حِـمـدِلآلـك بـلـسـلامـة. قـربّـتَ اسـوِي لـي عـمـود واجـي ازورك، لـكن خُـفـتَ. والله صـحـي...

من طرايف مستشفى اتبرا.

مرّة مشينا نزور صاحبنا إنضرب في الكورة، بعدين صاحبي
المعاي كان من ناس المزاج العالي. في الفترة ديك مستشفى
عطبرة كان فيها غفير إسمو الحسين، كان زولك المرضان
دا يغرغِر ما بيخليك تدخل، عليه نطينا بالحيطة. أها، وكِت
جينا مارقين لقينا زحمة شديدة جداً في الباب والحسين متنفش
وواقف ألف أحمر للناس، من شدة الزحمة غلبنا نمرق.
في حاجة كبيرة قالت للحسين، هوي دخلني أنا عندي باص.
صاحبي المصقوع بسرعة قال ليها، يا حاجة نحن عندنا
باص بارتيسبُول ما قادرين نمرق، إنت راجية الحسين يدخلِك ؟!...

ود المدير صاحبي \ صباح الخير يا وش الخير .

Quote: من طرايف مستشفى اتبرا.

تصدق يا معاوية من الملاحظ انه معظم رجال رسبشن المستشفيات مسيخين
احتمال يكون من شروط المهنة المساخة ههههههههههههه .

وبرضو مشتاقين .ومتابعين .

ولي قدام .

مرّة انا وصاحبي بتاع المزاج العالي دا برضو مشينا نزور
صاحباً لينا من غير الناطقين بها في مستشفى اتبرا.
أها، في اسنا قاعدين معاهو جن حبوباتو تلاتة كشت،
كشت، كشت، يكُشتن في البلآط. حسيت بصاحبي إضايق
وكضم. الحبوبات مشن علي صاحبنا، واحدة قالت ليهو،
ابدو الله، ما خيرتِ ؟، وكبّن اللفت بعد داك ما فهنا التكتح.
أها، كشت، كشت، كشت، مرقن.
صاحبي المسطول قال ليهو، لا حول لله يا عبد الله حبوباتك
ديل لابسات صنفرة ؟، راسنا دا براهو مخدّر يا اخ...

يا اخي والله فرحت من جوّه قلبي لامِن لقيتك خرجوك.
قلت إتحمدلك السلآمة في البوست دا، وفرِد خترة
إتعضرلك، عشان كان زرناك بيطلعو زيتنا...

عارِف،
مرّة كِدا إتحنفشتَ وسويت لي طاصتين اللآت كِسرة، وفركت لي
ربع كيلو فوق ورق وسويت لي طاصة ملآح ورق، وعندي ملآح
قرع بايت سويتو في طاصة، ولِحيمات نُص الكيلو حمرتهن وسويتن
في طاصة مع رِزيزة، وقلت كدي شلت العمود ومرقت. أها، بعد
وِصلت طرف الشارع إذكرت الجنا اب صلعة اب عيوناً منططات
دا، خفست تقول ضربتني عقرب ورجعت قعدت عند أهلي، وحاتك
من الخُلعة عمودي داك لصباح اليوم التاني قاعد في محِلّو...

هههههه
انعل ابو التب زاتو

عشان ما تقول ما سعلت مِنّك،
هاك الرابط:
Re: يـا صـاحـب الـحـوش يـا اخـي، حـيـدر حـسـن مـيـرغـني دا ...
،
وكمان هاك الإقتباس دا:

Quote: قالوا، والله يكافينا شر قلنا وقالوا، النميري كان ساجن محمد وردي، بعدين وردي قام وسّط عبد العزيز داود عشان يحدث النميري في شأنه. أها، مرّة كدا في قعدة فرايحية والنميري مبسوط، قرر ابو داود ينتهز الفرصة ويطرح للنميري الموضوع، طوالي قال ليهو، يا ريس يا اخي إنت وردي دا... النميري طوالي إتغيّر وقال لأب داود بنبرة لا تخلوا من الغضب، وردي مالوا ؟؟؟. اب داود بسرعة إستدرك وقال للنميري، يا اخي ما تكتلوا تريحنا مِنّو. قالوا وردي قال لاب داود، يا اخي رسلناك تطلعنا من السجن، داير تودينا في دآهية ؟؟؟!!!. لهم الرحمة والمغفرة جميعاً...

Quote: ود المدير صاحبي \ صباح الخير يا وش الخير . تصدق يا معاوية من الملاحظ انه معظم رجال رسبشن المستشفيات مسيخين احتمال يكون من شروط المهنة المساخة ههههههههههههه . وبرضو مشتاقين .ومتابعين . ولي قدام .

صاحبتي بت عمسيب،
والله مشتاقين.

بالزآت الحسين دا يا مُنى،
اسعلي مِنّو حيدر حسن مرغني...

حيدر الزين المطموس قال ماشي يفتشك في زقاقات السينما الجمهورية،
قُتلو، ما بيكون هناك، الزول دا السينما خلآها قريبات دي...

Quote: هههههه انعل ابو التب زاتو

ههههههههههههههه،

يا اخي فرحانين شديد بعودتك.
والله صحي.

إهداء خاص يا زول يا سمح،

من هنا وتاني أحرص،
أهلنا قالوا، مداراة المؤمن علي رقبتو حسنة...

تصدق رجعتعشان اصاقرك

- وعد غير ممهور بأي شيئ لابصلعة

ألف مرحب بعودة الرائع حيدر حسن علي
و عقبال حيدر الزين الحردان
بعدين يا ودالمدير أمانة عليك و في ذمتك الماواسعة دي
صاحبك أب راساً مخدر ده إنت و لا حيدر حسن على
و الدليل العمود البات لتاني يوم.

سلام معاوية يا ) صديق ( تحية ، عشان ما تقول
عفصتك ، لكن اخوك لسع بتمرن
، والحوش الربع دا تقول حقل الغام فى
(معركة العلمين) بتاعة الحرب العالمية الثانية . واخوك مؤمن عشان يكتر حسانتة وحكمة دى جات فى جرح

Quote: من هنا وتاني أحرص، أهلنا قالوا، مداراة المؤمن علي رقبتو حسنة...

طلب خاص لاغنية ( يوم الزيارة) الحكاية
الفوق هجيت الخلايا الرمادية ، يوم
كانت الاسبتالة والشفخانة قبل ما تغير
اسمها (مستشفى) " دار حياة" وليس
"دار اخرة " .

بعدين مسعول من الخير وين الخبراء
(صلاح غريبة) من بوستة المشفر داك ،
شكلة انضم (للمعتزلة ) ولة شنو ؟ وبالذات
دا ( موسم ) جمعية اصداقاء البئية
والسياحة .... ): او :(

حبيبنا الوليد
سلامات يارجل
الله يديم قعادنا في صقيعة بكري دي بالخير بين من نحترمهم ويحترمونا ، وتجبرنا محبتنا ليهم بالعودة وان طال الغياب

ح ح م الشهير بحيدر حسن ميرغنى..

أيناك يا رجل ؟
حمد الله على السلامة والله الجهل مصيبة كبيرة إفتقدتك هنا ولكن مافى زول قالينا الزميل (معنبر)
وإلا والله كان الواحد جهز عمودو وجاك زارك,,

حمداله على السلامة يا صاحب وأبقى عشرة على صحتك,,

تحياتى والله,,

* عمك ابكور دا بقى بحب الرج خالس خالس,,

اهلين بالعزيز ايمن
مشكور شديد يامان

Quote: ولكن مافى زول قالينا الزميل (معنبر)

بالله ود المدير عنبرني وانا ما عارف
الغيبة كانت مني براي والصحة عال العال الحمد لله
-
يمتعك رب العباد بكمالات الصحة والعافية ام جضوم (في قول اخر ام حاجة كده) لو كتبتها بكري بركني في الرف خريفين

-
ناقصنا الزين ود الزين

Quote: سلام معاوية يا ) صديق ( تحية ، عشان ما تقول عفصتك ، لكن اخوك لسع بتمرن ، والحوش الربع دا تقول حقل الغام فى (معركة العلمين) بتاعة الحرب العالمية الثانية . واخوك مؤمن عشان يكتر حسانتة وحكمة دى جات فى جرح طلب خاص لاغنية ( يوم الزيارة) الحكاية الفوق هجيت الخلايا الرمادية ، يوم كانت الاسبتالة والشفخانة قبل ما تغير اسمها (مستشفى) " دار حياة" وليس "دار اخرة " . بعدين مسعول من الخير وين الخبراء (صلاح غريبة) من بوستة المشفر داك ، شكلة انضم (للمعتزلة ) ولة شنو ؟ وبالذات دا ( موسم ) جمعية اصداقاء البئية والسياحة .... ): او :(

هاشم يا صديق كيفِنّك ؟.

حبوباتنا كمان بيقولن اللِسبِتالية، بعدين الخانات دي قالوا بتاعت
اتراك. يعني ايّ كلمة فيها خانة فهي تركية مثال أجزخانة، شفخانة
ادبخانة. بعدينك خانة معناها حِتة، الواحد يقول ليك، اسمع شوف
لينا معاك حِتة، أو خانة. والكلمات مركبة، أدب - خانة، شفاء - خانة،
أجز دي يعني شنو ؟.
أجمل حاجة اللِستبالية زمان وخاصةً يوم الزيارة، الوالدة عليها رحمة
الله كانت تجي صارالآ حِبيبات حلآوة واللآ نبقات في خُلالتا من سوق
الزيارة، ولآمن كبرنا كنا نمشي نجكس في الزيارة. اللِستبالية كانت
إسبِتالية بالجد. والله صحي.

يا هاشم يا اخي طاريهو مالك؟
هسّع يجي طاير...

Quote: ألف مرحب بعودة الرائع حيدر حسن علي و عقبال حيدر الزين الحردان بعدين يا ودالمدير أمانة عليك و في ذمتك الماواسعة دي صاحبك أب راساً مخدر ده إنت و لا حيدر حسن على و الدليل العمود البات لتاني يوم.

ود الشيخ،
حبابك.

تصدق صاحبي أب راساً مخدّر دا بِقى
مُؤذِن الجامع. والله صحي.

كان مشيت زرت حيدر حسن ميرغني أب صلعة
كان سجّم رايتي، لكن أنا ما حويّط...

Quote: (معنبرhttp://www.gulfup.com/?GCS7Lv)

هههههههههههههههههه،

مبالغة يا ايمن. والله صحي.
دا مُصطلح مُفترض يتكتب بماء الذهب ويُعلّق
في استار المنبر.

يا بكري علِق المُصطلح دا فوق، وشكراً...

يا مدير,,

بمناسبة الخانات ووكدا,,

(الجنخانة) رواية جميلة للأستاذ عمرو عباس,,

وفى الأثر التركى أيضا قيل,,

(جنخان )و(جبخان) و(جلخان),,
السلخانة زاتا أظنها ما فايته الناس ديل,,

أنت يا ود المدير حيدر دا مالك معنبرو لا يدو لا كراعو


أيوة خلى بكرى يعلقو فى أستار الخانكة حقتو دى..
..


مشتاقين والله,,

Quote: السلخانة زاتا أظنها ما فايته الناس ديل,,

يا أيمن زُنانة تركية ؟.

يقوليك الزول دا عامل لينا زُنانة زي
صلاح جادات مثلاً...

الف حمدلله على السلامة
انهد كتف العنبرة
و الجابك يجيب كل الغايبين