ونسة ناموس

بوست مُهداء لصديقي عاشق الركاب، الدكتور البيطري المُعز ضوء البيت
الرِكاب هنا هي الهجن
الناموس دارجة خليجية تقال للفائز بسباق الهجن أو مزاينة الإبل
إستحقيت الناموس يعني استحقيت الفوز أو مُبارك الفوز
الناموس أبو سالم
الناموس أبوغنيم
الكُنية عند البدو مُهمة، وبعض الأسماء تقابلها كُنية جاهزة، مثلاً:
سالم هو أبو غنيم
سعيد هو أبو عسكور
راشد هو أبو سنيد
حمد هو أبو شهاب
إبراهيم معروف هو أبو خليل
حسن هو أبو علي

في بعضهم يسألك يقول ليك: شو اسم الولد؟ تقول ليهو: عُمر
يقول ليك: هلا أبو عُمر*
في نص الونسة يسألك تاني: شو اسمك؟ تقول ليهو: أبو بكر
يندهش
ــــــــــــــــــــــ
أشهر من تنادى بأبي عُمر في السودان هو غوث الزمان المكاشفي

الأتنين والتلات والربوع ح يكونن بداية حقيقية لموسم مركاض الهجن بدُرّة ميادين السباق بالمرموم أو الليسلي العاصمة البدوية لإمارة دبي.

ستين شوط لسن الحقاقة واللقايا، والحق أو الحقة هو القعود أو البكرة الأكملت سنتين، واللقية أكملت ثلاث.
جوائز الأشواط الستين هي عربات range rover 2014

بزنس سباقات الهجن بزنس كبير جداً تتعايش عليه آلاف الأسر الوافدة وأصحاب الدار

داير في البوست ألقي على العالم دا نظرة من زوايا متعددة
معظم الصور ح تكون صورة حيّة بكاميرا الفنان أبوبكر عباس

سم طال عمرك منتظرين باقي الهرجة

الهرجة والرمسة، أجمل ناس يا مسلمي في الونسة هم بدو الإمارات والسعودية
تعرف يا مسلمي، لو لقيت فرصة أملص توب الأدب السوداني؛ وحات سيدي الحسن، أونسكم بونسة البدو الحقيقية الممتعة، تاني يوم تلقى دينق قالد هاشم الإمام بالمنبر!!
واحدة من أكبر التعقيدات السودانية هي انو نحن وخاصة الذكور عندنا شخصتين ونستين، هم عندهم شخصية واحدة والونسة دي أصلا ما بشوفوها عيب

المهم كدي هسع بونسكم عن الهجن

البوست دا بجيهو يوم السبت، لو لقيتو مشى الصفحة التانية؛ بعمل بوست تاني

إشمعنا فلان؟ عندو ستين بوست بالأسبوع!

تأمرونا بشيء؟
في خاطركم شيء؟

تكون طالب البدوي مية درهم، تجيهو يقهويك وممكن يضبح ليك وفي الآخر وإتّا ماشي يقول ليك:
دكتور، في خاطرك شيء؟
بسرك تقول ليهو أديني قروشي بس، وبالجهر تقول ليهو: تسلم

Quote: الفنان أبوبكر عباس

انا بحب الصور .

Quote: لبوست دا بجيهو يوم السبت، لو لقيتو مشى الصفحة التانية؛ بعمل بوست تاني

نسلم ليك ليه في الصفحة دي يوم السبت صرة وخيت المافي شنو

موسم الركض ببدأ في سبتمبر بجميع ميادين السباق بالخليج، أشهر الميادين (الدورات) هي:
- ميدان المرموم بدبي ويطلق عليه دُرّة ميادين السباق
- ميدان الوثبة بأبي ظبي
- ميدان الشيحانية بالدوحة

تختلف مسافات السباق حسب السن وتبدأ ب1200 متر للفطامين (سن سنة) وتصل 8000 متر للحول و الزمول (أكبر من 5 سنوات) وهناك أيضاً مارثون يصل 20 كلم.

تعرف يا أبوبكر
أخوك الموقع أدناه من الناس الدهماء بالرغم من أنني لم أدهم أو أداهم ومن الغوغاء وما غوغيت قط أها لمن شفت الناموس تلك الحشرة التي أرقت منامنا وتمت الناقصة وساهرت بينا في الشاطئ وفي غيره بطنينها ولسعاتها بالرغم من أننا ربما نكون سبباً في نقل مرض حمى الملاريا لتلك الناموسة المسكينة فكل ما تبقى لنا من دماء بكرياتها الحمراء والبيضاء وما بينهما بالكاد تبقينا على قيد الحياة.
آسف أخي أبوبكر لهذه الهرجة غفد ظننت وكل ظنوني آثام أن الحضارة والعلم أزجت لنا أو كادت أن تفعل علاج فعال لمحاربة الناموس ذكوراً وإناثاً (قالوا الصورة في الناموس معكوسة فالطنان عادة الذكر والبتقرص الأنثي) لكن قرصتها والمعامل للتحليل وكورس الراجمات.
أكرر أسفي مرة أخرى على الدخول فالغاية تبرر الوسيلة هنا ، أها مسؤل من الخير إنت لمن يكون في سباقات زي كده ليه بيكون فيها جوائز مالية مش للمتسابقين بل للمشاهدين يتراهنون على فوز هذا الفرس أو ذاك البعير أليس في الأمر ريحة ميسر ، وفرق الموضوع شنو من عمليات المراهنات ولو كانت رياضية.
هنا رياضات كثيرة لا أجد متعة في مشاهدتها وإن كان ممارستها ممتعة للشخص الممارس.

أريام بكرة حِقّة حققت أحسن زمن باليوم الأول لمهرجان اليمامة للإبل المقام حالياً بالمرموم - دبي.

شوفو متعة إذاعة السباق
المتعة إنك تكون متابع للسباق من داخل السيارات المباريا للسباق

الفيديو:
http://www.youtube.com/watch?v=fQzFwhHDx2Ihttp://www.youtube.com/watch?v=fQzFwhHDx2I
يا الملا عمر، يا أخي، ميسر شنو؟ ونافخ الكير شنو؟ دا فايض أموال يتم توزيعها لأهل البلد ودي ناس تعدت حدود الرفاهية
ريحة ميسر آل!
الما عارف يقول: عدس

Lentils غايتو كتبتها بالعافية ومن الصعب أقولها بإعتبار أنني ما عارف شكراً على الرفاهية