(عيدية) الحكومه للقوي الاجماع هي الاعتداء (الوحشي علي طلاب المؤتمر السوداني)!

البارحه في الليله الاخيره قبل رمضان
والدنيا قبايل عيد وفي زمن التقوي و الصلوات
كان صعاليك المؤتمر الوطني يتربصون بشباب صغار نحيلين البنيه
اهلكتهم الخرطوم بتجبرها وعنجهيتها….وبطشها….شباب صغار
عرفتهم معتقلاتها البائسه و عنف جلاديها….لم تمنحهم الدولة و ظائف
وصادرت احلامهم مثل اغلب شباب السودان!
الدوله لا تعرف ماذا ياكلون او ماذا يشربون او كيف صاموا رمضان!!
او اين يقيمون؟!

فكل هذا ليس من اختصاصات الدوله

لكن من اختصاصاتها ان تعرف من يساهر ليلا ليخيط جراحات الوطن
ومن يفقد اخوته ببقية اصقاع السودان؟!
ومن يكتب عن المعتقلين ظلما بسجونها البشعه!!

جاءت ثلاثه عرابات بها قرابة ال 12 (ملثما) وقفزوا من منزل الجيران!!
ليهاجموا 6 من شباب الموءتمر السوداني العزل.

وضربوا حتي فقد اغلبهم الوعي
وتركوا نازفين بعد ان نهبوا كل ممتلكاتهم!!


موضوع نهب الموبايلات

ونهب اللابتوبات

ونهب ملاليهم

و (التلثيم) كل هذا يدل انهم نفس المعتدين علي عثمان ميرغني

ونفس المعتدين علي كل بقاع السودان.

انها سلوكيات الجنجويد هذا العنف المبالغ فيه تجاه البشر….

ومن احزان طلاب المؤتمر السوداني كالعاده انهم حتي ليس عثمان ميرغني

فهم مجرد نكرات

هم اولاد غبش لا يعرفهم احد ولا يحفظ اسمائهم احد!!

ولا يتعاطف معهم احد…..


الشاب عيسي زين احد عضوية هذا الموقع معهم

جراحه نازفه والله اعلم اي اترجاج في المخ قد حدث له او لرفاقه





اللهم ارنا عدلك فيهم
اللهم الذين روعوا الامهات
وجلعوا مثل هذه الاخبار هي ما تردهم يوم الوقفه بدلا عن اصوات صغارهم تملأ اذنهم فرحة ودعاء.

ارنا فيهم عدلك يا رب.
اليوم قبل غدا.

بكره العيد يا معارضه

وخلونا من خلافاتكم

وانتم تفكرون في العيد

تذكروا بان هنالك شباب جرحي ويحتاجون صور اشعه و علاج

وتذكروا بانه لا هواتف لهم حتي تطمأنوا عليهم بها من خلالها.

فالتيحرك الجميع من اجل علاج هؤلاء الشباب

وتعويضهم

موبايلاتهم

ولابتوب باتهم.



انهم كانوا هنالك عزلا باسمنا

كانوا هنالك يخطون اللافتات لامسكياتكم السياسيه الكاربه

كانوا هنالك….والان لوحدهم….التحيه لعضوية المؤتمر السوداني التي تسندهم

ولكنه جهدا يجب ان يكون جماعي.

Quote: اهلكتهم الخرطوم بتجبرها وعنجهيتها….وبطشها….شباب صغار عرفتهم معتقلاتها البائسه و عنف جلاديها….لم تمنحهم الدولة و ظائف وصادرت احلامهم مثل اغلب شباب السودان!

هؤلاء هم الشباب الذي قتلت أحلامهم الإنقاذ وأضاعت مستقبلهم

صاروا يهيمون علي وجههم في الصحاري وفي عرض البحار،،

يموتون غرقا أو تنهش أحشائهم عصابات مجرمة


وفي خرطومهم توسعهم عصابات الإنقاذ ضربا وترويعا


ولكنهم صامدون حتي القصاص من هذه العصابة المجرمة...

نقول للمعارضة كل سنة وإنتو طيبين


لك خالص التحايا يا تراجي....

يا تراجى..

خدمة بسيطة كدى تقيفى قدامها ألف أحمر؟
طيب ورينى بيعملوها كيف وأنا أحل عنك..

عيد سعيد لك وللعيال وللسودانيين فى كل مكان..

حتي متي يا سيف ونحن اعيادنا تجدنا مسمرين لكي بوردتاتنا؟!

حتي متي و اخبار اهلنا كلها تنكيل ومذابح وقمع وبطش؟!

اللهم ارفع البلاء عن شعبنا……

Quote: هؤلاء هم الشباب الذي قتلت أحلامهم الإنقاذ وأضاعت مستقبلهم صاروا يهيمون علي وجههم في الصحاري وفي عرض البحار،، يموتون غرقا أو تنهش أحشائهم عصابات مجرمة وفي خرطومهم توسعهم عصابات الإنقاذ ضربا وترويعا ولكنهم صامدون حتي القصاص من هذه العصابة المجرمة... نقول للمعارضة كل سنة وإنتو طيبين لك خالص التحايا يا تراجي....

تسلم اخي سيف و هذا اقل و اجب تجاههم ان نوثق لمن يبطش بهم و نلوم من يتجاهل جراحهم.

تقدر تقول لي المعارضه غايبه ليه؟! حتي عن بوستات الشجب و الادانه؟!

فالنتحزم يا سيف في موضوع تعويضات موبيلاتهم علي الاقل

فبدونا لن يتمكنوا حتي من طلب العون من اقربائهم و اصدقائهم.

لهلم المجد….ولنا الصبر.


عيد مبارك عليك و علي اسرتك.

الحبيبه نور تاور


عيدك مبارك

وانا عارفه رمضان دخل العضم و طلع بهناك هههههه لكن ما قدر ده

حسه انت وليداتنا ديل ما اتذكرتي تقولي كلمة حق بشانهم مالك مشغوله قدر ده:

Quote: يا تراجى.. خدمة بسيطة كدى تقيفى قدامها ألف أحمر؟ طيب ورينى بيعملوها كيف وأنا أحل عنك.. عيد سعيد لك وللعيال وللسودانيين فى كل مكان..

افصحي و عارفانا ما بنقصر.

لبيك…تدللي…زي ما بقولوا….

تراجى..
سلام..

عيالنا ديل وجعى عليهم غلبنى أكتب كلمة وآحدة..
لآنى أتذكرتهم لما كنا بنعمل مؤتمرات الحزب الليبرالى فى دارهم..
شباب زى الورد..
ومؤدبين ومحترمين..
ومكتوين بالشأن السودانى زى أى واحد مسحوق فى مناطق القتال..
وبعد دا كله تلاقيهم مهمومين بالسودان...
وبحزب المؤتمر السودانى....
وبالاحزاب التانية...
رغم الظروف القاهرة العايشين فيها..
يعنى لو مشيتى تعملى عندهم مؤتمر..
بيقوموا هم بالخدمة كلها..
وما على المؤتمرين الا يقولوا كلامهم..

العيال ديل...
قلبى وآجعنى عليهم شديد...
وألاكتر من الوجع زاتو...
أنه الملهاة والماساة بتاعة الانقاذ دى..
ما باين ليها آخر..

وأخ يا زمن..
قّلبتى على المواجع..
ماظهر منها وما بطن..

وعلى العموم..
أكرر...
كل عام والجميع بخير..
والله يفك كربتهم وكربة البلد كلها..

يا هم ذاتهم يا نور

كما قلتي عنهم

سند كل الاحزاب وشوفي التجاهل اللقوها اليوم من المعارضه

وشوفي الهليله العملتها المعارضه علي عثمان ميرغني

عرفتي نحن شعب جزمه فعلا!! ونستحق الضرب بالجزم

Quote: تراجى.. سلام.. عيالنا ديل وجعى عليهم غلبنى أكتب كلمة وآحدة.. لآنى أتذكرتهم لما كنا بنعمل مؤتمرات الحزب الليبرالى فى دارهم.. شباب زى الورد.. ومؤدبين ومحترمين.. ومكتوين بالشأن السودانى زى أى واحد مسحوق فى مناطق القتال.. وبعد دا كله تلاقيهم مهمومين بالسودان... وبحزب المؤتمر السودانى.... وبالاحزاب التانية... رغم الظروف القاهرة العايشين فيها.. يعنى لو مشيتى تعملى عندهم مؤتمر.. بيقوموا هم بالخدمة كلها.. وما على المؤتمرين الا يقولوا كلامهم.. العيال ديل... قلبى وآجعنى عليهم شديد... وألاكتر من الوجع زاتو... أنه الملهاة والماساة بتاعة الانقاذ دى.. ما باين ليها آخر.. وأخ يا زمن.. قّلبتى على المواجع.. ماظهر منها وما بطن.. وعلى العموم.. أكرر... كل عام والجميع بخير.. والله يفك كربتهم وكربة البلد كلها..

مساكين يا نور

تخيلي حتي اسمائهم لا يحفظها احد!!

هم مجرد ارقام….!!

لانهم ابناء الغبش!!

رغم و فائهم و صمودهم

يظلوا اراقم بذاكرة الصفوة المنحطه!

العيال ديل يا نور حتي تلفوناتهم قلعوها…..!!

البعوضهم منو يا ربي؟!

لهم الله!!

تراجى سلام...

أنا جيت تانى لانه موضوع العيال دا وآجعنى جد بالجد..
أتذكرت أنهم ما عندهم أدنى مقومات العيش الكريم..
يعنى فى حر الخرطوم الانتى بتعرفيها دى..
ماعندهم حتى تلاجه صغيره..
ولا مراوح..
ولا بوتاجاز...
بيشربوا من الماسورة!

والعفش الجايبينه فى الصور دا بيوضح ليكى كل حاجة..
الشباب ديل تعاينى للواحد..
تشوفى الجوع فى وشه..
وتشوفيه أكبر من عمره بسنين..
و الواحد زى صوت العنج من الضعفه..
ولا بيشتكوا..
ولا بيفضفضوا...
بل العكس..
بيبتسموا ليك بكل براءه..
وينفذوا ليك شغلك..
ويمشوا لحالهم..

يا اخ السودان دا اذل ابنائه وبناته..
ذله ما أنزل الله بها من سلطان..
وكمية القهر المخزونة جوة الشباب السودانى...
تفّجر الكون كله..

وبعد دا كله..
زى ما تفضلتى..
مافى حتى زول عارف اسمائهم..
ارقام وسقطت فى الزحام..
شفتى الماساة والملهاة السودانية دى حّدها وين؟

ناس الانقاذ ديل...
لو جمعوهم كلهم..
وفرموهم فى مفرمة لحمة ثلاثية القوة...
برضوا ما بيكفينى فيهم..
حسبى الله فيهم ونعم الوكيل..

اعرفهم يا نور

واعرف انك لم تقولي الا الحق عنهم

لذا انا حزينه لاجلهم….غلبني الصمت يا نور عديل …..

Quote: تراجى سلام... أنا جيت تانى لانه موضوع العيال دا وآجعنى جد بالجد.. أتذكرت أنهم ما عندهم أدنى مقومات العيش الكريم.. يعنى فى حر الخرطوم الانتى بتعرفيها دى.. ماعندهم حتى تلاجه صغيره.. ولا مراوح.. ولا بوتاجاز... بيشربوا من الماسورة! والعفش الجايبينه فى الصور دا بيوضح ليكى كل حاجة.. الشباب ديل تعاينى للواحد.. تشوفى الجوع فى وشه.. وتشوفيه أكبر من عمره بسنين.. و الواحد زى صوت العنج من الضعفه.. ولا بيشتكوا.. ولا بيفضفضوا... بل العكس.. بيبتسموا ليك بكل براءه.. وينفذوا ليك شغلك.. ويمشوا لحالهم.. يا اخ السودان دا اذل ابنائه وبناته.. ذله ما أنزل الله بها من سلطان.. وكمية القهر المخزونة جوة الشباب السودانى... تفّجر الكون كله.. وبعد دا كله.. زى ما تفضلتى.. مافى حتى زول عارف اسمائهم.. ارقام وسقطت فى الزحام.. شفتى الماساة والملهاة السودانية دى حّدها وين؟ ناس الانقاذ ديل... لو جمعوهم كلهم.. وفرموهم فى مفرمة لحمة ثلاثية القوة... برضوا ما بيكفينى فيهم.. حسبى الله فيهم ونعم الوكيل..

السؤال….لماذا هذا البؤس… ولماذا…ولماذا….وكلام كثير مرات لما بقوله الناس بتزعل.

لكن اكيد حنقوله يوما ما.

شكرا للشهاده التي سجلتيها.

عن ظروفهم وتضحياتهم.

ربنا يحفظهم لشبابهم.

الحبيبة \ تراجي .. وضيوفكم الافاضل ..

كل عام وانتم والوطن والشعب المنكوب بالف خير .

كالعادة عيد خالي من الفرح . الله يورينا في الكيزان عاجلآ غير اجلآ عظمة جلالو وقدرتو .

تسلمي الهميمه مني

وكل عام و انت بخير

وكما قلت لم يتركوا للفرح متسعا….

Quote: الحبيبة \ تراجي .. وضيوفكم الافاضل .. كل عام وانتم والوطن والشعب المنكوب بالف خير . كالعادة عيد خالي من الفرح . الله يورينا في الكيزان عاجلآ غير اجلآ عظمة جلالو وقدرتو .

امين يا رب اللهم ورينا فيهم عدلك.

شكراً أم حازم وكل سنة وانت بخير
شفتي الجبن والخوف من المصير؟
الحكومة بقت تتلثم وتنكل بالمعارضين
وتكذب وكالعادة تتنصل عن المسئولية.


يوم الحساب سيأتي قريبا

الحبيبة \ تراجي .. وضيوفكم الافاضل ..

كل عام وانتم والوطن والشعب المنكوب بالف خير .

كالعادة عيد خالي من الفرح . الله يورينا في الكيزان عاجلآ غير اجلآ عظمة جلالو وقدرتو .