Post: #1
Title: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-24-2014, 00:38 AM
أحيانا نسمع الأغنيات ... و نطرب لها ...
و نعجب كثيراً بكلماتها دون التمعن و التدقيق في معانيها المقصودة ...
أنا فيك عشقت الروعة .. في ( الدّل و الدلال )
و المعاني الراسمه في عينيك ظلال
و ابسامتك لما تحكي عن المحال
من قلبي وهبت ليك شعر الغزل
الطريق انا عارفو يا السمحه انقفل
مافي قسمه و مافي حتي بصيص أمل
و يا ربيع الدنيا
_______________________
هي كما قال الشاعر الكبير عوض أحمد خليفه
قصيدة مشتركه بينو و بين الشاعر مبارك حسن الخليفه
فقط اتوقف عند كلمتين هنا ...
هما ( الدّل و الدلال ) ...
لو تغاضينا عن التفاصيل يعتقد الكثيرين انها تؤدي الي نفس المعني ...
و لكن عند العاشقين هما كلمتين لهما معنيين قائمين بذاتهما ...
الدّل هو حالة السكينة و حُسن السيرة ... الزول ( الهدى و رضي ) ...
اما الدلال ... هو الوقار الذي لا يخلو من غنج ...
و ان اكتمل الدل و الدلال في شخص واحد ... فهو المُراد ...
و لكن رغم كل تلك ( الروعة ) التي عشقها شاعرنا ... الا انو حتي مافي بصيص أمل ؟
_________________________________________________
نسمع و بس ... اغنية رغم كامل دسمها ... الا انها مانعة للطُمام ...
|
Post: #2
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عاطف عمر
Date: 10-24-2014, 12:14 PM
Parent: #1
غايتو يا قباني ربنا يسامحك
عملنا ليك شنو في الدنيا دي ياخي ؟؟
ربيع الدنيا ....
وسعادة اللواء عوض
وسعادة المشير أبوعفان
والدنيا جمعة ....
والـ ( عزوبية ) معكرة صفانا....
هسع نشكيك لى منو ؟؟
|
Post: #4
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-24-2014, 02:09 PM
Parent: #2
Quote: غايتو يا قباني ربنا يسامحك
عملنا ليك شنو في الدنيا دي ياخي ؟؟
ربيع الدنيا ....
وسعادة اللواء عوض
وسعادة المشير أبوعفان
والدنيا جمعة ....
والـ ( عزوبية ) معكرة صفانا....
هسع نشكيك لى منو ؟؟ |
عارفوا الكلام ده بجيبك ...
خاصة لو عزابي ...
انا بكتب يا عاطف و قسماً بالذي سواني و سواك انت الفي بالي ...
اها شفت ليك ( قصِد ) اكتر من كده ...
داير ( اهاتر ) مره في المنبر ده ...
فتعال ( طالعني ) خلينا نفند الكلام العجيب ده ...
يا جبتني يا جبتك واطه ...
اها كيف معاك ؟
ديل شعراء شنو ياخ و دى محبة شنو ياخ و دى بساطة شنو ياخ ..؟
عمنا مبارك كتب الكلمات الاولي ...
و اداها لسعادة اللوا ...
و بعداك ما هماهو اسمو ينقال ما ينقال ... قعد يسمع فيها زىى و زيك يا عاطف
لا و ازيدك من الشعر بيت ...
ماجد مبارك صديقي اشتغلنا و ما زلنا شغالين في المكتبة ( عمرو) ما جاب السيرة ...
رغم علمه التام بالامر بعد ما جانا الخبر ...
ياخ ديل ناس مؤدبين و بس ...
|
Post: #3
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عاطف عمر
Date: 10-24-2014, 01:20 PM
Parent: #1
ثم
بدأ الأستاذ مبارك حسن خليفة الأغنية بقوله
أنا فيك عشقت الروعة .. في ( الدّل و الدلال )
و المعاني الراسمه في عينيك ظلال
و ابتسامتك لما تحكي عن المحال
من قلبي وهبت ليك شعر الغزل
الطريق انا عارفو يا السمحه انقفل
مافي قسمه و مافي حتي بصيص أمل
و ( سمكر ) سعادة اللواء النص أعلاه ليصبح
يا ربيع الدنيا …في عيني
يانور قلبي يا معنى الجمال
يا أخت روحي يا أماني هواي
في دنيا ….. الخيال
أنا فيك عشقت الروعة
ما أحلاها في الدل والدلال
والمعاني الراسمة نور
اشراقة في عينيك ظلال
وابتسامتك لما تأسر قلبي
تحكي عن المحال
تحكي عن شوقك إليّ
وتحكي عن بعد الوصال
من قلبي من أجل المحبة
وهبت ليك شعر الغزل
مع إنو قدامي الطريق
انا عارفو يا السمحة انقفل
مافي قسمة ومافي يا نور
قلبي حتى بصيص أمل
ما قدرت أقرب من ضراك
وما قدرت لفراقك أصل
بالطبع لا تعليق سوى ممارسة الدهشة
لكنني تذكرت أستاذي وأستاذك ( وسميك )
الباشمهندس يحيى محمد صالح
كنا ونحن مهندسون مبتدؤون في مكتب عبدالمنعم مصطفى ... نصيغ رسالة ما
نكتب فيها كل ما تعلمنا من فنون البلاغة ( الشكسبيرية )
نظن أن لا مبدل لكلماتنا
نأخذها له ليعطى الإذن للطباعة
يقرأها
يحذف كلمتين ويضيف كلمة
يؤخر كلمة ويقدم أخرى
يضيف كلمة أو نقطة أو شولة
نقرأ الرسالة مرة أخرى
فإذا بها رسالة جديدة
جديدة جد وجديدة جداً
لله دره ... له التحايا
___________
كل المحبات يا حبة
|
Post: #5
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: محمد أبوالعزائم أبوالريش
Date: 10-24-2014, 02:19 PM
Parent: #3
| Quote: بالطبع لا تعليق سوى ممارسة الدهشة |
إنتو الجوز ........ طالبيني مغسة؟
شوفوا ليكم هندسة تلمكم بطلوا الحركات دي.
|
Post: #6
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عبدالرحمن إبراهيم محمد
Date: 10-24-2014, 02:44 PM
Parent: #5
باشمهندس قبانى
سلام مكمل ليك ولى الإثنين الأجبرونى أتداخل.
أنا لى زمن حارن لاسباب كثيرة ما أدخل الموقع كتابة، مشاركة أو تعليق
لكن الكلام السمح والناس السمحين بجرو الواحد جر. فالباشمهندس عاطف عمر
وصديقى الرائع محمد ابو الريش معاك ياباشمهندس ما ممكن الواحد يمر ومايقول
ليكم سلام.
أنا نظرت للأبيات من زاوية البديع فى الكلام والتعبير. فالشئ بالشئ يذكر.
والمعنى يفسر بما قبله وما بعده من نص حتى فى إزدواج المعنى بدون أن
يلغى أحدهما الآخر. لذا فانا أعتقد بأن الدلال مقصود كمعنى مزدوج للتعالى
المتصنع بغرض لفت النظر والتمنع، ولكن فى نفس الوقت يشير إلى ماكان
يسمى بــ"كحل الدلال" وهو كحل فائق السواد يظهر بياض العين فيبرز سواد
الببو أو العدسة فتكون العيون أكثر فتكا. ولربما أراد الشاعر أيضا أن يشير
إلى أن الصفات التى ذكرها فى الأول ثم أتبعها بوصف العيون يشير إلى أن
تلك الصفات تكاملت مع كحل الدلال لتنتج أبعادا جمالية لا يدانيها جمال
والله أعلم.
ولكم كل الود
|
Post: #7
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-24-2014, 03:03 PM
Parent: #5
Quote: إنتو الجوز ........ طالبيني مغسة؟
شوفوا ليكم هندسة تلمكم بطلوا الحركات دي |
الليلة الجابت ابو الريش و جابت ( البروف ) دى ...
نجيها بي مهل نساهر بيها في الويك اند و ليالي الخريف الطويلة دى ...
|
Post: #8
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عاطف عمر
Date: 10-24-2014, 03:29 PM
Parent: #1
تحياتي وسلامات أستاذنا البروف عبدالرحمن
تحياتي وسلامات حبيبنا أبو الريش
التواجد في مساحة أنتم فيها له طعم الجمال ورائحة التميز ولون المعارف
Quote: أنا نظرت للأبيات من زاوية البديع فى الكلام والتعبير. فالشئ بالشئ يذكر.
والمعنى يفسر بما قبله وما بعده من نص حتى فى إزدواج المعنى بدون أن
يلغى أحدهما الآخر. لذا فانا أعتقد بأن الدلال مقصود كمعنى مزدوج للتعالى
المتصنع بغرض لفت النظر والتمنع، ولكن فى نفس الوقت يشير إلى ماكان
يسمى بــ"كحل الدلال" وهو كحل فائق السواد يظهر بياض العين فيبرز سواد
الببو أو العدسة فتكون العيون أكثر فتكا. ولربما أراد الشاعر أيضا أن يشير
إلى أن الصفات التى ذكرها فى الأول ثم أتبعها بوصف العيون يشير إلى أن
تلك الصفات تكاملت مع كحل الدلال لتنتج أبعادا جمالية لا يدانيها جمال |
لا يفتى والبروف عبدالرحمن في البوست ...
|
Post: #9
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: محمد أبوالعزائم أبوالريش
Date: 10-24-2014, 04:54 PM
Parent: #8
سلام يا بروف وليك وحشة والله ....
جوز المهندسين ديل ما تديهم الأمان .....
تكون قاعد في أمان الله مكفي خيرك شرك، يجي واحد يشوت ليك غنية تهري فشفاشك.
______________
تفسير الدلال بي (كحل الدلال) ما فكرت فيهو، لكن برضو بيدي معنى مختلف للنص.
صراحة زي ما قال قباني، كتير من الأغاني نطرب ليها دون تمعن أو في الحقيقة (غوص) في كلماتها ...... لذلك في الحالتين (الدلالين) معوقين معوقين.
|
Post: #10
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عصمت العالم
Date: 10-25-2014, 08:12 AM
Parent: #9
..عزيزنا الباشمهندس والاعلامى يحى قبانى
لك التحايا عطورها واريجها ونفحها فى تخنصر يرش عطاياه الجمال
انقطعت الاتصالات بيينا وفقدنا وسائل التواصل لزمن ولعله زمن مجحف وقاسى
اقعدنى المرض عن النواصله منذ 2012 فى فترة صعيبه وقاسيه لكن لطف الخالق العظيم
ورحمته وتفضله فوق كل رجاء وكل اعتبار..والان الحمد لله..
لذا انقطعت ىعن ىالمشاركه فى مكتبة الغناء السودانيه واحتجبت عنها..لكنى قطعا ساعود
وطبعا احتاج لكلمة مرور ..ارجوك ان تمدنى بها لو تفضلتم
العزيز يحى..
اللواء عوض احمد خليفه وربيع الدنيا وتلك التفاصيل فى خيايا تسترها وهى تتخفى
وتحتجب وتبذق مثل مطالع القمر فى كامل بهائه..وتفسير كلمة الدل..
هو ذلك الانسراب المتأصل الذى يبخ لواعد حسره وهو يقيد ويوثق بربطة من سحر
وقوة مغنطيسية جاذبه تستقطب وتستحوذ وتخضع فى ارتعاش ذبذبة ارسال يخترق ويغرق ويستغرق فى سريانه
تحسه وتدركه وتقرأ تفاصيله وتعيش شروحاته فى حالة ارتعاش مبالغ فيه وهى تصيب كل يصادفه ويحسه
فى رؤى ومسلك وتعامل ومعالدة واقع لك التقمص المنبهل..وذلك الغزو المباشر فى قوته وفى ارساله\
استحواذ الاستحواذ المطلق..
اما الدلال فهو ذلك الغنج والدلع المبطن فى تراخى مخملى النسيج دمقصى التفاصيل متداخل بين اسحار
الجمال وافرازات ذلك التبطر وفى خليطمركباته وكيمياء انتشاره وهو يكسر ويخضع ويتهن ويحيط ويمتلك
ذلك الاعتلاج فى لهفة وقوة انتشاره وفى جنوح فتنته وطغيانه وفى ذلك التخلط فى تردده وتبعثره وانتشاره
واللواء عوض احمد خليفه وشارع الفيل وعباسيه مورده والاستاذ مبارك حسن الخايفه وشارع الفيل
منتصفه وعباسيه مورده ورني تلك الحروف وهى تتشكل بالف وتجانس..
ثم ياتى الفراش الراحل عثمان حسين والحانه ترش وجه الدنيا بذلك التمنى والتوقع والاشتهاء المبطن
والمعلن فى اعادة صياغة الكلمات ونسجها وتفصيلها بكل ذلك الذوق وجمال المولةديه الموسيقيه
وتلك الانفاس الحرى وهى تشهق وتزف وتستنشق كل ذلك التسيم المعطر بما يسهل عليها اجترار
وهضم كل تلك الوجبه العاطفيه الدسمه كلمات ولحن ربيعى واداء مشحون بالشجن والطرب..
محبتى يحيىاااا
|
Post: #11
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-25-2014, 10:31 PM
Parent: #10
Quote: .عزيزنا الباشمهندس والاعلامى يحى قبانى
لك التحايا عطورها واريجها ونفحها فى تخنصر يرش عطاياه الجمال
انقطعت الاتصالات بيينا وفقدنا وسائل التواصل لزمن ولعله زمن مجحف وقاسى
اقعدنى المرض عن النواصله منذ 2012 فى فترة صعيبه وقاسيه لكن لطف الخالق العظيم
ورحمته وتفضله فوق كل رجاء وكل اعتبار..والان الحمد لله..
لذا انقطعت ىعن ىالمشاركه فى مكتبة الغناء السودانيه واحتجبت عنها..لكنى قطعا ساعود
وطبعا احتاج لكلمة مرور ..ارجوك ان تمدنى بها لو تفضلتم
العزيز يحى.. |
الف لا باس عليك يا عالم ..
انقطعت الاتصالات زمن بالفعل ...
لو تلفوناتك ما اتغيرت اكلمك انشاء الله ...
او رسل لي في الخاص هنا تلفونك و ايميلك ..
__________________________
ساعود انشاء الله للغوص في هذا الجمال معكم ...
|
Post: #12
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-27-2014, 03:33 AM
Parent: #11
Quote: أنا فيك عشقت الروعة .. في ( الدّل و الدلال )
و المعاني الراسمه في عينيك ظلال
و ابتسامتك لما تحكي عن المحال |
قادرين تتخيلوا المشهد ده ؟
قادرين تتخيلوا معاي ( الزول ) البتكلم و هو ( ساكت )؟
الزول البتدلل و هو في كامل وقاره ؟
الزول البي ابتسامته وراك حبو ليك و بي نفس الابتسامة وراك انو الوصال من المحال !!!
الابتسامة الرايداك و مجبورة تقول ليك الطريق ما ليك فيهو سكة !!!
ياخي كلام عجيب ...
|
Post: #13
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: محمد عثمان
Date: 10-27-2014, 04:49 AM
Parent: #12
بوست فى قمه الجمال
شكرا قبانى و شكرا لضيوفك الكرام...
|
Post: #14
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: نورالدين الفحل
Date: 10-27-2014, 07:48 AM
Parent: #13
اخى يحى ود القبانى محبتى واعجابى بما تكتب وتتناول من مفاخر الاغنية السودانية الافلة
انظر اين كنا واين اصبحنا الان على جميع الاصعدة والاغنية بعضا من هذا النسيج المتهالك
ياربيع الدنيا حالة من العشق والتوله صاغها مبدعون واخرجها قديس الى محراب المستمعين.
|
Post: #15
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: جمال المنصوري
Date: 10-27-2014, 08:16 AM
Parent: #14
الحبيب/ يحي (قباني) وضيوفك الاكارم كل عام وانتم بخير..
قلنا نشارك في الحصة دي من زاوية مختلفة شوية...
وهي زاوية الاسامي والمهن وتأثيرها علي عمل وفكر صاحبها...
عندك نموذجين هنا.. 1
-المهنة وتاثيرها علي عمل وفكر صاحبها.. يمثلها بصورة ممتازة اخونا / عاطف عمر، فهو كمهندس دائما شايل ال (EDM ) وشغال يقيس بيهو زوايا البوستات والمداخلات عشان كده دائما زواياه موزونة ومدوزنة..
2- الاسم وتأثيره علي عمل وفكر صاحبه ويمثله خير تمثيل اخونا / يحي (قباني) .. فاهلنا من اول ما عرفوا من الموازين (الميزان) القباني..
وهاهو القباني يعيد الكفة للأستاذ/ مبارك حسن خليفة.. ويزن لنا (الدل) و (الدلال) بالقسط ..
مرة اخري سلامي للجميع..
وشكرا جزيلا علي الأغنية الجميلة، والكلمة الرصينة
|
Post: #16
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: ياسر السر
Date: 10-27-2014, 08:37 AM
Parent: #15
استاذنا يحيى قباني وكل من يمر بهذا المحراب الجميل ,, لكم التحية والتجلة والتقدير لانكم تحفظو هذا لجمال من الاندثار عل جيلي انا يحفظ مثل هذه الملاحم الفنية الراقية الجميلة الشفيفه ,, فلكم حبي وتقديري .. اما ربيع الدينا فهذه فعلا حصة مجانية ودرس لا يفهمه كل الناس عدا الشفافين الانيقين مثل استاذي يحيى قباني وضيوفه الاكارم المرهفين هنا .. فيا يحيى ياريت توثقو هذا الفن السوداني الجميل بكل ما تحمله هذه الكلمة من معاني لكي يستفيد منه هذا الجيل الهالك لان هذا الجيل هالك في كل شي لا فن ولا رياضه ولا اجتماعيات ولا ساسية ولا صلات ولا تواصل ولا اي شي فهل في بصيص امل ام لا ؟ بان يعود السودان كما عهدناه وكما تربينا فيه ونشائنا فيه من زمن قبيل وايام قلال وعدايد ,,,
لا استطيع ان اقول إلا ( متعك الله بالصحة والعافية اخي يحيى وجعلك دائما توثق وتنمق دواخلنا بالجميل الاصيل) ..
تحياتي : ياسر العيلفون
|
Post: #17
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: نصر الدين عثمان
Date: 10-27-2014, 09:03 AM
Parent: #16
باشمهندس يحيى وضيوفك الكرام ......... تحياتي،
[ربيع الدنيا] تلك الأغنية الباذخة جديرة بأن تسلط عليها تلك الأضواء وزيادة..
لاستكشاف مكامن الإبداع فيها .. كلمات ولحناً وأداءً....
كيف لا ... ومن عجائبها - التي لم تنقضِ) أنها اجتذبت إلى رحابها عاطف عمر وأبو الريش البروف عبد الرحمن إبراهيم وعصمت العالم وود الفحل وود المنصوري والذين من بعدهم يأتون..
--------
نجلس ها هنا نستمع ونقرأ ونستمتع ....
|
Post: #23
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 04:22 AM
Parent: #17
Quote:
باشمهندس يحيى وضيوفك الكرام ......... تحياتي،
[ربيع الدنيا] تلك الأغنية الباذخة جديرة بأن تسلط عليها تلك الأضواء وزيادة..
لاستكشاف مكامن الإبداع فيها .. كلمات ولحناً وأداءً....
كيف لا ... ومن عجائبها - التي لم تنقضِ) أنها اجتذبت إلى رحابها عاطف عمر وأبو الريش البروف عبد الرحمن إبراهيم وعصمت العالم وود الفحل وود المنصوري والذين من بعدهم يأتون..
--------
نجلس ها هنا نستمع ونقرأ ونستمتع .... |
نصر الدين عثمان الرجل الذي احبه و احب صحبته ...
نحياتي يا جميل و خليك قريب دائماً ...
ما تحرمنا من طلتك يا ملك ...
|
Post: #22
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 04:19 AM
Parent: #16
Quote: استاذنا يحيى قباني وكل من يمر بهذا المحراب الجميل ,, لكم التحية والتجلة والتقدير لانكم تحفظو هذا لجمال من الاندثار عل جيلي انا يحفظ مثل هذه الملاحم الفنية الراقية الجميلة الشفيفه ,, فلكم حبي وتقديري .. اما ربيع الدينا فهذه فعلا حصة مجانية ودرس لا يفهمه كل الناس عدا الشفافين الانيقين مثل استاذي يحيى قباني وضيوفه الاكارم المرهفين هنا .. فيا يحيى ياريت توثقو هذا الفن السوداني الجميل بكل ما تحمله هذه الكلمة من معاني لكي يستفيد منه هذا الجيل الهالك لان هذا الجيل هالك في كل شي لا فن ولا رياضه ولا اجتماعيات ولا ساسية ولا صلات ولا تواصل ولا اي شي فهل في بصيص امل ام لا ؟ بان يعود السودان كما عهدناه وكما تربينا فيه ونشائنا فيه من زمن قبيل وايام قلال وعدايد ,,,
لا استطيع ان اقول إلا ( متعك الله بالصحة والعافية اخي يحيى وجعلك دائما توثق وتنمق دواخلنا بالجميل الاصيل) ..
تحياتي : ياسر العيلفون |
ود العيلفون يا فنان ...
ربنا يقدرنا جمبعا علي مهمة التوثيق و حمل مسئوليتها ...
ضاعت اغاني و اتنست الحان ... و اهملت اسماء الشعراء ...
و لكننا جاهدين مع مجموعة رائعة من الحادبين علي اهمية امر التوثيق
نقوم بجمع و حفظ الدرر و حمايتها من الضياع و الاندثار ...
زورنا في مكتبة الاغنية السودانية يا جميل ... :)
|
Post: #20
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 01:35 AM
Parent: #15
Quote: الحبيب/ يحي (قباني) وضيوفك الاكارم كل عام وانتم بخير..
قلنا نشارك في الحصة دي من زاوية مختلفة شوية...
وهي زاوية الاسامي والمهن وتأثيرها علي عمل وفكر صاحبها...
عندك نموذجين هنا.. 1
-المهنة وتاثيرها علي عمل وفكر صاحبها.. يمثلها بصورة ممتازة اخونا / عاطف عمر، فهو كمهندس دائما شايل ال (EDM ) وشغال يقيس بيهو زوايا البوستات والمداخلات عشان كده دائما زواياه موزونة ومدوزنة..
2- الاسم وتأثيره علي عمل وفكر صاحبه ويمثله خير تمثيل اخونا / يحي (قباني) .. فاهلنا من اول ما عرفوا من الموازين (الميزان) القباني..
وهاهو القباني يعيد الكفة للأستاذ/ مبارك حسن خليفة.. ويزن لنا (الدل) و (الدلال) بالقسط ..
مرة اخري سلامي للجميع..
وشكرا جزيلا علي الأغنية الجميلة، والكلمة الرصينة |
جمال المنصوري الزول انيق الحرف و سليم الذوق ...
زيارتك لينا اسعدتنا يا جميل ... و مرحباً بك استاذاً في ( حصتنا ) ... :)
و ياخي عاطف ده من رفاعه ... و رفاعة لا تعرف الا الجمال ...
جانا في الجامعه بي جمال فطري جاهز ... فقط شذبته زوايا الهندسة و معادلاتها ...
اما اعادة الكفة لعمنا البروف مبارك حسن الخليفه ... لهو واجب علينا ان نوثق و نثبت المعلومات للتاريخ ...
يا منصوري يا صديقي نحن في زمن الغُبن و التشويه ... فمن واجبنا ما استطعنا ابراز الجمال الذي جاد به علينا هؤلاء الكِبار ...
|
Post: #19
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 01:24 AM
Parent: #14
Quote: اخى يحى ود القبانى محبتى واعجابى بما تكتب وتتناول من مفاخر الاغنية السودانية الافلة
انظر اين كنا واين اصبحنا الان على جميع الاصعدة والاغنية بعضا من هذا النسيج المتهالك
ياربيع الدنيا حالة من العشق والتوله صاغها مبدعون واخرجها قديس الى محراب المستمعين. |
ود الفحل يا حبيب ...
عندي صاحباً لي و دفعه ...
يركب معاي في عربيتي لازم يلقي اغاني شغالة من نفس العيار ده ...
يقعد يدندن و يصن ...
و بعد فترة يقول لي تعرف يا حبيب ... جيلنا ده لو فات ...
الغنا ده مافي زول حيحفظوا تاني ... ابقي عشره عليهو و علي المكتبة ...
____________________________________________
المحير في الامر الصياغة و الاضافة لم تزد العمل الا جمالاً علي جمال !!!
|
Post: #18
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 01:18 AM
Parent: #13
Quote: بوست فى قمه الجمال
شكرا قبانى و شكرا لضيوفك الكرام... |
محمد عثمان يا ابو الفن و الجمال ...
تسلم علي غالي المرور و جميل الكلمات ...
لولا جمال ما بدواخلك لما حط ركبك في هذا الابداع ( الثلاثي ) ...
|
Post: #21
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: نادر الفضلى
Date: 10-28-2014, 03:11 AM
Parent: #18
Quote:
الدّل هو حالة السكينة و حُسن السيرة ... الزول ( الهدى و رضي ) ...
اما الدلال ... هو الوقار الذي لا يخلو من غنج ...
و ان اكتمل الدل و الدلال في شخص واحد ... فهو المُراد ...
|
قبانى يا مرهف
تحياتى
أحسنت فى إظهار جمال التعبير وروعته عند عوض أحمد خليفة
شعراء الأغنية السودانية فى مجدها تميزوا بعبقرية إستخدام
المفردات وتداولها وبتوارد الخواطر
يقول المرحوم عوض الكريم القرشى فى يا إله فنى
(قلت رب الدلال دَلُو لينا يزيد)
والمرحوم خليل فرح فى الضواحى
يا أم لسانا لسع معجن ..كلمة كلمة وحروفو ضجن ..
ديل خدودك غير داعي وجن .. ديل عيونك من غير سبه لجن ..
ديل دموعك من نظرة شجن . .ده دلال ايه ده دلال معجن ..
محن الامات يا رداح
غايتو الجماعة كانو مكسرين والحسان واثقات ومضمنات
وتايهات فى دلهم ودلالهم ... أحلى عذابات أخرجت الدررّ
|
Post: #24
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 04:26 AM
Parent: #21
Quote: الدّل هو حالة السكينة و حُسن السيرة ... الزول ( الهدى و رضي ) ...
اما الدلال ... هو الوقار الذي لا يخلو من غنج ...
و ان اكتمل الدل و الدلال في شخص واحد ... فهو المُراد ... |
Quote: قبانى يا مرهف
تحياتى
أحسنت فى إظهار جمال التعبير وروعته عند عوض أحمد خليفة
شعراء الأغنية السودانية فى مجدها تميزوا بعبقرية إستخدام
المفردات وتداولها وبتوارد الخواطر
يقول المرحوم عوض الكريم القرشى فى يا إله فنى
(قلت رب الدلال دَلُو لينا يزيد)
والمرحوم خليل فرح فى الضواحى
يا أم لسانا لسع معجن ..كلمة كلمة وحروفو ضجن ..
ديل خدودك غير داعي وجن .. ديل عيونك من غير سبه لجن ..
ديل دموعك من نظرة شجن . .ده دلال ايه ده دلال معجن ..
محن الامات يا رداح
غايتو الجماعة كانو مكسرين والحسان واثقات ومضمنات
وتايهات فى دلهم ودلالهم ... أحلى عذابات أخرجت الدررّ |
و ما تنسي يا صديقي
عمك السر دوليب مع العبقري سيد خليفه
في اغنية عجيبة بدأ تلحينها عمنا حسن بابكر و بعدها غيرها ابو السيد ...
قال فيها ...
زيدني من ( دلّك ) شويه و كتر الأشواق عليّ
بكرة قلبك يصفو ليَّ و تملأ بالأنوار عينيَ
|
Post: #25
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عاطف عمر
Date: 10-28-2014, 05:40 AM
Parent: #1
ما بين قلائد الجمال التي طوقنا بها الأحباب جمال المنصوري ونصر الدين عثمان ، وما بين كرم الضيافة الأصيل عند القباني الحقاني
ما بينهم تهرب من الذاكرة كل حروف الإمتنان
لكن تبقة المحبة راسخة في القلب
بينه وبين قلوبكم رسول
|
Post: #26
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عبيد الطيب
Date: 10-28-2014, 06:29 AM
Parent: #25
Quote: أنا فيك عشقت الروعة .. في ( الدّل و الدلال )
و المعاني الراسمه في عينيك ظلال
و ابسامتك لما تحكي عن المحال
قادرين تتخيلوا المشهد ده ؟
قادرين تتخيلوا معاي ( الزول ) البتكلم و هو ( ساكت )؟
الزول البتدلل و هو في كامل وقاره ؟
الزول البي ابتسامته وراك حبو ليك و بي نفس الابتسامة وراك انو الوصال من المحال!!!
الابتسامة الرايداك و مجبورة تقول ليك الطريق ما ليك فيهو سكة!!!
ياخي كلام عجيب....
|
وهيط إنت يا قباني
وضيوفك سمحين بلحيل
لذا محبتكم دربها ساهل....
الزول دي شفيف بلحيل، شوف الدَّل والدلال مع النظرة بطريقة معينة، والتي تحوي معاني كثيرة بل عميقة
والنظرة مع إبتسامة برضو بطريقة معينة توحي بأن لاوصال...........
أجزم بأن هذه الإبتسامة فيها عزاء ومعزة...
"مابِتصُر جبينها تشوف غباينها
وبشاشة وجهها توريك بطاينها"
كتابة السمحين مثلكم نعمة كبيرة في هذا الزمن العيفة
|
Post: #27
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: بابكر قدور
Date: 10-28-2014, 11:40 AM
Parent: #26
الأخ الحبيب يحي قباني
لك الود والتحايا الطيبات
ولك الشكر والثناء والتقدير على هذه اللفتة الرائعة التي أوقفتني طويلاً تمعناً في هذه المعاني المتشابكة الساحرة ورشاقة المعاني الدافقة التي سكبها سعادة اللواء في وصف شاعري للحظة عشق خالدة لا يبليه الزمان مهما مرت أيامه ولياليه وشهوره ودهوره عليه .... وصف باق خالد متفرد .. جسد عظمة الشاعر اللواء عوض أحمد خليفة أمد الله في أيامه ومتعه بدوام الصحة والعافية .. وجسد عظمة الكلمة التي مثلت وجدان جيل كامل وبقيت عظمتها في إرثنا الغنائي نقف عندها في إعجاب شديد .. لا نكل ولا نمل التعمق في معانيها .. لأنها الأساس الذي يفترض أن تنطلق منه الأجيال الحالية وتبني على عظمته فتقودنا إلى الأمام .. لا إلى الوراء .... هي لحظة عشق "أنا فيك عشقت الروعة" .. عشق في من يحب " الروعة" .... والروعة هي مسحة من الجمال الشديد .. هذه الروعة مكمنها "الدل والدلال" .. بيت القصيد .. وكما ذهبت ياصديقي فهما كلمتين لهما معنيين قائمين بذاتهما ليس عند العاشقين فحسب .. بل عند اختلاف معناهما .. الذي هو عند الشاعر إيضاً فجمع المعنيين مستخدماً واو المعية مدللاً على ذلك الإختلاف في المعنى .. وقد سبقه في جمع الكلمتين معاً "الزمخشري" في أساس البلاغة مع خلاف الغرض حيث أن الزمخشري أراد شرح المعنى فقال تحت كلمة دلل"وتدللت المرأة على زوجها، ودلت تدل، وهي حسنة الدلّ والدلال. وذلك أن تريه جرأة عليه في تغنّج وتشكّل، كأنها تخالفه وليس بها خلاف" والواقع أن الزمخشري على الرغم من جمعه للدل والدلال إلا أنه قد شرح الدلال فقط ولم يشرح الدل فعبارة "وذلك أن تريه جرأة عليه في تغنج وتشكل" فهذا هو الدلال وأما عبارة "كأنها تخالفه وليس بها خلاف" فهذا هو شرح التغنج أما الدل فقد اختلف الشراح في معناه فمنهم من شرحه بترادف معناه مع الدلال كصاحب العين ومنهم من خالف معناه مع الدلال كصاحب مختار الصحاح حيث شرحه بقوله "قَالَ أَبُو عُبَيْدٍ: (الدَّلُّ) قَرِيبُ الْمَعْنَى مِنَ الْهَدْيِ وَهُمَا مِنَ السَّكِينَةِ وَالْوَقَارِ فِي الْهَيْئَةِ وَالْمَنْظَرِ وَالشَّمَائِلِ وَغَيْرِ ذَلِكَ. وَفِي الْحَدِيثِ: «كَانَ أَصْحَابُ عَبْدِ اللَّهِ يَرْحَلُونَ إِلَى عُمَرَ رَضِيَ اللَّهُ تَعَالَى عَنْهُ فَيَنْظُرُونَ إِلَى سَمْتِهِ وَهَدْيِهِ وَدَلَّهُ فَيَتَشَبَّهُونَ بِهِ" أما غرض شاعرنا العظيم فهو أنه استمد من الجمع بين الدل والدلال "الروعة" التي عشقها والتي هي مسحة من الجمال كما سبق الإشارة إليه فأصابته في مكمن العشق فجعلته تائهاً في المعاني "الراسمه في عينيك ظلال" والابتسامة "لما تحكي عن المحال" فلنرسل جميعنا ياصديقي تحية عرفان وشكر وتقدير لشاعرنا سعادة اللواء عوض أحمد خليفة ....
|
Post: #28
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-28-2014, 03:14 PM
Parent: #27
بوصول عبيد الطيب و بابكر قدور ...
ايقنت تماماً ان ( مظلة ) الجمال لا يستظل بها الا الهارب من امطار القبح و الغبينة ...
مجيئكم سادتي يضيف الي هذا العقد الفريد القاً و رونق ...
احس كانني في غابة كثيفة لم يكفي وعورتها و تشابك اغصانها تعقيدا
بل هبت رياح عاتية ... فوجدنا هذا ( الكوخ ) الآمن ... و الذي اهتدى لمكانه فقط اصحاب القلوب البصيرة ...
|
Post: #29
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: Osman Musa
Date: 10-28-2014, 04:03 PM
Parent: #28
سلامات يا قباني يا فنان
قاليك كان هو من عطبرة كل عصرية خميس ينط في قطر العمال
وصاحبو يقابلو في شندي وعلي الخرطوم عشان نوع ده الكلام الزي البركاوي الملول .
يا سلام والله دي من عيون شعر الغناء في العالم العربي كلو .... بس عان لي ( الدل والد لال ) دي وأعرش علي كدي .
|
Post: #30
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: عاطف عمر
Date: 10-28-2014, 06:21 PM
Parent: #1
|
Post: #31
Title: Re: أنا فيك عشقت الروعة ... في ( الدّل و الدلال ) ... حصة عربي مجانية !!
Author: يحي قباني
Date: 10-31-2014, 01:27 AM
Parent: #30
Quote: ما قدرت أقرب من ضراك
وما قدرت لفراقك أصل |
عمنا سعادة اللواء اختار كلمة ضراك ؟
الأبيات القبلها بتقول :
Quote: من قلبي من أجل المحبة
وهبت ليك شعر الغزل
مع إنو قدامي الطريق
انا عارفو يا السمحة انقفل
مافي قسمة ومافي يا نور
قلبي حتى بصيص أمل |
يعني مافي اي قافية بتحكمو انو يجيب كلمة ( ضراك ) ...
زمان كانو يقولوا ... فلان انشال من ( الهيف للضري او الضرا )
و لو عرفنا الهيف ... عرفنا عمق المعني في ( ضراك ) ...
___________________________________________
معليش ... بجي راجع ... اسباب قاهره ...
و نرجع لي ( ضراك ) ...
|
|