فيديو خطير جدا : مداهمة مصنع زيوت فاسدة ، كارثة حقيقية في الخرطوم

.....


.....

في جرايد الليلة الصباح (الثلاثاء 16 سبتمبر 2014) لقيت خبر منشور في اغلب الجرايد ..
الخبر بتكلم عن ضبط (مصنع عشوائي) للزيوت في منطقة بحري .... الى اخر الخبر
حقيقة ما وقفت كتير في الموضوع دا لانو زي الاخبار دي اتكررت وبقت حاجة عادية
لكن في نص اليوم ، رسلو لي الفيديو بتاع الضبط بتاع المصنع دا ..
حقيقة حاجة مؤلمة وبشعة للغاية ..
اصلا ما اتخيلت انو الانسان السوداني اخلاقو تكون اتدنت للدرجة دي..
دا ما مصنع زيت ... دا مصنع سموم وممكن نعتبرو واحد من الاسباب المباشرة لانتشار السرطان في السودان عشان تاني ما نقول ليه السرطانات دي منتشرة كده !
الناس ديل حسب الوقائع بجيبو الزيوت الراجعة من المطاعم والمصانع وغيرها من القاذورات ، وبخلطوها مع مواد فاسدة تانية وبعيدو تعبئتها في جركانات وبوزعوها للمحلات .. والمواطن المسكين يشتري السم
يا جماعة ، الكلام دا لو كان في الصين الكافرة الشيوعية كان الناس ديل اعدموهم ... طيب ياخي ليه المواطن السوداني كرامتو منتهكة للدرجة دي ؟؟
ليه الناس اخلاقها اتدنت للدرجة دي ؟ ليه القوانين ما قاعدة تردع الناس ؟؟
طبعا كلامي دا ما حيكون عندو معنى مباشر الا لمن تشوفو الفيديو ... الفيديو بشع والله ...

.....


...

http://youtu.be/zITGnq7Eio4http://youtu.be/zITGnq7Eio4

ابشرك يا استاذ وائل دا غيض من فيض
بناءا على ما يتواتر من انباء وما يتكشف من مخالفات فالمؤكد ان ماخفي اعظم حيث الاسواق تضربها الفوضى والحاجة تدفع المواطنيين للبحث عن الارخص بل هناك من يعرف ان السلعة منتهية الصلاحية وتدفعه الحاجة لشرائها
هذا اذا ما غضضنا الطرف عن السلع المتداولة وهي تفتقر لظروف التخزين والنقل الملائمة
المسؤولية الاولى والاخيرة على عاتق الكيزان

متوائم مع لحم الحمير يا وائل

ههه
مع لحم الحمير والزيت ده والمبيدات

تاني فطور تسالي
غدا دوم
عشاء نبق

Quote: تاني فطور تسالي

البطيخ مزروع بموية الصرف
البطيخة لو قلت تخبطها عشان تجسها نجيضة والا ما نجيضة تقول ليك: إحم ... إحم

مهدي وناصر وايمن ، لو قاعدين في البلد دي اعملو حسابكم يا شباب :)
بعد قصة لحوم الحمير قلنا انو الفول اضمن حاجة ممكن الواحد ياكلها في الخرطوم ،
الجماعة يزبطو صحن الفول وكل مرة يناولو الصحن لبتاع الدكان : هاك زيد الزيت دا شوية ....
المساكين ما عارفين الحاصل :)
غايتو تاني الواحد الا ياكل في خاطرو :)

السلام عليكم ورحمة الله
والله يا وائل الفيديو دا ما تتخيل مزعلنى قدر شنو
يا خى دى جريمة لا تقل عن جرائم الابادة الجماعية
وانا مستغرب حقيقة الناس ديل لما كانو بصوروا فيهم لى شنو ما كانو م######شنهم ؟
مما مكن عادى راس الحية بتاع الشغلانة دى يقوم يهرب !

فعلا يا ياوسف ، فيديو مثير للغثيان .
المشكلة انو القوانين غير رادعة..
يعني الحكاية اقرب لكشات ناس البلدية والصحة ،
انا حأتابع اخبار القصة دي ، عشان نشوف الحكم حيكون فيها كيف؟

Quote: .... الجماعة يزبطو صحن الفول وكل مرة يناولو الصحن لبتاع الدكان : هاك زيد الزيت دا شوية ....

الزيت القاتل ده في الفول ياوائل بكون واضح لأنه الناس تعودت على زيت الفول وطعمه لا يغباهم.. ولو كان شغال في الفول من زمان كان ضبط من زمان كمان..

الوجع الحقيقي يا وائل في الطعمية البتتاكل فطور، غداء وعشاء والناس بتمرر أي طعم غريب فيها بإعتقاد أن الزيت قديم، وهي ما جايبة خبر ساكت.

Quote: المشكلة انو القوانين غير رادعة..

الإعدام في الطرقات العامة للناس ديل وأمثالهم والمتحفظ عليهم.. أقل ما يستحقون..

كسرة.. الزيت يا وائل في ذلك الزمن النضيف كانو بحشو لينا بيهو للمدرسة، حشوة زيت حافي.. وناكل مبسوطين ومطمئنين..

تحياتي..

نطالب باعدام هولاء جميعا وصلبهم فى ميدان عام

تحياتي اخي وائل؛؛
فيديو مؤسف..

الفكرة ماخودة من الصينيين...




ياناصر قلت لي الفطور شنو؟
تحياتي؛؛؛

made in china
بكرة ح نسمع استيراد الزيت الراجع من الصين

كلامك صحيح الطيب عبد الرحيم ، فعلا طعم الزيت في الفول لو متغير بيكون واضح..
الطعمية دي مشكلة براها ، غير كارثة المصنع دا ، كتي من محلات الطعمية بتستعمل الزيت للتحمير اكتر من مرة ، ودا المختصين قالوا بيعمل سرطان :(
غير كده، انا مرة واحد من العاملين في المجال الطبي كلمني عن دراسة عملوها على الطعمية ، لقو فيها بلاوي من الميكروبات ، باسباب كتيره
المشكلة مركبة : الناس ما واعية لصحتها ، يعني الناس بمشوا براااهم ياكلو الاكل الما مطابق لابسط الشروط الصحية ، وبعدين يقولو ليك المرض والسرطانوالمستشفيات تعباة والحكومة كعبة ..
المشكلة بتبد من المستهلك ، لانو لو اي واحد اصر ياخد المنتج السليم حيقلل الفرصة لوجود منتجات فاسدة
....

الاعدام دا عقوبة بعيدة المنال في القوانين الحالية يا سيدأحمد ...
كتير من الجرائم الكبيرة والمضرة بالبشر ، اكتر العقوبات فيها سجن شهر شهرين ، دا لو ماكنت غرامة ومصادرة بس

الغريبة يا دكتور بشير الصينيين ديل بالذات متشددين في قصة الفساد من النوع دا ، في اخبار كتيره عن اعدام اصحاب المصانع الفاسدة في الصين ...
لكن طبعا دا ما بمنع الصينيين نفسهم من تصدير المنتجات الضاربة للسودان والبلدان التعبانة / لأنهم عارفين ما فيها مواصفات واشتراطات صارمة زي الدول البتحترم البشر الفيها ..

تحياتى للجميع ..

بالفعل وصلنى هذا المقطع عبر الواتس اب .. قبل انزاله هنا .. وحقيقة مقطع مرعب جدا ..
وهذا بحساب ان ما خفى كان اعظم .. ويجب ان يتم التشهير بهذا المقطع حتى ينتبه الجميع الى خطورة ما يدسه لهم عديمى الضمير ..
امثال من سولت لهم انفسهم المريضة ايذاء البشر بمثل هذه الافاعيل .. ومثل هؤلاء يجب ان يتم معاقبتهم العقاب الذى يليق وهذا الجرم الفظيع ..
اتمنى ان ينال هذا المقطع حقه الكافى لما فيه من تنبيه ولما فيه من عظة للجميع ..

لا حول ولا قوة الا بالله ..

وائل فحل ،

...

سـلام ،
الموضوع دا قديم خالص ،
ليهو أكثر من كم سنة ،
اكرر الموضوع أكل عليه الدهر وتقيأ ،
بعرف دكتور ياسر شخصياً ،
يا جماعة دي مشكلة المعارضة ،
عدم المصداقية ،
تسلم الغالي ،
،،،،،،،

...

Quote: في جرايد الليلة الصباح (الثلاثاء 16 سبتمبر 2014) لقيت خبر منشور في اغلب الجرايد .. الخبر بتكلم عن ضبط (مصنع عشوائي) للزيوت في منطقة بحري .... الى اخر الخبر حقيقة ما وقفت كتير في الموضوع دا لانو زي الاخبار دي اتكررت وبقت حاجة عادية لكن في نص اليوم ، رسلو لي الفيديو بتاع الضبط بتاع المصنع دا .. حقيقة حاجة مؤلمة وبشعة للغاية .. اصلا ما اتخيلت انو الانسان السوداني اخلاقو تكون اتدنت للدرجة دي.. دا ما مصنع زيت ... دا مصنع سموم وممكن نعتبرو واحد من الاسباب المباشرة لانتشار السرطان في السودان عشان تاني ما نقول ليه السرطانات دي منتشرة كده ! الناس ديل حسب الوقائع بجيبو الزيوت الراجعة من المطاعم والمصانع وغيرها من القاذورات ، وبخلطوها مع مواد فاسدة تانية وبعيدو تعبئتها في جركانات وبوزعوها للمحلات .. والمواطن المسكين يشتري السم يا جماعة ، الكلام دا لو كان في الصين الكافرة الشيوعية كان الناس ديل اعدموهم ... طيب ياخي ليه المواطن السوداني كرامتو منتهكة للدرجة دي ؟؟ ليه الناس اخلاقها اتدنت للدرجة دي ؟ ليه القوانين ما قاعدة تردع الناس ؟؟ طبعا كلامي دا ما حيكون عندو معنى مباشر الا لمن تشوفو الفيديو ... الفيديو بشع والله ... وائل فحل ،،،، ...

عزالدين عباس الفحل
ابوظبي
...

فعلا نشر الموضوع لتوعية الناس مهم يا علي الخير ... لانو اصلا العقوبات ضعيفة

..

يا عز الدين عباس الفحل : الموضوع ما قديم .. الموضوع جديد (الضبط تم اول امس الاثنين الموافق 15 سبتمبر 2014 في منطقة بحري ) ، وانا بعد مداخلتك دي اتصلت بدكتور ياسر ميرغني واكد لي ذلك ... دا غير انو المعلومات انا ما اخدتها من الجرايد ، الجرايد اشارت للخبر بس. ( مع ملاحظة انو الناس ديل الظاهر كانو شغالين ليهم زمن بس تم ضبطهم يوم 15 سبتمبر)
الموضوع لا علاقة له بالمعارضة او السياسة ، الموضوع يخص صحتك انت - المواطن السوداني - ولا مجال للاستغلال السياسي او المعارضة هنا ..
(عليه ارجو تعديل مداخلتك اعلاه )
......

تحياتى اخى وائل ..

Quote: الموضوع لا علاقة له بالمعارضة او السياسة ، الموضوع يخص صحتك انت - المواطن السوداني - ولا مجال للاستغلال السياسي او المعارضة هنا ..

لا تعليق ..

اسمح لي يا اخ وائل ان الموضوع لا علاقة له سوى بالسياسة وجمعية حماية المستهلك السودانية دائما تجأر بالشكوى من الفوضى التي تضرب باطنابها الاسواق مع تقاعس الحكومة والجهات الرسمية في القيام بدورها
مع تراخي وفشل الكيزان السودان اصبحا مكبا للسلع المسرطنة والرديئة والفاسدة اما المواطن المسكين فهو مدفوع دفعا تحت وطأة العوز لشراء السلع التي تفتقر لأبسط القواعدالمتعلقة بشروط سلامة المنتجات الغذائية

شكرا يا وائل
الجماعة ديل الاعدام شوية عليهم

تحياتى ..
اخى بكرى .. فعلا الامر خطير جدا .. وان لم يكن هذا الحدث فى حد ذاته صدمتنا خطورته فقط لانه تم الكشف عنه ..
فبالتاكيد ما كان خافيا هو الاعظم ..
يبدو ان هذا المصنع كان يعمل على الاقل لعدة سنوات بهذه الطريقة .. ويبدو انه قد سوق مئات العبوات من هذا الزيت الفاسد .. ولا شك ان هناك المئات ممن تناولوا هذا الزيت وهم لا يعلمون
وبالتاكيد هم على موعد مع امرض سرطانيه وصرف علاجى مفزع .. وطالما هذا الامر بهذا الرعب .. فلما لا يرفع هذا البوست عاليا ولاطول مده من الزمن حتى ينتبه الناس وينتبه اهلنا البسطاء ماذا
يخبى لهم عديمى الرحمة والانسانية ..
امل ان يصبح هذا الحدث قضية راى عام من الدرجة الاولى ...

اللهم نسالك اللطف بعبادك ..

Quote: تمكنت الشرطة الامنية ولاية الخرطوم من ضبط مصنع يقوم بتصنيع زيوت الطعام الفاسدة بمنطقة ام درمان الثورة الحارة (54) تديره امرأة.ويعد هذا المصنع الثاني الذي يتم ضبطه بتصنيع الزيوت الفاسدة خلال اسبوع.وتم ضبط عدد (10) براميل حديد بها آثار مخلفات الزيت (المنتج) وعدد (4) جركانة و (5) جرادل بلاستيك فارغة تستخدم في عملية التعبئة عدد (1) صبابة وربع جوال ملح لتكرار الزيت وتم اقتياد المتهمة التي تقوم بادارة المصنع للتحقيق. وافادت متابعات (آخر لحظة)ان الضبطية تأتي في اطار الجهود التي ظلت تبذلها الشرطة الامنية والتي حققت من خلالها عدداً من الانجازات. وتم فتح بلاغ في مواجهة المتهمة واتخاذ الاجراءات القانونية اللازمة ضدها.