فيهو ناس التحلل
العرس قهر بنات وفلاحة امهات
ولا شطارة بنات وفلاحة امهات
سمعتو قبل كم سنة وقايلو نكتة تصدقي
لكن الحال ضاق .. والتشدد الاسري قل .. التشدد فيما يخص الاخلاق والسلوك
يقول ليك مد راسك وبقطعو ليك طوالي
الامهات العقبة الكؤود تزلزلت مكانتها
والغريبة رغم التطور رجعنا لاسس الاختيار الاقدم .. والكنا بنحارب فيهو .. اختيار الزوجة
احكي ليك قصة بايخة تكرر سماعي لها
بجيك

مساء الخير أخي حفيظ

نتطلع لعودتك حتة تكتمل الرؤية

شكرا على الإطلالة

العزيزة عواطف
عودا حميدا
عنوان البوست زكرني نكتة البنت الحالا واقف في موضوع الزواج ساقتا أمها لاحد الشيوخ
اعطاها بخرات ، البنت خلصت البخرات والحال في حالو ، رجعت تاني للشيخ ، أعطاها تاني
بخرات وقال ليها هي لكن يابتي ماتساعديني ، البت مافهمت الشيخ نططت عيونا وقالت ليهو
اساعدك كيف ؟ قال ليها قابضي قابضي شمال ويمين يابتي ههههههه

لكن فعلا البنت لو ما اتحركت وكانت تقيلة بتخلي الزول يلاوز من ان يتقدم .

الباهي ...

أشكرك على هذا البهاء

في ناس بتقول التقل صنعة

و لا ايه رايك يا باهي

حكى صديق:
"لقيت بنية خريجة يادوب ووصلت لى احساس انها واعية ورزينة. وجميلة جدا. لاقيته فى المصلحة اكتر من مرة. عزمتها ومعاها صاحبته. بعدو بى كم يوم لاقيته وقلته ليها انا احداثياتى السينية والصادية كدا وكدا. انا زول دغرى. فكرته فيك بى طريقة ايجابية. يعنى دائرك. فكرى واتشاورى وردى على. البقضيك كم؟ قالت اسبوع. قلته اسبوعين عشان تاخدى راحتك. تلفونى عندك ارجعى لى.

مرو الاسبوعين. قلقته واتصلت عليها. ماردت. وتانى مااتصلت. دى الفترة اللاقيت فيها زوجتى الهسه. وكنت نجضت امورى والعرس قرب. لاقيت البت. سلام وغرويد عيون. قعدنا وفى نص الونسه سالتها مالك ماتصلتى ولا رديتى على بى صراحة؟ قالت لى (يضحك): "شاورت صاحبتى قالت لى اتاقلى عليهو".

Quote: فعلا والله أسماء تياب عجيبة ما أنزل الله بها من سلطان ، ولأني ما مواكبة وتيابي بتاعة السهرة منذ زمن أهل الكهف ما قدرت أحفظ ليكم الأسماء فسامحوني..ما كانشي قصدي ...

يا استاذة صباح الورد والياسمين .. يعني معقول تكوني ساكنة دبي دار الحي وتكوني ما ناقشه أبو النوم 😉 .. غايتو بعد عشرة سنة كدا التوب السوداني سينقرض ويصبح ذكرى .. الزواج قسمة ونصيب وشوية توم وشمار .. هههههههه

تحياتي

حمادة

شكلك بردان شوية

والله ما ناقشة فعلا قالوا الساكن جنب الحج ما بحج

مودتي

أخي العزيز أبوبكر

تحياتي

أعجبتني صراحتك الجميلة ربنا يبارك لكما ويسعدكما

زي مت بقولو التقل صنعة

Quote: كل التفكير دة وأنا داخل قاعة الحفل ، ولم ينقطع حبل أفكاري إلا عندما سمعت صوت الفنان وهويقول تاني توبة لا حب لا غرام لا خطوبة عرس بس فقلت لنفسي أهو الدنيا ..

عطووووووف اشواقات
يا زولة دا فنان حاسد ساى
هى الدنيا دى لو ما الحب والون البنبي والبنفسج كان فى حد عاش ولا اتنفس فيها
وحاااات الله نحب لما نشرق ظاتوا

تعجبني شقاوتك وانتي تشعلين البوست حبا وغرام

اغتقد انك تؤمنين بمقولة أنا أحب أنا إذا موجود

ومع ذلك اقول لك يا عزيزتي الحب منطقة

وسطى ما بين الجنة والنار

محبتي الصادقة

Quote: "شاورت صاحبتى قالت لى اتاقلى عليهو".

من وحي كلام زميل المنبر المحترم (أبو بكر)

يا بنات عليكن بقول شيختكن ندى بنت القلعة:

"أوعي الصاحبة الحاسدة"
"تخرب ليك بيتك"
"وتعمل فيها"
"ما قاصدة"

هههه نصيحة غالية

زي بتاعة بنيتي حسابك

شكرا يا ابن العربي مرورك يسعدني

Quote: العولمة

التحية لكي منى عمسيب وصاحبة البوست

بخصوص العولمة فهو حديث العصر

اولاً بحث تخرج البكلاريوس عملته في العولمة بعنوان (مفهوم العولمة)
اما رسالة الماجستير من مركز حوار الحضارات بجامعة النيلين وعنوان البحث(العولمة واثره على حماية الاسرة والطفل) فهذا هو بيت العرس وخفت البنات وشطارة الامهات
اربعة سنوات في رسالة الماجستير عن هذا المفهوم المعقد.

نقطة ملاحظة : اغلبية من بنات السودان لونهم واحد والسرطان حائم زي كلب الحر والبنات ما عاملات حسابهن

وسوف اقوم بكتابة بوست عن العولمة ومن الله التوفيق

مرحبتين حبابك
واليوم السعيد اليلة جابك
بصراحة موضوع العولمة دة موضوع طويل
خصوصا وأن العالم بقى حارة صغيرة وليس قرية صغيرة
شكرا يا ابن سليمان خطوة عزيزة

روووووووووووووووعة يا ابن العربي

شكرا جزيلا على هذا الإختيار المبدع

أنا بقترح عليك تعمل بوست تسميه بنيتي حسابك وتضع فيه الفيديو دة بدون تعليق

Quote: ( عواطف إدريس : إنتي ما سمعتي المثل بيقول العرس (خفة بنات وشطارة أمهات) التقلة الكتيرة دي مي سمحة شدي حليلك شوية ؟؟؟ )

سلااااام الاخت عواطف ، وحقيقة مافي داعي بالجد لفقة الضرورة دة ، لانو وعن نفسي انا دة الحاجة البتجيني سااااهلة بفكها تروح مني اسهل من شرب الموية
والبتجيني بعد سل الروح ... يمين بتبقى اغلى شي عندي واحافظ عليها اكثر من روحي ... ويا قولة بشرى البطانة :
ان زول اسراني سماحتاً كاسيا
بنت البلد الهاديه وراسية وضميرا الحي التب مامات

الغايتو اروع واهممممم شي في البنية ياهي ( التُقلـــــــــــة ) العليها ولابساها زي تاج الوقار ... تسلمي يا عواطف وربنا يديك الصحة والعافية

عواطف،
فقة الضرورة ليس غطاء لخفتهن أو لب لشطارة أمهاتهن إنما هو غطاء لغشاء مثله

تحياتي

معتز

يسعد نهارك

كترت المحلبية شوية مش ؟

أقصد الأغشية ، والأغطية

هههه يعطيك العافية .. سعدت بمرورك

محمد ..

نهارك سعيد ..

عارف الرجال في الزمن دة البت التقيلة بقولوا عليها دمها تقيل لأنه عندنا

بنات جيرانا الأربعة قمة في الرزانة والأدب والأخلاق ، أمي الله يرحمها

كانت شايلة همهن كل يوم تقول لي عليك الله هسة البنات ديل ما لهن

مؤدبات وزرينات وتقيلات الرجال ما بشوفوهن ليه ؟؟؟

قلت ليها يا أمي أنسي في رجال عايزين الخفيفات اللفيفات

صرخت بعفوية وقالت قبلهم ووحدهم .. ههه

عارف دلوقتي البنات ديل في العقد السادس وما في حد دق باب بيتهم

العزيزة الغالية عواطف
والله طلتك بالدنيا ...نورتينا. ..وزرتينا مرة لكن عاوزينك تطلي علينا
كمان وكمان..
وكمان عاوزة اقول ليكي خفة الدم الزيادة ما كويسة. .لان الرجل السوداني له نفس
عادات الرجل الشرقي تقاه دائما يتكلم عن حرية البنات وتلقاه يعجب بالبنت العصرية
اللابسة موضة ومتحدثة واجتماعية. لكن لمن يجي وقت الجد وعاوز يتزوج طوالي
ينسى مبادؤه وافكاره التحررية دي كلها ويبدا يفتش في البنت الرزينة واللابسة التوب
بل والانطوائية وفي اعتقاده ان دي ما بتكون عندها تجارب حب وشيطنة قبل كده...
لكن انا موافقة في الشطر الثاني من نصيحة خالتو...ان العرس شطارة امهات...لكن خفة
البنات ما بتمشي طوالي مع الكثير من الرجال ..
والله يديكي الصحة والعافية

الأميرة أميرة

ياااااااااااه والله مشتاقين

سعيدة جدا جدا بشوفتك مرة تانية

صراحة كلامك صح لما كان في الجامعة أولاد الأقاليم

رافعين شعار الجكس في الجامعة والزواج من القرية

دة باعتبار أنه بنات الجامعة عصريات وما ينفعش الكلام

دة مع الثقافة ، والبيئة ..

يديك العافية دة موضوع طويل بتاع قناعات شخصية

سلام اختي الفاضلة عواطف
عموما التكلف تخلف
فتكلف الخفة خطأ
وتكلف التقلة ايضا تخلف
كوني انت ولابد من بروز العقل اثناء التعامل فالمرأة الانسان صاحبة فهم وراي في كل ما يدور حولها وهي اكمل من المرأة الانثى
تحياتي

عواطف ادريس اسماعيل ،

...

أصابتني الحيرة والدهشة ،
في معرفة تفكير عقول بعض النساء ،
إن كيدهن عظيم ،
إن كيد الشيطان كان ضعيفاً
تسلم الغالية ،
،،،،،،،

...





عزالدين عباس الفحل
ابوظبي
...

عزو

تحياتي

كيدهن عظيم في حال تعرضهن لما لا ينبغي أن يتعرضن له

ولكن إعلم أن لكل إمراة مفتاح إذا توصل إليه الطرف الآخر ضمن حياة سعيدة إلى الأبد

كل الود

كل الحب التقدير أخي بدر الدين

كل ما ذكرته صحيحا قالمرأة هي المدرسة التي تخرجت منها آلاف الأجيال

ولكننا نستعرض هنا بعض الظواهر الإجتماعية ونطرحها للنقاش حتى نتوصل

إلى أسباب الظاهرة وكيفية المعالجة ، علما أن إخفاء الظواهر الإجتماعية

لا يعني عدم وجودها ..

سعيدة بمرورك الأنيق ..

شكراً أخت عواطف إدريس --- لطرح هذه المشكلة بقالب الكوميديا السوداء...

والحل موجود ....

الزواج الجماعي ...

والتعدد....

لكن الناس راكبه رأسها ساكت....

عطوفة الماكنتوش في رفوفها. هودا حميدا مستطاب

برجع لببوست ده بمهله

موضوع حساس لكنني لم اكمل قراءة البوست نسبة لانه به كثير من عبارات اللهجة المصرية بتاعت المسلسلات
تمنيت لو كان الموضوع مكتوب بي لغتنا السودانية و خلا من مكانش و هو اللي و الحركات دي

الموضوع اجتماعي و معرفة خلفية الكاتب ضرورية عشان ما نفهم غلط
فاااااا هل الموضوع ده سوداني ام مصري ؟

الاستاذه عواطف
لي زمن من سودانيزاونلاين بقي ما بدخلنا الا عزاء او اداء واجب
وسط الاحباطات الساسية والاجتماعية الحاصله في السودان
الا موضوعك هذا فعلا جاذب
وذكرني ما عارف ليه بالقصيده الحلمنتيشية الشهيره يا عبدو عيب
اقولا ليك بس وامشي

من عيون الشعر الحلمنتيشى

ياعبدو عيب


في الليلة ديك القصة ذاتا بقت عليك

يا عبدو وأدوك الشريط

يوم قولنا ليك أنضم معاها وكلّما

أبيت تسمع كلامنا وبقيت لميض

وقلته أحسن أكون تقيل أنا ما جميل


وبقيت تقيل لامن سقوك موية الغسيل

وجيت تنطط زي زمان وتباري بقعور الشجر

كايس كراسي الخيزران ..

وقعدته يا زينة الرجال.. كهربجي قال

رفعوا الستار والبت تجي ومرات تقيف

ومعاها يا زول ولداً حريف

والوقفة كانت وقفة وِلِف

صاحبنا بالاحساس عرف

سألتَ والناس كلّموك

ووقعتَ في شارع الزلط

تبكي وتجعّر والعيون اتورّمت

ويد القميص ضهر القميص كم القميص

حتى الفنيلة اتشرّطت

يا عبدو عيب

قوم ياخي صلي على الحبيب

الواطه صبحت داير ننوم

يا أخوانّا لأ أنا عايز أموت أقع البحر

يا عبدو عيب

الدنيا حر .. والموية بتسخّن عليك

ثلاثة ساعات زولنا يسب ويكيل

ودموعو سايلات بالكفوف

وشرايطو تلمع في الكتوف

بقى فيلسوف

في علاقة بين يوم السبت وعين الحسود؟!

ومقارنات بين الجمال!!

و الجهل وسوء الإختيار

قال شينة قال ...!

قال شينة قولنا كلام صحيح

وخطيبها زاتو ولد قبيح

بس ياخي قوم الواطة صبحت دايرين ننوم

قام تاني جاب سيرة البحر

قام تاني جاب سيرة البحر

العرس قسمة ونصيب والبيت بنزل من السماء زي ما قالوا اهلنا القدام...
لا خفة بنات ولا شطارة امهات ...يمكنها ان تخلق السكينة والمودة والرحمة المطلوبة..
وهو الغاية من الزواج...

فالخفيفة بتجيب خفيف...والفهلوية بتجيب فهلوي...
Bad for bad and evil for evil

ما اختلفنا فعلا قسمة ونصيب

والبيت بنزل من السما حقيقة ..

ولكن الهدف من طرح الموضوع

هو إلقاء الضوء على وجهة نظر بعض

الأمهات ليس إلا

معزتي

أخي العزيز جدا طارق

أكاد لا أصدق إنك عبرت من هنا

صراحة ليك وحشة ...

وأرجو أن لا تترك الكتابة يا رفيق الزمن الجميل

أشكرك على كلماتك الطيبات .. وعلى القصيدة

الحلمنتيشية صراحة ذكرتني أيام الجامعة

ألف ألف شكر على هذه المداخلة الرائعة

ود المبارك

لك كل التحايا والود

صاحبة البوست سودانية مية المية

وسامحوني ما كانش قصدي مقتبسة من فيلم إسمه كدة

عموما لو زعلتك أمسحها لينا في وشنا

بس حركات ، وما حركات دي فيها زيادة محلبية مش كدة

نحنا مش بتاعين حركات ولا حنكون في يوم من الأيام

عموما لك كل الشكر كنت أتمنى أن تنتقد الموضوع وليس الأسلوب

فهذا منبر حر وكل واحد يكتب بالطريقة اللي تعجبه

المهم يوصل للقراء ما يريد قوله

كل الشكر مرة تانية

ياااااااااااااه

دندون !!!

والله شوق مطر ...

أنا ما أفسر وإنتي ما تقصري

عطيك العافية ....

العزيز أحمد

تحياتي

إنت شايف كدة الحل

عارف الزواج الجماعي دة

زي النقل الجماعي ... ههه

عندي صاحبتي كانت راكبة راسها

دة شين ، ودة وما عندو مستوى

لم فات الفوات قلت ليها بعد كدة

شرطك حيكون ذكر مسلم ويس

ضحكت وقالت لي مسلم ذاتها يمكن أشيلها من الموضوع

سعدت لمرورك الجميل ...