Post: #1
Title: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-07-2014, 02:10 PM
Parent: #0
خبايا مشروع أبولو وخدعة الوصول للقمر
وبصراحة قاعد فيهو قرابة الساعتين أو تلاتة عشان أصل لآخر صفحة فيهو
( دي أول مرة أعملا ).
ولأنو توجد ظروف جانبية معاكسة ما قدرت ( حتي الآن ) إلا الوصول للصفحة
سبعة، ومستمتع جدا بما أورده سيد البوست حاتم إبراهيم، وفي نفس الوقت إتضايقت
من ( غلاط ) تبارك شيخ الدين تحديدا، وسبب ضيقي من غلاط تبارك إنو هو البدأ
بالإستهتار والأعوج ( كلامك فارغ ) وفي النهاية لغاية صفحة 7 قاعد يشكي من ردة
فعل حاتم، مع انو الأخير من وجهة نظري وبعد ما كمل الصبر ما عمل أية حاجة إلا إنو رد
( التراب ) أو ( الغبار ) أو ( الكتاحة ) لي سيدا، وكان رد فيهو بعض الحنية
يعني إذا كان تبارك شال التراب بي شطتو وكشحو في سيد البوست فالأخير بصراحة
غربل الشطة ورجعو تاني لتبارك ( ترول ) حسب ما تم شرحو للمفردة ( والله أول مرة أسمع بيها ).
الخلاصة : حاتم جاب وجهة نظرو المعتبرة من وجهة نظري وختاها بغض النظر
عن صحتا من غلطا (شخصيا مايل لى صحتا ) بناء على المنطق والعلوم الكتيرة
الأقنعت فهمي على بساطتو للمصطلحات والرموز الخ الخ .. وكنت أري انو لو في
زول ما راكب ليهو الكلام دا يحاول يعارض بالسياسة لا بالسلاح لأنو حاتم كان
زول مسالم وما زال مسالم لغاية الصفحة 7 .
تبارك ما فاضل ليهو إلا يقول انو ناس لا لا ديل شركوا للقمري ولعبوا شليل في القمرة
.. غلاط ساي .
يجدر ذكره انو البوست دا فتحتو عشان شكلي كدا جيت متأخر للبوست المذكور
والمرارة فاتتني لكن ما قدرت أهضم ما أشرت إليه عاليه وكان صعب انو أتجاوزوا
إحقاقا للحق أو قل هاشمية ساي كدا.
غايتو من ناحيتي وحاة النعمة دي ناس ناسا ديل ما وصلوا القمرة ولا شافوها بى عينم
المجردة ذاتو مش لو جابو ترابة من هناك لو ساقوني معاهم عديل ما بصدقم ..
نحن ياخ نقعد نصدق فيهم العمر كلو ليييييي ؟
وبعدين كلام حاتم صاح بخصوص الأثر وظاهر عليهو فعلا عندو فراسة ( القصاص)
.. لأنو إذا كان درب
نعلات الزول بتاع البدلة ظاهرة وواضحة ( مخططا ) وهو الذي يمشي على سطح
القمر مثل أم قيردون في خفتو ورشاقتو ، فما بالك بى تجة المركبة الكم طن دي ..
وين أتر العلالة بتاعتا ووين غتسة كرعينا في باطن القمرة .. ؟؟؟؟؟؟
|
Post: #3
Title: Re: دا أعظم بوست قريتو هنا بكل ثقة وتأكيد
Author: معاوية الزبير
Date: 10-07-2014, 05:22 PM
أوووه حبيبنا القاعد جنب صاحبو
كل سنة و انت وصاحبك والأسر بخير
ياخ تبارك قرّب يقول ليهو لو طلعتَ* القمره وجيت
واحتمال يكون قالها، أنا فكيت درب البوست بدري، مع التقدير لصاحبه المجتهد حاتم إبراهيم (عيدو مبارك)
*(تشكيل طلعتَ حتى لا تختلط مع لو طلعتْ القمره ودّينا لي أهلنا عشان الرواد ما يشوفونا أنصاص الليالي دي)
|
Post: #4
Title: Re: دا أعظم بوست قريتو هنا بكل ثقة وتأكيد
Author: الصادق اسماعيل
Date: 10-07-2014, 08:20 PM
Parent: #3
طلحة
عيدك مبارك
البوست جميل جداً وكمية من المعلومات المفيدة خصوصاً للناس الأول مرة يمروا على موضوع (فبركة النزول على القمر)
طبعاً أخوك متسنتر بهناك ومنتظر (الدليل العلمي) ومنير مزرزرني، وحاتم بيضحك على مسميني (مستر هوكس).
المهم الموضوع مدور هنا في أمريكا وفيه (هلال مريخ) شديدة جداً.
وأنا وجهة نظري إنه من الصعوبة إنه الناس تصدق إنه الموضوع (فبركة) ما لم تجيب أدلة علمية.
وبالمناسبة كل فريق يجيب ليه حاجة الفريق التاني عنده ليه رد وتبرير طوالي (بيني وبينك ممكن تصدق الإتنين) ذاتم
المهم أنا قناعتي من زمان أول ما دخلت الفلم دا إنه حتظل الرواية الرسمية لناسا هي المعتمدة وحتظل قصة الفبركة دي (على الهامش إلا يشوفوا ليهم بشاشا ينجدم )
أنا زي ما قلت ليك ما حبيت أخرب للباشمهندس حاتم بوسته وأخش معاهو في (هلال مريخ) زي ما وضحت ليهو.
وعشان أديك هلال مريخ شوف الفديو دا
http://www.sudaneseonline.com/db/attention/010_Smile.gif
أها ديل ناس (مريخ ناسا) ردوا طوالي على ناس (هلال فبركة)
وإنت قايل ناس هلال فبركة هينين
شوف ردوا عليهم بي شنو
| Quote: mythbuster go up to the moon with a HD cam and use real lunar dust instead of something "close" to it. |
يعني إنتو لو دايرين تقنعونا، امشو القمر وبكاميرا (عالية النقاء) واستعملوا تراب القمر الحقيقي مش حاجة قريبة ليه.
أها الموضوع مدور طوالي كدا
والحاجة الوحيدة الحتحسموا حسم نهائي لصالح واحد من الفريقين
إنه جهة تالتة تمشي القمر ولمن تصل حتشوف الآثار الخلفوها (مريخ ناسا) وناس (هلال فبركة) يشربوا ما يرووا
أو العكس يحصل
أو يتم صناعىة مرصد ممكن يخلينا نشوف القمر وموقع الهبوط غير كدا حيستمر الجدل لي يوم الدين.
|
Post: #6
Title: Re: دا أعظم بوست قريتو هنا بكل ثقة وتأكيد
Author: جمال ود القوز
Date: 10-07-2014, 08:40 PM
Parent: #4
هو لو ما الغلات بتاع طباركـ ده..
كان وصل البوست للكليكات الرهيبة دي ..
أوافقك الرأي ولا طلعوا ولا حاجتين ..
ده خم امريكان ساي ..
بعدين هم بيخموا فينا من شويه ..
ثم ثانياً .. تاني ما طلعوا مالم .......
منور ياخ وأضحى مبارك ..
|
Post: #5
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-07-2014, 08:28 PM
Parent: #3
هلا الوجيه ود الزبير
كل سنة أنت وأحبابك كلكم في أمن وسلام مع الأمنيات الطيبة
شكرا لسعيك الجميل يا جميل .
تبارك في البوست المعني متلقي حجج ساي بصراحة .
...................
الاخ المستنير شديد من الفيس بوك قوم لف اتا دا .
|
Post: #7
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-07-2014, 09:18 PM
Parent: #5
سلامات يا الصادق وكل سنة وانت طيب
عظمة البوست ما بس في كمية المعلومات الفيهو انما أكتر في ترتيب المعلومات دي وتبسيطا
بطريقة تخلي الزينا ديل قادرين على المتابعة وفاهمين الحاصل، بالاضافة لاسلوب سيد البوست
في ترتيبا وحوارو مع ( الذين اتوا لحوار) .. خخخخخخخخ
غايتو أنا أول مرة أستمتع بموضوع يغلب عليهو الجانب الأكاديمي ..
من ناحية تانية ناس لا لا ديل والأميركان عموما أنا من زمان عايز لي زول يطلع زيتم ان شاء الله حنك ساي
زي ما بعملوا هم لى خلق الله .
|
Post: #8
Title: Re: دا أعظم بوست قريتو هنا بكل ثقة وتأكيد
Author: الصادق اسماعيل
Date: 10-07-2014, 09:42 PM
Parent: #7
Quote: من ناحية تانية ناس لا لا ديل والأميركان عموما أنا من زمان عايز لي زول يطلع زيتم ان شاء الله حنك ساي
زي ما بعملوا هم لى خلق الله . |
سلام يا طلحة
يا زول هو الموضوع اساساً قاموا بيه ناس عندهم راي في امريكا (وعشان نكون محددين كمان عندهم راي في الحكومة الفدرالية)
وبيفتكروها بتصرف في كلام فارغ قروشم.
المهم
نزودك كمان بالموقع دا
في المواضيع وفيه الردود
وعشان الواحد يكون محايد حتشوف الموضوع الأخير بتاع السي ان ان بيقيف مع المتشكككين
http://www.ibda3world.com/%D8%A7%D9%84%D9%87%D8%A8%D9%88%D8%B7-%D8%B9%D9%84%D9%89-%D8%A7%D9%84%D9%82%D9%85%D8%B1-%D8%AD%D9%82%D9%8A%D9%82%D8%A9-%D8%A3%D9%85-%D8%AE%D9%8A%D8%A7%D9%84/http://www.ibda3world.com/%D8%A7%D9%84%D9%87%D8%A8%D9%88%D8%...E%D9%8A%D8%A7%D9%84/
لكن برضه بديك فكرة أحسن ومبسطة عن الموضوع
|
Post: #9
Title: Re: دا أعظم بوست قريتو هنا بكل ثقة وتأكيد
Author: Kostawi
Date: 10-07-2014, 09:42 PM
Parent: #7
نحن غايتو بنشجع القمر الروسي
|
Post: #10
Title: Re: دا أعظم بوست قريتو هنا بكل ثقة وتأكيد
Author: تبارك شيخ الدين جبريل
Date: 10-07-2014, 11:32 PM
Parent: #9
القطيعة حرام ...
... المهم ....
|
Post: #11
Title: Re: دا أعظم بوست قريتو هنا بكل ثقة وتأكيد
Author: الصادق اسماعيل
Date: 10-08-2014, 00:13 AM
Parent: #10
Quote: فما بالك بى تجة المركبة الكم طن دي ..
|
طلحة شرطت عينا
إنت ما سمعت بالهبوط الناعم ولا شنو؟
| Quote: وثيقة أمريكية مسربة تدعو لـ «هبوط ناعم» لقيادات الإنقاذ |
هسع عليك "أثقل" قيادات الإنقاذ ولا مركبة ناسا
أهو برضو حيعملوا ليهم هبوط ناعم.
|
Post: #12
Title: Re: دا أعظم بوست قريتو هنا بكل ثقة وتأكيد
Author: mustafa mudathir
Date: 10-08-2014, 05:37 AM
Parent: #11
استسمح سيد البوست طلحة عبد الله في التعليق.
حقيقة الموضوع بهناك في بوست حاتم على الرغم من غلبة المعرفة العلمية وربما المهنية عليه لكنه تحوّل لغلاط.
والغلاط دا خطورته في انه بيشكك في المعرفة العلمية لانسان اليوم.
أنا ما عندي شك في أن الأمريكان طلعوا القمر وفي نفس الوقت أتابع منذ سنين قصة الناس الشاكين في الموضوع دا
وعارف حاجات وحكاوي وعارف مواقع متخصصة وطبعاً لا بأس من الشك ولكن الشاكين ديل ما فيهم علماء عشان
يدحضوا قصة النشاط الفضائي للأمريكان. ومهما طال الغلاط فإن الحقائق حول الموضوع لا تسرنا نحن في الدول
النايمة وذلك للآتي:
- الأمريكان يتحدثون عن بحوث علمية والخير العميم ولكن حقيقة هم يبحثون عن الذهب والماس واستثمار السياحة.
- الأمريكان هنالك من قال لهم تاني ما تجوا حايمين بي جاي، كان إله كان كائنات فضائية، المهم تم منعهم من القمر.
- الامريكان لما جاء متيور حايم قبل شهور خرجوا له بصواريخ عشان يصوروه، عشان يصوروا الدهب والماس الفيهو!
ودي براها دليل على قدراتهم وما منعهم من ذلك المتيور إلاّ أنه اقترب كثيراً من الشمس وبعد ذاك زاغ وتاني ما ح يرجع
إلاّ بعد كذا ألف سنة ولا حاجة زي دي! ودا موضوع ما بيسرنا لأنهم كانوا يتربصون شراً بضيف لا يأتي كثيراً ولأنه ثروات
الكون دي مافي اتفاق الناس تتعامل معاها كيف!
أنا شخصياً واقف مع جانب العلم ومؤمن به والمؤمن صديق!
|
Post: #13
Title: Re: دا أعظم بوست قريتو هنا بكل ثقة وتأكيد
Author: أبوبكر عباس
Date: 10-08-2014, 06:29 AM
Parent: #12
| Quote: - الأمريكان هنالك من قال لهم تاني ما تجوا حايمين بي جاي، كان إله كان كائنات فضائية، المهم تم منعهم من القمر. |
لي كم يوم يا مصطفى، داير أسجل ملاحة شبيهة بنقطتك دي وغلبني أصيغها بشكل قوي.
كنت حابي أشكك بقولي:
ليش الأمريكان ما خلوا وراهم بالقمر حاجة بتواصلوا معاها أو ترسل ليهم إن شاء الله درجة الحرارة هناك أو لمبة حمرا عشان نعرف بيها هلال رمضان، شوال وذي الحجة؟!!
إقتفوا أثر مصطفى؛ إنه....
|
Post: #15
Title: Re: دا أعظم بوست قريتو هنا بكل ثقة وتأكيد
Author: صلاح الدين موسى
Date: 10-08-2014, 06:50 AM
Parent: #13
شكرًا صاحب البوست
انا فى الحقيقة لم ادخل البوست بتاع حاتم ،
انا زرت جامعة أوهايو فى العام 2008 برفقة الاستاذ محمد جاد كريم وهو عضو صاحب حضور وقلم مقروء فى هذا المنبر
ودخلت معه كلية( الفلك او الفضاء ) انا ما متاكد من اسمها بالضبط
هو شرح لي بعض المعلومات عن الجامعة ودورها فى برنامج الصعود للقمر وشاهدت كثير من الصور خاصة بمواضع الفضاء ،،،
اتمني من الاستاذ جاد كريم يقول رأيه فى هذا الامر ،
|
Post: #16
Title: Re: دا أعظم بوست قريتو هنا بكل ثقة وتأكيد
Author: صلاح الدين موسى
Date: 10-08-2014, 06:50 AM
Parent: #13
شكرًا صاحب البوست
انا فى الحقيقة لم ادخل البوست بتاع حاتم ،
انا زرت جامعة أوهايو فى العام 2008 برفقة الاستاذ محمد جاد كريم وهو عضو صاحب حضور وقلم مقروء فى هذا المنبر
ودخلت معه كلية( الفلك او الفضاء ) انا ما متاكد من اسمها بالضبط
هو شرح لي بعض المعلومات عن الجامعة ودورها فى برنامج الصعود للقمر وشاهدت كثير من الصور خاصة بمواضع الفضاء ،،،
اتمني من الاستاذ جاد كريم يقول رأيه فى هذا الامر ،
|
Post: #14
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-08-2014, 06:36 AM
Parent: #12
هلا يا ود القوز والعيد مبارك عليكم
تبارك يكابر حبا في الأميركان لا كية في سيد البوست كما أعتقد
عموما أنا ضدو حتي ولو كان كلامو صاح .. وهيهات أن يكون ذلك كذلك ( لقيتني كيف يا بوس ؟)
لازم الواحد فينا يأخد موقف ولو مرة في حياتو ضد ماما أمريكا لازم .. حكيم
الشهرة مكلفة جدا .
|
Post: #17
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-08-2014, 06:50 AM
Parent: #14
يا الصادق روابطك الجبتها دي بالإنجليزي ؟؟
يا كستاوي تشجيعك للقمر الروسي دليل وعي .. أبشر بطول نصر مؤزر .
يا تبارك ما في أية قطيعة .. الكلام دا خفت أقولو هناك يقوم يضيع في الزحمة .. ( واخد بالك في اختياري ليك تحديدا ؟)
يا مدثر شخصيا طلعت بحاجات مفيدة للمستقبل .. مثلا أول مرة أعرف أنو ترابة القمرة كالدقيق الفينو الأسترالي
في نعومتا بيد ان لونا يشبه الأسمنتي .. كما أطلعت عن قرب على البثور والقشور التى على وجه القمرة .. حقيقة
الواحد كان مخموم خالص في نصاعة جمال وجه القمر .. لقد خدعونا الشعراء و صعاليك الأعراب .
كل عام وانتم بخير يا أبو بكر عباس
|
Post: #18
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-08-2014, 07:04 AM
Parent: #17
يا صلاح يعني اتا معانا واللا مع الخيانة ؟؟
كل عام وانتم بخير
|
Post: #19
Title: Re: دا أعظم بوست قريتو هنا بكل ثقة وتأكيد
Author: طلحة عبدالله
Date: 10-08-2014, 10:26 AM
Parent: #18
عاد حاتم كما العاصفة وإجتاح تبارك إجتياحا مدمرا، فيما تكفل القشاش منير بوأد محاولات الصادق
ونفر من المغامرين ..
البوست حتي الآن حاشد بالمتعة والإثارة ..
ياله من بوست أو كما قال .. خخخخخخخخخخخ.
..............
يا المستنير شديد ما عايز تقوم تلف اتا دا مالك ؟
|
Post: #20
Title: Re: دا أعظم بوست قريتو هنا بكل ثقة وتأكيد
Author: تبارك شيخ الدين جبريل
Date: 10-08-2014, 01:01 PM
Parent: #19
هي دي تاريها العاصفة؟
انا شايفو كلام ما بستاهل يردوا عليو ظاطو ...
(والله انا شكلي عفصت ليّ كديسة وانا ما حاسي )
... المهم ....
|
Post: #21
Title: Re: دا أعظم بوست قريتو هنا بكل ثقة وتأكيد
Author: الصادق اسماعيل
Date: 10-08-2014, 11:05 PM
Parent: #20
طلحة
سلام
http://www.ibda3world.comhttp://www.ibda3world.com
اسمه إبداع الموقع
لمن تخش الموقع اكتب في خانة البحث
الهبوط على القمر حقيقة ام خيال
|
Post: #22
Title: Re: دا أعظم بوست قريتو هنا بكل ثقة وتأكيد
Author: mustafa mudathir
Date: 10-09-2014, 04:29 AM
Parent: #21
يا صادق قلت أصلح اللينك قبل ما أعرف أشوفو
http://www.ibda3world.com
|
Post: #23
Title: Re: دا أعظم بوست قريتو هنا بكل ثقة وتأكيد
Author: علي دفع الله
Date: 10-09-2014, 08:09 AM
Parent: #22
طلحة كل سنة وانت طيب
انا غايتو ما مشكك في انو الامريكان طلعوا القمر وعن قريب حا يطلعوا المريخ
بس عندي سؤال مش في امير سعودي مامتذكر اسمو قالوا طلع القمر . طيب الراجل ودوه صحراء بيوضة ولا شنو القصة..
|
Post: #24
Title: Re: دا أعظم بوست قريتو هنا بكل ثقة وتأكيد
Author: علي دفع الله
Date: 10-09-2014, 08:19 AM
Parent: #22
طلحة كل سنة وانت طيب
انا غايتو ما مشكك في انو الامريكان طلعوا القمر وعن قريب حا يطلعوا المريخ
بس عندي سؤال مش في امير سعودي مامتذكر اسمو قالوا طلع القمر . طيب الراجل ودوه صحراء بيوضة ولا شنو القصة..
|
Post: #25
Title: Re: دا أعظم بوست قريتو هنا بكل ثقة وتأكيد
Author: صلاح الدين موسى
Date: 10-09-2014, 08:41 AM
Parent: #24
طلحة صباحك نور
طبعا مع الخيانه ههههههه
علي ما اذكر هنا فى المنبر اثير جدل مشابه لعميلة طلوع القمر هي حادثة مقتل بن لادن
عموما انا ليست لدي ادني شك في ذلك ،،،،،،
|
Post: #26
Title: Re: دا أعظم بوست قريتو هنا بكل ثقة وتأكيد
Author: حاتم إبراهيم
Date: 10-09-2014, 11:07 AM
Parent: #1
Quote:
دا أعظم بوست قريتو هنا بكل ثقة وتأكيد |
السلام عليكم أخ طلحة
ومشكور جداً على الاهتمام بالبوست، أنا في مشغولية نظراً لتبديد شهر كامل في محاولة توصيل مفاهيم أساسية لمن حاولوا "مناقشتي" في الموضوع.
شكراً جزيلاً
|
Post: #27
Title: Re: دا أعظم بوست قريتو هنا بكل ثقة وتأكيد
Author: حاتم إبراهيم
Date: 10-09-2014, 11:17 AM
Parent: #1
Quote:
انا غايتو ما مشكك في انو الامريكان طلعوا القمر وعن قريب حا يطلعوا المريخ
بس عندي سؤال مش في امير سعودي مامتذكر اسمو قالوا طلع القمر |
يستحسن تبدأ تشك يا أخ علي.
الأمير اسمو سلطان بن سلمان، لم يزر القمر،
لكن أظنه رآه.
دار حول الأرض في المكوك ديسكفري عام 1985 في مهمة زج به فيها زجاً، المعلومات في ويكيبيديا
تلك الأيام كان الرواد يقومون بالتجارب العلمية المخطط لها، بينما خاض العالم العربي في مساءل مثل كيفية أداء الصلاة على المكوك واتجاه القبلة (الشمس تشرق 16 مرة في اليوم) .
بعض الظرفاء ذكروا تلك الأيام أن ذلك تصديقاً للآية (....لا تنفذون إلا بسلطان) الآية.
|
Post: #28
Title: Re: دا أعظم بوست قريتو هنا بكل ثقة وتأكيد
Author: الصادق اسماعيل
Date: 10-09-2014, 07:32 PM
Parent: #27
مشكور
يا مصطفى مارلي
(ما طالبني حليفة مريت سريع لنهاية البوست شفت صورتك لمحة كدا قلت دا منو الخاتي صورة بوب مارلي في بروفايلو)
|
|