السادة خبراء الاراضي .. المندرة حقيقة ام خيال؟؟؟؟

بحكم قربها من المطار تلقى اراضي المندرة رواج شديد وسط المواطنين وتترواح اسعارها الان بين 15الى 30 الف جنيه حسب المربع
دايرين فتوى من خبراء الاراضي بالمنبر حول توقعاتهم لمستقبل المندرة وهل تستحق هذا الزخم الذي يحيط بها الان ؟؟

فوق

عزيزنا عبدالله
سلامات
ذكرتني مسلسل ما بعد الانتفاضة .
مسلسل محاكمة اللواء عمر محمد الطيب .
القاضي سأل الشاهد : أنت كنت سفروك لندن تشرف علي رسم خرأئط المطار الجديد ؟
نعم .
والمطار قالوليك حيكون في منطقة الحاج يوسف ؟
نعم .
وتفتكر المطار ده كان حقيقة أم خيال ؟
كان خيال .
........
يا عبدالله يا عزيزي ياخ مافي حاجة أتبدلت .. كلو خيال في خيال

المندرة أضحت حقيقة واقعة و الناس واقعة فيها بثقلهم فيبدو بعد غرق المطار في الشهر الفائت أنه لا محالة قائم

اخونا عبدالله سلامات

اولا اخوي هل هنالك مطار بالفعل

فالنفرض جدلا على انه بالفعل سيتم انشاء مطار

متى تتوقع او يتوقع الخبراء سيتم الانتهاء من هذا المطار

مع العلم بأنه لا ميذانية له و الدولة لا تملك مالا لانشائه ولا جهة ممولة له

واقعيا لا يمكن انشاء مطار لمدة خمسين عاما في ظل هذا الوضع

وعليك بعد ذلك ان تحكم ان كانت المندرة خيالا ام واقعا

وكل ما راهن عليه السماسرة هو المطار ودون ذلك فالصحراء جرداء

شكرا لكل الذين عبروا من هنا ...
وما زالت المندرة تتأرجح بين الحقيقة والخيال ....
وفي انتظار رأي البقية

لاتدفع اكثر من خمسة مليون قديم لهكذا مناطق فهي ستاخذ زمن طويل للتعنير .....................
اتذكر نفس الاشاعة كانت علي ايام الوادي الاخضر ....................حتي جهاز المغتربين دخل كبائع

اخونا / عبد الله
سلام
انا ما خبير في الاراضي لكن كل المساحات الخصصتها الدولة كسكن ليها رواج بغض النظر عن مكانها
حاليا لانو مافي انتاج في الدولة كل الاموال اتجهت الي الاراضي سواء الزراعية او السكنية
المندرة ليست استثناء لكن السعر الانت كاتبو شوبة كتير لانو اسعارها ما بتتجاوز العشرة
اضف الي ذلك انها تتبع لولاية النيل الابيض و ليس الخرطوم و اجراءات تسجيها و تحويل ملكيتها عقيمة جدا و ممللة و مكلفة اكتر من سعرها
ومن ناحية مستقبلية برضو ما شيف ليها فائدة بخلاف انها جوار المطار الفي رحم الغيب
الموضوع بذكرني الدلالة بتاعت العربات ، العربية تكون كويسة و فخم لكنها رخيصة واحدة تانية جقروتة و تعبانة تكون اغلي منها
و السبب السماسرة البقولو ليك السوق داير كده
فدحين و الله اعلم في سماسرة او سمسار داير كده
تحياتي

شكرا للجميع

الشكر لك اخي عبد الله وانا ايضا اود ان اعرف عنها قبل ان اتورط مع المتورطين فقد عرضت على بعض القطع هناك ,, فارجو من الاخوه الزملاء ان لا يبخلو علينا بارائهم ومشورتهم ..

تحياتي : ياسر العيلفون

يقال ان الكثيرين من يحملون شهادات بحث لهذه القطع و جدت ايضا مملوكة لاخرين ويحملون ايضا شهات بحث بملكيتها

و يقال هنالك الكثير من المنازعات حول ملكيتها امام المحاكم

شكرا اخونا عبدالله كنت على وشك انزل بوست فى نفس الموضوع
قال لى احد اقربائى بمجرد ما تدفع المبلغ يسلموك شهادة بحث مباشرة
وقال لى اراضى درجة اولى انا ما عارف درجة اولى دى من يحددها
الحكومة ولا مقدرة المالكين فى بناء مبانى راقية تستحق تسمية درجة اولى
ارجو من الاخوة من لديه معلومات بالتفصيل يدينا ليه قبل ما نتورض تانى مرة
هههههههه انا اتورطت اكتر من مرة . اذكر قبل سنوات كنا فى السعودية
جونا بتاع اراضى و عرضوا لينا قطع سكنية وزراعية قالوها فاخرة من شدة اقبال الناس
دفعنا الفلوس بواسطة كمان واستلمنا ايصالات ووعدونا بتسلم شهادات بحث خلال ايام
مرت عشرون سنة ونحن منتظرين منا من قضى نحبة ومنا من ينتظر ولم يحصل شئ

سلام لصاحب البوست والاخوة المتداخلين...


سؤال في نفس المنحنى..

ماذا عن اراضي السمرا حاج الطاهر..وهي تقريبا في نفس المنطقة..
لكن بحيازة وليس شهادة بحث..عرضو علي قطعة شبه مسورة 500 متر ب 20000 الف
مع العلم ان المنطقة مأهولة وتووجد بها كهرباء وعلى ما أعقد مياه ايضا..
أفيدونا ولا نقع المندرة؟؟

انا غايتو اشتريت فيها بحمد الله اذا الحظ ضرب و قام المطار معناها ربنا كاتب لينا نغني...لكن حسب الردمية و اليافطات المطار قائم هنالك و علي مرمي حجر منها

أخي عبد الله.

أنا اشتريت فيها قطعتين بحساب الواحدة 13 الف جنية (بالجديد)..بواسطة صديق في السودان.
ولما سافرت اجازة الي السودان لاستلام شهادة البحث وشهادة المبايعة ..وجدت المبايعة كانت بيني وبين ناس الاراضي بقيمة 5 ألف جنية فقط.

وذهبت لناس الاراضي للاطمئنان ووجدت الاراضي ملك لي وباسمي ..بس المحيرني حتي الان ال16 ألف جنية مشت وين؟.

ربنا يكضب الشينة اخي عبد الله (مستقبل المندرة ح يكون نفس مستقبل الوادي الاخضر).

لك احترامي

أنا مشتري فيها ومعي مجموعة من الزملاء 500م في مربع 6 واستلمنا شهادة البحث مع العقد وكل شي.
كان هنالك خطأ في اسم جدي عند التسجيل، راجعت تسجيلات أراضي القطينة خلال اجازتي لطلب إفادة للمحكمة، استلمت الإفادة بكل سهولة- طلعت من الخرطوم 8:30 ص ورجعت 12 ومعي الورقة المطلوبة بالرغم من بدائية العمل في تسجيلات أراضي القطينة يعني لسه شغالين بالورقة والقلم ولم يلجوا عالم الكمبيوتر ولا الالة الكاتبة بعد، حتى الإفادة المطلوبة مكتوبة بخط اليد، بس الحق يقال الزول الكتب الافادة خطاااط.
الشاهد انه التسجيل صحيح 100%
والمطار قايم قايم ولو طار السفر
والمندرة
سمحة
المقدرة

المندرة دى وين يا جماعة ؟

حبال من غير بـقر

سلامات

زمان في جبل غرب جبل أولياء بيودوا ليهو طلبة الخدمة الإلزامية والدفاع الشعبي
لي ضرب النار إسمو جبل المندرة!! غايتو لو ده المكان المقصود يبقى الله يعوض بس
منطقة خلوية لا خدمات لا مميزات وفي سقط لقط وأى قطعة أرض في قرية فيها مدرسة
وموية وكهرباء أفضل منها عشرات المرات.
الناس الشافوا سندس وبعرفوها كويس لو قطعة الأرض في المندرة بي 10 ألف مفترض
نفس قطعة الأرض في سندس وفى أطراف المشروع تكون بما ل يقل عن 300 الف رغم
إنو الأتنين خلاء سااااى.

غايتو ال10 الف لو ضاعت ما مشكلة لكن توصل 20 و 30 تبقى مقلب عدييل.

شكرا لكل الذين عبروا من هنا ....
وفي انتظار مذيد من الاراء

Quote: الشكر لك اخي عبد الله وانا ايضا اود ان اعرف عنها قبل ان اتورط مع المتورطين فقد عرضت على بعض القطع هناك ,, فارجو من الاخوه الزملاء ان لا يبخلو علينا بارائهم ومشورتهم .. تحياتي : ياسر العيلفون

الأخ ياسر تحياتي
حسب الواقع فإن دخول الخدمات للمخططات الجديدة بطئ جداً ويستغرق وقتاً طويلاً وعلى سبيل المثال مربعات البقعة بأم درمان أبو سعد
تم توزيعها على المغتربين منذ العام 1992 وحتى الآن لم تدخلها الخدمات ( 22 عام بالتمام والكمال ) مع العلم أن موقعها قريب جداً من قلب
الخرطوم ناهيك عن المندرة التي تقع في صحراء جرداء بالنيل الأبيض وموضوع المطار الجديد يعتبر في رحم الغيب وعدم قيامه على الأقل خلال السنوات
القريبة القادمة المنظورة هو الأرجح .
على العموم الإستثمارفي مثل هذه الأراضي يكون طويل الأجل ويحتاج إلى نفس طويل وصبر لعشرات السنين بمعنى عندك قروش وليس لك بها حاجة ملحة
في الوقت الراهن فتشتري على أمل أن يستفيد منها الأبناء والأحفاد .

أي استثمار في الأراضي في السودان مبدئياً كويس للزول وللبلد خاصة على المدى البعيد

لكن المشكلة الكيزان ما عندهم مصداقية

وبيتلاعبوا في الحكم
وبيتاجروا باصدار القرارات
وبالمعلومات
ومافي شفافية ولا محاسبة

ود نوع من المخاطر عالي جدا

الزول المستثمر بيتحملوا على اساس معرفتو بأن الربح أو الخسارة حتكون عالية
بناء على صدق المعلومة أو كذبها

وفي سوابق كثيرة جدا جدا على مشاريع أراضي ضرو فيها الناس ضرر كبير وأكلوا حقوقهم
########وا شقى عمرهم

والمؤمن كيس فطن

لذلك يفضل الزول يستثمر فيهو بما لا يتجاوز 25% من رأسمالو

عموماً زي ما قلت أي استثمار في الأراضي في السودان مبدئياً كويس للزول وللبلد
ولو ما نفعك بينفع اولادك أو اولاد أولادك بشرط ما تبيع

البكماء لا بتاكل ولا بتشرب
التعديل للتلخيص

Quote: أنا اشتريت فيها قطعتين بحساب الواحدة 13 الف جنية (بالجديد)..بواسطة صديق في السودان. ولما سافرت اجازة الي السودان لاستلام شهادة البحث وشهادة المبايعة ..وجدت المبايعة كانت بيني وبين ناس الاراضي بقيمة 5 ألف جنية فقط. وذهبت لناس الاراضي للاطمئنان ووجدت الاراضي ملك لي وباسمي ..بس المحيرني حتي الان ال16 ألف جنية مشت وين؟

الحمدلله القطعتين باسمك
اما فرق المبلغ بتكون تسهيلات وكدا
يعني الصديق طلع صادق ولو طمع شوية
هناك تجارب أخرى لا ورق ولا شهادة بحث ولا يحزنون
=-=
شكراً للاخ صاحب البوست

Quote: [المندرة دى وين يا جماعة ؟

جنب المطار الجديد في أمدرمان :)
كل كوكب الأرض يتجنب السكن بجوار المطارات الا في السودان :) :) !!
و ذلك بسبب الإزعاج و المخاطر من الحوادث المرتبطة بالمطارات
و لذلك تنشأ المطارات الحديثة بعيداً جداً عن المناطق السكنية
ولكن الناس عايزة تمشي للمطار أينما كان :)
ودلة كلو من جهل ما يسمي بسماسرة الأراضي
و هي وظيفة لا مؤهلات لها و كل من هب ودي يعمل بها :)
بلد عجيب !!

ما تضيعوا الفرصة ...اوصيكم بالشراء فيها فورا.. وشكرا

ود الباوقة ... اشك انك سمسار في المندرة دي ... ولا شنو

أبشركم بظهور مخطط جديد اسمو (رياض المستقبل)..برضو قالو جنب المطار الجديد...مساحة القطعة بين 300 متر الى 400 متر.

المخططات بقت هبطرش في السودان .

المندرة دي مش بعدها مخطط الصفوة (سكن اقتصادي وشعبي ) وفي طريقك لمسلخ صلاح ادريس

فوووووووق

ابتدعت ولاية النيل الأبيض أسلوب إسمه الأرض مقابل التنمية.
بمعنى أن الولاية لا تملك قدرات مالية ولسد العجز قامت بطرح مخططات سكنية في منطقة المندرة وبعض الأراضي الزراعية في مختلف مناطق الولاية على سبيل المثال منطقة القطينة وما جاورها.
نشط السماسرة في الترويج لمخطط المندرة بحكم أنه قريب من المطار الجديد.. ولكن متى سيتم انشاء المطار العلم عند الله وحده.
كان سعر القطعة السكنية الـ 500 متر في بداية الترويج للمخطط السكني لا يتجاوز الـ 3 ألف جنيه بالجديد، أي ثلاثة مليون بالقديم.

لا توجد ميزة واضحة للمخطط اللهم إلا قربه من المطار الجديد وهو أمر في رحم الغيب.
المناطق المجاورة للمخطط تعاني من انعدام الخدمات الأساسية والضرورية.. أي أن المخطط لا يوجد فيه مميزات أخرى غير ميزة قربه الجغرافي من المطار.

المخطط طبعاً يتبع لولاية النيل الأبيض، وأيضا قريب من حدود ولايتي الخرطوم وشمال كردفان.

..
..
إذا أراد شخص أن يستثمر استثمار طويل المدى لربع قرن أو خمسين سنة عليه بالشراء.. أما اذا كان الشراء بغرض السكن في الوقت القريب فلا أنصحه.. لأن توصيل الخدمات سيستغرق أقل شئ ربع قرن من الزمان وذلك بحساب وتيرة التنمية الحالية.. الدليل على ذلك أن خط النيل الغربي له أكثر من ربع قرن لم يتجاوز حدود ولاية الخرطوم في إتجاه النيل الأبيض.. وهو طريق حيوي وهام فما بالك بتقديم خدمات في مخطط سكني.

..
..
ملاحظة أخيرة
الأسعار الرائجة الآن غير حقيقية لذا يجب الإنتباه من السماسرة.

قبل الخروج:
ود البلة انت زول من كوستي وناس الولاية على مرمى حجر منك امشي شوف الحاصل وتعال بالنجيضة.

المنطقة من ناحية اوراق وشهادات بحث وعقود صحيحة
تختلف الاسعار من مربع الي آخر
مربع 2 افيه 900 قطعة اشترته نقابة العاملين بالضرائب انا اشتؤيت منهم بسعر 19ونص استلمت الاوراق فوراً الكلام شهر ابريل الآن نفس القطعة دفعوا لي فيها 35

اين تقع المندرة فى ولاية الخرطوم ام ولاية النيل الابيض

كانت تتبع للخرطوم
الآن تتبع للنيل الابيض محافظة القطينة

غايتو بعد الاعلان البتجيبوهو في قناة النيل الازرق ده بيكون الاعمى شايل المكسر غايتو ان شا الله نلحق لينا قطعة قطعتين ..
ماولنا في انتظار مزيد من الاراء اخوتي فلا تبخلو علينا ..

تحياتي : ياسر العيلفون

فووووووق