Post: #1
Title: ايها العلمانيون جاء العيد و هل تخبزون؟
Author: سيف النصر محي الدين
Date: 07-22-2014, 11:51 PM
مما يبدو أن عمل الكعك و البسكويت استعدادا لعيد الفطر عادة اتتنا متسللة مع غيرها عبر حدودنا الشمالية من
ما كانت تعرف في زمن سابق بالشقيقة الكبرى (مصر) . و لا اعرف سبب اعتبار مصر شقيقة كبرى و لا المعايير
التي استند عليها القوم في تحديد هذه التراتبية، مساحة نحن كنا - و لا زلنا- اكبر منها مساحة. و لو لاعتبارات التاريخ
و الحضارة فنحن برضو ما ساهلين لو وثقنا في انفسنا شوية. المهم يقال أن الفاطميين هم من عمل على انتشار هذه العادة
في مصر خلال فترة دولتهم ، و الفاطميون هم من احتفلوا بالمولد بالطريقة التي يحتفل به فيها المصريين و السودانيين
و يقال أن الأيوبيين خلال محاولتهم القضاء على جميع ارث الفاطميين من تشيع و خلافه ابقوا على مسألة الكعك
هذه لغرض في أنفسهم. و هناك من يقول أن الكعك ضارب بجذوره في مصر لدرجة أن بعضه قد وجد موضوعا
في المدافن مع المومياءات.
مهما يكن موسم الخبيز كان من المواسم الجميلة جدا بكل طقوسه من حجز للصواني من الفرن إلى مراقبة الامهات
و الخالات و هن يخبزن إلى حمل الصواني للفرن و العودة بها. و للأسف ما أن يبلغ الولد منا العمر الذي يحب فيه
أن يذهب للفرن لاغراض أخرى غير الخبيز نفسه مثل أن ينظر لفلانة أو يمني نفسه بابتسامة من علانة إلا و يتم ابعاده
من طاقم العمل.
سنرجع ببعض الذكريات الخبيزية كان الله هون.
|
Post: #2
Title: Re: ايها العلمانيون جاء العيد و هل تخبزون؟
Author: خالد العبيد
Date: 07-23-2014, 01:36 AM
Parent: #1
سلام يا سيف
كعك العيد من اهم ملامح العيد في السودان
والفراعنة اول من عرف صناعة الكعك في المناسبات كذلك عرفته الدولة الفاطمية
اكيد لكل منا ذكريات حميمة مع صينية الكعك وانت ذاهب بها الى الفرن
وفي بعض الاحيان في الرجعة تكون شايل صينية شخص آخر ويلزموك في البيت باعادتها
على ان تفتح عينك جيدا وتحضر الصينية التي ذهبت بها ويذكروك بان بها وسم لونو اخدر
|
Post: #3
Title: Re: ايها العلمانيون جاء العيد و هل تخبزون؟
Author: Ahmed Alim
Date: 07-23-2014, 01:45 AM
Parent: #2
ابوالسيوف سلامات وكل سنة انت وكل المسلمين والعلمانيين والملاحدة زي ما عاوزين :)
أولاً: لا بأس أن يخبز العلماني طالما كانت نيته للخبيز سليمة ، وعليه يجوز له أن يخبز مع الكراهه ،، والله أعلم.
بعدين أجدادك القدماء كانوا بيقولوا على كميت (مصر) إبنتنا الكبرى ماعارف ليه هسي
بقوها شقيقة وكبرى كمان :)
الخبيز الله لا تكسبه ياما إدقينا بسببه لمن كنا صغار، لاننا كنا بناكل نص البسكويت والكعك
في المسافة الصغيرة بين الفرن والبيت 
لكن بعد دا كلوا مازال يعتبر من أجمل عاداتنا.. تحياتي
|
Post: #4
Title: Re: ايها العلمانيون جاء العيد و هل تخبزون؟
Author: Deng
Date: 07-23-2014, 02:18 AM
Parent: #3
الأخ سيف النصر.
شنو يا حبيب مركب مكنة الكوز الدومة حنظل ولا أيه؟؟
كل سنة وأنت طيب.
|
Post: #5
Title: Re: ايها العلمانيون جاء العيد و هل تخبزون؟
Author: عبدالعزيز عثمان
Date: 07-23-2014, 02:38 AM
Parent: #4
ونخبز،،ونسو الليلية بي طاراتها..وينشد جدي صالح،ويدق خالي بخيت نوبته..
نصلي العيد في الساحة،ونمرق نعافي امواتنا ،
ونجي نبارك ونعافي الحلة جت
نقالد الامات والجارات وبنيات الفريق
نطلب العفو والسماح...ونشربو شربوتناوالله من خشم سيدنا،،قال حلال،خسوسا يوم العيد،قالو معني المقالة كاتب السيات بنوم .
وكل علماني بي لوحو...
وكل شئ بي دربو...
وعيد اتبارك عليك يابه ،ات والمعاك
|
Post: #6
Title: Re: ايها العلمانيون جاء العيد و هل تخبزون؟
Author: تبارك شيخ الدين جبريل
Date: 07-23-2014, 03:15 AM
Parent: #5
عبدالعزيز عثمان دا من ما حبوبتو انجذبت وقطعت المالح طالعة فوق قصبة وفاردة توبها شراع لغاية ما مرقتها في الأراضي المقدسة وحجّت قبال ما يعملوا السكة حديد ... هو فارق درب العلمانية تب ... وسحبنا أوراق اعتمادو واعتبرناهو تبع جماعة شيخ محمد المصطفى عبدالقادر ...
بالنسبة للعيد والخبيز فنحن العلمانيين نحرّمه على بني كجة ... والله من وراء القصد ...
والله دا بوست فيه من رائحة بوبلين جلاليب العيد المختلطة برائحة زيت ماكينة الترزي وبقايا نكهة الخبيز ....
كل سنة وانتو طيبين ...
... المهم ....
|
Post: #7
Title: Re: ايها العلمانيون جاء العيد و هل تخبزون؟
Author: الدومة ادريس حنظل
Date: 07-23-2014, 04:00 AM
Parent: #6
الاخ العزيز سيف النصر السلام عليكم رمضان كريم تصوم وتفطر على خير وكل سنة وانت طيب وجميع المسلمين ؛ يا اخى ديل يخبزوا شنو؟؟ ويخبزون لشنو زاتوا؟؟ العيد للمسلمون الصائمون!!!!!!!!!!!!!!!!!!!
|
Post: #8
Title: Re: ايها العلمانيون جاء العيد و هل تخبزون؟
Author: خالد العبيد
Date: 07-23-2014, 04:19 AM
Parent: #7
العيد للمسلمون الصائمون!!!!!!!!!!!!!!!!!!!
---------------------------
الدومة انت قريت وين؟
حصة العربي كنت بتقيل وين ؟
تكتب هكذا : العيد للمسلمين الصائمين ...
يا بليد
|
Post: #9
Title: Re: ايها العلمانيون جاء العيد و هل تخبزون؟
Author: عبدالعزيز عثمان
Date: 07-23-2014, 04:55 AM
Parent: #8
هسع اتبارك اخوي،وحبيبي،،صاحبي غابرييل غارسيا ،طير البنية فر،،وانام ماكندو قرونا،،وجعل من بائعة الفرح قديسة بي مرسوم،يبقي امير العلم والعلمانية،،وعبدالعزيز عشان تربال،شرب الموية بي دغلوبه،،وخمج الطين لموية القموح،في ليالي الصقط والقرة،،ركب الحمار المكادي،ونشل بالدلو في العد،مرقتو حمام حبوبتو خرافة..اتو الفانتازيا دي الا تجيكم من وراء البحار حتي تعتمدوها...
بعدين يا الحبيب اللطيف،،تعرف نحن عندنا عشم ناسنا الليلين الطارات والاذكار ،ديل اهون واسمح واسهل ناس يمشو معانا حجل بي الرجل حيث مشرع الحلم الفسيح،ومركز الضؤ،حيث ينتصر العلم والوعي والخير،،بلا اقصاء لاحد...
هي العلمانية دي اكان عندها سيد الاقول انا...
انا اظن فلاح فقير،اخذ زرعه باسباب العلم والجد،وخمج الطين ليعلم ولده ،بني المدرسة والشفخانة والمحكمة،،،وانشد اذكاره وقرا لوحه،،هو سيدها،،
وله النشيد...
معليش يا د سيف،،يقينا بسماحتك وكرمك،،سحنا في ساحتك السمحة دي،،اكان ما رضيت بنمسحها...
|
Post: #10
Title: Re: ايها العلمانيون جاء العيد و هل تخبزون؟
Author: فردوس جامع
Date: 07-23-2014, 04:55 AM
Parent: #8
سلامات د. سيف و كل عام و أنتم بخير و خابزين :)
جابتني ريحة الخبيز
الكافور موجود و مكنة و بوصة 8 محمولة جواً...
إتفضلوا معانا.
تحياتي.
|
Post: #11
Title: Re: ايها العلمانيون جاء العيد و هل تخبزون؟
Author: قصي محمد عبدالله
Date: 07-23-2014, 05:30 AM
Parent: #10
سلام للجميع:
| Quote: ايها العلمانيون جاء العيد و هل تخبزون؟ |
من وجهة نظري أن أمر الخبيز( سواء كان صناعة منزلية أو شراء من السوق) يعود إلى الحالة الإقتصادية للأسرة،
ليس له علاقة بديانة أو لون سياسي، لا من بعيد ولا من قريب، بغض النظر عن المناسبة.
تحياتي للجميع،
وكل عام والجميع بخير.
|
Post: #12
Title: Re: ايها العلمانيون جاء العيد و هل تخبزون؟
Author: عبداللطيف حسن علي
Date: 07-23-2014, 07:05 AM
Parent: #11
د. سيف النصر وضيوفه : سلام
حكاية الصينية البمشوا بيها الفرن دي جات لاحقا ...
كانوا النسوان بعملوا الخبيز في البيت
يضعوا فحم في طشت بفوق وصينية الخبيز بتحت ، وتحت برضو في فحم
| Quote: ايها العلمانيون جاء العيد و هل تخبزون؟ |
عجبني مجاراة الدومة في كتابتو الغلط ! وهل تخبزون بدلا عن فهل تخبزون !!
|
Post: #13
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-23-2014, 10:46 AM
Parent: #12
سلام يا خالد و كل عام و انتم بخير
ذكرتني حكاية الوسم الذي يميز كل صينية عما سواها
كميات الصواني بتكون مهولة و الحلة كلها غالبا بتكون في الفرن
و أمهاتنا ما شاء الله عليهن لا تفوتهن شاردة و لا واردة.
|
Post: #14
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-23-2014, 10:55 AM
Parent: #13
احمد يا عالم العيد يتبارك عليك
هل كميت تعني الابنة الكبرى من وجهة نظرنا نحن النوبيين؟
شايف في "برازرس" هنا في امريكا متبنين حكاية كميت دي و عاملنها
بلدهم و بحاولوا يحتكروا تراثها باعتبارو تراث أفريقي يخص القارة الافريقية
كلها.. يا ريت خبيزنا العلماني ده يجيب بشاشا لأنو يتخيل لي عندو علاقة
مع الجماعة ديل.
|
Post: #15
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-23-2014, 10:58 AM
Parent: #14
دينق كل سنة و انت طيب
الدومة ذاتو مركب مكنة المؤتمر الشعبي دي مع انها مكنة مبوشة ساكت
|
Post: #16
Title: Re: ايها العلمانيون جاء العيد و هل تخبزون؟
Author: هشام عباس
Date: 07-23-2014, 11:05 AM
Parent: #15
هو اساسا عنوان البوست كاتلنى بالضحك
لكن الفينى كملت لما وصلت لمداخلة اخونا قصى
Quote: من وجهة نظري أن أمر الخبيز( سواء كان صناعة منزلية أو شراء من السوق) يعود إلى الحالة الإقتصادية للأسرة،
ليس له علاقة بديانة أو لون سياسي، لا من بعيد ولا من قريب، بغض النظر عن المناسبة. |
فرج الله كربكم ياخى نسيتونا خرمة السجاير
|
Post: #17
Title: Re: ايها العلمانيون جاء العيد و هل تخبزون؟
Author: هشام عباس
Date: 07-23-2014, 11:08 AM
Parent: #16
وانى اعلن من هنا ان
الدومة ادريس حنظل
والشيخ قصى
من ثروات هذا المنبر العظيم والمحافظة عليهما جهاد فى سبيل الله
|
Post: #18
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-23-2014, 11:47 AM
Parent: #17
يا سلام يا عبد العزيز عثمان
عيدك سعيد و كل سنة و انتو طيبين ياخي
كالعادة نجحت في رسم لوحة علمانية رائعة للعيد و الخبيز و كافة طقوس العيد
يبتهج فيها الجميع على قدم المساواة لا يفرق بينهم في مشهد العيد لا نوع و لا جنس
و لا عرق بل لا حياة و لا ممات فالجميع حضور.
|
Post: #19
Title: Re: ايها العلمانيون جاء العيد و هل تخبزون؟
Author: ahmedona
Date: 07-23-2014, 12:12 PM
Parent: #18
علاقة العلمانيين بالعيد شنو يا دكتور سيف النصر ......
أليس هناك إجاز للعيد -- وتتعطل مصالح الدولة ---
والعلمانيين يدعون لفصل الدين عن الدولة والعيد من أمور الدين ....
|
Post: #20
Title: Re: ايها العلمانيون جاء العيد و هل تخبزون؟
Author: Osman M Salih
Date: 07-23-2014, 12:59 PM
Parent: #8
سلامات ياأخي خالد العبيد،
ماصاح منك تصف أخينا الكريم الدومة ادريس حنظل بالبلادة، لأنو في آخر التحليل مافي زول بليد. في معوقات بتقطع مسار المعرفة، وفي عدم تساوي للفرص بين الناس مما يجعلهم طبقات وعشان دا الواحد قلبو واجعو ممايراه من تفاوت مقيت وملت يسار عشان أساهم مع حركة الطبقة العاملة في إزالة المعوّقات والظروف البنيوية النابعة من الملكية الخاصة لوسائل الإنتاج ، البتنتج عدم المساواة بين البشر.
|
Post: #21
Title: Re: ايها العلمانيون جاء العيد و هل تخبزون؟
Author: Bashasha
Date: 07-23-2014, 03:25 PM
Parent: #20
Quote: و لا اعرف سبب اعتبار مصر شقيقة كبرى و لا المعايير
التي استند عليها القوم في تحديد هذه التراتبية، مساحة نحن كنا - و لا زلنا- اكبر منها مساحة. |
سيف ياعزيزي،
خت حبة رحمان في قلبك:
"كمت" اي مصر، نعم هي ابنتنا الكبري، وفيما قبلنا مافي بشر ختا فيها كراع اطلاقا بل كانت تحت الماء وهذه شهادة اجدادنا!
لذلك حكامها وبطول وعرض قرابة ال3,000 سنة من الاسرة الاولي وحتي الاسري 25 كانو سودانيين صر!
بنقول سودانيين لانو الكل ذهب الي هناك من السودان الحالي!
نعم مع فارق بسيط:
بعض هؤلاء الملوك والملكات كانو من منطقة اسوان الحالية اللي كانت العاصمة الفعلية علي مدار قرابة ال3,000، والبعض الاخر ذهبو الي ابنتنا الكبري كملوك من السودان الحالي!
يازول الجيش الوحد كمت واسس حضارتا علي مستوي الدولة كان من جنوب السودان الحالي، والفرعون الاول، تقول تفو ياهو الاب فيليب عباس غبوش!!
نعم والي سقوط عرش مصر تحت حافر خيول الغزاة الاجانب، مصريي اليوم من احفاد الهكسوس الحاليين، بالله ما شمو عرش كمت ولاقدحة!
عمرهم مافي ولاقرد واحد منهم اعتلي عرش ابنتنا الكبري اطلاقا، فما تسمع الجخ ده، فهؤلاء احفاد الهكسوس وافدين واجانب!
نعم فقط عندما خسر المارد والاسطورة ترهاقا الذي حكم حتي جنوب اوربا، اخر معاركو، والتوارة ذاخرة بسيرة هذا الفذ، حتين اصبحو امثال السيسي او حسني، هيكل او ناصر هم المصريين حصرا او بالصورة الشايفنها اليوم!
اها كلام الطير ده، اخوك ليو فيهو فقط اجر المناولة لاغير!
نعم اهلي او تاج راس كل سوداني، افارقة امريكا هم العملموني كلام الطير بتاعي ده، في هذا الفضاء، فالمجد لهم!
اها نسيت اقول ليك، كمت الاسم الحقيقي الاصلي لي ابنتنا الكبري "مصر" بالعربي معناها "سودان" عديل كده والمفردة هيروغلوفية!
اها بي مناسبة هيروغلوفية، فاعلم ان هذه اللغة وكاي شئ اخر في ارث ابنتنا الكبري "كمت" هاجرت الي هناك من السودان الحالي!
اها او بعد ده كلو او لانو النار تخرا الرماد تعال شوف احفاد اباء البشرية ومؤسسي اول حضارة علي سطح هذا الكوكب بسوو في شنو من فرط الخجلة، التعري، والجك من الاصل السوداني الرقيع، زي فهموهم اولياء نغمة وعي العبودية!
في الدنيا ام قدود يعتلي عرش امثال ABA اول فرعون، او تحتمس اعظم واشهر الفراعنة، بعانخي الاسطورة، وترهاقا، واحد زي العوقة البشير! قالو الدنيا بتهينك، والزمان يورك!
يا لعارنا بحق، ولكن كيف ما كنتم يولي عليكم! العوقة البشير يمثل حالنا كلنا حقيقة او مقطوع من شدرة!
|
Post: #22
Title: Re: ايها العلمانيون جاء العيد و هل تخبزون؟
Author: Bashasha
Date: 07-23-2014, 04:03 PM
Parent: #21
Quote: شايف في "برازرس" هنا في امريكا متبنين حكاية كميت دي و عاملنها
بلدهم و بحاولوا يحتكروا تراثها باعتبارو تراث أفريقي يخص القارة الافريقية |
نعم ياسيف، السودان هو موطن ومهد اي سوداني بي معني بلاك اين ما كان في هذا الكون وهذه حقيقة تاريخية!
نعم كل شعوب القارة السوداء تجمع في تقاليدها المروية، انو السودان المروي هو موطن اجدادم وهذه حقيقة، ليس من السهل فبركتا، وهذا مذهل لانو مطابق لي كلام اخر قالوهو اجدادنا السودانيين منذ قرابة ال2,000 سنة من تاريخ اليوم:
نعم اجدادنا قالو احنا نبتنا من تربة هذا السودان ولم ناتي من اي مكان اخر، بل قدمو شرح ومعالجة "علمية" بي لغة اليوم للاغريقي النقل الكلام ده! بل اضافو انهم اول الخلق!!
نعم لهذا الخواجات في الزمن دااااااك امنو انو السودان المروي هو بالفعل مهد البشرية!
اها علي كده، نجد مفردة آدم او حوا، مفردات سودانية خالصة، لغة!
لاحظو في السودان الخواجات وبذات خبثهم وبذكاء يحسدون عليه، قدرو يحشو امخاخنا، انو التاريخ ده خاص بي قبيلتين او ربما تلاتة في السودان:
1) المحس، 2) الحلفاويين، وربما الدناقلة!!!
عييييييييييك!
وهذا المفهوم الان يمثل كارثة حقيقيىة وقنبلة حرب اهلية اخري ثقافية، ستنفجر!
فتحة خشمك الجماعة ديل يقولو ليك "حضارة كرمة" او هم ماعندهم ادني فكرة عن المقصود من هذه الحيلة الماكرة الجهنمية والعبقرية اللتي برع فيها الخواجات بحق!
ياهداك امون، فراعنة مصر عن بكرة ابيهم كانو سودانيين، تقول لي حضارة كرمة؟
ياخي الله يصرف الخواجات، علي قول حميد!!
نعم دهاقنة البروفسيرات في السودان بيلهطو في الصارقيلة دي بتاعة مايسمي زورا ب"حضارة كرمة" او هم ما عندهم ادني فكرة انو الشئ ده، "جبادة"!
عيييييييك!
حقيقة احترم ولا املك غير الاحترام لما اروق، عبقرية الخواجات، او هم استلمو الراية من بعدنا بعد مافازو علينا 1/0 في دوري الحضارات او شالو الكاس، ليرتادو الكواكب الاخري بعد ما اخضعو كوكب الارض لي سلطانم، لانهم بالحق مؤهلين!!
اذن ما بي شيتين ساهل الناس ديل قلعو الكاس مننا في المقام الاول!!
|
Post: #23
Title: Re: ايها العلمانيون جاء العيد و هل تخبزون؟
Author: هشام عوض الكريم
Date: 07-23-2014, 10:05 PM
Parent: #22
|
Post: #24
Title: Re: ايها العلمانيون جاء العيد و هل تخبزون؟
Author: محمد حيدر المشرف
Date: 07-23-2014, 10:15 PM
Parent: #23
Quote: حكاية الصينية البمشوا بيها الفرن دي جات لاحقا ...
|
بس نحنا "لاحقا" دي ذاتها :)
|
Post: #25
Title: Re: ايها العلمانيون جاء العيد و هل تخبزون؟
Author: Ahmed Alim
Date: 07-23-2014, 11:54 PM
Parent: #24
Quote: هل كميت تعني الابنة الكبرى من وجهة نظرنا نحن النوبيين؟
شايف في "برازرس" هنا في امريكا متبنين حكاية كميت دي و عاملنها
بلدهم و بحاولوا يحتكروا تراثها باعتبارو تراث أفريقي يخص القارة الافريقية
كلها.. يا ريت خبيزنا العلماني ده يجيب بشاشا لأنو يتخيل لي عندو علاقة
مع الجماعة ديل. |
ويتبارك عليك وعلى الأسرة يا دكتور سيف..
كلامك صحيح أحنا أكبر حجماً لكن المصاروة مصرين يخلونا شقيقة صغرى!
وبعدين كلام الفرعون بشاشا صحيح وأتفق معاهو برغم انوا هو من الصعب يتفق معاي 
تضييق الواسعة وحصر كل الحضارات القديمة في أهلنا النوبة فقط كذبة بلغاء وهدفها
الأساسي مش بس زرع فتنة وخلافه ولكن لأنوا الخواجات ديل عاوزين يشاركونا فيها و
عشان كدا مطلعننا نحن أولاد عمهم ههههههه
الجماعة ديل بقولوا أنوا النوبة عرقياً ما نقرويد وهم أصلاً هجين "أفروكوكيشان" 
عشان ما ممكن الحضارات العظيمة في كميت والسودان تكون إنتاج جينات أفريقية بحتة!
والعبقرية الفذة الكانت فيهم بسبب تداخل جينيات الكوكيشان في دمائهم، وبكدا يا عمك
إنت في نورس كارولينا وبقلب مطمئن ممكن تكتب في خانة العرق كوكيشان (نص كلتش)
Quote:
أيها العلمانيون جاء العيد فهل تخبزون؟
لا فلا وقت لدينا للخبيز وتجهيز الرحمتات
ففي ليلة العيد تطلق الشياطين من الأصفاد
فنجمع بأيدينا الرماد
ونلف الخضروات
ونحتسي المشروبات
ونجتنب الشبهات إلى الأكيدات
حتى رمضان القادم أو الممات |
مداخلة أخونا هشام فايف إستارز :)
| Quote: حكاية الصينية البمشوا بيها الفرن دي جات لاحقا ... |
والله يا ود المشرف المداخلة دي أدتني إحساس زيك باني سغيروني خالص 
]
التحية ليك ولبشاشا وجميع المشاركين وكل سنة والجميع بخير..
|
Post: #26
Title: Re: ايها العلمانيون جاء العيد و هل تخبزون؟
Author: عبدالمنعم الطيب حسن
Date: 07-24-2014, 00:11 AM
Parent: #24
باعتبارنا علمانيين، ريفيين، حكاية الصينية بتاعة الفرن دي ما شفناها،
ممكن تكون جاءت لاحقة، في العشرين سنة الاخيرة دي....
لكن ايام طفولتنا كنا، نحس ان هنالك حركة خبيز في البيوت، في ريحة مختلفة،
ريحة البيض مع العجين، مع البهارات، مع الباكنبودر...
واخواتنا الكبار وبنات الجيران، وسهرة الليلة عندنا وبكرة عند جيران تانيين،
ونيران تولع، وشوية يطلع الخبيز ونضوقوا، مرة، مرتين،
وتُحفظ الكمية الاكبر منه، لمقبل الايام....
وتاني يوم الخبيز ممكن عادي نشرب شاي الصباح -كاطفال غير صائمين*-ومعاها خبيزتين، تلاتة....
............................................................................................................
أول صباح العيد تصحى امي باكرا جدا، تسوي لقيمات- لم اتذوق مثل حلاوة طعمها ابدا لاحقا-
ياخ كبيرة وهشة ومقرمشة، صحيتنا من النوم، ممكن نمصمص خشمنا بموية بس، حكاية المسواك ما متاكد منه،
-لاحقا ممكن- وطوالي على الصاج من نارا، وتغمسا في مسحوق السكر القريب، وتاخد ليك حبتين تلات،
وربما اربع،
وتتحرك ليس بعيدا ويكون الشاي قد جهز، ومعاهو داك يا الصحن المليان لقيمات،
نقيف تيوة، وبعد داك نستحِم، ونذهب للعيد وتلك قصة اخرى.....
يوم العيد الاول ما فيهوخبيز؛ مع شاي الصباح؛ اللقيمات حاضرة، واذا حضرت اللقيمات بطل الخبيز...
لاحقا تمتليء بطوننا من خبيز الحلة، وجيوبنا حلاوة...
مع العيد مبروك عليكم...
اها يا جماعة كلكم، علمانيين، وتانيين، العيد مبروك عليكم...
..............................................................................
* اول صيام رسمي لي كان في تالتة متوسطة، هسع محمد ولدي في خامسة وصام معظم ايام هذا الشهر،
|
Post: #27
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-24-2014, 01:02 AM
Parent: #26
Quote: الكافور موجود و مكنة و بوصة 8 محمولة جواً...
إتفضلوا معانا. |
فردوس كل سنة و انتم طيبين
لو اصريتي كمان حبة بنختف رجلنا و نجي نشارككم الخبيز ..كلها ساعة و نص ههههه.
|
Post: #28
Title: Re: ايها العلمانيون جاء العيد و هل تخبزون؟
Author: سيف النصر محي الدين
Date: 07-24-2014, 01:12 AM
Parent: #27
| Quote: بالنسبة للعيد والخبيز فنحن العلمانيين نحرّمه على بني كجة ... والله من وراء القصد |
تبارك عيدك مبارك
بني كجة أخر عهدي بهم وجدتهم يتفننون غاية التفنن في حكاية الخبيز دي.
مش زمان كان نوعين بس..كعك و بسكويت، ثم بعد شوية ظهروا ناس السعودية و جابوا معاهم بتاعة البتي فور داك و للا اسمو شنو ما عارف
ثم انو بعض الناس المفلهمين شوية او العندهم علاقة بي مصر كانو بعملوا غريبة و حاجات كده؟
هسي يا زول الشي بقى اشكال و الوان، لما يجيبوا ليك تتحير ذاتك تشيل شنو و للا تخلي شنو و البنيات اصبحن يستفدن من منتجات العلمانية
كالانترنت و العياذ بالله و السوشيال ميديا و لا حول و لا قوة الا بالله ليتعلمن وصفات جديدة و ليتبادلن الخبرات.
|
Post: #29
Title: Re: ايها العلمانيون جاء العيد و هل تخبزون؟
Author: الدومة ادريس حنظل
Date: 07-24-2014, 03:37 AM
Parent: #8
خالد العبيد نعم حقيقة العبيد مشو ياعبيد فهمت يا قرك الناكة التحتانى يا دحش موت بغيظك
|
Post: #30
Title: Re: ايها العلمانيون جاء العيد و هل تخبزون؟
Author: Muhib
Date: 07-24-2014, 03:58 AM
Parent: #29
انا مسيحي ولو لقت طريقه بخبز ... الخبيز وطقوسه من اجمل الاشياء في السودان ..
|
Post: #31
Title: Re: ايها العلمانيون جاء العيد و هل تخبزون؟
Author: معاوية الزبير
Date: 07-24-2014, 04:26 AM
Parent: #30
| Quote: * اول صيام رسمي لي كان في تالتة متوسطة، هسع محمد ولدي في خامسة وصام معظم ايام هذا الشهر، |
وأنا أول مرة صمت كان في أولى وسطى
جاء واحد قريبنا العصر لقاني ميت من العطش، قالي والله لما تكبر ويبقى عليك واجب، تندم ندم على الأيام الصمتها دي
تحياتي يا عبد المنعم
انت يا دكتور سيف النصر ايه حكاية العلمانية والشيوعية القايمه في المنبر اليومين دي،، بعد شويه يجيك واحد يقوليك: وهل تتبولون؟
|
Post: #32
Title: Re: ايها العلمانيون جاء العيد و هل تخبزون؟
Author: Ahmed Alim
Date: 07-24-2014, 04:51 AM
Parent: #30
كتب الأديب عثمان محمد صالح،
| Quote: ماصاح منك تصف أخينا الكريم الدومة ادريس حنظل بالبلادة، لأنو في آخر التحليل مافي زول بليد. في معوقات بتقطع مسار المعرفة، وفي عدم تساوي للفرص بين الناس مما يجعلهم طبقات وعشان دا الواحد قلبو واجعو ممايراه من تفاوت مقيت |
حتى عتابك جميل مثلك.. شكراً سالهنتود فلولا مداخلتك أعلاه لما إنتبهت لمداخلة ودالعبيد.. أوافقك بالكامل فيما كتبت، لأنوا مهما كانت درجة الإختلاف مع الآخر الزول بقدر مستطاعه بحاول إنوا ما ينساق أو يبادر بإساءة مخالفيه في الرآي.
كتب: الاخ الدومة إدريس حنظل:
| Quote: خالد العبيد نعم حقيقة العبيد مشو ياعبيد فهمت يا قرك الناكة التحتانى يا دحش موت بغيظك |
ياخونا الدومة برغم إني بالجد ما فاهم الكلام الفوق دا معناتوا شنوا الا بعد عبارة يا دحش، لكن شكلوا نبذ :)
الدنيا قبايل عيد وياريت إنت وودالعبيد تمسحوا الكلام الشين.
|
Post: #33
Title: Re: ايها العلمانيون جاء العيد و هل تخبزون؟
Author: جمال ود القوز
Date: 07-24-2014, 09:55 AM
Parent: #32
من نشم ريحة الخبيز طاقه في الحلة ..
تلقانا لابتين في زقاق مضلم ..
راجين الشفع القصار الشايلين صواني الخبيز ..
وجايين من الفرن ..
ومن يعدي الشافع من قدامنا نقوم بالراحة نلقط كرعينا وراهو ..
ونشيل من الخبيز وناكل ..
اها زولنا ده لمن يصل البيت يلقى الصينية فيها أقل من الربع ..
الا مرات كده بيكون الشافع مفتح يحس بالحركة التي تدب في الصينية ..
التي يحملها فوق رأسه ..
يقوم الشافع المسلط ده يقول كدي يطق الكواريك والعروروكـ ..
والله الا يمرقننا كرعينا ديل ..
وهاكـ يااااا ... جرررررري ..
وهكذا كنا زمان نعيد وناكل خبيز العيد ..
حق الجيران قبال العيد ما يجي ذااتو ..
حليل زمن خبيز الفرن ...
ليهو وحشه والله ..
من وجهة نظري الشخصية ..
الخبيز ما عنده علاقة بالدين ..
لكن الأكيده عنده علاقة بالدقيق والسمنة ..
ماااا .. ماااا .. بالسمنة وكده يأخ ... .....
|
Post: #34
Title: Re: ايها العلمانيون جاء العيد و هل تخبزون؟
Author: عثمان عبد الوهاب العامري
Date: 07-24-2014, 10:09 AM
Parent: #33
كيف لا أخوى سيف .. ألا أن أرضها من ذهب ... وهى أخت بلادي وشقيقية كمان
كل عام وانت رأفل فى الترف الغربى .. تحياتى بلا جدود
|
Post: #35
Title: Re: ايها العلمانيون جاء العيد و هل تخبزون؟
Author: Bashasha
Date: 07-24-2014, 05:05 PM
Parent: #34
Quote: كل الحضارات القديمة في أهلنا النوبة فقط كذبة بلغاء وهدفها
الأساسي مش بس زرع فتنة وخلافه ولكن لأنوا الخواجات ديل عاوزين يشاركونا فيها وعشان كدا مطلعننا نحن أولاد عمهم ههههههه |
احمد عالم مشتاقين،
نعم هناك مدرسة كاملة داخل مدرسة المركزية الاوربية برزت في عشرينات القرن الماضي، بتقول النوبيين خواجات، اي اولاد بيضة عديل كده يا للعجب بحق!
عييييييييييك!
اسمع الكلام ده سر ما تقولو لي جماعتنا ناس عزام!
الواحد يكاد لايصدق الاساليب العجيبة الاتبعوها الخواجات في تلفيق تاريخنا، بغرض التكويش عليهو، والانكأ والامر كيف الي اليوم ناسنا حملة القاب دكتوراة او بروفسر، في السودان لسة فاتحين خشومم الاتملا ضبان، او بسمعو في خبث ومكر الخواجات، بي سذاجة لانحسد عليها، والسبب كالمعتاد عقدة الخواجة!!
نعم مفهوم حاميين المنتشر في السودان، كتعريف لي سكان شرق افريقيا بعامة، بغرض ضرب افارقة غرب افريقيا، يرجع لذات المدرسة دي، اللي لقت دي اسهل طريقة لادعاء اصل اري اي ابيض لحضارة كمت "مصر" القديمة!
لاحظ فرية الاصل الحامي مقصود بيها في الاساس اغتيال وابادة الذنوج بي فهمهم هم للمفردة اي نموذج انسان غرب افريقيا وجنوبها، باعتبارم مركب نوح فاتتم، او بالتالي مامعروف ذاتو اولاد الحرام ديل "غرابة" افريقيا ديل جو من وين، كما انتبه للكلام ده العلامة واستاذي كانسلر وليامز، اروع من كتب عن دنقلا، اللي زار السودان ايام ناس بشير وعبود، وقد اساؤو كالعادة معاملته للاسف الشديد، وهذا ترك ظلال في كتابتو عن امثالنا من الشماليين!!
لاحظ رئيس جمعية الدراسات النوبية الحالي واحد فرنسي!!
عيييك!
اها والجاي في السنة دي في الغالب يكون واحد سويسري!
اما اهلنا من افارقة امريكا او حتي افريقيا، فيشموها قدحة!!!
|
Post: #36
Title: Re: ايها العلمانيون جاء العيد و هل تخبزون؟
Author: الصادق اسماعيل
Date: 07-24-2014, 06:14 PM
Parent: #35
Quote: نعم مفهوم حاميين المنتشر في السودان، كتعريف لي سكان شرق افريقيا بعامة، بغرض ضرب افارقة غرب افريقيا، يرجع لذات المدرسة دي، اللي لقت دي اسهل طريقة لادعاء اصل اري اي ابيض لحضارة كمت "مصر" القديمة!
|
بشاشا
سلام
هسع خلاص الـ DNA حسم الموضوع دا وبقى الأبيض ولا الاسود ولا الخضر كلهم اولاد آدم السوداني الأفريقي وهو العاش في منطقة وسط افريقيا دي.
من هنا ورايح ما في زول حيقول لأانه لوني أنا متفوق، كلكم اولاد آدم الأفريقي دا شئتم أم أبيتم.
|
Post: #37
Title: Re: ايها العلمانيون جاء العيد و هل تخبزون؟
Author: عبدالمنعم الطيب حسن
Date: 07-25-2014, 00:24 AM
Parent: #36
| Quote: قالي والله لما تكبر ويبقى عليك واجب، تندم ندم على الأيام الصمتها دي |
لاحقا، ربما اولى ثانوي، او تانية... كنا نصوم وشغالين طُلَبْ، البنيان في رمضان يبدأ بدري وما فيها اي تكلات، زي للفطور والشاي النصت نهار والعصائر،
شدا واحد قدح المونة فوق راسك او شائل الطوب وتساسق بالدريب الجاي بجنب ملطم المونة،
وبعد نهاية الشغل ؛ جري البحر، ونغتس غتسة واحدة، ونرجع مع الفطور، ونشرب موية بس، وناكل لاحقا...
الحاجة المستغرب ليها لا يوم الليلة دا، الكان جابرنا شنوذاتو....
...........................
معاوية الزبير سلام وتحية...
|
Post: #38
Title: Re: ايها العلمانيون جاء العيد و هل تخبزون؟
Author: Osman Musa
Date: 07-25-2014, 00:31 AM
Parent: #1
يا سيف
وهل صار خبيز الكعك عند ه رجس من عمل الشيطان ؟
|
Post: #39
Title: Re: ايها العلمانيون جاء العيد و هل تخبزون؟
Author: فردوس جامع
Date: 07-25-2014, 08:01 AM
Parent: #38
Quote:
فردوس كل سنة و انتم طيبين
لو اصريتي كمان حبة بنختف رجلنا و نجي نشارككم الخبيز ..كلها ساعة و نص ههههه |
يا د.سيف نحن لا قينكم و ين...
أها إصرار شديد اللهجة على قول النكتة من البورد و بالتلفون كمان إن شاء الله.
تحياتي لي عرفة.
|
|