Post: #1
Title: المعاي منو ....؟؟
Author: رشا بابكر
Date: 08-04-2014, 09:56 AM
المهاجرين بالسنين
الضاع عميرهم في المنافي
وفي السفر
وزادهم ذكريات
منها المفرح ومنها الحزين
البحلموا متييين يجو راجعين
ويقضوا باقي الفضل من العمر بين الأهل والناس الطيبين
.....
دي ما قصيدة شعر ...
هاكم امنيتي
الناس الجوه البلد والبره ليهم سنين
تنوم وتصحى وهمها واحد
( عايز ابني ... عايز اشتري .. بيت في الخرطوم ..!!!)
كل الناس عايزة تسكن الخرطوم ..!!
شن الــ لزوم ؟؟
مالها الحِلة ..؟؟
وسط ناسنا واهلنا
ويا سماحة اللمة والطلة
الحبايب .. والاصحاب .. والقرايب
تصحى وتنوم وخاطرك طايب
تنسى تعب السنين
والمعاناة مع الحنين
العيشة وسط الأهل وناس الفريق
بتدي الحياة طعم
أنا ...
عايزة ابني بيتي في الحلة
ما من غربة ارجع لي غربة
حياة الحِلة .. احلى حياة
الخرطوم شن فيها
كل الناس جاريه عليها ..!
في الحلة بتمشي البحر
وفي الحلة بتفرح بي بنزول المطر
والونسة والضحك والسهر
تعيش مبسوط
بين الأهل ووسط البيوت
بتاكل وتشرب وما شقّ الله حنكن ضيعوا
اها المعاي منو ؟؟
|
Post: #2
Title: Re: المعاي منو ....؟؟
Author: عبدالله ود البوش
Date: 08-04-2014, 09:59 AM
Parent: #1
الحجل في الرجل
والماشي ورح
والقاعد تح
سلام واحترام رشا بت عمي بابكر
|
Post: #4
Title: Re: المعاي منو ....؟؟
Author: رشا بابكر
Date: 08-04-2014, 11:22 AM
Parent: #2
سلام عبدالله
الله قادر ..
أنا مالي مالي سكن البنادر
والتراب الريحتو زي ريحة النشادر
وين الاقي ... فرشة عناقريب المغارب ؟
وقعدة الضُل في البنابر
وونسة بتنسيك همك
وضحكة البغشاك عابر
....
بكره العاصمه وهواها
وزحمة الناس في ضُحاها
ويوم الكهارب نوره يقطع ..!
والقمرا تحزن في سماها
ومطرة الطين والمجاري
وكان غرقتا .... وقلتَ يا ابو مُرووه الكع
منو البجيك في الضلمة جاري
ما بدورها ..
حبي للحله وسماها
وريدي للبحر الممدد بي وراها
ولمة الناس والمحنه
وونسة السمحين براها
وزكرياتنا ... منو البكضب يقول نساها
مالي مال التلتله وسكن البنادر
حلفت لا اشلهت ... ولا أمشي واكابر
العمر ماشي ومرووح
والله قادر ..
|
Post: #3
Title: Re: المعاي منو ....؟؟
Author: الطيب عثمان يوسف
Date: 08-04-2014, 11:07 AM
Parent: #1
Quote: الحجل في الرجل
والماشي ورح
والقاعد تح
سلام واحترام رشا بت عمي بابكر |
*** لكما كل التقدير ... أنا ما معاكم
.
.
.
.
.
.
.
.
.
.
أنا قدامكم .
|
Post: #5
Title: Re: المعاي منو ....؟؟
Author: عبدالله ود البوش
Date: 08-04-2014, 11:25 AM
Parent: #3
اصلو من الله خلقك قدامي يا العشا اب لبن
.
.
عاين جاي
كنا شفع بنلعب في الكنبلة وخلااااااااااااص قربنا نكمبلا ونفوز
كان نسمع ليك الصديق ود عمي كمال الدين اكورك للهادي اخوهو اللاعب معانا وداير اكمبلا
هاااااااااااادي اخوي شعيرية شعيرية اجر جاي
عليك امان الله الهادي سمعتو للشعيرية كان اطفر واشتت الكمبلا طوبة طوبة
شوف حلاة شعيرية الجن دي
هل تذوقت طعمها مرة واحدة في هذه المهاجر التعيسة
|
Post: #6
Title: Re: المعاي منو ....؟؟
Author: رشا بابكر
Date: 08-04-2014, 11:28 AM
Parent: #5
الطيب أخوي
قالوا البتبلبل بعوم
وأنت من الناس الاتبلبلو
لك السلام والأحترام جنابو
|
Post: #7
Title: Re: المعاي منو ....؟؟
Author: عزالدين عباس الفحل
Date: 08-04-2014, 11:29 AM
Parent: #3
رشا بابكر ،
...
سلام ،
بحب الريف ،
و أزقة القري الضيقة ،
وصوت البوابير علي القيف ،
والنسوان بحشمة متلففن ،
بحب ريحة القري ،
والحمير والإبل والحصين ،
جارية وماشة ،
من غير إشارات ضوئية ،
والكارو اللطيف ،
يقدل عليهو جنيات صغار ،
ما شافو الآيباد ،
،،،،،
...
عزالدين عباس الفحل
ابوظبي
...
|
Post: #8
Title: Re: المعاي منو ....؟؟
Author: ناصر احمد الامين
Date: 08-04-2014, 02:10 PM
Parent: #7
Quote: بحب ريحة القري ،
والحمير والإبل والحصين ،
جارية وماشة ،
من غير إشارات ضوئية ،
والكارو اللطيف ،
يقدل عليهو جنيات صغار ،
ما شافو الآيباد ، |
غــايتو كان الزول دا باراكم
اخير ترجعو للبندر ساااكت 
عودا حميدا يا ود البوش - تحياتي لجميع المتداخلين و كل سنه و انتي طيبة يا رشا
|
Post: #9
Title: Re: المعاي منو ....؟؟
Author: خالد علي محجوب المنسي
Date: 08-04-2014, 02:37 PM
Parent: #8
رشا بت بابكر
حبابك وحباب هواك وهواك هوانا
أعشق الريف واعشق نسيم الريف
هاجرنا من زمن طويل بعد الشهادة السودانية ويا أختي لي يومنا هاجين ومصايدين من البلد البقت طاردة
نمني النفس ينصلح حال البلد ونعود والعود حميد ...
أقول ليك شئ من سنة 1988 ولي يومنا لو جمعتي عدد الأيام التي عشتها في السودان ما تصل سنة لاني
رجعت اقل من عشرة مرات وفي كل مرة شهر وحيد زي سن العجوز
مشتهي رقدة في الحوش مصنقع أعاين في السما وأحسب نجومه أناشد القمرة زي زمان
يا القمرا يا القمرا
أقلبي السنسنة حمرا
وشوفي وليدي أحمد
وين ما جا
زمان كنا بنقول وشوفي أبويا ليه ما جا ... ونحن ولاد عساكر وكانوا مغربين بسبب الخدمة العسكرية
مشتهي حرف كسرة مقطعة في طماطمايا من نتاج جنينتنا مخصب بسماد بلدي وعليها موية وشمار وارد حوض
البسابير ودي أحلى البهارات ...
مشتهي وقت العصرية جلسة قهوة مع أخواتي البنات نتجاذب فيها أطراف الحديث مودة وحنيّة
مشتهي جلسة مغربية مع التربالة في وطاتنا اشرب معاهم شاي المغربية
لبن ضان يشدو في حلة مقننة ووِقود النار بعيرات روث بقر جاف يكتحو في الشاي
ما ضقتي الشاي دا يا رشا أحلى شاي ومن سنة 1988 أتذوق في طعمه في فمي لي يومي ويومك دا
مشتهي والمشتهي كتير والله يكون في العون
في سنة 2000 عدت للبلد وزجتي خواجية
مشينا شندي وعجبتا شندي بالحيل والجناين والحلة
ومن يومها كل ما نجي السودان تحلف ما تقعد يوم في الخرتوم ( البندر ) بي ليلنا نمشي شندي وتاني
ما بتجي إلا يوم السفر
حياة الريف فيها كل جميل وكل شئ صحي
تحياتي وشكراً كتير لإتاحة هذه النافذة نطل منها
ما يجيك ود شيقوق يملا البوست عنكوليب
|
Post: #10
Title: Re: المعاي منو ....؟؟
Author: رشا بابكر
Date: 08-04-2014, 05:13 PM
Parent: #9
عزالدين ود الفحل
أنا في ظني ويقيني
اي زول من ناس القرى والحلاّل
ما بلقى روحو في العواصم
وإن الله قدّر ليهو قسمة سكن الخرطوم
ببقى في حاو وتُر
إن مرق عصرية ساي قدام بيتو .. تلقاهو يتلفت زي الرايح ليهو شي
بلداً غريبة علي ..
ويتهد حيلو من الجري للحلة والبلد والمساسقة
ويبقى مقسم نصين نص في الحله ونص في الخرطوم
وبلداً ما بلدك مويتها ما بترويك .............. شكراً عزالدين
................
مشكور كتير / ناصر ود أحمد
.............
شفت كيف يا خالد منسي
سماحة الحلة وناس الحلة خلى ام العيال الخواجية تأمن
وهي جاية من بلدن المطرة فيهو تغسل الواطة النضيفه خِلقه
إن شاالله باقي عمرك تقضيهو تحت سما حلتكم
وتحت ترابها تدفن مرارة سنين الضهب والتيه
شكرا خالد .. والتحية للمدام عظيمة
|
Post: #11
Title: Re: المعاي منو ....؟؟
Author: امجد الجميعابى
Date: 08-04-2014, 06:03 PM
Parent: #10
سلام يا رشا و كل سنة و انت و الاسرة بالف خير
معاكم
يربطنا حبل و يقطعنا سيف
|
Post: #12
Title: Re: المعاي منو ....؟؟
Author: رشا بابكر
Date: 08-04-2014, 06:26 PM
Parent: #11
اهلاً بيك وحبابك أمجد
أهلنا بقولوا العرجا لي مراحا
أها الزينا كدى إن داير يبقى زول بندر
كتب علي نفسه الشقا
أنا القاهرني ..
الخرطوم السمح فيها شنو ؟
الحمد لله زمان الناس من الحلال ما بجيبها ليها غير المرض وكواسة العلاج
الناس كانت لما تجي الخرطوم ما بلفت نظرم غير الكهربا
ونحن الحمد لله الكهربا ملت البيوت
وكل شي بشتغل بالكهربا الناس جابتو
اها البودي الناس هناك شنو
أنا منطقتي بتبعد من الخرطوم 80 ك مرات تسافر من وسط الخرطوم بالحافلات الساعة 8 ص
والودعك وماشي الثورات البعيدة ديك... أنت تصل وهو تلقاهو مطوطح من حافلة لي حافلة
اخير البِعد ولا البلاد الما بتنقعد ... تحياتي أمجد
|
Post: #13
Title: Re: المعاي منو ....؟؟
Author: عبدالعزيز عثمان
Date: 08-04-2014, 07:59 PM
Parent: #12
 التحية لك ،،اهديك هذه الصورة من بحر حلتنا...انه موسم الاهتمام بالريف.
|
Post: #14
Title: Re: المعاي منو ....؟؟
Author: عبد العزيز محمد عمر
Date: 08-05-2014, 07:25 AM
Parent: #13
امحمد قاااعد تحت النيمة .. وجاهو ود الزين قال ليهو : السيد رجع من البندر
امحمد قاليهو الجنا دا مو نصيح ... هسع لو قعدت اعاين في عربات الخرطوم دي فو .. فو ... فو
بجي راااااجع
انحنا غايتو بين نغمة فو ... فو ... وأكل الباسطة .... ما قادرين نفارق
أكان عندكم مقعد فاضي ... كلموني
الشغيل
|
Post: #15
Title: Re: المعاي منو ....؟؟
Author: عبدالحفيظ ابوسن
Date: 08-05-2014, 07:35 AM
Parent: #14
رشا يا خيه
خليهم البره
الناس الجوه كلها ماشه الخرطوم
|
Post: #16
Title: Re: المعاي منو ....؟؟
Author: الطيب شيقوق
Date: 08-05-2014, 07:39 AM
Parent: #14
رشاء بت ابوي بابكر اتاريك مولعة النيران بجاي وما بتكلمينا
|
Post: #17
Title: Re: المعاي منو ....؟؟
Author: ياسر السر
Date: 08-05-2014, 08:13 AM
Parent: #16
قريبتي الفضلى رشا بابكر يا سلاااام على هذا البوست الذي يعيد لنا الذكريات الصادقة وجميلة ومهما تجافنيا بنقول حليلااااا .. طبعا الواحد عاش حياتو في العيلفون لكن اتعلق بالخرطوم منذ الصغر لاسباب عديدة ولكن مهما تعلق القلب فهو لا ينسى مرتع الصبا ومسقط الراس على الرغم من ان العيلفون لا تبعد عن الخرطوم كثيرا ولكن ستظل هي المأوى والمقصد والمنال والاول والآخر ..
وما عايز اشكر ليك مسقط راسي لكن هاك القصيده دي القالها شعارنا العمرابي وانتي براك فسري .. وغايتو انا معاكم معاكم ومالي بالخط المعلق ،، قال خرطوم قال ,, وكل سنة انتي الاسرة الكريمه بالف صحة وعافية ..
العيلفون جنة عدن
كلمات : أحمد محمد حسين العمرابي
الحان وغناء : عبد الله الماحي – مبارك حسن بركات
العيلفون جنة عدن ..........شوفة معالم يسعدن
***
شاهدنا حور إتقلدن البابنا ....وشحات فوق لدن
لينا العيون كم قلدن .....والشادي يسكر غير دن
***
يمشن مشيات العجن ....سبن العقول حين بهرجن
آهلاا مصابيح الدجن ...جلسن وعاقلنا أندجن
***
... هناك تشوف كيف الأدب ...وتشوف وجوه تمحي الغضب
وتشوف سحر تحت الهدب ......لو شافه ناسك إنجذب
***
سطعن بدور في ليل عتم ....كل غانيه من در اليتم
ملك السعاده كتب ختم ....أن (الدخيره ) سروره تم
***
يا من أذا دٌعي أستجاب ......أجعله من العين حجاب
أرزقه أبناءً نجاب .....والمال يفيض عجبا عجاب...
تحياتي : ياسر العيلفون
|
Post: #18
Title: Re: المعاي منو ....؟؟
Author: رشا بابكر
Date: 08-05-2014, 10:03 AM
Parent: #17
حباب اخوي ودشيقوق
بقولوا النية زاملت سيدها
الدرب الماشه فيهو ده ياهو درب الراحة والسماحة
الله واحد والعمر واحد
درباً مرقني سنين ودنين
وبقيت اغني مع الحزن العلي
اتغربت واتعذبت يا يمه
وريني الخلاص
أمي يطول عمرها
قات لي تعالي مارقه واتلمي وسط الناس
اها شن بوديني لي عِشة الخرتوم
ما قلت لي أنت معانا والا معاهم ؟؟
ما بريد مسك مسك العصاية من النص
ود البوش كورك وقال لي الحجل بالرجل
أنت شن قولك؟
................
يا ياسر والله صدق القال العيلفون جنة .. خلينا النقول جنة شرق النيل
ارض رويانة وتريانة .. ويا جمال الجناين فيها
بلد المبدعين والشعرا .. مافي كلام
تحية للأهل في العيلفوت
|
Post: #19
Title: Re: المعاي منو ....؟؟
Author: عبدالحفيظ ابوسن
Date: 08-05-2014, 10:18 AM
Parent: #18
اها ده الكلام البخلي الزول يعضي ايدو
رشا عفصتني
ردت فوق وتحت وانا في النص
|
Post: #20
Title: Re: المعاي منو ....؟؟
Author: الطيب شيقوق
Date: 08-05-2014, 11:05 AM
Parent: #19
Quote: ما قلت لي أنت معانا والا معاهم ؟؟
ما بريد مسك مسك العصاية من النص
ود البوش كورك وقال لي الحجل بالرجل
أنت شن قولك؟ |
معاك وحابسك بعكازي عشان ما يقوم ود بندر يدفرك دفرة فهيمة
خليك عافصة ود اب سن دا شدييييد لانو ماسك العصاية من النص - ما ترخي ليهو فجاج الرقاريق هههه
|
Post: #21
Title: Re: المعاي منو ....؟؟
Author: اميرة السيد
Date: 08-05-2014, 01:59 PM
Parent: #20
Quote: أنا مالي مالي سكن البنادر
والتراب الريحتو زي ريحة النشادر
وين الاقي ... فرشة عناقريب المغارب ؟
وقعدة الضُل في البنابر
وونسة بتنسيك همك
وضحكة البغشاك عابر
....
بكره العاصمه وهواها
وزحمة الناس في ضحاها
ويوم الكهارب نوره يقطع ..!
والقمرة تحزن في سماها
|
<<<<<<<<<<<<<<<<<<<
العزيزة رشا
والله انتي وعبد العزيز عثمان شهيتونا نسكن القرية والريف.. وقدمتوا لينا صورة بديعة ورائعة للقرية وايجابياتها
والمدينة وسلبياتها.. ووالله عندكم ألف حق..وبعد ما قريت الكلام السمح ده قراري النهائي السكن في قرية بعيدا عن ضوضاء
المدن.. وكفاية علينا كده ضوضاء نيويورك..
واسمحي لي كمان اقتبس شوية من الشعر الرائع الفوق ده وأعلق بيه كمان في بوست عبد العزيز عثمان عشان فعلا بيتسق
وبيتناغم مع الصور الفوتغرافية لقريته الجميلة الوادعة في الجزيرة الفيحاء..
والله يديك الصحة والعافية
|
Post: #22
Title: Re: المعاي منو ....؟؟
Author: رشا بابكر
Date: 08-05-2014, 03:08 PM
Parent: #21
أخوي ود الحلة القرييبة مننا
عبدالعزيز ود عصمان
يا عبدالعزيز قرايتي في مدني
خلتني اعرف قرى جميلة في جزيرتنا الحنينة
قريتكم بتنضم سحر وجمال
وما بعيدة مننا بس انتو ناس غرب النيل ونحن شرقو
التحية لكل الناس الطيبة فيها .. شكراً عبدالعزيز
......................
عبد الحفظ ابو سن
العفو يا أخوي ... والله لا جاب البخليك تعضي ايدك
انا في رجا الناس الفوقم حب الحله ساكن
وانت زول ريف ما بنسميها حله ... كوستي القالو سمحة
والشدر فيها خلاها كوستي الخدرا
اها انت مع ياتو ناس ... اكان دربك مع جيهتنا بإذن الله اخدر
|
Post: #23
Title: Re: المعاي منو ....؟؟
Author: رشا بابكر
Date: 08-05-2014, 03:29 PM
Parent: #22
عبدالعزيز محمد عمر
سلام
ما فات شي
بيتك افي الخرتوم بيعوا
بجيب ليك الشي الفلاني
واتراوح علي حلتكم وابني فيها وسوي ليك مشيريع مهما كان حجموا
بتضوق حلاتوا ولو الناس الهجت وضربت الخرتوم ختت الرحمن في قلبها
ما كان الحلال فضت
.........
الله عليك يا أميرة
واكدتي لي بي كلامك ده انك أميرة
كوركي وبي صوت عالي
..... وقولي
بكرة جايه من المهاجر
بي قلب ممكون وصابر
راجعه للحله البريدها
وللدروب الما عنيدة
السفر ضّيع خطانا
ونفسي احضر مره عيدها
وانسى جرح الفرقة وافرح
وباقي عمري اعيش سعيدة ..
|
Post: #24
Title: Re: المعاي منو ....؟؟
Author: الطيب شيقوق
Date: 08-06-2014, 05:49 AM
Parent: #23
Quote: أنا في ظني ويقيني
اي زول من ناس القرى والحلاّل
ما بلقى روحو في العواصم
وإن الله قدّر ليهو قسمة سكن الخرطوم
ببقى في حاو وتُر
إن مرق عصرية ساي قدام بيتو .. تلقاهو يتلفت زي الرايح ليهو شي |
بسسسسسسسسسسس يا رشا اخي عليك الله تاني ما تزيدي اي كلام
والله بيتي في البندر بقى زى كمبو العمال الموسمي الفي الخلاء -
اولادي مربيين قرى كلما مدارسهم تقفل موسم الاجازات يهربوا كلهم يخلوا ليك امهم براها في المدينة و بعد شوية هي ذاتا ترتب احوال بيتا وتجيب الطبل تقفلوا كلووووو وتلحق الجماعة في الريف
انا ذاتي لما ارجع السودان ما بزيد لي من يوم واحد في المدينة طوالي بتلهم الحلة
والله الواحد كان قعد يوم واحد يعديهو كلو تلفت يمين وشمال وجيبوا لي الجرائد وجيبوا لي ديك وعيييييييييك
|
Post: #25
Title: Re: المعاي منو ....؟؟
Author: محمد المسلمي
Date: 08-06-2014, 06:56 AM
Parent: #24
قاعدين متوهطين في نص سعيتنا وماكلين وشاربين منها وحامدين ربنا
تقوم الولية من الصباح تحلب لينا لبن ولبة مع الشاهي نأكل لبة حار
ونفك الريق بي عصيدة بملاح لبن
------------
رشا يارشا العيد ينعاد عليك بالخير والبركة ولكل الاخوان المشاركون هنا
|
Post: #26
Title: Re: المعاي منو ....؟؟
Author: رشا بابكر
Date: 08-06-2014, 08:41 AM
Parent: #25
يا ودشيقوق أخوي
والله وثم والله الناس البره ديل كان ختو الرحمن في قلوبن
وحسبوها صاح تب ما بتجيهم عوجه
أقول ليك واقول ليهم ..والمعنيين بالكلام ده كل الناس المن القرى والحلاّل
بقولوا الطبيعة تغلب التطبع ..
انتو لامن مرقتو من الحلة وسافرتو وضربتو بلود العجم والعرب
فيكم : الكان نايم في عنقريب ضرا الحيطة
وصحنّو البهايم في الفي الزريبة
وقبلهن حس الديكة .. وآذان الفجر من عمك حاج أحمد .. وجدك دفع الله
وقشيت عينيك ولقيت أمك قدامك شاده الشاي في كانون الفحم
وأنت مسافر وهاجي من الحله
شويه والواطه صبحت .. تلاقي البيت اتملا بالمودعين
تقوم وتلبس وتقشقش في دميعاتك ومغبون
وتمرق وراك لمة ناس حُنان ... إن كان دربك علي شارع سفر باروك لااامن تركب
وإن كان علي البحر وصلوك المعدية والا البنطون ..
وتقيف موادع تبكي وترفع في ايدياتك .. وتعاين للحله موجوع وأنت مفارقها
منو فيكم الما عاش اللحظات دي في يوم ولي هسه الصورة المُره عايشه في زاكرتو
...
مرقتو من حلالكم ..
وجيتو لبلادن حديثها كُتر .. الأيام الأولى جاك وجع الرقبه من كترت الـ لفيّت
لقيت روحك وسطهم زي تايه تفتش لي زولن بشبهك ويعرف نضمك
وحسيت حراق الروح ..!
وواليت الصبر ترياق
والسوط إن وقع كترت البتابت عيب ..
والبتبلبل بعوم ..
....
المشكلة :
الناس عاشت تفاصيل حياة مختلفة فيها من الرفاهية ما فيها مع اختلاف الناس والمكان
وتمر سنين البعاد .. وترجع وأنت همك بيت في الخرتوم .. داير تعيش نفس الوضع حتى ولو علي حساب طبيعتك وطينتك القرويه
وتعاند حنينك لي عيشة الحله ونفيستك فيها
وتكابر .. وترمي العراقي والسروال
اتعودت علي لبس الترينق والكدارة
ونسيت عوم البحر .... وحوض السباحة هناك إن شقيتو لا بتصل جنينة حاج الطيب ولا بترجع تلاقي القيفه قدامك
ها زول ها .... انت نسيت ..؟
ميدان حلتكم الجنيات ملمومين .. إن كنت داير تتمرن مع الصبيان .. والا تقعد وسط ندداك وتضحك لمن تقع علي قفاك ..
عمار الحله بي اولادها ..
البيت السمح ابني
ودرب المعايش مافي شيتن بحمي ..
فلان جا من بره وبنى في الخرتوم ...!!
وبعدين ..!
قطعة راس ..
وبعدها تبقى زي بوكس الخضار .. ماشي الخرتوم وصاد الحله
في الأسبوع ممكن تسافر الحله اربعة مرات
فلان مات .. وفلان عرّس .. والحاجة عيانة ...
وعييييييييك ... ينتهي المسلسل المكسيكي وحكايتك كرّهت المخرج زاتو هههههه
...
عمار الحله بي اولادها ..
ونواصل ..
|
Post: #27
Title: Re: المعاي منو ....؟؟
Author: رشا بابكر
Date: 08-06-2014, 08:48 AM
Parent: #26
ود المسلمي
ربي يجعل كل ايامك اعياد
العمر محدود يا اخوي
وفات منو الكتير وفضل القليل
ومادام الراحة بتتلقي تحت ضل شدرة
وقعدة مغربية وسط الناس
شن بجبر علي الهم البقصر العمر
ابقى مقبّل علي حلتكم
والزارعا الله في الزلط بتقوم
والخالق الله والرازق الله
|
Post: #28
Title: Re: المعاي منو ....؟؟
Author: معتصم الطاهر
Date: 08-06-2014, 09:08 AM
Parent: #27
خلونا نكون واقعيين و عمليين
الناس مشت المدينة كايسة شنو ؟
و هجرت الريف هاربة من شنو ؟
و الحل لكل شنو ؟
|
Post: #29
Title: Re: المعاي منو ....؟؟
Author: الطيب شيقوق
Date: 08-06-2014, 09:55 AM
Parent: #28
Quote: وبعدها تبقى زي بوكس الخضار .. ماشي الخرتوم وصاد الحله
في الأسبوع ممكن تسافر الحله اربعة مرات
فلان مات .. وفلان عرّس .. والحاجة عيانة ... |
الله الله يا بت ابوي والله واقسم بالله هذه لوحة صادقة تعبر عما نحن عليه الان
وبقينا ونحن في بلاد المهجر نخاف على اولادنا من شارع مدني الخرتوم
الولد مسافر كلموك بقيت ايدك في قلبك لحدي تتاكد بتلفون انو وصل والعكس يا رشا
من المواجع التي لا انساها يا بت ابوي عندما عدت للسودان في اجازتي السنوية - الشاهد هو ان جيرانا تعودوا يوسعوا لضيوفهم في ديواني لا انسى مناسبة عرس لجيرانا وصلت عربية السيرة قدام بيت اهل العروس - ابو العروس طوالي قعد يصيح للضيفان ( اتفضوا يا اخوانا على ديوان عبد الله داك) وانا اسمع ساي وانا والد عبد الله دا - والله بيني وبين نفسي قلت ملعون ابوك يا غربة
ولما تلفون البيت الارضي يرن اصلك ما تحلم تكون انت المطلوب
صارت غربتين غربة الخرطوم وغربة السودان .
|
Post: #30
Title: Re: المعاي منو ....؟؟
Author: عبدالله ود البوش
Date: 08-06-2014, 10:39 AM
Parent: #26
Quote: مرقتو من حلالكم ..
وجيتو لبلادن حديثها كُتر .. الأيام الأولى جاك وجع الرقبه من كترت الـ لفيّت
لقيت روحك وسطهم زي تايه تفتش لي زولن بشبهك ويعرف نضمك
|
والله يا رشا وما طالباني حليفة وهو في الزمن دا في زول بطلب ليهو حليفة كان مو ساهي تقعد حديس
زي جدي العوض ود حمودة اقوليك علي الطلاق وقولة علي الطلاق اسمع طلاقي دا
بوستيك دا كل يوم اقراهو واعيدو وراسي ملان ملية قربت اشيل مخيلاتي فوق راسي وعليك يا الله اشيل اهلي
عايني جاي
زمان في السودان كان جانا موظف جديد وسكن معانا في الميز وكلنا عزابا الزول دا من العزازي اسمو ود الزبير
كل يوم اقوم مع الصباح وابزق بزقة ماكنة بزهج واقول
يارب طاحونة ومرة مجنونة وحواشة اخر بيت وحمارة مكادية
وانا اقوليهو يا عوذ بالله والنيتي لله منك يا ود الزبير
لاحظي العبارتين ديل كل يوم الصباح الصباح
بعد فترة طويلة براي فكرت في كلامو دا وقلت ليهو يا ود الزبير اتا كل يوم تدعا كدي كان ربنا استجاب ليك حكايتك بتكون صعبة
قال اقوليك حاجة انا كل يوم بقول كدي وطالب ربنا استجيب لي
لشنو ؟
عشان اقعد عمري كلو في حلتنا ولا يكون عندي طريقة امرق بيها منها كلو كلو
يعني الرجل يعني ما يقول
شوفي الزول دا الزمن السبقنا بيهو
نحن لفينا ودورنا طول السنين دي ومتمنين ما توصل له من بدري
واسع نفسي اعرف ود الزبير دا البقا عليهو شنو
لو في واحد من عزازي ربك افيدنا مع تحياتي لاهلنا بالعزازي والخير بجيك وام بجيك والسانية وود المنسي والفقوسة جاتك تمشي
كل الود والتقدير
|
Post: #31
Title: Re: المعاي منو ....؟؟
Author: عبيد الطيب
Date: 08-06-2014, 10:47 AM
Parent: #30
Quote: كل الناس عايزة تسكن الخرطوم...!!
شن الــ لزوم ؟؟
مالها الحِلة ..؟؟
وسط ناسنا واهلنا
ويا سماحة اللمة والطلة
الحبايب .. والاصحاب .. والقرايب
تصحى وتنوم وخاطرك طايب
تنسى تعب السنين
والمعاناة مع الحنين
العيشة وسط الأهل وناس الفريق
بتدي الحياة طعم
أنا ...
عايزة ابني بيتي في الحلة
ما من غربة ارجع لي غربة
حياة الحِلة .. احلى حياة
الخرطوم شن فيها
كل الناس جاريه عليها ..!
في الحلة بتمشي البحر
وفي الحلة بتفرح بي بنزول المطر
والونسة والضحك والسهر
تعيش مبسوط
بين الأهل ووسط البيوت
بتاكل وتشرب وما شقّ الله حنكن ضيعوا
اها المعاي منو ؟؟
|
أصدق بوست قرأته منذ سجلت بالمنبر، ومن أجمل المواضيع وهادف جدا
معاكم بلحيل
Quote: أنا في ظني ويقيني
اي زول من ناس القرى والحلاّل
ما بلقى روحو في العواصم
وإن الله قدّر ليهو قسمة سكن الخرطوم
ببقى في حاو وتُر
إن مرق عصرية ساي قدام بيتو .. تلقاهو يتلفت زي الرايح ليهو شي
بلداً غريبة علي..
ويتهد حيلو من الجري للحلة والبلد والمساسقة
ويبقى مقسم نصين نص في الحله ونص في الخرطوم
وبلداً ما بلدك مويتها ما بترويك....
|
والله كأنَّك شقيتي دواخلنا ونطقتي بحالنا
العام القادم قلت أجيب البنيَّات الخرطوم للتعليم ، البادية الغربية "حمرة الشيخ" التعليم فيها إنتهي...
هل تصدقين لقيت نفسي في الخرطوم
"ولكن الفتي البدوِّي فيها غريب الوجه واليد واللسان"
بقيت أترك الوليدات وأمشي أركب المواصلات عشان أفرق لي روحي ، مرات أركب في المقاعد الأخيرة
وأدفع لي الناس المعاي في المقاعد الوراء..ماكرم منِّي لكن قاصد القي لي زول مشاتر
ويداوسني عشان دفعت ليهو لي شنو..! وقول يا محِن ، وطُرف كتيرة خلاااس
أخيرا خليت الوليدات ومشيت البادية كمَّلت إجازتي
يشهدالله غربة الخرطوم كانت اشد علي من غربة المهجر
شكرا وكل عام وانتم بخير
والريف الحبيب ممهول وشامخ
|
Post: #32
Title: Re: المعاي منو ....؟؟
Author: فيصل محمد خليل
Date: 08-06-2014, 11:11 AM
Parent: #31
يا ايدي شيليني ختيني في بيت الله و الرسول
|
Post: #33
Title: Re: المعاي منو ....؟؟
Author: رشا بابكر
Date: 08-06-2014, 11:45 AM
Parent: #32
الـ ايدو في الموية ما زي الـ ايدو في النار
بلدن ما بلدك ما بتريد هواها
ونحن اتربينا في الهوا
اخوي عبيد
تعبنا من زنة المكيفات والكتمة
ووليداتنا بي قدرة قادر نجو من الكساح
والنجا منهم هسي كريعاتو معوجات والسبب معروف
اتحرمو من اللعب والجري في الحيشان
ومنو الوليداتو ما جاهم ( ربو ) وصوت سدرو زي شخشخة الرادي
كل الحكاية وهمه وموضة
والبتوهم بفيق .. والموضة بتفوت بي زمنا
وعمار الحله بي اولادها ...
ومشكور علي الشهادة الطيبة .. إنشا الله بكري نسيبي يرفع البوست ده تكون أول مرة يرفع لي بوست
|
Post: #34
Title: Re: المعاي منو ....؟؟
Author: رشا بابكر
Date: 08-06-2014, 11:52 AM
Parent: #33
الباشمهندس فيصل خليل
يا كريعاتي الشايلاني
فكي القيد وسوقيني
ودرب الحِله وريني
...
شكرا فيصل
وعمار الحِله بي اولادها
|
Post: #35
Title: Re: المعاي منو ....؟؟
Author: قصي محمد عبدالله
Date: 08-06-2014, 12:19 PM
Parent: #34
سلام رشا وسلام جميع المتداخلين،
نحنا لسه شباب، بنحلم بالتنقل بين الدول وامتلاك الأملاك
لا داعي لتثبيطنا وتثبيط أندادنا،
مع إن حلتنا بها كل وسائل الحياة ، من وإلى.
حتى العونكوليب (ذهب الضهاري الأخضر و تحلية الطيب شيقوق المفضل وعقدته النباتية)
هههههه
بس أمنيات الجدود والحبوبات دي لسه ما جاتنا،
ههههه
تحياتي وتقديري
|
Post: #36
Title: Re: المعاي منو ....؟؟
Author: Haju Muktar
Date: 08-06-2014, 01:38 PM
Parent: #35
الحلال زمان ما احلاها ...وعيشه كلنا بنحلم بيها وكنا زمان بنستمتع بالضحي وشاي الصباح باللبن وصوت السعيه طالعه للرعيه وصوت بوري البص ماشي البندر والناس راجيهو المسافر والموصي ...ومقيل النهار في ضهر الترع والحوامه بين بيوت المفتشين وقبيض الطير والتمر هندي سور بيوت الموظفين والجري في الحواشات والكوره في العصريه وشاي المغرب ...بس ده كلو راح من يوم نطه علينا كيزان السجم القري سكنها البوم ....وجففو البير والترع وبيوت المفتشين اخخخخخ والمشاريع الريفيه حدث ولا حرج...
الاخت رشا والضيوف ...سلام
بوست جميل وزكرياتكم جميله ...بس ما في زول منكم هجر القريه بي اراضته ..وعشان نرجع القريه يجب ان يرجع الزمان ويرجعوا الناس الحنان ..والله يجازي الكان السبب
|
Post: #37
Title: Re: المعاي منو ....؟؟
Author: رشا بابكر
Date: 08-06-2014, 03:58 PM
Parent: #36
معتصم الطاهر
الناس المشت بظروفها
وكل زول ليهو قتاعاته وطموحاته
فيهم الأستمتل وقعد
وفيهم الندم
والحل الناس تخت الرحمن في قلبه
الحلال بقت المافي فيها شنو
مشكور للتداخل
...............
اخونا قصي
أنا والمعاي في صعيدي
والله لا بنثبط في همم ولا بنكسر في مقاديف
نحن ناس حلاّل ومطرا قِبلي خريف
بندور عيشة الهداوة وراحة البال
وواطاطن ما بتقد النعال
وأنت يا ودعمي اختر بي دربك الدايرو والله يديك الفي في مرادك
وبعدين دي ما امنيات حبوبات ..
ده عشم ناسن اتغربوا في بلودن مافيها تراب
ودايرين يرجعو لي ريحة الطين والجداول
من عواصم ما بتنوم الليل
وفي الأخير كل زول وعوسو
مشكور قصي
..............
يا هجو الحلاّل وقُرانا صابرة ومنتظرة الطير الرحل يعود
وما دام الناس الطيبة فيها موجودة مافي عوجة وكلو بهون
مشكور هجو
|
Post: #38
Title: Re: المعاي منو ....؟؟
Author: د.محمد بابكر
Date: 08-06-2014, 05:08 PM
Parent: #37
Quote: أنا ماشي راجع لبيوت
تفتحلي أدق أو ما أدق
من غير تقول الزول منو؟
ولا حتى علو الداعي خير
حميد
58Like |
|
Post: #39
Title: Re: المعاي منو ....؟؟
Author: وضاحة
Date: 08-06-2014, 05:15 PM
Parent: #38
( عايز ابني ... عايز اشتري .. بيت في الخرطوم ..!!!)
كل الناس عايزة تسكن الخرطوم ..!!
شن الــ لزوم ؟؟
مالها الحِلة ..؟؟
-------------
ياريت يا رشا لو ناس الخرطوم قدروا سكنوا البيوت العملوها واستمتعوا فيها
سكنوها الغفرة نحن اتشردنا حول العالم لينا 23 سنة
وما معروف نحن شنو سودانين ولا قطرين ولا كندين ولا امريكان
ضاعت هويتنا يا رشا شوفتى الوجع النازف دا كيف
يا حليل السودان ويا حليل المحنة حتى السودانين اتغيروا في المنافي
|
Post: #40
Title: Re: المعاي منو ....؟؟
Author: د.محمد بابكر
Date: 08-06-2014, 05:33 PM
Parent: #37
Quote: أنا ماشي راجع لبيوت
تفتحلي أدق أو ما أدق
من غير تقول الزول منو؟
ولا حتى علو الداعي خير
حميد
58Like |
|
Post: #41
Title: Re: المعاي منو ....؟؟
Author: رشا بابكر
Date: 08-06-2014, 06:36 PM
Parent: #40
حباب الدكتور محمد بابكر
سكن العواصم ..!
يدق بابك في البندر زولاً هيلك
جاي من بعيد
ضاربة شمس ولافحو غبار
جاك ووقف قدام بابك الشال وصفوا من خالك
وملهوف لي ملاقاتك وشوفتك
يدق الباب ويستنى
وتطول انصلابتو ووقفتو
وينبهو زولاً ماشي بالشارع
يا حاج .. دق الجرس ما بسمعوك
ويعاين فوق وتحت ويباصر محل ما الجرس بدقوا
ويخت ايدوا مسااافه .. المسكين مريوق وعطشان
وتجي الشغالة .. وتنهروا نهرا يرجع معاها خطوتين لي ورا
النهرا ... شان دقا الجرس طويل
ويبلع ريقو المسكين ... ويقول ليها
بدور دكتور أم حُ مد
ويجيهو الرد بي قوة عين ... الدكتور نايم
وتقفل الباب في وشو .. زي الما حاصل شي
....
أها ........... بلداً تفتح الباب فيهو شغاله
وحيشانا هناك قبال تتم النقره يجوك جارين
الحلال إن عمرت
برجع الزمن الجميل
..........
يا وضاحة ..
قالوا البتبلبل بعوم
انا لو محلك اسو لي بيت صغيير وبسيط وازرع قدامو شدرة نيم
ومرة مرة في المناسبات والأعياد امش اقعد فيهو ايام على الطبيعة
البيت في حلتكم اكيد
وإن شاالله ترجعي ويتلم الشتات بي قدرة الله
وتسلمي كتير
|
Post: #42
Title: Re: المعاي منو ....؟؟
Author: عبدالعزيز الفاضلابى
Date: 08-06-2014, 06:37 PM
Parent: #40
Quote: الله قادر ..
أنا مالي مالي سكن البنادر
والتراب الريحتو زي ريحة النشادر
وين الاقي ... فرشة عناقريب المغارب ؟
وقعدة الضُل في البنابر
وونسة بتنسيك همك
وضحكة البغشاك عابر
....
بكره العاصمه وهواها
وزحمة الناس في ضحاها
ويوم الكهارب نوره يقطع ..!
والقمرة تحزن في سماها
ومطرة الطين والمجاري
وكان غرقتا .... وقلتَ يا ابو مروه الكع
منو البجيك في الضلمة جاري
ما بدورها ..
حبي للحله وسماها
وريدي للبحر المدد بي وراها
ولمة الناس والمحنه
وونسة السمحين براها
وزكريتنا ... منو البكضب يقول نساها
مالي مال التلتله وسكن البنادر
حلفت لا اشهلت ... ولا أمشي واكابر
العمر ماشي ومرووح
والله قادر |
الله يفتح عليك ـ ـ رغم انك قَلَّبتي علينا المواجع
في الغربة أُم سُكَّراً مُر.
|
Post: #43
Title: Re: المعاي منو ....؟؟
Author: عبدالعزيز عثمان
Date: 08-06-2014, 07:56 PM
Parent: #42
Quote: [QUOيا وضاحة ..
قالوا البتبلبل بعوم
انا لو محلك اسو لي بيت صغيير وبسيط وازرع قدامو شدرة نيم |
تاني قمنا علي النيم...
شدر النيم ده اصلو مايبرانا
برتقال
منجة
جوافة
قريب
ليمون
عنب
زهور فايكس مهوقني
بس النيم ده لا...
|
Post: #44
Title: Re: المعاي منو ....؟؟
Author: رشا بابكر
Date: 08-06-2014, 08:07 PM
Parent: #43
نار الغربة كضاب البقدر يطفيها
ويا الفاضلابي..
الغربة كان بقت علي الحلو يبقى مر هينه
الغربة بتاكل العضم
يارب ترد المهاجرين والمسافرين
من البلود الا فيها بحر لا طين
|
Post: #45
Title: Re: المعاي منو ....؟؟
Author: رشا بابكر
Date: 08-06-2014, 08:21 PM
Parent: #44
قرية الطالباب الوديعة
والذكريات الحلوة
ونحن كل اسبوع في حله
لمة الداخلية الجميلة
مشيت الطالباب مرتين
وما بنسى رحلة البحر واللعب مع القرود
يا ســـلام
والقهوة مع بت القرشي
ناس معجونين بالمحنه ..
اخوي عبدالعزيز
والله هوى روحي ومناي في الدنيا اسو لي حوش كبير
وازرعو شدر ليمون وجوافة ونفسي ازرع لي شدرة ( أراك )
وفي نص الحوش ازرع الزهور وكل صباح اقوم اسقيها
لك التحية عبدالعزيز ولكل الأهل وصديقاتي العزيزات في الطالباب
|
Post: #46
Title: Re: المعاي منو ....؟؟
Author: الطيب شيقوق
Date: 08-07-2014, 06:40 AM
Parent: #45
وضاحة
Quote: وما معروف نحن شنو سودانين ولا قطرين ولا كندين ولا امريكان
ضاعت هويتنا يا رشا شوفتى الوجع النازف دا كيف |
يعني في انتخابات الرآسة عندك الحق تصوتي لإنتخابات رئيس اي دولة من الدول ديل ؟
طيب وكان كولهم انتخابتهم بقت في فد يوم واحد حتقطعي تلاتة تذاكر طيران عشان تمشي تمارسي حقك الديموقراطي في صندوق اي دولة ؟
|
Post: #47
Title: Re: المعاي منو ....؟؟
Author: رشا بابكر
Date: 08-07-2014, 07:53 AM
Parent: #46
لا لا يا ودشيقوق
وضاحة دي زولة حساسة وزوق
وبعدين وراها مسؤلية عمل
أنا بنصحها تشغل أغنية :
الصوت
الصوت يا جنى
الصوت أحلى من الموت يا جنى
وبي كده تكون صوتت
ومارست حقها الديمقراطي
وهي قاعدة في بيتها
|
Post: #48
Title: Re: المعاي منو ....؟؟
Author: الطيب شيقوق
Date: 08-07-2014, 08:02 AM
Parent: #47
Quote: وبي كده تكون صوتت
ومارست حقها الديمقراطي
وهي قاعدة في بيتها |
لا زولتك فالحة وتفتيحة يا رشا بتكون مفوضة ممثل عنها في كل دولة
|
Post: #49
Title: Re: المعاي منو ....؟؟
Author: عزالدين عباس الفحل
Date: 08-07-2014, 08:11 AM
Parent: #48
،،،، جاري وراء السراب مخدوع وضاع الزمن ،،،،
...
عزالدين عباس الفحل
ابوظبي
...
|
Post: #50
Title: Re: المعاي منو ....؟؟
Author: رشا بابكر
Date: 08-07-2014, 08:50 AM
Parent: #49
عز الدين أخوي
سبق الريح ده دربو طويل
في بدايتو بنكسر الضهر
وبخلي النص عقاب
الصورة دي بتخوف وضاحة
انا دايراها تجي اللبلد
وتسوي ليها بيت صغيير في حلتها إن كانت صعيد والا سافل
اها السايق نص الدينّا ده
تلقاهو مشغل البوري ويغني
....
لا السكة بيكى بتنتهى
ولا معاك ملّيت طواف
ياريتنى لو أقدر أطولك
وضاحة قولي متين نزولك
|
Post: #51
Title: Re: المعاي منو ....؟؟
Author: عزالدين عباس الفحل
Date: 08-07-2014, 09:10 AM
Parent: #50
رشا بابكر
...
ضـحـكـت بشراهـة ،
وبصوت عالي ،
لمن عشرقة لي الضحكة ،
وقربت أقع من الكرسي ،
تسلم الغالية ،
،،،،
...
Quote:
عز الدين أخوي
سبق الريح ده دربو طويل
في بدايتو بنكسر الضهر
وبخلي النص عقاب
الصورة دي بتخوف وضاحة
انا دايراها تجي اللبلد
وتسوي ليها بيت صغيير في حلتها إن كانت صعيد والا سافل
اها السايق نص الدينّا ده
تلقاهو مشغل البوري ويغني
....
لا السكة بيكى بتنتهى
ولا معاك ملّيت طواف
ياريتنى لو أقدر أطولك
وضاحة قولي متين نزولك
رشا بابكر
،،،،
...
|
عزالدين عباس الفحل
ابوظبي
...
|
Post: #52
Title: Re: المعاي منو ....؟؟
Author: عبدالعزيز الفاضلابى
Date: 08-07-2014, 03:44 PM
Parent: #51
| Quote: لا زولتك فالحة وتفتيحة يا رشا بتكون مفوضة ممثل عنها في كل دولة |
الملكة مفوضة ودعمها ـ في الـ US إنت امرق منها يمرق جِلدك زي مابتمرق قشرة العنكوليب.
|
Post: #53
Title: Re: المعاي منو ....؟؟
Author: الطيب شيقوق
Date: 08-07-2014, 04:47 PM
Parent: #52
| Quote: الملكة مفوضة ودعمها ـ في الـ US إنت امرق منها يمرق جِلدك زي مابتمرق قشرة العنكوليب. |
تتلصقوا سااااااااااي في الخواجيات
تكون عشمان تتطلع إغاثة لاهلك الغمرتم الامطار ديل
|
Post: #54
Title: Re: المعاي منو ....؟؟
Author: رشا بابكر
Date: 08-07-2014, 05:59 PM
Parent: #51
وش الخرتوم ...
البلمع كلو ماهو دهب ..
الناس القالوا معاي
ديل ناس العرجا لي مراحا ..
ناس الضفر ما بمرق من اللحم
والـ ايدو في المويه ما زي الـ ايدو في النار
أها سكنت الخرتوم ..
بسم الله نبدا
بس طولو بالكم
صباحاتو بُيُض
في يوم عطلتك .. سبت وجمعة
وأنت ممدد وغرقان في نومك
يجيك الصوت المطرّق
وهاك يانبيح ......................... خُرد ~~~~ خُرد ~~~~ خُرد
بطارياااات .. حديد ... حديد
وياخد ليهو وقفة جمب العمود الجمب بيتك
زي التقول قاصدك ... حسادة ساي
وتقعد تتململ زي القارصاك باعوضة عميا
ويفوت بتاع الخُرد ويقطع طاريهو
.....
وتعاود النومة ده يوم راحتك وأنت مبطل
وما تلحق إلا ويجيك أبو الألحان
لا تعرفو نم .. ولادوباي .. ولا غُنا
والله دي مصيبة الزول في بيتو ما يرتاح !!!!!!
وهاك يا صياح ....لا وبالمكرفون ( استحداث .. مواكبة للعصر وكدى )
الخدار ..... الخدار
انتبه : دار ما الخدار الغنا ليهو عبدالرحمن الريح .... خداري البي حالي ماهو داري
ده خدارن علي ضهر ح م ا ر وحنطور
ويبدا الوصف (حسب الأولوية في اهمية الخدار)
الطماطم
الليمون
البطاطس
الجرجير
الرجلة
الخُدرا
.........
وتتفزع .. وتطفر .. وتقرررب تكفّت روحك
عندك حل ؟؟
وفي عز زهجتك وقطعة نومتك
يدق الباب ... جرس الباب .. المهم
يتهيئ ليك ده سيد الخدار وتجري جري وتسعل الله يكون هو شان تفش مغستك
وتفتح الباب .. وعينك تشوف النور
تلقى قدامك واحدة كاربه طِريحتها
وتسلم عليك
معليش ..... رسوم النفايات ... ههههه
وتمسك اعصابك وتمشيها ..
يا الله صباح خير .. دي بلد شنو دي الزول مايرتاح
التقيل قدام .....
شاي المغرب السمح المجيه
ما بتريد لبن البودرة
بتشربو باللبن الحليب
وسيد اللبن جا ..... مرقت لي زهرا ...
لبن شايك يا العشا .. بجيك مستورد .. بلحيل مستورد
اي شي بجي من بعيد بسمى مستورد
براميل تتطاقش من حر الشمس
والحنطور بسابق في الريح .. حفظ دربو ومفتّح
وقطعة كبري المنشية زي قطعتو لي حواشة 5 فدان
وبالحسبة المسافة من الزرائب لي وسط الخرتوم ما أقل من ساعة
ويجي سيد اللبن ... يدق الباب .. وتشيلو الوليه علي المطبخ وتختو في الناروشوية
وتسمع الكوراك ... سجمي اللبن اتقطّع ..!!
نان البحمي يتقطّع شنو ... اكان ماعونو برميل بلاستيك .. وتحت شمس الله الحاره دي يقرررب يطمح ..!!!
المافي شنو ..
الخدار في السوق المركزي : راقد هبطرش ونضييف ( بتغسّل بي موية المجاري ) شوف عيني
الطعمية : في الشارع دخانها بكاوي في دخان عوادم العربات
الرغيف البلدي : طاعم وسمح .. علا ضارباهو العجاجة وهو في الكارو مردوم
عافيتك ما بتلعب بيها وبتشرب موية الصحة ؟
والله مردومه ردم في البقالات بس اسعل سيد البقالة .. باقة الموية ليها كم اسبوع في الشمس
وما تنسى تسعلو من ..البارد ( من بيبسي وكولا .. وميرندا .. لمن تشوف لونها بقى زي لون موية المطرة
ونواصل ...
|
Post: #55
Title: Re: المعاي منو ....؟؟
Author: عبدالعزيز الفاضلابى
Date: 08-07-2014, 06:12 PM
Parent: #54
| Quote: تكون عشمان تتطلع إغاثة لاهلك الغمرتم الامطار ديل |
تغمر في 14 قول امين
الغمران فضلة خيركن يا ناس الصعيد
دي ذكرتني ياشيقا ـ الناس كانوا محربسين فوق البحر
راجين بنطون الفاضلاب ـ واتنين كانوا بي يتبايعوا في حـ مار
سيد الحـ مار يزعم إن حـ ماره صغير السن (تني)
المشتري دَخَّل اصابع إيدو في خشم الحـ مار وقال لي سيد الحمار
حُـ مارك ده رُباع مو تَني.
سيد الحـُ مار قالُّو : كيف تقول الحـ مار مو تَني؟
بي تغالتني؟ أنا ود الـ حمير.
يلا يارشا يا كحيل ـ وكت اصلك بهلتي الذكريات
خلينا نِتنخج في بوستك ده ـ علا وكت المسنوح
ده بِقي يزازي بي هنا الله يستر ـ شيق امرق تمرق فطيس..
هيييييييع انا الرضعان فوق الخُلال ...
|
Post: #56
Title: Re: المعاي منو ....؟؟
Author: عبدالعزيز عثمان
Date: 08-07-2014, 06:12 PM
Parent: #54
|
Post: #57
Title: Re: المعاي منو ....؟؟
Author: عبدالعزيز عثمان
Date: 08-07-2014, 06:14 PM
Parent: #56
|
Post: #58
Title: Re: المعاي منو ....؟؟
Author: عبدالعزيز الفاضلابى
Date: 08-07-2014, 06:28 PM
Parent: #57
Quote: شاي المغرب السمح المجيه
ما بتريد لبن البودرة
بتشربو باللبن الحليب |
بِت عمي يارشا ابوها جاء يشرب شاي المغرب مع وليداتو
بنته الوسطانية مستعجلة ومتسربعة عشان تلحق المسلسل
قومي يالفالحة الفحي علبة الويكة المسحونة قايلها علبة السكر
وطَعِّمي الشاي بالويكة ـ ابوها راجل ظريف جداً عليه رحمة الله
كَبَّ الشاي نزل من الـ بَرَّاد خِيوت خِيوت ـ عِرف الموضوع.
كورك لها: ثريااااا ما كَبِّيتي ليهو شَـ ر مـ وط؟
|
Post: #59
Title: Re: المعاي منو ....؟؟
Author: رشا بابكر
Date: 08-07-2014, 06:50 PM
Parent: #58
يا الفاضلابي
سو عوسك وكب الفي مخلايتك
والله البوست العوج رقبتي ده
الخلاني فتحتو حبي للحله
الغربة بتقسي القلب
وكفانا هم
قول وامرق الفي بطنك
ومافي زولا بحنكلك
والله يدينا العافية ويتم المراد
................
والله يا عبدالعزيز
مناظر تنسي الهم
يا ســـلام
اها دي حلالن بتنفات..!!
مالنا ومال حراق الروح
شكرا كبيرة هدية سمحة
|
Post: #60
Title: Re: المعاي منو ....؟؟
Author: الطيب شيقوق
Date: 08-07-2014, 08:08 PM
Parent: #59
Quote: تغمر في 14 قول امين
الغمران فضلة خيركن يا ناس الصعيد
دي ذكرتني ياشيقا ـ الناس كانوا محربسين فوق البحر
راجين بنطون الفاضلاب ـ واتنين كانوا بي يتبايعوا في حـ مار
سيد الحـ مار يزعم إن حـ ماره صغير السن (تني)
المشتري دَخَّل اصابع إيدو في خشم الحـ مار وقال لي سيد الحمار
حُـ مارك ده رُباع مو تَني.
سيد الحـُ مار قالُّو : كيف تقول الحـ مار مو تَني؟
بي تغالتني؟ أنا ود الـ حمير.
يلا يارشا يا كحيل ـ وكت اصلك بهلتي الذكريات
خلينا نِتنخج في بوستك ده ـ علا وكت المسنوح
ده بِقي يزازي بي هنا الله يستر ـ شيق امرق تمرق فطيس..
هيييييييع انا الرضعان فوق الخُلال ... |
اها يا رشا وقت المسنوح دا جاء يباري بهنا دا طرفنا من بوستيك
بقيت آفة عدييييييييل كدا
خليت ود المنسي يتلفت واتلهمتني بجاي ؟
عييييييييييييييك
|
Post: #61
Title: Re: المعاي منو ....؟؟
Author: رشا بابكر
Date: 08-08-2014, 09:43 AM
Parent: #60
التعديل .. لي لخبطة حصلت .. للأسف
|
Post: #62
Title: Re: المعاي منو ....؟؟
Author: رشا بابكر
Date: 08-08-2014, 10:28 AM
Parent: #61
الصباحات البهيه
في الضواحي
وفي القُرى الراقدات نواحي
شقُ نص الليل بريقن
خلى فجر الحِله صاحي
ورعّدت وقبليها زرقن
والمطر عمّ المناحي
...
وقام سماعين ود منور
صحى ابوهو
لقاهو صاحي
وقالو امرق للطواري
النشوف خبر المجاري
قالو يابا الحله غرقت
كشم ابوه وفيهو بحّلق
قالو آزول أتا اهوج
نحن في الحِله السواري
ونحن للسيل الكباري
أت نسيت وبقيت مطرطش
نحن من الضهاري
قوم وشيل طوريتك الكع
وافزع فريق علي والعشاري
...
دي النترة
وعُقبا الطرفة
مطرن بدورلو رجال
( عندما تصبح الحِله .. أسرة واحدة )
ونواصل ..
|
Post: #63
Title: Re: المعاي منو ....؟؟
Author: د.محمد بابكر
Date: 08-08-2014, 10:49 PM
Parent: #45
اختنا رشا
احمد الله انا ما بعتبر نفسى ود بندر ..نحن من الذين يتهمون باسترياف المدن ورغما عن(النضارات) والبناطلين والقمصان الا ان الايجابى فى حياة اهل الريف يتملكنا ونَحِنُّ اليه..اضافة الى ماقال حُميد فاننى استمسك ايضا بما قال الحلنقى:
مهما طال ياشوق غيابنا وليل دموعنا
برضه راجعين للديار الحلوه تفرح برجوعنا
يفرشوا الحبان رموشُم فوق دروبنا
والاماسى الضايعه بتعود برجوعنا
لك التحايا ولنتضرع لرب العزه لاجل عودة كريمه ولوطن كريم..
|
Post: #64
Title: Re: المعاي منو ....؟؟
Author: رشا بابكر
Date: 08-09-2014, 09:31 AM
Parent: #63
شيخنا الكريم / د محمد بابكر
والله أنتو الساس وأنتو الراس
افندية الريف
تربية الجدول والطورية
القراية في حنتوب وخورطقت ووادي سيدنا
لا قروكم خاص ولا قطعتوا الراس
شقيتو درب العلم غُبش وملحلحين
وبقيتو في راس المناصب والمساطب
افندية ... ولاد الغبش المزارعية
شربتو موية البير
واكلتو العصيدة بي لبن
ويا دكتور .. الصُرتو مدفونة في الحِله
ارضن (ظلت) ما بتتمشي ليهو
وبسعل الله كل غايب تسهل جيتو ويعوض الفات من عمرو
|
Post: #65
Title: Re: المعاي منو ....؟؟
Author: الطيب شيقوق
Date: 08-09-2014, 12:32 PM
Parent: #64
| Quote: التعديل .. لي لخبطة حصلت .. للأسف |
دي امانة و نزاهة ناس الضهاري هلا هلا
واحدين يصوطوا ويعدلوا سااااااااي دون تقديم أسباب لذلك
|
Post: #66
Title: Re: المعاي منو ....؟؟
Author: رشا بابكر
Date: 08-09-2014, 05:02 PM
Parent: #65
الطيب اخوي
نحن اهلنا اول ما بقينا نعرف الكلام وننضم قالو لينا
اوعكم تكضبوا البكضب بودوهو النار ولانا عارفين النار دي ياتو نار
النار الوحيدة الكنا بنخاف منها نار الطابونة هههه
وكنا ونحن بنلعب لو واحدة كضبت
كلنا بنكوكرك فيها ... ما تكضبي هوي .. الكضب حرام والموت لي قدام
وما عندنا شيتن بندسدسو ولا نضاري
طيبين وسمحين وقلوبنا زي اللبن الحليب
بس الزمن اب وشن شين ده بقى الكضب فيهو مبرمج
الله يدي العافية
|
|