المركز الثقافى VS نادى الغزال "مكايدة أم معايدة"؟

دايرين نعيَد على الناس كوووولها فى الدوحة ..
اليوم واحد .. التوقيت واحد .. المسافات متباعدة ..

نفس فيلم عيد الفطر ..

يعنى نكتفى بالتلفونات ولا كيف ؟

ياخى عليكم الله اتفقو بس فى الاعياد دى بس ..
وبعد العيد يبقى "الحال فى حالو" .. او كما قال الجعلى فى النكتة ..
او خلوها فى يومين مختلفات عشان نقدر نلاقى كل الناس ..

النكتة :
الجعلى ماشي الحج قالو ليهو لازم قبل تمشي تصافى الناس كووولها .. وتعتذر ليها ..
عندو جارو ما بطيقو وشايف موضوع الاعتذار ده حاااار .. لكن ما عندو طريقة ..
مشي دق ليهو الباب وقال ليهو : شوف انا ماشي الحج .. كان مُت العفو والعافية ..
وكان جيت راجع الحال فى حالو

الزميل ود البشاري:تحياتي
هذه الفرضية (المركز الثقافى VS نادى الغزال "مكايدة وليست معايدة )ليست صحيحة.
.............................................................................

معايدة نادي الغزال،احتفاء بالاعياد، ولقاء اسري لتبادل التهاني،ومفتوحة للجميع، ومنذ انطلاقها في 1992 حضرها كل السفراء المعتمدين في الدوحة،ووجدت المعايدة لتبقى،طالما انها تجمع ولا تفرق،كماانها وجدت قبل ان يبصر المركز الثقافي النور،بل كان فكرة لدى مثقفين في الدوحة،والبعد الانساني فيها ان الاستاذ عبد المنعم المكي، نسال الله ان يمتعه بالعافية، هو رائد الفكرة،استطاع ان يجمع السودانيين،وبات رمزا في مجال الدبلوماسية الشعبية،يبادله الناس الوفاء والتقدير والاحترام، بالمحافظة على هذا التقليد الجميل في الاحتفال بالاعياد في نادي الغزال،واستمرت المعايدة تحت مظلة المجموعة السودانية، حاضنة تقاليدنا السمحة،والمحافظة على الارث الجميل لكبارنا ورموزنا، وينهض بتنظيمها البعض ، ويتغيرون كل عام،لانهم اناس محبون للخير، يعملون بتجرد، ويسعون بوقتهم ومالهم وجهدهم لاشاعة الفرحة بالعيد، في وقت عز فيه الفرح،وغابت عنه الحكمة والكلمة السمحة.

ينسى الكثيرون ، جانبا انسانيا مهما، ان صاحب الفكرة، يحتاج منا لرد الجميل، والدعاء الصالح،فالابتلاء في عافية البدن،يجعلنا ان نجزل الوفاء ونكثر الدعاء، وما نطلبه من الاخرين ان يقولوا"حسنا"، ويتذكروا هذا الرمز،الذي اعطى لوطنه والى قطر عصاره فكره القانوني،كما اننا نذكر"هل قطر" بالخير وحسن رعايتهم لنا،وفي هذه الايام والحج على الابواب، تتجلى فرحة العيد وحكمة الفداء،علينا ان نتذكر هذه الانسان الرائع الذي جمعنا في مناسبة عظيمة .
اللهم اشف الاستاذ عبد المنعم المكي.
اما من يرون عكس ما كتبناه،عليهم ان يعيدوا البصر كرتين، ويفكروا بعقل رزين، فالامر في المبتدأ،سنة ماضية لا يستطيع احد ان ينكرها، او يرفضها، مثلما اننا نقدر للاخرين جهدهم ونحترمه،فلتتعدد الامكنة ولتكون الفرحة واحدة بالعيد .

...
تخريمة:

الروح الرياضية، تقتضي احترام الاخر وخياراته ، وليس الامر( هلال - مريخ).وليبقى الود بين الجميع.

تحياتي يا بشاري ومشتاقين..

اتفق معك تماما انو الامر لا يخلو من مكايدات..

ولكن ايضا الناس حرة في اختياراتها..

ونضر الله ايام الاستاذ عبد المنعم المكي .. الذي جمع الناس على الخير بعيدا عن السياسة ..

الصورة اعلاه كانت خلال زيارة لنا للاستاذ عبد المنعم المكي بمنزله العامر بمنطقة الهلال انا و الاستاذ هاشم الادريسي والدكتور ابوسيف..

تحدثنا كثيرا عن الدوحة زمان .. ويا حليل الدوحة زمان.. وياريت عزام حسن فرح كان بالمنبر عشان يورينا كيف كانت معايدة نادي الغزال زمان..

المهم الناس تطيب النفوس .. من هنا ومن هناك..

Quote: النكتة : الجعلى ماشي الحج قالو ليهو لازم قبل تمشي تصافى الناس كووولها .. وتعتذر ليها .. عندو جارو ما بطيقو وشايف موضوع الاعتذار ده حاااار .. لكن ما عندو طريقة .. مشي دق ليهو الباب وقال ليهو : شوف انا ماشي الحج .. كان مُت العفو والعافية .. وكان جيت راجع الحال فى حالو

هاهاها

دي المنطبقة علينا في الدوحة في مباراة الديربي دي ..

تحياتي

شكرا يا عزام لسرعة الاستجابة..

Quote: كيف حالك يا Faisal Al Zubeir علك طَيِب - قَولك: [الاستاذ عبد المنعم المكي، نسال الله ان يمتعه بالعافية، هو رائد الفكرة،استطاع ان يجمع السودانيين] (إنْتهى). ده قول فيهو شطط، أنا حاضِر بِداية الأمر، وكانت في بِداية أمرِها تجمع لِلصَفوة، الرعاع والرجرجه شوقُم كان يسمحو ليهم يدخلو ويِباركو، تجمُع لإسْكيل A ,B ما تقول كلام ماك حاضرو يا Faisal ولقنوهو ليك تلقين يا فيصل يا خوي. ـــــــــــــــــــــــــــــــــــــــ - وقولك: [واستمرت المعايدة تحت مظلة المجموعة السودانية، حاضنة تقاليدنا السمحة،والمحافظة على الارث الجميل لكبارنا ورموزنا] (إنْتهى). التقاليد السمحه بتقول تجمعو الناس مُش تستغلو المناسبات في مكايداتكم السِياسِية.. السياسة البديتوها في الغربة، و 99% منكم يا مُناضلين الدوحة، في سودان عمر البشير كنتم "طايعين" وده البحصل لامِن تمشو السودان سنوِيًا في إجازات، تقضوها عزومات وأعراس وتصدو راجعين، ترجعو تناضلو. ـــــــــــــــــــــــــــــــــــــــ وداير أسألك يا Faisal وهل تحديد إحتفائية "نادي الغزال" ثاني يوم أو ثالث يوم في العيد، هل هذا يُعتبر عدم وفاء للعم عبدالمنعم مكي؟! البحصل كل عيد بينكم وبين القواعِد الشعبِية -حليلُم ياخ- مُكاواه أطفال حرّم.. ناس الريس (مربي ومدربي ورعاة الإبل) يِصلوكم كيف يا قِمة.. الطباخين والميكانيكِية وعُمال النظافة، ديل ما بعرفو فِجه "نادي الغزال" وإنتو ما بتعرفو فجتُمْ، ديل ما داخلين في حَيِز " الدبلوماسية الشعبية". كُل سنة تكتِب الترهات الفوق دي يا Faisal، أنا بكتِب الحقيقة، وبرضو الروح الرِياضية مُتَوفِرة..

الأخوة بورداب الدوحة ....
من هسي ها ده طرفنا من هنا ومن هناك ...
العفو والعافية وكل سنة وانتو طيبين ..
وده زااااتو ما عيد مرقة ومعايدات وكلام زي ده ...
من بدري ترتب الأمور الحمية والشطية وتقعد ليها مع وليداتك وكفى الله المؤمنين القتال ...

الاخ الحبيب / فيصل حضرة
كل سنة وانت بالف خير ياخ ..

Quote: هذه الفرضية ليست صحيحة.

انا لا افترض شيئا .. ولكنه احساس انتابنى ..

Quote: الاستاذ عبد المنعم المكي، نسال الله ان يمتعه بالعافية، هو رائد الفكرة

متعه الله بالصحة والعافية وله اجر المبادرة وحفظ حقه كاملا غير منقوص ..

Quote: ،استطاع ان يجمع السودانيين

وهذا هو هدف البوست ده يا فيصل ان يجتمع كل السودانيين فى مكان واحد ..

Quote: ينسى الكثيرون ، جانبا انسانيا مهما، ان صاحب الفكرة، يحتاج منا لرد الجميل، والدعاء الصالح،فالابتلاء في عافية البدن،يجعلنا ان نجزل الوفاء ونكثر الدعاء

والبوست يذهب فى نفس اتجاهك يا فيصل .. بدل يكون رد الجميل للاستاذ عبد المنعم المكى من جزء يكون الرد من الكل ..

Quote: اللهم اشف الاستاذ عبد المنعم المكي.

اللهم آمييييين

Quote: وما نطلبه من الاخرين

شوفت قولة الاخرين دى ياها زااااتا الفتحنا البوست ده من اجلها ..
ياخ نحن دايرين نعيَد على الاولين والاخرين .. ليه تحرمونا ؟

Quote: ،فلتتعدد الامكنة ولتكون الفرحة واحدة بالعيد

ما صعَبتها علينا يا فيصل ياخ !

Quote: الروح الرياضية، تقتضي احترام الاخر وخياراته ، وليس الامر( هلال - مريخ).وليبقى الود بين الجميع.

والله احترامى الشديد لخيارات الكل .. ولكن أأمل فى يجتمتع الكل فى مكان واحد بدل الشلهتة دى ..
انا غايتو مريخابي .. ح اشوف هارون دياب مشي وين وانا فى خطراتو
كل الود لك ولكل سودانى بالدوحة
كل عام وانتم بخير ..

الحبيب / عادل ابراهيم ..
شوق شديد والله ..

Quote: المهم الناس تطيب النفوس .. من هنا ومن هناك..

وده المطلوب ياخ ..

الدنيا دى فيها شنو !!

الاخ الكريم / عزام فرح ..
كل سنة وانت طيب ياخ ..
كنا دايرنك تجينا بي فوق .. لكن شكلك لسة حردان

والله انا فتحت البوست ده وكلى عشم فى انو يحرك المياة الراكده فى اتجاه وتفكير ايجابي يجمع شمل السودانيين فى الدوحة -على الاقل- فى الاعياد ..

دمت بخير يا حبيب ..

الاخ / عثمان دغيس ..
كل سنة وانت والاسرة بالف خير ياخ

Quote: الأخوة بورداب الدوحة .... من هسي ها ده طرفنا من هنا ومن هناك ... العفو والعافية وكل سنة وانتو طيبين .. وده زااااتو ما عيد مرقة ومعايدات وكلام زي ده ... من بدري ترتب الأمور الحمية والشطية وتقعد ليها مع وليداتك وكفى الله المؤمنين القتال

ههههههههههههههههه
شايفك نفضت يدك تب




وهذا ما اخشاه ان ينفض الناس ثم لا يذهبون لمركز ثقافي او نادى غزال وكل يلزم بيته