وصايا بطعم الزمن العتيق .. قرأتها فأعجبتني فنقلتها

وصية أم لابنها بلهجة اهلنا الطيبين

بتقول في الوصية :

الجايه من الله ...
ماف زول بيقدر يمنعا
واقسامنا قبّال نتخلق ...
رب الخلايق وزعا
والربو كاتبلو الضرر...
من وين يلاقي المنفعه
سلّم امورك للإله ...
وليهو روحك اودعا
واوعاك تغرك دنيتك ...
وتقوم نخرتك ترفعا
شان نعمتك زرعا الكريم ...
وفي لمحا ممكن يقلعا
تاج التواضع مافي زيو ...
خليك راضي وقانعا
ازرع جميلك بنفعك ...
يوم الخلق مجمعا
ادي الفروض في وكتها...
واوعاك تأخر تجمعا
واتوضا كل مانادو ليها ...
هي فضل الصلاة الجامعه
واوعاك تظلم للضعيف ...
بدعيك وعينو مدمعّا
ودعواتو توصل دون حجاب ...
رب الخلق مابرجّعا
طبق شرايع دين نبيك ...
اوعاك تفارق شارعا
واحرص تبر بي والديك ...
يوم كلمتم لاترجعّا
وادعي الله يوم يرحمم ...
من باب رحمتو الواسعه
شان بكره تلقي جناك بار ...
وزيك كلمتك يسمعا
اوعاك تكشر خلقتك ...
اضحك صدقتك وزّعا
هي الدنيا زاتا قدر شنو ...
شان في زعلنا نضيّعا
وطول ما فيك نفس ...
دايراك تحفظ اربعا
دينك ..لسانك .. وسمعتك ...
ولاتشيل جواك من اي زول ...
خليهو قلبك ناصعا
القلتو ليك كلام كبير ...
دايراك تطبقو بي وعا
وإبقي الختام خير الانام ...
خاتم النبيين اجمعا
صلي عليه وزيد صلاه ...
ملء الوطا وحد السماء السابعه