لو نيمار شديد كان شفنا ضحكة خجوووله ... وقصيدة مجاراه

ليه ياكروز تبكيهو الغزال الشارد(قصيدة)-توجد صورة
ليه ياكروز تبكيهو الغزال الشارد
برازيلية قدرها فى الثرى وعطارد
كان ما انت زول حقار ودمك بارد
ما بتقبل تشوف دمع العيون وتطارد
عيون كتالة لو شافن قبيلى كلوزا
ما بلعبلو تونى كروز واختها موزا
مقاعد السامبا وكتين للحسان محجوزة
شن خصانى فى المانيا وقضية فوزة
كان بى ايدى كل الكون اكون فى طوعن
والبكاء والنواح ما بنكتب لى نوعن
الشايلات ثمار البرتكان فى فروعن
نيمار كان شديد ما اكنا شفنا دموعن
وكتين قشت الدمع الملا النضارة
حسيت قعدتى وسندة قفايا خسارة
الما شالت الدوكة وبروها صغارة
ما تستاهل الدمعة البقت قطارة
ليه ياخديرة بتزود عليها جراحة
وتخلى اللؤلؤ اتقاطر على التفاحة
لو نيمار دخل بدرى ولقالو مساحة
كان شفنا ابتسامة وانشراح وسماحة
الشافعة التلووح للخلوق بى ايدة
كان عشمانة فى كورة ونتيجة سعيدة
لو شاف الحكم هادى الدموع فى خديدة
مفروض ارجى نيمار انجبر وإعيدة
يا المخرج اقيف واللقطة لى ما تعودة
وما بحمل اشوف سيل الدموع فى خدودة
بعد ما المانيا عملت ها العمائل السودة
كرهت المرسيدس و البورش والاسكودة
القصيدة إنتشرت في الفيس بووك إنتشار النار في الهشيم ولا أدري من هو مؤلفها .
وجدت هذه القصيدة مرسلة فى قرووب الدفعة 46 وأنا ماشى الخامسة صباحاً على الشغل وفى البص طلعت ورقتى وقلمى وقلت :
مكن المانيا دوّور ومسخ عليينا الكووورة
كييف خلى الحسان حال الشراهو جرورة
وقف فى السبعة والدفن التقووول مطمورة
بنات ساوباولو حزنانات.... زى العليهن بوورة
********************************
شوف حال الحسان والدموع مبهوووله
ويين ( نيمار ) حبييبن والجهود مبذووله
كان حال الدفاع حال الحرييم فى الفوله
ما شُفنا المهاره وما شُفنا أصلو رجووله
*********************************
مكن المانيا دوور واللعبة عرفو إصووله
ما رحمو الحسان ولا الدموووع ونزووله
ولو نيمار شديد كان شُفنا بسمه خجوله
لكن الظرووف دايماً........ هى ما مأمووله
**********************************
كل سودانى أصبح........ فى زعل مغبووون
وكل قرووبنا زعلان مع الاستاذ جمال صابون
يا المانيا يا المانيا بالغتى .... وعملتى فنووون
ياربى الكأس معاك .... أصبح عدييل مضموون ؟؟