جانا وفات ولا هببناهو (حنين الى الماضي القريب )

الرحمتات

تقبل الله من الجميع الصيام والقيام وغفر لكم ذنوبكم ووسع رزقكم

ونسأله أن يمن بنعمة الامن والسلام على اهلنا في المناطق المنكوبة وكل السودان



.....................................


ماشي في شوارع الفيس دقش عيني كلام ابن اختي خالد خسرو واتذكرت انو الليلة ده ياهو اليوم الكنا بنتمناهو في كل رمضان

Quote: Khaled Eltyb Abdalla زي الوكت ده كده او ابدر شوية في يوم الخميس الاخير من شهر رمضان المعظم شفع كل فريق كانو بتلمو براهم و بكونوا مكونيين حملة رحمتاتية قوية مصحوية بشعارات القضية و كل الافكار المشروعه و الغير مشروعه كمان ( نشرق ولا نغرب نفوت ولا نقوت ) منظر عجيب : كل بيوت الحلة تخرج الصدقات ، كل يما يستطيع ، و لا تسعفني الذاكرة لاقدم التفاصيل لان اخر مره حضرت فيها الحدث كانت قبل 22 سنه في حاجتين ما عارفهم ، اول حاجه : ما عارف موضوع الرحمتات ده جا من وين اذا كان في التسمية او الموضوع او الاهداف ؟ و الحكاية دي في فترة طفولتنا ما كانت موجوده في المدن الكبيرة ، لكن نشطه جدا في القرى و المدن الصغيرة الليله الرحمتات يا ناااااااس يا ربي في ناس لسه بعملو الرحمتات ولا اندثرت ثم لم يبقى منها اثر ؟ UnlikeU

نسبة لشمول الفقر والحال المائل كان اللحم من الرفاهيات في القرى او (قريتنا) على وجه الدقه . نباتيون قسراً او ممكن نسميه (عدم ميول لاكل اللحوم عموماً)

يوم الخميس بجوا ناس الخرطوم الشغالين هناك والضيوف الدايرين المهلة في (الصي ) هيلنا . والعيد بين الاهل والاحباب

من نص النهار بتمشي (الزريبة الله يكرم القراء) وبتمسك اقرب (عنبلوك ) او (حميل) وبتضبح والناس الما عندها (بهائم) بتتشارك خروف او تيس وعودي وعودك
واي زول بشيل كوم هيل لحم يمتع بيه اولادو ويجيهبو صينية فطورو.


مثل كثيرين ما عارف التسمية جاية من وين ولا بتعني شنو بس ده يوم الناس بتاكل فيه لحم والاكل بكون اكتر من الايام العادية




وسؤالي كما سؤال ابن اختي ياربي في ناس (رحمتت) الليلة ؟؟