غُلاط

الحاصل في البلد كأنًّو مجرد ( غُلاط في غلاط )
و ما معروف الحالة بتمشي كدة ؟ و البلد ما ناقصاها تِكْنوقراط* ؟
جهْلاً يُكال مرة بالكيلة و مرة بالملوة
مع إنو العِلِم جُوّانا فات .. قَطَع أشواط
و العزة نامت بس في عيون غِنوة
و النخوة تاهت في هزة سيف و نقرة طبلة
و عروق الإنْتِما زي نَتِف مُلْقاط
مجاديف السياسة و دفة مراكب البلد
متوهِّطة نص بحر الَّلوْلوة
بي جوقة الفوضى و الإفراط

و ما معروف الحالة بتمشي كدة ؟ و البلد ما ناقصاها تِكْنوقراط

متروسة القواسيب بالعزة و النخوة
و خناجْر الضلام أنْماط :
واحْداً بالجفير محفوظ ..
و واحْدا باللسان ملفوظ...
و زولاً بي واحْداً سنين مطبوظ...
و الدنيا جنا الأعمال و ماها حظوظ
راح زمان الدهشة و الحِجوة
و جانا زمن نص النهار يطير وطواط

و ما معروف الحالة بتمشي كدة ؟ و البلد ما ناقصاها تِكْنوقراط؟
( بعد طلاق الغابة و الصحراء )
و ما بين بَيات الغفلة و الصحوة
نتباكى من شان حليب مسكوب
و نصقع جَرْة ال في الجبين مكتوب :
ونكورك : ( متين يا علي تكبر تشيل حملي؟ )
و ما معروف هُو جلابي أم مجلوب
حياتنا ديمة كدة : لا غالب ولا مغلوب
مرة ال في يمين يبقى يسار
( و كلام الليل يمحوه النهار )
و ديمة ال قَلَب هُوبة ما بِكون مقلوب

و ما معروف الحالة بتمشي كدة ؟ مع إنو البلد ناقصاها تِكْنوقراط

( ربما حتى يلِج الجمل في سَم الخياط )

****

حسب تعريف. جان وليم لابيير : التكنوقراطي Technocratic " هو الخبير المدعو الى المشاركة في صياغة القرارات التي يستفاد منها في ممارسة السلطة الفعلية ، اما بتأثيره الغالب على أصحاب السلطة الشرعية، أو بالنيابة عنهم في حلوله محلهم، أو – أخيرا- باستيلائه على السلطة الصريحة باسم الشرعية العقلية".

Quote: ( ربما حتى يلِج الجمل في سَم الخياط )

المستكين عشقا والمتمرد حرفا (وليد)

سلام ووينك يا رجل
اها الغلاط دة مش ياهو حيستمر حتى دخول الناقة من خرم ابرة