Post: #1
Title: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-29-2014, 04:16 PM
كل عام وجميع ابناء وبنات السودان بخير على امتداد مساحات العالم ..
وربنا يرجعكم جميعا الى اهليكم تامين لامين سالمين غانمين ..
ستكون معايدة كل من السفارة والمركز الثقافي والجالية السودانية باذن الله في تمام الساعة السادسة من مساء اول ايام عيد الاضحى المبارك الموافق 4 /10/2014 ..
وذلك بالمركز الثقافي السوداني بمنطقة مريخ قرب اسباير زون ..
سيبدا برنامج المعايدة منذ ما بعد العصر بالعاب للاطفال تشتمل على نطاطيات ورسم وفقرات خاصة بالطفل..
وبعد المغرب يبتدئ برنامج المعايدة الرسمية للسفارة ..ثم تستمر المعايدة بفقرات عديدة ومتنوعة تشتمل على فواصل غنائية واناشيد ومدائح ..
وهنالك مفاجآت اخرى حسب افادة البروفسير عمر الاصم رئيس الجالية والاستاذ احمد عبد المنعم رئيس اللجنة التنفيذية للمركز الثقافي والاستاذ عمر كمال الامين العام للجالية ..
اعاد الله العيد السعيد على الجميع بالخير والبركات وكل عام ومجتمع السودانيين بالدوحة بالف خير..
|
Post: #2
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-29-2014, 04:27 PM
Parent: #1
|
Post: #3
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: حسين عمر الفكي
Date: 09-29-2014, 05:18 PM
Parent: #2
حضور باذن الله ..أخي عادل.
تخريمة.لو عندك شواية زايدة كلمني ههههه
ودي واحترامي
|
Post: #4
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: معتز القريش
Date: 09-29-2014, 09:25 PM
Parent: #3
شكرا أخي عادل وشكرا للمركز الثقافي والجالية والسفارة
لكن عندي ملاحظة على اليوم الأول
حسب التجربة المعايدة بتاعة الأضحى ما بتنفع أول يوم
خصوصا للنساء والأطفال قول لي ليه
أول يوم بكون 80 في المية من الناس ضابحين
المرارة وشية الجمر بتستمر لغاية الساعة عشرة صباحا
الساعة من 12 الى 1 ظهرا بكون برنامج الفطور والشربوت وما الى ذالك
الغداء غالبا بكون من 5 الى 6 مساء
يعني لما النسوان يغسلن العدة ويلملمن باقي اللحم بتكون الساعة مشت للتمانية
وبالمرة بتكون عين مغمدة وعين مفتحة وعايزة السرير بس لأنها مساهرة يوم الوقفة لغاية 3 صباحا
وصحت يوم العيد الساعة اربعة صباحا عشان تجهز للراجل والعيال هدوم الصلاة
وهاك يا حمام للشفّع ولبيس ..
أها اقولا ليكم عن تجربة أول يوم معايدتكم فااااااشلة لأنها ح تكون بدون نسوان وبدون أطفال
خلوها تاني يوم الناس رايقة وهادية وقاشرة وحايمة في المعايدات على الأهل والأصحاب
ومن هناك بعرجو على المركز ويحضروا المعايدة
بالجنبة كدا :
غايتو لو عملتوها أول يوم النطاطيات دي إلا تنططوا فيها إنت وأمير طمبل وأحمد عبد المنعم ههههههههههههه
|
Post: #5
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: بدر الدين الأمير
Date: 09-29-2014, 09:51 PM
Parent: #4
خلاص يالحوثيين احكمتم قبضتكم وبقى ماعند السودانيين بالدوحة خيار غير ان ياتو لاماكن سيطرتكم لكى يعيدو على بعض ... وعجبى
من حقكم تتكلمو عن السافرة والمركز الثقافى بحكم وضع اليد والسيطرة الانقلابية بس عن ياتو جالية تتكلمون
|
Post: #6
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 05:12 AM
Parent: #5
Quote: شكرا أخي عادل وشكرا للمركز الثقافي والجالية والسفارة
لكن عندي ملاحظة على اليوم الأول
حسب التجربة المعايدة بتاعة الأضحى ما بتنفع أول يوم
خصوصا للنساء والأطفال قول لي ليه
أول يوم بكون 80 في المية من الناس ضابحين
المرارة وشية الجمر بتستمر لغاية الساعة عشرة صباحا
الساعة من 12 الى 1 ظهرا بكون برنامج الفطور والشربوت وما الى ذالك
الغداء غالبا بكون من 5 الى 6 مساء
يعني لما النسوان يغسلن العدة ويلملمن باقي اللحم بتكون الساعة مشت للتمانية
وبالمرة بتكون عين مغمدة وعين مفتحة وعايزة السرير بس لأنها مساهرة يوم الوقفة لغاية 3 صباحا
وصحت يوم العيد الساعة اربعة صباحا عشان تجهز للراجل والعيال هدوم الصلاة
وهاك يا حمام للشفّع ولبيس ..
أها اقولا ليكم عن تجربة أول يوم معايدتكم فااااااشلة لأنها ح تكون بدون نسوان وبدون أطفال
خلوها تاني يوم الناس رايقة وهادية وقاشرة وحايمة في المعايدات على الأهل والأصحاب
ومن هناك بعرجو على المركز ويحضروا المعايدة
بالجنبة كدا :
غايتو لو عملتوها أول يوم النطاطيات دي إلا تنططوا فيها إنت وأمير طمبل وأحمد عبد المنعم ههههههههههههه |
تحياتي يا معتز وصباح الخيرات
انتا عارف دا اقتراح جميل .. لكن ناس السفارة والجالية والمركز دائما ما يقيموا احتفالهم بالعيد في اليوم الاول ..
ومن وجهة نظري الشخصية اليوم الاول خال تماما من الرحلات ومعظم الناس زي الساعة 3 بكونوا ضربوا الشيات واللحوم ..
بعد المغرب بهجسوا للراحة وما فيهو زيارات ..
لكن الايام اللاحقة ايام رحلات وتجمعات اسرية ..
Quote: الجنبة كدا :
غايتو لو عملتوها أول يوم النطاطيات دي إلا تنططوا فيها إنت وأمير طمبل وأحمد عبد المنعم ههههههههههههه |
انا غايتو لسة شباب ..لكن طمبلاوي واحمد عبد المنعم ديل لو عملوها بتكسروا تب ..هاها
تحياتي
|
Post: #7
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: بدر الدين الأمير
Date: 09-30-2014, 06:37 AM
Parent: #6
Post: #8
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:57 AM
Parent: #7
Quote: خلاص يالحوثيين احكمتم قبضتكم وبقى ماعند السودانيين بالدوحة خيار غير ان ياتو لاماكن سيطرتكم لكى يعيدو على بعض ... وعجبى
من حقكم تتكلمو عن السافرة والمركز الثقافى بحكم وضع اليد والسيطرة الانقلابية بس عن ياتو جالية تتكلمون |
صباح الخيرات والبركات اخي بدر الدين
وكل سنة وانت بخير وصحة وعافية
عارف يا بدر جاليتنا دي فيها 45 الف سوداني وسودانية .. العاملين الزوبعة دي كلها ممكن احسبهم لك على اصابع اليد .. ومن الطرفين ..
الالاف المؤلفة الباقية ما عندها شغلة يمسك الجالية زيد ولا عبيد ..ناس شايفة اشغالها وبتعيش ايامها مع الغربة ومشاكلها ..
العلى اصابع اليد الواحدة ديل بعضهم عاوزين ينقلوا احباطات الوطن لينا هنا ..
عشان كدة الحوثيين ديل من الطرفين ما حبابهم ..
| Quote: عادل انت والظلامى ما اشوفكم تجونا حايمين |
هاها..افو آ ود عمي بتابى الضيوف؟
بالنسبة لي انا شخصيا لدي اصدقاء واحباء هنا وهناك .. وبلاقيهم في العيد اطايبهم في السفارة والمركز الثقافي ونادي الغزال ..
ومن زمان بعيد اولا بالسفارة والمركز وبعدين بمشي نادي الغزال ..
وحينما كنا بنمشي نادي الغزال كان في ناس ما فكروا يجوا الدوحة .. يا حليل الدوحة زمان.. وانتا عارفها..
وحينما كنت احرر صفحة السودان بالشرق بجيب الخبر واحد : السودانيين يتبادلون تهاني العيد في السفارة ونادي الغزال وبجيب صورتين ..من هنا ومن هناك..
وكنت بفضل الله اول واحد يدعوا لمعايدة واحدة .. وكتبت بذلك في جريدة الشرق .. ولا زلت من دعاة التكاتف والتعاضد بين السودانيين بالدوحة..
الجماعة بتاعين السياسة يقولوا ما يشاءون ..
الان .. وقد تبدل الحال .. واصبحت الجالية تحكمها صراعات سياسية .. فان الناس مخيرة في اختياراتها :
العاوز من السودانييين والسودانيات يمشي المركز الثقافي والسفارة وبس اهلا وسهلا..
العاوز يمشي نادي الغزال وبس اهلا وسهلا..
والعاوز يمشي ليهم الاتنين برضو اهلا وسهلا ..وانا منهم..
والعاوز يقعد في بيتو يستقبل ضيوفو ولا يلتئم مع اسرته الممتدة برضو اهلا وسهلا.. والعاوز يعيد في الحدائق والمتنزهات برضو اهلا وسهلا..
في الحياة فسحة اخي بدر ..وفي العيد براحات لا تحدها الحدود.. ونحنا بقيتا كتار 45 الف ..
زمان كانوا اولاد اربجي كلهم بالدوحة بعيدوا في حتة واحدة ..هسة باقيليك بقدروا يعيدوا في حتة واحدة؟
ابقى المهم الناس تتلاقى وتتطايب .. وين مامهم .. المهم تطيب النفوس ..اما سبابة السياسة فلنتركهم في معاركهم يعمهون..
لك تحياتي
|
Post: #9
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 07:04 AM
Parent: #8
Quote:
حضور باذن الله ..أخي عادل.
تخريمة.لو عندك شواية زايدة كلمني ههههه
ودي واحترامي |
حباب يا حسين ومشتاقين
بالله رتبوا لينا رحلة في كورنيش الخور نجيكم مع الاولاد واخونا حسام عامر واولاده والاصحاب..
الشوايات راقدة.. بس اوعا الشربوت القوي ..هاها
تحياتي
|
Post: #10
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: مصطفى البشارى
Date: 09-30-2014, 07:13 AM
Parent: #8
الاخوان عادل وبدر الدين الامير
السلام عليكما ..
| Quote: الالاف المؤلفة الباقية ما عندها شغلة يمسك الجالية زيد ولا عبيد |
انا واحد من هؤلاء ..
يهمنى ان التقي كل سودانى من الـ45 الف ديل .. واعيَد عليهو واقالدو .. واقول ليهو كل سنة وانت طيب ..
| Quote: وكنت بفضل الله اول واحد يدعوا لمعايدة واحدة .. ولا زلت من دعاة التكاتف والتعاضد بين السودانيين بالدوحة.. |
والله العظيم لو النفوس اتصافت الشغلة دى اصلا ما صعبة ..
ربنا يجمع شمل السودانيين فى الدوحة - على الاقل - على كلمة سواء ..
اللهم آمييين ..
|
Post: #11
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 08:15 AM
Parent: #10
Quote:
والله العظيم لو النفوس اتصافت الشغلة دى اصلا ما صعبة ..
|
تحياتي يا بشاري
فعلا لو طابت النفوس لاحتفل الجميع في صعيد واحد..
تحياتي
|
Post: #12
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:30 PM
Parent: #11
المركز الثقافي السوداني
بيت كل السودانيين
|
Post: #13
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:36 PM
Parent: #12
احد فعاليات التلاقي الشعبي القطري السوداني بالمركز الثقافي
|
Post: #14
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:37 PM
Parent: #13
|
Post: #15
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:42 PM
Parent: #14
يكاد لا يمر يوم من ايام شهر رمضان الا ونجد افطارا جماعيا بالمركز الثقافي ..
والصورمن افطار صفحة الفعاليات "فعاليات السودانيين بالدوحة بالفيس بوك" في حوش المركز .. وقد حضره المئات .. وكان البساط احمديا..
جعل الله السودانيين جميعا متآلفين ..
|
Post: #16
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:51 PM
Parent: #15
مسرحية النظام يريد بالدوحة.. تحت رعاية وترتيب المركز الثقافي ..
|
Post: #17
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 06:56 PM
Parent: #16
من انشطة المركز الثقافية ..
|
Post: #18
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 09-30-2014, 07:06 PM
Parent: #17
الموسيقار الكبير بشير عباس ..والكاتب المبدع عضو المنبر حبيب نورة .. شرفا المركز الثقافي ..
|
Post: #19
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: عادل ابراهيم احمد
Date: 10-02-2014, 06:57 AM
Parent: #18
اعاد الله العيد على الجميع بالخيرات والبركات
اللهم امين
|
Post: #20
Title: Re: معايدة السفارة والمركز الثقافي والجالية السودانية بالدوحة السادسة مساء اول ايام العيد السعيد
Author: بدر الدين الأمير
Date: 10-03-2014, 08:22 PM
Parent: #19
Quote: المركز الثقافي السوداني
بيت كل السودانيين |
بل بيت الكيزان والموالين لهم
وبعدين اصلا هو مركز ثقافى
قدم شنو للتعريف بالثقافات السودانية وتنوعها للسودانين ناهيك عن الاخرين
وهل المحتلين له بازرع السفارة قرو الاتفاقية الثقافية بين السودان وقطر التى
اسس على اثرها هذا المركز وفي المخلاية الكثير عن الذهنية التى يدار بها المركز
وتفاصيل ماحدث ويحدث في المركز المسمى مجازا ثقافى سودانى
|
|
|