حدثونا عن الشاعر الفذ المنسي رشاد ود كرار البشاري.. الذي لم ينل حظه من الاعلام التجاري..

صباح الخيرات

شاعر البشاريين الفذ رشاد ود محمود ود كرار ..شاعر ابن شاعر .. وسليل نظار البشاريين..

شاعر دخل في مجادعات كثيرة مع فحول شعراء البطانة واشهرهم الشيخ عبد الله ود حمد ود شوراني..

هذا الشاعر لم يجد حظه من الاعلام رغم شاعريته المفرطة.. وشعره الرصين القوي..

هي دعوة للمهتمين ومن يعرف عنه ان يكتب لنا عن شعره وعنه وعن شاعريته..

وبالمرة ندخل في تراث البشاريين ..ناس الناظر ود كرار ..

وجد بعض محبي الشعر الشاعر الفذ ود شوراني في بادية البطانة فاخبروه ان رشاد ود محمود ود كرار في مجلس ادبي بديع قريبا منه ..

ودفعوه دفعا ليجتمع مع رشاد في جلسة بين الحسان والقيان وبينهما الشعر .. فدخل عليه ود شوراني قائلا :


دمي الغذا نفسي وليها رطب وريح
اصبح جرحو ينزف زاذ بعد ما قيح
مرناعا تتلو الروبة وين ما مــــيح
ناعم وطاعم ومن غير ريجة جسمو مريح

عليكم الله شوفو تشبيه العربي دا؟.. دا غايتو اجمل وصف للجمال الطبيعي البعيد عن الكريمات ومستحضرات التجميل ..

أها قام رشاد ود كرار رد عليهو فوري قائلا :
مايقو سماح وزاد لهب الضمير ما ريح
بسمها فوقو تيجان البيـــــاح البيح
حالتي اتبهدلت مخي البفكر سيح
سببي العاشقو للنجم المويقد طيح

وجدت عنه بعضا مما ابحث في منتديات الكواهلة .. وقيل ان له ديوان شعر يسمى "النقعة" ..على اسم بطانة ود كرار وهي محاذية لعموديات الكواهلة بالبطانة :

عن بطانة ود كرار ( النقعة)

يا النقعة الهواك عليل منقا وصافى
فيكى معالى مسكن حص وفيك مكافى
سألتك من ملوكا بردوك سيافى
فوق صاهلاً دفر وحاسما بيضرب نافى
...........................
*النقعة هى بطانة البشاريين


إيديك بى فزع بسقن عزيز الفودة
وعينتك فوق معالى قصيرة داوى رعودة
ضهوراً شامخة مرميات رتج فى حدودة
جابك كف جدودى الفى المحاصة أسودة
...........................
*فزع تقع على حدود البشاريين الغربية

يا النقعة الأصم كف المبرد سوحك
ماكى قصيفة وافرة كتير وباين شوحك
برد الروح عسيفك يوم دعاشك وفوحك
عفاف أهلك نضيف من الرزايل لوحك

كم لله أهلك صدو محناً جاتك
فى مسمار ظهر ناظرك تلب حوباتك
عن ناس باركين يالفودة واضحة غلاتك
يشهد دربكان يوماً عقر محراتك
باركين أحد فرسان البشاريين الإيرياب ودربكان وادى بالباك

يا النقعة الحدودك فوق شكارى اصال
جيب رسنك قبيل جابك معاهو رجال
بعطى وبكرم الغاشى وبستر الحال
كاس النصرة والفوز عندوو أخد الفال
.............................
*حدود البشاريين والشكرية عند جبال الضرى


يا النقعة العشير سيدك دوام متكيف
يخرف بى امان ويشتى بيكى يصيف
جابك جدى عنوه الرايو ماهو قصيف
فيك قارش غوارب وفيك خرت متقيف
.................................
*يقصد قائد البشاريين حمد ود عمران وتحريره للأراضى عام 1750

ياالمطروحة نمك بالصحف وزعتو
جيب رسنك قبيل فوقك مبين زعطو
فيك حمد المنيع لى خسمو مافى بتعتو
فيك شعر الجنيد غلبان كجوج من معطو

شكراً لك يا عادل وأنت تنقب عن الجمال.

سأحاول تمرير البوست لبعض المهتمين.

الأخ عادل
تحياتي العطرات
مثنى وثلاث ورباع
أهلنا البشاريين قريبين مننا في (بعلوك) بنهر عطبرة، ورشاد أعرفه وقابلته
وأعرف جزء من آل كرار في سيدون
ورشاد دا شاب صغير مقارنة بي ود شوراني الإتوفى في التمانينات
يعني عندما توفى ود شوراني يكون رشاد في الطاشرات
و شاعر يقوم بمجاراة العملاق ود شوراني وهو في الطاشرات أكيد ما ساهل
للأسف لا أحفظ له شعر لكن مصادري في الأتبراوي بتجيب لك شعر رشاد من مصدره
(من رشاد نفسه في الغالب)
كما أحب أن أذكرك بأن (جيب رسنك) دا لقب الناظر الشاعر والزعيم النادر ود كرار
وقد رثاه ود شوراني برثاء معبر وذكر فيه هذا اللقب تحديداً:
(جيب رسنك) فرقتو كبيرة ناظر العامة
وانفقد البيندار للأمور الهامـــة
وهو لقب يعبر عن كرم هذا الناظر، حيث يمنحك ناقة أو جمل بشاري مأصل (يقولك أخد ود فلانة ولا ود فلان)
وما عليك إلا أن تجيب رسنك وتركب
وإنت براك عارف قيمة البكرة أو الجمل البشاري
(البيندار) دي عرفتها ولا أشرحا؟

شكرا الأخ عادل
كل عام أنت وضيوفك بألف خير
وتحيَّات أخي بدر البوادي
عندي تسجيل في جوالي للشاعر الموهوب رشاد
وتحديدا مجادعاتو مع الشاعر الفحل ودشوراني
ومن كم ساعة بفتش ليها ما لقيتها قلب الجوال ما عرفت محلها
إذا لقيتها بنزلها ليكم
أجمل حاجة مخاطبة ود شوراني ليهو :
"يا رشاد ماعندك غنوة ندخلها ليك الضُّل"

والله يا ود المقدم ما عارف أشكرك كيف ولا أجازيك بي شنو
أولاً ما أعرفه من شعر رشاد مريت عليه مرور الكرام، ولم أحفظه
وذاكرتي مثقوبة دائماً ما تخونني حتى ما حفظته من أشعار العظماء أنساه بعد فترة وجيزة
التسجيل دا زائد إنو واضح، ونضيف، كمان رشاد مزاجو رايق
إن شاء الله ألقى لي طريقة أنزلو في البوست دا

تحياتي يا حبيب مثنى وثلاث ورباع

Quote: شكراً لك يا عادل وأنت تنقب عن الجمال. سأحاول تمرير البوست لبعض المهتمين.

تحياتي استاذي اسماعيل وراق


يا ريت بالله ..و اكيد حا يفيدونا حول هذا الشاعر المجيد المنسي..

لك تحياتي

Quote: الأخ عادل تحياتي العطرات مثنى وثلاث ورباع أهلنا البشاريين قريبين مننا في (بعلوك) بنهر عطبرة، ورشاد أعرفه وقابلته وأعرف جزء من آل كرار في سيدون ورشاد دا شاب صغير مقارنة بي ود شوراني الإتوفى في التمانينات يعني عندما توفى ود شوراني يكون رشاد في الطاشرات و شاعر يقوم بمجاراة العملاق ود شوراني وهو في الطاشرات أكيد ما ساهل للأسف لا أحفظ له شعر لكن مصادري في الأتبراوي بتجيب لك شعر رشاد من مصدره (من رشاد نفسه في الغالب) كما أحب أن أذكرك بأن (جيب رسنك) دا لقب الناظر الشاعر والزعيم النادر ود كرار وقد رثاه ود شوراني برثاء معبر وذكر فيه هذا اللقب تحديداً: (جيب رسنك) فرقتو كبيرة ناظر العامة وانفقد البيندار للأمور الهامـــة وهو لقب يعبر عن كرم هذا الناظر، حيث يمنحك ناقة أو جمل بشاري مأصل (يقولك أخد ود فلانة ولا ود فلان) وما عليك إلا أن تجيب رسنك وتركب وإنت براك عارف قيمة البكرة أو الجمل البشاري (البيندار) دي عرفتها ولا أشرحا؟

التحيات النضرات لك اخي بدر الدين بابكر

Quote: ورشاد دا شاب صغير مقارنة بي ود شوراني الإتوفى في التمانينات يعني عندما توفى ود شوراني يكون رشاد في الطاشرات

وهذا هو السبب الذي جعلني اهتم بهذا الشاعر المنسي..

شاعر شاب لم يبلغ العشرين يجادع ود شوراني ويباريهو في القافية لامن يفتر دا اكيد شاعر مجيد..

وكونو انو ود شوراني يمشي ليهو مخصوص فتلك ايضا اشارة لمكانته الادبية عنده ..

هذا اضافة لاحترام نظارة البشاريين عموما لود شوراني ..

وفعلا "جيب رسنك" كان احد ركائز الادارة الاهلية في السودان .. رجل ضو السودان كلو وليس البشاريين فحسب..

اما " البيندار" كيفن ما بعرفا ؟ .. البيندار دا الفيهو العشم والمطلوب بقوة في المحكات ..

لكن بالله عليك الله يا بدر الدين تحاولوا توصلوا رشاد دا للفضائيات والاذاعات..

هذا الشاعر لم اسمع له اطلاقا الا مقطع صغير عبر الواتساب ارسله لي شقيقي عبد الودود..

ويا ريت لو قدرت تجيب لي ليهو تلفون نرتب ليهو حلقات مع الشاعر الهمباتي الاغبش عبر برامجه الاذاعية وايضا الشاعر ود مسيخ..


الشاعر دا اكيد غير الشعر الجزل يمتلك مخزون هائل عن ادب البطانة وميراث ود شوراني الادبي ووالده محمود ود كرار وهو شاعر ايضا ..

وميزة محمود ود كرار انه يمزج لغة البيداويت " وهي لغة الهدندوة" مع مفردات الدوبيت في ترتيب جميل جدا ..

لك تحياتي وفي انتظارك يا ارباب لاثراء البوست

Quote: شكرا الأخ عادل كل عام أنت وضيوفك بألف خير وتحيَّات أخي بدر البوادي عندي تسجيل في جوالي للشاعر الموهوب رشاد وتحديدا مجادعاتو مع الشاعر الفحل ودشوراني ومن كم ساعة بفتش ليها ما لقيتها قلب الجوال ما عرفت محلها إذا لقيتها بنزلها ليكم أجمل حاجة مخاطبة ود شوراني ليهو : "يا رشاد ماعندك غنوة ندخلها ليك الضُّل"

التحيات الزاكيات لك اخي عبيد الطيب

عليك الله بالله نزل لينا التسجيل ضروري

ويا ريت تسهم معنا في هذا البوست لتسليط الضوء على هذا الشاعر الذي لا يحب وسائل الاعلام..

وتعريف السودانيين به..

لك التحيات النضرات..

الأخ عادل
تواصلت مع ابن أختي في البلد (وهو شاعر)
فأرسل لي مقطعين صوتيين لرشاد
أتمنى أن ترسل لي رقمك في الخاص أرسلن ليك
لأنو أنا ما عندي بصارة أنزلن في البوست
وسوف أزودك بوسيلة اتصال تلمك في رشاد شخصياً

الناس ديل رطانة رسمي لكن فصيحين

تحياتي مثنى وثلاث ورباع

Quote: الأخ عادل تواصلت مع ابن أختي في البلد (وهو شاعر) فأرسل لي مقطعين صوتيين لرشاد أتمنى أن ترسل لي رقمك في الخاص أرسلن ليك لأنو أنا ما عندي بصارة أنزلن في البوست وسوف أزودك بوسيلة اتصال تلمك في رشاد شخصياً الناس ديل رطانة رسمي لكن فصيحين تحياتي مثنى وثلاث ورباع

لك عاطر التحايا اخي بدر الدين

تسلم كتير والله للاهتمام ورقمي 0097455450331

واكون شاكرا لو اوصلتني بالشاعر رشاد شخصيا..

ياخي والله ديل شعراء لا يشق لهم غبار

لك التقدير والاحترام