Post: #1
Title: الأخطاء المطبعية في الأوراق الثبوتية ونتائجها
Author: حمد عبد الغفار عمر
Date: 08-20-2014, 11:10 AM
إلى كل بواليس المرور في السودان ..... ربنا ما يحرمكم مني ولا يحرمني منكم... وان شاء الله يا رب دايما في الشمس واقفين و لاصالاتكم لامين من الليلة مااااف اي حنك ...قااانوني بس تحت شعار ..
لا_إيصال_بعد_اليوم
و بحب أهدي الرخصة دي للسيد الرئيس راعي السواقة في السودان ...
18 سنة لا تكلمني
هذه هي فرحة بن أخي باستخراجه لرخصة قيادة
ولكن كتب فيها اسم الوالد عبد الغفار / عبد العفار
|
Post: #2
Title: Re: الود دا جنا ولا شنو
Author: مني عمسيب
Date: 08-20-2014, 11:14 AM
Parent: #1
لك التحية حمد .
ههههههههههههههههههههههه تصدق ذكرتني نكة راجل الجيران .
هههههههههههههههههه ان شاء الله تكون سمعتها .
ولي قدام .
|
Post: #3
Title: Re: الود دا جنا ولا شنو
Author: حمد عبد الغفار عمر
Date: 08-20-2014, 11:30 AM
Parent: #2
مرحب منى عمسيب
صاحب الرخصة دا بن شقيقي الأكبر ويمين أنا لسه قايل عمرو 13-14 سنة وهسة ما كلمتو بالبوست دا كمان يقوم يفتح فينا بلاغ
لكن شكلو السودان دا بقى كلو مساخيت ومساطيل بالفطرة
هسه شوفي جنس الهترشة المكتوبة فوق دي
نكتة راجل الجيران ما سمعتها
ارميها لينا عشان نكمل الضحك
|
Post: #4
Title: Re: الود دا جنا ولا شنو
Author: عبد العزيز محمد عمر
Date: 08-20-2014, 11:31 AM
Parent: #2
انا قلت الخطأ في كلمة ( عبد الغفار )
ارجع شوفها كاتبنها كيفن
الشغيل
|
Post: #5
Title: Re: الود دا جنا ولا شنو
Author: حمد عبد الغفار عمر
Date: 08-20-2014, 11:36 AM
Parent: #4
هلا عبد العزيز
لاحظت ليها
طبعا لازم يغلطوا الحلوييين ديل ونجيهم نحن بالأعذار
هو أصحابو في الفيسبوك عاملين فيها العجب بهناك
|
Post: #6
Title: Re: الود دا جنا ولا شنو
Author: معاوية المدير
Date: 08-20-2014, 11:56 AM
Parent: #5
غايتو العفار دي إلا كان نسعل
منها جمال الوالي...
|
Post: #7
Title: Re: الود دا جنا ولا شنو
Author: حمد عبد الغفار عمر
Date: 08-20-2014, 04:23 PM
Parent: #6
مرحبا ود المدير
يا خوي جمال الوالي فتواهو شفهية على الهواء مباشرة
دا إمتحان تحريري سقوط بامتياز
ياخ أحمد ربك الأسماء في السودان ما بتكتب بالإنجليزي كان بشتنة شديدة
---------------------------------------------
يا منى عمسيب النكتة اتذكرتها موش حقت الناس الولدن جاب 50 % وقعدوا يضربوا في الرصاص؟
هههههههههههههههههههههههههه ومال انتي قايلانا شنو نحن أهل العوض اصدقاء المزارع
|
Post: #8
Title: Re: الود دا جنا ولا شنو
Author: مصطفى البشارى
Date: 08-21-2014, 04:33 AM
Parent: #7
حمد وضيوفو .. سلامات
| Quote: ياخ أحمد ربك الأسماء في السودان ما بتكتب بالإنجليزي كان بشتنة شديدة |
وصدقاً لى كلامك ده يا حمد ..
انا مصور تلفزيونى .. عارف ترجموها فى الجواز بالانجليزى شنو ؟
photo tv
والله صحى ..
|
Post: #9
Title: Re: الود دا جنا ولا شنو
Author: حمد عبد الغفار عمر
Date: 08-21-2014, 10:11 AM
Parent: #8
هلا مصطفى البشاري
مبالغة لكن هسة لو مشيت ليهو بعد سنة قلت ليهو رجعها لي بالعربي ما حيعرف يكتب شنو
ما أجهد نفسو أبدا يسأل زول عن المعنى
أو على الأقل مفروض تكون عندهم قائمة جاهزة بترجمة المهن يستعينوا بيها للأوراق الرسمية والثبوتية
|
Post: #10
Title: Re: الود دا جنا ولا شنو
Author: الطيب الجاك
Date: 08-21-2014, 11:12 AM
Parent: #9
سلام و تحية ،،،
عارف الحل بسيط جداً و الكلام ده هم عارفينو لكن تقول شنو ،،،
يعني يتم ربط سجلات الرقم الوطني مع كل الإدارات في الشرطة ،،،
يتم تفعيل خاصية الإختيار من دروب داون لست أو بمجرد إدخال الموظف للرقم الوطني ، بدل ما يكتب الموظف الإسم كامل ،،،
و لو إسمك ما طلع مع الموظف معناتو ما عندك رقم وطني و بالتالي مفروض ما تكون قدمتا للرخصة أو الجواز أصلاً ،،،
و بعد داك أي فني شرطة قاعد علي أي جهاز ممكن يملأ كل البيانات من الدروب داون لست بدون إجتهاد منو ،،،
طبعاً بنفس الطريقة ممكن تكون في لستة بكل الوظائف المعروفة في السودان و يتم الإختيار منها باللغتين العربية و الإنجليزية ،،،
و إذا في وظيفة ما ظهرت للفني في اللستة ، يرجع الورق لمكتب الإدخال و هناك يكون في ناس مختصين يدخلو الوظيفة في اللستة و يعملو ابديت للـــ لستة ،،،
و للضمان بمجرد إختيار الفني للوظيفة باللغة العربية يظهر الحاسوب ما يقابلها باللغة الإنجليزية ،،،
و للجوازات القديمة يكون قدامو الــ لست و يختار منها أو يبحثا في الحاسوب وبعد داك يكتبا ،،،
لكن تقول شنو ،،، أهو نبقي في photo TV دي ،،،
الغريبة إنو الإدخال في سجلات الرقم الوطني يتم عن طريق دروب داون لست !!!
تحياتي ،،،
|
Post: #11
Title: Re: الود دا جنا ولا شنو
Author: khaleel
Date: 08-21-2014, 12:21 PM
Parent: #10
سلامات يا حمد
خلاص ود اخوك طلع الرخصة
رسل حق العربية بلاش تمسك في المواضيع الجانبية
ههههههههههههههههههههههه
|
Post: #12
Title: Re: الود دا جنا ولا شنو
Author: حمد عبد الغفار عمر
Date: 08-22-2014, 01:11 PM
Parent: #11
هلا الطيب الجاك
Quote: عارف الحل بسيط جداً و الكلام ده هم عارفينو لكن تقول شنو ،،،
يعني يتم ربط سجلات الرقم الوطني مع كل الإدارات في الشرطة ،،،
|
طبعا عارفنو بس المشكلة دائما هي النظرة التجارية والأمنية للأشياء مع إغفال الجانب الخدمي وتكامل الخدمات المقدمة
مفروض يكون لكل مواطن قاعدة بيانات تشمل ابسط معلومات شخصية على الأقل مسجلة بصورة صحيحة يتم استدعائها لتسجيل أي بيانات ليهو في مستند رسمي
لأنو اثبات الأسم الصحيح دا مرات ببقى مشكلة ويحتاج لحلف القسم وشهود ودا في داخل البلد ،ولكن في الخارج بيكون صعب جدا خصوصا إذا ارتبط بدعوى جنائية وتتطابق الاسم الخطأ مع اسم الفاعل الرسمي
دا غير مشاكل البنوك والحوالات
شكرا على التثقيف دا ياخ ليتهم يقرأوه
|
Post: #13
Title: Re: الود دا جنا ولا شنو
Author: حمد عبد الغفار عمر
Date: 08-22-2014, 01:33 PM
Parent: #12
هلا خليل
وحبابك
Quote: خلاص ود اخوك طلع الرخصة
رسل حق العربية بلاش تمسك في المواضيع الجانبية |
هل تصدق مهند دا بستاهل العربية ، لكن اليد الما طويلة دي نعمل ليها شنو
ياخ دا زول حبوب ولطيف بشكل ما تتخيلوا
لو شفتو في الفيسبوك بكتب كيف بسخرية عن الكورة والفن والسياسة حتحفظ صفحتو في المفضلة
ديل شباب قدروا يخرجوا من مستنقع الخراب الحاصل في البلددا بفكر مفتوح على جمال الحياة
يديك العافية وأولادك
|
Post: #14
Title: Re: الود دا جنا ولا شنو
Author: عبدالعزيز الفاضلابى
Date: 08-22-2014, 04:58 PM
Parent: #13
Quote: وصدقاً لى كلامك ده يا حمد ..
انا مصور تلفزيونى .. عارف ترجموها فى الجواز بالانجليزى شنو ؟
photo tv |
سلام سيد البوست وناسو
أخير من انجليزي اليمنيين
البيبي سِتر بتاعة ولادي جيت آخُدُن من عندها نزلتم تحت وزعلانة تهرج مع الولد سامعا من السلم وكت وصلت قلتلا الحاصل شنو؟
قالت لي:
خالد (ولدي) قد جزع الابواك ـ الابواك دي: جمع Book
مرة سألتني عن ام الاولاد عاوزة تعرف ما اذا كانت ماخدة اجازة اليوم ام لا, قالت لي:
امهم اليوم قد هيْ مَأوِّفا؟ يعني امهم اليوم ماخدا Off؟
|
Post: #15
Title: Re: الود دا جنا ولا شنو
Author: خالد حاكم
Date: 08-22-2014, 06:57 PM
Parent: #14
الاخ حمد وضيوفه
تحباتى
انت عارف يا حمد موضوع ود اخوك ده ذكرنى بقصة حقيقية حصلت من واحد قريبى فيلسوف كده , مرة قام مشى قابل ناظر مدرسة الاساس فى القرية فى مكتبه وقال ليه انا الليلة جايك لموضوع مهم جدا , الناظر قال ليه مرحب اها موضوعك شنو , قال ليه انا جائ اعلم تلاميذك اهمية النقطة .. الناظر سالو كيف يعنى ؟ قال ليه مثلا كلمة ( الشرطة ) لو ما اهتميت بنقاط حرف الشين والتاء المربوطة حتتقرئ ( السرطه ) ود اسم اسم زول وهكذا !
|
Post: #16
Title: Re: الود دا جنا ولا شنو
Author: عبدالعزيز الفاضلابى
Date: 08-22-2014, 08:32 PM
Parent: #15
| Quote: حصلت من واحد قريبى فيلسوف كده , مرة قام مشى قابل ناظر مدرسة الاساس فى القرية فى مكتبه وقال ليه انا الليلة جايك لموضوع مهم جدا , الناظر قال ليه مرحب اها موضوعك شنو , قال ليه انا جائ اعلم تلاميذك اهمية النقطة .. الناظر سالو كيف يعنى ؟ قال ليه مثلا كلمة ( الشرطة ) لو ما اهتميت بنقاط حرف الشين والتاء المربوطة حتتقرئ ( السرطه ) ود اسم اسم زول وهكذا ! |
قريبك ده ياخالد ينفع يدوهو باسوورد ويبقي عضو معانا هنا.
|
Post: #17
Title: Re: الود دا جنا ولا شنو
Author: قسم الفضيل مضوي محمد
Date: 08-22-2014, 10:02 PM
Parent: #16
اخونا حمد وضيوفه الكرام ... طاب يومكم ...
مشاركة على الماشي كدة ...
|
Post: #18
Title: Re: الود دا جنا ولا شنو
Author: خالد حاكم
Date: 08-23-2014, 01:25 AM
Parent: #17
| Quote: قريبك ده ياخالد ينفع يدوهو باسوورد ويبقي عضو معانا هنا. |
امثال قريبى موجودين بالكوم فى المنبر ده يا الفاضلابى بس ما شايفين شغلهم حسع , قبل كم سنة كانوا نشيطين وبيصححوا كراسات الاعضاء ناس ملاسى وودالباوقة وبعد داك لقينا ودالباوقة ذاتو محتاج لمصحح لكثرة اخطائه !
|
Post: #19
Title: Re: الود دا جنا ولا شنو
Author: حمد عبد الغفار عمر
Date: 08-23-2014, 09:18 AM
Parent: #18
مرحبا يا فاضلابي
| Quote: ـ الابواك دي: جمع Book |
زمان تكون في Break يجيك واحد يقول ليك مبرك ولا شنو؟
زي حكاية سطب أو فرمط لي الكمبيوتر من Set Up - Formatting
الإنجليزي دا حيكون مشكلة كبيرة في البلد في مقبل السنوات
|
Post: #20
Title: Re: الود دا جنا ولا شنو
Author: حمد عبد الغفار عمر
Date: 08-23-2014, 09:31 AM
Parent: #19
هلا خالد حاكم
| Quote: كلمة ( الشرطة ) لو ما اهتميت بنقاط حرف الشين والتاء المربوطة حتتقرئ ( السرطه ) ود اسم اسم زول وهكذا ! |
الحمد لله الما قال ليهو (الشرطان) كان خلاهم حاجة تانية خطيرة على صحة البلد
النقطة فعلا تشكيل مهم جدا في اللغة العربية
|
Post: #21
Title: Re: الود دا جنا ولا شنو
Author: حمد عبد الغفار عمر
Date: 08-23-2014, 09:48 AM
Parent: #20
مرحب قسم الفضيل
العمود الموقفو في شارع الشرطة شنو كمان ، غلطان وألف غلطان
زمان عندنا قريبنا حسب روايته جاء عُمرة وزاغ وضرب الخلا سايق بوكس وشغال تجارة في أمان الله لا إقامة ولا جواز ولا رخصة سواقة يوم ماشي في الشارع قدام سيارة شرطة وسواقتو كانت تعبانة ناس الشرطة وقفوهوا
وطبعا عرف إنهم حيسألوه من الإقامة ، قالوا ليهو سواقتك غلط قال ليهم سواقتي براها أنا كلي غلط
قال خلوه يمشي ما كشوهو
|
|