Post: #1
Title: طنّوب الشوف
Author: أبوذر بابكر
Date: 08-14-2014, 03:10 PM
نضمك وحسك
مارق منك
من محاحاة الحروف
الحامن وتلّن ركّن
ومن الطارن تانى
سدّن عين الوجعه
والفجه علال
وام غِزيّل ماسكة فيك
مخالته جِنك
جداول عشمك فيكَ جاريه
زى دم الشرايين فى الجروف
لافحه توب الفرحة ماشه
جِيهة الدُوبن غبينتك
وناحية الحلم المحال
هاطله مطرة
جايه من تيبار سحابه
حالا يغنى عن السؤال
صابه للقعدن رجنّك
جاريه كابه
الغناوى
والمسادير
الحكاوى والطنابير
المسافات والمشاوير
والفجة علال
ونضمك مارق منك
ماشى دافِر
تالا فرقان الجمال
الراجيه منك
فرحة وفزعه
وام غزيل ساكنه فيكَ
مخالته جنك
واتا ما هاميك نشافك
ساوى درب المويه رجعه
خاتى مقدافك مقام
فوق جروفك
فوق ضفافك
واقف تناتل إيد الوجعه
لا مشيكَ لى هناك يسوقك
ولا فى ضل يرسم وقوفك
وام غزيل تبقى نمّه
سايله زى شعر البنيه
ام غزيل تبقى ضمه
فى سدور أمات نديه
واتا ما هاميك نشافك
وتسقى فى الناس سلسبيلك
البريدك والبعافك
شربتن سمحه وهنيه
ام غزيل تبقى نيلك
للخلوق تريانه ساهله
للسمع بيك ولا شافك
شبعانه مواسمك
حامده شاكره
نديانه طريه وماهله
نورا نورك
لهبة فوانيسك دليلك
أم غزيل تبقى عِينه
تسقى جيهات اليباس
بالمطيرات الحنينه
تبقى منها تبقى منك
ابقى ماشى
شدو سرجك فوق غناك
دوبى نيمك
نشوة النيل التساب
وشيل مساديرك حجاب
خلى غنواتك حداك
عاليه زى هامات نخيلك
واملا خُرجك
بى زوادة الروح معاك
وابقى سادر فوق عديلك
|
Post: #2
Title: Re: طنّوب الشوف
Author: ملهم كردفان
Date: 08-15-2014, 07:37 AM
Parent: #1
كالعاده نصوص تستفز الروح للغوص فى مكامن الكمال يا اباذر ...!!!
|
Post: #3
Title: Re: طنّوب الشوف
Author: ابو جهينة
Date: 08-15-2014, 10:11 PM
Parent: #2
سلمت يمناك يا ابا ذر
نص يرسم خارطة البلد بكل منحنياته وبالطبع زمنا كان وبلدا كان
|
Post: #4
Title: Re: طنّوب الشوف
Author: مصدق مصطفي حسين
Date: 08-16-2014, 00:57 AM
Parent: #3
أطرب كثيرا لنضميك السمح يا سمح ،
متعك الله بالصحة يا أباذر وأعاد لنا الوطن سليماً معافاً .
|
Post: #8
Title: Re: طنّوب الشوف
Author: أبوذر بابكر
Date: 08-17-2014, 03:38 PM
Parent: #4
كيف الحال يا مصدق
وأنا أزهو ب حضورك الأسمح
ليك كل الإمتنان والتقدير
رفقة السلام بكل اخضراره الفيهو
|
Post: #6
Title: Re: طنّوب الشوف
Author: أبوذر بابكر
Date: 08-17-2014, 05:35 AM
Parent: #3
تسلم روحك إن شاء الله
ويخدر عمرك
وتطيب أيامك
يا جلال يا ابا جهينة
كيف الحال
|
Post: #5
Title: Re: طنّوب الشوف
Author: أبوذر بابكر
Date: 08-16-2014, 11:48 AM
Parent: #2
يا كردفانى
يا ملهم
احييك مليا
واهديك كامل التقدير
وكل ما فى التحية من عطر
وعبرك ارسل التحايا الى الأصدقاء
من أهل تلكم الديار فى كردفان وفى عروسها على وجه الخصوص
آل شبور وآل بكراوى وغيرهم
تجدهم اجمعين
فى سعادة وعافية وفرح
|
Post: #7
Title: Re: طنّوب الشوف
Author: عبدالله ود البوش
Date: 08-17-2014, 10:25 AM
Parent: #5
جابني ليك الطنوب ووجدته مراح اكفي كل الناس
شكرا لهذا الابداع يا أبوذر
|
Post: #9
Title: Re: طنّوب الشوف
Author: أبوذر بابكر
Date: 08-18-2014, 06:33 AM
Parent: #7
حباب ومراحب بى اخونا ود البوش
ضويت المكان نورت لينا الحوش
والطنوب فاض وفار وادفق بعد ما شافك جيت
وتشرب بى كفوفنا زى ما قال العبادى
لما تتكفَ
|
|